رواية قصة خلف الفصل الثامن بقلم جمانه السعيدي
خلف....امي امي ماتت من زمان صار اكثر من ١٢ سنه
...مو ام ياسر ام ياسر اعرف ماتت الله يرحمها امك انت
خلف...امي شنو انت تريد تخبلني ماعندي ام
...امك صبيحه مره حبيره ومريضه ومحد بحالها
بيت اخوها مكعديها بدبدوبه طين ( غرفه طين زغيره) محد بحالها
خلف...لا تخبلني اي ام مافهمت
...اسئل ياسر وهو يفهمك
اخذت المسواك ورجعت للبيت بسرعه طاير
دخلت البيت ياسر وكمت اصيح ياسر ياسر وينك
ياسر...الله يستر شبيك أصيح
( احب ااكدلكم القصه حقيقيه ،)
خلف....امي شنو قصة امي احجيلي
ياسر...امك
خلف...اي اني عرفت عندي ام موجوده عايشه واني كل هاي السنيين مااعرف بيها احجيلي ياسر لان ماضل عقل براسي
ياسر...شلون عرفت
خلف...مو مهم شلون عرفت المهم اريد اتاكد
ياسر.. اكعد واهدء ليش عصبي واني هسه راح احجيلك
كلشي
خلف...ليش ماحجيت من زمان اذا فعلا عندي ام ليش اني ماعرف اي شي عنها
ياسر...استغفر الله العظيم ولله مو قصدي بس توقعتها ماتت
خلف..احجي بسرعه جمانه السعيدي
ياسر....ابوي جان يستغل قبل دلال يجيب شغلات نسائيه
بخور عطر ملابس شيله نسائيه كحل دريم ملابس
ويصعد على المطي ويضل يفتر بلعرب يبيع على النسوان
كبل ماكو نسوان تنزل للسوك عيب
النسوان تشتري من الدلال لو تبدل الغراض بدهن حر لو زبد لوروبه
بوقتها ابوي جان مزوج امي ومخلفنا اني وحسن والبنات
حسن جان زغير عمرا سنتين بوقتها
بيوم من الايام ابوي طلع للعرب يمشي ويصيح بلعرب ملابس عطر ديرم
جان طلعت وحده من بيت بس مو بنيه تخبل ماشايف كل عمره مثل جمالها ابد بقا أكف منبهر بجمالها اتخبل عليها انجن
سئلها عرف هي مامزوجه
رجع للبيت وهو يهذي بيها كابل امي وكال اني راح اخطبها وازوجها واذا فتحتي حلكج بكلمه اطلكج
اني راح اتخبل عليها
امي حجت عاركت لطمت مافاد الكلام ويااا مصمم يزوجها يعني يزوجها
اخذ مشيه وراح الابوها يطلب ايدها
ابوها راسا وافق بدون حتى ما يسئل عن ابوي لو يعرف شي عنه وافق حتى لمن عرف ابوي مزوج وعنده اربع اطفال
ابوها اخذ المهر وكاله تعال بعد اسبوع العرس
ابوي ماصدك نفسه بنيه حلوه وزغيره بس يطلبها تجي كبل امي من سمعت اهلها موافقين كبل اخذتنا وراحت الاهلها زعلانه الهسه اذكر جدي اتعارك وياا امي ما قبل تعوف بيتها كاللها واذا ازوج ارجعي اكعدي بيتج واسكتي
جمانه السعيدي
رجعت امي مكسوره للبيت
اجا يوم العرس ابوي راح فرحان مامصدك نفسه ملجوها علي جابها واجا عروس ملفلفينها ماشاف وجها بيتهم
جابها واجا مكيف وفرحان بيها دخل للغرفه وطبك الباب
رفع البركع طلعت مو هي الي شافها
ابوها ضحك علي عدهم وحده جبيره وموحلوه فاتها قطار الزواج وابوها يريد يمشيها
من ابوي طلب البنيه الحلوه ابوها فكر يمشيها على ابوي
ابوي من شافها تخبل طلع من الغرفه كام يلطم ضحكو عليه
قشمروني شلون هيج يسوون بيه
امي كانت اول الشامتين بي
ابوي مايكدر يرجعها الاهلها بنيه راح يكولون هو مورجال وماكدر يدبرها ورجعها الاهلها
دخل عليها واخذها وهو كاره نفسه
بقت عدنا ٣ ايام بلضبط وابوي طلكها ورجعها الاهلها
كاللهم انتم ضحكتو عليه مو هاي الي شفتها بتكم طالك
بعد مااريدها
بلنسبه الابوي انتهت قصة زواجه هاي وتندم ندم مو طبيعي لان خطى هيج خطوه بس امك صبيحه طلعت حامل
اهلها دزو علي كالو البنيه طلعت حامل اول ما تولد تاخذون ابنكم احنا مراح نربي الكم
فعلا من امك ولدت دزوك النا بيد واحد
ابوي جابك الامي وكاللها تربي حاله حال ولدج فهمتي لو لا
امي كانت ماتحبك لان اذكرها بزواج ابوي عليها
وابوي كلما يشوفك يذكر شلون ضحكو علي بهاي الزواجه
لذالك سموك خلف هاي قصتك بختصار
خلف ..اريد اعرف وين أهل امي لازم اروح اشوفها
خلف.. اخذت العنوان ورحت للقريه الي عايشين بيها خوالي
من شافوني ماعرفوني
دخلت على ببت خالي سلمت وكعدت
خالي...ولا زغير بيك ماعرفناك
خلف...اني خلف ابن صبيحه اجيت اشوف امي
خالي.. توك اذكرت عدك ام
خلف....امس يله عرفت عدي ام اريد اشوفها
خالي...اي روح ذيج الدبدوبه الطين تلكاها بيها
خلف كمت امشي اقدم خطوه وااخر خطوه تعرفون شنو واحد عمره أربعين سنه توه يله عرف عنده ام
امه موجوده وعايشه بلضيم وهو مايعرف عنها شي
دخلت لكيتها مره عجوز ضعيفه ماتشوف هلكد نضره ضعيف كاعده بغرفه طين زغيره مابيها غير فراش
وعدها كم ماعون فافون
بس دخلت كالت
....ياهوو ياهوو هذا
خلف...من شفتها دموعي نزلن ما مصدك هاي أمي
.. اني اني يمه
....ياهوو انت مااعرف صوتك غريب عليه
خلف....اني ابنج خلف خلف ابنج الي عفتي صار ٤٠ سنه
.. ابني...انت ابني تحجي صدك شو جرب عليه
خلف..كربت كعدت كبالها
كامت تباوع عليه اديها ضعاف كلش كامت تمررهن علي وجهي انت ابني تحجي صدك
خلف...اخذت ايدها من على وجهي وبستها
اي ولله اني ابنج اعذريني ماجنت اعرف عندي ام امس يله عرفت
....تعال جرب انا مااشوف زين
خلف..لزمتني من خدودي باديها ثنيبنهن تريد تشوف ملامحي رغم نضرها ضعيف بس ادقق بملامحي حيل
ماكدرت اصبر كمت ابجي ما مصدك بعد كل هذا العمر امي موجوده وعايشه
هي هم كامت تبجي يايمه ولله تمنيت اشوفك من زمان وماردتك اطيك الابوك بس ابوي عاند بقيت ايام وليالي ابجي عليك ابوي ضالم ضلمني وضلمك
خلف.. تعاي وياي بعد مااعوفج هنا ولا دقيفه
اني مزوج وعندا ٣ اولاد وبنيه زوجتي خوش بنيه راح تحبج تعاي وياي جمانه السعيدي
خلف...طلعت الخالي ...من رخصتك اريد اخذ امي وياي
خالي.. اخذها هنا محد بحالها
خلف...شلتها بحضني صعدتها بلسياره ومشينا
الطريق كله اباوع عليها وابجي لو اعرف من زمان امي موجوده جان ماعفتها تعيش هيج عيشه ذليله جان اخذتها وياي
وصلنا شلتها ودخلتها للبيت
خلف...سليمه سليمه جبت امي طبعا سليمه عدها علم بلموضوع مسبقا
سليمه...دنكت عليها وباستها هله عمه شلونك
....انت ياهي مرت خلف
سليمه.. اي عمه هله بيج هذا بيتج
...الله يخليج انتي وخلف
خلف...رحت جبتلها ملابس جديده وعطر وفراش جديد محد نايم علي
يومين اني مااطلع للشغل مكابلها وكاعد ما مصدك اني بهذا العمر وعندي ام
ياسر ونعيمه كل يوم يجون يكعدون يمها يتشافون و يسولفون وياها
ست اشهر بس عشت وياا امي الموت زاحمني عليها
ست اشهر وماتت امي ولله بعدني ما شبعت منها
حتى جهالي حبوها ينامون يمها بليل
اخذتها دفنتها بلنجف وسويتلها فاتحه جبيره
مع الأسف ما شبعت منها
بس المهم شفتها وعرفت بوجودها
ولدي ازوجو ثنيبنهم وحتى البنيه انخطبت
اشترينا بيت جبير وبناء حديث ونتقلنا
بس قريب على بيت ياسر لان ماستغني عنه احن كلب بلدنيا ووحسن بعده على نفس وضعه
ياسر انطا خواتي حصصهن وزوج ولده وبناته وراح للحج
وبعده بيتنا القديم الهاي اللحظه
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
