رواية بيوت الصفيح الفصل التاسع 9 بقلم زهراء السراي

.

"هم لا يعرفون ما معنى أن تكون شخصاً يتجاوز كل شيء وهو صامت

يتجاوز ويتجاوز بكل هدوء

حتى يعتقد من يراك أنك لم تتعثر يوماً.

.

.

.

.

صِبى

_____

الضربات القاتلة متتوجهلك

فقط من الأسلحة النارية

ولا من الأعداء

أحياناً الضربة التي تنهي

حياتك تصدر ممن هم أقربهم

صلة بك

گاعدة أباوع للبوفية ولخانة فرقد

بالذات أغراضه البسيطة

ملابسة مرايته الصغيرة اللي لازكها

بالباب فرجة الشعر مالته

اللي ملتصقة بيهة شعرات من

آخر مرة مشط بيها محتفظة بيها

بكيس بلاستك حتى لا تتطاير الشعرات الرقيقة

منها

الكارتونة گدامي اخلي بيها اللي أريده 

واشيلهن بلطف وكأنهن أثمن أشيائي

اتجهت بعدها لأغراضي كذلك اختصرت

اخذت الزين والضروري والباقي تركته

دموعي ماتوقفت وذكرياتي بهالبيت

القديم الرث هجمت عليه

مرة وحدة وطلعت راكضة للهول

لمكان گعدته أباوع البيت بدأ يفرغ

والأغراض أغلبها توزعت عالجيران

اللي رغم قدمهن محافظين عليهن

اني وخالتي فخالتي طبيعتها النظافة

بهووس خالتي على كرسيها تسفط

الملابس بكارتون و غِنى بصفها تنطيها اللي

نريده

نزلت دموعي واني أشوف مكانه الفارغ من

سنين

وافترت دوامة الذكريات براسي 

واحنة صغار طالعين برة سوينه

بيت صغير من طين وحديقة

ويا وحظيرة حيوانات

وسيارة اباوعله ينحتلي بالطين اللي اريده

-فرقد اني مااريد بيت

اريد مثلك شمسوي هذا الصندوگ

-هاي سيارة راح اشتريها من اكبر

-تاخذني بيها لأمي

ابتسم

-وأصعد بيج للنجم فوووگ

گالهة وشالني يفر بيه ويضحك

وعيت من هالذكرى على صوت خالتي

اللي خربطت لحظات ذكرياتي بسوالفها

هي و غِنى طلع ويه ملابسها تراك

لأبويه وگعدت تنعي بالجذب

وتغم بالملابس

-ياااااايمة ياعامر على ريحتك وتنام

عيني

يابعد طولي طولك يايمة ياگ***د المنطقة

يابعد حيلي

طگتها غِنى ضحكة واني كممت حلگي

فالوضع اللي أحنه بي مايقبل هزل

ماسكتت رجعت كملت

-يمااااااااااه يمه يعامر يابعد روحي

شلونك بالگبر منكر ونكير طلعو الشرب من ......

لحظة صمت سادت واحنه منتظرين التكملة وندري بخالتي تبعرها بس غمت نفسها وكملت

-من خشمك يطلعون الشرب يابو جهامة الحلوة

يابعد روحي حتى موتتك مقندرة مثلك 

بعد ماگدرت أسيطر أنفجرت ضاحكة

و غِنى وگعت على كومة الملابس اللي گدامها

سكرانة ضحك وخالتي مستمرة

-يابعد هالعين ياعموري أكيد أمي

الله يرحمها جانت حولة 

ناسبتك مرتين مرة اختي ومرة آني

-اگلج خالة شجاج وقبلتي

باوعت خالتي لغِنى وأبتسمت بقهر

-أمي سودة عليه عود تريد تأمن عليكم وعليه

خلتني أتزوج عويمر العار

-مااسمحلج تغلطين

هزت ايدها خالتي ورجعت تسفط

- سودة علية جان يحملج

گواني فلوس ايييييه اييييه يغنيوة

غنيلة

ابووووي يامن دللاني

ومن الشرب حمل گواني

هناااااه يعويمر يابعد خشمي

رجعت غِنى وفقدت من الضحك

على كومة الملابس 

تركتهن وطلعت اباوع لمُنى تخلي الصحون

اللي نريدهة بالكراتين

باوعتلي مبتسمة

-صباوي 

-ها حبيبتي

-الله عليج يعني البيت اللي نروح

نسكن بي بيت بييييت لو مثل هذا

-بيت بيييت

-طابوگ وسگف ومنگعد بالمطر بغرفة وحدة

خاف نتنگع

-ايييي ولج

ضحگت وبينت غمازاتها

أباوعلها بيها ومتشبه أمي بالشكل

شعر بني مخلوط بشگار وعيون عسلية فاااتحة

ونعومة مفرطة ولسان يضحك

طلعت تاركتهة واني الملم اللي نريده

فتحت خانتي باوعت صندوگ هدايا رضا

اليه طلعته ضحكت بسخرية

طلعت وهو بيدي فتحت الباب اللي يطل

عالجدول وفرغت الصندوگ بالمي 

رجعت للبيت أشتغل وياهم

أصحاب البيت بعد يومين ياخذو

كملنة وماتركنا بس كم حاجة نمشي

بيهة نفسنا الى أن نروح للبيت الجديد

نمت بتعب وصحيت بوقت مبكر

لبست قميص أسود وكيلوت عريض

ولفيت حجابي وثبتت الكمامة بدبابيس

وطلعت للشارع ومن كيا لكيا وصلت

دخلت بسرعة لغرفتي حظرت الجاي

كالمعتاد للأستاذ خليته بترمز صغير

لأن ميريد جاي أكياس

واخذته اخلي بالمكتب لأن هو متعود

يجي متأخر شويه

دخلت المكتب هدوء فتحت الشباك

اهوي المكتب تلميع شويه منا ومنا

طلعت بعد ماسديت الشباك تلاگيت

اني والأستاذ بباب المكتب ارتطمنا

ببعض أبتعدت متوترة

-آسفة حضرتك

مسح جبينه ضاحك

-يابة نعتبره صباح الخير

شنو هالغيبة يومين أجازة

-اعتذر أستاذ ظرف طارئ

-أن شاء الله يكونون الأهل بخير

-الحمد لله أستاذ بخير

-صوتج متغير اكو شي صاير للحجية

-لا أستاذ بس تعبانة جاي ننتقل لغير بيت

ويادوب لمينا أغراضنا بهاليومين

أشرلي للمكتب ودخلت 

-كوب جاي من ايدج

صبيتله وخليته على المكتب مسح على جبينة وهو يسألني

-وين أنتقلتو

-لل............

-حلوو أنتقاله موفقة شعجب

-ظرف مر أجبرنا أن ننتقل

-شوية سكر الجاي فاهي

تقدمت اخليله من العلبة

خليتلة خاشوگة ابتسم وحتى عيونة تتغير من يبتسم 

-عاشت ايدج

وگفت مستقيمة أرتب قميصي

حتى أطلع همس

-صِبى والدج شلون توفى

-بجلطة أستاذ

-بس صِبى لگو كمية كحول جبيرة بدمة

مرادو ينطو للدفن الا تشريح 

گعدت عالكرسي بتعب أحس هالسمعة

السيئة راح تلاحقنا حتى بعد مماته

-ليش ماگلتي حتى اساعدكم بالاجراءات

بدل وقوفج بالبرد انت وخالتج بذاك اليوم

-وهالشي تعتقد بي فخر حتى أحجي بي

ابوية مات نجس بنصف القذارة

-آني مشيت الأمر بمعرفتي

لأن خفت عليكم تبقون بالمستشفى

بهتت وخفت صوتي

-دفعت فلوس أستاذ

قرب كوب الجاي لشفافه وشرب رشفة

-لا

-احلفك بالله

-لا گتلج عندي جماعة اعرفهم سهلو الموضوع

مد ايدة للمجر فتحة طلع ذات الشريط مال العلاج 

اشرلي على بطل مي گبالي

-المي من يمج

مديتله ايدي بي شرب الحبايتين وباوعلي

-صِبى اليوم خليج هنا

صفنت بوجهه وحرت شگول كلمة ليش طلعت

مني لاارادية

-ليش 

-عندي ملفات هووووايه تحتاج ترتيب

وأريدج تسويهن ويايه.

-تتدلل أستاذ لكن بعد الدوام

-لا منا لنهاية الدوام تبقين والموظفين

كل واحد يخدم نفسه جاي موجود وغلاية موجودة

بلعت ريقي بصعوبة دوام كامل متقابلين

مااعتقد اگدر وأخجل مااخذ راحتي

سكتت على مضض وهو يلبس نظارات القراءة

الخاصة بي ويأشرلي 

-الكمامة نزعيها تنفسي براحتج

مديت ايدي سحبت الدبابيس اللي مثبتة

بيهم الكمامة

خليتهم عالمكتب رفع راسه. باوعلي

نزل راسة يقرأ الملف گدامه وحجه بيت

شعر فصيح

-أشرقت شمس صبحها وتجلت

ويح قلبي اذا مايوم طلت

باوعت تجاهه مستفسرة

-شنو أستاذ

-جاي استذكر قصيدة قديمة

احممم تفضلي هالملفات والاغلفة گدامج والستك نوت

سويهن بالترتيب مثل ذاك اليوم

بديت ارتب وأعدل بيهن وكل ملف بملفه

ساعة خلصت مجموعة

رفعت راسي لأن رگبتي تعبت

قدمتهن اله

-كملت هالمجموعة أستاذ

جيبيهن بالله

وگفت اخذتهن اخليهن بجهته

واگفة بصف كرسيه اخلي الملفات بصفة

افتر بالكرسي وتراجعت بسبب قرب وجهة مني

-العفو

اعتذر وابتعد هو والكرسي رجعت لمكاني

يسألني وأرد علي على اسماء

الملفات وترتيبها

-هاي الخمس قضايا ترتبن

التفتت باوعلي عينه عليه

-احتاج أحد منظم مثلج يرتب حياتي

ابتسمت ورجعت لكرسيي

-حياتي نفسها يحتاجلها اللي ينظمها

بعدنا نحجي وانفتحت الباب ودخل

اخو حمزة بيده جنطة جلد أنيقة

وتلفونه على أذنه يحجي بلغة انجليزية

ومنزل راسه ممنتبه فزيت واگفة

جاي اطلع صاحلي الأستاذ

-وين رايحة صِبى

-هاااا اخذو راحتكم أستاذ

-ابقي بمكانج ورانا شغل 

اباوعلة گعد عالكرسي يكمل حديثه

بالتلفون وفتح جنطته طلع ملف منها

وتغيرت لهجته للعصبية الملف اللي بيده

شگگة قطع صغار وشمرها بالگاع وآخر

شي رگع التلفون الي عبر حرفياً بصفي

وهو يصيح

فزيت من تصرفه أجيت أطلع

مشيت خطوتين اجاني صوته عصبي

-ويييييين مولية لمي هالقذارة من الگاع

صفنت بوجهة وغليان حار صعد من معدتي

لبلعومي واني أسمع أهانته اللي يوجها اليه

غمضت عيني استحظر الجواب فآني بالمواقف العصيبة

لا تحظرني الكلمات الا نادراً

فتحت عيني علي ووگفت مقابيله

-أعتقد من حسن الخلق من نطلب من شخص خدمة

نطلبها بتواضع

-ترديني أركعلج بدربي حتى توافقين تسوين شغلج

گوووومي لج 

ردت أجاوب رد بمكاني الأستاذ

-حمزة خلي صِبى بعيدة عن عصبيتك ونوبات

غضبك تفضلي صِبى نكمل كلامنا بعدين

-ايييييييي كلام عندك وياها مو هي هاي

الرخيصة اللي علمودها فقدت وعيك بمنطقة

نصها مقالع وقذارات 

صرخ الأستاذ بغضب

-حمممممممزة ثمن الكلمة قبل لتحجيها

باوعلي بقرف وأشرلي عالگاع

-شيلي الورق من الگاع فضيني

-أعتذر أستاذ كلامي مو وياك 

التفتت للأستاذ

-أستاذ اني أعتذر مااگدر أكمل بالشغل

بالنهاية آني أنسانة مهما كان المسمى الوظيفي مالتي

عاملة خدمة او غيرها يم كرامتي كل شي يتوقف

اعتبرني مستقيلة أستاذ

-اي كرااااامة حضرتج ببيوت الصفيح والمقالع والقاذورات

اي كرامة بسيارة مديرج بطريق مقطوع

بالليل

بلعت ريقي استحظر كلامي وارتجف جسمي غضب وقهر وعصبية 

ورد قبلي الأستاذ بعد ماوجه نظراته لأيديه اللي

ماتوقفت رجفتهم

-أستاذ حمزة توجه للبيت الوالدة تحتاجك الشركة

مو بعازتك

طلع حمزة ضارب ورا الباب بغضب

وتحرك الأستاذ ناحيتي بعد ماانهارت اعصابي

توجهلي بخوف

بلا تفكير ولو للحظة أمسك أيديه وهو يردد بتوتر

-كااااااافي لترجفين هدي نفسج

صِبى شووووو باوعيلي رفعي عينج

رفعت عيني وأنهالت دموعي تعلن أنتهاء صبري

وحدوده ويا سخرية البشر مني

ومن عيشتي ومكاني

-لترجفين لترجفيييييييين

حجاهة وهو يضغط أيديه بقوة بين ادي

سحبت أيديه امسكهم بقوة

-باوعي

رجعت رفعت راسي

- مستحيل ميوصل الشركة بعد فهمتي

عليه ممنوع تتركين شغلج فهمتيني هو اللي ميوصل هنا 

بسبب وضعي المزري وبسبب قربه مني هزيت راسي

بالموافقة وسحبت ايديه

مبتعدة فقرب المسافة بينة خلاني

اتابع كل مسامة بوجهه الأسمر

ولحيته المنثورة بكم شيبة بيضة

جسمي رافض الحركة توترت واني اعدل بأطراف

ردني انزلها على على اصابعي وكفي 

اباوعلة يعتذر بنظراته

قبل لسانه ويبرر سبب الكلام القاسي

اللي توجهلي من اخو بعد ماشاف دموعي رافضة أن تتوقف 

-عذري صِبى عايش طول عمره بالخارج 

مستغرب منطقتكم وبيوت الصفيح

وعندة مشكلة جبييييرة بحياته حالياً مخليته

حتى بالبيت أعصابه تالفة

اطلقت ضحكتي العالية تحت أستغرابه

-هههههههههههههههه بيوت الصفيح

أستاذ شنو هالأسم المنمق

شنو هالأكسسوار الحلو اللي تحاول تحلي بي واقع

سكني

اسمها بيوووووت التنك

تنك أستاذ موووو صفيح

انحنيت بالأرض 

رفعت الأوراق المشگگة امتدت ايده يساعدني

رفعتلة راسي ابتسمت بمرار

-هذا شغلي استاذ لتتعب نفسك

عينه مني تجاهلت نظراته واني الملم الاوراق بسرعة

وهو متوتر يهز برجله

طلعت مسرعة واجاني صوته الهامس

بأذني

-صِبى

تجاهلت نداء گلبي بالاستجابة وطلعت بروح رايحة

شبه راكضة للغرفة اللي اگعد بيها

ولأول مرة ألوم فرقد على كل شي جاي

يصير حجيت ويا كأنة گبالي اعاتبه بصوت مرتفع 

-شوووف فررررقد هاي نتيجة غيابك عني

بهالسرعة مستعجل رحت شفت مدللتك

وين صارت شفت الدنيا شجاي تسووووي

بيه بعد وبعد فرقد بعدددددددد راح

تحطمني وراح تدفع بيه لقاعها

بلا رحمة لك يگلي رخيصة ششاف

مني شعررررف مني بس حقه

مايعرف آني اخت منو ومدللة منو 

أندفعت الباب بخفة معلنة دخول شخص

التفتت الأستاذ واگف سد الباب ورا متوجه ناحيتي

-لأي مرحلة واصلة من التعب حتى تطلبين 

الأمان من أخوج الميت

مسحت دموعي واني اعدل بالاكواب والشغلات

گدامي

-اللي عاش اللي عشته راح يتمسك

حتى بأرواح الغياب يطلب منهم أمان

-لهالدرجة تحبي

-أحبه للدرجة من مات حرت المن أشكي عن موته

الوحيد الجنت أريد احجيله عن موت فرقد

هو فرقد نفسه بلحظتها أكتشفت أن الجنازات

مانقيمها للأموات لكن للأحياء

فبساعة اللي هالو علي التراب اني

ودعت گلبي وآخر ذرات حبي لهالدنيا

لمثواها الأخير

-أقسم بالله اللي صار مراح يمر

مرور الكرام 

-آني آسفة أستاذ بس مو من حقه يحكم عليه

هيج حكم مسبق

ولو اني اليه موقف قديم ويا قبل سنوات

مشابه لهالموقف

صفن بوجهي يستفسر

-قبل سنوات يعني بأي عمر جنتي

-جنت ثالث متوسط بعمر ال١٦ سنة

أجيت لهالشركة أطلب المساعدة القانونية

لفرقد لكن أخوك قابل طلبي بالرفض

ابتسمت بمرار

-لو موافق بوقتها ومساعدني جان

فرقد حالياً حي ويمكن اني مجنت راح

اشتغل هنا ولا راح اتعرض

للأهانة 

سحب كرسيين وأشرلي أگعد وبديت أشرحله

الموضوع من بدايته وشلون أجيت هنا

وحمزة شسوه

باوعلي بنظرات حايرة وطلع بدون

ماينطق أي كلمة لبست كمامة ثانية وبديت

بشغلي خلصت الطلبات وگعدت بتعب

ساحبة الكرسي گدام الشباك اباوع للشارع

وللناس اللي بي مستذكرة صدمتي

بعد اللي صار لخالتي ومعرفتي بأن

مكان عملي هو نفسة المكان اللي خيب

أملي سابقاً رجعت بماضيي للسنة الفاتت

.

.

.

.

الشهر الخامس

٢٠١٦

بعد أسابيع من معرفتي بزواج رضا

أفتر بالبيت أشتغل بأنتظار خالتي 

الجو حار والبيت خنگة صحت على

البنات

-غِنى مُنى راح أطلع أتمشى عالدكان اشتري شي

بارد نشربه

تركتهن وطلعت الدنيا عصر وهوسة اطفال

المنطقة ولعباتهم الطفولية وصياحهم

هارج الدنيا اخذني الواهس للدكان اللي

عالشارع العام وصلت أشتريت عصاير والتفتت راجعة

الشارع العام سايدين

اجاني صوت خالتي

-صباوووي اوگفي ولج

التفتت واكفة عالسايد الأول بيدها علاليگ

مسواگ

ردت اعبر صاحت

-سيارات انتظري اني جايتج

عيني منها بس التفتت على صوت صاحب الدكان

-عمووو تعاي اخذي الباقي

مشيتله اخذه ووقفني صوت بريك سيارة سريع

وصياح صاحب الدكان

-دعمممممممها

ركضت بخوف واني مدركة ان ماكو غير خالتي

عالشارع ويا طلعتنا وركضنا كم شخص عالشارع

شخطت السيارة هارب صاحبها من مسؤولية

الأنسانة اللي تركها مدماية مرمية على جانب الشارع

ركضتلها أعيط والناس التمت توقفت سيارة

والسايق صار يصيح

-الله واكبر ولكم الحرمة ميتة وخايفين تشيلوها

رفعوهة لسيارته واني وياهه

صارت بحضني أباوعلها وجها مدمى

وتفتح عينها وتسدها

نزلت دمعة من عينهة وهي تباوعلي گوة

طلعت الكلمة من بين شفافها

-مُنى 

بجيت واني احضن وجهه

-ماعليها شي بس رجعيلنا

همهمت بألم وحجت

-يمة شلون بيجن 

ولأول مرة أستشعر أن خالتي صدگ بعد أمي بالمقام

ولأول مرة تنطقها من گلبها نابعة من خوف

من ألم

-راح تگوميلنا بالسلامة ماالنة أم غيرج

غمضت عيونها باجية وغطت بأغماءة

بجيت آني على أثرها هوووايه

بجيت

وصلنة المستشفى أستلموها بالطوارئ

الأصابة جانت بظهرها وجروح بوجها

وراسهة وكدمات بديها ورجليها

يومين مرن عذاب صحت لكن كسور

رجليها خلونا منعرف نسوي

شي احاجيها بس تبجي وخايفة تكون

تكسرت أبويه اجاها مرة وأيمان بقت يمها

يوم بعد ماهي طلبت تلفونها واتصلتلها بالمدير

اللي دز مبلغ مالي بيد واحد من الموظفين وبلغها

ان راتبهة ماشي منا لمن تتحسن

لكن بعد اسبوع أكتشفنة الفاجعة ضربة العمود

الفقري شلت الأطراف السفلية

لخالتي غطت بنوبة حزن عميقة

ورة مفتحو الجبس من رجليها

أستوعبت اللي صار وبدت تسترجع قوتها

-شوفي صباوي اني بعد انتهى مشواري

بالشغل اريد أطلب منج طلب

-طلبي عيوني الج

-سالمات عيونج

-تشتغلين بدالي

صفنت بوجها

-عاملة

-بشرف وتاكلين لگمتج من غير منية

وتعيشين نفسج وخواتج والراتب الج مااريد

منة بس علاجي

بقيت يوم كامل افكر الى أن أتخذت القرار بالموافقة

واخذنه رأيي أبويه تحصيل حاصل

اتصلت خالتي بالمدير وافق يخليني بدالها

انطتني العنوان توجهت للعنوان بتكسي

اول متوقفت التكسي رجعت بالزمن لذاك الموقف

ووقوفي بباب شركة الغالب للأستشارات القانونية

حتى ينقذون اخويه من الظلم اللي أحاق بي

دخلت من الباب وجهوني لمكتب المدير

بعد فترة دخلت وگعت عيني علي

أسمر بشعر خفيف ولحية خفيفة

وطول فارع أنيق يشبه لحد ما جاذبية

وجمال كاظم الساهر القيت السلام بهدوء

واني أتقرب من المكتب

-السلام عليكم أستاذ

-وعليكم السلام

گالهة ووگف بأحترام

-أستاذ اني صِبى جاية من طرف

ام فرقد

خلة ايده على صدره بأحترام وهو يتمعن بوجهي

أبتسامة أنرسمت على وجهه وهو يتفحص وجهي

ويركز بعيوني واني أرمش وهاي طبيعتي من اتوتر

-اهلا وسهلا صِبى آني أسد ألله غالب

مدير هاي الشركة تفضلي گعدي

باوعتلة وصفنت بالأسم هو هذا اللي المفروض

جنت أقابله هو هذا اللي جان راح يطلع فرقد

من السجن بس للأسف جان بمكانه شخص

فض عديم الخلق

-أول شي الحمد لله على سلامة الحجية

صحة وعافية أن شاء الله

-الله يخليك استاذ

-صِبى الحجية منطيتج علم عن طبيعة العمل

-نعم أستاذ

-المكان مكانج حاجتين اطلبهم منج بس

-تفضل أستاذ

-الألتزام بالوقت والأحترام

-أن شاء الله

وگفت حتى اطلع مستأذنه

-عن أذنك استاذ

-لا دقيقة رجعي

طلعلي عقد واوراق 

-باجر تجيبين هويتج استنساخ تمام

حتى توقعين عقد التوظيف

-تمام أستاذ

-سيارة الشركة تمر بيج بس اخذي

رقم السايق من الحجية

-ان شاء الله

وگف وطلع من ورة الميز سد أزرار الجاگيت مالته 

وتقدم ناحيتي باوعتله رافعة راسي ابتسم وأشرلي

-تفضلي آنسة صِبى ادليج مكان عملج

مشى گدامي ببدلتة الكحلية الأنيقة

وطولة الفارع وترتيب شعره والهدوء اللي يحيط بي

دخلني غرفة صغيرة بيهة ميز وكراسي وبرادات مي

وثلاجة

-هنا كل شي موجود وان شاء الله تكونين مرتاحة

من باجر تجين ويا سيارة الدوام

هزيتله راسي بالموافقة وطلعت ماشية

للبيت وهيج بديت اشتغل ملثمة بعد ماشفت

معظم الموظفين والموظفات بعمري واكبر

فظلت أن اخفي وجهي خجلاً من الوضع

اما خالتي فالشلل كان مصيرها وحاولنا

وياهة بالعلاج الطبيعي لكن بدون فائدة

الى أن ضمرت عضلة رجلها ويأست بشكل

نهائي

وعيت من هالذكرى الأليمة على صوت تلفوني

رفعت الخط أستاذ أسد

-نعم أستاذ

-تعاي للمكتب 

-اجيبلك جاي

-لا لا تعاي انت وبسسس

طلعت ماشية لمكتبة والاف الأفكار هجمت

علية خفت ليكون اخو أثر على قراره

وخلا يفكر بطردي بس اللي راح يصير راح

يكووون أبعد من كل خيالاتي وتصوراتي 

دخلت بعد مادگيت الباب

وگف وتقدم ناحيتي بيدة أوراق

صار مقابل الية رفعلي عينة مبتسم وهدأت

هواجسي وارتاحيت من افكاري

-وقعي هنا

نزلت راسي لمكان القلم ووين ثبته عالورقة

-شنو أستاذ

-اششش بدون نقاش وقعي

بدون تفكير مني وقعت عالورقة واني أحاول

أقراها بس تلقفتها ايده بسرعة

وهو يباوع لعيني ويحجي

مادلي ايدة للمصافحة ونطق الكلام اللي صدمني

وخلاني جامدة مثل تمثال رخام 

مديت أيدي بأستغراب وخجل

- بما أني شفت عملج المتقن بترتيب وأعادة تدوير ملفات الشركة

فمن اليوم أنتِ موظفة بشكل رسمي بشركة

الغالب القانونية

فتحت شفافي أحاول أسأل بأستغراب

صفن للحظات يتفحص وجهي وعيونة تتنقل

على ملامحي 

وكمل مفاجئته بهمس الجملة الأخيرة

-وتحديداً داخل مكتب أسد الله غالب

.

.

.

.

.

.

.

غِنى

_______

تعرفون أحساس الدفو اللي يحيط

بيكم بوجود أحد من أهلكم 

هذا الأحساس نفسه ممكن نحسه بوجود

صديق جان غريب تلگاه ماتعرف شلون ووين

تختبره يمكن بحوار عابر

يمكن بموقف بسيط بس گلبك يرتاحله قبل ما حتى تعرف اسمه الكامل

تحجي وياه وتحس إنه سمعك قبل

حتى قبل لا تلتقون

كأنكم تواعدتوا من سنين بجلسة سرية بين الأرواح واتأخرتوا بس باللقاء

هذا اللي صار أليه بعد ماعرفنه

أن أبويه حتى بمماته مسببلنه أذى

وتارك أرث من النذالة والجشع

انقطعت بية السبل واني أشوف خالتي

عاجزة بلا حيلة وصِبى حاضنة ملابس فرقد

تعاتبه

طلعت هاجة من البيت

گعدت بالطرمة مفترشة الأرض

واخذتني الحاجة لوجود فرقد ورياح الحزن رمتني ببحر عميق قادني أحساسي للأتصال بي هووو ماكو غيرة دست أتصال رن مرتين ومثل عادتة

مترن الثالثة يفتح خط

-ها غنيييييوة اليوم من وكت

ونطقت كلمة من سنين فاقدتها

وجبل القهر اللي حط على كتافي خلاني

اتذكرهة لاحلتي صورة فرقد وهو يلمنا تحت جناحه

من نبجي على أمي ونحتاجها

-فرقد محتاجتك 

انطلقت دموعي تعلن قلة حيلتي

وكأن روحه متصلة بروحي وفهم

علية

-جايج والله احرگ الكون لعيونج

شهگت باجية وهو مشتعل حيرة وغضب

-شصااااار بس اهدي وفهميني وحدة

وحدة لا تبجين

-يااااارب ميشوفه رحمته بايعه للبيت

لحگنا على هالبيت المهتري الواگع

-ابوووووج

-ايييييييي بايعه ومسلم ثمنه بيد

مرته اللي الله سلطها علي باگت فلوسه

وموتته بحسرته مثل مامات فرقد هم وحزن

على تعبه

-الگ** النغ** الساقط

انهال أيمن بسيل من الشتم والسباب

لحد ماگال فجأة 

-دقيقة دقيقة اكيد جاي تمسحين خشمج بثوبج

-اييييييع شبيك

-انجبي سكتي عن البجي وفهميني

سردتلة اللي صار وهو يستمعلي

لحد ماخلصت ماكلف نفسه بس بكلمتين

-سهلة غنيوة

-شنو السهلة تشردنا أيمن شلووون بينة

-دلمي غراضكم وكافي تشفطين

بخشمج

-رااااح اسده والله

-دسويها حتى اجيج باجر أ.........

-هاااااااا شنوووووو أ ...............

-أأأ ......أشوفج مشتاقلج يازمالة

هسة سمعيني تلمون بس ملابسكم

والضروريات اي غراض لتاخذون

-وين نولي ابو حمادة

-حسبي حسابج عگب باجر مخلصة كل شي فهمتي

-غير افتهم 

-وانت والفهم وينج ووين

-شقصدك

-صماخج شگده بس فارغ

-خلف الله عليك

-دولي خل اخلص شغلي وعگب باجر

من الدوام جايج فهمتي عدنا مشوار 

جيب حمادة وياك

-مااگدر يجلب بيج وتعال ياايمن احتار بحمادة وغنيوة الخبلة

-خل اشتري كرامتي واغلق الاتصال

-اذا غلقتي وبجيتي اطيح حظج والله 

الموضوع محلول

-ماابجي

-وهاي الشهگة الطلعت هسة شنو شهگتها امي

رجعت بجيت وهو يستغفر

-اني جايج الفجر أوصل ببغداد

بثمانية الگاج على الشارع العام مالتكم فهمتي

-لا تجي بهالليل الطريق طويل وظلام

-اگلج روحي أرتاحي وسوي الگتلج

علي لعگب باجر تكعدون بمكان وتستقرون

غلق الأتصال وبقيت كل ساعة أتصل بي 

لحد مازهگ

-اااااااخ يابه بس خل أوصل اذا مانظفت بيج

شوارع بغداد مااطلع أيمن

همست أتماوع بالشقة

-يمناي

-ووجعاي تسرسحت بت الشرييييف

ضحك وهو يكمل

-ليش قلقة هيج

-أخاف عليك والله من الطريق هسه

الله يرضاها گاطعلك طريق شطوله والله

غِنى بجت

-اي أگطعه ليش هالشهگة والدموع هينة عندج

ضحكت مستمتعة بدلاله

-ابووووو حمادة

-ووووجعة شتردين

-ضيعت لحظات الدلع والغنج

-عود هم تتدلع عمتي خاچية

ضربت على جبيني ادردم

-ادووور صرت خاچية

-اي نفسها بالضبط من تتدلع على عمي سلطان

صوتها مزنجر وجهرتها ماتسمح

-هاي اني صوتي مزنجر

-چا أمي

-وشحلات الچا

گلتها وهو ضحك 

-تعرف نقاط ضعفي ضلع

ضحكت على كلامه وهو يكمل

-روحي نامي اتأخر يلا أوصل 

-أمشي على كيفك الله عليك

-تمام ماما

-خبيث

-حقيرة

نهينة الأتصال مثل كل مرة واحنه

واحد يقسم للثاني

نمت بعد مشوار من التعب

وصحيت على صوت المنبه غيرت

ملابسي ويا دگة الساعة

٨ الصبح اتصل بيه 

-صباح الخير يمناي

-صباح الخياط

-ههه متضحك

-دنجبي وطلعيلي عالشارع خل اخترع من شوفة

جهرتج من الصبح 

اخذت جنطتي وطلعت بعد مابلغتهم رايحة

لدوامي

طلعت ماشية ولاحلي طوله وهو واگف مخلي

أيدة على عينه بسبب الشمس

جگارته بيدة ولابس تراك سوت رياضي وحذاء

رياضي أسود

تقدمتله ابتسم

-صباح بغدادي غنيوة

-صباح الچا وأهل الچا

استدار فتحلي باب السيارة وصلتله

-شنوووو هاي ضلع صاير ذوق ماعرفتك

رفعلي حاجبه وطبگ الباب

-دصعدي بوحدج يلا نسوان مو مال دلال

غمزتله وفتحت الباب دخلت للسيارة

ريحة الجگاير قوية فتحت الجامات

-باردة لج

-جگااااااير ريحة سيارتك دخان

حرك السيارة شمر الجگارة بره ورفع الجامات

-يمج معطر رشي

-مااگدر تلعب نفسي وبعدني ممتريگة

خلينا على ريحة الجگاير المعفنة أحسن

-معفنة بصماخج أحسن نوع جگاير هاية

-اي سودة علية تسوي سرطان رئة مختلف من نوعه

كفخني بخفة ايده

-عوذة منج من الصبح بيش طالبتني بعدني

شباب

-٣٨ سنة ضلع

-أقطر شبوبية

أبتسمت على كلامه باوعلي وحجه بحنية

-شلونج غنوة

-مثل متشوف الوالد قرر قبل ليموت يهدينا

الهدية الأخيرة ويطيح حظنا

-الله يرحمة شگد گ***د

باوعتلة صفح

-اوگفي خل أخاف وأرجف

اي گ****د هي هاي عملة يسويها

-والله حقك باللي تگوله

بس هسة فهمني وين رايحين

-دشغلي فيروز يمج أغاني اختاري خل

نصبح بصوت حلو انظف أذني بعد صوتج النشاز

وراهة نحجي

-هاي اني صوتي نشاز

-امممممم

شغلت فيروز وهو يدندن وياها

دخلنا منطقة مرتبة وفروع هادئة

توقف بباب بيت صغيرة وبيده

سويج سيارتة وكومة مفاتيح

فتح قفل موجود عالباب الجبيرة ودفع الباب مأشرلي

-نزلي غنيوة

نزلت ودخلت ويا بيت بحديقة صغيرة

فتح باب داخلي خشب مرتب

باوعلي

-دخلي

-لا عيني أخاف

-اي راح أغتصبج

هز ايده وغمني ودخل

دخلت ورا شغل الاضوية بيت صغير مطبخ

بي كاونتر مرتب وثلاجة ومجمدة مفتوحات

فارغات

دخلنة هول صغير بي كرويتات خشبية حلوة

واستقبال صغير بيها تخم وتلفزيون

وغرفة نوم بيها اثاث خشبي

وغرفة ثانية صغيرة بيهة اخشاب طفل

باوعتلة وفهم حيرتي

-ها رأيج غنوة

-اجرته

غرغرت عيوني دموع خجل وحيرة منين

ممكن نجيب آجار هيج بيت مرتب

-وهاي العيون شبيها بسرعة احتارت

والدموع افترت بيها

-هيج بيت بيش ممكن يكون

وگعت دمعتي ورفعت ايدي امسحها

تقدملي أيمن بسرعة بالكلينكس بأيده

مسحها وضحك

-هيج بيت ايجاره غاااااالي هوايه

الحزن اكتسى ملامحي وسألته بخنگة

-شگد تقريباً ثمن هيج بيت مأثث وبهيج

منطقة

-ثمنة هالدمعة اللي وگعت

ابتسم وسحبني من ذراعي ناحية القنفات

-تسكنون هنا من باجر او عگبه

-بس فهمني

-بيتي هذا

انرسمت أبتسامة على وجهي بس غابت بسرعة

بعد ماتذكرت كلامه وهو يحجيلي أن هو 

مراح يفتح بيته طول عمره لأن يذكره

بزوجته وطفلة اللي راح

-بس أنت ............

فهم علية وجاوبني

-بس آني وين الگه أغلى منج حتى افتحله هالبيت

-بس هذا استغلال راح اكون أستغلالية هيج

-بالله أنچبي رجاءاً بلا لغوة

لتجيبون أي شي البيت گدامكم هو وأثاثه

الثلاجة والمجمدة بس نشغلهن

وراح اروح العصر اشوفلكم خط سحب

حتى تستقرون بشكل كامل

صفنت بوجهه ولأول مرة تمتد ايدي تمسك

ايده

-يمكن هاي الدنيا حبت تعوضني مكان فرقد بيك

ربت على ايدي وامسكها بقوة

رفعهة باسها تحت صدمتي

-وانت معزتج بمعزة رهام وماتفرقين عنها بشي

وهسة گومي كافي لواگة

ضربت جبيني واني گايمة

-عدو اللحظات الحلوة

مشى گدامي

-تجين نجيب ريوگ وتنظفين البيت

-أنظف لو ننظف

-تنظفين اني شعليه بت الحباب

-نشوف ضلع نشوف

طلعنا بالسيارة جاب ريوگ ونزلني ويا

لأسواق جبيرة اشترينا منظفات وماسحات وفرج

ورجعنة تريگنا بسرعة وبدينا

كف ردن التراك وشمر قمصلته عالقنفات

رفع تراكة وشعل جگارة خلاها بطرف شفته

ووگف بركن الباب 

-تفضل ضلع

لزمت ماسحة بيدي واني مغرگة الگاع مي

-امشي لج

-شبيك ساعدني

-انچبي بالله

واگف يدخن وآني أشتغل 

-لعد المن كفيت ردنك وتجهزت

-هيج عاجبني اتلطخ بدم المچاتيل

تقدمت ناحيته مبتسمة عالجملة

-تعااااال هنا والله حيرتني هاللهجة التخبل منييين جايبها وانت أصلك بغدادي

-لا يابوووي بغدادي شنو أنا رجال أصلي ناصرية

غمزتله

-الشجرة الخبيثة

رجعلي الغمزة

-بس مو بخباثتج

تقدم لازم الماسحة يسحب بالمي وياي

رفعت راسي أباوعله

-الناصرية مصنع الأبطال والشجعان

رفع ادي يشوفني عضلاته وحركهن

صوفرتله وصفن بوجهي

-ماكو أنوثة أبدددددددد

-نوووو بيبي

أستمرينا ولمدة ساعتين لمعنا البيت

صعدنة للطابق الثاني بي غرفة وحدة فارغة

ابتسم ودفعني الها

-هدوء وسنطة ومحد يدري بيج وين رايحة

أموتج هنا واگطعج وأعبيج بجياسه الزبالة

هههههههههههههههاي الجريمة الكاملة

هزيت ايدي وتقدمتله محظرة ايدي أضربة بوكس

-اوووووگفي

-شنوووووو

-خل أرجف حبيبتي

گالها وهو يشمر سطل المي بالغرفة

غسلنا المكان والبيت كلة صار نظيف

نزلنا جوة باوع لجگايره مخلصة

-انتظري دقايق وجايج

طلع تاركني واني من التعب گعدت بالمطبخ بالگاع ممدة

رجلية ومسنودة عالطباخ افكر ربع ساعة رجع 

توجه للثلاجة اللي شغلناها

طلع بطل المي اللي جبنا الصبح وگعد بصفي سند ظهره

وطلع لفتين من العلاگة اللي بيده 

-دلعي كرشج بجالي

-عاشت ايدك والله بوقتها جوووعانة

-اكلي اكلي بفلووووسي شخسرانه

فتحت اللفة باوعتله رافعه حاجبي

اخذت عضة جبيرة من اللفة

-شگددددد طيب الاكل من تاكل بتعب غيرك

لعبتله حواجبي وميل عليه ارتديت خايفة

عض اللفة مالتي سواها نص ورجع لمكانه

باوعتلهه

-خلصتها يامفجوع

-حبيت اساعدج وأصغرها الج

فتحلي قوطية الببسي خلاها گدامي

وگعدنا ناكل بهدوء خلصت قبله بعده

ياكل بلفته عطت ووگفت بسرعة وگف خلة اللفة

عالطباخ وباوعلي بقلق

-شبييييج

-فاااااار جوة المجمدة

تقدم للمجمدة يدور جواها التفتلي

اللفة بيدي أكل بيها غمزتله غمني 

ووگف

-بعدج جوعانة اليشوفج بطول گطف الجگارة مايدري بكرشج ياخذلة لشة طلي بحالها

-عوافي على گلبي وگلب الخلفني

ابتسم وعدل شواربه وهو يطگ الجداحة

يشعل جگارة جديدة

-ريتة هني وعافية 

خله جگارته بين شفافة ووگف

بزاوية الباب يباوعلي گاعدة بالگاع وأكل 

خلصت وغسلت 

و تمشيت ناحيته سحبت الجگارة من شفافه

باوعلي صفح

وانفتحت عيونه على وسعها واني اخلي

الجگارة بطرف شفتي أسحب منه نفس

دخنته بوجهه

-ولج

-حبيت أساعدك واصغرها الك

رجعتها بين شفافه ومشيت تحت صدمته

-يا صلفة

التفت اضحك

-احنة شراكة بكل شي ضلع

تمشالي يباوعلي بقلق

-ليش عيونج طاگات دم

-اخذتلي وصلة بكاء ونواح على مارجعت من الأسواق

-غبية ليش البجي شكووووو بهالرااااااس

نكز جبيني بأصبعه 

-شكوووو بهالصماخ احجي اليه ولا تبقين

تكتبين فهمتي عليه

-وانت ناقص هم

-وهسة سوالفج هي اللي راح تطفح الكيل

احجيلي وانچبي

سحبت الجنطة واني أباوعله

- يمة فدوووووة للناصرية وأهلها

-غصباً عليج لج

-چاشلووووون

-واللعد

-نخليهة لأهلها

طلعنة ماشين بعد وقت لرجوعي من جامعتي

توقف يم مولدة براس المنطقة

اتفق وياهم العصر يسوي خط وطلع

بينة نفتر نحجي بكل شي أحس الصخب

اللي بعقلي والسوالف اللي مدوختني

تترتب وتتنظم من احجيله 

يباوعلي ويصغيلي كأن العالم كله صامت

وموجه جل أهتمامه ناحية كلامي

ويا انتهاء الدوام

رجعني وگفنا عالشارع باوعلي وبعيونه

كلام متردد يگوله

صفن ثواني ونطقها تحت صدمتي

وتعجبي وعدم تصديقي 

-اگلج غنوة 

-ها يمناي

-تتزوجيني

________