رواية أعظم خيانة الفصل الرابع بقلم الزهيريه
#أعظم_خيانه
#البارت_الرابع
@بقلم الكاتبه الزهيرية الزهيرية
الأصيل يؤتمن في عداوته
اما قليل الاصل لا يؤتمن حتى في صداقته
ريماس / من نفقد شخص عزيز علينه ماكو احد يحس بحزنك حتى يجي يعزي عامةً يكون جاي على الاكل لانه أصلاً الميت ما يكون عزيز غير بس عند اهله وبعد فتره حتى اهله ينسوا وكأنه ما اجى لهاي الدنيا أني اكذب إذا اگول اكره أبويه احبه صح چان ضعيف الشخصيه ويه صفيه وما چان موفرلي حياة كريمه حالي حال اي بنيه بس شگد چانت تتعارك ويا صفيه في سبيل يذبني بملجئ أيتام
چان يرفض وبقى متمسك بيه وشگد چان يتحمل لسان صفيه السليط والتجاوز مالتها عليه بقاني عنده واني اعترف حنيته بكلام ما أشعر بيها بس بأفعاله احس اما آخر لحظاته بالمستشفى هاي باقيه مطبوعه بدماغي وما يوم نسيتها
وبعد ما رجعت صفيه من الدفنه وشي اكيد ما نسوي فاتحه لانه حالتنه ضعيفه اضافةً ما عدنه رجال يوگف بالفاتحه وأحنه معارفنه بس بالمنطقه واجتي النسوان سون الواجب وعزن صفيه بوفاة أبويه واكو وحده الظاهر ملايه ظلت تنعي وسوت ختمه وانتهى الأمر
بقى عليه انفذ وصية أبويه بس صفيه ما مر كم يوم على وفاة أبويه وگالتلي
صفيه/ يله شوكت تطلعين للشغل مو تدرين احنه ما عدنه مورد غير بس شغلچ
ريماس/ أبويه چنت اگدي بي مات الناس چانت تستعطف أبويه وتنطيني هسه منو ينطيني
صفيه / قابل كل المگادي إلا واحد معوق وياهم يله يگدون انتي ابچي وگولي جوعانه وياچ الوصفه مال العلاج همه الناس ينطوچ
ريماس / بس اني ابويه بالمستشفى وصاني اروح على اهله وأبقى يمهم ومأ ابقى يمچ
اني گتلها هيچ لو تخبلت لزمتني موتتني كتل وظلت تعيط يعلو صوتها
صفيه / الله يحرگك بگبرك سلام هسه صارت صفيه مو زينه خلف الله عليه تحملته الفگر ابن الفگر شوفي لچ ام الگمل تطلعين لشغل لو اكسر ايدچ ورجلچ واگعدچ گدامي وموضوع تروحين على اهل سلام الگواد تنسيها
ريماس / اني چنت هلكت من الضرب مالتها سكتت
ودفعتني قوي وهي تگلي ولي من خلقتي ومن باچر تطلعين للشغل ابتعدت عنها ورحت گعدت بالمطبخ وبذاك الوقت چان بعد اشهر وادخل بعمر 15 سنه
وعلى ثاني يوم سلمت امري لله الواحد القهار وطلعت للشغل وبوقتها اني چنت ادگ أبواب الناس واكو الچان ينطيني واكو لا لهذا چنت ما اطلع مبالغ زينه استمر الوضع شهر وصفيه بدت تتذمر وأنه الفلوس الي أجيبهن ما يكفن مصرف
واني من چنت اطلع اگدي كله ملثمه يعني بس عيوني طالعه وبيوم چنت راجعه وانطيت الفلوس الحصلتهن شافتهن لو تخبلت ولزمتني كتلتني وهي تگلي
صفيه / ادري الله انطاچ طابوگه بدامغچ اشوفين الگدايه من البيوت فلوسها مو زينه گدي من المحلات لطشتي بالبيوت اطلعي على المناطق الزينه شبيچ غبيه
ريماس / ما حچيت وياها شي اريد طريقه أخلص بيها منها ما اعرف وللمغرب دزتني على خبز من الفرن رحت جبت واني راجعه شفت وحده يگولوها ام رحاب وهاي ام رحاب جثيثه يعني الله لا يكذبني يمكن طولها 190 سم او اكثر اضافةً انه سمينه وهي تلبس عبايه على الراس وما تلبس جوها حجاب يعني نص شعرها طالع ودائماً صابغته لو اصفر لو احمر ومن تمشي ما تلزم العبايه وتلفها على جسمها لا تمشي وجسمها كله طالع بحيث حتى صدرها طالع وهي بيضه ودائماً تلبس اكثر من گلاده ذهب شنو شغل ام رحاب ما اعرف في حين ام رحاب ما عدها ولد عدها بس بنيه
اني من چنت جايبه الخبز فتت من يمها وعبرتها وما اسلم عليها لانه أصلاً ما اعرفها مشيت مسافه عنها وهي صاحت عليه وگفت باوعت عليها وگالت
ام رحاب / اگلچ انتي مو ريماس بنت الرجال المعوق المات قبل فتره
ريماس/ اي ليش
ام رحاب / يا مگموعه كبرانه ولچ بعد شلون عايشين بعد ما مات ابوچ
ريماس/ عايشين الحمدلله
ام رحاب / إذا تردين شغل اني اشغلچ
ريماس / لا حمدلله
وابتعدت عنها وقريب ما دى اوصل لبيتنه صاحت عليه جيرانه الي بصفنه وهاي علاقتنه قويه بيها وهم صاحت عليه وگالت / شفت ام رحاب تحچي وياچ شتريد منچ وحچيتلها كل الحچي الصار بيني وبين ام رحاب وهاي جارتنه اسمها ام زهراء وگالتلي
ام زهراء/ شوفي ريماس ام رحاب ابد لا تحچين وياها لانه شغلها مو تمام والناس من شوفچ واگفه تحچين وياها الناس الها الظاهر لهذا سمعتچ هم تروح بالرجلين
ريماس / اني حمد لله لا فهمت على ام رحاب ولا فهمت على ام زهراء وعلى ثاني يوم وسعت نشاطي بالگدايه صرت ما اروح على البيوت صرت افتر على محلات هنا فهمت الدنيا صح وهي انه اكو ناس تنطي لوجه الله واكو ناس ما تنطي إلا تاخذ مقابل
خلال فرتي على المحلات صاروا يساومنوني هو تعالي انام وياچ وانطيچ بصراحه اني كلمة انام وياچ ما افهم شنو معناتها بس اكو غزيره بالانسان انه هذا الشي غلط لهذا چنت ارفض وابتعد مسرعه عنه هيچ نماذج واكو مو بس محلات ينطوني اكو كذلك اصحاب سيارات يصيحني وينطيني لهذا چنت أرجع بمبالغ محترمه بس اني بعمري اريد وحده احچي وياها تفهمني واني بمراهقه
ومستحيل تكون هاي الوحده صفيه واني حتى اقارب ما عندي ولا صديقات حياتي كلها اطلع اگدي بالنهار ومن كثر الفره على المحلات والسيارات تعب يهد حيلي ارجع آكل وانام وبعدها اگد انظف البيت لانه صفيه ما بيها حيل
دخلت عمر 15 وبيوم مثل كل ايام حياتي اطلع للگدايه وچنت بمنطقه هاي اول مره ادخلها ما اعرفها بس مو بعيده على منطقتنه وبعد ما فتريت على محلات وما حصلت ذاك السعر الزين وچانت حدود الساعه 11 الصبح وصيف والحراره كلش عاليه صار گدامي بنچرچي بي ولد من شافني صاحلي اني عبالي راح ينطيني فلوس ومن تقربت گالي مبينه تعبانه ذاك براد روحي اشربي مي
جاوبته / انطيني انت اني واگفه هنا
ما حچى شي راح جاب مي وانطاني شربت بدون ما أبعد اللثام أسلوب الولد چان يحچي عادي وبهدوء رجع گال قبل شويه تريگت وبقى عندي صمون جبن تريدين لفه واضح عليچ جوعانه
وبالفعل چنت كلش جوعانه لانه اطلع بدون بدون ريوگ ولما ارجع يله اكل لهذا گتله يا ريت سويلي لفه
وبوقتها ألتفتت لشارع ما حسيت غير خله ايدعلى حلگي وأيد الثانيه على خصري وسحبني ارافس بي ما اگدر ايده مخليه على بطني اريد أبعدها اريد اخرمشه ما اگدر لانه لابسه چفوف دخلي لغرفة بيها براميل وشبه ظلمه لانه بيها گلوب واحد خافت وبعدها عاف خصري وسد الباب وايده الثانيه على حلگي
گال / ليش يوميه تفترين وتعبين وما تحصلين غير كم فلس تعالي يوميه ألي انام وياچ وانطيچ هواي فلوس ويجون يمي اصحاب سيارات هم ينامون وياچ وهم يدفعولچ فلوس ولا هاي البهذله
دفعته بكل قوتي ومن خوفي بقيت اعيط وهو اجى خله ايده على حلگي ويخنگ بيه حسيت روحي راح تطلع بيده
بيان / كل شي نحسب حسابه إلا وخصوصاً ويه الشخص الغدر بينه اما ثعلب يصير حمل وديع هاي ما صايره ولا تصدق بعد طلعت ابويه من السجن وبعد ما رحنه ندور على أغاريد وما لگيناها وبوقتها قربت ضربة امريكا للعراق والوضع مخربط والناس حايره تخزن مي والمواد الغذائيه تحسباً للحرب وبيوم احنه گاعدين دخلت سياره للمزرعه بيها امي وأغاريد وفي وقتها حتى عمامي وعوائلهم چانوا يمنه بالمزرعه بسبب قرب بدء الحرب
واحنه گاعدين بصالة البيت البداخل المزرعه من شفنه امي وأغاريد من نزلوا من السياره بوقتها عمي وسام گام وطلع الها
وسام / خير يا وجه الفگر شكو لافيه يمنه إذا جايبه أغاريد هنا عوفيها ورحي
حنان/ اني ما جايه عليك جايه احچي ويه سامي
وسام / هاااا عرفتي طلع واجيتي اكيد حتى ذبين بلاچ عليه مثل ذيچ المره ام زلم
حنان / سامي سامي اريد احچي وياك
بيان / امي من چانت تحچي بعلو صوتها گام ابويه واني طلعت ويا وابويه وگف ساكت گدامها
حنان/ اريد احچي وياك سامي وحدنه
وسام / لا احچي گدامنه حتى نكون شهود على الكلام
بيان / ومن شافت أبويه ما يحچي يعني موافق حچي عمي وسام بدت تتوسل انه هي ما عدها مكان تروحله وتريد ابويه يستضيفها بالمزرعه إلى ما شويه الأوضاع تهدئ
سامي / شنو ما عندچ مكان تروحيله املاكي انطيتهن الچ وينهن
حنان/ انت تعرف أبويه طلع عليه نقص بالدائره مالته وچان لازم أبيعهن وكلهن بعتهن حتى ابويه باع بيته والفلوس ما كفن
وسام / ليش ابوچ شگد خامط من الدوله وتعالي يا نقص غير ابوچ حرامي وهو بايگهن واني بعد ما انتي سجنتي سامي رحت بلغت على ابوچ وخليتكم شكو فلس أخذتوا من سامي زعتوا انتي كل عقلچ تسجنين اخويه الچبير وحزام ظهري واعوفچ رب العالمين شگد عادل سجنتوا سامي وابوچ هم نسجن ومات وانگبر بالسجن وانتي ظليتي تهرمين ورا عبالچ كل شي ما اعرف عنچ
بيان / ظلت صافنه بوجه عمي وسام لا تبث ولا تستلم
بس رجع عمي وسام انطاها المفاجأه الاخيره من گاللها اي حنان زوجچ وينه الظاهر ما تدرين بعد ما ديحچ واكيد إيجار البيت خلص وفلستي بعد ماكو احد يصرف عليچ و رجعت تبوس قنادر
هي هنا تخبلت وظلت تحلف ما خلت لا الله ولا قران ولا اهل بيت ما حلفت بيهم انه هي ما مزوجه
وسام / تحبين باچر اجيبلچ نسخه من عقد زواجچ من محكمة بغداد الجديده
هنا بعد ما عدها اي كلام تگوله ظلت بس تتوسل انه تبقى إلى ما تهدئ الأوضاع ودبر امرها
سامي / اني ما عندي شي يمچ غير بس أغاريد وهاي بنتي وما اسمحلچ تأخذيها هسه لو يصير كاتل ومكتول اما انتي حالياً مره غريبه علينه شلون تگعدين ويانه حتى حرام عليچ وعلينه زوجچ أولى بيچ من عدنه
وسام / شعجب صار سنين من طلگتي وهاي هسه اجيتي ابد ما فكرتي تسألين على ابنچ بيان صار رجال حگه زواج
بيان / وهي من فشلتها التفتت عليه وگالت تعال ماما بيان تهون عليك امك ابد ما تجي عليه
اني ظليت واگف وما اهتميت الها ابد وهي كأنه ما شوفني رجعت تكمل كلامها وتتوسل بس ابويه رفض وما قبل بس صاح أغاريد انه تدخل جوه وأغاريد ما قبلت وظلت حاضنه امي
بوقتها طلعت بيبي وگالت لابويه ولعمامي/ يمه احنه داخلين على حرب ما نعرف راح نبقى احياء لو اموات الخير سووا رب العالمين يرده الكم مضاعف واعتبروها غريبه مستطرقه ونختكم خلوها لما الحرب تفض وترجع لزوجها
وشگد اعترض عمي وسام بس بيبي ما قبلت ودخلت امي وأغاريد للبيت والبيت چان كلش چبير لهذا انطوهن غرفه واستقرن بيها لكن انتبهت على أغاريد تحسها شايله حقد الدنيا كلها علينه وابد ما سلمت على احد حتى اني وعبرت ايام وبدت الحرب وما استمرّت هواي وسقط النظام وبده البوگ بدوائر الدوله
ومن السرقات لدوائر الدوله نعرف انه نظام الدوله انهار وصارت فوضى الها اول ما الها بيوم گعدنه الصبح امي وأغاريد ماكو وظل ابويه يصيح بحيث گد ما عصب ارتفع عنده الضغط واخذنا للمستشفى ونزلوا ضغطه وهو يكرر وين راح الگى أغاريد بهاي الفوضى
ومرت شهور بالسنة السقوط وبعدها كملت خامس اعدادي ونجحت لسادس اعدادي وچانت سنة گشره لانه بدت الطائفيه البغيضه وبوقتها طلعت معدل زين وقدمت على كلية الشرطه وحمدلله نقبلت لانه طولي وزني وخالي من الأمراض
داومت بالكليه وكملت السنه الاولى وبدوام السنة الثانيه انتهت الطائفيه اللعينه بوقتها اتعرفت على بنيه أداوم بكلية التربية قسم التاريخ والتعارف صار عن طريق ولد صاحبي اخته اداوم وياها بنفس القسم وهنه صديقات البنيه حلوه ودائماً اروح ويه صاحبي من يروح لاخته للجامعه والبنيه اسمها ميقات
واخذت رقم موبايلها وبالبدايه چانت بس سوالف بينه وبعدها صار إعجاب وبعدها ربطتنه علاقة حب استمرت إلى ما تخرجت من كليه وفي وقتها چان عمري 23 سنه وميقات ظلت تلح إلا تجي تخطبني
واني عمي وسام كلش قريب عليه لهذا فاتحت عمي وسام بالموضوع لانه استحي من ابويه
اما ابويه عجز ومل وهو يدور على أغاريد وبوقتها عمي وسام راح على اهل زوج امي وعرف انه زوج امي أنه اثناء الطائفيه مقتول لهذا ضاع كل اثر لامي وأغاريد
وعمي وسام فتح موضوع زواجي ويه أبويه وبيبي رحبوا بالموضوع وبوقتها عن طريق صديقي أخذنه موعد ويه اهل ميقات وچان يوم جمعه وتم التعارف بين أهلي واهلها وحچوا بموضوع الخطوبه
وتمت خطوبتي ويه ميقات واحنه اتفقنه انه تعيش بالمزرعه ويه أبويه وبيبي وهي واهلها رحبوا بالموضوع وعقدنه محكمه واهلي ما قصروا بتجهيز شتريد يجيبولها وچنت مستعد انتظرها السنه الرابعه لما هي تخلص جامعه بس ما قبلت وگالت السنه الجايه أداوم
اكو أشياء في وقتها من فرحتنه بشريك حياتنه ما ننتبه على اي شي واني ما انتبهت انه ميقات چانت تلح بموعد الزواج وتريده قريب وهذا السبب عرفته بعدين
حددنه موعد العرس ونسوان عمامي ما قصروا ويايه والله لو امي موجوده ما تسوي مثل نسوان عمامي واجى يوم العرس الموعود وفرحتي لا توصف بميقات لكوني احبها اموت عليها
وچانت ليلة العرس ليله ما أنساها طول العمر وبداية زواجنه چانت سعاده بعد 6 شهور بده النكد على اصوله ولا عبالك ذيچ ميقات الحبيتها
اما عدها موضوع ما يوگع من حلگها وهو موضوع الحمل والطفل وهي چانت تريد تراجع دكتوره على موضوع الطفل بس اني ما قبلت اما موضوع الغيره هذا ما احچي بي مع هذا احبها طبعاً إذا يدگ موبايلي تجي تگعد يمي ولازم افتح مايك حتى تسمع والف مره گتلها احنه الضباط بينه يصير فشار وغلط وعيب سمعي بس ما يفيد ودائماً نتعارك وابويه وبيبي يحچون وياها ويصالحونه المهم مر على زواجنه 10 شهور وهي تريد تراجع دكتوره من كثر الإلحاح مالتها وافقت
وحجزت واخذتها لدكتوره وبعد السونار والفحص ما بيها شي وانطتها تحليل صورة الدم وگالت الدكتوره خلي زوجچ يحلل
اما التحليل سوت ميقات التحليل وگالوا بعد 3 ايام تطلع النتيجه
شكرا لزيارتكم عالم روايات سكيرهوم
