رواية عندما يتلوث العسل بالدم كامله جميع الفصول بقلم براء
لا تعتقد انك فككت لغز هذه الرواية بمجرد إن قرأت العنوان ، ففي الغالب عنواننا يحمل في طياته
تعبيرًا مجازي لا نستطيع تفسيره الا اذا قرآنا سطور
هذه الرواية
#paraa207
#عندما يتلوث العسل بالدم
#اعلان
في ذلك البيت الكبير، أو ما يُسمّى ببيت العائلة، وُلد أربعةُ ذكورٍ،
أُطعِمت أفواهُهم بملاعقَ من ذهبٍ صغارًا،
ثم كُمِّمت تلك الأفواه بسلاسلَ من حديدٍ كبارًا.
وفي البيت نفسه، نشأت ثلاثُ إناثٍ: إحداهنّ شيطان، والأخرى إنسان، والتي تليهنّ ملاك.
يَحكم هذا البيت ربُّ أسرةٍ اشبهُ بحاكمٍ متسلطٍ ،
رجلٌ لا يعرف من العدل شيئًا ؛ يُقدِّم الرغبة، ويشتري الحب، يُطعِم السُّلطة، ويأخذ الحريّة.
بيتٌ نشأ على قوانينَ صارمةٍ، توازي في انضباطها عقاربَ الساعة، لكنها لا تترك مجالًا للخطأ، ولا تعترف بالضعف، ولا تمنح الغفران.
تعالوا معي لنعيش سلسلةً من الملاحم في بيت الحاكم؛ ملاحمَ تحاكي :
• الـ نعمِ والـ لا،
• الأخذَ والعطاء،
• الحبَّ والكره،
• الفقرَ والثراء،
• وأخيرًا… ملحمةً تحاكي العشق والمنطق
ذاك العشق الذي يأتي بمذاقًا حلو يشبه حلاوة العسل والذي غالبًا ما يتلوث بشيء من المنطق
الذي يكون ذو طعم مر ، لاذع لا يمكن استساغته
والذي يشبه في طعمه الدم
وهذا هو عنوان رواياتنا
"عندما يتلوث العسل بالدم"
اذا احببتم اضيفوها الى مكاتبكم وانتظروني اسرد لكم اجزاءها بكل حب وحماس
احبكم
اختكم براء ❤️
.
#عندما_يتلوث_العسل_بالدم
#البارت الأول
مرحبا حبايبي العسل شلونكم ❤️❤️
#عندما يتلوث العسل بالدم
#للكاتبة براء
"منزل الحاكم"
حيث النظام ، الألتزام ، والطاعة هي اول الأركان الواجب اتابعها لدخول هذا المنزل
ريم : واكفين اني وامي بباب الغرفة نلوب ، افتر وافرك بأيدي
اباوع لأمي سانده روحها على الحايط تحاجي روحها والحيرة مرسومة على وجها
اميرة : والله البنية عفتها جنها ورد ... شجاها فجأة ما اعرف ؟!
ريم : تنهدت هازه راسي ... شأريد احجي واكول خليني منچبه وساكته
اميرة : ريم يمه شبيها اخيتج منو وياها ؟
ريم : دا اجاوبها وانفتحت الباب طالع الدكتور
ركضناله اني وامي
اميرة : هاا دكتور بشر شلونها بنيتي
الدكتور : الحمدلله صارت احسن
بس ست اميرة اني شموصيكم مو گايل ابعدو عن
الأنسة اي ضغط نفسي لأن ضغطها يشكل وموزين عليها
اميرة : والله يا دكتور هي كل ضغط نفسي ما عليها
وهذا الشهر كله هي ضغطها ممتاز وكلش منتظم بس اليوم مدري شجاها صار عدها هبوط واغمى عليها
الدكتور : على العموم هسه هي زينة بس اكرر ديرو
بالكم عليها وعلى اكلها .... معافاة ان شاء الله
ريم : طلع الدكتور واحنه دخلنا لكيناهم مشكلين الها مغذي ونايمة
اهتز الموبايل بأيدي ، رفعته لكيت ابويه يتصل ، جاوبت عليه
الوو هاا يابه
حاكم : اني بالأستقبال نزلي اريدج
ريم : اجيتك .... سديت الموبايل وباوعت لأمي
يمه ابويه اجه اني نازلة اشوفه شنو يريد مني ، انتِ باقية هنا مو ؟
اميرة : اي طبعًا خوما اعوفها ، روحي انتِ شوفي ابوج شيريد
ريم : طلعت من الغرفة ونزلت لجوه متوجها للأستقبال
دكيت الباب ودخلت ... صار گدامي
الهيبة .... والدنا الكريم
تقربت بست ايده ... الحمدلله على سلامتك بابا ، ربت على جتفي واشرلي على القنفه
حاكم : هلا بيج ، كعدي اريدج
ريم : كعدت وباوعتله منتظرته يحجي
حاكم : ريم اريد اسألج سؤال
"زمرد" منو وياها وديربالج تگليلي ما اعرف ، انتِ النـ** تعرفين منو البزرة
وبهالبيت ماكو سالفة تفوتج ، اعرفج عيونج اربعة وعشرين ساعة تزرزر هنا وهنا
فأحجيلي بدون لف ودوران .... اختج شبيها ؟
ريم : فاطمة وياها
حاكم : شسوتلها ؟
ريم : احم ، كالعادة تسمعها حجي من جوه لجوه وانت تعرف زمرد حساسة ، تحط بگلبها وتسكت تالي تتخربط وتوكع وهذا الي صار اليوم
حاكم : شكلتلها يعني ؟
ريم : سوالف نسوان ما اعتقد تحب تسمعها بس تره هواي جاي تلح ويه زمرد فياريت لو تحاجيها تعوف
البنية بحالها
اباوعله حط ايده على ذقنه و هز راسه متوعد
حاكم : هاهي روحي اني اعرف اتصرف
ريم : كمت على حيلي وانداريت عليه ... تحب اكلهم يحطولك العشى ؟
حاكم : ميحتاج اريد اصعد اشوف اخيتج واروح انام ستوني راجع من ديالى وتعبان
ريم : هزيت راسي بإيماء وعفته ، رحت اصلي المغرب .... كملت الصلاة وكمت بدلت ورحت لغرفة زمرد
فتحت الباب ودخلت لكيت امي كاعدة يمها
وتقرأ قرآن على راسها
تقربت كعدت يم راسها ودنكت بستها .... يروحي زيزي سلامتج
اميرة : ما كتيلي ابوج شراد منج ، قبل شويه من اجه راح عن بالي اسأله
ريم : اشرلتها .... امشي نكعد بره لنروح نفززها وهي ستوها استقرت
طلعنا كعدنا بالصالة الفوك حتى ناخذ راحتنا بالحجي لان محد موجود اليوم كلهم طالعين بس امي وزمرد وابويه بالبيت
كعدت وگتلها .... سألني عن حالة زمرد وما جذبت كتله من وره فاطمة
اميرة : ليش زمرد تخربطت من وره فاطمة ؟ ... شنو هم رجعت حاجتها !!
ريم : علساس متدرين انتِ كلما شافت زمرد وانكرصت .... متفوت فرصة اذا متغثها
تخيلي اليوم اني وزمرد كاعدين بأمان الله نسولف بالهول ومنشوفها غير طبت علينا مثل الأعصار
شايلة شرها وياها
والله شنو جايبه عريس لزمرد وانتِ تعرفين زمرد شلون تتسودن من سيرة الزواج
بس ردتها بكل احترام كلتلها اني ما خالة فكرة الزواج ببالي حاليًا وسدت الموضوع
بس عبالج فاطمة تنجب وتسكت لا لازم تسمم البنية وتكرهها بعيشتها
اميرة : شگالتلها المتسمى ؟
ريم : تگلها زمرد انتِ خوما تبقين العمر كله عايشة عند بيت عمج وانتِ حسب علمنا ملتزمة
متعرفين انُ ميجوزلج تبقين كاعدة ببيت كله شباب عزابية
فنصيحة الج من اخت على اساس هي بحالها ، تگلها حاولي تتزوجين بأسرع وقت لان انتِ مو صغيرة وخوما تبقين عاله على بيت الناس ، حلاة الضيف يكون خفيف
خلتلج البنية باهته متعرف شتجاوبها .... اجيت اهد عليها اني وسكتتني زمرد ما خلتني اتدخل حتى لتصير مشكلة ومثل كل مرة تضم بكلبها الهضمة وتتخربط
اباوع لأمي لزمت راسها
اميرة : يمه يمه الله اكبر على راسج يا فاطمة
ولج هاي راح تسودني والله راح تسودني ، حاطه گورها من گور هالمسكينة ، حرت شسوي وياها والله حرت
لا باللين تمشي ولا بالأهاين تمشي تعبتني والله تعبتني ما اعرف شلون اسيطر عليها
انوب يربج لا مراهقة ولا طفلة حتى نكول تكبر وتعقل مرة بناتها بطولها بدال متلتهي بيهن خاله بالها يم هاليتيمة
ريم : شبيج يمه معقولة لسه ما مفتهمه سبب شدة فاطمة ويه زمرد !!
هي غير راح تموت من الخوف ، تخاف لا ابويه ياخذ زمرد لمهدي لو لمروان وهذا المسودنها ومخليها تريد بس تعرسها وتخلص منها
اميرة : هاي هم مسودنه همه غير اخوتها ورابيه وياهم ، شبيها هاي خرفت على كبر
ريم : رفعت حاجبي ، يمه !! يعني تقنعيني هسه ابويه ما حاط بباله زمرد لواحد من الولد
اميرة : والله ما اعرف شكلج يايمه بس حتى لو جان بباله يزوجها لواحد من اخوانج لا هي تقبل ولا همه يقبلون
اخوج مهدي شايل فكرة الزواج من باله اصلًا ، صار سنين وكعت وصله من لساني واني اكله خلي اخطبلك وحده من كرايبنا وميقبل
ومروان ميحتاج اكلج حاط كوره من كورها ويتسودن منها حتى سوه بيها عقدة سوده عليه
وهي المسكينة وعت على الدنيا وهي متشوفهم غير انهم اخوتها وربت وياهم على هذا الأساس
بس هاي مرت اخوج تخبلت ويرادلها جرة اذن حتى تتأدب وتجفي زمرد شرها
اني عندي زمرد خط احمر ، صحيح بطني ما شالتها بس ربيتها بگلبي من عمرها يوم وهي بحضني
فما مستعدة افرط بنفسيتها وصحتها علمود وحده تافهه مثل فاطمة
ريم : والله تسوين فضل لو تحطين لجنتج الجاي تراهق حد
الغيرة راح تموتها ولا جنها مرة جبيرة وبناتها بطولها مستغلة انها ارملة اخونا وعايشة الدور
تستغل عاطفة أبويه واخواني وتدوس بالبطن على ابو هي المضحية البقت كافه على الجهال وما تزوجت بعد استشهاد المرحوم
واني اعرف غايتها شنو بس والله والسوه محمد نبي على گوله مهدي الي ببالها ميصير
كل عقلها تريد ترجع تصير جنه بهالبيت ام اللثك والوصخ وجها هطول
صحت على اثر ضربة قويه نزلت على ظهري ... ااااخ يمه شبييج
اميرة : بطلي هاي المصطلحات الشوارعية عيب انتِ بنية
ريم : انتِ خو كدرتج بس عليه لعد ولدج ميغلطون لو بس اني كخه
دتجاوبني واجانا ذاك الصوت الغليظ المزعج
اخونا الصغير .... نسخة ابويه الثانية ... الثلاثيني الجاد .... مروان افندي
مروان : السلام عليكم
اميرة : وعليكم السلام ... هلا حبيبي هلا يمه الله يساعدك
ريم : اباوعله انحنى بايس ايد امي بود
مروان : ويساعدج حبيبتي
ريم : استقام بوكفته وباوعلنا اني امي
مروان : خير ان شاء الله ، خو ماكو شي !!
اميرة : لا يمه هيج كاعدين اني واختك ندردش قابل شكو اسم الله
ريم : اباوعله اندار مباوعلي بطرف عينه غامز
مروان : ها حجيه ؟!
ريم : هاا
مروان : شنو الأخبار ، شو خاتلة هنا ويه امي
شمسويه من عمله
ريم : اموت على حسن الظن الي عندك اني .. عجيب والله يعني شلون ابطل ما اكعد ويه امي
لو هي بس امكم وحدكم اني مالي حق بيها !
مروان : كافي سكتي مو فتحنا حلكج
اميرة : عوفك من اختك يمه گلي متعشي لو اوصيهم يجهزولك العشى
مروان : لا ميحتاج متعشي ورايح اكمل شغلي بغرفتي من رخصتكم
ريم : اندار يمشي وتوقف محاجيني بأستغراب
مروان : لعد تكج الثاني وين ؟
ريم : شنو هذا الحجي مروان ، شنو تكي الثاني شايفني حذاء
مروان : حشاج انكس
ريم : انتتتِ جاي تسمعين ابنج شلون يتجاوز عليه لو بس يمي حاسة السمع عندج تختفيي
اميرة : كافي مروان لتضوجتها
وزمرد صاير عدها هبوط خطيه وهايجة عليها كلاتها فانطاها الدكتور علاج ونامت
مروان : عاد هي خو يوميه واكعه علينا
اميرة : ليش يمه هيج تحجي على اخيتك
مروان : يمعوده فكينا تتنعوص
ريم : زمرد متتنعوص هي طبيعتها رقيقة وناعمة ، باختصار انثى
مروان : لعد متصيرين مثلها
ريم : يييييمه
اميرة : هههههههه ولك عوفها شلحيت وياها
ريم : اباوعله ابتسم بخفه وكرصني من خشمي ، ابتسمت لابتسامته وبسرعة بردت
"بالمناسبة اني اتقشمر بسرعة "
مروان : يله يمه اني رايح ، من رخصتج
اميرة : مرخوص بعد گلبي يمه اخذ راحتك
ريم يمه حبيبتي اني رايحة اخذ حمام وابدل واجي انام يم اخيتج
ريم : يمه والله ماله داعي اني راح ابات يمها وبعدين ابويه ستوه جاي من طريق بعيد روحي يمه خطية خاف يحتاجج
خوما كلنا نتگابل يم البنية ، اني هسه راح اروح ابقى يمها وعود اذا احتاجيت شي اتصل عليج
اميرة : يله لعد خوش واني كل شويه اكوم اطل عليجن
راحت امي واني دخلت لغرفتي غسلت وفرشت اسناني ورحت غيرت ثوبي ولبست تراك نوم وجريت لحافي ورحت لغرفة زمرد
دخلت وتمددت يمها على الجرباية وضليت اكلب بموبايلي لحد ما نعست ونمت
كعدت نص الليل على صوت حركه بالغرفة ، فتحت عيوني لكيت زمرد كاعدة
كمت بسرعة ، هاا حبيبتي صح النوم بشري شلون صرتي
زمرد : ابتسمت .... الحمدلله حبيبتي احسن
بس انتِ ليش معلعله نومتج هيج وجايه يمي قابل اول مرة يهبط ضغطي
ريم : انجبي لج ليش اني شعندي غيرج ، ولج انتِ روحي الثانية اذا ما اشيل همج واتعلعل علمودج لعد منو اليستاهل اتعلعل علموده
زمرد : اروحلج فدوة اني تعاي خلي ابوسج
ريم : ضحكت وبوستها ، ما كتيلي شعندج كاعدة بنص الليل ، بس لا كعدتي تصلين صلاة الليل
زمرد : ياريت لو اكدر ما افوتها والله بس الدوخة بعدها عندي وكعدت جوعانة ، كلت انزل اكلي شي
وارجع انام
ريم : دكعدي اني انزل اسويلج اكل واجي ، شتحبين تاكلين ؟ اسويلج توست وجبن ؟ لو تحبين اسويلج شي ثاني
زمرد : لا حبيبتي ميحتاج اريد اكل شي خفيف اذا تكدرين بس جيبلي فواكه اذا متصير زحمه عليج
ريم : اشرت على عيوني ، من عيوني هسه ثواني واجيج
عفتها ونزلت للمطبخ ، سويتلها صحن فواكه من الي تحبهن وصعدت فوك
داروح للغرفة واستوقفني صوت واحد يون وتتبعه همسات غريبة جاية من الطابق الثالث الي بي جناح فاطمة
سلام قولا من رب رحيم ، هاي شنو الأصوات ، يمه بس لا اكو جنانوه عدنا بالبيت
لا هي هاي العايزة انوب اتخبل واني بعز شبابي ،
فزيت من صار الصوت اعلى ، بلعت ريكي ومشت صاعدة اتبع الصوت
وصلت يم جناح فاطمة وبس مديت راسي بهتت بمكاني
اباوع لمروان حاصر فاطمة على الحايط وخانكها بأثنين اديه وهو ترفس برجليها تحاول تتملص منه ومجاي تكدر
يمه هاي شجاي يصير !
اسمع مروان يحاجيها وويه كل نهاية جملة يركع راسها بالحايط
مروان : اني جم مرة حذرتج وكلت فكي ياخة عن زمررد كلت لو ما گلت ، احجيييي
فاطمة : وو والله مو يمهاا انيي
ركع راسها بالحايط حيل
مروان : لج تحطين عينج بعيني وتجذبين !! كلبه بنت الكلب مترصدتلها وتغثيها ليييش يمج هييي كرباج ولج والله لو صاير بيها شي والديج انعلهم
وبعدين شنو هاي السالفة الجديدة ، حضرتج صايرتلي خطابة تردين تعرسيها ، لييييش شاكيتتتتلج هييي
فاطمة : والله والله ردت اسعالها بالخير
مروان : خيرررج مو بحاجته هي ، اسمعي ولج والله العلي العظيم اذا اسمعج فديوم ماستها بشعره لأشرب من دمج
زمرد خط احمر ، اذبحج اذا تتقربيلها والله اذبحج ولا يوكف بعيني ابويه ولا بناتج ولا حتى اخويه الشهيد
والله اذا سمعتج بعد جايبتلها عريس لو تفكرين مجرد تفكير تفتحين موضوع الزواج كدامها
اكطع وصل من لحمج افتهمتييي
فاطمة : صصـ صار صار والله بعد ما عليه بيها بس عوفني التوبة والله التوبة
ريم : اباوعله نتر ايده عن وجها وابتعد تافل عليها
مروان : بت النعال
ريم : من راد يتحرك نزلت بسرعة طابه لغرفة زمرد وطابگه الباب ورايه حيل
اباوع لزمرد كاعدة وسانده راسها على تاج الجرباية ومن شافتني طبيت هيج فتحت عيونها مستغربة
زمرد : شبيج ريم ليش هيج ترجفين
ريم : مسحت وجهي ، هاا ممـ مابيه شي حبيبتي مابيه شي
قدمت الصحن يمها ، هاج جبتلج الفواكة
زمرد : عاشت ايدج حبيبتي
ريم : اا الف عافية ، اني حروح اتمدد عود اذا احتاجيتي شي بس صيحيني
تمددت بصفها وغطيت وجهي باللحاف والرجفة لسه مسيطرة عليه
هاي اول مرة بحياتي اشوف هيج منظر كدامي ، خاصة اخواني اول مرة اشوفهم يمدون ايدهم على مرة مو عاد فاطمة الي نعتبرها مقدسة لان مرت مرت الشهيد
بس معقولة ابويه كايل لمروان لو هو سمعنا من جنه نسولف ؟
وليش هيج جان محروك گلبه !! وهو اصلا علاقته بزمرد موشي رغم هي كلش تحبه وتحترمه
بس هو مدري شبي يتخبل من عدها
طلعت عيوني من اللحاف مباوعه لزمرد الكاعدة تاكل ومتدري بالدنيا طشت لو رشت
زمرد تصير بنت عمي اكرم ، خطية امها وابوها ثنينهم ماتو بحادث سيارة
وهي الوحيدة الضلت عايشة لان جانو عايفيها عندنا
ومسافرين يغيرون جو بس شاء الله تعالى تكون منيتهم هناك
ابويه عنده 3 اخوان واخت وحده .... عمي الجبير حامد ورا ابويه حاكم والصغير ابو زمرد اكرم
واخر وحده عمتي شفاعة
ولأن بذاك الوقت عمو حامد وعمو اكرم الله يرحمه ميتحاجون فلا عمي ولا زوجته قبلو يستقبلون
زمرد عندهم
وهي اصلًا كل عمرها بذاك الوقت جان سنة يعني طفلة
وبابا من قبل ليرفض عمو استقبالها هو اصلا جان مقرر يتكفلها هو وامي
رغم انُ زمرد عدها خال واحد وجان رايدها بس بابا رفض لان يخاف لا خالها ميكون كفو بتربيتها
فهو الي اخذها وتكفل بيها وبقت وتربت عدنا وكلنا حسبناها اخت واعز الا مروان من وهي طفلة وهو حاط بباله هي مو اختنا
ليش وشلون والله ما اعرف بس الأعرفه إني وعيت على الدنيا واني شاهدة على اسلوب مروان الجاف ويه زمرد
تبتلي على عمرها تحجي حجايه يخزيها واسلوبه كله نتر واستهزاء بيها وهي سوده عليه تبلع وتسكت
حتى سوه بيها عقدة خطية كامت حتى وهو موجود تسكت لو تكوم حتى لتسمع منه كلام يأذيها
وهذا الي خلاها انعزاليه ومتحب الاختلاط ، وشكد نحاول نغير من شخصيتها هاي بس ما جاي نگدر
وبقت زمرد لحد هذا يومنا تحس نفسها حمل ثگيل
بحيث تتحس من ابسط الأمور التتقدم الها
والسبب شدة فاطمة وياها وكلام مروان الكضه عمره يذكرها انها مو اختنا
بعز صفنتي واسترجاعي لبعض الحقائق المؤلمة وافز على دفعه حيل قويه موكعتني من الجرباية
اباوع لزمرد دفعتني حيل وكامت على حيلها مخترعة
عطت ، هايييي شبييييج
زمرد : بسم الله الرحمن الرحيم ، شبيج ريم خوفتيني ليش هيج تخزرين بيه
ريم : اني اخزر بيج !!
زمرد : اي والله حتى حاجيتج هواي ومجاوبتيني ، تباوعيلي وتهزين براسج
خوفتيني والله .... اني اسفة اذا عورتج بس والله خفت من نظراتج عبالي بيج شي
ريم : يا زمرد صدك جذب تحجين ، اني مو يمج
بس جنت صافنه وانتِ تعرفيني اذا صفنت انافس صاحب الرداء الرمادي بصفنتي
زمرد : سوده عليه اسفه اسفه تعاي كومي ، خوما تعورتي ؟
ريم : لزمت ايدها وكمت مبتسمه لا يابه شنو السالفة تره طحت من الجرباية مو من العمارة
امشي يله خلي نكمل نومتنا
رجعت لفيت روحي باللحاف وانطيتها ظهري بهدف إني انام
وهم رجعت صفنت
والظاهر الفترة الجاية راح اصفن هواي لان يمكن هاي مو اول ولا اخر مرة راح اكتشف بيها شي جديد
ما جنت ملاحظته بهالبيت المريب
فالله يستر
_________________________________
" اليوم التالي ..... ظهرًا "
كحلاء : دارتب ملابس الجهال وعيني عليه ، هستوه اجه من الدوام وواكف دينزع بدلته
حاجيته ، عمار تره علاوي باجر عنده مسابقة مال رسم على مستوى مدارس المحافظة
واني ما اكدر اروح ويا نفس كل مرة لأن اختي عدها ولادة قيصيرية ولازم اروح وياها للمستشفى
فتگدر تروح بدالي ؟ عاد خطية يشوفله واحد منه ويا حاله حال الطلاب
واني والله لوما اختي ما اعوفه بهيج يوم بس مضطرة لان خطية امي متكدر وحدها
جاوبني بجزع بدون حتى لا يتكلف ويرفع راسه
عمار : فكيني بله اني روحي مالي خلگها
كحلاء: حباب بس هالمرة اخذ مكاني والله ما اگدر اروح اني
عمار : كلت لا
كحلاء : شمرت التيشيرت ونترت ، انت وتالي وياك يعني الى متى تبقى هيج
كلشي لا ، ما اكدر ، ما اروح تره والله تعبتني
عمار : والله هذا اني محد جبرج گلج اخذيني ، اني رجال هاي السوالف التافهه متعجبني وانتِ تدرين مو جديد عليج اني
فماله داعي نضل نعيد هاي الاسطوانة يومية واذا كاتلتج المسابقة روحي انتِ وعوفي اختج لو دزي واحد من عمامه وفضت راحت
كحلاء : كمت على حيلي ورحت وكفت مقابيله
عمار الى متى اخوتك يبقون ماخذين مكانك !! لشوكت يبقى مهدي ومروان ياخذون ويجيبون ويحضرون اجتماعات ويودون سفرات ؟
وانت كلشي ماكو
سولفلي انت كأب شنو دورك بحياة اطفالك ؟ شتعرف عنهم ؟
شيحبون ، شيكرهون شنو اهتمامتهم ؟ لشوكت ابقى اني وعمامهم نحاول نسد مكانك بحياتهم
اطفالك ذوله قطعة من روحك شلون تكدر تكون مستهتر وياهم هيج !!
اريدك مرة وحدة بس مرة تلمهم جوه جناحك ، تقربهم منك ، تحسسهم انك ابوهم
ليش هيج قاسي وياهم انت ، شنو عدوانك همه ؟
اباوعله ابتسم ببرود هاز ايده بأستهزاء
عمار : والله انتِ فد انسانه تافهه وماعندج شغل يعني اذا جنت مبتعد عن جهالي بسبب شغلي معناها ما احبهم وقاسي وياهم ؟
الله يهديج ويعقلج بلكت تبطلين هذا النكد مالتج دخيل محمد شوفيلج شغلة حالج حال النسوان وجفيني شرج تره كامت تلعب روحي حتى اكابلج واكعد گد ما تلطمين
كحلاء : ليش اني شسويتلك اشو عايفتك براحتك ومالي كل علاقة بيك بس اكو واجبات لازم تأديها
وهذا واجبك مو بمزاجك هي
عمار : واجبي اشتغل واامن مستقبل بي حظ الهم اكثر من هذا ما اكدر اسوي عود الباقي عليج
كحلاء : دا اجاوبه واندكت باب الغرفة ، انتظرني ثواني راجعه
رحت فتحت باب الغرفة وشفت العاملة بوجهي
- مدام الغدة صار جاهز تفضلو نزلو لغرفة الطعام
كحلاء : هزيتلها راسي وسديت الباب منداره عليه
باوع عمار .... داكمل كلامي ويا وفزيت من دفعني بظهر ايده ومشه رايح للحمام
عمار : يابه دوخري كافي ما تعبتي من الحجي والله
قابلية عندج ، شكد تلغين كلت لا لتضلين تاكلين تبن وتخليني امد ايدي عليج
كحلاء : ضليت واكفه بمكاني باهته وكالعادة ماعندي غير الهضمة والدموع تشرح حالي وتعبر عن الضيم الي اني عايشة بي من 12 سنة زواج
ولو ليش استغرب هي هاي ضريبة انُ الوحدة تاخذ مجبور عليها
رغم انُ هذا الشي مو ذنبي اذا بعائلتنا ممنوع واحد ياخذ غريبة ولازم يتزوج وحده لو من بيت عمه لو من بيت عمته او من دائرة العشيرة
بكل اعتقادهم الغريب يدخل على طمع والهدف من الزواج داخل دائرة العائلة
حتى الفلوس والحلال ميروح للغريب او الغريبة و احد ضحايا هذا القرار اني وعمار
خالي حاكم خطبني لعمار قبل 12 سنة كنوع من العقاب اله لأن حب وحدة غريبة وراد يتزوجها غصب عنهم
تالي خالي حاربه محاربه ميعلم بيها الا الله وجبره يتزوجني مثل ما اهلي بطلوني من دراستي بوقتها وجبروني اتزوجه
وهاي اني گضيت 12 سنة من عمري قهر بقهر والله اليشوفني يگول هاي عجوز ولا جن عمري بالثلاثين
حالتي حاله والله ء عمري ما سامعت منه حجايه بيها
خير أربعة وعشرين ساعة يعيب ويغلط ويفشر
ويه الناس شحلاته الضحكة من الأذان للأذان ، هو يجي يمي اني وجهاله الخلقة تنكلب رأس على عقب
هسه بله اني يطبني مرض تعودت على عدم وجوده بس الأطفال شنو ذنبهم !
بس شأريد اكول الله يهدي وينطيني الصبر والقوة حتى ما اقصر ويه اطفالي مثل ما اهلي قصرو وياي
تنهدت ماسحه دموعي وطلعت متوجه لغرفة جهالي
دكيت الباب على نور ما لكيتها اكيد نزلت جوه
مشيت لغرفة علي ، دكيت الباب واجاني صوته ، فتحت الباب مبتسمة لكيته كاعد يرسم
علي : هلو ماما تفضلي
كحلاء : يله حبيبي عوف الي بأيدك وكوم غسل وانزل دنتغده
علي : يله خمس دقايق والحكج انزلي انتِ
كحلاء : ماشي حبيبي ، سديت الباب ونزلت لجوه متوجهها لغرفة الأكل او"الطعام" مثل ما يسمنها العاملات
دخلت لكيت الكل ملمومين كالعادة ، باوعت لنور كاعدة يم بنات عمها ، ابتسمت الها وسلمت وكعدت بمكاني المعتاد بين عمار وريم
ريم : عيني على كحلاء مبينه ضايجة ، ندستها بأيدي مأشرتلها .... شبيج ؟
كحلاء : تحسرت ، بعدين نسولف خلي نكمل اكل وعود صعديلي نحجي
ريم : واني شيصبرني وره الأكل
كحلاء : ريم !
ريم : خوش خوش حركت الخاشوكة بالماعون وعيوني تترصد الكاعدين
كالعادة بابا ومهدي ومروان يسولفون بالشغل وعمار ساكت لان علاقته ببابا موشي وحتى شغله بعيد
كل البعد من مجال التجارة والبزنس " العمل "
الي يشتغلون بي اخواني
اباوع لمروان يسولف ويه بابا وكل شويه يباوع بطرف عينه لزمرد الكاعده بصفي ويرجع يندار
وهاي الثولة الي بصفي مدنكه على ماعونها وتاكل بدون صوت
حاكم : شموسه ، زهورة جدو لعد امجن وين شو ما نزلت
شمس : والله جدو كعدت اليوم تصيح من ركبتها واخذت مسكن ورجعت نامت ، وكالت راح يجيها الدكتور العصر لان كلش متوجعه
حاكم : خيرها ؟
زهرة : والله منعرف جدو من رجعنا البارحة من العرس مجان بيها شي شو الصبح من كعدت جانت كلش متأذايه
حاكم : ايييه عدها العافية
ريم : اباوع لمروان ياكل ومسوي الموضوع طبيعي
ولا كإنه مسوي شي
اما ابويه فما كلف نفسه غير ينطي نظرة لمروان مبتسم يكمل اكله
حاكم : اكول عيني اميرة نسيت ابلغج تره العائلة البديلة لبيت ابو محمد باجر الصبح يوصلون
فإنتِ جهزي نفسج وخلي العاملة تدزلهم كل الوجبات لمدة يومين علما يرتبون أمورهم ويباشرون بمكان بيت ابو محمد
مروان : يابه انت متأكد هاي العائلة امان ؟ خوما عليهم شي لو أصحاب مشاكل
حاكم : لا لتخاف الجماعة من طرف ابو محمد والرجال ضامنهم
واني طلبت من فريد "السايق" يلتقي بي ويتفاهم وياا واذا بي حظ عود يدزه الي
تعرف اني ماعندي وكت اكعد اسولف ويه ياهو الجان واضيع وقتي
عاد ابو يسر كلي الرجال خوش رجال واجه تفاهمت ويا ، راح يجي هو وعائلته يسكنون بدال العائلة القديمة
وكتله راح اعينك حارس بالمصنع بمكان ابو محمد وزوجتك تجي تخدم بدال نرجس وابو محمد الظاهر مرسي كرايبه على كلشي ومفهمهم نظام البيت وتفاصيل الشغل فما اعترض
بقى بس ينتقل لهنا واليوم بلغني فريد انهم باجر ينتقلون لهنا
وهو بنفسه طلب مني يومين يرتبون بيهن امورهم
وانوب يباشرون بالعمل
فإنتِ يا اميرة سوي وياهم الواجب خطية نكسب بيهم ثواب وعود من يباشرون تفاهمي ويه مرته
اميرة : ان شاء الله
كحلاء : كملنا اكل وكعدنا نشرب جاي بالصالة ، داسولف ويه خالة والبنات
وانتبهت لمهدي يگوم من مكانه ناوي يطلع ، عفت استكاني وكمت ورا صايحتله ... مهدي
اندار عليه
مهدي : هلا خوية گولي
كحلاء : عفيه باجر علاوي عنده مسابقة رسم فگلت اسألك اذا تكدر تروح بدالي
والله اعرف داثقل عليك وانت مشغول ومفارغ بس انت تعرف عمار ميحتاج اكلك بعد
حاجيته وما قبل يروح واني والله لوما اختي عدها ولادة جان رحت ومزحمتك وياي
مهدي : شنو السالفة خويه عليمن تزحميني قابل شمسوي اني !!
عادي يابه سهلة باجر اني اخذه بأيدي من البيت وارجعه بأيدي هم
لتشيلين هم انتِ واخذي راحتج واذا على عمار فلتزعلين منه هو هذا طبعه ميحب التجمعات والمجاملات خلي على راحته
اني موجود وان شاء الله ما اقصر
كحلاء : لا والله حشاك من التقصير
مهدي : محتاجة مني شي بعد ؟
كحلاء : لا رحم الله والديك ، اخذ راحتك
لبس نظارته الشمسية وطلع من البيت ، تنهدت هازه راسي ، ياريت لو كل الناس مثلك يا مهدي
بالعافية على الي راح تاخذك ، الله يفتحها بوجهك انت والجان مروان بحق النبي واحبابه
_________________________________
"بعد مرور أسبوع"
ضامه اديه لصدري ، منتظرة امي تتصل عليه داروحلها لان ام البيت تريدني بمدري شنو
واكفه انتظر وعيني على بيت الناس الدنشتغل عدهم
ساعة اصفن على البناء العمراني للبيت وشنو من فخامة ورُقي شايل
وساعة ثانية تروح عيني على مختلف انواع السيارات المصفوفات والي يدلن على بذخ وثراء اصحاب هذا البيت
حتى حديقة بيتهم تشرح مدى جمال وذوق اصحابه
صار اسبوع تقريبًا من انتقلنا لهنا بدال عمتي نرجس وعائلتها الي طلعو لألمانيا بعد ما سحبهم ابنها محمد
اما احنه فجنه كاعدين بالتجاوزات وبابا عنده بسيطة يبيع بيها مي وكلينس ومرات علج
وهم يادوب جان ديسد احتاجتنا الرئيسية من اكل وشرب
وامي جانت تشتغل عاملة بحانوت مال مدرسة اهلية تسوي اكل وعلى مشكلة صارت بينها وبين وحدة
طردوها من الشغل وضلت كاعدة بالبيت لان متعرف تسوي شي غير الطبخ
ولا تكدر تفتح مشروع من البيت لان وضعنا المادي يادوب يجيبلنا لكمة الأكل مو عاد نفتح مشروع حتى لو منزلي يرادلة رأس مال
وبابا سوده عليه ما گدر يشيل حمل البيت وحده
وهو رجال على باب الله يوم اكو رزق ويوم لا
وعمتي من شافت وضعيتنا هيج ما ترددت تطرح على اهلي موضوع الأنتقال بدالها لبيت الناس الجانت تشتغل هي وزوجها عدهم
خاصة اهل البيت جانو يردون ناس تخدم من طرف بيت عمتي لان عمتي عاشت تخدمهم فوك التلاثين سنة
فرادو ناس امان مثل بيت عمتي لأن الجماعة يخافون من الرجل الغريبة وطلبو من رجل عمتي يجيبلهم ناس على ضمانته
وبرأيي عمتي احنه جنه افضل خيار
اما اهلي فشافو هالفرصة اجتهم هدية من السماء وما ترددو لحظة بأنهم يوافقون على طلب عمتي
على الأقل يضمنون وظيفة تگدر تعيشنا بحال احسن
استنادًا على انُ مستوى عمتي المادي جان بالنسبة
لأهلي حلم
وهياتنا انتقلنا لهنا من اسبوع وفعلًا الفوارق الي جانت تحجي عنها عمتي كدرنا نلاحظها من اول يوم
من بعد ما جنه كاعدين ببيت تجاوز غرفة وحدة للنوم وساحة بدون سقف هي صالة هي مطبخ ومغاسل صغيرة
لبيت بي غرفتين ومطبخ معزول واستقبال وصحيات
داخلية ، رغم انُ اليشوفه يكول انه بيت عادي وبسيط لكن بالنسبة للناس الي امثالنا نشوفه قصر
على الأقل هالبيت بناء مو جينكو مثل المكان الجنه ساكنين بي والي بأي لحظة جان ممكن تشيلنا منه الحكومة
لكن بعز كل هالتغيرات الي اهلي يشوفوها عظيمة الا إني ما مرتاحة
لدرجة انُ من اول ما اجينا واني متوترة ليش ما اعرف
شتت انتباهي ايد تخلت على جتفي
منال : شدتسوين "حياة"
حياة : جاوبتها وعيوني بعدها تتبع الداشوفه گدامي
امي خابرتني وكلتلي ام البيت تريدني بشغلة وكلتلي انتظر بره علما تصيحلي وهياتني دانتظر
منال : لعد شبيج صافنه ؟
حياة : داباوع على البيت ، بيتهم كلش حلو ما شاء الله
منال : قصدج قصرهم هذا قصر مو بيت
حياة : ايًا كان المهم انه حلو
منال : لعد يحيوته لو تشوفين البيت على كولتج من جوه شتكولين
حياة : دكت امي عليه ، فتحت الخط وباوعتلها
هياتني حدخل واشوف
الووو هاا يمه
عبير : تعاي حيوته الست تكلج طبي
حياة : تمام ، سديت الموبايل وتحركت متوجها لمدخل البيت
دكيت الجرس وانفتح الباب طالعة بوجهي العاملة
صفنت عليها ، قميص ابيض رسمي وتنورة جوه الركبة سودة والشعر مشيول كباية بأنتظام
جان مبين عليها مو عربية ومن حجت وياي بين اكثر
لان تحجي فصحى
- انتِ ابنت عبير ؟
حياة : اي
- تفضلي
حياة : وسعت الباب ودخلت رافعه عيوني على التحفيه الصارت فوك راسي
اول شي اجه ببالي هاي شلون ركبوها !! وميخافون توگع عليهم ؟!!!
- تفضلي من هنا
حياة : هاا اي اي اجيت
مشيت وراها داخله بمرر عريض يأدي لمكان جبير
شويه شويه بينت ملامحه ، يشبه الأستقبال المفتوح
بدون ابواب وبي تخم قنفات فاخرة التصميم
مترأساته عدد جبير من النساء ، ما شاء الله مبين عليهم عائلة جبيرة
وصلت يمهم ، وشفتهن كلهن كاعدات وامي واكفه يم مرة ما كدرت اصنف عمرها گدما معتنيه بنفسها لكن الي واضح انها بنهاية الاربعينات او منتصف الخمسينات
جانت لابسة بنطرون وتيشيرت ، شعرها اشقر قصير والمجوهرات مزينه شكلها وضايفتلها جمال خاص
بدون شعور صارت عيني على امي الواكفه لابسه ثوب رث وحاطه فوگا مريول المطبخ ولابسه
مقنعة سوده ونعال لاستيك (تكرمون)
جوه عينها اسود وشفايفها يابسه من التعب ، اباوع عليها وعلى النسوان الكاعدات بمختلف الأعمار
وحدة تگل للثانية اني احلى ، فجأة لكيت الدمعة تغرغر بطرف عيني من شفت حالهم وحالنا
مو اعتراض على حكم رب العالمين لا والله بس مرات تحز بنفسي واكول احنه ليش هيج ؟
- تحركي يا فتاة
حياة : باوعت للعاملة مستوعبه إني جامدة بمكاني ، مشيت واكفه بصف امي من بعد ما گلت السلام
الي اصلًا محد رد عليه لان كلهن ملتهيات يسولفن بيناتهن وممنتبهات الي فبس المرة الجبيرة جاوبتني
عبير : ست هاي بنتي حياة الي كتلج عليها تعرف بأمور الزراعة
اميرة : اهلًا عزيزتي ، والدتج كلتلي عندج خبرة بمجال الزراعة
حياة : اي ست بشنو تحبين اساعدج
اميرة : اريدج تساعدين الحدقچي بشغل الحديقة ، لابد انج شفتيها كلش جبيرة وميگدر يشتغل بيها وحدة لان خطية رجال جبير
ومنگدر نستغني عن خدماته لان ماعنده معيل غيرنا
فإنتِ ساعدي بالي تكدرين عليه وكلما اشتغلتي اكثر اني اكرمج وان شاء الله ما اقصر وياج
حياة : بلعت ريكي وخليت شعري وره اذني مباوعله لأمي النطت من مكانها
عبير : اي طبعًا عادي ست ماكو مشكلة اذا تحبين من اليوم تبدي تشتغل وتساعده
اميرة : هو من يجي عود ابلغه ويدز عليكم دتفقون بيناتكم
عبير : صار ست ، محتاجة شي بعد ؟
اميرة : لا عزيزتي روحو كملو شغلكم
حياة : انداريت دامشي وره امي واستوقفنا صوت وحده من الكاعدات
نوال : عيني ام منه لحظة
فدوة لكلبج اني شحجيت وياج الصبح مو كتلج اخذي لبس من العاملات ولبسي لتضلين بهذا المنظر
احنه ناس طابه طالعة علينا ميصير يشوفوج بهيجي شكل وشنو هذا الشبشب الي لابسته
ميصير حبيبتي تفترين كدامنا هيج شنو هذا منظرج
الدتمشين بي شنو وين كاعدين احنه
كل مكان واله احترامه والوالد لو يشوفج هيج يلعب جوله ميقبل بهيج زي فوضوي التزمي بالقوانين رجاءًا وهذا لبسج ما اريد اشوفه بعد
حياة : اباوعلها تحجي من وره خشمها وتنتر بس تجمل اسلوبها بكلمة فدوة لكلبج و حبيبتي
ما تحملت اسكت فجأة لكيت روحي انتر بيها بنفس اسلوبها
العفو منج ست بس تره تكدرين تحجين بأسلوب افضل من هيج واصلًا مو من حقج تجرحين المقابل هيج
احنه صح عمال هنا بس مو عبيد عندكم ولا رب العالمين خلقنا بدون مشاعر حتى تحجين ويانا بهالطريقة
عيني عليها تباوعلي رافعه حاجبها متفاجئه من ردي ،
بعدها سيطرت على ملامحها و اخذت رشفه من استكان الجاي الي بأيدها
نوال : عفوًا عزيزتي شنو تفضلتي مسمعتج عدل؟
حياة : كرصتني امي حيل وخزرتني
عبير : العفو ست اني جدًا اعتذر هاي بنتي زعطوطة اندفاعية ومتفتهم
امسحيها بوجهي هي متقصد والله واذا على الزي فبعيني هسه اروح اغير ملابسي وميكون خاطرج الا طيب
اعتذري من الست ولج
حياة : باوعت لأمي خازرتها ... رجعت كرصتني كدامهن حيل
عبير : اعتذرييي گلت
حياة : عضيت شفتي كاتمة الدمعة بمحجر عيني ،
باوعتلها وحجيت بصوت ناصي ، اني اعتذر
جرتني امي وياها طالعة من المكان بعد ما كررت الأعتذار اكثر من مرة
ريم : اباوع للبنية طلعت وامها تكفخ وترزل بيها على الموقف الصار بينها وبين اختي الجبيرة "نوال"
نوال : شفتن الصلافة واللسان ، يمه يمه هاي شنو من بنية شطول لسانها تكول هي ام البيت مو اني
فاطمة : تربية شوارع يمعوده شمتوقعه من هالنماذج
يعني
زمرد : نوال حبيبتي مو جان المفروض تحاجين المرة بأسلوب الطف من هيج
خطية تره حرجتيها كدامنا
نوال : يا گلبي انتِ اني متعمده احاجيها هيج لان حاجيتها باللين اول مرة وما سمعت الكلام فأستحقت الرزالة المبطنه اليوم حتى انوب من واحد بينا يأمرها بشي تسوي بدون كاف لام
وهم هذا درس الها حتى تتعلم انُ الكلام الينگال الها يتنفذ بالحرف وميتأجل خاصة هي جديدة وتحتاج الشدة حتى تتعلم
زمرد : ميخالف شويه شويه وياهن خطية تره كسرتي خاطرهن
ريم : والله حتى اني انقهرت بس ما ردت اتدخل واكسر بنوال كدامهن
فاطمة : شدعوة سويتوها كلش ... عادي شصار قابل
نوال : خليهن من حقهم ينطن رأيهن ما صار شي
وهسه سولفولي شسويتو ما سويتو بغيابي ، انطوني المستجدات شكو ماكو
ريم : كلشي ما سوينا بالبيت كالعادة بس كلش اشتاقينالج والله عبالك اخذتي البيت وياج ورحتي
اميرة : اي والله مكانج خالي انتِ وبنياتج ، البيت وحشه عليجن
نوال : بعد گلبي يمه الله لا يخلي مكانكم بس شسوي اضطريت اسافر واخذ البنات يشوفن بيبتهن
تدرين بعد خطية ستوها سوت عملية وجان لازم بناتي يرحن يتحمدن الها بالسلامة
تبقى ام ابوهن والمرحوم وصاني بأهله ما اكطع ايدي عنهم واني دامشي بوصيته
اميرة : سودة عليه يا يمه ترملتي وانتِ بعز شبابج
نوال : الحمدلله على كل حال يمه لا اعتراض على حكم رب العالمين
وهياتني عايشة بنعيم اني وبناتي بجالكم
ما كتيلي شلونهم اخواني وابويه
اميرة : كلهم زينين وناقصهم بس جيتج ، وهاي بعد انتِ رجعتي واني ما اكدر استلم امور البيت اكثر من هيج
البيت بأيدج وعوفيني ارجع التهي برجلي وبأموري الخاصة
نوال : هههههه بعيني
زمرد : من رخصتكم اني راح اروح اتحضر للصلاة
عفتهم كاعدين وصعدت لغرفتي ، دخلت وبوجهي للحمام فرشت اسناني وتوضيت ، طلعت مشطت وتعطرت
فرشت السجادة وكعدت استغفر رب العالمين علما يصير وقت الصلاة
اندعيت لنوال وأهل هالبيت كلهم بالهداية بلكت الله ينزل السكينة على كلوبهم ويبطلون هذا التكبر والجبروت بالتعامل ويه الناس
قبل شويه الصار كسر گلبي ، والله حتى الغصة الي بصوت البنية وصلني من جانت تحجي
ما اعرف بيت عمي شبيهم وشجاهم ويه الناس ، والله اني احبهم اموت عليهم نفر نفر
ما انكر زيناتهم وياي وشكد همه مدلليني ومداريني من يوم الوعيت بي على حقيقة موت اهلي
واني ما احسهم غير اهل بس هذا ميعني إني اجذب الي تشوفه عيني من ظلم
كل نفر بهالبيت عايش حالة حال اللعابة الي مكوكة
يتحرك مثل وشلون ميريد عمو
ومن بعد عمو نوال مسيطرة على كل البيت ومتولية مسؤولية قصص وروايات عراقية كرار صلاح الكل بغياب عمي
كل قرار بهالبيت قبل لا يتخده عمو لازم توافق عليه هي لأن برأي عمو نوال هي اذكى واعقل وحدة بالبيت
من بعده هو طبعًا حتى خالة اميرة مالها دور ولا حجايه اذا نوال اخذت قرار
حتى من جنت صغيرة اتذكر هي الي حرضت عمو على عمار حتى ليتزوج البنية الي يحبها
بحجه انها غريبة ومو من مستوانا وفركشت كل مخططات عمار وهي الي زرعت فكرة زواج عمار وكحلاء براس عمو وخالة
وهذا السبب الي مخلي علاقتها موزينه بعمار والي
من سنين كاطع علاقته بيها ويعاملها بكل سطحية
اما مهدي كل عركه يتعارك وياها ولا الثانية لان ميحبها تدخل بخصوصياته ولا تاخذ قرار عنه وهو الوحيد الي عمو ميخليها تتقرب منه
لكن لحد هذا يومنا نوال عدها قناعة انُ هي اكثر واحد يعرف مصلحة هالعائلة من بعد ابوها
واني ما انكر انها فعلًا تحاول تدور مصلحة الكل وزينة ويه كل اهل البيت وتحبهم
لكن عدها نوع من حب التملك والسيطرة ، ميهمها احد اهم شي تسوي الي تشوفه هي مناسب بعينها
والباقي اخر همها
حتى بناتها خطية ممشيتهن مثل الساعة ، ميگدرن ينطقن كلمة وياها .... مراويتهن الويل حتى خصوصية الهن ممخليه
وحدتهن اذا تاخرت شويه بالحمام تكسر الباب عليها وحتى ضرب تضربهن رغم هن مو صغار
على عكس فاطمة بنت عمو حامد ، ارملة ابن عمو حاكم الجبير "جواد" الي جان ضابط عسكري واستشهد بالحرب
وهي بقت هنا لان عمو ما قبل بنات المرحوم يتربن خارج هالبيت وهي بقت وياهن بحجه متكدر تفارگهن
وياريت لو صدك بحال بناتها هي ، متدري بالدنيا طشت لو رشت حايرة بروحها وضاربه الدنيا عرض الحايط
ووظيفتها بالحياة تلگالي عريس حتى اتزوج وتخلص مني ، بشنو مأثره عليها اني والله ما اعرف
شبيدي اكول غير الله يهديها ..... سمعت الباب يندك
كمت من السجادة وتوجهت فاتحة الباب
شفت مروان گبالي ، ابتسمت هلوو مروان شلونك
باوعلي من فوك لجوه
مروان : هاي شلابسه ؟
زمرد : باوعت على ملابسي مستغربه ، تقصد الجادر
"ازار الصلاة" ، اي داتحضر للصلاة
اشرتله بأيدي ... تفضل
دخل لغرفتي واني عفت الباب مفتوح ودخلت ورا
اباوعله اخذ نظره على الباب المفتوح وضحك بأستهزاء
مروان : المن عفتي الباب مفتوح شنو تخافين اسويلج شي ؟
زمرد : لا العفو اكيد مو هذا قصدي بس ميجوز الباب تنسد علينا
مروان : ومنو گال ميجوز ؟
زمرد : رفعت جتافي وجاوبته .... الدين
مروان : اموت على الرياء اني
زمرد : باوعتله مقهورة من حجايته بس ما جاوبته تنهدت مستغفره بداخلي
مروان : الظاهر ما عاجبج كلامي ست الحسن
زمرد : غلست على كلامه وسألته بشكل واضح
خويه مروان انت شنو تريد مني بالضبط ؟
اباوع لملامحه ظلمت ومد ايده بجيب بنطرونه مطلع ظرف
مروان : مدي ايدج
زمرد : قدمت ايدي عليه ، فزيت من ضرب الظرف بأيدي حيل
مروان : هذا جزء من ارباح ابوج هذا الشهر ، قسم خليته الج بهالظرف والقسم الثاني ودعته بحسابج بالنگ
واذا ما كفاج هالمبلغ ، عود بلغيني
زمرد : هزيت راسي ، شكرًا صارت زحمه عليك
مروان : ماكو زحمه .... هه اختي
_____________________________
منال : كومي يله عشه
حياة : ما اريد
منال : دكومي تره منبقيلج والله
حياة : كتلج ما اريد
منال : اووو طبج مرض
حياة : عافتني وطلعت ، ضميت ركباتي وسندت راسي عليهن اباوع بالفراغ
شويه وطبت امي
عبير : هاي شنو ليش متردين عشه بس لا زعلانة
حياة : لويت طرف حلكي ومجاوبتها
اباوعلها تقربت كاعدة يمي ، تنهدت من مدت ايدها مسحت على راسي
عبير : لتزعلين مني حبيبتي بس انتِ اليوم غلطتي ما جان لازم تردين بوجه الست هيج
حياة : لعد اخليها تتجاوز عليج واسكتلها !!
عبير : ميخالف يمه اني الغلطانة هي بلغتني واني نسيت
وبعدين يا يمه يا حبيبتي المثلنا مجبور يبلع كلشي ويسكت
حياة : مسحت دموعي وباوعتلها ، ليش لأن فقره كون ياهو اليجي يهينا ونبلعها ونسكت !!
مشطت شعري بأيدها وتحسرت
عبير : هاي قسمتنا من رب العالمين امي ، ميخالف نتحمل
لگمة الحلال تره صعبة يا يمه واني وابوج جبنا عمرنا الدنيا تلطش بينا وتحملنا علمود لگمة الحلال
وتره لگمة الحرام اسهل منها ماكو ، اني لو اريد من عين باجر امشي بالدرب الموزين واحط احسن بيت
واشتريلجن كل التشتهي رواحجن
بس يا حيوته وين نروح من رب العالمين ، وشنريد نگله يوم القيامة لو مشينا اعوج ؟
والله ردنا بيت لو ردنا هدوم !! عندي اضل العمر كله بهالشگه هذا ولا اخلي وحدة منجن تميل اعوج ولو لثانية
وهاا خاف عبالج اني من ابلع الكلام اليجرح واسكت معناها اني ضعيفة لا ابدًا
بس يا بنتي العيشه تريد والي يريد يحجي خلي يحجي شريد منه
اني موكله امري لله هو يرد ياخذ حقي لو واحد اذاني
والله مو غافل عن كسر الخواطر يا امي فإنتِ وكلي امرج لله وعيشي حالج حالنا وربج يفرجها
وهسه مسحي عويناتج الحلوة من اروحلهن فدوة
وانطيني ايدج
وكومي ويايه نتعشه سوه ابوج خطية منتظرنا
حتى ياكل وينام ورا دوام الصبح
حياة : مسحت عيوني وكمت لازمه ايدها ، بستها وحضنتها
اني احبج هواي يمه
عبير : ليش اني شعندي غيرجن يبعد گلبي ، كسرات ظهري هذا المن غير الجن ، يله حبيبتي تعاي
حياة : شبكتها ومشيت للصالة
الله يساعدك بابا
رشيد : هلا بويه
حياة : كعدت يم خواتي وبدينا نتعشه
كملنا وكمت اني غسلت المواعين ومنال تمسح الطباخ
اما ست الحسن والجمال منه فايدها منقوش عليهن الحنة كلشي متشتغل
مكابلة هالموبايل وكاعدة
كملنا كلشي وطبينا كلمن نامت على دوشگها
منال : شجاي تسوين صارلج ساعة تتراسلين
منه : داحجي ويه سمية على الناس الدنشتغل عنهم
ولجن شنو من شوفه شفت قبل شويه
منال : شنو شفتي ؟
منه : قبل العشه بابا اجه وصاح لوحدة منه تساعده ديطبب المسواك
واني طلعت اساعده ولهناك واشوفلج ذيج الشوفه بالحديقة
3 زلم ولج يوكعون الطير من السمه شنو اللبس شنو الشياكه انوب كلمن لازمله قمجي مال اركيلة ويجر
النفس منه
سكتي خيه سكتي زلم يشگون الگلب شگ ، للحظة تمنيت روحي انگلب قمچي واصير بأيد واحد منهم
حياة : ايع منه شهالحجي تره عيب ، شنو تنگلبين قمجي شنو تطيحين بأيد واحد منهم
شنو هالحجي السخيف تدرين لو بابا يسمعج شسوي بيج .... شهالمصطلحات هاي مال بنات الشوارع
منه : يله اني بت شارع انتِ شعليج
ما بقى عليه بس الزعاطيط
حياة : مبين منو بينه الزعطوطة اصلًا
منه : دنداري يله وانطمري لا اكوم اكفخج تكفخ عود
صايره تعرف تحجي
حياة : انداريت منطيتها ظهري وهي بقت تسولف ويه منال
منه : تدرين منال ، هسه من اصفن اكول اني شناقصني وما أخذ واحد مثل ذوله
منال : وانتِ عبالج المثل ذوله يكلبوج ؟
منه : شو انتِ متعرفين تحجين
منال : هذا الصدك انتِ منو بحالج حتى انوب ذوله يلفون عليج
منه : ليش شبيه اني ناقصه لو لان مطلقة
منال : معليها شغلة المطلقة بس احنه كلنا ناقصين بالنسبة الهم .... احنه وظيفتنا بهالحياة نشگه وهمه يعيشون
والله يا الله انوب تگلي شناقصني ، دنامي خيه نامي ولتحمين زايد
احنه وين وهمه وين تصبحين على خير
حياة : طبعًا هن يحجن واني حاصرتني الضحكة وجتافي تهتز على حجي منال ، خرب يومها ولا تجامل الادبسز
منه : داشوفج تتمضحكين اكوم احط النعال بحلكج
حياة : ههههههه الله اكبر شون يعني ابطل اضحك
منه : انجبي ونامي
حياة : هزيت راسي اضحك وغفيت
ثاني يوم الصبح اجه الحدقچي وطلعت علساس داتفاهم ويا وياريتني مطالعه
لكيت الرجال واكف ومخنزر عليه ، بعدني هستوني وصلت يمه وعاط بيه
الحدقچي : اني اريد افتهم انتِ شجابج عليه اني ما طالب من احد يساعدني انتِ منين طلعتيلي
حياة : واني علساس الكاتله نفسي حتى اساعدك
غير همه طلبو مني
الحدقچي : تساعديني لو تاخذين مكاني
حياة : تخصرت وباوعتله ، اسمع عمو اني هنا جابوني اساعدك لا اخذ مكانك ولا ابد
وبعدين انت رجال جبير وين تكدر وحدك غير اذا تشيل هاي السندانه يصير عندك انزلاق
فزيت من ضربني بالكرك على ظهري
الحدقچي : الزمي حدج من تحجين ويه الأكبر منج تره والله اشكيج للسيد الجبير واخليهم يشيلوكم منا
حياة : هاي ضربتني انت لو اني متوهمه ؟
الحدقچي : واكسر راسج اذا تتجاوزين
امشي يله فتحي المرشة خلي تنسقي الزرعات
حياة : هزيت ايدي الحمدلله والشكر بهالبيت حتى الخدم ميتحاجون
يارب ما اطلب منك غير الصبر ، مشيت فتحت المرشة ورجعت اساعده
وهيج مر شهر كامل اني ملتهي ويه الحدقچي واهلي كل واحد بشغلة ، بابا بالمصنع وامي بالمطبخ
وخواتي بالبيت
اكدر اگوم انه شبه تأقلمنا اما اني فمن ساعة الحاجتني ذيج السخيفة ما وصلت لباب بيتهم بعد
الحدقچي : حياة تعاي زرعي هذني الشتلات هنا
ديري بالج هالنوع من الورد يحبه استاذ مهدي
فأعتني بي
حياة : صار
وخرت الجفوف ولفيت شعري لفوك ورجعت لبستهن وبديت اشتغل بيهن
ضليت فترة اشتغل بيهن والحدقچي لازم المكينة ويقلم العشب حتى يبين مرتب
لهناك ولفت انتباهي صوت رجال مميز مختلط ويه صوت الحدقچي
انداريت عليهم ، صار بوجهي رجال يطلع ببداية الثلاثينات خال اديه بجيوب بجامة تراكه
وديسولف ويه الحدقچي
ما اخذت وقت حتى اعرف انه واحد من اهل هالبيت
لأن القالب غالب مثل ميگولون ذاك وينه يصيح لأمه وابو اني ثري
الحدقچي : تفضل سيد شوف ذني شتلات الورد الي طلبتهن
حياة : اباوعلهم تقدمو عليه
والظاهر الأستاذ مجان منتبه الي لأن من شافني قطب حواجبه "عگد حواجبه" متفاجئ من جودي
- السلام عليكم
حياة : وعليكم السلام
- شنو ابو جهاد جايب بنتك تساعدك ؟
الحدقچي : لا سيد هاي بنت رشيد حارسكم الجديد
بس والله يا سيد شالعه گلبي لسانها شطوله متسمع كلامي ابد ، ترضاها سيد ؟
حياة : خزرته متوعده وباوعت للرجال ضحك بخفه
مباوعلي
- ديربالج على ابو جهاد تره هو هنا الخير والبركة صح هو شديد شويه بس لأن يحب النظام
الحدقچي : كللها سيد كللها هاطول لسانها
حياة : هسه غير يسكت فشلني من الله لا ينطي لكاها فرصة بس يريد يشحتني
- ميخالف حجي هم بنيتك هي ، المهم هسه سويلي مجال خلي اتمعن بورداتي
الحدقچي : تفضل هذني الوردات الهولنديات الردتهن بس تره هذني مو اني الخليتهن
شنو رأيك بيهن ؟
حياة : همه يسولفون كدامي واني لساني ارتبط ، لازمه المكص وواكفه
اباوع للرجال صافن على الوردات ، دنك شمهن وابتعد
ـ حلوات الوردات ومكانهن مثالي بسرعة الواحد يكدر يلمحهن ، عاشت ايدج
حياة : احم شكرًا استاذ
هز راسه بخفه بدون لا يلتفت عليه و حاجه ابو جهاد
- يله اني اترخص اخذو راحتكم
الحدقچي : هلا بيك سيد على راسي
حياة : طلع موبايله جاوب على اتصال اجا ومشه عايفنا
باوعت لأبو جهاد .... اكلك عمو منو هذا
الحدقچي : هذا ابن الحاكم الوسطاني
