رواية بيوت الصفيح الفصل الحادي عشر بقلم زهراء السراي
.
.
أعرف جيداً معنى أن يحتضن الأنسان
نفسه بنفسه ويردد أنا بخير
.
صِبى
_______________________
للفقد آثار ماتنشاف بس تعيش ويانه
الفقد يغير روح البني آدم
يخليه يسكت هواي
يخليه يخاف حتى من الضحكة
لأن يعرف كلشي ممكن ينكسر بلحظة
لمن تفقد شخص عزيز تبدي تخاف تتعلق
تخاف تحب
تخاف تحچي هواي
تخاف تفرح لأن كل فرحة صارت مربوطة بوجع محتمل
1
يخليك تصير حساس لأي شي
نظرة كلمة حتى الهوا تحسه ثگيل
تصير تتوقع الأسوأ
وتحضر گلبك دائماً لأي فراگ
و لأي وجع و لأي خيبة
1
هذا اللي حسيته بعد موت فرقد
وغيابه عن عيوني صرت حساسة
وأخاف أترقب حتى أنفاس أحبابي
مثل المجنونة أتابعهم خالتي مُنى
غِنى بالليل اتفقدهم وأباوعلهم يتنفسون
يلة تغمض عيني
الى أن وقع المحذور وأجاني الأتصال
اللي هدم الجزء المتبقي من گلبي
بعد مااتصلت بغِنى وبلغني الشاب اللي
ناقلها للمستشى باللي صار ماسيطرت
على صراخي وبكائي واني أبلغ خالتي
و مُنى بالخبر حجيتلهم كل شي
وطلعت راكضة اخذت سيارة للمستشفى
وصلت وچان وضعها مزري
خلع بالفك ضربة راسها مسببة جرح
عميق ونزف فاقدة للوعي عدة مرات
وترجع تستعيده أتصلت بيه خالتي بلغتها
بكل شي واني منهارة مااسيطر حتى كلامي
الحروف تبعثرت بشفافي من خوفي أن لا أفقد
شخص ثاني من عائلتي
ساعة بس وآني أفتر بالممرات أتمنى يدخلوني ألها
شفته يمشي بسرعة ناحيتي شبه راكض ويتلفت
تعلگت عيوني علي ووگعت عيني بعينه ركضلي
بخطوات مسرعة
-شصاااااار صِبى
-ماااا ماااا أدري يگلولي حادث ميخلوني أدخللها
أستاذ فدوووة
عينة على وجهي وشفافي اللي ترجف وأديه
اللي ماثبتت لحظة سحب أديه وهاي للمرة
الثانية يتوتر ويتلعثم
أيده حاوطت أيديه بقوة
-شووو باوعي بس تنفسي تروح هالرجفة تمام
اني رايحلهم وكل شي راح يكون بخير
ابتعد مني راح على جهة أجرى أتصالات هووايه
نص ساعة وكل شي تغير انفتحت الباب
وطلعو الأطباء النزف متوقف واشخاص اثنين
أجو ورى أسد بين سلام وكلام ويه الأطباء
اخذوها گدام عيني للعمليات
مشيت بخطوات سريعة وراها
وقفني صوته وهو يصيح بأسمي
-صِبى دقيقة
وگفت اجاني بيدة بطل مي
وگف أسد يحجي وياهم
-حولوها غرفة خاصة أذا ممكن
مشينة وراهم وهم يطلعوها بسدية
متحركة ناحية المصاعد صعدنا وياهم
للطابق الثالث مشو بيها لغرفة فتحناها
جبيرة معقمة حمام بداخلهة وسرير للمريض
والثاني للمرافق نزلوها وضبطو وضعها
لحد ماصحت تأن بألم انطوها
مهدئ نامت على أثرة بعمق
كل هذا وأسد مافارگنا يفتر بالممرات
اني شايفة وضعه وأعرفع من يتعب
طلعتله گاعد وساند نفسه عالكراسي
-أستاذ
فز واگف
-شلونها
-بعدها نايمة أستاذ تعبناك ويانه والله
روح أرتاح بالبيت ماعندي شي
اني يمها
- باچر جمعة صِبى ماعدنا شي
اني باقي هنا دزيت على الجماعة
يجيبون أكل
-أستاذ ليش تكلف نفسك والله مو جوعانة
-يابة آني جوعان وماكو تكلفة
اشرلي گعدت يمه
-مافهموج شصار
-الشاب اللي ناقلها صاحب محل من
الشارع اللي چانت ماشية بي
يگول بسرعة صارت الشغلة مالحگنا اني
واهل المحلات نساعدها سحبوها شباب على
دراجة سارقين جنطتا وهي لابستها
حوالي كتفها ومجرورة وياهم وشامريها
الناس خايفة تنقلها بس هالشاب ربي
يوفقه جايبها ليجاي
-دفع الله ماكان أعظم ليش مااتصلتي بيه
بساعتها
-والله أستاذ ماقبلت على خالتي لأن كلفتك
هاي ثاني مرة نقلقك ويانه
-صِبى الدنيا بعدها بخير والناس للناس
وانتم غاليين عليه
واني اريد أرد اجاني صوته المكروه
-أبووو قسوووور
التفتت شفته ماشي بيده
علاگة وترمز
وگفت رايحة للغرفة وأسمعه يحجي
وية أسد
-هذا العشة سوتة قمر
وهنا چاي حار لو طالبلك من مطعم مو احسن
متدوخني
-اكره اكل المطاعم ولحمهم مو مضمون
-صدقت كلة لحم زمايل
-صح مثلك
-خلف الله عليك ترى الوالدة ماتدري انت
ويا هاي
-أسمها صِبى وأحترم نفسك وشگلت لأمي
-گلتلها ويا متهم عنده بمركز الشرطة
-يلة تزحلگ منا
-متزحلگ خوييي في أمان الله
راح واني ورة الباب سمعت كل شي
شوية واندگت الباب
دخل أسد رفع ادي مبتسم
-وصلت الأمدادات
مدلي أيدة بالعلاگة
-رتبي الوضع اروح اغسل
دخل للحمام وطلع رافع ردن قميصه
الصيفي باللون السماوي وية السمار گاعد
گعدة نفضت الفكرة من راسي بعد ما حرك
شعره بأطراف اصابعه المبللة ورتبه
فتحت الحافظات
كبة مقلية بتيتة حلقات
زلاطة ودجاج مشوي
وبطل لبن وبطل مي وگلاصات سفري
وترمز الچاي خليتهن على ميز الادوية المتحرك
-تفضل أستاذ
سحب كرسي گابلني واني عالسرير گاعدة
سمى بأسم الله وسوه لفة بدأ ياكل
منزل راسه حتى مايحرجني
صبيتله گلاص لبن ومي وخليتهن يمه
-شكرا
گالهة ورفع راسه
-شنو رأيج بطبخ قمرتي
-ماشاء الله بنتك أستاذ
-لا بنت أختي گال حمزة ان هي ويا اختج
اللي بالمتوسطة
-صح صح بس ماعرفت صلة قرابتها بيك
-خوما ضوجج حمزة من شافج
ابتسمت
-لا بس شمرله گلمة وراح
-هذا ظرفه صعب هووواي نتسامح ويا
بالبيت ومخلي على راحته رغم صعوبة التعامل
ويا
-هو هم محامي
-لا مو محامي
-شلون شفته بالشركة
-چان ستوه متخرج من السادس
-عبالي جامعة وخريج
-لا هو جثل شويه
-هههههههه هوايه أستاذ يعني أساساً
مجان محامي وحجه من كيفه وبسببة ضاعت سنة من عمر اخويه
گلتها وغيمت ملامحي قهر نزلت الاكل حامدة
رب العالمين عالنعمة
باوعلي وترك الأكل
-جان طايش وتصرف ذاك التصرف من كيفه
لكن بالحقيقة ماعندة گلب ومن تتعرفين علي تغيرين
رأيج
-الله يوفقه شدرس لعد
-سفرنا لبرطانيا ببعثة درس
هندسة
-ومن كمل ششتغل
-فتحناله مكتب هندسي هناك هو ومجموعة
خريجين اصدقاءه بيوم مشكلتكم انت ويا
اتصل بيهم يشوفهم طلعو غالقين المكتب وماكلين
حصته منه لذلك أنهار
-وهسة شيسوي أستاذ
-هسة جاي يدرس ماجستير وطلبت منه
يجي هنا كموظف اداري ماقبل اقتراحي
بدأ يطلع شغل تصميم شركات مكاتب منازل
-طموح
-جداااا بس متسرع
-عكسك
ضحك بهدوء وكمل
-تشوفيني هادئ صِبى
-جداً
-عكس الزوابع اللي بداخلي
ابتسم واشرلي
-أكلي مااكلتي شي
استحيت أرجع امد ايدي شربت لبن ومي
مدلي أيده بلفة
-يلة وراج سهر قوي نفسج
اخذت اللفة اكلها خلصنا لميت الحافظات
ورتبتها وجهه هو شاحب وتعبان
-استاذ ليش مترتاح
-لا ماعندي شي مجرد صداع
-خاف ……
رفع عيونه عليه ونظرة خجل اعتلت وجهه
-مااتخربط لتخافين ماخذ علاج
سكتت خجل وحجيت متبلكة
-نام عالسرير أستاذ اخذ راحتك
-لا طالع بره انت أرتاحي
-والله من خابرت وعرفت اللي صار چنت ستوني
گاعدة من النوم انت أرتاح اني راح اگعد يمها
عالكرسي خاف تصحى
هز راسه وراح للسرير تمدد رافع رجل والثانية مادها
وأيدة مخليها على عينه من الضوة
توجهت للأضاءة طفيتها وخليت ضوة الحمام
بس مشتغل منطي نور خفيف
اجتني همسته
-عاشت أيدج
وراهة بربع ساعة ارتفع صوت تنفسه العميق
وغط بالنوم
گابلت غِنى طول الليل من شفتها مستقرة توجهت للشباك أباوع عالشارع والسيارات القليلة الماشية
امتدت ايدي لجيبي طلعت التلفون
فتحت فيديو فرقد من گد ماانقله من تلفون لتلفون
الدقة مالته انتهت وبس صوته واضح وصورته مغوشة
يحجي وياي ومُنى تصور چانت تلعب بالتلفون
-أگلج صباوي اذا الله أذن وكملنا البيت
شتگولين أخطب فطم بس تصير على ذمتي
-ليش مستعجل فرفور
-ولچ أحبها أتمنى ألزم ايدها والله بس شو أخاف من الحرام عاد نعقد أحسن
-بس كمل بناء البيت حتى ترتاح وهالوجه الأجلح
هذا يرجع أبيض حتى تطلع حلو بالصور
-تغارين الحولة
-ليش مو تگول عيونج حلوات من هسة بعتني
بعدك ماخاطب
-بعدني أگول عيونج من عجائب الدنيا السبعة
ضحك وانغلق الفيديو منتهي
ابتسمت ووگعت دموعي وحاجيت صورته
-تدري فرفور لوما صاير اللي صار چان هسه
عمرك كمل ٢٢ وتدخل ٢٣
التفتت وعيوني محروگات من الدمع
-مااگدر أحس روحي تفر من جسدي باليوم
اللي مااسمع صوته
-شهالأرتباط اللي بينكم
-آني أعتقد أن أحنه توأم أجينا بأوقات متباعدة
لكن بالحقيقة أرواحنا مترابطة
-شلون مات بهالعمر الصغير
-أنقتل بذنب مو ذنبة وجريرة مو جريرته
توقف وتقدم ناحيتي سحب التلفون من ايدي
يشوف صورته
-تملكون ذات العيون
-شلون
-عيونكم تحجي
ابتسمت
-تحجي ألم يمكن
-أنت بالذات
-شبيه
-عيونچ تحجي قصص
توجه نظره للشباك مكمل
-أعتقد العيون هي نافذة الروح
-فعلاً
انفتح الباب مقاطع كلامنا دخلت الممرضة
سلمت فتحت الأضوية وبدت سلسلة
من الاجراءات الطبية بدلت الضمادات
والسيرومات حقنت أبرة مهدئ ثانية بعد ماانطتنا
علم ميردوها تتحرك علمود دعامة الفك
وطلعت باوعلي أسد
-الوضع يطلب چاي
تمشيت للميز فتحت الترمز الچاي حار
صبيتله كوب واليه كوب
وگعدنا عالكراسي هادئين اني أفكر
بغِنى وهو هم باله سارح
نص ساعة ووگفت مشيت لغِنى شفتها
گعدت مقابيلها وسندت راسي
عالسرير وغطيت بالنوم
صحيت بعدها على صوت أسد يگعدني
-صِبى آني رايح للبيت من الاستعجال
نسيت العلاج أسبح واجيبلكم ريوگ وأرجع
-أستاذ والله مااريد أتعبك اخذ راحتك بعد
-صِببببى
گالهة بنفاذ صبر وطلع رجعت تمددت ونمت عالسرير
عطر ملابسه الهادئ مالي الفراش والچرچف الخفيف
تغطيت ورحت بالنوم مااعرف شگد
وقت مر حسيت على صوته يحجي ويا أحد
-آني موجود اختي تركيها نايمة
-تمام اريد تنتبه لهذا المحلول وين الخط الاسود اللي أشرت عليه من يوصلة توقفه تمام
-تمام اخذي راحتج
فزيت واگفة ارتب حجابي نزلت رجلي
للگاع التفتلي
-صح النوم
ارتبكت واني انزل للگاع
-آسفة ماحسيت
-ليش آسفة لأن ارتاحيتي شويه
-لأن تعبتك
تقدم ناحيتي ماتريگت جبت الريوگ وياي
ترتيباتج بعد
دار ودخل الحمام
ياربي معقولة اكو هيج شخص هدوء
ترتيب أخلاق صفنت واني سارحة
بشخصيتة الغريبة
سمعت صوت الباب شغلت نفسي بترتيب
الاكل
اجبان والترمز مليان چاي حار
وصمون خليته ودخلت غسلت وگعد
تريگ ويايه بهدوء مشغل بتلفونه
فيروز بصوت هادئ
كمل ووگف تمشى بسرعة لغِنى
وقف المحلول
گعد عالكرسي يم الشباك وصاحلي
-تردين ادور اللي سرقوها وسببولها هالأذى
-لا أستاذ ربي يجازيهم آني جاي
أقاتل هالحياة قتال مااريد افتح جبهة ثانية
-ضعف لو قلة حيلة
-كل شي أستاذ كُلهن
بقينة متقابلين نحجي لحد
الساعة ثلاثة ونص صحت غِنى
وبعد كلام الاطباء لأسد اطمأنينا وطلعنا
هو راجع بينه للبيت والحمد لله عدت
على خير وتحسنت غِنى وبدينة نستعيد
حياتنا چنت أعتقد أن الدنيا
انطتني نصيبي من الحزن والفراق
ماچنت مدركة أنها مخبيتلي بثناياهة
حزن عظيم قادم
.
مُنى
_____________________
يگولون الصداقة ماتجي الا
بعد عشرة طويلة ومواقف هوووايه
بس أكتشفت
أن هالمقولة خاطئة فأكو أشخاص
نعرفهم بشهر وتكون علاقتنا بيهم
روحياً عابرة المئة عام
وهالشي صار بيني وبين قمر
بعد اللي صار قمر صارت صديقتي
المفضلة أيام اللي أنكسرت بيها أيدي
هي ملازمتني من بداية الدوام لنهاية
لحد مافتحت ايدي الحمد لله كل يوم نطلع
نتمشى بالساحة نسولف بكل شي وبيوم وبلحظة
هدوء يشبه روحها حاجتني
-اگُلج خل أخلي ماما تنقلج ويايه
-تگدر
-أكييييد أمشي
تمشينة للأدارة وهي ايدها بيدي
دخلت غرفة المدرسات تحجي
وية أمها وطلعولي باوعتلي
-ها ياحلوووة راح تبوگج قمورة وتاخذج
وياها موافقة انتِ حتى أتدخل
-اي ست
-تعالن ياملعونات امشن گدامي
تمشينا وياها دخلت للمديرة
اللي مااعتقد مرت عليه مديرة بأخلاقها وهدوئها
حجت وياها ست ميادة أم قمر ولا اعترضت
-بس روحي للمعاونة تنقل اسمها بسجلات شعبة (ب)
رحنة وگالت مالج علاقة هسه اخذي
جنطتج وروحي هناك لباجر سجلاتج منقولة
مشينا وقمر من سعادتها تگرص بأديه
-ممصدگة ممصدگة قبلو
-ولج شبعتيني گرص نحلة أنتِ
-امشي وووويايه خل ناخذ الجنطة
اخذنة الجنطة ورحت وياها بالرحلة
-وأخيراً احد گعد برحلتي
-ليش محد گاعد يمج
تقربت شاورتني
-ميحبني لأن بنت المدرسة
خلصنة هاليوم وهي فرحانة
اخذت جنطتها بعد مادگ الجرس
وطلعت اني وياها للأدارة
تلاگت وية امها مشت مثل كل مرة
تگلهة اجاني خالو دائما تطلع ويا خالهة مو وية أمها
وهالشي غريب
-ماما اني رايحة
-بالليل خلي خالو يجيبج تعشي يمنا
راح أسويلج بيتزا
-أجة خالوووو الله عليج تعاي نوصلج
-لا والله بيتنه بعد ثلث شوارع قريب
احنة بيتنه بعيد بس لخاطر ماما اجيت هنا
تريدني وياها
-شعجب ممخليلج خط
-هذا خالو معقد يتخبل من هالسوالف ومن رجع
من السفر لغى الخط وهو ياخذني ويرجعني
واحنة نحجي وگفت سيارته المكروه
ردت امشي نزل بسرعة وتقرب
-شلونها ايدج
هيج بدون لا سلام ولا كلام
باوعتلة رديت بملل
-الحمد لله زينة
-وشبيج تردين من وره خشمج
-غلطان دا أرد من حلگي
نزلت نظراته ناحية شفافي وگال
-واضح داااشوف ومركز
تركتهم واني اودع قمر
-اشوفج باجر
صاح ورايه
-تعاي نوصلج الشمس صارت حارة وايدج منا
-لا عادي وايدي المكسورة مو رجلي
وبعدين صرت زينة ماكو داعي للمجاملة
-شرد عليج مثلاً اذا اختج صِبى
رجعت ماشية ناحيته
-رجاءاً أستاذ حمزة ممنوع تقدم أي نوع من الأهانة لأختي سواء بحضورها او غيابها
-ملسوووووونة
دار وجهة ماشي وأعصاب رگبته نطت بسبس ويا قمر واجتني ماشية تضرب على خدها
-هذا تعصب ويگول خل اوصلها الشارع فارغ والجو صار حار
واذا ماصعدت أدعمها حتى صدگ تنكسر ايدها ورجلها
التفتت الموضوع مغري صراحة
السيارة مسدودة ومبين عالگ تكييف
مشيت وية قمر وگف فتح الباب لقمر صعدها
ورجع مد ايده حتى يسندني
باوعتلة صفح وصعدت لوحدي
أباوعلة نزل أيده وعصر كفه بقوة
ضحكت بسري واني احسب
-وهيج صرنا واحد واحد أستاذ حمزة
عالگ اغنية أجنبية هادئة مشى بينه
سريع اباوع شو هذا طلع المنطقة
-عفواً بيتنا بقى وراك
-افتهم بس اريد أوصل قمر وبعدين
ارجعج عندي شغل بمنطقتكم
-لا لا شنو وين ماخذني
-لتخافين مناكل كتاكيت
قمر التفتتلي وغمزت
-شبيج يرجعج والله
سكتت وهو يمشي مسافة ربع ساعة
توقف بباب بيت جبير يجنن مكسي حجر ابيض بالكامل
وتصميمه راقي بشكل نزلت قمر
للبيت وهو باوعلي
-تعاي هنا شنو اني سايق عندج
-اني ماطلبت من حضرتك تجيبني ليجاي
لذلك راح أبقى بمكاني وترجعني للبيت
لأن اخواتي يقلقون عليه
بقبضة أيده ضرب الستيرن وتحرك ماشي بسرعة
احس گلبي بدأ ينبض بسرعة آني ومن حادث
خالتي صار عندي فوبيا من السرعة ومن السيارات
تعرقت واختفى صوتي وأحس هبطت وعيوني
أبيضت احاول احجي ويا يخفف سرعته
ماطلع من حنجرتي صوت مديت أيدي ناحية كتفه
الظاهرة من الكشن عصرت گتفه حيل
ضرب بريك بسرعة وگعت بكامل جسمي عالكشن
الگدام وذوت روحي بعد ماانضرب خشمي بقوة
الدوخة لازمنتي وانكفيت على نفسي على
صوته وهو يفتح الباب
-شووو باوعيلي شيلي راسج
ماگدرت احجي رفعني واني لازمة وجهي
والرطوبة ملت ايدي وريحة
الدم لعبت نفسي رجعني ليوره
وهو يسحب باكيت الكلينكس بسرعة
وعدل راسي غمضت عيوني وهو يحجي
-مُنى شووو فتحي بالله
دفعت ايده رجعها غصبا عني
فتح الشال اللي لافته تركني ثواني
ورجعلي بيده بطل مي
-طلعي راسج من السيارة
ماگدرت سحبني غسل وجهي مرتين
ثلاثة توقف الدم
رجعت بمكاني سحبت كلينكس نشفت وجهي
وحاجيته واني أبجي
-رجعني لبيتنا
-باوعي أقسم بالله مو قصدي بس
انتي فاجئتيني لزمتيني غير تحجين
وگعت دموعي مسحتهن ودرت وجهي
-لتسرع حباب أخاف من السرعة
سد الباب بهدوء وصعد عدل المرايا ناحيتي
وطلع يمشي على كيف
لحد ماوصلنا البيت فتحت الباب قبل ليحجي ونزلت بشارعنا بقى واگف يباوع من بعيد لحد ماوصلت البيت
دخلت هدوء البنات بعدهن بدواماتهن
وخالتي عالكرسي تتحرك ومخليه حجلة
توگف عليها من تشتغل طبيت وصاحت
-مناووووي تعاي يمه
-ها يمه
-سويتلج فاصوليا
رحت غيرت ملابسي
قبل لتشوفني وركضتلها
بستهة ورجعتها عالكرسي وسويت زلاطة
وسوالف خفيفة علما اجتمعن البنات
وهاي عادتنا اني وياهة نگعد نسولف عن كل شي
وبين شغل ودراسة لليل بينت عليه آثار
الضربة خشمي ورم وجوه عيني لون خفيف
بس واضح سألوني گلتلهم بالطوبة أنضربت
داومت باليوم الثاني وچنت متأخرة
لزگت الضربة لأن خشمي تلون بلون ازرگ
باوعت سيارته واگفة وهو مسنود عليها
مشة ناحيتي وصاح من شافني اسرع خطواتي
-لتنهزمين أوگفي
وصل يمي باوعلي ولأول مرة نظرة الحقارة والتعالي
مختفية وبدالها نظرة أعتذار وأسف
-أعتذر هالمرة من صدگ ماادري
رفعتلة حاجبي
-يعني القبلها تدري مو
-لتتصالفين وياي هاي اعتذرت
-شكراً
-اخذيلج راشدي اذا تحبين
-أهلي مربيني زين مااضرب كبار السن
گلتها ومنظر صدمته بوجهي خلاني مبتسمة
بحقارة باوعتله وقبل لااروح شمرت قنبلة كلامي وتخطيت ماشية بهدوء
-شكراً عالأعتذار عموووو حمزة
ترددت كلمته اللي يگولها كل مرة
نتعارك بيها تحت مسامعي وهو رايح
-ملسوووووونة
دخلت المدرسة ضاحكة على قوتي وجلادتي
على حجم ايده وضخامته كرجال لو ضاربني
كف جان لزگني بالرصيف
وهيج أستمرت أيامي گام من يشوفني يخزرني ويحرك
لحد ماامتحنا نهاية السنة يومين وصار حادث غِنى
چنت محتارة وحاولت تأجيل باقي الامتحانات
بس صِبى رفضت و غِنى كتبتلي رزالة بالتلفون
وهيج خلصنة الأمتحانات وهو يوگف لقمر ينتظرها
آخر يوم توسلت بية قمر يوصلوني
-لا مااگدر والله
-لخاطري شبيج
شاورتها
-خل يوصلني أول مو يطير خشمي مثل
ذيج المرة
باوعلي صفح وكرر جملته
-مناكل كتاكيت امشي
وصلوني حضنتني قمر
ورجعت صعدت بالسيارة
-مو تنسين خابريني
-ان شاء الله قمورة
مبتسملي بأستهزاء اشرتله بيدي
-باي عمووووو حمزة
شخط السيارة ومشى بسرعة
وبهالطريقة ختمت السنة واني
غاثته أرتاحيت وحسيت بالنصر
ثاني يوم مرتاحة ظهرية ممدة بسرير
صِبى واتصفح بتلفونها أخذتني النومة
وصحيت على صوت غِنى بعد مارجعت
من طلعتها گومتني رحت للغرفة
دخلت أصيح مثل كل يوم من اگعدها
-يمممممممممه يووووم امي گعدي
ارييييد اتمشى آني وياج
شمرت نفسي عليها وهي تضوج من هالحركة
أيديها اللي اعضهن كل مرة أشاقيها
باردات ثلج اباوعلها رغوة بيضة طالعة من حلگها
رجفت روحي داخل جسمي واني
أعيط بداخل روحي وصوتي مايطلع
-لا تمووووتين يوم لا تيتيمني مرتين
.
.
غِنى
__________________
عارفين فكرة الموت ورعبها
اكو فكرة أعمق منها وأكثر حزن
وهي فراق الأحبة
بعز ألمي والرطمة القوية اللي أرتطمتها
بالرصيف والألم المرعب اللي أصاب فكي
والصوت العالي اللي صدر أثر ضربتي
وغيابي عن الوعي ورجوعي اله واني
مسنودة على صدر شخص غريب
يحجي بصوت عالي ويا اللي يسوق
-ضربتها براسها مااظن تعيش
اسرررررع بعد أخوك
ماچان براسي الا شي واحد
وين أيمن عني
غمضت وهوا بارد أجتاح رئاتي
ظنيته الموت
واختفيت وغبت عن العالم
ورجعت لوعيي من انرفعت بين
الأدين كل شي مغوش وضبابي
أصواتهم ونقاشهم حول وضعي أحاول انطق
أحس بألم يجتاح أوصالي وكأن شفافي مكبلة
بأسياخ حديد
ساعات الكل يحوم حواليه اللي يخيط جرح واللي يخليلي محلول
واللي يخلي دم بسبب النزف أسمع
وأحس بس مااگدر انطق
من بين الأصوات كلهة اجتاح مشاعري
وحرك حواسي صوتها
-اختييييي فدوة هااااايه أختي خلوووني ادخل
هي أمي الثانية أختي الشجاعة
صِبى وكأن روحي أرتاحت بوجودها
وغمضت أغماضة عميقة
يمكن أغماءة او يمكن موت ماادري
ارتاحيت وحملتني كفوف وانسندت
فاتحة عيوني همست فرقد
حبيبي
-اجيتج غنيوة
بس لحظات لحظات سمعت صوته
وشفت طولة الحلو واختفى
انيت وبچيت والأصوات تداخلت
وصوت فرقعة أصابع يم أذني
-غِنى تسمعيني
رجعت للأنين مااگدر أحجي
-باوعيلي يلة سبعة شووو فتحي
فتحت عيوني احسهن وارمات
وگعت نقاط مي على وجهي
باوعتلها واني افتح واغمض
دموعها دموع صِبى وهي تحضن راسي
تمتم
-الحمد لله غِنى ردت أموت وراج
رجعت أنيت وارتفع صوت جهوري بأمر
-دكتور أنطوها مسكن ضروري ترتاح
احس بالمحلول البارد يمشي بوريدي وبالابرة
اللي زرقوها بكتفي
وغطيت بالنوم والراحة اللي ماگعدت منها الا
وصوت صِبى يداعب آذاني
-غناوي حبيبتي
فتحت عيني عليها اشوفها بشكل واضح
بعيني اليمين بس عيني اليسار مغوشة
ارتفعت ايدي تتلمس وجهي اشوف مثل القفص الحديد
يحاوط وجهي
نزلت ايدي صِبى
-اششش ارتاحي لتتحركين
-اممممممم
همهمت وصوتي مختفي
اشرتلهة عالتلفون بيدها
فتحتة وكأنها فهمت عليه
فتحت الملاحظات
بأصابع مهزوزة وهي لازمتة كتبتلها
-ليش مااگدر احجي
سحبت التلفون مني وخلتة بصفها
قرت السؤال وردت
-لأن عاضة لسانج اثناء الحادث
ومتورم
تنفست ساكتة وهي تحتضني على كيف
واحنة نحجي اندگت الباب ودخل شاب تقريبا
بنهاية الثلاثينات
-تفضل تفضل أستاذ
-الحمد لله عالسلامة آنسة غِنى
ردت صِبى مكاني
-الله يسلمك أستاذ تعبناك هوووايه
-تعبكم راحة الدكتور يگول أن شاء الله أصابتها بسيطة
بس الجرح عميق براسها لذلك اضطر يشيل جزء جبير من الشعر بجانب راسها اليسار حتى يخيطون المكان
اما الدعامة فتبقى عالأكيد لمدة اربع أسابيع
أكلهة هالفترة سوائل واكلات لينة وسهلة بدون
مضغ وبلغني أن كل شي تمام وتگدرون تطلعوها
العلاجات هايه
قدملها علاگة مليانة
-ليييش تعبت نفسك أستاذ
-صِبى يا صِبى بطلي نبرة الخجل بصوتج تمام
هسة ترحين وياي نفهم شيريد الدكتور
وبعدها أني اطلعكم
قبل لتطلع صِبى أشرتلها عالتلفون
خلتة بيدي وطلعت
دست الأرقام واني رافعة ايديه
فوگ حتى اگدر اشوف جنت محتاجته وبمحاولة
اخيرة اتصلت بي رن ورن ورن
وماكو رد
محاولتين بعدها ذات الشي ماكو رد
نزلت ايدي بتخاذل ونزلت دموعي
عشر دقايق ورجعت صِبى وياها ممرضة
گوموني وعدلو شعري ورتبو الحجاب
لبستني صِبى عباية أسلامية
جسمي يأذيني بس الالم الأكبر بوجهي
وفكي وراسي من جهة اليسار بي حرگة
وألم قوي
تحركت ماشية وياهم اباوع الدنيا نهار
حاولت انطق ماگدرت بس همهمة طلعت مني
توقفت صِبى خلت التلفون بيدي
-بيش الساعة
قرتهة وردت
-بالأربعة العصر من البارحة طلعوج بالوحدة بالليل من
العمليات ورة ماصحيتي انطوج مسكن ونمتي جريتيها
جرة وحدة
تحركت تسندني الى أن وصلنا سيارة عالية راقية
فتح الباب أسد ولزمني من مرفق ايدي يسندني
ويا صِبى
جنتلمان حقيقي رفع اطراف عباتي
دخلها ويايه وسد الباب
صعدت صِبى بصفي ومشى بينا
يحجي ويه صِبى عالشغل ويتناقشون
واني سارحة باللي صارلي ضغطت ايدها
سندت راسي على كتفها باوعلنا بالمرايا
-صِبى شوفيها محتاجة شي
اشرت بيدي لا وخليت ايدي على صدري فهمت عليه
گالتله لا وصلنا البيت نزلوني وهو نزل العلاج
اطمأن علينة دخلنا وتحرك ماشي
ركضتلي مُنى بعد ماسمعت الباب وهي تبچي
-متت ورررراج
خالتي بعربانتها تتحرك ناحيتي
صوتها مهزوز
-ولج غنيوة الحية لو ميتة چان بقيت وحيدة
منو يعاركني بعد
سحبت ايدي تبوسها سحبتها واني اطبطب على
راسها
دخلوني لغرفة صِبى تمددت عالسرير وهنة يفترن
حواليه وبعد ساعة وكلوني شي خفيف صِبى
جهزتلي ملابس نظيفة
و مُنى جابت مي وويا منشفة صغيرة نظفو جسمي
من الدم
مرن خمس أيام بديت أسترجع جزء من كلامي
وصوتي باقي يومين بس على أمتحاني
صِبى مجازة وتفتر حواليه ومحاوطتني مثل
الام اللي تحاوط اولادها
-تتجهزين لأمتحانج
-مااگدر
گوة رديت
-تردين تأجلين
-ايييي صِبى و بعد اني صرت زينة روحي للشغل
-وصوتج الرايح
وتعبج
-زينة آني والله خالتي يمي
راحت ثاني يوم صِبى صبحية
و مُنى بأمتحانها
گاعدة بيدي التلفون أتصفح
أباوع لصورة اللي مالية تلفوني
هو وحمودي ثلث أشهر ضبط بدون
حتى مااسمع صوته چان حمودي
يخبصهم مايتحمل يومين ويخليهم يتصلون
كاميرا يحاجيني
اكيد اشتاقلي واني هم أشتاقيتله هوووايه
أشتاقيتله
ابتسمت على صورته بحظني ضاحكين وأيمن
تدخل ووگف ورانه رافع اصابعه مسويلنا
اذانات
واني لازمة التلفون دگ أتصال عالواتساب
باوعت للأسم رهام جنت هوووواية زعلانة
بس قررت احاجيها فتحت الخط أجاني صوتها الخجول
-الو
جاوبتهة بصوتي المرتجف
-الو
-والله احنة مانستحي
-لا حشاكم
-شبي صوتج شو گوة تحجين مريضة
-أسناني تأذيني شويه
-اشوووووف ننة يلا رهام
سمعت صوته الحنون حمادة ياحبيبي
-غناوي حمادة يريد يشوفج عادي نفتح كاميرا
ترددت بالرد بس لخاطرة رديت
-تمام
فتحت الكاميرا
ويا ماظهرت صورتي بالكاميرا شهگت رهام
وجهي متورم عيني اليسار كدمة دم غالقة
جزء منها شعري بالجهة اليسار من جبيني لحد منتصف راسي مشيول بس گالت
-شبييييج يمه شصايرلج سوووودة بوجهي
بعدهة ممكملة أنسحب التلفون من ايدها
وصارت عيونه المصدومة بعيوني
أبتسمت گوة بسبب المسند ووگعت دموعي
متناسية شعري اللي واگع على كتفي
وثوبي الفضفاض اللي لابسته بلع ريگه بمحاولة أن يسألني ماسيطرت على حزني وغلقت الخط
اجتني رسائل وحدة تتبع الثانية صوتيات
بصوتة الحنون المرتجف
-شبيج غِنى افتحي الخط أحجي وياج
-لج بابا ردي برسالة فهميني
مارديت لمدة ساعة هو يرن من خطة بعد مارفع الحظر عني من كل البرامج اتصل واني رافضة الرد
رجعت رهام ورة ساعة أتصلت
-الو غِنى ولج تخبل والله جايج بالطريق
-للأسف متأخر هووايه
-سووودة بوجهي ولج حتى متگدرين تحجين
-الحمد لله على كل حال رهام اذا هو زعلان انت
ليش گطعتي ويايه وحتى حمودي حرمتو مني
-والله حاربني حرب تعاركنا وحلفني بروح أهلي
مااتصل اجاني متسودن بيومها مااعرف شبي
-غلطت غلطة بدون قصد
-يجي يوم وتفهمينه غِنى
-شنووو
-ماكو شي گليلي شصار
-بسيطة حادث ومر
الحمد لله
-ولج هو گالي خابريها يتحارش بيج لأن يدري
امتحاناتج گال اروحلها اول يوم امتحان اخذلها قرطاسية مال
زعاطيط وراح افاجئها واعتذر
-ماامتحن راح تأجلي صِبى
-مااتعبج آني صوتج رايح عليج الله اتصلي علي ترى
اجاج طاير لا يروح يصيرلة قدر فدوة لعيونج
سديته مودعتها واتصلت بي اول رنة رد
-غنوووة
-أيمن
-يابعد ررررروحي
گالها وتنفس بقوة
-شبيج
استعاديت انفاسي بعد مااختنگت بشهگتي
-مااحجي وياك اذا ماتقلل سرعتك
-اريد اوصلج بسرعة
-توصلني شوكت ماتوصل اني موجودة
بس قلل سرعتك
-قللتها
-أحلف
-وداعة دموعج
سكت لحظات وصوت جداحته أعلن بداية
رحلته وهو جايني راح يترس صدره دخان
-غنوة
-ها
-شسويت اني
-مااعرف
اختفى صوته ورجع
-وگع التلفون دقيقة
-افتح سبيكر لا تبقى شايله على اذنك لا يصير قدر
-هو والجگارة بنفس الأيد دقيقة
ابتعد شويه صوته ورجع حجه
-ماعندي عذر مو
-أنت شتشوف
-يمكن بالغت
-يمكن
-أكيد بالغت خل يوووولي الموضوع
شصارلج
-راح تدوخني بسوالفك منا لمن توصل
واني نعسانة
ضحك وردت روحه
-روحي نامي جايج كلهة خمس ساعات
-ماكو خمس ساعات على كيف امشي لا تسرع عليك الله
-وعيونج
سديت الخط وحان وقت الأنهيار
وكأني چنت حابسة أنفاسي تحت المي
لفترة طويلة وفجأة رفعت راسي وتنفست
ساعة اذا مو اكثر اني أبجي أيمن عشرة عمري
مااكذب اذا گلت نصفي الثاني اجاني بوقت
جنت ضايعة بي انتشلني من الضياع اللي
چنت راح أسببه لنفسي بسبب اللي صارلي
من شجاع واخته ثلث سنوات ملازمني
بالنهار والليل نحجي لا هو يمل ولا اني
نتعارك نتصالح نسولف نضحك نكتئب سويه
أكتشفت أني بحياتي مفتقدة نموذج الرجل اللي
يحاوطني بحمايته واهتمامه أبويه وبكل صراحة
نموذج للأب الفاشل اللي ماسبب وماجلب لحياتنا
سوى الخراب
حتى الأمل الوحيد اللي بحياتنا اللي هو فرقد
چان سبب لفقدانه لحياته بعز شبابه بعمر
ال١٨
لذلك احس أيمن جزء مني بوقت وبوضع چان يگدر
يسوي مثل كل الرجال اللي يختلون بالبنات لكن
من شاف عمري وحجيتله قصتي قرر يحتويني
ومن يومها وآني ممتنة لوجوده بحياتي
تمددت بهدوء عالفراش الطريق بالعادة يستغرق
خمس ساعات أباوع للساعة بالتسعة
اخذتني الغفوة وفزيت بخوف الساعة عشرة
ونص اتصلت اجاني صوته
-ها غنوة
-ها أيمن
-بعدج زعلانة ادري مدام أيمن مو يمناي
جايج اطيب خاطرج
-لتجي ارجع
-اي عود احجليج وياها
صوت الهوى العالي اختفى وهو يحجي
-خل اسد الجامات دقيقة
رجع كمل
-شگد فاگدج
ضحكت بسخرية ورديت
-صح مفتقدني هوايه
-فاگدج فاگدج مو مفتقدج
-ماكو فرق
-لا اكو فاگدج تچوي الگلب غنوة
-ثلث أشهر أيمن
-ثلث أشهر وسبع أيام و١٦ ساعة وخمسين دقيقة
وشوية ثواني
- حتى لو حاسبهن هم لتجي
-ماجاي عليج جاي على خالتج
-اي عود اهلا وسهلا تلگاني نايمة
-الخبلة
-المزنجر
-افااااا هيج صارت الأسمر يسمو مزنجر
-اييييي عندك أعتراض
-ياااااابة شعليني وطفيني وماراح أعترض
اگلج القردة شو جعت طالع بدون ريوگ من وراج
-منو گلك تجي
-فداج المعدة والمصران مو شرط اكل
-اييييع
-عليمن لچ
-على نفسي
-حسبالي
-حسبالي لو عبالي
-حسبالي مال زلم
توقف وهو يحجي وصوت البريك واضح
-ابقي وياي عالخط
اسمعه دخل المطعم ويسلم يعرف الناس بسبب شغله
بالسياحة
-وياي
-وياك
-عندج نت
-اي
-راح اتصل واتساب فتحي اتصال
-مااااا
-هاااااا تراضينا عالخط وعالواتساب زعلانين
دفتحي خط لا اطيح حظج
-لتغلط
-مااغلط كافي لتبجين
-خرررررررب
سد الخط واتصل فيديو
سحبت الحجاب بصفي غطيت شعري
فتحت الاتصال ووگعت عينه عليه
صفن بوجهي ساكت وايدة تمسح
على لحيته بقوة
-شصارلج
-حادث
-حادث شنو
-شباب على دراجة
-دعموج
قشعريرة صابت جسمي واني احجي
انتفضت وغمضت عيني وهو مركز وياي
-احجي شصار
-طلعت من الشغل لابسة جنطتي عالجانب
وسحبوني من الجنطة رادو يبوگوها وانجريت وياهم
مسافة وشمروني
غلق الأتصال بنفس الثانية
واختفى دقايق اتصل عالخط
-وينك
-جاي بالطريق
-ووووين مااكلت
-مااريد زقنبوت
-اسم الله شبيك
-تأذيتي وشعرج راح من ورا حرامية ساقطين
-الحمد لله
-ارتاحي عينج حمرة شفتهت قبل شويه
علما اوصل نامي بس بلغي الحجية و صِبى تمام
-تمام
-ضلعي
-ها أيمن
-أستاهل
گالها وسد الخط يعرف بعدني
زعلانة مدام بعدني اجاوبه بأسمه
عالساعة ١ ونص رجعت صِبى من الشغل
بلغتها وبلغت خالتي بجيته
تأخر لثلاثة دگ تلفوني
-ها غنوة موجودين
-اي
-فتحولي الباب
طلعت صِبى فتحت الباب برداء الصلاة
مالتها دخل يسلم أسمع صوته بالصالة
خالة تحجي ويا سألهم عليه واجتني
صِبى
-الولد يسأل عليج گومي
-مااااريد
-مو وقت زعل زحمة
-قدموله شي يشربه وخليله قطع كيك
ترة مامتريگ ولا متغدي
-طايحة الحظ تتعزز وهي حافظة حتى مواعيد
اكله
طلعت صِبى ووصلتني رسالة منه
-طلعيلي
-مااااا
-أدخلج للغرفة وروح أمي
-ماااا اطلع
-أدخلج وأبوسج وخليها ترعد وتبرق وننفضح
صفنت على كلامه هذا شبي تخبل
-شبيييك شنو أبوسج
-من راسج ابوسج ياسرسرية
تعااااااي ودزي صِبى تدعبل الحجية
من الصالة
اجتني صِبى
-ها البسج رداء الصلاة مالتج واطلعج
-لا لابسة مستور بس خليلي حجاب على راسي
وطلعي خالة من الصالة
باوعتلي صفح
-وين الزعل بعد
-اريد اتعارك ويا
-بس يروح تگعدين تحجيلي سبب هالزعلة
والا حظج اطيحه
-ميخالف
طلعت صِبى دقايق وشفتها جابت خالتي
لغرفتها
طلعت ماشية فتحت باب الغرفة فز واگف تقدم
ناحيتي طبگ الباب وصار گبالي
تقدم ناحيتي باس جبيني
تراجعت خجل
باوعلي مبتسم
-عود هم تخجلين مثل البنات
باوعتلة صفح
سحبني من ايدي
-عود ماعاجبها الصفرة
-هذا شگار ياازرگ
-يابه اروحلج فدوة آني ولوني
شو باعيلي اشوف
غرغرت عيوني وخانتني دموعي
-شلون گدرت
-ماگدرت والله بس مستني الحجاية هووواي غنوة
-لا گدرت ونص ثلث أشهر حاولت بكل
طريقة اوصلك وأعتذر وانت اختفيت وحتى
حرمتني من حمادة ورهام
-اعتذري يلا
رفعلي حاجبه باوعت بنص عينه
-ضاع حقك من خذلت گلبي
اختفت أبتسامته وتقرب ناحيتي بالگعدة
-هيج حسيتي
-ولا زلت أحس بساعة الحادث
تعرف شجنت أسوي
-احجيلي
-چنت أمشي وأفكر بيك ارسلتلك
رسالة اعتذرت بيها وشرحتلك
شگد محتاجتك بس مالحگت ادزها
انضربت وتأذيت ولآخر لحظة مامر ببالي
غيرك احتاجيتك بس تعرف شنو
-عرفيني
-أجاني فرقد ياالله شگد ارتاحيت من شفته
يمكن حس بيه وحدي ومحد ويايه
يمكن حس بگلبي مكسور
لزم ايدي يگلب بأصابعي ومنزل راسة ويحجي
-غنوة الأنسان من يعز شخص ويحبه
على قدر هالمعزة يكون الزعل ماشفتي
نفسج وانت تحجيها چنتي عصبية متنرفزة
ونترتي بوجهي نتر وهالشي صار رغم تعرفيني
شگد تختلفين عندي أنتِ مو مجرد صديقتي
شي چبير بحياتي غنوووووة هووووواي چبير
فعلى قدر معزتچ صار بخاطري گلت
هاي صار سنين وبعدها ماعرفتني
-بس لو زعلان ومعاتبني بنفس اللحظة
-عندي خصلة زبااااالة خل احجيها
-گول
باوعلي صفح رفع كف ايده كفخني على كيف
-أگلها بية خصلة زبالة تگلي گول
ماكو حشاك لا فدوة لگلبك احساس صفر
رمشتله برموشي ببراءة وهالحركة چانت تضحكة
-أشتغلت سوالف البزون البريء
-ايييي كمل
-من أزعل من شخص عزيز أطول بالزعل وخصوصاً اذا معزته بمعزة الصفرة
-الأزرگ ثلث أشهر هو هذا هم زعل
-تدرين شنو چان مفتاحي برسائلج
-شنو
-لو بس گايلتلي يروح الشغل مااشتغل
بس لا تزعل انتِ خليتي زعلي بكفة
وشغلج بكفة وكفة الشغل رجحت
وهاي حتى الحادث بسبب هالشغلة
المنحوسة
-بس .........
-لا بس ولا خس سمعي شغل ماكو السنة
الجاية فاينل مااريد أنشغالات
أريد تميز وتفوق
-بس أسمعني
-لا تلحين وانتِ سمعيني
تركي الشغل عند ذولة الأثنين وخلصي
امتحانات وتشتغلين بالفرع مال المكتب
هنا شگلتي
-لا شفقة ولا كاسكيتة أشتغلي شغل حقيقي
مو عبالج هين شغل بي تعب
صفنت علي وهو مركز وياية ابتسم
وبينت رصعة فكة من جوه لحيته
الخفيفة ورجع لسوالفه
-بنت الكلب حتى وهي مسحولة تشگ شگ
-گووووووم گوم روووووح
-دنجبي انجبي وهاج
دار وجهة بصفه علاگة صغيرة مبرومة
-هاي لسلامتج مالحگت اجيبلج شي
تلمستهن فلوس
-مااااااااا اخذ والله مااخذ
فتح ايدي وجعصهن بيها
وصوته تغير
-شوفي غِنى الشفتي ذيج الفترة هذا
ربع من عصبيتي وزعلي لاتخليني اشوفج
ذاك الوجه وتنفريني
باوعت بوجهه وحجيت بهدوء
-أيمن
-هاااااا ووجع
-باووووع
باوع على ايدي حركتها
-رجفت من الخووووووف
طگها ضحكة مامسيطر على نفسه
-أقسم بالله أكبر عرمة ولو لازمه الحرامية
جان علستيهم
ضحكت مميله راسي
-يمناي
نظرتة تغيرت وصارت عيونة تلمع
-بعد رووووحي
-فاگدتك اني هووووايه
ضرب على گلبة حيل
-انعل ابوي أذا غبت بعد
ابتسمت واني اباوعله بأرتياح
-تاكل
-اكيييييد اكل بس زحمة من خالتج
تمشين نطلع
-شايفة الحديقة الحلوة المليانة ورد
يحاوطوها بسلك شائك
-اممممم
-هيج حسبي محاوطين وجهج الأصفر لأن نخاف
عليج
-غزل معوق
-اذا أريد اتغزل هذا وجهج الحلو يتحول للون
الأزبري
غمزلي ووگف
-صيحي صِبى
طلعت صحتها ودخلت ويايه
-وين ابو حمادة بعدك مااكلت شي
-استأذنج اخذ هاي الثولة اشتريلها قرطاسية
صفنت بوجهه وهو يحجي بدالي
ارتفع صوت صِبى فرحانة
-راح تمتحنين
بعدني ممجاوبة رد هو
-اكيد تمتحن شعدها مأجلة سبعة هي
وگدهة هسة شگلتي
-تمام اخذها وهي رافضة حتى مراجعة
الدكتور تستحي تطلع
-خليلي كل اوراقها وأشعتها احجزلها
نشوف الوضع
-لا لا والله احنه ناخذها متقصر
-يابة اختي الصغيرة اريد اطمأن عليها
يالله بعد اخوج
راحت صِبى جابت الأوراق
ورجعت
-غيري ملابسج منتظرج اني
سحبتني صِبى للغرفة
تغيرلي بملابسي وتساعدني
هادئة وصامتة عيني منها عيونها
مغرغرة
-صبااااوي
-هيج راح يكون فرقد حنين ودافي لو باقي عايش
گالتهة ومسحت دموعها
حضنتها وهي مستمرة تحجي
-ابويه لا خلا يعيش ولا هو عيشنا
باوعتلها
-شگد تحبي
كل مرة أسألها الجواب هو هو تحبه
صدگ أكثر من روحها لليوم منازعة الأسود
حتى خالتي نزعناهيا بس هي رافضة
وكأن هالشي يعكس مدى حزن روحهة
وعمق اشتياقها اله
طلعت للگراج صِبى توصيني
-لتشترين هوايه اشياء زحمة
-صِبى اكو علاگة عالقنفة بالصالة بيهة فلوس
ضميهة يمج
-من ترجعين فهميني
ومو تتأخرين خالتي نامت عالعلاج والله
اذا وگعتي بلسانها تطيح حظج
طلعت وهو واگفلي يم باب السيارة
اباوع سيارة جديدة عالية
سند ايدي وصعدني
صعد وشغلها وحرك شعل جگارته
اباوعلة أسمر بعيون وسيعة وغمازة بفكة
تخبل لحيته خفيفة مااتذكر مرة شالها
شعرة شوية عالي وأسود طويل بجثالة
ضخم بس مو يخوف لا طول ومرتب
ضحكت التفتلي
-ها الخبلة
-دبسسسسس
-هاي عليمن الصفرة
-عليك
-ترحين فدوة للوني ياصفرة
-رحم الله والديك
-وامج بالرحمة غنوووة
-ليش مو والديه اثنينهم
-الملحوم مايستاهل
-أيمممممممممن
-بعد روحي
-تمتحنين
-مااگدر
-گلت تمتحنين لا تعاندين
-تعبانة والله
-راح ابقى يمج
ابتسمت
-گول والله كل الامتحانات
-كلهن منا لمن تخلصين اروح
-وحمادة
-حمادة بحالي مو عطل هو وجهال عماته حجزو لتركيا
وهو ويا رهام
-وشغلك
توقف يم مطعم ونزلنا
گعدنة طلب اكل واني نصيبي منه
شوربة لأن مااگدر اكل
يعض الجزر گدامي حيل ويهمس
-شگد طيييييب وخصوصاً اذا يگرط
هييييييج رهييييب
يطلع صوت الگرط ويلعبلي بحواجبه
-ها بيبي اجيبلج صمون افتته بالشوربة
باوعتلة صفح ضحك
-أيام وترجعين طبيعية
-تأذيت ماتتوقع كمية الألم اللي حسيتها
نزل الاكل من ايدة وصب أنتباهه وياي
-منو وگفلج بالعملية والمستشفى
-صِبى ومديرها بالشغل لأن عنده معارف هناك اهتمو بيه
-ومديرها شافج وانت هيج
-شلون يعني هيج
-من طلعوج من العمليات وشعرج طالع
وهاي
-آني بيا حال جنت شوف
فتحت التلفون وخليته يمه
يگلب بالصور مصورتني صِبى
بكل حالاتي
نزل التلفون وباوعلي متأسف
-للأسف ماچنت وياچ
-صح
نزلت راسي بزعل وكمل كلامه
-للأسف ماوثقت هاللحظات وانت وكفشتج
ووجهج الأصفر اييييييييع
ضربت عالميز وهو ارتد عالكرسي يضحك
ياربي شنو هالضحكة الحلوة
رجع گعد عدل يباوعلي
-متحرشة
-ياااااا لييييش
-شبيج تباوعيلي هيج
-اشتاقيت لسوالفك والله
انطلق برحلة أعتذار طويلة مليانة كلام
دافي ومشاعر
-آني آسف ردة فعلي چانت قوية
بس كلامج هم چان قوي كل يوم أگعد اگلب
برسائلج واعيد كلامج
انت مو انسانة عادية بحياتي غِنى انت أجيتي
بوقت چان الفراغ مالي حياتي
والهدم اللي چان بروحي رجع أنبنى بوجودج
وروح امي هاي اخر مرة نزعل بيها
وآخر بعد نبتعد
تنفست براحة وهو يباوعلي
-هسة وقت الحساب
باوعتله مستغربة
-شعندج تحجين ويا هذا الأستاذ
الغثيث اخو هاي البربوگ
صفنت بوجهه
-يااستاذ
-أستاذ جبان
-شجاع
رفعلي حاجبه بمعنى شنووو شجاع
خوفنتني نظرته
-أحممم شبي أستاذ شجاع
-قبل شهرين يوم الأثنين واگفة انت بالسنتر
وتقدم ناحيتج مبتسم صافحج
-يمممممه شعرفك
-ردي عالسؤال
-لا عدنة مادة بالثالثة هو يدرسنا
وبعدين شمدريك
-تركينا من أستاذ نعال
گالهة متنرفز وكمل
-الشهر الفات يوم خميس
ليش لابسة قميص گصير لونه وردي
فتحت شفافي تعجب
-لا لا مو معقول شعرفك غير افتهم
-اني هذا القميص مو من جبتلج حمادة وطلعنا
گلتلج لتلبسي بعد گالب على وجهج الأصفر
-يعني مو حلو
-مطلعج تشگين شگتين
-خلف الله عليك
بس احجيلي شمدريك
-بالشهر ثلث مرات اجي اشوفج وأرجع
سويت طريق أربيل بغداد
باب الشرجي علاوي من وراج
-زعلان بالجذب لعد اذا هيج مشتاقلي ماصالحتني
-كرامتي منعتني
رفعتله حاجبي مستنكرة
-يعني تجي بس تشوفني من بعيد وتروح
-اي
-هسة شفهم من هذا
-والله لو عندج عقل جان فهمتيني
غمني ولا مهتم للي حوالي
-رجعني للبيت انفضحت
-دگومي گومي ارجعها صماخها شگده
فوگاها ضاربي الها اسلاك شائكة
-رجعنننننننني
-طلگني أيممممن طلگني
-يبووووو شجاك
-امشي ياغبية
تحركت ماشية ورا اني مو غبية
ولا ثولة جداً واعية وفاهمة أن مشاعر
أيمن تغيرت من سنة ناحيتي
بس لازال فقدان زوجته وحزنه على
غيابها وندمه تجاهه مالي عيونه
لذلك ماتجرأ لو مرة يحجيها بصراحة
اني واثقة منة مستحيل يخطي خطوة ناحيتي
وگلبه بي ذرة مشاعر لغيري
أما آني أحس بالأمان ويا وأحبه
بس مو ذاك الحب بالمعنى المعروف لا
حب أمان حب سند
مااكذب يمكن مشاعري تتغير بمرور الوقت
فتجربتي السابقة لازالت آثارها باقية
ومشاعر الحب الحقيقي بالمعنى المعروف نبذتها
بعد ذيج التجربة وگلبي لازال يحمل بقايا مشاعر
لشجاع
صعدنا السيارة وهو مشغل أغنية قديمة
يدندن وياها
-ولو غيمت دنياي لو غيمت دنياي
دنيا اللي تحس بيك والله يا ابويا
وبعيوني دمعة تصير بعيوني دمعة تصير
وبروحي أباريك والله يا ابويا
يدندن بواهس ومبتسم
وكمل ويا المطرب
-ويا روحي هلبت يوم يا روحي هلبت يوم
حن وتعناج يا ويلي
غير مسيره الماي غير مسيره الماي
وإنت برجه هواك يا ويلي
صرخ بصوت عالي
- هووووو غير دمااااغه محجر
-منوووو
-المطرب اگلج غنيوة اخذج للدكتور
-لا مااروح والله مايحتاج وأساساً
راح أتأخر خالتي تطيح حظي وتعرف سوالفها
انت
-نشتري القرطاسية ونرجع
تحرك يسولف ويايه لحد ماوگف گدام
مكتبة
-يلة نزلي
-انت اشتريلي
فتحلي الباب منزلني ويا
بجانبه أوصل جوة كتفه رفعتله راسي
-شدعوة هالطول
-اي من قوم عاد اني
وانتِ من جماعة يأجوج ومأجوج
-قصدك اني من الاقزام
هز ايده يمشيني
-امشي بابا أمشي
گال كلمته واحنه داخلين المكتبة
البنات العاملات كلهن صغار گعد يطلعلي شغلات
ونتنقاش صاحتله بنية منهن
-عمو ولو تدخل مني بس تعال انت وبنتك
شوفو هذا الموديل مال الأقلام
لحظة صمت سادت وضحكة فلتت من بين
شفافي ومشيت ويا رافعه راسي مبتسمة
-بابا خل نشوف ذني اللي گالت عليهن
همس على كيف
-أيا بنت الكلب
همست
-ليييش تغلط على نفسك بابا
-اليوم ابوج اسمطه
-أسم الله عليك حياتي
گز سنونه يعض لسانه وهالحركة
مايجوز منها
وصلنة يمها موديلات اقلام وسيتات دفاتر
طلعتلي مجموعة وتحاجيني
-شوفي وعدنه موديل ولادي وموديل مال بنوتات
أذا عندج اخوان صغار راح تعجبهم
-بابا
عض خده من الداخل وباوعلي
-ها حبيبتي
رفعلي حاجبة عباله اخجل
-بابا خل ناخذ لغزل وآدم منهن
صفن بوجهي
-اخوانج الصغار
سألتني البنية
-اييييي وهمزين بابا ماجابهم جان گلبولكم المكتبة
سحبته من ايده يتفرج وياي
همس
-بسييييطة قابل تطيرين
-حبيبي بابا
-أحترگ أبوج
ماسيطرت بعد ضحكت اخذت الأريده
وطلعنة طول الطريق هو يدردم
-الصفررررة ناصبة علية أنتِ والزعاطيط بالمكتبة
-دنتشاقه
-سهلة سهلة غِنى
-لا تگلي غِنى تخوفني
-شگلج بالله باباتي
-هههههههههههههههههههه
-من گل گلبها تضحك الصلفة
-شو ممبين عليك الكبر شبيهن ذني
-سألي نفسج سرسرية
-لااااااا تگول سرسرية تحسسني اني واحد
من جماعتك بالباصات السياحية
-انجبي اخذج الواهس
وبابا وبابا
-شسوي شو عجبتني اللعبة
بقينة نسولف وهو من صدگ ضايج
لحد ماوصلني للبيت
نزلت وقبل لا أسد باب السيارة باوعتله
-شكراً باباتي عالقرطاسية
ابتسم ونظرة شريرة اكتست عيونه
وهو يغمزلي
-حفظي أسم آدم وغزل زيييين حتى
من نتزوج نخاوي بيهم حمادة
شمر جملته وحرك بسرعة خلاني
شهگت ودخلت بسرعة للبيت
دخلت البنات نايمات
فتت للغرفة غيرت ملابسي گعدت
مُنى
-ها ولج ماخذه مكاني منايمة يم مرت
أبونا الدنغوزة
-ماادري بنفسي اگلب بتلفون صِبى وغفيت
تحركت ماشية وتاركتني وهي تسوي طقوسها وسوالفها حتى تصحي خالتي
شوية وأجتني راكضة ووجها شاحب تعيط
-لحگي غِنى أمي مدري شبيها
ركضت وياها دخلت للغرفة وشفتها وگلبي فوت
نبضة وآني أعيط
-لچ يوووووم
