رواية الحب اختيار الفصل الخامس والاخير
هتغير وهكون الشخص اللي انتي عوزاه.
ضحكت ودموعي نزلت في لحظتها وكأنها كانت مستنيه الضحكه دي بالذات وقلت:
- بره وجوه فرشت لك وانت مايل ايه يعدلك.
بصلي باستغراب وكان باين على وشه ما فهمش اقصد ايه, فقلت له بنفس الضحكه ودموعي بتجري على خدي:
- يعني المايل عمره ما يتعدل حتى لو عملتله ايه, فبلاش تخدعني ولا تخدع نفسك انك لما تتجوزني وتملكني وابقى في ايدك ساعتها هتتغير, عشان انتَ ما اتغيرتش عشان تملكني واهلي يرضوا بيك هتتغير بعد ما ابقى معاك! هي كده خلصت يا نبيل.
- يعني ايه؟
هزيت راسي وزادت دموعي وانا بقول:
- يعني انا كنت غلطانه من الاول اني نفخت في أربه مخرومه, كنت غلطانه اني ما منعتش نفسي واتحكمت في اعجابي بيك وبعدت نفسي عنك و كانوا كلهم بيقولوا فيك العبر وانا عامله ودن من طين وودن من عجين عشان ما اسمعش, عشان قلبي متعلق بيك وعيني مش شايفه غيرك, جاري بقى ... اول ولد شفته واول واحد اتعلقت بيه, كنت اقف في الشباك واشوفك في الرايحه والجايه و اعجابي بيك يزيد وقلبي يتعلق اكتر, بس خلاص القصة خلصت والشباك اللي كنت بقف فيه عشان اشوفك منه هقفله بالضبه والمفتاح, هكسب نفسي وهكسب اهلي اللي انتَ بتشجعني دلوقتي اني كسرهم واهرب معاك, وعلى فكره ما فيش راجل يقبل انه ياخد واحده بالغصب والسرقه, ده المفروض لو انا اللي قلتلك تعالى نهرب تقولي لا انا هعافر لحد ما تكوني ليا, رغم إن المعافرة هنا مش صعبه يا اخي! ده احنا بنطلب منك تبقى بني ادم كويس محترم والناس كلها تتكلم عنك حلو, بس زي ما قلت لك المايل عمره ما يتعدل.
ومشيت من قدامه وانا رافعه راسي وبمسح دموعي, وفي اللحظه دي رغم كل الوجع اللي جوايا حسيت بعزة نفس وكبرياء ما حسيتوش قبل كده, وانتصار طلعت, كسبانه نفسي واهلي ودنيتي كلها , دنيتي اللي كانت هتتهدم لو كنت فكرت اخسر كل الناس عشانه هو, لانه يوم ما يتعبني, واكره عيشتي معاه ما كنتش هلاقي بيت يلمني ولا حضن يضمني بعد ما رميت كل ده عشانه.
رجعت البيت وانا بفكر في حاجه واحده بس, هطلب قعده تانيه مع مصطفى وهحكي له على كل حاجه من غير تفاصيل طبعا, ان وافق انه يكون معايا وجنبي لحد ما اعدي أزمتي وانسى نبيل تماما هيبقى ليا معاه فرصه, وان رفض هستنى فرصه تانيه مع شخص تاني.
***********
واخر الاسبوع ومع الميعاد اللي الكل اتفق عليه عشان مصطفى ييجي يقعد القاعده التانيه, وبعد سكوت شويه مني عشان اقدر احضر نفسي للكلام اللي عاوز اقوله قلتله:
- انا عارفه انا كنت سخيفه اوي المره اللي فاتت وحتى لو كان اللي كنت اتكلمت فيه كان حقي ما كانش ينفع اني اتكلم بالاسلوب ده زي ما انت قلت, كان في كذا طريقه ممكن اتكلم بيها, بس انت كمان كان معاك حق لما قلت اني بطفش, الحقيقه انا كنت بطفش عشان كان في حد معين كنت منتظراه و.....
وقبل ما اكمل كلامي لقيته بيقاطعني وبيقول:
- الشخص ده لسه في حياتك؟
فرديت بكل ثقه:
- لا ما بقاش في حياتي ومستحيل يدخل تاني.
ابتسملي وهو بيقول:
- يبقى انا مش عاوزه اعرف عنه اي حاجه ولا عاوز اعرف تفاصيل الحكايه.
بصيتله وقلتله:
- بس هو كان في حياتي لما قعدنا أول مره.
ابتسم ابتسامه جميله قوي وهو بيقول:
- انا ما بتكلمش على أول مره أنا بسألك في قعدتنا دي هو لسه في حياتك؟
هزيت راسي بلأ ,ففرد ضهره وهو بيقول:
- يبقى نرجع نتعرف من الأول, ونعتبر دي اول قاعده ما بينا.
ابتسمت وانا بقول له بقلق:
- بس انت لازم تعرف ان اكيد مش سهل عليا اني انهي موضوع بالسهولة وبالسرعة دي وان لو الموضوع ما بينا تم هاخد شويه وقت على ما اتعود عليك وادخلك حياتي, الحقيقه انا طلبت القعده دي عشان اعرفك ده, ولو رفضت هحترم قرارك جدا لانه هيكون واقعي وطبيعي.
سكت شويه وبعدين قال لي بابتسامته الجميلة:
- مش هضحك عليكي وهكون صادق معاكي, زي ما انتي كنتي صادقه معايا, انا كمان لسه طالع من قصة حب فاشلة, كانت زميلتي في الشغل و ....
قاطعته وانا بسأله:
- لسه في حياتك؟
ضحك وهو بيشوفني برد نفس سؤاله وهز راسه بلأ فقلتله:
- خلاص يبقى ما يهمنيش اعرف تفاصيل الحكايه.
وهنا كانت البداية, البداية لحب حقيقي, واختيار مناسب, وحياه جديدة حلوة بكل تفاصيلها ومشاكلها وخلافتها اللي بتكون مجرد بهارات بتضاف لأكله حلوه عشان تطلع احلى, ودايما جملة نبيل بتتردد في ودني وهو بيقولي ان لو هربت معاه عمري ما هندم, عشان ابص لحياتي دلوقتي واقول اني لما اخدت قرار اني ابعد عنه كان هو ده القرار اللي فعلا عمري ما ندمت عليه.
وفي اخر الحكاية اكبر غلط ممكن يعمله الانسان انه يحكم قلبه بس في اختيار شيء, او في إدارة حياته عموما, دايما لازم تكون محكم قلبك وعقلك مع بعض , تفكر بهدوء وتعرف توصل للحل الامثل والاريح ليك حتى لو كان الحل ده هيوجع قلبك شويه وهيتعبه بس ما فيش وجع بيستمر مدى الحياه, لكن الاختيار الغلط نتايجه بتفضل مدى الحياه واثره عمره ما بيروح.
واخيرًا الحب قرار ولا اختيار؟؟؟
الحب عمره ما كان اختيار لأنك مبتختارش تحب ده وتكره ده, قلبك بيحب بدون أي تحكم منك, لكن الاستمرارية في الحب هي اللي اختيار وقرار .. لو الشخص اللي قلبك اختاره مش مناسب ليك وقتها لازم تقف وتاخد قرار انك مش هتستمر في حب الشخص ده لانه مش مناسب ليك وحبه هيعذبك, واستمرارك هنا بيعني دخولك في علاقة سامة هتخرج منها بندوب كتير عمرها ما هتتداوى..
الحب قرار واختيار وكل شخص في ايده يحدد إن كان يستمر في حبه او ياخد قرار...
تمت بحمد الله
