رواية نعم أحببتك الفصل العاشر 10 بقلم انين الليل

بثينه

اكيد انتم هسه تسالون ليش فتحت الباب السعد واكيد انتم اخذتوا عني فكره مو حلوه 

صحيح انا لبسي شويه جرئ وانا بطبيعتي بشوشه واسولف واضحك وبابا منطيني ثقه ما الها حدود لكن 

انا بنفس الوقت اعرف شلون احافظ على نفسي وما استغل هاي الثقه الصالحي عندي شويه تسرع لكن اعرف 

حدودي وبنظري مو كل وحدها لبسها قصير او ما تلبس جواريب وتخلي مكياج وتضحك هي مو شريفه او

راح تكون مشروع سهل للرجال لا اتصور هذا الشي ما اله صحه 

التربيه هي الي تزرع بالبنيه تصرفاتها وانا امي وابوي ربوني وتعبوا عليه وابقى طوول عمري اتذكر تربيتهم 

وثقتهم بخير                 

لكن السبب الي خلاني افتح الباب السعد لان خفت احد يجي من ولد عمي اواقاربنا او ابويه ويشوفو وتصير مشكله ويصيرون يشكون ويمكن يرحون للكاميرات ايعيدوهن 

صدگوني انا نفسي ما اعرف ليش رحت وفتحتله الباب يمكن خفت اي خفت جريت نفس وبقيت انتظر بالصاله

وهو بس يتصل وانا ما ارد لان بصراحه ضجت حتى من نفسي واجتني الف فكره وفكره 

اكثر من عشرين اتصال بعدها دزلي رساله گلي 

بثينه شبيج ردت اگلج احبج وهم ردت اسمع ردج حياتي لا تزعلين 

انا ما رديت لكن هو بقى يلح 

حبيبتي ما اقصد بس حبيت اسمع احلى كلمه منج 

ارجوج ياروحي قدري الهيام الي انا بي 

انتي ما تعرفين من سمعت هالكلمه شنو صار بيه يمكن ملكت الدنيا من عرفت انتي تحبيني اوعدج ابد ابد 

ما ذلج لان انتي صرتي كل حياتي حياتي الي ضاعت والي قاسيت ما قاسيت وربي دزاج هديه 

ابوس ايدج لا تزعلين وردي عليه الخاطر الله 

صرت اقرا بالمسجات وضجت حييل من كثر ما يلح لذلك قررت ارد 

كتبتله =اسمع سعد مع الاسف انا كنت غلطانه وغلطانه هواي لان مع الاسف انطيت ثقتي الشخص ما اعرفه 

المفروض افكر الف مره قبل ان اتهور واقبل اقابلك وارجع انا واخواتي وياك 

تدري يا استاذ تدري اني شدا احس من اتذكر الي سويته 

اصلا اني خجلانه من نفسي لان طاوعتك اني عبالي انت هماتين تخاف عليه وعلى سمعتي 

لكن مع الاسف طلعت غلطانه 

شكرا على صداقتك الي ما حافظت عليها وشكرا لانقاذك الي لان انت كنت بوقتها شهم جدا وشجاع 

بالنسبه الهديتم راح توصلك باقرب وقت لان ماعدت تهمني ولان هي اجت من شخص كنت اعرفه 

لكن الان اصبح غريب عني 

سعد كتبلي //ارجوج بثينه قدري وضعي انا احبج واعشق كل شي بيج وابد لاتفكرين لو مجرد لحظه 

تفكرين انو صورتج ممكن تهتز امامي اعيد واكرر كل ما بالامر اني حبيت اسمع ردج لا تظلميني تعرفين بيه 

احبج واحارب الدنيا كلها على مودج 

ما اعرف ليش من قريت كلامه حرك احساس بداخلي بقيت اسال نفسي 

اشو گلبي رجف من كلامه معقوله انا وگعت بالحب معقوله انا احب سعد لعد وهذا الي سووا 

اكيد لان يحبني هيج جازف واتهور 

وانتي بثينه ؟

انا ما اعرف احس بنفسي تايهه وخايفه من هاي الجرأه الي يملكها والي ما اعرف معناها 

معناها يحبج ومستعد يسوي كل شي بس حتى يفوز بيج 

الساعه بالثنتين اجو اهلي وابوي چان كلش تعبان ومقهور وعرفت حتى هو باچي على اياد انا سالتهم 

شلونه اياد 

زين //سووله عمليه وهسه هو بالعنايه المركزه لان فقد دم هوايه 

امي //اي صدك كلهم اتبرعوا اخوانه وزيوني واو ولد عمج عباس اولاد خاله كلهم الدنيا انگلبت علي 

ابوي من سمع كلام امي بچى وانا اتقربت بست راسه وگتله بابا لا تبجي ان شالله يصير زين 

امي باوعتله وگالت //حسين لا تصير مثل عباس شگ دشداشته بالمستشفى مو زين لا تفاولون ع الولد

خلي نصلي وندعيله الله يراف بحاله 

ابويه باوع الامي وهو ايگلها //وفيقه اياد من اتغدا عدنا گلي عمي عندي موضوع اريد احچي وياك لكن راسا 

اجا تلفون وطلع گلي رايديني وما عرفت شنو يريد مني 

امي //ان شالله يگوم بالسلامه والله ياخذ بايده وتعرف شنو راد منك انت بس ادعيله اياد دووم ما يشوفك 

اله مثل ابو وكل عمرنا ما شفنا منه اله كل خير 

ابوي //اي والله اياد سبع وشهم كل ما يشوف زين يگله انا اخوك الچبير وحزام ظهرك اي احد يضايقك لو بگد الشعره 

لو شنو تحتاج تگلي تصوري من يمر عليه للمحل ويشوف حمل يروح يركض ينزل ويه العمال ما يستنكف من شي 

اياد مو ابن اخوي اياد ابني وفيقه 

شفت ابوي شلون مقهور على اياد انا ما اتحملت واگفه واشهك من البچي امي باوعتلي وگالت 

اذكروا الله وادعوله هسه ما تشوفونه اله گام على حيله (باوعتلي ) بثينه روحي سوي الابوج واخوج عصير كافي لا تبچيين 

ما بي شي بس ادعوله 

رحت للمطبخ سويت كوبين عصير برتقال وجبته اتوسلت بابوي حتى يشربه 

ابوي راح الغرفته يرتاح وزين صعد لان مبين كلش تعبان امي بقت گاعده وانا سالتها 

ماما صدوك اشلونه اياد 

امي باوعتلي واتحسرت //يووم اياد بايد الله (ورفعت ايدها بالدعاء ) هو جل جلاله قادر يشفي ويگومه بالسلامه 

الخاطر امه الي اتخبلت علي وموتت روحها لو هذا عمج صابر الله يعينه يكسر الخاطر 

خطيه ماما 

اي بثينه مصيبه چبيره الله يساعدهم تدرين من دخلوا اياد للعمليه عمج وين راح 

وين ماما 

اخذ الاشعه وصورة اياد وراح الابو الجوادين وهناك شامر عگاله بالحضره والصوره ذابها بالشباك 

وصار يدعي ويصرخ والناس ملتمه وكلها تدعيله 

انا بدون وعي نزلن دموعي لان اتخايلته هسه هو نايم بالمستشفى وما يدري بكل شي  

و صرت ابچي امي اتقربت مني وگالت وهي تمسد على شعري 

ماما بثينه ادعيله الاياد الله يحفظه الشبابه 

ان شالله 

ياالله اصعدي الغرفتج وارتاحي لان باچر احتمال هواي ناس ويجوز يجونه اهنا 

هزيت راسي ورحت صعدت الغرفتي وانا ادعي ربي يارب شافي وعافي بحق حبيبك محمد 

اتمددت ع الچربايه وانا اسأل بنفسي 

شنو ليش هلگد مقهوره على اياد لا انا مقهوره من سمعت كلام امي على عمي صابر ومن شفت ابوي 

بس ليش الچذب هم مقهوره على ايااد لان هو ابن عمي 

واياد زين وياي رغم عصبي بس عمره ما اتجاوز بالكلام بالعكس من يشوفني ضايجه يحاول يسوي كل شي بس حتى ارضى 

اياد انسان نظيف بس انا ما اعرف ليش من اشوفه اضوج 

رفعت اديه بالدعاء وانا اگول يارب بحق حبيبك محمد وآل بيته شافي اياد وگومه بالسلامه الخاطير شبابه والخاطير عمي 

(بعدين صارت گدامي امه وهي تبچي )يارب والخاطير امه 

فتحت النقال لان انا خليته صامت من اجو اهلي شفت مسج جايني من رقم غريب قريته 

(بثينه احبج وراح تثبتلج الايام صدق كلامي )

ما اهتميت للرساله لان عرفت هي من سعد حتى ما فكرت بي كل تفكيري چان باياد 

نمت وگعدت الصبح الساعه بالتسعه نزلت لگيت امي بالمطبخ سلمت عليها وسالتها 

صباح الخير ماما ماكو اخبار عن اياد 

امي ردت //ابوج واخوج راحو من الصبح للمستشفى الله كريم 

انا اتصلت بزين اخوي =الو 

هلا بثينه 

هلو زيوني شنو الاخبار 

والله بعده معلگيله دم وما منتبه 

هاا والطبيب شنو گال 

يگول ان شالله خير يراد صبر شويه 

حبيبي زين اذا استجد شي خابرنه 

ان شالله 

ودير بالك على بابا لا يرتفع ضغطه 

اي اعرف 

گعدت على الكرسي امي سالتني //ها ماما شيگول اخوج 

=بعده بالعنايه والطبيب مطمنهم 

الله كريم خلي اصبلج ريوك 

=لا ماما ما اريد راح اصعد فوك ما الي خلك لا اكل ولا اشتغل 

امي //منو الي اله خلك كلنه ضايجين على اياد 

صعدت الغرفتي واتمددت وبدت اتصالات سعد وانا مطنشته ولا ارد اجاني مسج 

بثينه ارجوج ردي جاي اتصل اريد اگلج اسف ارجو ان تقبلين اعتذاري 

ما رديت ولا اهتمييت چان فكري باياد افكر وانا خايفه يصير بي شي 

غلقت النقال لان ما الي خلك هذا سعد يتصل ما احب اجاوبه العصر نزلت لگيت امي بالصاله انا فتت للمطبخ شربت ماي وطلعت تفاحه اكلت بالليل امي سوت عشا واكلنه بدون نفس صارت تقريبا بالتسعه اجه ابوي هو وزين العابدين وياهم تلث رياجيل عرفت همه من اقاربنا الي بواسط سامعين بالحادث وجايين مو بس همه هواي ناس الي رايح ويه عمي عباس والي رايحين ويه اخوان كريمه امي سالت زين //اسوي عشا 

زين لا ماما اتعشينا بالمستشفى ابوي دز على عشا للناس الي اجوي من سمعوا بالحادث بس سوولنه چاي وحضروا فراشات علمود ينامون 

امي راحت تطلع فراشات وانا خدرت چاي واجه زين ياخذ ه بعد ما اخذ ماي سالته 

زيوني شلونه اياد 

بثينه اياد بعده بالعنايه ما منتبه 

والدكتور شگال 

گال ما طول ما نزف معناتها عده مرحلة الخطر 

يارب اگلك شلون صارت الحادث 

من اتغده عدنا خابروا بالدائره هو راح چان عنده علم بعصابة تهريب ومسويلهم كمين اترامى وياهم واحد منهم ضربه اياد وهو هم رامي اياد طلقتين 

حييل طلقتين 

ايي وحده بچتفه وهاي الدكتور طمنه لككن شويه الخطره هاي الي بطنه 

خطيه الله يشافي 

لو تشوفين يابثينه شگد ناس اجو ترسوا المستشفى ويدعوله يگلون خوش ولد وصاحب نخوه 

زين وعمي 

عمي الله يعينه وحتى ام اياد گاعده بالحديقه ما تقبل تروح للبيت والله بثينه تكسر الخاطر 

الله يشافي 

اخذ زين الچاي واجه ابوي للصاله انا وامي اجينه يمه هو گال 

وفيقه اتحضري باچر راح ادز مسواك وطبخي للناس الي جايينه للمستشفى 

انا جاوبته =هسه بابا احنا بيا حال وتريدنه نطبخ

بابا عيب ناس جايتنه ومتعنيه اليوم جبت من المطعم شيگولون ما عدهم نسوان يطبخن 

امي //حسين ما عليك بيها دز وانا اطبخ حتى لو ادز على رجاء تساعدني 

تسلمين وفيقه انتي طوول عمرج بت اصول 

امي باعتلي وكالت روحي جيبي دشداشة ابوج مالت النوم علگيها بالحمام 

باوعت الهم وانا الملم بحلگي =صار 

ابوي دخل للحمام وراح بات يم الخطار بالديوانيه وانا غسلت الاستكانات ورحت فوك للغرفه قريب الساعه بالتسعه گعدت ونزلت للمطبخ شفت المطبخ بس علاليك مسواك سالت امي 

ابوج دزاهن حتى اطبخ للناس الي جايين الاياد 

انا بسرعه خبطت كوب حليب وچاي شربته ع السريع وصرت اگفض العلاليك وامي تغسل بالدجاج وخاله اللحم ع النار واجت خالتي رجاء هي وتماضر وصارت تساعد امي بالطبخ وانا وتماضر نظفنا الخضره وغسلناها وغسلنه الفواكه

حضرنه الصياني والمواعين واجه زين هو ويوسف شالوا الجدوره بعد ان امي فهمتهم شلون يصبون 

گعدنا اتغدينا ويه خالتي وتماضر الي راحو العصر لان تماضر عدها دوام 

المغرب اخوي زين خابرنه وگال اياد انتبه والطبيب خلا تحت المراقبه يخاف من المضاعفات

امي گالت اللهم صل على محمد وآل محمد الف الحمد لله والشكر ياربي 

گلت الزين =الحمد لله ما طول انتبه معناتها راح يسترجع عافيته شويه شويه 

(نسيت اگلكم اياد نقلوا المستشفى اهلي بناءا على طلب ابوي ) 

وره ما انتبه اياد بقوا مانعين عنه الزياره تلث تيام وبس واحد يبقى مرافق اله فصاروا اخوانه وزين واولاد عمي عباس يتناوبون واحد الصبح والثاني بالليل واكثر الناس صاروا يجون عدنا واحنا واگفين چاي وماي وعصير 

واذا من خارج محافظه فاكيد غدا وعشا ومبيت 

انا اتافف لكن امي تكول مي حالقف الخاطر ابوج والخاطر اياد 

وره خمس تيام اجه ابوي وجهه مبتشر گال اياد زين والطبيب طمنه علي 

امي گالت //صلوات على محمد وآل محمد والله حسين فرحت اله من كل گلبي ان شالله يگوم على حيله 

ويسترجع عافيته 

ابوي //ان شالله وفيقه اياد سبع ما ينخاف علي (باوعلي )بابا بثينه سوي شوربه خلي اخذها اله من ارجع 

امي //طلعي صدر دجاج من المجمده وسويله

طبعا انا رحت للمطبخ وانا ادردم =شنو ما تسويله اخته مرت اخو شنو بيتهم بالفاو اشو خطوتين بس هنه خوش 

لا گياتنا ازواج هنه گاعدات بحجة مقهورات واحنه علينه الكراب اطبخوا افرشوا 

(بالاخير سويتله الشوربه 😜😜)

اجه اخويه زيوني اخذها وامي سالته عن اياد هو جاوب 

الحمد لله زين بس بعده تعبان 

امي يعني عرفكم حاچاكم 

ايي ماما عرفنا وحاچانه وحتى سالني عليج وعلى بثينه 

اتفاجأت من كلام اخويه گتله =شنو سالك عليه 

زين العابدين //ايي گلي شلونها بثينه جاي تاكل لو بعدهي تعبانه 

امي //سوده عليه هاي ظاله اباله لمن اخذج للطبيب قبل الحادث 

=بس شگد عيب يسال عني گدام الناس هسه الي يسمعه شيگول

      زين العابدين //لا بثينه شنو گدام الناس محد موجود بس اخو محمد وامه وعمي وانا من دخلت شفته صاحي 

    بسته براسه وگتله كلنه خفنا عليك هو سالني عن امي وعنج 

ضحكت واتخيلت المنظر =لعد من سمعت عمه كريمه شنو چان ردها 

زين //هههههه شبيج بثينه تدورين وره المره هي بيا حال 

 =والله ولا اصدك معقوله كريمه سمعت وسكتت الله عليك زيوني بداعة بابا ما عوجت حلگها وهزت ايدها

زين بقى يضحك وامي گالت //عووفي للولد خلي ياخذ الاكل ويروح 

=ماما انا شگايله جاي دا اطمن على ابن عمي وعلى امه الله عليك زين من سمعت اياد سال عليه ما هزت ايدها 

وگالت //اشبيها تسأل عليها حيير بروحك 

اخوي صار يضحك //شنو بثينه انتي چنتي يمها 

=مو انا الي اعرفها للقوه الغاشمه هاي ما تصير الها چاره وانت وابويه وامي طايحيلي خطيه امه لو تشوفينها 

تكسر الخاطر تريد تموت تدرون من يموت عمي انا اتهمها بقتله اگول فقعت مرارته للرجال ما اتحمل طب مات 

امي //دي كافي مافي عيب هالحچي وانت اخذ الشوربه وسلمنه على اياد گله امي تريد تجي تشوفك 

اخويه //ان شالله اگله 

راح زين العابدين لحگته للصاله =زيوني الله عليك سلملي على اياد وگله بثينه بايدها سووت هاي الشوربه خصوصي 

الك وشنو يشتهي خلي ايگلك وانا اسويله 

زين //اي راح اگله وگدام عمه كريمه 

=عفيه باخوي البطل 

امي //ولا تجوزين من سوالفح الولد بيا حال وانتي مناوشاتج ويه امه 

=ماما ليش تخلين ابختج الله عليج منو سووا الشوربه مو انا 

ايي انتي سويتيها بس شگد دردمتي عبالك طابخه عجل وهسه توصيين اخوج شنو يشتهي يگله 

=ماما مو صدك بس حتى اقهر كريمه 

انا يووم الاحد ما داومت والاثنين گوه رحت للكليه لان تعبانه كلش من وصلت انا وصديقاتي شفت سعد من بعيد 

انا ولا اهتميت گبل ع المحاضرات وبالاستراحه رحت الغرفة الطالبات ما وصلت للكفتيريا لان بصراحه 

احتقرت نفسي لان سويت شي بلحظة ضعف ما لازم اسوي 

////////////////////////////

اياد 

من اجيت انا وبثينه من المستشفى چنت كلش فرحان ما اعرف ليش يمكن لان الطبيب گلي يجوز المدام حامل 

او لان بثينه ما عقبت على كلام الطبيب او من اخذتها للتحليل وهمه ياخذون الدم هي اتاذت وصارت تباوعلي او من 

وصاني الطبيب ادير بالي عليها ما اعرف الي اعرفه رقررته ويه نفسي 

بثينه ما اتركها ولازم اخليها تحبني 

من طلعنا من المستشفى وركبت يمي بالسياره خسيت الي صاعده مو بت عمي لا حسيت بيها زوجتي وانا مسؤول 

عنها ومن وصلت وامها گالت لازم ابقى ع الغدا لان عمك طلب هذا الشي انا بقيت بس حتى اشوفها اكثر وقت ممكن 

اتغدا واباوع الها اباوع الثينه الي ملت عليه حياتي رغم رفضتني لكن من احنه رغار وانا احبها واضرب خواني

 لان يزعلوها وادري بيها تخبث عليهم لكن انا اسايسها واسوي كل شي تريده مني 

من كبرت بثينه وشبت صارت حلوه ومثيره والمشكله اتفتحت اكثر من اللازم وصرت احس بيها صارت جريئه 

ولبسها صار اجرأ وهذا خلاني دائما عصبي خصوصا من خطبتها وهي رفضتني وصارت تتحجج 

ما افكر بالزواج اريد اكمل اعتبره مثل اخوي هذا الشي اذاني واذاني حييل 

وكل ما نروح البيتهم لازم يصير بين امي وبثينه سجال لان امي تكره بثينه وزاد كرهها اكثر واكثر من لمن رفضتني 

واعرف بثينه ما تحب امي اتصورهن اذا بنفس البيت شنو راح يصير 

امي دووم تگلي //ساحرتك بت وفيقه مثل ما امها سحرت عمك  

بوكتها ارد عليها :: شنو هالحچي هذا يووم تره عمه وفيقه خوش انسانه وما عدها هاي السوالف 

امي //ايي مبين من بتها الشاله حالك ومخليتك ما تندل دربك 

انا ويه نفسي ::صحيح بثينه مخبلتني وما مخليتني اندل دربي وانا ما اتصور حياتي بدونها 

ذاك اليوم گعدنا كلنه ناكل وعمي حسين يسولف عليه وانا عيوني على بثينه من كملت جابت النه الچاي وهي صعدت فووك وانا بوكتها قررت افاتح عمي بموضوعنا واطلب منه يفتهم منها ليش رافضتني 

بوكتها باوعت العمي وگتله ::عمي اريد احچي وياك بموضوع مهم 

عمي بابتسامه //اي بابا اياد اسمعك محتاج فلوس لا تستحي 

لا عمي تسلم الله يخليك ويطول عمرك انت ما مقصر بس هو موضوع خاص 

اي بابا اتفضل 

عمي رايدك تفهملي من ب......اهنا اتصلو عليه بالدائره وبلغوني لازم اجي 

انا وگفت واهنا شفت بثينه وهي نازله للمطبخ 

عمي گلي //خير بابا 

عمي اتصلوا عليه ولازم اروح 

الله وياك دير بالك 

هي ما منتبهتلي جاي تنشف بايدها بمنشفة المطبخ انا اتقربت عليها وگتلها ::بثينه الله عليج اكلي زين وشربي عصير 

هي ابتسمت وهزت راسها 

انا اذا اجي على وكت ارجعج للطبيب واذا لا باچر ان شالله 

لا اياد ما بيه شي لا تكلف نفسك شويه ارهاق وصرت زينه 

ان شاء الله ياالله مع السلامه 

الله وياك

طلعت وانا فرحان بالطريق صرت اخابر بمجموعتي وصلنه للدائره وهناك كل واحد استلم الامر مالته ورحنه للعصابه باغتناهم وصار تبادل لاطلاق النار والقينه القبض عليهم حسيت اكو واحد لابد باغته واتبادلنه الرمي يمكن قتلته وهو ضربني 

بوكتها ما اعرف شنو صار بلحظتها اشوف الكل ملتم عليه امي وابوي واخواني اصدقائي واقاربي انا صرت اجر نفس قوي لكن مختنك اريد اگلهم وخروا ابتعدوا جاي ادور على وحده اريدها يمي اريد اشوفها اريدها تجيني اختنكت وحسيت خلاص انا انتهيت وهاي اخر لحظه بحياتي اتمنيت اشوفها بس هي ماكو غمضت عيوني وانا دموعي تجري عليها. 

حركت اصيعي وانا احس بنفسي يصعد وينزل احچي ويه نفسي لا انا متت اتذكر صياح جماعتي 

بس لا انا احس بگلبي وانا هسه جاي احچي ويه نفسي حسيت بفتحة الباب وبچي امي ودعاء ابوي وعمي حسين الي يسال الدكتور ويگله طمنه الله يطمنك 

ويجي الطبيب يكشف بطني ويفحص صدري بالسماعه ويگلهم الحمد لله حالته مستقره الان اتجاوزنا مرحلة الخطر لكن راح امنع عنه الزياره 

چنت اريد اسمع صوتها واشم عبير انفاسها لكن بقيت ساكت او بالحرى ما اگدر احجي 

بعدها نقلوني للعنايه وانا ابدي شي واحد اشوف بثينه يمي لكن هي ما اجت اكيد بسبب وجود الناس واقاربنا عمي ما يقبل تجي 

جابلي زين العابدين شوربه وگلي هي مسويتها رغم ما اشتهي بس اكلت منها وهو يگلي بثينه اسلم عليك وتگول شنو يشتهي اسويله 

انا ابدي اگلهم اريدها تجي اريدها يمي ما اريد اي شي ثاني اريد بثينه بثينه وبس  

///////

الفصل الحادي عشر من هنا 

شكرا لزيارتكم عالم روايات سكيرهوم