رواية قصة وجدان الفصل السادس 6 بقلم انين الليل

انا وغنيه صرنا وحده تباوع للثانيه وامي يمكن طارت من الفرح وهيه تكول

• هلا بيهم قابل نلكى احسن من بيت حجي كاظم

ابوي // لا تحجن بهذا الشي هسه هو الرجال مجرد كال كلمه

• لا ما نحجي والمن بس تسمع اختك تحچي وتتقول علينه اشكال

   ابوي سال امي // اكلج هيه خو ما حچت

هزت راسها // لا ام كريم ما تخليها لو تفك حلكها وهيه شبعد الها ابنها اتزوج الله يوفقه وبتنا اتزوجت بعد شتريد

• انتي ما تعرفينها ؟

امي اتحسرت // اي سولفت الي ام كريم ساىلتها ليش وجهه ثكيل عليه

گايله اخوي طگني على مودهن وغنيه دفعتني وطردتني وهو سكت

ابوي صفن وعرفنا صفنته بعدها يصير عصبي ويظل يحجي انسحبنا للغرفه بدون حتى ما نغسل ولا نلم السفره

غنيه تبتسم // ولج ذوله اهل سعاد مرت ناظم ناس واصلين وتجار علواا يجون انا اوافق وانا مغمضه

•. تدرين غنيه مرات انسى ناظم متزوج

- ولج اذا انتي تنسيين متزوج انا اساسا انسى عندي اخو اسمه ناظم

• لا تسمع امج وتجي تكون علينه

• هسه ما علينه بناظم علواا يجون نسابتنه يخطبون انا بالنسبه الي اوافق وانا مغمضه

• تقبليين ؟

غنيه //همه ما كالو اي وحده من عدنا بس انا اقبل بشرط يخليني اكمل

• واذا يكولون اله تبطليين

• ما اقبل شبيج دراستي حياة ثانيه صرت اعرف اضرب ابر واخلي كانوله وكلها هاي فلوس

جاوبتها بخوف // غنيه اسمعي شيگول ابوي نسوي حتى ما نعم ع التبقى وعلى امي لو نسيتي شسوا بينه

على مود نظيمه

• لا ما نسيت شبيج احجي ابحدي هو بس هوا بغداد يرد الروح يادراسه ياابر

ام احسان // واجو خطبوج

• همه حچو وبقو فتره ما سمعنا شي ومشت حياتنا غنيه اتطبق وانا نجحت من اجت عمتي ام كريم هيه وزوجها

وكلش فرحنه بيهم وفاتحت ابوي بالموضوع انو جايه تخطبني السعدي

انا اتفاجئت كل ظني جايه تخطب غنيه لكن هيه كالت انو جايه تخطبني انا

ابوي سالها // شعجب انتي وابو كريم اجيتو

ابو كريم // شقصدك حميد انا مو كدها

ابوي //. لا محشوم ابو كريم بس اكول بعرسكم حجي كاظم كال نريد نجيكم

ابو كريم // انا واخوي واحد وهو. تعبان شويه وماله خلك الله يساعده من المر بي وهل اجيت انا بمكانه واذا اتشوفني

مو گدها انا اعتذر

• صدك جذب ابو كريم هلا بيك ا تشرف بناتي وكل ما املك كدامك انت اخوي وصاين عرضي

• الله يخليك ويطول عمرك واحنه ما نلكى احسن منكم اناسبه 

ابو كريم // وهو مو غريب عنكم شو احنه سدا بلحمه مثل ما يكول المثل انا ماخذ هديه وناظم ماخذ بتهم

يعني اهل

ابوي //. ان شاالله طول عمرنا نبقى اهل والله لا يفرقنا

ما اوصف فرحة غنيه وامي يمكن اكثر مني وهي رافعه ايدها

- الله ما قصر بعد ما ام حاتم تمشي وتذب سمها اجه ضابط رتبه واسم وصيت اهله واسم اابو كافي الف الحمد لله والشكر

ياربي ما قصرت

وبنفس اليوم ابوي دز على اقاربنه الي بالبصره وخابر عمامي بالناصريه وكلوله مشيها لان ولدهم زغار وتم كل شي

بقت على موافقة الامن ولان ابوي عسكري وهو عسكري اجت الموافقه خلال شهر وبهذا الشهر محد اجه من اهله

او حتى خابر

الى ان ابو كريم زوج عمتي خابر ابوي وكله اجت الموافقه والولد يريد يجي يعقد محكمه

وبعد يومين اجه ويه عمتي وكريم وزوجته وهو جايب ويا جنطة ملابس وبيها عطورات ومكياجات

وانطه الابوي المقدم وثاني يوم رحنه عقدنا واحنه لاگاعدين ويه بعض ولا حتى مسولفيين راح ويانه ابوي وعمتي

ومن عقدنا اباب المحكمه ابوي كله

• عمي اخذ زوجتك وروحو اتونسو واتغدو اكعدو سولفو واحد يتعرف ع الثاني هسه هي صارت موتك

وفعلا عمتي وابوي رجعو وانا ويا ركبنا بسيارته واخذني المطعم وطول الطريق ما حجى وياي وانا هم چنت كلش

خجلانه منه

ام احسان // ابد ما حجى

امي ابتسمت // اي وداعتج بيني وبين نفسي كلت اكيد مثلي مستحي

الطريق كله ومشغل اغاني سعدون حابر وياس خضر ونزلنه للمطعم وراح يمشي گدامي وكعدنا على طاوله بعيده شويه

متقابلين ابتسم بوجهي وكلي // مبروك

رديت الابتسامه شكرا

بعدها اجه عامل المطعم هو بدون ما ياخذ رايي طلب غدا

ام احسان // نجاة تحجيين صدك

هزت راسها // اي ليش ممكن اجذب وره عشرين سنه صدكيني هو طلب الغدا ومن جابو صار ياكل انتبه لي گلي

- اكلي ليش ما تاكلين

اكلت وانا احجي ويه نفسي // هذا شبي وليش هالشكل يتصرف

اكلت شويه بعكسه هو اكل بشهيه ومن كمل طلب چاي وشربنا وكلي ياالله خلي نرجع لان تعبان

ورجعنا وانا محبطه واتساءل // هذا شبي هالشكل يتصرف

رجعنه وحتى اهلي اتفاجىو وامي سالتني اشو رجعتو من وكت

جاوبتهم // سعدي يگول تعبان

وفعلا بمجرد ما وصل نام وكريم وزوجته وياهم اختي غنيه واخوي ايمن راحو يتونسون

هو كعد قريب المغرب واخوي حسين 

كال يريد چاي سويتله ورحت اخذه مني وسالني

- بعدهم ما اجو

جاوبته وانا مدنكه // لا بعد وكت توهم راحو

هز راسه وكمل الجاي وبعدها اخذ السويج وطلع رجعت الامي سالتني

• وينه رجلج ؟

كلمة رجلج استوقفتني يعني صدك سعدي صار رجلي وهو ما حاجي وياي كلمه

بقينه انا وامي وبعدها راحت تسوي العشا وكالت

• روحي غسلي وبدلي وخلي مكياج حتى من يجي رجلج يشوفج حلوه ومرتبه

وفعلا سويت مثل ما كالت امي الي بيومها هواي تعبت وهيه تحضر اصناف الاكل تقريبا الساعه بالتسعه

اجت عمتي وكريم وزوجته وغنيه وايمن وهمه كلش مرتاحين حتى مرت كريم گالت

البصره تخبل اسمع يسولفون بس ما عبالي هيج

ايمن // اذا تردون باجر اخذكم للفاو ع البحر

عمتي // لا باجر نتوكل ونروح

امي // خلي اكوم اصبلكم عشا

عمتي //. تعشينا وشبعنا الحمد لله ايمن الله يطول عمره عشانه

ايمن // ما سويت شي عمه بالعافيه

عمتي //. چا وين سعدي

امي // طلع وبعده ما جاي

///////////////////////////////////////////////

ايمن هو وكريم راحو للديوان يم ابوي وانا گعدت يم امي وعمتي الكل كان فرحان ومتونس وانا فقط اكتفي بالابتسامه

ما اعرف احس اكو شي

ام احسان //مثل شنو

- يعني تصرف سعدي وكانه مجبور عليه

بقينا نسولف الى ان صارت الساعه بالعشره وشويه اجه سعدي راح حسين فتح الباب ودخل للديوان من الباب الخارجي

حسين اجه كال // ياالله حضرو العشا

ورحت ويه امي صبينه عشا وخلينا بالصاله وكلنه التمينه سعدي ما قبل ياكل لان كال هو متعشي بره ومن عاتبه ابوي رد

عمي ولد صديقي من زمان عنه رحت شفته وعزمني ع العشا وبصراحه استحييت منه فاتعشيت ويا

امي // بالعافيه على گلبك ولو نجاة ما قبلت تاكل متانيتك

ابتسم وباوعلي //. ها اهه كعدت بس على مود نجوى تاكل

عمتي //. يا سعد عمه عوف الغزل من تتزوجون غازلها براحتك بس هسه ابوها واخوانها وزحمه منهم

سعدي // ليش زحمه مرتي وبكيفي

الكل ابتسم وانا مدنكه واكل لان احس الكل يباوعلي بعد ان كملو شلنه المواعين وامي گالت صبي الجاي واخذي

ومن رحت وقدمت الابوي وبعدها السعدي هو اخذ الصينيه مني وخلاها ع الطبله وكعدني مد ايده وطلع علبه فتحها وجانت

بيها مداليه لبسها الي وباسني بكصتي وهو يكلي

• بس كون ذووقي ايعجبج حبيبتي

جاوبته وكلبي يدك // شكرا

عمتي // يا سعدي انت ذوقك كلش حلو بكل شي

تسلمين عمه

عمتي // اخذ مرتك واكعدو سولفو واتعرفو واحد بالثاني

انا خجلت وابوي كال // اي من حقهم

لزم ايدي واخذني للديوان وسد الباب وصار يباوع الي خفت من نظراته سالني

عجبتج المداليه

بلعت ريكي / /. اي حلوه شكرا

اتقرب اكثر عليه وصارت انفاسه قريبه مني // تدللين هذا شي بسيط

مرر ايده على خدي وهو يكول ///. هاااي شنو خدج ناار

اتقرب اكثر وهمس بااذني //. بعد اسبوعين نتزوج

واتمدد ع القنفه استغربت من تصرفه باوعتله هو گلي // جيبيلي فراش باجر ورانه سفر

طلعت وصلت يم غرفة امي واسمعها تسال بعمتي // چا شعجب حجي كاظم ومرته لا اجو لا شافو مرت ابنهم

• خيه ما يكدرون يجون

• ليش مو اجه حماج بعرس ابنج

- اي اجه هو او. ولده بس ام بدر ما تگدر تجي الحزن غاطيها

- ادري والله يساعدها بس هذا هم ابنها

عمتي // اسمعيني صبريه سعدي من زمان مبتعد عن اهله وعايش ابغداد ما يروح الهم اله من الشاگه باكه

امي // اي بس ما يصير چنه، ما يردونها وهو نفسه. حجي كاظم كال الاخوج نريد النه مره مكم

- - اي گال واجه ابو كريم ياخيه وماكو فرق ابو كريم عمه واجه ابكان ابو

امي // بس ام كريم حتى چنتنا سعاد ما اجت تدرين صار سنه ما شيفينها

ادري صبريه هسه مو هالبتج عقدت بعد شكو

امي // اي بس حتى الناس من يسمعون اهلي شر...

عمتي بنتر // همه وينهم اهلج ما تسكتين رحمه الاهلج ام حاتم تمشي وتعذم وتحجي

• اي محترك كلبها جيف ابنها ما اخذ بتي

• كافي شني محترك كلبها تره ام حاتم هيه الما رضت تاخذ بتج ومن يسالونها تكلهم البت شردت ورجعوها ناس

كافي صبريه وخلي بتج تمشي مو اله يجون اهله تره سعدي ما سال ومن يسال ويسمع ما راح ياخذ بتج لا هو

ولا اي واحد

امي بارتباك // انا ما كايله شي

• ادري بيج بس الناس ما ترحم واهل سعدي ناس حزاينه الله يساعدهم الصار بيهم مو شويه خلي بتج تمشي بحال سبيلها

دخلت يمهن باوعلي /$ ها شو اجيتي

هزيت راسي // اي يريد فراش يكول باجر نسافر

عمتي // تدني يمي

اتقربت منها هيه لزمت المداليه // بالعافيه حلوه كلش

باوعت الامي الي كالت //. اي حلوه وفخمه وغاليه

اخذت فراشه. شفته بعده متمدد ع القنفه فرشته ومن ردت اطلع لزمتي من ايدي

• ليش بس جبتي فراش واحد ليش ما جبتيلج فراش بصفي

صرت اتنفس كعد وطبع بوسه بخدي وكلي // راح اشتاقلج

ما جاوبته طلعت من الديوان ورحت للغرفه شفت اختي غنيه تسولف ويه مرت كريم اجيت يمهن صارن ايصنفن عليه لان

شافن وجهي احمر والصبح امي اجت كعدتني

اكعدي نجاة

فتحت عيوني // اكعدي رجلج وعمتج راح يرحون

وين همه

جاي يتريگون

خليت تاج على شعري وطلعت شفت عمتي هيه وام كرار يتريكن // صباح الخير

صباح النور تعالي اگعدي

كعدت يمهن وعمتي هي وامي يسولفن ويضحكن اجه ابوي وكله

فوت عمي انت مو غريب

دخل امي من شافته وكفت وعمتي خزرتني يعني كومي

وكفت هو اتقرب كال ها جاهزات

اي عمه

تمام

اتقرب مني وخله فلوس بايدي باوعتله هو كلي // هذني الج تكملين بيهن احتياجاتج لان خلال هالاسبوعين نتزوج

باوع الابوي // طبعا من بعد اذنك عمي

ابوي // حقك بابا يمته ما تكمل شغلك تجي تاخذ مرتك

ما عندي شي كله جاهز

بيها الخير ابني

امي رفعت ايدها بالدعاء // الله يوفقك يمه ويسعدكم

وصل يمها باس راسها ودار عليه // اذا يعجبج سوي حنه واعزمي صديقاتج

امي // اي ان شاالله وانت من تتوكل انطينه خبر

- - ان شاء الله ياالله اودعناكم

ابوي // فيمان الله

وسلمنه على عمتي وعلى ام كرار الي گالت // من يقررون العرس راح اجي وياهم

وطلعو كلهم وبقى بس هو يمي اتقرب وگلي // اسبوعين واجي

هزيت راسي بدون ما احچي وهو طلع راحو البغداد ومن وصلو عمتي خابرت ابوي بعدها بديت اجهز وانا صافنه على حالي

وامي ونظيمه يسولفن وياي ويوصن بيه وسويت حنه قبل العرس بتلث تيام وثاني يوم سافرنه

اجت عمتي وزوجها واجه هو وسعاد الي اجت ويا

حتى ما اجه بسيارته لا اجو كلهم بسياره كبيره واخذوني انا وامي واختي غنيه واجه ويانه اخوي حسين

همه ركبو كدام واحنه وره ويانه سعاد

والي عجبني ثاني يوم جان العرس رحت للصالون ومناك اجه اخذني وكريم ابن عمتي جاب سعاد وزوجته وزوج عمتي

الي هو عمه جاب امي وعمتي بسياره ثانيه اخذني من الصالون ركبني بالسياره واخذني صورنه وبعدها رحنه للفندق

وسط ذهول امي وذهولي

ام احسان // يعني ما سوولج زفه

لا ومن امي دخلت وياي للغرفه سالت عمتي ليش ما سوا زفه وما اجو اهله

عمتي كالت // تدرين بااهله حزينين وحتى سعاد لوما يعرفون بيها شكد تحبه ما خلوها تجي

امي // بس ام كريم ...

قاطعتها عمتي وگالت // هذا هو صورو ولبست بدله وافترو ابغداد بعد شكو خلي بتج اتفوت ابفالها

هزت امي راسها وعافني ويا وراحو وسط توصيات امي وعمتي ومن طلعو اجه هو چانت مو غرفه سويت

ومن اجه بعد ان راحو واتمنولنه حياة سعيده چان يضحك بعدها اتصرف وياي بكل هدوء وكلي شي لازلت اذكره

• نجاة انتي زوجتي يعني ملكي تسمعين كلامي واي شي يصير ابيناتنا ما يطلع بره الاي كان مفهوم

بين الخجل والتردد ما كدرت احجي ويا

اندك باب الغرفه وهو طلع وسمعته ايكله شكرا رغم اكو عشا لكن الي فاجاني انو جابوله مشروب وهو كلي

• تعالي اتعشي

باوعت اله واكلت شويه وهو راح فتح البطاله وصار يشرب وهذا الشي خوفني لكن بعدها اتصرف وياي عادي

وحتى من اخذني كان طبيعي

وبقينه بالفندق تلث تيام لان هو خابر كريم وكله لا تجون مددنه اقامتنه بالفندق

بوقتها كنت ساكته يمكن الزواج والخجل خلاني ما اكدر احجي ولا اناقش ثالث يوم رجعنه اخذني الشقته جانت زغيره وحلوه واثاثها جديد واجت امي وعمتي وغنيه وكريم وزوجته باركولنه وهو وصه على غدا من المطعم اتغدينه كلنه سوا والعصر راحو

حتى امي وغنيه لان ثاني يوم رجعو للبصره

بهاي الايام چنه هادئيين وهو يداوم الصبح ويرجع العصر ومن يصير خفر يطلب اقفل الشقه عليه ودووم يفاجىني يجي نص الليل

ويرجع الصبح وشهرين ورحنه الاهلي نزورهم بقينه اسبوع ورجعنه وما اوصف فرحة ابوي الي سواله عزيمه وعزم بيها اقاربنه

وكانما ايكللهم شوفو بتي شتزوجت وانا ناسبت منو

وره تقريبا شهرين من زواجنا هو سافر الاهله هو هيج گلي اغيب يومين وارجع اروح اشوف ابوي واتذكر رجع ثاني يوم

وگلي لمي ملابسنه كلهن بالبدايه عبالي نريد انسافر لكن هو گال لمي الملابس كلهن وراح جاب كراتين گلي خلي بيهن الصحون والجدوره وبعدها جاب عمال فتحو غرفة الاخشاب وجاب سياره شالها ويه المطبخ والثلاجه والمجمده والتلفزيون ورحت ويا وانا خايفه اثاري جابنه لهنا

  ام احسان // الهذا البيت ؟

  • اي

ومن اجينه انتو بعدنا بسنه نزلتو ابيتكم مو صحيح

اي نجاة وشنو صار

الي صار وره اسبوع اجه ناظم اخوي وكال يريد اياجر يمنه لان هاي رغبة سعاد

ام احسان // مبين ناظم شتريد سعاد ايلبيلها مو صحيح (لملمت حلكها ) او خلي انگول هي مسيطره

امي // احنه ناظم وسعاد ما نعرف هواي عن حياتهم ناظم دووم مسافر وهي يم اهلها يعني ما نشوفها وهي مبتعده

عنه ولا چنه اعيالها اهل زوجها ولا نعرف عنها شي

- وشنو اجرتو الهم بيت

- اي صار سعدي يدور وكلف كريم الى ان حصلو مشتمل اجار وره بيتنا ابفرعين

وصارت سعاد تجينه وانا هماتين اروح الها وحتى مره رحت لكيت عمتي ام سعدي عدها هيه وحماي بصراحه انا اتفاجات

وسلمت عليهم وچان ردها عليه ابروود

وحماج

حماي رد عليه السلام ودار وجهه وطلع

وبعدين

حاجيتها العمتي گتلها // عمه لويش ما تجينه البيتنا نشوفج

باوعتلي بنظره بدون ما ترد عليه

لويش

• ما عرفت السبب اتصوري حتى من خليت هشام بحضنها ما باسته

• الهلدرجه

• اي مثل ما گتلج بحيث من رجعت سعاد حتى ما لزمت بيه ابقى مثل كل مره

وبيومها اجه سعدي وحچيتله الي صار وهو تنرفز عليه وكلي

  - بعد من تردين ترحين الاختي اتصلي عليها واذا احد من اهلي موجود اياني واياج ترحين يمهم

جاوبته //. اي مي خالف بس اهلك وامك ابد ما رحبت بيه ولا حتى باست هشام

- بكيفها

• حتى انا عزمتها وگتلها عمه تعالي النه ذاك بيت ابنج بيتج وهي بقت ساكته ما ردت عليه

سعدي رد عليه بعصبيه // وانتي لويش تعزميها شنو بكيفج

• گلت لان جايه السعاد ذيج بتها وانت هم ابنها

هز راسه // ابد لا تقارنين نفسج بسعاد سعاد بتهم ويجوها مثل ما اهلج يجولج

انا جاوبته // بس همه اهلك مو غربه ليش ما يجولك ولا يسالون عنك

اهنا هو فقد وكمشني من رگبتي وصار يكول // اني ما اريدهم يجولي افتهمتي وسدي الموضوع لا اطيح حظج

استغربت من ردة فعله وليش هالشكل اتصرف لكن فهمت من رد فعله انو ما يريدني اتواصل ويه اهله واسال عنهم

سعاد دائما تجينه وتتدخل يكل زغيره وكبيره ومرات هواي تبقى تبات يمي اذا سعدي بالواجب مرات تجي

هيه وناظم ومرات ابحدها. وداىما تجي زعلانه من ناظم لكن هو يجي بنفس اليوم يصالحها ويرجعون

ام احسان //. اكلج نجاة ورجلج بقى يشرب

اي بقى ما تركه يشرب ابحده وانا احاول ابتعد عنه لان ما يحب يكون احد يمه

ام احسان // زين ومن حملتي ما اجوي عليج عيالج ما باركولج صصد

• انتي شتحچيين اصلا من ولدت محد اجالي ولا گلي مبروك

ومن صار عليه اربع تشهر اخذني الاهلي بقينه تلث تيام ورجعنا حتى اتذكر گللهم بعد ما نكدر نجي لان سفر ومو زين عليها

الشي الي شفته انو حتى عمتي هديه مو هلكد تجينه بس هو ايوديني الهم ابقى يمهم ساعه ساعتين ويرجع ياخذني

اما اهله فنهائيا ما مرو بينه بس هو يروح الهم كل شهر ومن يرجع يكون ضايج وما طايق نفسه

چان عليه ست تشهر او اكثر طلع العصر ورجع بالليل مبين علي ضايج من دخل جنت كاعده ع التلفزيون

هو باوعلي وراح طفى التلفزيون واجه كعد يمي سالني

• اختج نظيمه شلون اتزوجت

استغربت من سؤاله عرفت هو سامع شي بس منين ومنو الي كله باوعتله هو هز راسه ورجع كال

• اشبيج تباعيلي دا اساال اختج شلون اتزوجت

ابتسمت وجاوبته // يعني شلون اتزوجت مثل ما تتزوج كل الناس ،

اتقرب مني اكثر وعاط عليه //. شنو دا اشاقى وياج جاي اسالج جاوبي

بلعت ريگي // شجاوب اتزوجت ولد حالها حال الناس من تتزوج

• ها يعني ما منهزمه ويا

عرفت هو سامع هذا الكلام من عمتي ام حاتم بس شلون شافها ويمته حاولت اكون طبيعيه واتحاشى نظراته

لكن الي صار ثاني يوم اجه سعدي وسالني

• شنو قصة المدرس الي رسمج ؟

اهنا تيقنت انو عمتي وبتها مسولفات اله رديت علي بكل برود

• اي مدرس

• اني ما اعرف انتي جاوبي

• هو مدرس فنيه وسوا معرض وراد يرسم صوره الوحده من البنات وكتب اسماء الشعبه وطلع اسمي

• ها

- اي والي ايگلك غير هالحچي غلطان

بقى صافن عليه ورفع حواجبه // يعني هو ما راد يخطبج

حاولت اكون طبيعيه // هههههه راد يخطبني استاذ وبكد ابوي واساسا هو متزوج وانتقل من مدرستنا بعد يمته خطبني

- بس اني سمعت غير هالحجي

• ما راح اگلك منين سمعت بس اكيد الي سمعت منه هذا فد واحد حقود ويكرهنه

واهنا هو سكت ومشت حياتنا طبيعي حتى من رحت زياره الاهلي جبت وياي اللوحه الي رسمها صلاح وعلگتها بالغرفه

وهو اتقبل وجودها اصلا اثنى عليها لان صلاح راسم ادق التفاصيل

وهيج بقينا هو يجي من الدوام يلكاني كل شي محضرتله واذا يكون خفر اقفل عليه الباب ورغم اخاف لكن اتعايشت

ويه الوضع مرات نطلع واكثر المرات نبقى بالبيت محد يتصل بينه بس اهلي وما اطول وياهم لان اشوفه يتضايق

حتى من هو بالدوام احاول اختصر وياهم لان دائما يخابرني واذا لگى التلفون مشغول يفتحلي تحقيق ما اله اول من اخر

ام احسان // نجاة كل الرياجيل هالشكل بس شنو الي غيره

قبل ما يصير هشام وتقريبا الساعه ثمانيه بالليل اندك الباب راح فتحه شفنه امي وابوي وعمتي وعمه وكريم جايينه

چانت مفاجأه ما متوقعينها

رحبنا بيهم وما تعرفين فرحتي بجيتهم وهو استقبلهم عادي وما عاتب عمه ابو كريم لان ما يسال ولا يمر لا هو ولا عمتي

ردت اسوي جاي بس همه ما قبلو هو نزل ورجع وصى الحارس يجيب عصير

ابوي كله عمي سعدي احنه متعشين وشاربين جاي لاتتعب نفسك جايين نشوفكم

لا عمي شنو اتعبني هلا بيكم البيت بيتكم

دايم البيت واهله ( باوع) انتي شلونج بابا

الحمد لله زينه

ان شاالله تجيين اتولدين عدنا حتى اخواتج ايدارنج

هو جاوب //. اي ان شاالله بس تدخل. بشهرها انشوف الطبيبه واجيبها تولد عدكم

ودخلت بشهر التاسع وانا منتظره ايكلي امشي اوديج الاهلج لكن هو ما وداني وانا ما لحيت علي امي هالشكل وصتني

لان سولفت الها شلون سالني على نظيمه وعلى صلاح عاد هي گالت اسمعي كلامه ولا تلحيين ويا

واتذكر بيومها امي خابرتني وهو موجود وبعد ان سلمت عليه گالت انطيني رجلج

انطيته التلفون جاوبها ،هلا عمه اي ان شاالله بس ما محصل اجازه مو عبالج جاي مجاز لا اسالي بتج

اجيت المغرب وارجع الساعه بالاربعه

اي ان شاالله بس احصل اجازه اجيبها اقلها انتي واخواتها ايدارنها

الله يسلمج عمتي الطيبه سلمي على عمي

وعرفت امي ساءلته ليش ما تجيبها وهو ايكلها ما محصل اجازه وبس احصل اجيبها مع العلم هو مجاز

بس بعدين امي كايلتله لا تكلف نفسك اذا ما تحصل اجازه خليها احنه نجي البتنا

وهو سكت ما كلي امج هالشكل گالت وبقيت ما جابني الاهلي

وحسيت باالالام الولاده وجبت هشام ما اوصف فرحتي باابني وانا شايلته واشمه

ام احسان // منو راح وياج للمستشفى

• محد بس هو

• تحجيين صدك حتى حماتج

• محد اجت وياي بس هو واتذكر اخذني للمستشفى وبوكتها ما قصرن وياي لا الطبيبه ولا الممرضات

ولان شافني ابحدي وعرفو انو اهله واهلي بعيدين بغير محافظه

واجتني امي وابوي وغنيه بنفس اليوم وعمتي ام كريم اجت هيه وزوجة ابنها اتحمدتلي السلامه

واهله

محد اجه

لا بربج

مثل ما اگلج ما شفت احد اجه او اتحمدلي السلامه حتى بوكتها اهلي سالو هو جاوب

ابوي تعبان وامي يمه اتداري بي

بقو اهلي يمي خمس تيام وبعدها رجعو للبصره

زين نجاة وحماتج سعاد

ما اجت اله بعد ان راحو اهلي حتى من سالتها كالت جانت عد اهلها لان ناظم مسافر

وبقيت حتى ما رحت الاهلي بعد ان ولدت هشام بشهرين حسيت بدوخه ومن حللت طلعت حامل

ام احسان // شعجب راسا حملتي

لان بوكتها رضعت على صدري وسامعه ما يصير حمل واساسا ما راجعت طبيبه وما تشوفين مقدار التعب بين

هشام والحمل

- سعاد مو داىما يمج وتجيج اكيد ساعدتج

• لا من حملت صارت اتمر عليه قليل تتحجج. اب ابنها تگول مريض ومتعبني

- هو صدك مريض

• لا بس ما تريد تجي خاف اطلب منها مساعده

ام احسان // ومن جبتي رامي

• نفس الشي بس سعدي وبعدين يجون بيت عمتي ام كريم وهي تروح البيت اهلها

• عجيب

• المهم صار عمر رامي سنه وهماتين اجت وجدان ومن اجت صارت هواي شغلاات

• شنو نجاة

• ما اسولف لج جهال تلاثه وطلبات الرجال صدك تعبت اتذكر من شافني شكد اعاني كلي راح اجيبلج حبوب مانع

حتى بعد ما تحملين ومشت حياتنا بين تربية الجهال وعصبية سعدي وشغل البيت 

م احسان //. بعد هاي معاناتنا كلنه بااول زواجنه لكن اني لحد هسه ما عرفت سعدي لويش هالشكل يتصرف وياج

اتحسرت //. هواي امور ومشاكل بس صدكي يا خوله انا ما الي يد بكل الي صار

تقصدين عرف بسالفة اختج نظيمه

مو بس سالفة نظيمه

لعد شنو ؟

ابتسمت // تدرين خوله جاي تفتحين ضيم وجروح ما عولت انساها

• الله يساعدج والله نجاة ردت اعرف ليش الله يرحمه هالشكل يتصرف وياج واذا الحجي ايااذيج لا تحچيين

• لا يمعوده شي راح وعلى گولة عمتي صارن سوالف

• بس احس الصار وياج شي چبير

اي شي بعمري ما انسا

  ياستار شصار

  بيوم اندك الباب وهو جان بالغرفه توه طالع من الحمام وانا بالمطبخ رحتله وحاچيته //. سعدي الباب يندك

• روحي افتحي اكيد سعاد جايه

رحت گلت منو اجاني صوت // انا افتحي

ما عرفت منو بس صوت رجال چان صوته خشن

فتحت شويه الباب اريد اعرف منو هذا الرجال شفته يشبه سعدي هو بدون ما يسلم گلي // رجلج اهنا

هزيت راسي يعني موجود

روحي گليله // ابوك بالباب

بلعت ريگي وانا متفاجىه ابتسمت // هلا بيك عمو

  فتحت اله الباب ردت ابوسه بخده وايده لكن هو ابتعد. انا من فشلتي گتله // اتفضل

لا اهنا صيحي

  - لا عمو شنواهنا اتفضل البيت بيتك

دخل واشوف الرجال عصبي وضايج وريكه يابس رحت بسرعه وانا اگله // سعدي ابوك ابوك بره رايدك

هو باوعلي //. وينه

گوه ياالله دخل گاعد بالهول

اي وانتي شبيج هلگد خايفه

لا سعدي مو ابوك اول مره يجينه بسرعه بدل واطلعله

انا رحت للمطبخ خليت ماي بدولكه وكلاص ورجعت سويت جاي وحتى خليت عصير بس منتظره سعدي ايگلي شقدم

سعدي راحله وانا رحت ورا لكن سعدي سد الباب واسمع ابو ايگله // اريد احچي وياك بموضوع مهم

   سعدي ابرود // اي اسمعك حجي

مو اهنا بيني وبينك

- اتفضل بالديوان فتحله باب الصاله الداخلي واجه سعدي كلي ابقي بمكانج

يعني ما اجيب جاي عصير

لا كل شي لاتجيبيين روحي للغرفه يم جهالج

رحت للغرفه وجبت الجهال للصاله حتى اخذهم العمي لان هو ما شايفهم ولان هاي اول مره يجينه حبيت ان يشوف

جهالي ويخليهم بحظنه حاله حال الاجداد الباقيين من وصلت سمعت صوته وهو ايكله

- خاف الله انت عندك مره وابنيه والدنيا دواره

سمعت ضحكة سعدي باستهزاء وهو ايگله // المره والبنيه بنعالي ما اشتريهم

ابو يرد علي // الى متى تبقى بحقدك ما كفاك الي سويته

اهنا سعدي //. اا ما كفاني ولو بيدي اسوي اكثر

خوله //. ليش شكو

ما ادري شنو صاير بس كلام عمي بقى دائما يرن بااذني

   • شكال نجاة

  سمعته بحركه والعبره مكسره صدره وهو ايكله // الله يغضب عليك حسبي الله ونعم الوكيل تلگاها ابعافيتك وبزرك

وسعدي يحجي بتشفي //. ههههه ادعي شكد ما تكدر لاتخلي ولا تبقي

طلع عمي وهو ما يباوع النه وهو يتحسب ويكول // الله يغضب عليك الله لايوفقك

وشفت سعدي طلع ولا مهتم الزعل ابو

ام احسان // وعرفتي المن جان جاي عمج

• لا حتى ما اتجرأت اسئله ولهسه خوله ما عرفت عمي المن اجه ولا ليش هلكد دعى على سعدي

   خوله // وبعدين نجاة

اتحسرت // صارت سعاد مو مثل قبل تجي لا قللت جياتها ومن اخابرها بالارضي حتى ارووح يمها تعتذر

لو طالعه للسوك لو يمي اهلي لو اريد اروح الاهلي لو انا اريد اجيكم

وانا بسبب الجهال والبيت ما اهتمييت للامر وبيوم اجت سعاد تقريبا العصر ومبين عليها كلش ضايجه وبيومها

انا رحت للمطبخ وهي خابرت سعدي وسمعتها اتگله // تعال بسرعه انا ابيتك

وفعلا ساعه واجه

ام احسان // دوامه يمكم

• اي بوكتها دوامه يمنه يروح تلث تيام ويجي يومين لكن ذاك اليوم اجه ثاني يوم التحاقه

• ليش شكو

• ما اعرف اتفاجآت بجيته راح للديوان هو وياها وصارو يحجون وانا احضر بالعشا بس بيني وبين نفسي اگول اكو شي صاير

صارليل واريد اصب العشا واندك الباب وراح سعدي فتحه وطلع ما اعرف وين راح

وهيه اجتني وكالت // جيبي جهالج وتعالي للبيت (تقصد بيتها)

جاوبتها //. ليش نروح انا سويت العشا وهسه سعدي على جيه

سعدي ما يجي وهو گلي ترحين وياي

اي شكو شصاير فهميني

امشي وانتي تعرفين

حسيت اكو شي صاير وما تقبل تكلي بيني وبين نفسي گلت اكيد ناظم بي شي

لكن الي معجبني برود سعاد

اخذت الجهال ورحنه انا وياها الى ان وصلنه للبيت يمكن عشر دقايق وانا اشوف سيارات تلاثه اباب بيتهم

ام احسان //. ياستار شصاير ،

دخلنه وياي الجهال واتفاجات بالي شفته

ام احسان // شنو شفتي

• شفت الي بعمري ما راح انسا ويوميه ينعاد عليه مثل الكابوس ( اتحسرت ) شفت سعدي واخوانه دايرين داير مداير

ناظم واكعين بي ضرب مدمى من جميع النواحي وهو گاعد وخال ادينه على وجهه ما يگدر يدافع عن نفسه

وهمه يرفسون بي باحذيتهم ومسوين وجهه خارطه المنظر الي شفت بي ناظم لحد هاي اللحظه من اتذكره گلبي يرجف

من الخوف وشفت عمي گاعد على كرسي يباوع وهو يدخن

شكرا لزيارتكم عالم روايات سكيرهوم