رواية كامب شيزار الفصل الاول
♧ الفصل الأول ♧
بقول لحضرتك كل يوم بسمع صوت عيد ميلاد في الشقة اللي فوقي مع العلم مفيش غيري انا وشخصين ساكنين تحتي ! كل يوم بسمعهم بيقولوا سنة حلوة يا جميل ويسقفوا ويطفوا الشمع
الشرطي بإرهاق : طب حضرتك متصل تبلغ عندنا ليه نيجي نقبض على إيه ؟ ما إحنا جينا مرتين والشقة فاضية ومهجورة المرة الجاية لو كلمتنا هنعملك بلاغ كاذب عشان إحنا مش ناقصين صداع وورانا بلاوي غير الهواجس بتاعتك
قفل الشرطي في وشه ، دخل الحمام بعد ما رجع سماعة التليفون مكانها وغسل وشه ، حاسس إنه فقد اخر ذرة عقل فيه
الحادثة كانت من سنتين ، لسة فاكر وش الجثة بتاعتها وهي مرعوبه ، لسه فاكر إن هو السبب ، من سنة بالظبط بدأ يتعالج نفسياً عند دكتور شاطر
بس كل اللي بيحصل من العلاج إن وجعه بيتجدد وبيفتكر وهو مش عاوز كدا !
الساعة بتدق ١٢ !
نور الحمام قفل وفتح وبعدين بقى خافت ، وسمع تاني صوتهم
سنة حلوة يا جميل
* قاعد في عربيته في الشارع برعب
لقى حد بيخبط على الإزاز ، إتفزع في الأول بعدين اتنهد وهو بينزل إزاز العربية وقال : خضتني يا أخي ! انا مش عارف اقعد في شقتي ، ومش عارف أتصرف إزاي وقالوا إنك كويس لطرد الأرواح
الراجل كان لافف راسه بوشاح إسود ، بص في عيونه وقال : إنت حاولت تعمل جلسة تحضير أرواح قبل كدا ؟
سكت هو شوية بعدين قال بحزن : ايوة ، كان نفسي أعتذرلها إني السبب في موتها ، كنت متدمر نفسياً ف مش عارف أعمل إيه
الراجل بصوت مريب : أهو اللي إنت عملته دا خلاهم يحوموا حواليك
نزل خالد من العربية وقال : هما مين دول ؟ أنا كنت .. كنت بستحضر روح معينة مكنتش عاوز غيرها
الراجل الدجال بتحذير : مكانش لازم تعمل دا من نفسك من غير مايكون معاك حد ليه خبرة ، شقتك فاضية ؟
خالد بغضب : انا مش طالع الشقة ، عاوز تطلع إنت إطلع وخلص الموضوع دا
الدجال بريبة : مينفعش لإنك إنت اللي حضرتهم لازم حضورك ومهم
طلع معاه خالد مضطر وهو بينفخ ، دخلوا الشقة وقفل الدجال النور
قعد قدام خالد بعد ما ولع كلم شمعة ورسم نجمة كدا بتراب كان في كيس معاه
الدجال بهدوء : اللي هنعمله هنصرفهم ، ومتكررش دا تاني عشان متتأذيش
خالد بنبرة حزينة : مينفعش روحها تحضر ؟ عاوز أعتذرلها .. عاوز أسمع إنها مسمحاني
الدجال : هي أسمها إيه ؟
خالد بعيون لامعة بدموع : ضحى ، إسمها كان ضحى
كامب شيزار مدينة الأسكندرية / صيف ٢٠١٨
إفتكر خالد بدايتهم وبداية حكايتهم ، ومر في باله شريط ذكرياتهم
