رواية بنات الحجي السعيد كامله جميع الفصول شمس العراقية
( أنتيكات ) ـ لقُب يُطرح على إحدى البطلات وهو عنوان مميز لنساء هذهِ الرواية الجميله ..
" ماذا لو أحبتكَ امرأه عراقيه رسامه من أنتيكا .
العراق ـ بغداد
ليال ـ من داخل إحدى البيوتُ العراقيه البغداديه القديمه وتجار أب عن جد عائلة الحاج عبد الغني العال والد كل من أولاده سعيد ورشيد وكريم وسليم ، هم من عائله عراقيه غنيه من أصول بغداديه قديمه وتُجار ذهب وتجار السجاد والمفروشات في بغداد .
هذهِ العائله الكبيره تَحمل معها الكثير من القصص والحكايا ولندخل داخل قصرهم ونروي لكم كل مــا حَدث ..
أنا ليال، أبنة تاجر الذهب الحاج سعيد عبد الغني العال ودراستي في تخصص اللغة العربية بكلية التربية وشخصيًا، أتميز بحاجبين كثيفين وعينين بُنيتين وشامة بجانب شفتي .
أحب الأغاني الكلاسيكية المتنوعة، خاصة فيروز وأم كلثوم وميادة الحناوي ونهاد فتوح وسعدون الجابري وياس خُضر وغيرهم من عمالقة الطرب القديم وأجد راحتي في العزلة والهدوء، وأميل إلى الرسم واهتم بكل ما هو قديم وتحفة فنية، فالأنتيكا تجذبني بشدة ..
اليوم هو أول أيام عيد الفطر المُبارك كملنا الصلاة ويه أمي أني وأخواتي لقاء وغفران ، صعدن للغرفه وأمي شالت سجادتها وصاحت وراهن .
هيفاء ـ أستعلجن ولبسن بسرعه مو تنامن بغرفجن ورانا عمامجن نعايدهم ونروح بيت جدج هسه جديتج تضل تحجي علينا وكل بنات عمامجن واصلات قبلجن .
لقاء ـ ما عندي شيء بس البس ملابسي .
هيفاء ـ ديله أستعجلي يله ليال ماما شو واكفه
لحگي اخواتج هسه يجي أبوجن وأخوجن من الجامع وانتن لحد الان تتصفنن تحركن يا ماما ..
ليال ـ أي ماما صعدت وراهن لبست ملابسي لونهن ذهبي وفتحت شعري على طوله وخليت كحله سوادها قاتم ومسكارا وأحمر شفاه فقط برزت اللون ولبست عقد على شكل ليرات واسوارات ذهب ورشيت العطر ولبست الكعب وشمرت الشال على شعري وباوعت لمرايا مكياجي وشكلي بي لمسه من جيل الطيبين ..
وأخواتي كملن ونزلن قبلي لقاء لابسته لونه احمر وغفران بنفسجي فاتح ها لعد ماما وين .
لقاء ـ خبصتنا يله ويله وهي لحد الأن ما جاهزه
ليال ـ خل أشوفها وبهل الأثناء دخل علينا اخويه باسل وبابا ما موجود وياه لقاء تأففت ورجعنا باوعنا لأخونا باسل لابس دشداشه بيضه والسبحه والأناقه تتكلم تقدمنا عليه عايدنا كل عام وأنت بالف خير يارب عريس ان شاءالله
باسل ـ رحمة الله والديج وأنتن بالف خير الله يوفقجن وأشوفجن بإعلى المراتب ، اي أمي وين
يمه يمه وينج العيد واكف يم الباب منتظرج .
هيفاء ـ أجيت أبني فدوه لمصباح العيد وأنت أول العايدين أبني حبيبي .
ليال ـ حضنها وباسها من ࢪأسها وعايدها وانطانا عيدتنا وأول عيديه من أخونا باسل وبعدها طلعنا وياه وقفل الأبواب وتمشينا بالفرع احنا كُلنا الأقارب العمام والعمات ساكنين بنفس المنطقه وبنفس الأفر؏ وكل عمامي وعماتي بكل المناسبات والأفراح ننجمع بيت الكبير بيت جدي عبد الغني وجديتي حليمه وزوجة ابويه الأولى جواهر وأخويه الكبير نائل أبن جواهر وعمي سليم ما متزوج وعماتي نجاح وبليقس أيضاً ما متزوجات كلهم عايشين بيت الكبير بيتنا بنفس الفرع ...
وصلنا وبدخولنا صادفونا بيت عمي كريم لا بيتهم بصف بيت جدي حايط عالحايط صار بوجهنا عمي كريم سلمنا عليه وعلى ࢪأسهم ليث! وبصفه أخوانه فارس وفواز وعمتي سلوى وبنات عمي ياقوت وفيروز وأستبرق زوجة فارس
صارت عيوني عليه قدر الأمكان قَللت النظر بس القلب متولع بنار العشق ، تجاوزته ودخلنا وبلشت المعايدات وناس تعايد ناس ومن بين الكل نظرلي ونظراته مليانه قبول ولهفه ورمشة رموشه هي التشرح المعاني والحب وتفاصيله ...
دخلنا سوه البيت جدي ومن بين الأزدحام صار قريب عليه وهمس بصوت شبه مسموع.
ليث ـ ندري أبوج تاجر ذهب لابسه ذهبي ليش أبويه
ليال ـ ما حجيت من التوتر والخجل أكتفيت فقط بإبتسامة وأختي لقاء غمزتلي بحذر أبتعدت ودخلنا وريحة البخور والكليجه والجاي والقهوى مكس وأندماج ناري .
لكينا بيت عمي رشيد واصلين قبلنا وشفت بنات عمتي نجلاء هم موجودات تهاني وتماضر ولقاء هم غمزتلي شبيج ذبحتيني بهل الغمزه .!
لقاء ـ عمتج نجلاء أول الحاضرين باعي تماضر المخور مالتها يطگ شدعوه عمي والله نائل ما يستاهل كل هالدلال والغنج والا تهاني الكشخه انفلاقيه .
ليال ـ شعليج بيها أمشي نعايد أبويه وجدي وجديتي وعماتي ونسوان عمامي بلا هاي اللغوه أمشي عيب
لقاء ـ أعايد الكل الا جواهر ! .
ليال ـ دمشي عاد مشينا وتقدمنا عايدنا الكل وبست ايديهم كبار بالعمر والعمر اله دور مثل الخيمه على روؤسنا وهما بركة البيت وتقدمنا على أبويه كل عام وأنت بالف خير ينعاد عليك بالصحه والسلامه وربي يحفظك النا .
سعيد ـ وأنتن بالف خير بابا الله يخليجن ويوفقجن
ليال ـ أنطانا عيدتننا وزع للكل حتى لـ أخواني وصل أمي وتقدم أنطه لجواهر بعدين أمي ولقاء كرصتني شبيج
لقاء ـ شفتي
ليال ـ زوجته الأولى شگو بيها ، سگتنا وتقدموا ولد عمامي ناس تعايد ناس وتقدمت عايدت عمي رشيد وضحك وكالي .
رشيد ـ يوم أشوفج عروسه وأني ازفج بيدي .
ليال ـ حجاها وباوع على أبنهَ زياد ! وليث كح لان جان قريب من عمي أشر برأسه يعني طلعي مشيت ورىٰ البنات وانجمعنا بالمطبخ ونضحك ونسولف ونصور عفتهن وبديت أساعد عماتي وخطيه مجهزات الريوك الكيمر والكاهي والقشطه والروبه والكليجه والبيض بالدهن الحر والمربى بأنواعها كومة مواعين وأكل منو؏ وبكثره لان الكل مجموع واني شلت الچاي ومشيت ورى عمتي نجاح وكلمن شالت صينيه وننطي الهم بالحديقه فرشوا سفره وفراش ...
كعدة لوحدهم أبويه وعمامي وولد عمامي وأقاربنا كلهم واحنه بنات العم والخال وزوجات عمامي لوحدنا ونأكل ونسولف وناس تضحك لناس وبوسط سوالف العائله الدافيه واللمه الحلوة بوجود جدي وجديتي .
كملنا وهما حضروا الخرفان بلشوا يذبحون لان الكل مجموعين بيت الجبير ذبحوا ذبايح للعزيمة وغدة العيد
وعماتي هنا وأزواجهن هم أجني عمتي نجلاء وعمتي أنسام وأزواجهن ولد عمهن يصير أخو جدي أسمه عبدالعزيز العال أخوه جدي عبدالغني العال يعني عماتي متزوجات الأخوان سلمان وسهيل ...
عمتي نجلاء الجبيره متزوجه سلمان أبو فهد وبنات أثنين تماضر وتهاني .
عمتي أنسام متزوجه سهيل أبو هيثم أولادها همام وبنات أثنين هدير وغدير .
وعماتي كاعدات بالبيت نجاح وبلقيس صديقاتي وحبيبات گلبي مو بس عماتي حيل حنينات علينا وفقيرات وحبابات .
عفت البنات يغسلن المواعين مالت الريوك وبعدت البرده وباوعت شفتهم جدي وأبويه وعمامي وليث وأخواني وولد عمامي وعمي سليم وكلهم . .
للظهر تغدينا وفضت الهوسه ، نشفت إيدي وطلعت اني وعمتي نجاح والكل كاعدين يسولفون ويضحكون واني أمشي طلع ليث من الأستقبال رفع ࢪأسه وباوعلي توترت من نظراته دخلت ورى عمتي لغرفتها عدلت حجابي
نجاح ـ كثرانه نظراته
ليال ـ باوعتلها سويت روحي ما أعرف على الرغم هي أكثر وحده قريبه من عماتي وبسرعه تفهمني وتلاحظني ، جاوبتها منو!
ـ ليث منو قابل؟
ـ هـا ما أعرف شبي
ًـ ليال ماما أنتبهي لروحج ترى عماتج عيونهن عليجن وتعرفيهن ما يحبن أمج ولا يرغبنها يعني أنتبهي حتى لو نظراتهم عاديه وأبن عمج بس يفسرنها غير تفسير .
ـ أن شاء الله عمه لايضل بالج أعجبج
ـ أدري بيج حبيبتي يله خل نطلع أشرب أستكان جاي ࢪاسي طگ ومعدتي حيل توجعني كل يوم صايمه شحلاتني .
ـ اي لأن فطرنا اني هم معدتي أذتني ، مشينا وكعدت بصف أمي يم النسوان وهما بالأستقبال
هيفاء ـ ها ماما خلصتن شغلجن عاونتي عماتج
ليال ـ أي ماما گملنا گلشي أبتسمت برضا وعمتي نجلاء كالت لبنتها تماضر
نجلاء ـ گومي تماضر سويلنا جاي شلون تسوي جاي يخبل من هذا الجاي يكعد الرأس يله تماضر كومي .
تماضر ـ أي ماما من عيوني جده هسه اشربج من جاي مالتي .
حليمه ـ ديله فضينا هنا جايات عبالي معلمتها على الخبز على الطبخ هواي فالحه يا نجلاء .
نجلاء ـ هي تتعلم يا يمه انطيها مجال وبعدها تدرس .
جواهر ـ أهم شيء دراستها يمعوده تلحك على شلعان الگلب .
حليمه ـ واليأخذها ما يريد لكمه يأكلها شو تلوصن بحجيجن البنت اذا ما تتعلم الأساسيات بيت أهلها يمتى تتعلمهن من تتزوج وتضل مناكر هي وعيالها هذا مو حجي ينحجي كدام بناتجن علمنهن على كلشي لايضلن فاهيات وهاي هيفاء كدامجن كلشي معلمه بناتها .
نجلاء ـ اي يمه فهمنا فهمنا نعلمهن ان شاء الله نعلمهن يله تماضر ماما وين صرتي صبي للزلم أول شيء .
ليال ـ حجن وباوعن لأمي ويضحكن هنا وجواهر أمي ما حجت ضلت ساكته وعمتي نجلاء كاعده بصف عمتي أسمهان زوجة عمي رشيد تتشاور هي وياها وجديتي هزت ࢪأسها وشوي واجه باسل سلم وتهاني أبتسمت احمم .
باسل ـ يله ما تكومن
هيفاء ـ اي يمه يله ليال لقاء غفران يله ماما
ليال ـ سلمنا وشلنا جنطننا وطلعنا ويه باسل وأبويه طلع من باب الأستقبال الخارجي وكف وحجه
سعيد ـ وين رايحيين بهل الظهريه مو كلها كاعده شعندك كمت وكومتهن وياك يله رجعوا ارتاحوا وضلوا على العشه واليوم عيد وعمتك أنسام العصر تجي بعد هواي عالم ما جايتننا .
باسل ـ العصر ان شاء الله نجي خل نرتاح بيتنا وهنا صارت زحمه واني تعبان من تفتيحه المحلات رجلين ماضاله عندي اريد انام من رخصتك حجي .
ليال ـ أبتسم النا ومشينا وأمي ما حجت شيء وصلنا بيتنا ، باسل دخل غرفته وامي هم دخلت غرفتها واحنه صعدنا غرفتنا ثلاثتنا بغرفه سبحنا وتمددنا وللعصر هم كشخنا ورحنا بيت جدي وبدخولنا ليث طلع أبتعدت من يم الباب ودخلنا البيت وهوسه لضالين والبيت مگلوب بلشنا تنظيف وتعزيل وضيافه واجت عمتي أنسام سلمنا عليها وبلشت هوسة العشه لما فضت لـ ١٢ صرنا جنايز رجعنا احنه وأمي وباسل ما موجود ويانا وأمي ما اعرف شبيها بس ساكته .
وصلنا البيت ولقاء ما صبرت الا سألت أمي
لقاء ـ ماما شبيج شو ساكته صاير شيء وباسل وين راح .
هيفاء ـ ماكو شيء ماما فوتن نامن
ليال ـ صعدنا لغرفتنا وفتحت تلفوني شفته ناشر منشور هو وأخواني ولد عمامي وكاتب تهنئه العيد انطيت فقط لايك وخليته عالشاحن ولقاء حجت
لقاء ـ أكولجن أمي شبيها؟ طول العيد هي ساكته تحجي بس قليل على گد السؤال .
ليال ـ ترى هي أمي هاي طبيعتها سگوتيه وحتى لو تحجي وتتعمق بالسوالف وياهن يگلبن عليها خير شر
لقاء ـ أي طبعاً القائد مالهن جواهر ام السحوره طاگه العائله كلهم سحر سداسي الأبعاد شون ما يگلبن الخير شر على هيفاء وخلفتها وقسمتها الگشره الي ما أخذت الا متزوج وخلتنا بوجه المدفع بوجه جواهر تشوف الدم ولا تشوفنا أعداء في الخفاء .!
غفران ـ شو عفتن أمي رجعتن على جواهر أنتن عرفتن امي شبيها گبل ذبيتنها برأس جواهر!
لقاء ـ أگولج أنتِ هو تدافعين الها وتحبينها خير! لازمه عليج شيء لو مثل العائله الكريمه طاگتج بسحر ؟
غفران ـ أستغفر الله وأتوب اليه سحر شنو وبعدين شمعرفج بيها تسوي سحوره أنتِ شفتي بعينج
لقاء ـ مـا يحتاج أشوف أني أحس وأقرأ الشكول القبيحه .
غفران ـ أنتِ منتهين منج تكرهينها ماكو منج خلاص ليال وأنتِ شايفتها تسوي سحوره عليج الله احجي .
ليال ـ لـ الأمانه لا بس هي هذا لقبها ماشي عليها
غفران ـ هذا اللقب باسل ولقاء طلعوا عليها وانتوا كلشي تصدكونه بدون مـا تشوف عيونكم حرام عليكم مره مكسوره خاطر .
لقاء ـ اي عيني بعد وبعد دافعي علمود اكوملج أشيلج وأشمرج من البلكون .
غفران ـ ترى أمي نازله عليها ضره مو جواهر لاتنسين جواهر زوجة أبوي الاولى واي معامله نشوفها فه بسبب مو الها كلنا ندري ابويه ليش تزوج أمي وشون جواهر نكسر خاطرها وهي بعده توه والده نائل وشايله رحمها هاي القصه من سنين جديتي تعيد وتصقل بيها النا فه كافي كلما تعثرين بالكاع ذبيتيها برأس جواهر .
ليال ـ يبووو شذكرجن هسه شو سدن الموضوع وخل ننام وبعدين الموضوع كله مو يم جواهر اعتقد يخص علاُ وباسل .
لقاء ـ وعُلا شعليها وبعدين صوج أهلج ما يوافقون على زواجهم ويفضونها عـلى شنو هالرفض والعناد أثنين يحبون بعض شگو بيها قابل حرام لـو عيب .
ليال ـ لا تنسين عُلا مطلقه!
لقاء ـ أي وإذا مطلقه شبيها تنكس ليش المطلقه منبوذه
ليال ـ لا مو هذا القصد بس عليها سمعه وهما يردونها لـ باسل من ورى هالشيء تأثر عليهم وعلى سمعتهم وأسمهم وأكو هواي أسباب تخليهم ما يوافقون .
... والمطلقه شبيها قابل ينحلف برأسها ياما مطلقات مظلومات وانهضمن من الرجال ومن الأهل ومن المجتمع مثل عمتي بلقيس تطلگت ظلم علمود عرگه بين عمامي سحبوها وطلگها رجلها ومن هذاك اليوم هذا حالها .
لقاء ـ وأنتِ شمدريج عليها سمعه رحتي شفتي بعينج سألتي عليها وشمدريج ما أهلج طلعوا عليها هالحجي علمود باسل يعوفها وتجز نفسه منها ونفس الوقت يردون سبب وحجه يرفضون هالزواج لان لـو صُدك عليها سمعه باسل مـا صارله سنين وياها ويحبها ويموت عليها ويوميه مشاكل هو وأهلي علمودها .
... ترى مو غبي ولا أطرش ما يسمع ولا أعمى ما يشوف بعينه بس گولي أهلج لطشوا عليها لان مطلقه وابننا أعزب وحال وأحوال شون أبن التاجر الحاج سعيد يأخذ مطلقه والميراث من يسترثه مطلقه ووراها بنيه وعدي واعدلج .
غفران ـ اني ويه كلام لقاء اني اي شيء ما شايفه بعيني وما سامعه بإذني ما اصدكه لان حرام ينحسب بذمتي وهيج علمتنا أمي .
ليال ـ شمدريني والله ، الله يعلم يله نامن كافي سدن الموضوع ، غفران طفي الاضويه ونمننا ...
الصبح كعدت على صوت أبويه عالي فزيت ما لكيت أخواتي بفراشهن گمت بس لقاء واكفه يم المحجر شگو
لقاء ـ واكف يحاسبها على غياب باسل عبالك بس أبنها سمعي شيحجي عليها سمعي .
سعيد ـ كله منج ومن تربيتج ضليتي تدللين بي لما طلعت عينه بكد الثور ما أكدرله اكوله ابقى تعلل ويه ولد عمامك يگولي لا يابه تعبان من شغل اروح أنام واجي الصبح ما الكاه بفراشه أصلاً ما واصل البيت!! وينه تكدرين تكوليلي أبنج وينه
هيفاء ـ شسويله أقفل الأبواب وأمنعه خوما صغير هو وأكعد أحاسبه وين تروح ومنين جاي .
سعيد ـ لا يبوي شتسويله ضلي تبججي على حاله ما اوصيج هسه من يجي امسحي على أكتافه ولج أنتِ هيبة أب ما خليتي اليه من ورى تربيتج اله كله من دلالج .
هيفاء ـ ليش مو منك ليش ما توافق عليها عليت گلبه
سعيد ـ ما أوافق وخلص
نائل ـ نوافق عليها شبيج خاله لازم مخابيل نوافق عليها خاله شبيج أبنج هذا وحيدتج تأخذيله وحده مطلقه سمعتها سگط من رجال لرجال وتالي لفت على أبنج وهسه يجيج وهو جان يمها وهذا أكبر دليل سمعتها سگط لان، الشريفه ما تسمح الافندي ينام يمها .
هيفاء ـ خاف الله لاتحجي عليها وتقذف بيها عندك أخوات أستغفر ربك ولو صدك سمعتها سگط جان أخوك عافها من زمان مو صارله أربع سنوات وراها رأسه شاب من وراكم ومن رفضكم .
ﻧائل ـ أستلم أبنج طبعاً أدافعيله يابه أمشي للبيت هذا ما يجي هسه يتأخر .
سعيد ـ روح أنت
ﻧائل ـ لا ابقى وياك غفران وين صار الجاي نمتي .
غفران ـ أي أجيت .
ليال ـ أنطتهم الجاي أبويه ما أخذ بس كاعد أعصابه ويباوع على الباب لان أول مره يلاحظ غياب باسل عن البيت وأول مره يلاحظ باسل نايم بغير مكان!!
وسمعنا صوته يغني بصوت واضح لقاء هزت أيدها ومشت الغرفه
لقاء ـ متونس الأخ عائله مـا يصيرلهم كل حل .
ليال ـ أنفتح الباب وشاف أبويه ونائل وتفاجئ عدل ياخة قميصه ونائل أبتسم بخباثه وغمزله وتقدم أبويه حجه بهدوء مخيف!
سعيد ـ خليك رجال وجاوبني وين جنت نايم الليل كله
باسل ـ جنت يم صاحبي أفترينا وسهرنا سهرة شباب وأخذتنا السوالف وتأخر الوقت مو مال أرجع ونمت يمه
سعيد ـ صاحبك؟
باسل ـ أي صاحبي ليش يابه صاير شيء .
سعيد ـ من يمتى تكذب على أبوك .
نائل ـ يابه بس نزل ياخة القميص تعرف صدق كلامي
باسل ـ أنت لاتتدخل بيني وبين أبويه خليك بنفسك .
سعيد ـ نائل أطلع روح البيت
نائل ـ رايح بس ياريت توقف هالمهزله لان تاليتنا ننفضح ونصير علج بحلوك الاوادم .
ليال ـ نائل طلع وأبويه نزل ياخة القميص وجرها بقوه وضربه كف فر وجهه فر واشر لأمي سحبت غفران للغرفه وأشرتلي أبتعدت من الدرج بس صوتهم واصل لعندي وينسمع بوضوح .
سعيد ـ لك خزي جنت يمها لك كذبت أخوك وكذبت گلبي وگلت أبني ما يسويها ما يدنس الحرام لك هاي جزه تربيتي هاي جزاتي لك ساقط ما صبرت لما ازوجك لك شون تلعب بعرض غيرك ما خفت على عرضك وانت عندك ثلاثة أخوات حيوان هيج ربيناك تعوف بيتك وتنام بغير بمكان .
باسل ـ أنطيني مجال أحجيلك گبل حكمت عليه بالموزين ولاعب بأعراض الناس شواصلك عني هيج تحجي بكل ثقه يعني الواحد مـا يطلع يشوف الدنيا لو الا عنده سوالف موزينه بس هيج تفسيرها يمكم .
سعيد ـ لاتكذب ولك أبني وأعرفك وهاي بركبتك شنو لك سرسري عينك بعيني وتكذب عليه
ليال ـ ضربه وباسل لزم خده وشفته ذبت دم وأمي تبجي ولازمه أبويه وتمنعه بس أبويه يفور وأعصابه نار حتى ما ينطي مجال يحجي.
سعيد ـ هيفاء شوفي أبنج الشفيه وين جان نايم اكيد جاييننا بقذارته ولك طايح الحظ المن تصوم وتصلي المن اني رايح حاج ومتعب نفسي وامشي واصي أبني صلاتك ابني لسانك ابني دينك أبني دير بالك على روحك من ولد الحرام لا يجرونك ابني لاتنغوي بزلات الشيطان تالي ما تالي أبني يزني!
أستغفرالله واتوب اليه استغفرالله واتوب اليه .
هيفاء ـ هدي يا أبو نائل هدي أعصابك لا يصيرلك شيء
سعيد ـ عوفيني خليني أخلص على هالولد شلع گلبي ولك كلشي متوقع منك بس مال تكسر كلمتنا وتروحلها وتجيني بوسخك لا هاي ما اقبلها مو ابن الحاج سعيد يجييلي العار والسالفه العوجه ويلعب بإعراض العالم واني بيتي مليان نسوان .
ولك شسويلك هــا شسويلك الزملك الخيزرانه مثل النسوان واهري جلدك لو احبسك بالمخرن كولي شسويلك زلمه شكدك شكبرك تعرف الصح من غلط شون تغلط هالغلطه لك ما خفت تكسر ركبتك يمصخم الوجه ما خفت .
ـ گلشي وگلت باسل سرسري وگلشي يگوله الك نائل تصدگه وتحكم عليه بدون ماتسمعني وگبل ضربتني بس ميخالف أبويه وتمون على رگبتي
أنت حتى ما انطيتني مجال أحجيلك بس هذا هو صدك الوصلك عني ما يحتاج أبررلك لأن اني واحد سرسري والشريف أبنك نائل حبيب گلبك .
ـ أنجب وأحجي عدل والتحجي عنه هذا أخوك حاله من حالك ماكو فرق عندي ونائل ما يكذب شايفك بعينه وين رحت ويم منو جنت بايت فه كذب لاتكذب ولك حاجيني وأصدك ويه أبوك غلطت وياها لو لا .
ـ خل نائل يكولك أني وين جنت لان حتى لو حجيت الك ما راح تصدكني وأثر الحلاقه بركبتي فسرتها بأشاره من نائل جيت سحبتني ياخة قميصي وضربتني وأني ساكت .
ـ أي تسكت وماتحجي حرف وأخوك ما يكذب
ـ مـــا متقرب الحرام يعني جريمه كفر أطلع ويه جماعتي باقي بس تلبسني شيله وتكعدني ويه أخواتي ، لو حكمك بس على باسل .
هيفاء ـ باسل أش ماما أش لاترادد بوجه ابوك اش
ـ شوف ولك قسم بالله العظيم كلمه ما أكول غيرها أغضب عليك ليوم الدين وأتبرى منك اذا تقربت الحرام وهالبيت ما الك فوته عليه أكسر رجليك والله اخليك تزحف وتتوسل شربة الماي اني ما خلفتكم علمود تجيبون اليه العار بسوالفكم المكسره ولا جن مربيكم وتعبان عليكم وجنت أكول باسل يختلف العاقل المأدب ونائل المخربط اللي يوميه شايل ࢪأسه وأشهر يله يرجعلي والكاسري لي ظهري وحيد أمه وحبيب جديته كلمه ما الي وياه وعايفه وساند گلبي بيك ومحملك المسؤوليه ومخلي بأيدك المال والعيال وبركبتك أمك وأخواتك تالي من ورا مره ترجع للصفر وتنزل من عيني يا سؤء ظني بيك يا أبني
ـ أني ما خيبت ظنك بيه وأذا هالمره بتت خارج البيت فه حالي حال الشباب طلعت وتونست لان مليت من كعدات ولد عمامي نفس الكعده ونفس السوالف وبعمري ما خلفت الك أمر ولا طلعت عن كلمتك بس هالمره عيد وأخذتنا السوالف وتأخر الوقت ونمت يم صاحبي وحقك عليه والسموحه منك .
ليال ـ تقرب راد يبوس ࢪاس ابويه بس دفعها بقوه لان ما مصدگه
سعيد ـ أمشي ولي من وجهي لا بارك الله بيك من ولد
ليال ـ باسل مشه لغرفته وأمي وكفت تحجي ويه أبويه ما سمعها فتح الباب وطلع وضلت هي تفرك بأيدها وطلع باسل راح المطبخ وأمي لحگته واجتي لقاء فاتتج أبويه شسوى .
لقاء ـ أبويه ظالم ومو ظالم أحبه من ما يرضى بالغلط تجاه أبناءه ، بس اضوج منه من يرجع على أمي ويحملها الذنب وكل المسؤوليه عبالك باسل بس أبنها مو أبنه وكل أغلاطه وعيوبه لازم أمي تدفع نص الثمن تسمع كلام قاسي يطعن بتربيتها وتعبها هذا مو عدل ولا حق .
ـ قابل ما نعرف أبويه لو جديد علينا ، أني نازله تجين
ـ بس أفهمي صدك باسل غلطان ولو واضح عليه الغلط بس يعرف شون يلفها وابويه ذكي مـا تفوته سوالف باسل .
ـ الله يهديهم ، نزلت وشافتني أمي وصاحتني
هيفاء ـ سوي ريوك لأخوج شتريد أمي تطك الك بيض عيون لو قشطه ومربى .
ليال ـ ما جاوب بس يخلي ثلج على شفته ودم ينزل منها أمي رادت تسويها سحب أيده وخله وطلع بالصاله وأمي لحكته
هيفاء ـ ليش أبني خل اشوف شفتك
باسل ـ يمه عوفيني بحالي لخاطر أبوج النايم بالكبور
لو هيج هامج وگلبج عليه جان حجيتي دافعتي عليه كدامه مو أكلني حاصل فاصل وتوالني الغلط معاملة اليهود هم مو هيج .
ـ أنت هم صوجك شعندك نايم خارج البيت مو تدري بي حريص عليكم وما يحب الغلط ودوم يوصي بيكم .
ـ يوصي بمنو يوصي بينا قصدج نائل لا يمه أصحي أبويه ما يوصي بس بيه اني وحكمه بس على باسل يعني وصلت بي يخلي نائل وراي يراقبني ليش اني طفل لو أول وأخر واحد حب بس باسل بهل الكون حبله وحده مطلقه مو مطلقه عبالك بنت ليل ومسويلي نفسهم رجال دين ويخافون الله وأعراض الناس وأعراض العالم وعدنا بنات وهما يجيبيون وتلطشون عليها بالاخير طلعتوني نايم يمها .
ـ يمه عليك الله بغلاتي ما غلطت وياها أحجيلي الصدك
ـ يمه شبيج حتى أنتِ ترى البنيه عدها أهل وأخوان وعمام صح مطلقه بس صاينه نفسها واني مو ناقص غيره شرف اروحلها ولو هيج نيتي ما صارلي سنين مشاكل وياكم علمود تمشون تخطبونها اليه
ـ والأثر اللي بركبتك شنو
ـ يمممممه گافي عاد .
ـ خلص سگتت يله أمي أمشي أسبح بينما أجهزلك الريوك يله أبني يله حبيبي وأبوك هذا لاتزعل منه ميخالف ماما أبوكم ويخاف عليكم .
ليال ـ مـا حجه شيء مشى الغرفته ونزلن أخواتي كملت الريوك وهو ما اجه كامت أمي راحتله دگت الباب ما فتحه .
ليال ـ يمه عوفي براحته هواي لحيتوا عليه .
هيفاء ـ يجي يتريك
لقاء ـ هو يجوع ويأكل عوفي تعاي تريگي .
ليال ـ أجتي وبس شربت الجاي وصافنه وگملنا الريوك ونظفنا البيت وأمي تطبخ الغده ولقاء تنظف الغرفه وتعزل الملابس للغسل واني دخلت الغرفه الخاصه بيه مالت الرسم وشغلات الأنتيكا من زمن قديم ومكتبه كتب مو بس غرفة رسم وقراءه كتب لا هاي ملجئي الأحبه وهروبي من الواقع .
كعدت ولزمت قلمي وبديت أكمل رسمتي رسم واقع وأدمجه بالخيال رسم ليث من أبن عم الى فارس أحلام
كملت رسم عيونه وأندك الباب سحبتها وضميتها بالمجر تفضل ودخلت غفران .
غفران ـ أمي تگول أكو طلبيه راح توصل منطيه رقم أمي أنت وشموصيه .
ـ كتب ولوحات أنتيكا وصلت لو بعد
ـ لا بعد بس خابروا وأمي انطتهم العنوان وأجيت أبلغج
ـ أي ماشي بهل الاثناء سمعنا صوت ليث!!
ـ هذا يمكن صوت ليث شجابه؟
ـ قبل لا نطلع دخل بأيده طلبيه مالتي وأمي وراه خلاها على المكتب وأبستم واني بأيدي القلم وباوع على كلشي معلق وكل للوحات المرسومه وحجه
ليث ـ من شفته بالفرع عرفت الطلبيه الج أستلمتها وأعتبريها هديه مني على ذوقج .
ليال ـ شكراً .
هيفاء ـ هي غير لو تبطل من شغلات القديمه هاي مثل جدها الله يرحمه جان هيج رسام ويحب سوالف القديمه مستارثه من عنده .
ليث ـ والله خاله خوش ورث راقي يله بالعافيه عليج صدك باسل وين أجيت عليه كاعد نايم .
هيفاء ـ بغرفته علواه تفوت تحجي وياه
ليث ـ أي ليش لا .
ليال ـ طلع وراح على باسل وفتحتها وعلقت للوحات بالحايط وكتبت بخط رفيع هديه مميزه؟ طلعت من الغرفه ولقاء نزلت دخلنا المطبخ غفران ليث راح لو بعده
غفران ـ اي راح اخذ باسل وطلعوا يمكن راحوا بيت جدي
لقاء ـ وأمي لحگتهم دفاع
غفران ـ شتسوي خطيه هي هواي تحبه وأبويه هم قسى عليه ما أنطاه مجال .
ليال ـ سدوا الموضوع گافي ، وأنسد الموضوع بس حسيته وقتي لأن كُلنا نعرف باسل يحب عُلا وحبهم قوي لكن الأهل مانعيه ورافضينه رفض قطعي ...
وتمر الأيام وأنسد موضوع باسل ورجعت الأمور طبيعيه وبدأ الدوام مرحله ثالثه وهاي رابع سنه أعيشها بنظرات ما مغهومه من أيام السادس والأمتحانات وشلون يساعدني ويدرسنا اني وأختي لقاء لان بنفس الصف بابا مسجلنا تؤام بس لقاء جانت أشطر مني محد ساعدها بس اني جنت أعاني وواجهت صعوبه ولقاء جان حلمها مجموعه طبيه أما اني كل حلمي فقط أطلع من السادس سلامات وبكامل عقلي
جان دائماً كلما يجينا للبيت يشوفني دايخه ساعدني بكم موضوع وشرحيات ويدزلي المرشحات ومن يرجع من دوامه يبلغ أخواني هو يوصلنا للامتحانات بحجه هما ملتزمين بشغلهم وبمحلاتهم ويوصلنا الأمتحان ويضل ينتظرنا وضل وياي ساندني الى أن كملت وعدت مرحلة السادس الصعبه من حياتي ودخلت كليه بمعدلي بدون مساعده بابا راد يدخلني أهلي بس رفضت لان جان حلمي أصير مدرسه اللغه العربيه وما مانعي وكملت طريقي وقدمت والف الحمدلله على تحقيق الحلم .
أما أختي لقاء طلعت معدل خوش معدل بس ما عجبها وضلت أيام عازله نفسها بس تبجي واخواني وولد عمامي يتقشمرون عليها لان معدلها زين اذا تقدم كالوا تنقبل صيدله بس هي قافله الا طب عام بس بعد كلمن وقسمته رادت تعيد بس بابا ما قبل وقدمت بجامعة تكريت وحاليا جاي تدرس هي صيدله مرحلة ثالثه واني تربيه اللغه العربيه ...
علاقتنا أني وليث ما إلها أسم ( ) وأثنينـا واكفين بنفس المحطه ونعرف الطريق بس أكو عائق يمنعنا نمشي ونكفي للأخير سواء من ناحيته أو من ناحيتي أو يمكن القرابه والدم وكلمة العيب هي تمنعنا نتكلم فقط مكتفين بلغة العيون ما مغهوم هذا حُب لو مجرد أعجاب عابر بس عن نفسي عابره وياه الحب بمراحل بس ما أعرف عنه هو يَحبني أو لا لسا ما گالها ولا أعترفلي ولا بينلي أي أهتمام يدل على الحب ، أهتمامه وحرصه يدل على فقط بنت عمه لا أكثر ، ما اعرف طريقي وياك يا ليث ينتهي بيـا محطه ...
كعدت لبست وتجهزت أروح الدوام طبعاً ما لازمه خط مرات باسل أو نائل لان أحنه هواي وكلهم عدهم سيارات يوصولنا ومرات ليث لان أخته ياقوت وياي بس غير قسم تدرس ، راسلتني ياقوت لان ليث يوصلنا .
ياقوت ـ وينج يله طلعي أحنه يم الباب ننتظرج .
ليال ـ أجيت طلعت وصلتهم وصعدت صباح الخير
ليث ـ صباح النور .
ليال ـ فتحت الملزمه راجعت وبالي يمها وياقوت تحجي ويه أختها عالتلفون بدون قصد رفعت ࢪأسي لكيته يباوع لي گبل نزلت عيني وهو أبتسم حس بيه وبخجلي وأحترامي لنفسي ما أريد ابين ذابه نفسي عليه ومستقتله عليه حتى لو أحبه هذا ما يمنع أكون محترمه ما أريد يأخذ عني نظره مو حلوه .
وصلنا وراح ودخلنا المحاضرات وأول محاضره جانت
لـ الأستاذه أيناس أكثر أستاذه لطيفه وحبابه وخلوقه بشكل مو أستاذه صديقه كلنا نحبها ونحترمها ونحب محاضرتها ، كملنا وطلعنا التقيت ويه بنات عماتي لان وياي تهاني بنت عمتي نجلاء وغدير بنت عمتي أنسام كعدنا نسولف .
الى أن خلص الدوام ورجعنا وليث اجه اخذنا وأستمر الحال وندوام وليث يوصلنا فترة أجازته هو مهندس بالنفط بس مو كل الأسبوع يدوام ...
كاعده بالغرفه أتصفح وصلتني منه رساله .
ليث ـ زعلانه علينا
ليال ـ أبتسمت لا ليش الزعل منو گلك زعلانه؟
ـ محد گلي أني لاحظت عليج
ـ ملاحظتك مو مضبوطه ماكو هيج شيء
ـ هـا متأكده
ـ أي نعم متأكده
ـ مـا تبتسمين مثل قبل
ـ على شُنو أبتسم
ـ هيج
ـ تمام
ـ باجر منو يوصلكم للكليه؟
ـ باسل لو نائل لو فواز
ـ لا فواز بالمحل روحي ويه أخوانج
ـ الله كريم
ـ أي شلونج شخبارج بالرسم شنو أخر لوحة رسمتيها دزيها خل أشوف وأقيم
ـ تذكرت الرسمه اللي هي صورته جاوبته ما راسمه ملتهيه بدراستي
ـ براحتج يله أخليج كملي دراستج
ـ تمام باي
ـ الله وياج أبويه
ـ ركزت على أخر كلمه وأنسحب الموبايل من أيدي لقاء لا عفيه بطلي هالتصرفات رجعي موبايلي لا أصيح أمي عليج لقاء شو جيبي وكفت تقرأ المحادثات ورافعه الموبايل جيبي عاد لاتصيرين حشريه ما تلوك الج هالتصرفات شو جيبي .
لقاء ـ باع الرقي واو عيني شگد محترمين ولج أنطيني السر هذا شلون خليتي هيج يحترمج شو اني يكفخ بيه وكلما يشوفني يصيحلي سحليه .
غفران ـ السر الحب ومـا أدراك ما الحب
لقاء ـ أي أدري بيهم قابل غبيه تعبر عليه بس سالفتهم مطوله أثنينهم كبرياء واحد ينتظر من الثاني يعترف بحبه .
غفران ـ خليهم هيج أحلى ولو الحب حلو بكل مراحله
لقاء ـ تعاي تعاي أنتِ الثانيه شمعرفج بالحب ومراحله خاف مرتبطه؟
غفران ـ لا يحظي منين لسا ما لكيت سعيد الحظ ألارتبط بي!
لقاء ـ احنا دازينج تدرسين مو تربطين وعلاقات حب وطيحان حظ ولو أنتِ غبيه من جبتي معدل فاشل مثلج ما دخلج غير تربيه .
غفران ـ هاي أستطاعتي شسوي قابل وأبويه راد يدخلني أهلي اني ما ردت لان مو مستواي كوه اصير طبيبه ومهنه الطب ما احبها خليناها الج ولكلبج .
لقاء ـ ولا هي ضاله لحلكج التافه ديله هسه أنتبهي لدراستج وقسمج خوش انكليزي زين وعوفيلي سوالف المرحله الأولى وتعارف ما اعرف أيش خليج نبهه وأنتِ أختها الجبيره ما تعلمينها .
ليال ـ شعلم منها هو اني منو علمني علمود أعلمها هي خوما صغيره ومرحلة الأولى شبيها حالها حال باقي المراحل بس كلمن وعقله برأسه يعرف خلاصه .
لقاء ـ همصح بس باعي ولج أم عيون طاگه دراستج ثم دراستج عوفيلي خرابيط الحب
غفران ـ عود من أحب أكولج صدك لقاء ماكو سعيد الحظ سرق قلبكي .
لقاء ـ قلبي عزيز عليه ما انطي الياهو الجان مستحيل أسمح لأحد يأذي گلبي ويجرحني ويبجيني من الأخير لو يحبني يفرحني ويسعدني لو ما أحب ولا أنحب ونفسي فوك گلشي .
ليال ـ تفتهمين على طاري الحب شخبارج عن تماضر
غفران ـ سمعت من غدير كالت أجوها خطابه ورافضه والغبيه تريد تصارح نائل لان فحم گلبها من بروده .
لقاء ـ يركعها بالواحد والأربعين عايشه بأوهام بابا نائل مثلي ما يحب بس نفسه ونحس هذا گلبه عزيز عليه وكل عقلجن يتزوج برأيه وأمه جواهر والميراث لمنو تخلي غير وحده على أختيار الماما وشلون أختيار أبويه أبويه راح تمشيها على الصراط المستقيم تكعدها بسحر وتنومها بسحر تسويلها ديرشش ديرشش ...
غفران ـ ينعل بليسج شمدريج بيها لو بس أعرف شايفه عينج تسوي سحوره .
لقاء ـ لعد منو يرش ماي ويتفف ولا كلما تشوفني تقرأ بوجهي طلاسم بهمس لان تعرفني كافشتها
ليال ـ قُل أعوذ برب الفلق سدي سالفة السحوره وجواهر وسيرتها هي بحالها وأحنه بحالنا ، لقاء عوفيها يمعوده شُـــنوْ نسيتي أخر مشكله إشســوت وشعملت گلبت الطاوله علينا طلعت أمي الغلطانه والكُل تعاطف وياها لهذا شيليها من ࢪأسـج مـا ناقصين مَشاكل وياها .
لقاء ـ ماشي .
ليال ـ صدك شوگت تروحين لتكريت .
لقاء ـ باجر الصبح أن شاء الله .
غفران ـ والله لقاء أنتِ تفتهمين وأذكى من عدنا .
لقاء ـ ديله نامي ورانا دوام ومن الفجر أكعد أتجهز .
ليال ـ تصبحن على خير ونمننا وأحنا نايمين اتگلب بنومي ما مرتاحه فزيت على لمسات على رجليه فزيت لقاء فوك ࢪأسي أسم الله الرحمٰن وگعتي گلبي لزمت صدري بالگوه أخذ النفس شعندج كاعده باوعت الساعه بعد وگت ! .
لقاء ـ كعدت على صوت حركه بالطابق وكعدت أگولج ليال تشتمين ريحة حرك وريحة خايسه خنكتني خنك
ـ وأني شمدريني ششم توني كاعده گمت من فراشي وفعلاً ريحة مو طيبه شعواط ريحة غريبه شنو هاي خاف الأجهزه شيء طاك .
ـ لا طلعت ماكو شيء ، لحظه لحظه ليال شو سگتي
ـ شگو أباوعلها تباوع من جوه الباب وشهكت وكتمت صوتها اشرتلي أسكت بس كل جسمها يرجف اشرتلي وباوعت شفت خيال رجلين من جوه الباب توني ردت أصرخ لقاء گتمت صوتي وهمست بصوت خافت
ـ سگتي تردين تفضحينا بصوتج يكولون بنات هيفاء عبر عليهن واحد سگتي .
ليال ـ شهگت بخوف منو ولج
ـ وأني شمدريني أروح أساله أنت منو
غفران ـ شگو شبيجن كاعدات خل ننطمر عيع شُنو هالريحه هالخايسه.
ليال ـ بهل الأثناء أنطفت الكهرباء علينا والغرفه صارت ظلمه يمــا لا السالفه ما ينسكت نتراكض ندور على موبايلاتنــا نشغل الفلاش ولا موبايل ولج وينهن غفران وين تلفونج .
غفران ـ شمدريني شگو شببجن خوفتني ولجن موبايلي يم ࢪأسي عالشحن اوكفي خل أشوفه وخري أخ ضربتيني برأسي أخ الله طار ࢪاسي
ليال ـ مو وگتج هسه شوفي ودوري زين .
لقاء ـ ماگو ولجن أنباگن خل ننزل على أمي وباسل بسرعه يله خل نطلع من الغرفه
ليال ـ والله ما اطلع منا ولجن أنتِ مو وياي شفتي رجلين من جوه الباب خبله نطلع وموبايلاتنا ماكو خل نصرخ هما يسمعوننا .
غفران ـ يمممما شفتن رجلين من جوه الباب ولحن خاف هذا حرامي
ـ نجبي تردين ننفضح وحرامي جاي علينا شبيوك موبايلات!!
ـ اني دمي جمد بحسمي شو وخرن شيصير خل يصير يارب عليك توگلت حاولت أفتحه ما أنفتح حاولت ما يفتح شو ما يفتح!!
لقاء ـ ها ليال يله راح أموت بطني تملخت اكولج خل نصيح عليهم .
ليال ـ ما يفتح ما يفتح مقفول من الخارج!! أحجي وصوتي يرجف وگلبي يريد يوكف وأخواتي يصيحن
غفران ـ يمممممما باســــل لحگوا النا مـــامـــا .
لقاء ـ باسل ماما ماما ماما باسل باسل فتحوا الباب
ليال ـ أخواتي يصرخن واني عفت الباب لان شفت ضوء من البرده الشباك وشفت خيال من البلكون شخصين لزمت كتف لقاء وصرخت مـــامـــا .
