قصة منزل الانفيلد الفصل الثانى عشر بقلم اسلام الامير
"رعب منزل الانفيلد"
يا مساء الفل يامرعبين انهارد جاي اكلمكم عن بيت مرعب وكل اللي بيحصل فيه ملهوش تفسير بيت كلمة مرعب شويه عليه وعلي اللي بيحصل فيه
ف يلا يامرعب متضيعش وقت وجهز مكانك الهادي
ومشروبك المفضل، وطفي نور غرفتك ويلا بسم الله نبدأ
لو انت شوفت فيلم الرعب الشهير
The Conjuring 2
فخليني اقولك ان سلسلة افلام
The Conjuring
المكونه من 3 اجزاء وهي من افضل افلام الرعب الي تم تقديمها في التاريخ وجميعها مأخوذ من احداث حقيقيه
واهمها واكثرها رعباً هو الجزء الثاني والي حرفياً مأخوذ من احداث حقيقيه تماماً
القصه بتبدأ سنه 1977 في انجلترا في منزل صغير في مدينه "انفيلد" مع سيده مطلقه اسمها "مارجريت هودجوسون" كانت عايشه في البيت ده هي واولادها الاربعه "بيغي12سنه/ جانيت 11سنه/جوني10سنين/وبيلي7 سنين"
وفي يوم من الايام كان الوقت متأخر ومارجريت اخدت اطفالها ووصلتهم لسرايرهم علشان يناموا
وهي نزلت تحت تتفرج علي فيلم في التليفزيون
المهم نزلت مارجريت وفضلت تتفرج علي الفيلم واثناء اندماجها مع الفيلم بتسمع صر*خه من بيغي وجانيت ف افتكرتهم بيلعبوا وندهت عليهم وامرتهم يناموا والا هتيجي تعاقبهم
المهم الصوت مسكتش دا زاد وعلي اكتر واكتر
وقتها طلعت مارجريت ودخلت غرفه بيغي وجانيت ولقيت البنتين واقفين علي السرير مرعوبين ومركزين نظرهم علي حاجه معينه وهي دولاب غرفتهم
الدولاب كان بيتحرك لوحده اتحرك من مكانه وبقي في منتصف الغرفه
تخيل كده معايا تكون نايم وفجأه تصحي علي صوت دولاب اوضتك بيتحرك لوحده يمين وشمال في الاوضه احساسك هيكون ايه.؟!!
المهم مارجريت حست انهم بيهزروا معاها ورابطين الدولاب بحبل او حاجه كده وده كله مقلب وراحت تبص علي الدولاب لكن تتفاجأ ان مفيش اي حاجه
المهم رجعت الدولاب ذي ما كان وهدت اطفالها وطمنتهم وامرتهم انهم يرجعوا يناموا
وبمجرد ما مارجريت همت بالخروج الدولاب رجع واتحرك من تاني ووقف في نفس المكان الي كان واقف فيه، وقف في منتصف الغرفه
الام هنا حست ان في حد معاهم في الاوضه حاجه هي حاسه بوجودها لكن مش شايفاها تقدر تقول انه كيان غير مرئى
طيب هل الموضوع خلص لحد كده...؟!
لا مخلصش، لأن بعد الي حصل بثواني الام سمعت صوت 3 دقات علي جدار الغرفه وبعد كدا المكان ساده الصمت التام ومره واحده النور ق*طع وبدأ الخبط علي كل حته في الغرفه، وكانت دقات متتاليه
هنا الرعب تملك الام واطفالها وبدأت الام تاخد اطفالها بهدوء وبدأت تجري وخرجت برا البيت وراحت عند واحده جارتهم وحكتلها كل حاجه وهي بتص*رخ وبتبكي
وهنا جارتها تقرر انها تبعت جوزها يشوف ايه الي بيحصل في البيت
وبالفعل راح الرجل للبيت ودخل وفضل يلف في كل مكان في البيت لكن ملاحظش اي حاجه غريبه
فقرر يرجع البيت ويقولهم انه ملاحظش اي حاجه غريبه بتحصل في البيت وانهم اكيد كان بيتهيألهم
وقبل مايخرج من البيت فجأه كده سمع صوت خبط جاي من الدور التاني فطلع جري للدور التاني علشان يعرف مصدر الخبط ايه
الدقات كانت مستمره والراجل ماشي ورا الصوت عايز يعرف مين الي بيعمل كده لكن مشفش اي حد بيعمل كده وبدأ الخبط يزيد وبدأ يسمع خبط في كل غرف البيت
وهنا يجري الرجل ده ويسب البيت ويطلع علي بيته وحكالهم علي كل الي حصل
وهنا مارجيت قررت تبلغ الشرطه وتحكيلهم علي كل الي حصل
وبالفعل الشرطه وصلت وبدأت تفتش البيت وتحاول تعرف ايه مصدر الصوت ده لكن كالعاده موصلوش لحاجه
لكن فجأه كده والشرطه مشغوله في البحث سمعوا صوت ابن مارجيت جوني بيص*رخ وبيشاور علي كرسي في اوضه الجلوس والطفل قال ان الكرسي بيتحرك لوحده
وهنا الشرطيه "كارولين" بدأت توصف الي شافته في الوقت ده وقالت ان كان في كرسي قديم جنب ترابيزه في غرفه الجلوس وفجأه الكرسي بدأ يتهز لوحده ويتحرك يمين وشمال وفوق وتحت ومفيش اي حد قرب ليه، هو بيتحرك لوحده، وفجأه الكرسي زحف لحد موصل لجدار المطبخ واستقر هناك
كارولين بتقول جريت علشان اشوف في حاجه مربوطه في الكرسي وهي الي بتحركه ولا لا.؟! لكن تفاجأت ان مفيش اي حاجه مربوطه في الكرسي
هنا الشرطيه اترعبت وخرجت من البيت هي والناس الي معاها وقالت لمارجريت ان الي بيحصل في البيت ده مش من اختصاص الشرطه
وهنا يامرعبين الموضوع بجد بدأ يزيد عن حده وبدأت المناو*شات تحصل لسكان البيت
مارجريت بتقول انها في ليله كانت نيمت اطفالها ودخلت هي كمان علشان تنام لكنها صحيت في منتصف الليل
بتقول صحيت لان حسيت ان في ايد بتنغز في ضهري كأن حد بيصحيني واول ما صحيت ونورت النور مكنش في حاجه فنزلت اشرب لأني كنت عطشانه
بتقول نزلت لكن اتفاجأت بخيال حد قاعد علي الكرسي القديم في غرفه الجلوس والكرسي بيتهز وفي حد قاعد عليه بتقول مشيت براحه ودخلت الغرفه ونورت النور لكن مكنش في ايه حد
والمرعب ان الكرسي فضل بيتهز موقفش معني كده ان في حد كان قاعد عليه.!!!!
بتقول طلعت اجري لفوق من غير ما اشرب واتغطيت ونمت وكنت مرعوبه
المهم بعد كام يوم الموضوع انتشر بسرعه رهيبه والصحافه عرفت بالبيت المسكون والي بتحصل فيه حجات مرعبه
وهنا قررت جريده "بيلي ميري الانجليزيه" انها تبعت اتنين من مراسليها وكلفتهم بنقل وتصوير جميع للاحداث الي بتحصل في البيت
وفي واحد منهم حكي كل حاجه شافها في البيت قال انهم اول ما دخلوا البيت شافوا ان في فوضي في كل مكان بيقول الكراسي والخشب كانوا بيطيروا لوحدهم في البيت وكان في صوت صر*يخ محدش عارف مصدره ايه وحرفياً حاجه مرعبه
وبمجرد نشر الموضوع في الجريده تقرر هيئه الاذاعه البريطانيه تبعت فريق متكامل وكلفتهم برصد وتصوير اي شئ يحصل داخل البيت صوت وصوره
وبالفعل الفريق راح البيت وبات ليله كامله وصور كل حاجه حصلت وبعد كده جمعوا كل متعلقاتهم وبدأوا يسيبوا البيت ويمشوا
بس بعد ما مشيوا حصلت معاهم حاجه غريبه ملهاش اي تفسير
وهي انهم اول ما وصلوا للمقر بتاعهم وفتحوا الشنط علشان يخرجوا الكاميرات والمعدات لكن تفاجأوا بأن المعدات كانت ملتويه ومتك*سره
الغريب ان الشنط الي محطوطه فيها المعدات سليمه لكن المعدات نفسها متك*سره مش بس كده دي حتي الصور والتسجيلات الي صورتها الكاميرات مكنتش موجده كلها اتمسحت !!
تفتكر يامرعب مين الي عمل كده..!؟؟
بعد اسبوع قررت مارجريت تبلغ "جمعيه البحوث الروحانيه البريطانيه" وحكتلهم علي الي بيحصل وبالفعل الجمعيه بعتت 2 من المحققيين الروحانيين من عندها وكلفتهم بأمر المنزل والمحققين والمحققين دول هما دكتور "موريس جروس" ودكتور "دافيس انتوني"
وبمجرد دخولهم البيت بدأوا يشوفوا حجات غريبه
موريس بيقول انه شاف مكعبات لعبة الليجو بتطير لوحدها في الهوا واول ما وطي ومسك واحده منهم كانت سخ*نه جداً وكأنه مسك جم*ره من ن*ار
وفجأه بدأ العفش بتاع البيت يتحرك في كل مكان بطريقه فوضاويه
وهنا المحققين لاحظوا حاجه غريبه وهي ان كل الاحداث دي بتدور حول البنتين بيغي وجانيت وتحديداً
جانيت وبمجرد ما كانت جانيت بتحضر النور كان بيرعش والعفش يتحرك لوحده والكتب والرموز الدينيه بتطير في الهوا وحاجه في منتهي الرعب
دل غير ان مارجريت اقسمت انها شافت جانيت بتطير في غرفتها لوحدها لحد م وقعت علي الارض وجاتها نوبه صرع
*(هسبلك صوره موثقه لجانيت وهي بتطير 🤝🙂)
مش بس كدا دي مارجيت بتقول ان جانيت في مره ضر*بت صحفي في صدره الصحفي طار لمسافه 4 متر
وكمان قالت للمحققين ان جانيت بيخرج منها صوت راجل عجوز والغريب بتتكلم وهي قافله بوقها كأن الصوت خارج من جواها
وبمجرد م مارجريت حكت الكلام دا بدات جانيت تص*رخ والصوت ده يخرج منها بالفعل، كان صوت غليظ لرجل عجوز صوته مرعب
وبعد ما المحققين سمعوا الصوت دا تحققوا ان دي حاله مس شيطاني
بدأوا يتكلموا مع الصوت ده وهما بيسجلوا كل حاجه علي اسطوانات
هتسأل نفسك يامرعب وتقول طيب نتيجه الحديث دا كانت ايه..؟!
وهي دي حاجه تفوتني تعالي اقولك بس قوم كدا اعمل كبايه شايه كمان علشان نتكلم بمزاج
هاا عملت الشاي ..؟!
طيب حلو يلا نكمل، الراجل ده اسمه "بيلي ويلكينز" وكان ساكن في البيت دا لوحده من زمان وم*ات بجلطه في الدماغ بيحكي الصوت دا وبيقول انه فجأه كده حسيت بأ*لم في رأسي وبعدها اتعميت ومبقتش شايف حاجه وفضلت اتحرك لحد م قعدت علي الكرسي دا وم*ت عليه ومحدش عرف بخبر مو*تي غير لما جث*تي تحللت وريحتها لفتت انتباه الجيران ففتحوا الباب ووجدوني متحلل علي الكرسي
الغريب هنا ان جانيت مكنتش حاسه بأي حاجه وعلشان يتأكدوا انها مش بتضحك او بتمثل عليهم خلوها في نفس اللحظه الي الصوت بيتكلم فيها تحتفظ بالماء في فمها واتفاجأوا ان الصوت ده بردوا بيخرج عادي
فحبوا يتأكدوا اكتر فجابوا طبيب انف واذن وحنجره علشان يتأكد بنفسه فقالهم ان مستحيل جانيت تكون بتتصنع الصوت ده من غير متحرك شفايفها والا احبالها الصوتيه هتنف*جر
تاني يوم يجي لموريس تليفون والي بيكلمه بيعرفه بنفسه وبيقوله اسمي "توم بيلي ويلكينز" وقاله ان ابوه فعلا ما*ت لوحده في البيت دا ومحدش عرف بم*وته غير بخروج رأحه جث*ته لما اتحللت
وهنا قرروا المحققين انهم يحطوا كاميرات حساسه ومايكات في غرفه جانيت
وخليني اقولك يامرعب الكاميرات دي بتشتغل ازاي
الكاميرات دي بتشتغل بمجرد احساسها بحركه او صوت جنبها، بمجرد احساسها بحاجه سا*خنه بجوارها يعني بتشتغل بالاستشعار
حرفياً الكاميرات دي بتاخد لقطه كل ربع ثانيه انت متخيل.؟!!
المهم الصور الي الكاميرات دي صورتها قدرت انها ترعب الجميع ارعبت انجلترا كلها وجعلت من المنزل قضية رأي عام
وتعالي اقولك الكاميرا صورت ايه.؟!!
كانت كل حاجه في الغرفه بتتحرك لوحدها الكراسي الترابيزات السراير الدولابات
مش بس كدا دي الكاميرا صورت جانيت وهي طايره في الهوا وملامح وشها خايفه دي كمان مرعوبه
ولما فرغوا الشرائط لاحظوا صوت غريب بيت*ألم وبيطلب النجده وسمعوا صوت دقات كتير علي الحيطان
بعد كده حصل لقاء تلفزيوني مع جانيت وقالت فيه
"لقد كنت منقاده من قبل قوه خفيه لا احد يستطيع فهمها وانا لا احب التفكير بها كثيراً وغير واثقه ان كانت هذه الروح بالفعل شريره وتريد ايذا*ئنا ام لا، هذه الروح ما*تت بمفردها متأ*لمه داخل المنزل وكانت تريد ان تكون جزء من عائلتنا ولم يكن امامها خيار للتواصل معنا الا عن طريقي انا واختي وهذه الروك لم تكن لتص*يبنا بأي ضرر، هذه الروح كل ما كانت تريده هو ان ترقد في سلام"
وبعد مرور حوالي سنه بدأت الامور تهدي في المنزل وكانت بتحصل حجات غريبه من وقت للتاني بس مش بأستمرار زي الاول
وعدي بعد كده فتره وجانيت اتجوزت وهي سنها 16 سنه ومشيت من البيت
وبيغي كمان اتجوزت وسابت البيت
لكن بعد كده حصلت حاجه غريبه مع باقي افراض العائله ذي
وهي ان جوني اخوا جانيت يم*وت وهو سنه 13 سنه مص*اباً بالسر*طان وبيلي اخوهم الصغير وقع وهو سايق دراجته وحصلت ليه اص*ابه منعته من الحركه لباقي حياته
دا حتي جانيت كبرت وبقي عندها ولد عنده 17 سنه والولد ما*ت اثناء نومه بطريقه غامضه
والام مارجريت بقت عايشه لوحدها هي وابنها الي مش بيتحرك في البيت بعد ماولادها كلهم سابوا البيت لحد م توف*يت سنه 2003 وبعدها ب 6 شهور يم*وت ابنها بيلي
بس قضيه الانفيلد مخلصتش لحد هنا
بعد فتره جات عيله وسكنت البيت ده
الغريب ان العيله دي بردوا كانت سيده مطلقه ومعاها 4 اطفال ولديين وبنتين ومكنوش يعرفوا بقصة البيت لانهم مكنوش من انجلترا اصلا دول كانوا عائله هولنديه
والسيده دي بتقول ان طول م انا عايشه في البيت حاسه بحجات غريبه حاسه ان في حد بيراقبني دا حتي اطفالي كانوا ييصحوا علي صوت ناس بتتكلم في الدور الارضي
وفي يوم ابن الست دي صحي وهو بيص*رخ ويقول انه شاف راجل عجوز واقف جنبه وبيبصله وكل الي حصل ده كفيل يخلي السيده دي تلم كل حاجاتها وته*رب وتسيب البيت هي واطفالها
ولحد دلوقت في عائله ساكنه البيت والمريب والغريب بردو هو انها سيده مطلقه ومعاها 4 ابناء ولديين وبنتين بس العائله دي رافضه تتكلم مع الصحافه بخصوص المنزل
الناس يامرعبين اتهمت الام مارجريت بأنها كانت بتفبرك القصص دي وانها هي الي كانت بتطلب من اطفلها يعملوا كده لكن المحقق موريس قال مستحيل اطفال يقدروا يعملوا حاجات زي دي ازاي يحركوا دولاب ضخم زي ده لوحدهم وازاي جانيت بتتكلم بالطريقه دي طيب ازاي كانت بتطير كدا لا الموضوع كان في وراه شئ خفي وغير مرئي
بعد كدا جانيت طلعت في لقاء وقالت انها حاسه ان كل اللي حصل معاهم كان سببه انها لعبت هي واختها لعبه الويجا قبل ميحصل الي حصل بليله وانها شاكه انهم فتحوا بوابه للكيان ده بتسمحله انه يعدي للعالم بتاعنا بكل سهوله ..
وبكدا تكون انتهت القصه اللي ارعبت انجلترا كلها وكانت في الوقت ده حديث الساعه انتهت قصه منزل الانفيلد....
جاري كتابه الفصل الجديد من احداث الروايه وسيتم نشره فور انتهاء الكاتبه منه عاودو زيارتنا الليله او يمكنكم الاشتراك بقناتنا علي التليجرام ليصلك الفصل فور الانتهاء من كتابته ونشره
شكرا لزيارتكم عالم روايات سكيرهوم
