رواية أرض الخناجر الفصل الثالث والخمسون بقلم ايلول
و مِثل كل مَرة هَم رَديت نادِم
حَزين و گلبي يِشبه شِفة الصايّم
حَزين و شارِد مِن الدِنيا و من الناس
و مِني و من جرح بس الله بي عالِم .
══━━━━✥◈✥━━━━══
ريـــمه :: امسح بعيوني ما مستوعبه وهو واكف يم الضوه تلاشت ابتسامته يعاينلي بغضب لميت الهدوم عليَّ اريد اكعد جسمي يرجف اجه عليَّ بساع مد اديه على ايديي رجرني من الچرباية وكفني گدامه كاضني من زنودي بقوة وجهه بوجهي صاح من بين اسنانه
-گووومي روحـــي الابوج.
ووي حجايته دفعني بأتجاه الباب چلبت بالكنتور مصدومة درت عليه أرجف دايخه وهو ينفض غضب ووجهه احمر كل الاجه ببالي عرف بسالفة الگراب صيح بصوت عالي
-اطلعييي بررره.
فزيت من صياحه متلعثمة
-لـ ليش؟
اندك باب الغرفة وهوه اجاني بساع جرني من زندي يعت بيه ويصيح
طــروادة:: اشششش ديربالج تسوين روحج غشيمة، امشييي.
جرني للباب اتعثر مچلبه بأيده روحـــي ممروده وجسمي مثل سعفه بهواء هبه تاخده وهبه ترده صدى صوته وحچيه يوصل الگلبي سهام مسمومه، فتح الباب صارت بوجهه عفراء دفعني عليها حييل، فتّحت أديها اثنينهن تسندني چلبت بيها ودرت عليه شال أيده يأشر ويصيح عينه بعيني
-روحـــي رووووحي الابوج روحـــي كليله لعبتنه ما عبرت عليه كاشفنه وهوه اللعب علينه امشيي.
دفعته عفراء خازرته وتشيل ايدها تسد حلكه وهوه يدفعها يحجي بحرگه وانه مچلبه بالحايط حانيه ظهريّ دايخه حييل واحس برنه لمتني بعبايه وبأثنين اديها جرتني الصدرها، وعفراء واكفه طول بطول وي طــروادة تتعارك وياه
عــفراء:: نصيييي صوتك.
حط ايده على حلكه خازرها متسودن
طــروادة:: اششش انتِ ما تفتحين حلكج حرف ما تحجين.
عــفراء:: وووولك شبيك تسووودنت؟ شبيييك؟
صفك أيد بأيد يصيح وانه احس روحـــي ما اگدر اوكف على رجليَّ
رنـــه :: روحـــي راحت من عصبيته ريـــمه تخربطت بأيدي كعدت بالگاع كعدت وياها لامتها بالعبايه حييل وأعاين لعفراء وطرواده اريد افهم شبيهم صاحت بوجهه
عــفراء:: عليييمن عليمن على گراب الخنجر؟
ضحك وكض عــفراء من زنودها حييل وهيه فاتحه عيونها بصدمة موجوعه هزها بقوة يصيح
طــروادة:: عبرررتها سمعت وحطيت ملح على الجرح سكتت وادورلها اعذار ابريها وهيه مو بريئة، ووولج انتِ تجذبين عليَّ علمودها تضمين عليَّ بوگتها لگراب خنجر ابوي
تلفت بين ريـــمه وعفراء وانه فاتحه عيني حييل عاينت الريمه ما فاهمه ورديت اعاين لطرواده وعفراء صاح بوجها
-يا ريتها تستاهل يا ريت يجي بعينهااا،
ضميتهن بگلبي چذبها وچذبج عليَّ سكتت عنهنّ گوه على روحـــي ووولج ما حجيت بيهن تالي بت ميلاد خوش حاطتلي خطه.
دفع عفراء من ايده وهيه مصدومه حطّت ايدها على زندها موجوعة وخرت من ريـــمه اعاينلها بصدمة وهوه اجاها بساع جرها من الگاع وكفها وصاح بوجها
-احجيي احجي كليلها شخططتي انتِ وابوج احجيلهاااا .
جرته عفراء منها وريمه بأيدهم شلون الجثة وين ما يدفعونها تروح صاحت بوجهه عــفراء
-هدهاااا، صغيره جانت ما تفهم ما تفهم من اخذت الگراب، ابووي يدري وما حاسبها تريد انتَ تحاسبها.
وهوه تسودن هزهن اثنينهن وصيح بوجهه عفراء
-وووولج موو عليه انا مو عليييه
ودار على ريـــمه بغضب جرها من ايدها وكضها من وجها يگلها
-سولفيلها شخططتي وي ابوج؟
وريمه تهتز بأيده ترجف كلها هزت راسها لا وتحجي بصوت متعوب
-ما مخططه شي.
دفعها من ايده وضحك عابن لعفراء گالتله
عــفراء:: حاجيني انت ووولك كهلان.
عاين الريمه مبتسم عيونه تنگط غصب گالها
-هالمره انا السمعتج بطلي جذبج ولا تنكرين ما يفيدج.
التفتّ العفراء يحجي ببرود بس هو ميت من القهر ايده من العصبية ترجف حجه بدون ما ينتبهلي ضاله على گعدتي بباب الغرفة اجمع حجيهم واحاول افهمه.
طــروادة:: هاي الكضيتي عمرج تدافعيلها، اليوم ببدلة عرسها وبنص بيتنا تخطط بيا طريقة تكسر ارگابنا، بنص حوشنا ترسم وي ابوها مخطط، هوه ياخذ شيخ حيدر وسيد عباس والوادم الخيره الدوانيته، وهيه بس اطبن للغرفة تطلع من يمي الاهلها تصررخ وتكلهم كهلان مو زلمه ويريد يطبب عليَّ اخوه .
ووولج انا السمعت سمّ حجيهم شرهم ماضل بس عليَّ حطوا وياي رگبة عبود .
يحجي بحرگه وثلاثتنا نعايلنه بصدمة ريـــمه تهز راسها لاا ترجف وعفراء تعاينلها مصدومة گال الريمه
-روحـــي الابوج روحـــي گليله ما گدرت اغشه وهوه الطلع غاشنه، عبود وي اخوج طالعين من القرية وانا ماخذج وكاسر عينج وعين ابوج، عاينــي عايني
جرها حييل يريد يمشي لباب الهول يوديها الاهلها ركضت عفراء جرتها من ايده وهوه ما يعوفها يصيح بوجها عفراء
-وخرررري عني
عــفراء::ووووين وين توديها تريد تتذابح وي اخوتهااا؟
كاعده على اركبي اعاين عليهم ريـــمه تغمض عينها تريد تطح وطرواده يعت بيها بس يريد يطلعها من بيتنا فاقد ما يشوف شي گدامه وعفراء تتعارك وياه بس تريد تجرها من ايده شهكت ملچوم من عفراء شالت ايدها طكته راشدي تبجي وهوه فاتح عينه يعاينلها بغضب جرت ريـــمه من ايده لمتها الصدرها تشهك وتصيح عليه
عــفراء:: ما تدررري ما تدري بروحها ساحرينها
وهوه بس فاتح عينه وجهه احمر مصدوم بعفراء شلون طگته طاحت ريـــمه بين اديها وهي كعدت وياها على حيلها متسودنه عليها تمسح بوجها وتحاجيها بخوف
-ريـــمه ريـــمه عاينيلي.
دارت علي شافتني على اركبي بباب الغرفه صاحت علي
-رنـــه ماي بارد بساع.
مسحت عيوني بظهر ايدي احرك راسي لا، وريمه چلبت بأيد عفراء تشهك وتحجي بغصه
ريـــمه :: چذاب عفراء والله جذاب ما حاجيه هيج انه.
وطرواده مسح وجهه دنك يعاينلها
-انا سمعتج محد وصلي السالفه حتى تنكرين.
ريـــمه::ما حجيييت ما حجيت والله ما حجيت هيج.
تسودن شلون تنكر وتجذب طك ايده بالحايط يصيح
-ولج لا تچذبييين لا تنكرين.
-ما حاااجيه ما حاجيه عفراء يحجي هيج يحجي هيج حتى ينتقم مني هوه حلف حلف من حركت الگاع حلّف يقهرني .
حطت ايدها على راسها تصيح
-لا لا مو من حركت الگاع ليمت حلف ليييمت
وتطك ايدها براسها تريد تتذكر وطرواده هز أيده يگلها
طــروادة:: اي مثلي مثلي سوي روحج البريئة المظلومة بس بعد ما يعبرن عديتهن اول مره وغشمت روحـــي گوه وانا الما انغش.
صفك أيد بأيد متحسف وهو يگلها
-چذبت ظنوني وصدگت حچي عيــونج .
مسح وجهه وهيه بأيد عفراء روحها رايحه وتبجي گالها بهدوء
-ودّيها الاهلها.
وكفت عفراء گدامه گالتله
-اذا ريـــمه تطلع انه اطلع وللموت ما اطب الهالبيت بعد.
خزرها ينر بوجها
-واكفه وياها انتِ، مصدگتهااا رمجدبتني؟
-لا ما مجذبتك بس كتلك البت مسحوره صارلها يومين ما تدري بروحهاا.
-عاشت ايدج لو تطلع كتالت ابوج هم تلكيلها عذر وتبرريلها شحجي وياج بعد.
نزل عيونه الريمه الكاعده بالگاع وتهتز كلها گالها
-ريـــمه!
شالت راسها تباوعلها عيونها حمر ودموعها تجري وهو اعصاب ميت من القهر گالها
طــروادة:: بعمري ما عاينتلج وتلعب روحـــي حتى من ذكر اسمج اخذتج بس حتى اكسر عينج وعين ابوج واذا عدج ذرة كرامه گومي ردّي الاهلج.
عــفراء حطت اديها بصدر طــروادة دفعته تصيح بوجهه
-اسكت اسكتتتت لا تحجي هيج لا تحجي.
وريمه سدت اذاناتها بأديها تنود كلها ودموعها مغطيه خدها وهو يحجي بحرگه گالها
-هم صح المن تردين الاهلج؟ ضلي هناه خنگ اخنگج اذا اخوتج ما گدرولج انا اگدرلج وأكسّر رجلج .
ووي حجايته طاحت ريـــمه نرگع راسها بالگاع ركضتلها عــفراء وطرواده يصيح عليها
-گومي گومي لا تچذبيين.
وعفراء حطتها بحضنها متسودنه تطك على وجها وتعاين علي صاحت
-وووولج گومي اطيني ماااي.
هزيت راسي لا اهمس صوّتي مخنوك
-هيه الماخذه گراب خنجر ابوي؟
وطرواده يصيح عليها عباله جذابه الحد ما انتبه الاديها مشمرات مناه ومناه واروبها الابيض من جوه العبايه مبين كله دم مسح وجهه وجرها من ايد عــفراء شالها للغرفه وهيه ركضت للمطبخ تبجي وتحجي بحرگه
-حسبنا الله ونعم الوكيل.
اخذت ماي بارد وركضت لغرفة طــروادة تتعارك وياه علفها وطلع اعاينله طب للحمام يسب ويغلط على شاكر وشعلان وانه ضاله كاعده بمچاني بس دموعي تجري طلعت عفراء من الغرفه تدردم عليَّ وعلى طــروادة بأيدها هدوم ريـــمه عافتهن بسطل بالمطبخ ورجعت يمها للغرفة كمت وراها فتحت الباب كاضه اليده بأيدي اعاينلها ريـــمه على الچربايه فاتحه عيونها بثگل وعفراء حاطه على راسها كمادات وتحاجيها
-نامي ريـــمه لا تخافين انه يمج بالحسين شحده إللي يحاجيج
وريمه ذبلانه كلها ما تحجي فاتحه عينها على كيف ورجعت غمضتها صاح طــروادة
-رررنه
مشيت بساع يم باب الحمام
-ها
-جيبيلي هدووم.
رجعت للغرفه عاينلي عــفراء بخزر.
-يريد هدومه.
مشت للكنتور فتحته طلعت هدومه حطتهن بأيدي حيل رگعتهن، اخذتهن وديتهن اله ورجعت وكفت بباب الغرفة وهوه لبس واجه طب للغرفه ما يعاين لا لريمه ولا العفراء فتح الكنتور طلعله چفيه لفها على راسه وتلثم بيها صاحت عليه عفراء
-وووين رايح؟
ما يحاجيها تنگب بالچفيه ويدور بالكنتور جوه هدومه جر مخزن الطق وهيه تسودنت لطمت على وجها
عــفراء::حاچينييي وين رايح تريد تسودني؟
مشه لوره الكنتور جر التفكه ريـــمه فاتحه عيونها الذبلانه على كسف وتهمس بصوت متعوب
-لا، لا تعارك .. اهلي.
وهوه حتى ما يعاين عليها حط المخزن بالتفكه جرتها عفراء من ايده ما عافها صاحت بوجهه
-وين رايح؟
يحاجيها ومايحط عينه بعينها زعل بعيونه كل حجي الدنيا ما يرضيه.
طــروادة:: رايح للگيعان اختنكت.
-تريد تصخمممم وجهي انتَ يا گيعااان تسودنت ولك عليييت گـــلبي لو واحد اجه عليك شحجي شگووول.
جر التفكه من أيدها لبسها بجتفه وعاين لوجها بغيض گالها
-تلكيلج عذر مثل ما تلكين البت عمج، واذا كلش كلش كليلهم نايم يم بت شاكر.
حجاها وطلع من يمها وهيه محترك گلبها مفرفحه، مشيت وراه اعاينله هدّ هاسكي وطفه اضويت البره حتى من يطلع محد يشوفه، إخذ هاسكي وراح، رجعت للبيت شمس تبجي بأيد عفراء عاينت عليها كالت
-خابري ماسة گليلها عفراء تريد رقم صــيهد
-شلج بيه؟.
خزرتني تنتر بحرگه
-مااالج غرض
مشيت للغرفة اجيب تلفوني وهيه تحجي حاطه شمس بحضنها متربعه بالهول وتهز بيها تريدها تسكت راسلت مــاسه ودتلي رقم صــيهد وديته لعفراء خابرته بساع وانه واكفه اسمعها كالتله
-الله يساعدك خويه انه ام شمس، خويه بلكن تروح وره كهلان راح للگيعان واخافن منه لا يسويله سالفه، لا ما صاير شي هيج والله هوه يسولفلك بس فـــدوه لا تخلي واحد يدري بعد اختك، الله وياك.
سدت التلفون دموعها تجري كعدت گبالها اسأل
-بس كليلي يعني ريـــمه صدك هيه الباگت گراب خنجر ابوي
مسحت عيونها تهز راسها اي
عــفراء:: صغيره چانت كلشي ماتعرف وأهلها يودونها.
-كلشي يقهرنا تطلع ريـــمه مسويته ليشش؟
بجيت محترك گـــلبي لان صاحبتي وكل سالفة تقهرني وتضر اهلي تطلع هيه السبب بيها التفتنا اثنينا على دگة باب الحوش، عفراء عافت شمس بالگاع والمميه بأيدها، مشت لباب الحوش كمت وراها اعاين من شباج الهول كالت
-ياهو؟
شاكر::ها بويه انا انا عمج شاكر.
فتحتله الباب طلعت وراها خفت عليها منه عاين علينه اثنينا وعفراء كاضه الباب وتعاينله مبتسمه گالتله
-هلا بيك عمي تفضل.
وهوه مرتبك من بيناتنا يعاين لبطن البيت ويرد يعاين الوجه عفراء گالها
شاكر:: ريـــمه وين؟
ضحكت عفراء بشماته
عــفراء:: ذبحناها ودفناها، وين يعني عمي غير يم رجلها.
عاين العفراء بغضب مسح لحيته يگلها
-لا مو اكولن نامت بعدها هيه مريضه اليوم هل انشد عليها.
عــفراء:: لا لا يضل بالك صارت زينه تعشوا ويانه وطبوا الغرفتهم وهسه نايمين، تعال الصبح شوفهم وباركلهم.
خزرها وهيه مبتسمتله گالتله
-تصبح على خير.. عمي!
سدت باب الحوش بوجهه واشرتلي لا تحجين طبي جوه. رد دك الباب فتحته اله عفراء گالها
شاكر:: عبود وسجاد وين؟
عــفراء:: طلعوا وي ولد شيّخ حيدر وباقر وجعفر ولد سيد عباس.
نگلب وجهه من الغصب دار وراح البيتهم سدت الباب وراه تتحسب عليه طبينه للهول سوه هيه راحت تشوف ريـــمه وانه اخذت شمس وطبيت للغرفة يم حسين وزهره حطيتها بفراشها وتمددت بصفهل افكر بريمه وسوالفها الحد ما غفيت ما فزيت الا على صوت بچي ريـــمه، طلعت من الغرفه بساع الساعة بالاربعيه الفجر وعفراء كاضتها بالهول وهيه تبجي وتريد تروح الاهلها
-بس عوفيني.
عــفراء:: يتاكتلوون والله يتكاتلون اخوانج ما يسكتون ولا اخواني يسكتون ريـــمه احلفج بروح امي اذا تعزينها كاافي واسمعي مني
كعدت على حيلها لمت ريـــمه الحضنها وريمه شلون المسودنه تبجي بحرگه عبرت من يمهن للمطبخ جبتلها ماي مديته العفراء اخذته من ايدي غسلت وجهه ريـــمه تحاجيها بهدوء
-كافي ريـــمه فـــدوه اروحلج كافي.
-جذاب عفراء والله العظيم جذاب ابوي ما يسوي هيج والله ما يسوي هيج ما انسى لو ابوي محاجيني ما انسى بس هوه يحجي هيج حتى يقهرني .
مسحت وجها وگومتها تاخذها للغرفه گالتلها
ريـــمه:: ما اريد ما اريد اطب الغرفته.
-غرفتج هوه خل ينام بالدوانيه.
وريمه من بين شهكاتها تردد
-خليني اروح الاهلي خليني ارووح.
ورجعت تخربطت تتقيئ اسود مثل بالليل روحها انمردت ركضت وي عفراء خايفه عليها غسلنالها واخذناها للغرفه تمددت مغمضه عيونها وجسمها يرجف، ضلينه يمها لمن نامت دارت عليَّ عــفراء مدت ايدها تمسح دموعي متحسره
عــفراء:: ررنه والله ريمه مالها ذنب ذنّب آهلها ظلومها وأخذوها جندي ينفذ مخططاتهم لا تظلمينها طــروادة صعب يقتنع بس انتِ .
بجيت بصوت احجي وگلبي مفرفح
-بس لو ما ماخذه گراب الخنجر جا جدي ما طردنه وجا خافوا منه وما حاربوا ابوي وكتلوه على اساس منتول.
-لا تحجين هيج كلشي بيه ارادة ابوي يدري بيها وشافها من اول ما اخذت الخنجر ما حجه بس الامي، ما حاسبوها ولا طردوها ضلوا يلمونها بحضنهم ويحبونها لان يدرون هيه جانت طفله وما تعرف شي وتمشي بحجي اهلها.
مسحت عيوني ساكته طلعنه من يم ريـــمه للحوش عفراء لمت الهوسه وانه وياها لان الصبح يجون اخوالي كضينه توه يطلع الصبح نريد نروح نصلي وطب طــروادة شافنه كاعدات وما اهتم سد باب الحوش واخذ هاسكي شربه ماي وربطه بالسلسه عبر من بيني وبين عفراء طبّ للبيت
مشت وراه عفراء وهوه بالمطبخ يغسل ودار للطباخ شعله وخله القوري عليه لا يعاين علينه ولا يحاجينه عيونه حمر وبس يتحسر طبت عفراء يمه جرت كلاص خلت بيه سكر وحطته على الطباخ تعاين عليه وهوه عيونه على نار الطباخ كالتله بهدوء
-هاي ريمتك طــروادة ريمتك العيونك انترست دموع علمودها هيج عدك سهله تردها بيوم عرسها يهون عليك ينحجي عليها؟ وتنطك والله اليدري شعلان لو سمع بالسالفة شيسوي حتى للذبح يوصلها.
مدنك وابتسم بطرف شفته شال راسه يعاين لعيونها گوه يحجي صوته مبحوح ومتعوب
طــروادة:: أسكتي محد ردها الگلبي غير حچاياتج شما تسوي تبرينها شما اشكيلج صحتي اهلها مو هيه طالعها من روحـــي اجيتي ورديتيها گووه، وولج اكلج أنا سمعتها طلعت وره هاسكي اجيبنه لان اكل الوادم واسمعها يم السياج تسولف وي آبوها ويخططون شلون ياخذ الوادم الدوانيته وشلون تطلع من بيتنا تصرخ ويعلمها شتحجي وهيه تسأله وتستفسر لا تكليلي مسحوره وهالتمسلت، هسه أمنه بالله كلنه مسحوره مو لابسها جني تحجي شي وتنكره يابه هاي دماغها مغسووول انتهت بعد
صفك ايد بأيد يحجي بحرگه
-انتهت ريـــمه شرهم وحقدهم ترسها ترس تمثل علينه عود هيه زينه بس حتى تسيطر وتسوي اليردونه.
-هاه هيج هسه مقتنع بحجيك انت َ؟
طفه الطباخ وجر القوري يصب چاي ويگلها
-ااي وسدي السالفة لا تحجين بيها بعد.
-والبنيه شني وضعها تريد تردها الاهلها؟
ضحك خاط الچاي شرب منه وهز راسه لا
-ما أردها اخليها هناه وهيه وابوها يعضون أصابعهم ندم.
حط الكوب على السنك وطلع للهول ذب چفيته على التلفزون وعاينلي
-اطيني مخده وچرچف.
مشيت الغرفتنه جبتهن اله حط المخده وتمدد على المده.
تغطه وغمض عيونه يحجي
-طفن الضوه والتكعد بالسبعه تكعدني.
عــفراء:: صليت گبل لا تنام ؟
- لا متاني انتِ تعلميني
-نام نام بلكن الله يهديك.
فتح عيونه خازرها وانه واكفه يم دگم الگلوبات بساع طفيتهن استغفر ربه ودار وجهه للحايط طبينه انه وعفراء للغرفة بس سدينه الباب كتلها
-لا تحجين على طــروادة هوه مقهور وانتِ النوب هم تقهرينهلا يصير بيه شي.
كعدت بفراشها بصف شمس تحجي
-جا رنـــه غير انه اعارف الحقيقة شلون يعني اسكت واخليه يظلم ريـــمه ؟ وعبالج لو مخليته رادها الاهلها تكضي هيج؟ ما تصير فضيحة ويا كاتل يا مكتول؟ جا شني اخوتها مو زلم ويسكتون؟ لو طــروادة الراح يسكت على الحجي اليطلع عليه؟ غير تصير مذابح وما تنحل بعد.
تمددت بفراشي واعاين عليها
-ادري بس هم لا تقهرينه خاب النوب يصير بيه شي هوّه هالايام راسه بس يوجعه.
سكتت متحسره تتگلب بفراشها شويه وگامت
-وين رايحه؟
عــفراء:: اشوفنه اذا نايم ابوسنه گـــلبي ضل يوجعني عليه.
-اوكفي انه هم .
كمت وراها اركض نايم على ظهره حاط الغطه جوه رجليَّه مثبته وجاره فوگ راسه هم مثبته تدنت يمه عفراء كعدت على أركبها ومدّت ايدها تريد تجر الغطه من راسه ما تگدر ضامه جواه باسته براسه فوگ الغطه ردت ابوسه انه هم ماخلتني جرتني تحجي همس
-لا يفز يضل يحجي .
ردينه للغرفه انه نمت وهيه ضلت كاعده.
ريـــمه :: كل الصار يخوف بس احلامي لأول مره حلوه، عمي شامل عمتي رباب اللي ما ترضى اگلها عمه كليلي يمه رباب، ضحكتهم احس بروحي اسمعها، فزيت بس فتحت عيوني بدون ما اتحرك لامه رجليَّ الصدري وايدي جوه خدي كلشي صار يرجع العقلي شويه شويه واعيش شعور الحچايات التكسر مرتين، مسحت دموعي من انفتح باب الغرفة وتشغل الضوه شلت راسي اعاينله لمحني كاعده ودرر للباب قفله.
كعدت على حيلي وكف مقابيلي حجه بهدوء
-عفراء مو يمنه هالمره لا تمثلين اقلها صارحيني انا احجيلي غايتج؟
مسحت وجهي بأثنين ايديي وعاينت لوجهه گـــلبي يوجعني احجي بنفس الهدوء بس صوتيّ مبحوح
-عفراء مو يمنه ليش ما تحجي انتَ الحقيقه تهمتني گدامهن بشي انه ما مسويته وماحاجيته شنو غايتك؟ كل الچنت تحجيه بالعقد تمثيل بس حتى تردني الهم بليلة العرس وتكسر عيونهم مو؟
دار وجهه يضحك ورد عاينلي
طــروادة:: والله داهيه انتِ حتى على روحج تمثلين.
-دام انتَ مقتنع انه امثل خوش أمثل شتريد ؟ طلكني وخل ارد الاهلي
ابتسم يعاين الوجهي وحجه بحقاره
-لاا شلون اطلگج بهالسهولة ؟ اتعبج واخذ حگ كل سالفة سويتيها من عيــونج الگراب الگيعان وحجاياتج النامن بگلبي سهام.
كلهن اخذ حگهن عود ذاك الوكت يجوز اطلكج واردج لحضن الخيسه شاكر.
خزرته كوه أتنفس
-وهاي غايتك من الاول ؟ حتى نظرت عيونك غيرتها بالعقد ما چنت تعاينلي بحقد هيج، ههه تتهمني أمثل وهو أنت التمثل من الاول
دك بأيده على اخشاب الچربايه من يم رجليَّ يضحك
طــروادة:: اي بس بعد ما يفيد التمثيل وصلنه للنريده كاسر عينج وعين اهلج اخذتج غصباً على خشومهم، خططتي وياهم تكسرين رگابنه وترديلهم صاغ ســليم بس ما عبرت انا اللعبت عليكم.
ابتسمله وگلبي يفور نار تحركني بكل نفس أتنفسه دنكت اكتم الغصه بگلبي وشلت راسي احاجيه
-كاشفتك من الاول وادري كل حجيك چان چذب سويت روحـــي مصدگه وامشي وياك خطّوه خطوه لان ابوي چان رايد هالزواج رضيت بيه الخاطره مو السواد عيونك، انتَ المتورط مو انه.
ضحك ضحگه طويله يهز راسه اي
طــروادة:: ادري ادري بكلشي وماشي على مايكم الحد هاللحظة، عاينــي الايدج شوفي هالحلقة مشنقة برگبتج تحلمين تطلعين منها.
عاينتله ساكته گـــلبي ينفض جوه ضلوعي وهوه عيونه شوي شوي تخزرني وتغيرت ملامحه للعصبيه مسح وجهه ونتر
-گومي غيري هدومج واكشي حالج حال اي عروس ابوج يريد يجي يتباركلج.
دكت باب الغرفه عفراء تحجي همس
-طــروادة .
مسح وجهه وفتحلها الباب نزلت من الچربايه آمسح بدموعي واحجي وي روحـــي ما أضل هناه أرد الاهلي وما احجي الاخواني الصدك حتى ما يتعاركون أجذب عليهم اكلهم كرهته ما اگدر اضلن وياه.
احجي وي روحـــي وعفراء تحجي وياه فززني صياحه متسودن ويصيح
-سهيل ما يطب بيتنه.
وعفراء تحاجيه بهدوء
-خالي جعفر من امس بالعرس گال باجر نجيكم انا وسهيل ويوسف، ونسوانهم شگله اكله لا خالي لا تجون؟
جر تلفونه وعفراء تتوسل بيه وهوه يفتر بحرگه يخابر بس رد عليه خاله وسلم عليه گاله
-خالي جيتك على عيني وراسي وكل الهلا بيك انت وخالي يوسف وولدكم بس خالي سهيل لا يوصلني ولا اريده... لا تزعل مني ولا ازعل منك انا وياك نعارف العله وين خليني ساكت خالي... رحم الله والديك.
سد التلفون وطلع من الغرفة عاينتلي عفراء بحيره هزت راسها تسأل
-شلونج اليوم ريـــمه؟
تحسرت ساكته اجت يمي شلت راسي احاجيها
-ما أدري عقلي احسه شلون اللي عليه ضباب احس اخر يومين من حياتي ناسيتهن.
كضتني من ايديي تحاجيني بهدوء
-ريـــمه السمعه طــروادة حقيقه بس انتِ ناسيته طــروادة ما يجذب.
هزيت راسي لا
-يجذب عفراء سوه هيج بس حتى يقهرني ويطلعني غلط.
سكتت ضايجه چلبت بأيدها
-اريد اروح الاهلي وما احجي شي الاخواني حتى لا يتعاركون والله اطلع الصوج بيه آكلهم ما احب اضلن يمهم اكره طــروادة احجي اي شي .
-ريـــمه والله العظيم ما تعدي على خير السالفة اكبر منج ومن كهلان وابوج السواها يوم الگال گدام الوادم زواجج انتِ وكهلان وصية ابوي، ما تكضي على خير والله جدي ما راح يسكت ويقهر كهلان وكهلان لو اموته ما يسمت اخوي واعارفنه ولا اخوتج گليلين شر ويسكتون.
تخنگني من تحجي هيج شالت ايدها تمسح عيوني
عــفراء:: خلي هالچم يوم يعدن على خير ريـــمه والله كريم لبعدين.
هزيت راسي لا ابجي
-عفراء گتله گتله تعبانه واجه يمي ما مهتم اخذ اليريده ووخر لعبانه روحه مني ترديني انسى حچيه البارحه لو الحچاه گبل شويه، عفره لو انتِ عايشه نفس الموقف والله ما تظلين لو مو تتذابح زلم.
جرتني الصدرها تشبگني وانه تجيني لحظات احس گـــلبي ينمرد وروحي تريد تطلع اضل بس اشهك .
وخرتني من صدرها من طبت رنـــه تعاينلي بزعل عيوني تتوسل ما تلومني على سالفة گراب الخنجر بس هي تتلافه تعاين لعيوني والزعل تارسها .
رنـــه :: درت وجهي منهن وگلت العفراء
-تعاي غسلي الشمس.
طلعت من يمهن للهول طــروادة طلع من الحمام شغل التلفزون على دعاء الصباح ودار وجهه عاينلي هز راسه يسأل شبيج؟
مشيت للمطبخ ساكته حطيت القوري على النار واندك باب حوشنه مشيت بساع صاح طــروادة
-تعااي
درت عليه احجي
-مــاسه جابت ريوك مــيثم كايللها.
-شدراج؟
-هيه راسلتني.
-جا مو تزاعلتن.
-تصاحبنه.
ضل واكفلي بباب الهول وانه رحت لباب الحوش فتحته صارت بوجهي مــاسه لابسه عبايتها وشاده شيله شراشيبها نازله على كصتها وحاطه صينية الريوك على راسها مغشيتها تضحك اول ما شافتني گالت
مــاسه:: صباح الخير خيه.
-هلا بيج خيه صباح النور والعافيه شلونج شلون الفريخات.
ضحكنا اثنينا ودرت وجهي بصف الحايط من سمعت ضحكه ثالثة واشوفه بريا واكف بصف السياج بساع شلت ايدي ومديتها من الباب وعوجتها عليه اغمنه
-شجااابك خربت صباحي.
بريا:: جاي وي مرت اخوي نو الخاطر جهرتج الزفره.
-خاااب تروح فـــدوه الوجهي تروحلي عشر فدوات بحلاتي انتَ؟؟؟
يحرك گـــلبي ويخليني احجي بحرگه وماسه تسكتني وتسكته ما اشوفه بس احجي صاح
بريا:: قرده منيلج الحلاه.
-اااانه قررررده؟؟؟
حطيت ايدي على صدري اثنينهن واصيح
-اانه ااانه قرررده؟
واحس بأيد جرتني من وره من علباي شمرتني يم باب الهول جنه دنگه غطه الباب كله گال الماسه
طــروادة:: تفضلي خويه.
طبت مــاسه الصينية على راسها وطرواده مد راسه لبريا وبريا بساع صفگله يهوسله
بريا:: هلاااا بعريسنا هلااا هلااا بالزين الرافع راسنه هلا ببن شامل النتنومس بييه، هلاااا بيه هلااا.
واخذله فره بباب الحوش يهوس ويفتر كضه طــروادة من ياخته
طــروادة:: تندل درب بيتكم منين؟
بريا:: اندله.
-روحله.
بريا:: مرت اخوي اريدنها .
دار طــروادة الماسه وهيه بساع هلت الصينيه بأيدي وحجت همس
-ترحين للمدرسه اليوم ؟
-لا جايتنه وادم ما اگدر اعوفن عــفراء وحدها باجر اداوم.
هزت راسها خوش تريد تطلع جلبت بيها
-اكلج اكلج جا انتِ مو زعلانه؟ شني رديتي؟
-زعلانه واجاني من غبشة خل اروح بعدين اسولفلج
طلعت بساع سد ألباب وراهم صاح بريا بصوت عالي
-تاكل زقنوب.
طــروادة:: ببطنك يا سگط.
عاينلي خازرني وانه هم خازرته واحجي بحرگه
-اااانه قرده؟
عبر من يمي يحجي
-حتى القرده اعقل منج.
عاينت للصينيه محترك گـــلبي طبيت حطيتها بالمطبخ واجتني عفراء شالت المغشه منّها شافتها گالت وتضحك
-هسه ميلاد تجيبلهم ريوك عبالها اخليهم ياكلون شي منها.
-تلكينها مخمرته بالسحوره.
طكتني على ايدي تضحك وراحت ضحكتنا اثنينا من شفنه ريـــمه طالعه من الحمام وتعاين علينه عيونها ذبلانه دنگت ومشت للغرفه وطرواده كاعد بالهول مدنك يلعب وي شمس راحت وراها عفراء للغرفة اريد بس انسى سالفة گراب الخنجر حتى ما اكره ريمه ما اگدر مل ما اشيل السالفة من بالي بس اشوفه ارجع اتذكرها ويوجعني گـــلبي.
شويه واندك بابنه طلعت عفراء من الغرفه وريمه وياها ضحك طــروادة وكف وجر ريـــمه من أيدها بصفه حط أيده على جتفها وهيه تعاينله باهته وذبلانه مابيها اي روح، راحت عفراء فتحت الباب وطبوا ميلاد وشاكر بأيدهم صينية الريوگ، عفراء سلمت بس على عمي شاكر وكالتلهم
-تفضلوا تفضلوا.
اخذت الصينية من ايد ميلاد وهمه طبوا للبيت اثنينهم وجوهم مخنزره، وطرواده حاضن ريـــمه من جتفها هي لابسه فستان الصباحة ابيض وبيه ستراس ذهبي وهوه دشداشة بيضة والضحكه تارسه وجهه
سلموا عليهم ريـــمه باوست ابوها وباست ايده وطرواده حتى ما مد أيده بس مبتسم بشماته وگاله
-هلا بيك
ميلاد:: شو ماتحب ايد عمك؟
شاكر:: عوفيه عوفيه اذا ابوه ما يعارف الاصول اتانيه هوه يعارفها.
يحجون وطرواده بس يضحك ورد حط أيده على جتف ريـــمه جرها الحضنه گالهم
-تفضلوا!
يعاينوله بخزر طبت يمهم عفراء كالتلهم
-تفضلوا عمي ليش واكفين؟
ميلاد:: ما نريد نتفضل جايه اشوفن بتي واروحن تعاي ريـــمه.
جرت ريـــمه من ايدها تريد تطب وياها الغرفتها جراها طــروادة منها وهيه مثل العجينه وين ما يجرونها تروح
طــروادة:: شتردين منها؟
خزرته ووگفت بوجهه تنتر وشايله ايدها
ميلاد:: بتيي وأريد احاجيها شني عبالك اخذتها هاي هيه بعد مالنه حگ عليهاا؟؟
ريـــمه جرت روحها من ايده مبتعده كضت ايد امها كالتلها
-تعاي يمه .
مشت وياها للغرفه وشاكر مگابل طــروادة ماعاجبه وطرواده يضحك عليه حطله مخده وصاح
-رنـــه چااي چااي الشاكر راسه يوجعه.
طبيت للمطبخ صبيتله استكان واخذته اله حطيته گدامه دناه عليه طــروادة يگله
-اشرب اشرب مبين ضغطك صاعد عيونك مورمه شني مانايم البارحه، ضليت سهران وي الزلم؟
-لا راحوا ل١٢ كلمن راح الاهله.
-جا شو عيونك مورمه شني باجر على ريـــمه؟
يحجي وياه وگوه كاض ضحكته وشامر مدنك يمسح بلحيته رد دنه استكان قصص وروايات عراقية كرار صلاح الچاي يمه ضحك وگاله
-اشرب اشرب چايك لا تضوج خيّرها يغيرها.
شال عينه خازره ودفع الچاي من گدامه ينتر
شاكر:: ما اريدن چايكم.
طــروادة:: تعاااي رنـــه، شيلي هذا الاستكان ذبيه بالزباله.
وكف شاكل بغضب دفر الاستكان برجله كسره وطرواده وكف وياه يعاينله ببرود درت عيوني العفراء عبالي راح تدخل وتسكت طــروادة بس هيه مجتفه اديها الصدرها وتعاينلهم ساكته، شال ايده عمي يريد يطك طــروادة وهو دفعها وحجه بتهديد
طــروادة:: اكسرررها حالها حال رجلك، متحملك ببيتي الخاطر ريـــمه .
درنه كلنه لباب غرفتهم على صوت شهگتات ريـــمه تشهك بصوت عالي تريد تجر نفس وصوت نيلاد صرخت تصيح
-يمممه بتي.
ركضنا كلنه للغرفه وره طــروادة ريـــمه على اركبها أيدها على رگبتها عيونها حمرر حييل وتجر نفس تشهگ مختنگه وميلاد كاعده يمها على اركبها تصرخ وتطك بيها على ظهرها جراها طــروادة من ايدها وصاح بوجهه بغصب
-شسويتيلهااااا؟
وهيه تصيح
ميلاد:: ماتت بتي ماتتت!
وطرواده يكض بوجهه ريـــمه جر ايدها من رگبتها يحاجيها وعفراء تغسل بوجها متسودنه ايدي يرجفن اعاينلها بخوف اختنگت من يمي من شفتها ما تگدر تتنفس روحها راحت عيونها صارن حمر وكوه فاتحتهن مسح وجها طــروادة خايف عليها لم وجها بين أديه يحاجيها
-ريـــمه شبيج ريـــمه.
غمضت عيونها صدرها يصعد وينزل بقوة جرها عمي شاكر الصدره ضمت وجها بحضنه تبجي وهوه شابگها يبوس راسها ويگلها
-شبيج بويه ريـــمه ؟
وميلاد مدت ايدها تمسح على خدها
-يممه راحت روحها يمه .
يحجون وياها وانه ميته من القهر، اخذها طــروادة من ايدهم جابها للمطبخ غسل وجها ويحاجيها
-شسوتلج؟
وهيه بعيون ذبلانه تعاينله هزت راسها ما سوت شي دار وجهه منها محترك گلبه وعفراء كالتلها
-تعاي سلمي على اهلج حتى يرحون وتتريكون.
مشت وي طــروادة طلعوا وياهم للحوش وميلاد تگلها
-حطيتلج گيمر اكلي منه وجهج اصفر كاضي دمج.
عــفراء:: تردلها عافيتها شويه شويه سلميلنه على الولد.
رادت تطبك الباب بوجهم كضته ريـــمه وحجت وياهم بهدوء
-يمه وديلي هاجر اشوفنها.
انها تخزر بينه وتهز راسها اي شامر كالها
-وره الغده أوديها الج.
راحوا وهيه سدت الباب ودارت تعاين العفراء بزعل كوه فاتحه عينها وعفراء دنكت كالتلها
-شبيج اختنگتي؟
هزت راسها ريـــمه ساكته، طبينه للبيت طــروادة مسويله لفة جبن من ثلاجتنا وكلاص چاي وواكف ياكل وعفراء تسودنت تحجي واعصاب كالتله
-اطلع اطلع روح كابل وجهه صــيهد وتريك انتَ مو مال وجوه حلوه.
طــروادة:: جا شبيه وجه صــيهد؟
يحجي باستفزاز صاير يقهر اخوي وعفراء تعطب من آلقهر، وريمه طبت الغرفتنا يم حسين وزهره مشيت وراها لامه رجليها الصدرها وكاعده ساكته، بالبداية مارضت تاكل لمن عفراء لحت عليها وزهره ضلت تسويلها لگم اكلت ويانه وطرواده طلع.
للعشره اجوا اخوالي اثنينهم ونسوانهم بس خالي سهيل ما جاي لا هوه ولا عياله، تباركوا واطوا فلوس لريمه گبل الغده بشويه راحوا، وطرواده يريد يروح للگيعان وعبود يتوسل بيه
عبود:: انتَ عريس ضل وانا اروحن ما اتعب روحـــي وعلي.
عــفراء:: عوفه عوفه لا تتعب روحك وين الحسين وين أم البنين كون واحد يصورك ويوديك الشيخ حيدر من انتَ ثاني يوم عرسك عايف مرتك ورايح للبساتين ابو البساتين.
ولا يهتم ولا اله شغل تنگب بالچفيه اخذ هاسكي وراح، وريمه كضتها نايمه مدري شبيها، وبالليل طــروادة من تعشه نام شويه بغرفة اهلي ل١٢ راح للحراسة ومن كعدت الصبح بالستة ونص هوه توه راد للبيت عيونه حمر عاينلي وعاين العفراء يسأل
-ريـــمه وين؟
رنـــه :: نايمه يمنه بالغرفه.
هز راسه خوش وطب الغرفته اخذ هدومه وطلع للحمام بين ناطلع كعدنا سوه تريكنا وطلعنه ودانه المدارسنه وهوه راح للكليه.
""
جــويريه :: كلشي يسويه ابوي يفرحني من يطلع من البيت يتسوك ويرجع مشتريلي شغله لو قلم اطير بيه من الفرح، بس تكسرني عيونه من يباوعلي بقهر، عزلت المسواك وهوه واكف يمي بالمطبخ شلت راسي اباوعله من سأل
-جــويريه بويه ناويه تطلكين انتِ؟
سكتت اباوع لوجهه كح وراح للهول تعبان، اخذتله ماي شربه گال.
-راح اروحن انا يم زلمه صاحبي انتِ لا تسوين عشه من اجي انا اجيبن وياي خبز وبيض.
-جيب وياك باگله بابا.
وكف على حيله حط ايده وره راسي وباسني بكصتي
-صار بويه صار تدللين.
مشيت وراه من طلع سديت الباب اخذت فواكه وصعدت الغرفتي اركض، اكل ومطلعه فديوهات على اليوتيوب اباوع واجه ببالي صــيهد وسؤال ابوي من گال ناويه تطلكين انتِ؟
تمددت على الچربايه بالعكس راسي يتلولح افتل بخصر شعري على اصبعي غمضت عيوني أفكر بيه وجسمي يقشعر ابتسمت متذكره اخر موقف من راد اركصله هجع نزلت راسي اكثر اريد اتذكر الموقف بكل تفاصيله واعيشه من جديد
أيده اللي لمت شعري شد شريط الروب على عيوني ونزّل اصابع على طول ظهري رجعت ليوره مرتبكه وجسمي يرجف وخر شعري من اذني وتلامس شفايفه وي طرف اذني رفعت كتفي مقشعر بدني همس وشواربه تدغدغ اذني
-هسه ما تشوفيني تخيلي روحج وحدج انتِ شاطره بالخيال.
عيوني مشدوده وحسيت بيه من ابتعد وراح كعد على طرف الچربايه مقابيلي احس بعيونه عليَّ ما گدرت اتخيل روحـــي وحدي، تمايلت وي صوت الاغنية وسلت الخناجر ورجعتهن البطني اركص وجسمي يرجف حافظته حافظه نظراته حتى وإني مغمضه حاسه بيهن أتمايل بحركات متشنجه ابد ماجانت ركصه احترافية مثل كل مره، نظراته المرسومه ببالي تحرجني ما گدرت اشيلها من عقلي واركص طبيعي، كل حركه اسويها احس بروحي اعرف باوعلي بيا نظرة وشاربه يعلى مبتسم وفرحان.
حسيت بخطواته حوالي عيوني جوه الشريط يرحن ويجن أحآول ألمحه حسيت بيه وراي طفه الأغنيه وكفت من الركص ونزلت ايديي طبگت الخناجر بأيد وحده وقبل ما التفت حط أيده على خصري وجرني عليه ظهريّ بصدره مد ايده يوخر شعري عن رگبتي تعالت انافسي شاهگه من أثر شاربه اللي حسيّته تطبع على رگبي شفايفه الدافيه ترسم قبل متتاليه بهدوء ولمسه دافيه عكس كل مره
وجهه برگبتي وايده على خصري شال ايده الثانيه فتح الشريط من عيوني جرره وابتعب يباوعلي مبتسم درت عليه جسمي يرجف ووجهي احس بيه يريد ينفجر اسيل عيوني اباوعله وادنك بسرعة احس بدفوا انفاسه ونغزات شاربه بعدهن حوالين رگبتي يباوعلي مبتسم، مديت ايدي ارفع الروب واغطي صدري.
فززني من ذكرياتي صوت رسالة فتحت عيوني گـــلبي يدك حييل كأنما عايشة الموقف هسه مسخت وكهي عركانه حريت التلفون فتحت رسايلها حجيت وياها شويه وسألتها عليه گالت
-اعصاب وياهو اليحاجيه يكتله امس راد يكتل سعاد مرت ابوي
-همزين اني ما موجوده جان طلع حرگة گلبه بيه.
-اخوي شريف ما يسويها.
دزيتلها ضحكت شويه وراحت بقيت منتظره ابوي الحد ما اجه وتعشينا رجع سألني
-تردين تطلكين؟
هزيت راسي لا
-لا يابه ما اريد، خلي اشوف هوه شنو يقرر الله كريم.
سكت ابوي يهز راسه اي فرشتله فراشه شرب علاجه ونام قفلت البيبان وصعدت فوگ كل شويه ادخل الرقمه على الوتساب الحد ما غفيت ودك المنبه الصبح منت اركض سبحت وبدلت وكفت گدام المرايا حطيت مسكرة وحمره ورجعت مسحتها مدري شبيه خايفه يشوفني حطيت كحل ورجعت حطيت حمره وأخفف بيها نزلت بسرعة ابوي گال
-يله يا بويه راح تتأخرين.
بسته براسه وايده اضــحك مسوي چاي ومخلي الجبن والصمون بالصينيه تريكنا سوه وطلعنه يوصلني للكليه بتكسي ووصاني اسأل البنات والوياي على خط، واني ما اعرف بسرعة اصادق افتر وحدي جني مضيعه اهلي دخلت للقسم هوسه وهمه يصيحون ماكو محاضرات اول ايام شويه ودخلت بنيه عبالهم طالبه محد اهتملها الحد ما دكت على الباب حييل كعدوا عدل عرفت على نفسها وبدت أول محاضرة
اخذت الحضور وطلعت كضيت محاضراتي وطلعت لمحت مــيثم وطرواده واكفين يسولفون رغم همه مو يمي مشيت باتجاهم
-السلام عليكم ورحمة الله.
حجوها ومشه مــيثم گدامي وطرواده أشر بأيده
-آمشي .
مشيت وره مــيثم وهوه يمشي وراي شنو السالفة ياهي اني مرت امنحُتب، دخلنه للكافتريا جر الكرسي مــيثم
-تفضلي اكعدي.
كعدت عفت اغراضي كدامي واتلفتت اباوع خاف هوه كالهم جيبوها أريد اشوفها ماشفته، راح طــروادة اشترالي وخلاهم كدامي
-تريكي.
شلت راسي اباوعله ولان متوتره خفت اغلط بالكلمة ويضحكون عليَّ حجيتهن كلمه كلمو
-صــيهد، احم صــيهد مداوم اليوم؟
ماجاوبوني حجّوا بيناتهم جريت اغراضي وكمت من يمهم مدري شبيه مقهوره فتحت عيني حييل مت شفته جاي علينه وجه بوجهه صار وياي لابس اسود ونظارات شمسية، بسرعة دنكت وغطيت حلكي بردن العبايه وامشي سررريع شارده وكف يريد يحاجيني واني رجلي تطكطك شردت رجعت القسمي وبعد ماطلعت حتى من القاعة، النهاية الدوام خابرني ابوي گال بالباب انا.
طلعتله رجعت وياه بتكسي وطول الطريق ابتسم من اتذكر شكل صــيهد وشردتي من كدامه هسه اني مو گده شكو مخليه مكياج اذا اخاف، وصلنه للبيت مالزمت تلفوني الحد وره الغده من صعدت اريد انام فتحت التلفون ودك گـــلبي حييل من شفت رسالة منه كعدت على حيلي هفيت على وجهي وفتحتها
-اذا ما گطعت شفايفج وعميت عيــونج .
ردت اعض التلفون من قريت رسالته حرك گـــلبي كتبتله
-عفواً وانت منو؟
بسرعة شافها واني هبطت طلعت من الوتساب خايفه ورجعت من دز رساله
-ولج جــويريه هاي هيج تحجين وياي؟ يشهد الحسين اذا اكضج حظج اطيحه.
لطمت على خدودي محتركه حرك مايتغير هيه شمره كتبتله
-رجاءً أخي الكريم أحترم نفسك.
وصلته الرساله وماطلعت من الوتساب انتظر رده كتبلي
-احتركت روح ابوج.
-وروح ابوك وياه.
-ايا بتّ الچلاب.
-الخاطر خاله ايمان راح اسكت رجاءً لا تدخل بيه كل انسان عليه بنفسه تمام؟
شاف الرسالة واتصل رفضته اخاف اجاوبه كتب
-اذا انتِ بت ابوج باجر تعاي حاطه كحل وحمره وشوفي شسوي بيج.
باجر حتى دوام ما اداوم احجي وي روحـــي واعض بأيدي محتاره شنو اكتبله كتبت
-شتسوي؟
ماشاف الرساله واني الوب نص ساعة عدت متت ادري بيه هالوكت بالغرفه يمكن يحجي وي نجمه وصفنت افكر
هاي يداوم بس ما يجي ولا يحاجيني يمكن يخاف منها لا تلكفه كتبتله
-تحجي وي نجمة؟
هم مارد رجعت كتبتله
-ربي يحبني خلصني منك وابتلت نجمة بيك.
ماشافها واخذني الواهس اكتب بعد
-بس اشوفها بالكلية واعرفها اكلها كل سوالفك احجيلها على عصبيتك وصياحك واكلها ميتفاهم ايده والراشدي، اخليها تعوفك انقذ البنيه منك.
بس دزيتها انفتحن الرسائل كلهن طلعت من الوتساب خايفه كتب
-جنت احجي وياها ترحيلها فـــدوه شايفتج وتعرفج وما تهتملج فرحانة لان راح اطلكج.
-خطيّه المسكينه ماتدري بالضيم الراح يجيها.
قراها وطفه النت كامت رسائلي ماتوصله عفته ونمت للغروب يله كعدت تعشيت وي ابوي ودرست محاضراتي حضرت ملابسي وعبايتي تمددت بفراشي الساعة ب١١ دزلي رسالة كاتب
-لا تحطين مكياج جاي تحرگين گـــلبي والله اموتج
أبتسمت واكتب واحذف ما ادري شنو ادزله كتبتله
-غير إسلوبك وياي.
-تردين اتفلسف نفس خيالج؟
قريتها مارديت رجع دزلي علامة استفهام كتبت
-لا
-جا انجبي
-أحترم نفسك اخي
-يشهد الحسين اذا بعد گلتي اخي الا اطبع اسنوني بأصابعج اليكتبنها، امشي نخمدي وعود تعاي حاطه حمره وكحله باجر وشوفيني شسوي.
قريت كلامه وطلعت من الوتساب اريد انام بس الشيطان يوزني جريت التلفون كتبتله
-معليك اخي، اخلي حمره كحله مسكرة ما يخصك.
دزيتلها وطفيت الانترنيت ونمت، ثاني يوم خليت الكحل والحمره اقوة من القبله ونويت اروح القسمه شأكلك ادور على بنيه صديقتي بلكي اشوفه وي نجمة. كملت اول محاضرتين وطلعت وياي بنيه حبابه وهم تستحي تصادق نفتر سوا اثنينا ساكتين نعرف بس اسماء بعضب كتلها
-نروح لكلية الادارة والاقتصاد؟
-شنسوي؟
-هيج نتعرف على الجامعة.
بعدها البنيه ما محاجيتني واحس ايد انمدت على ايدي من وره فتحت عيني حييل جرني شويه وهد ايدي يحجي بغضب
-امشي گدامي.
تلفتت بخوف
-وين؟
نزع النظارات خازرني
صــيهد:: بساااع بساع تمسحين البحگلج واحمدي ربج واشكريه احنا مو بالبيت بس انا اعلمج سهله.
مشيت للحمامات وما مسحت بقيت كاعده بالنص ساعة رجع اتصل عليَّ ما جاوبته ودالي رسالة على الرصيد
-اذا ما ندمتج سهله.
طلعت اتلفت مالكيته رجعت للقاعة كوه كملت محاضرات رجعت للبيت ابوي تعبان وخوفني
-شبيك بابا؟
-مابيه شي بويه روحـــي ناميلج ساعة
بقيت يمه امرغ رجليَّه الحد مانام صعدت فوك صــيهد ما راسلني وحتى من كعدت العصر ووره العشا ما شفت منه رسالة حجيت وي البنات بالگروب سألنه رنـــه على ريـــمه جاوبت بكلمة وحده "زينه" كتبت مــاسه
-ردناج موجوده بالعرس وتركصين هجع
-اركصلج هسه؟
-اي وصوريلنه فيديو.
رنـــه :: منيلج خناجر؟
-عدي سجاجين.
عفت التلفون اضــحك نزلت للمطبخ جبت سجاجين ورجعت فتحت الكنتور ادور بملابسي على شي مخصر البسه اخذت قميص يوصل للركبه البسه وي بنطرون جوه العبايه، لبسه بس هوه يوصل لركبي وسديت حزامه ليوره اخصره على جسمي وصوت رسائل يدك بالوتساب عبالي منهن مشيت بسرعة فتحت الرسائل مبتسمه وراحت ابتسامتي من شفتها اكو من صــيهد كاتب
صــيهد:: صارن هواي جــويريه وكلهن جاي اجمعهن الج ديربالج تركصين وتصورين روحج اموتتج .
طلعت من عنده دخلت للگروب كتبت
-مااسه هاي انتِ كلتي الصيهد؟
كتبتلي
-انه راح انام بطني اوجعتني تصبحن على خير.
رنـــه:: شكاتبه؟
مارديت عليها رجعت المحادثة صــيهد كتبتله
-اخي الكريم رجاءً لا تدخل.
-يشهد الحسين اندمج.
مارديت عليه شغلت اغنية بالتلفزون وصورت بتلفوني ركصت ووديته بس اله كتبتله
-صورت ووديته الهن بنات مو ولد هنّه حتى تصيح اندمج.
-سهله.
-اخي الكريم تصبح على خير.
طفيت الضوه وخليت بس الضوه الاصفر يم ميز الدراسة شمرت روحـــي على فراشي اضــحك واحجي على مــاسه بس كون ما تكله جذب مادزتلنه الفيديو واطلع جذابه گدامه، افكر بيه واضحك الحد ما غفيت.
نايمه واحس بروحي اشم ريحة دخان والضوه الاصفر الخفيف يشتعل وينطفي، فتحت عيوني الغرفة ظلمة واشم ريحة جكاير ماكو اي صوا على غفلة تشغل الضوه الاصفر اللي على ميز الدراسة التفت عليه وشهكت فازه ومرعوبه من شفت صــيهد كاعد على الكرسي حاط رجل على رجل وماد ايده على الميز يم دگمة التيبلام
فاتحه عيني حيل مصدومة بيه غمضت فركت عيوني ورجعت اباوعله على تفس الگعده يباوعلي بغضب بأيده جكاره شاربها للنص ومطفيها. لميت شعري وبلعت ريگي مرتبكه همست
-صــيهد !
"""
رغد:: گـــلبي عليه نار بعرس كهلان شفته من بعيد بعده ذبلان بس المهم رجع يوكف على رجليَّه ، امي مرتين كالت روحـــي وي جدتج شوفيه وتعاي بس صــيهد ما يرضى وماردت اروحن من وراه.
أشتغل وافكر بيه طكتني ندى على راسي
ندى:: شنو من طيور؟
-باع هاي كايمه تحجي مثلنه.
-اي خايبه هذا اخوج موتني كله كولي اموتن احبنك اكله هو حجيي يشبهه حجيكم اني عشت هواي بالجنوب يكلي لا مايشهه الزكي بكل كلمة حرف نون.
ضحكت وهـــب مسيس شاخط ماضال بيه شي، وخرت ندى من يم باب المطبخ من شافت سجاد وهاجر طبوا من باب الحوش اجت تركض مبتسمه طلعتلها شبگتني وسجاد صل واكف يم الباب گال
-خويه تريدج.
هزيت راسي خوش وطبينه للبيت سوه تسلم على خالتها سعاد من وره خشمها وتكض امي تبوسها بخدودها ورأسها واديها وتعاين السعاد بمكر عفتها يمهن وطليت للمطبخ اسويلها عصير شويه ولحكتني تلفتت مناه ومناه وطلعتلي رسالة من جوه ردنها ضحكت گـــلبي انترس فرح
- من سلطان؟
هزت راسها اي مبتسمه اخذتها منها فتحتها والصحكة شاكه حلكي
-عليلاً لا يُشفى إلا بالنظر إلى عيناكِ،
فهلا تفضلتِ عليه بلقاء
كالمواعيد القديمة بعد منتصف الليل
بقرب شجرة التين.
انترسن عيوني دموع زفرت نفس بحسره والضحكة تارسه وجهي وهاجر مكابلتني مبتسمه الابتسامتي ضليت يمه ساعة وراحت وانه احسب الوكت دقيقه دقيقة ليمت يكضي روحـــي طلعت لمت صارت ب١٢ من الليل.
طلعت من بيتنا وما طفيت الاضويه لأول مره اطلع وكلي لهفه وشوگ ماخايفه وما مهتمه اذا انشاف اذا أخواني لكوني، امشي وعيوني تدوره لمحته واكف يم الساگيه طهره عليَّ واديه وره ظهره مشيت بساع وحس على خطواتي التفت عاينلي وفتح ايده وگبل ما اوصل الصدره جرت دموعي لمني على گلبه شبگته ابجي واجر تفس بشهگه
-اشش رغده اشش كافي بچي
وخرني من صدره ومد اديه اثنينهن يمسح عيوني باسني بين عيوني بنفس طويل متحسر عاين لوجهي يسأل
-شلونج؟
-انت شلونك شلون صرت؟
هز راسه بتعب
سلطان:: يوم هيج ويوم هيج الحمدلله على كل حال، تعاي.
كض ايدي بين اصابعه ومشه بظل الشجرات كعدنه على الساگيه سانده راسي على جتفه مغمضه عيني وريحته تارسه ريتي يحرك ايده على زندي برخاوه گال
-كرهتني؟
شلت راسي مستغربه اعاين لوجهه
-كرهتك؟
تحسر مقهور
-غثيتك وحجيت حجي مو من گـــلبي اذكر.
هزيت راسي لا
-انسى اطوي هالصفحة سلطان.
رجع جرني الصدره يزفر تفس بحسره
-اتمنى انسى، كل ليلة اكعد على الجرف گـــلبي ما مرتاح جثة ابني بهالشط وما لگيتها.
شلت راسي من صدره ضيكت عيوني اتأكد اعاين من بين الشجر وخرت ايده من زندي واعاين بتركيز
-ياهي هذيج سلطان؟
شكرا لزيارتكم عالم روايات سكيرهوم
