رواية فصلية الضابط الفصل الخامس بقلم زينب نور
.......... خليت اديه جوه راسي وغفيت ما اعرف شكد حسيت على رفسه برجليه كعدت مفزوعه شفت ام نورس متخوصره واكفه كالتلي
:- كومي لج جايه تنامين شنو وبعدين شكو نايمه بغرفة بناتي كومي طلعي بره نزلي جوه للمخزن تنامين بي
كمت اريد اطلع صاحت ورايه
:- بوجهج للمطبخ نظفيه
باوعت شفت اكو حمام دخلتله غسلت وجهي وطلعت استحيت انزل الوحدي قويت نفسي ونزلت باوعت زين للبيت تصير كدامي صاله جبيره جامعه الابواب اسمع اكو هوسه وسوالف طالعه من غرفة الحجيه اباوع خايفه خاف واحد يشوفني ويعيط بوجهي امشي علكيف واتلفت اريد اندل زين بالبيت دخلت للمطبخ لكيت استبرق ونورس وثنين بنات وحده يطلع عمرها 14 تقريباً ولثانيه اعتقد عمرها 8 سنوات الصغيره تبجي انتبهن الوجودي ضلن مركزات بيه كالت البنيه العمرها 14
:- الله لا ينطيج ياحقيره اجيتي وجبتي المصايب وياج خربتي بيتنه بابا وماما راح يطلكون بسببج اخت المجرم
واخذت الصغيره من ايدها تبجي وطلعت ونورس خزرتني وطلعت وراها العرفته ذني بنات الصار زوجي كالت استبرق:- تعالي عيني عوفيهن ذني من غير شي هنه يدورن مشاكل مو انوب اجيتي انتي وفصليه هذني بنات عمو وارث زوجج اسماهن الجبيره زها ولصغيره زهراء امهن راحت لهلها زعلانه وعمو وارث بس اجه عقد عليج ورجع عنده انذار صار يومين هاي زوزه تبجي خطيه تريد امها بس اكولج ما لكيت الجنط مالتج واجه خطار التهيت اسوي چاي ونسيت اصعدلج كولتلها
:- عادي امج كعدتني وتكول بعد تنامين بالمخزن وين صاير المخزن خلي اروح اغير ملابسي واجي انظف وياج
باوعت عليه بنضره مستعطفتني وكالت
:- تعالي ورايه
رحت امشي وراها دخلتني بغرفه صغيره بيها بس اغراض قديمه وفراشات ولغذائيه كالت
:- هذا المخزن وراح اسئل امير على الجنط مالتج وين حتى اجيبهم الج
طلعت واني ضليت صافنه شلون اكدر اعيش هنا ولجو بارد جان شهر 12 خليت اديه على وجهي وبجيت من كل گلبي ياربي ساعدني شويه ورجعت استبرق شافتني ابجي كالت
:-عمو ماقابل ومرجع الجنط لهلج اني هسه اجيبلج دشداشه من ملابسي واجي راحت ضليت على وكفتي لمن رجعت جايبلتي دشداشه سوده غيرت ملابسي وطلعت وياها للمطبخ انظف وما حسينه غير الباب انفتح ودخلن ثنين نسوان وكفن يباوعلي بدون سلام وحده منهن كالت لستبرق هاي الفصليه وتأشر عليه جاوبتها :- ها عمه هلا بيج
كالتله بحده وتخزر بيه هيه هاي مو
كالتله:- اي هيه وجان يهجمن عليه وحده تجر بشعري ولثانيه ترفس بيه ضعت بديهن وتصيح بصوتها العالي:- انتي اخت الكتل ابني الحرمني منه اله احرم امج منج جابوج بمكان دم ضرغام اني اخذ حك ابني بيدي
واني احس نفسي انتهيت بديهن وبس اصرخ بلاعيمي اتجرحت شعري ملخنه ولدشداشه شكشكنها عليه ولكل اجه على صوت عياطي بس محد. حاول يفزعلي ويخلصني من اديهن واكفات يتفرجن اجت ضربه على وجهي عضيت الساني وشفتي انجرحت وجهي عباره عن دم من خشمي وحلكي كل هذا بس استبرق تحاول تبعدهن عني ولحجيه تصيح عليهن من بعيد ولبقيه يتفرجن لمن دخلو ولد ثنين امير ومحمد اساميهم خلصوني من اديهن وطلعوهن بره ني وكعت بلكاع ما اكدر اتحرك بس اون من الوجع واستبرق اجتني كعدتني وخلت حجابي على راسي ولواكفات يتشفن بيه فات الي اسمه امير عيط عليهن:- انتن شنو مشوفن شسون بيها ماعدجن رحمه تتفرجن عليها
وامه تكوله ابنها الميت ولكتله اخو هاي تأشر عليه خليها تطفي نارها بيها
كال:- الله واكبر شنو من بشر بنيه لا حول ولا قوه وكل ذنبها اخوها الكتل ضرغام مو هيه شنو ذنبها بله رجع كال لستبرق اخذيها للحمام كومتني كوه امشي والم بنفسي شعري انفتح وجان طويل طالع من الحجاب ولشداشه مشكوكه من يم صدري احير شنو استر دخلتني للحمام وكالت راح اجيبلج ملابس وارجع فتحت المي بارد ثلج بس من حراره روحي ما حسيت وكفت جوا غسلت كوه وخشمي ميوكف النزف عبالي انكسر وشفتي ولساني يوجعني باوعت شعري املخاته دموعي ويه المي ينزلن سوه جابتلي دشداشه لبستها وطلعت خشمي ميوكف الدم شافتني استبرق صاحت الامير اجاني كال لستبرق جيبي ثلج خلي على راسها ما قبلت عفتهم ودخلت للمخزن بارد عبالك مجمده دخلت مو الغرفه بده يوكف النزف شويه شويه شفت زوالي اتمددت عليهن واستبرق جابت بطانيه غطتني وامها صاحتها وراحت ضليت طول اليل كاعده اتگلب من الوجع من صفحتي ولجوع موتني ولبرد بحياتي ما انسه ذيج اليله ابجي اريد ارجع لهلي مااريد ابقه هنا شلون اكدر اتحمل حسيت وجع براسي قوي موطبيعي وخشمي انسد فدمره المخزن حتى شمعه مابي اضلم كمت كوه فتحت الباب وطلعت البيت هدوء وكل الاضويه طافيه رحت للحمام امشي على كيف دخلت غسلت باوعت بالمرايه شفت وجهي وارم واحمر وعيوني جواهن زراك ومن كد البجي هم وارمات رجعت لفراشي تمددت و تغطيت وحصرت نفسي على الحايط اريد ادفي نفسي وگلبي احسه يدك ابلعومي من الخوف كمت اتخيل اشيا عبالك شبح راح يلزمني من ضهري كوه كدرت انام لما فزيت على نغزات بضهري ونشال الغطى مني ما كدرت اتحرك جسمي ينتفض واحس الحراره تطلع من عيوني وحلكي حته النفس حار حسيت على ايد خشنه تلمست وجهي واسمع صوت رجال يصيح:- بيج شي ردي عليه
من الوجع الي احس بي وجع راسي ما اكدر ارد بس اون اسمعه صاح
:- استبرق نورس وينجن بويه
اجن مااكدر افتح عيوني زين ودموعي الوحدهن ينزلن من الحراره كال الهن
:- شنو هاي منو منيمها هنا ومنو مسوي بيها هيج
جاوبته استبرق:- عمو هاي عمه ام ضرغام اجت البارحه هي واختها سحر ضربنها
كالها:- وليش ما صعدتيها يمجن تنام كالتله
:-امي ماقبلت
كال الها:- روحي جيبيلها عبايه بسرعه وانتي لبسي وتعالي وياها لا تأخريني استعجلي
كعدني بس الدموع متخليني اشوفه زين عبالك ضباب بعيوني كومني هو وياها اخذوني للمستشفى لطوارى اجه الدكتور شافني وفحص حرارتي اسمعه يكوله كلش مرتفعه حرارتها وخشمي ضمدو اليه شدولي كانولا ومغذي وابرتين احس نفسي صرت احسن جان هو واكف يم راسي احسه يباوع عليه بس ما اكدر اباوعله استحي منه اجتني استبرق ساعدتني اكوم وهو يمشي كدامنه اباوع على طوله وكول بداخلي هو هذا زوجي ركزت بي زين جان طويل وضخم اكتافه اعراض ولابس ملابس عسكريه وعلى اكتافه رتبه ويمشي برزانه فتح باب السياره ولتفتلي صارت عيني بعينه استحيت منه نزلت راسي و صعدت ليورا وصلنه للبيت نزلت امشي كوه اسمعه صاح ورايه كال
:- تعالي الغرفة امي ابين ما افرغ الغرفه الفوك
مشيت دخلت يم الحجيه باوعتلي وهزت راسها دخل ورايه سلم عليها وكال الها
:- يمه ترى بس اني الي اليه الحق اسوي بيها هيج الي يمد ايده عليها بعد ااكسرها وخل الكل يسمع الي كولته
وجان يحجي بصوت عالي ومنفعل ويسمع الي بلبيت رجع باوعلي بخزره واشر عليه
:- وانتي اهلج لوما كواو...... يد ما نطوج فصليه حته يحمون العار اخوج ضام راسه وين يريد يشرد يوم دوم اله يوم والزمه ولو بسابع ارض اجيبه واعدمه
هو كال هيج واني تخبلت كمت ابجي وكوتله:- مو اخذتوني فصليه بمكانه ونسدت السالفه ليش هيج شتريد بعد
خزرني اباوع لعيونه يخوفن عاكد حواجبه وصاح بيه:- هششش ما اسمعلج صوت انتو من كل عقلكم اكتفي بفصليه واعوف دم ابن كاظم هيج يروح بلكاع الزمه وين يروح قابل يطير بس خلي هلفتره يستمتع بحياته زين
. جان يحجي بستهزاء وعلى وجه ابتسامه احسها استفزازيه
نزلت راسي و خليت اديه على حلكي ابجي بخنكه شفته طلع من الغرفه تمددت بلكاع وغطيت حته راسي بالغطى لمن غفيت ما اعرف شكد وحسيت الم بايدي فزيت على وجع بايدي فتحت عيوني شفته مكنبص يمي ولازم ايدي يريد يضربني ابره مخليها بالكانولا ومامهتم ضليت امدده ما اتحركت رفعت عيوني باوعت علي ما منتبهلي ضليت اباوعله يطلع عمره بنهاية الثلاثين ركزت بملامحه نضرته حاده عبالك يخزر حته من يباوع طبيعي وشواربه سود كلش حلو علي وجان لابس دشداشه رصاصي ويلگ جلد اسود وكاف اردانها ما اعرف ليش هلكد ركزت علي ما حسيت لمن هو كرص اصبعي حته انتبه فد خجلت من عنده شفته ضارب الابره ومخلص احتاريت وين اضم نفسي من الخجل شفت شبح ابتسامه على وجه
كام من يمي وطلع بره الغرفه باوعت لجهه الثانيه شفت الحجيه نايمه باوعت لساعه جانت ب2 الضهر حيييل شكد نايمه بس جنت تعبانه كلش حسيت بجوع كمت طلعت للمطبخ بالكي الكه فدشي اكله اول ما دخلت حسيت كلشي يمي يدور ما اسيطر اتمايل الدوخه قويه وكعت على ركبي للگاع ولازمه الگاع اريد يثبت شي كدامي ماكو ورجفه بجسمي حسيت واحد. دخل رفعت عيوني شفت امير دخل للمطبخ شافني سئلني بأهتمام ها خويه بيج شي ما اكدر اجاوبه كوه حجيت كوتله
:-بس ساعدني ارجع للغرفه شفت وارث دخل باوعلي ورجع باوع الامير يأشرله براسه شبيها جاوبه
:-ما اعرف هسه دخلت وشفتها بهذا حالها
شفته طلع بملابسه العسكريه ماهتم اليه اجه امير ساعدني كومني كال محتاجه شي كوتله بصوت خافت:-جوعانه الله يخليك اي شي انطيني اكله
وكملت طريقي الوحدي رجعت للغرفه اريد اوكع من الدوخه واعرف صار عندي هبوط قوي شويه ودخلت استبرق بيدها صينيه خلتها كدامي عرفته امير دزاها گالتلي
:-تاكلين وياي هزيت راسي الها وكمت اكل وياها بعدني هستوني اكل ودخلت مره باوعتلي بغضب وجان ودها تموتني بنضراتها ورجعت باوعت للحجيه جانت نايمه هستوها كعدت سلمت عليها وكعدت كالتلها
:- يمه انتو صدك تحجون هاي اخت الكتل ضرغام شو عايشه الدور وصايره عروس تقدمولها اكل ومعززه مكرمه وضرغام جوه التراب انتو تخبلتو تردون تجلطوني تره المات ابن العزيز كاظم هيج عدكم هين ضرغام وتجيبون بمكانه مره مو راس الحرمه الهوى
ضربت رجلها وكالت
:- ياحيف والله
ردتها الحجيه كالتلها
:- جا يمه شبيدي اني وارث مايكول شنو براسه ويكول مااكتفي بفصليه اضن اكو شي براسه ويريديسوي
من سمعت هيج انسدت نفسي وحجيهن خوفني جانت كاعده وعيونها عليه تخازر بيه اختنكت كمت طلعت للمطبخ كوه امشي اسمعها شتمتني وحته سابع جد من اجدادي غلط وفشار سديت اذاني باديه ودخلت كعدت بلمطبخ شويه واجت ورايه للمطبخ شافتني غمتني وطلعت شايطه من القهر مني وراحت البيتها ومحمد لحكها يركض وراها يسكت بيها فضحتهم بصوتها العرفته هاي اخت وارث الجبيره اسمها سناء ومحمد ابنها دخل امير يضحك شافني كال
:- انتي موتج ايصير لو على ايد عمتي سناء لو ايد بهيه ام ضرغام لو ايد ضرتج سهام
ويضحك بصوت مسموع لا ارادياً ابتسمت على ضحكته رجع كال
:- خايبه انتي مبينه مابيج خير شدي حيلج والتضربج ارجعي اضربيها لا تتماوعين يلفاهيه
فز گلبي من كال اخير كلمه اذكرت حسام نزلن دموعي ما ادري علي ما ادري من وراء ابجي..........
شكرا لزيارتكم عالم روايات سكيرهوم
