رواية بنات الملا الفصل الثالث عشر بقلم رغد الموالي
جواهر... اليوم عمي عبد الودود عازمنه على العشاء فرحت كلش
لان خنكت البيت ذبحتني طلعاتي حيل صارت قليله بعد ماتركت المدرسه
جواهر... والله مشتاقه اشوف بنات عمي من زمان ماشفتهم
دره... اي والله ياجواهر حتى روحنه تعبت من كثر الكعده بالبيت
جواهر... اسمعي دره من نروح لا تحاولين تكومين من كرسي مالتج مثلا حمام او تردين تمددين تتعبين ابد دره
دره... وليش
جواهر... ماريدهم يباوعولج بعين العطف من احنه نساعدج وان رجليج متتحرك ومتكدرين مااقبل
دائما خل يكون كلامج كله قوه وان انتي حالج حالهم وان مامسببتلج اعاقتج اي ازعاج
دره... واني فعلا هيج جواهر اني مامنزعجه من اعاقتي أني تأقلمت وعادي قابل شناقصني
جواهر... عفيه دره
رحنه لبيت عمي وهناك جانو بنات عمي وماشاء الله عمي عبد الودود تحسه يريد يحطم الرقم القياسي بكثرة الاولاد والبنات
جنت اني اكبر وحده بيهم من البنات
الباقيات اصغر بس مو هواي اعمارنه متقاربه من ناحية دره وزمرد وياقوت وماس
جانت الاجواء حلوه وفرشنه بالطرمه زوليه ومدينه عليها سفره طويله بسرعه تزينت السفره بأنواع الاطباق خضروات وسلطه وطرشي وكبه وكباب وتمن وتشريب وشوربه ودولمه ولبن وسمك مقلي على تمن احمر
كلها التمت وكعدت وقبل لااحد ينتبه رحت بسرعه سندت جواهر وكعدتها بالكاع حتى ماتبقه هي تاكل على طبله والعين عليها وتستحي تاكل حالها حالنه
كعدت يمها حتى لما تحتاج شي اني يمها
ابو جواهر... والله عاشت ايدك مكلف نفسك عبد والله هواي
عبد الودود... قليله بمقامك عضدي دتعال شلون خليت نعيمه ترتبنه هاي الصينيه تمن وسمج احمر وياها خبز مگله نرجع ايام زمااان ههههههه
عبد المجيب... اي والله ذكرتني بأبويه الله يرحمه من جان يگليلنه سمج بيومها عدنه عييييييد
عبد الودود... تتذكر من جنه اني وياك نسوي هيج صينيه ونكعد عن دون اخوتي
ناكل على راحتنه
عبد المجيب... خطيه جان ابويه ياكل ورانه يكضيها يفلس اللحم عن عظم السمجه وينطي لعبد الرحمن وعبد الرحيم
عبد الودود... الله يرحمك ياابويه شكد جان حنين علينه ويحبنه
عبد المجيب... الله يرحمه دكل اكل لاتفكلي جروح وتقهرنيييي بعدين اتبهك
عبد الودود.... الزمر زمرك ونكال تمرك عبد المجيييييب لازم ناوي تتزوج
عبد المجيب... كفوووو من ام جواهر شعندي غيرها بس هم حق النفس على النفس يعني يخرب شكل وجهي زحمممممه
عبد الودود ... والله عمي حقك
....
جواهر... دره اول مايكوومون وتصير هوسه اكعدج على كرسي مالتج افتهمتي
دره.... شبيج قابل دانبوك
جواهر... شكتلج اني
دره... هاي انتي هيج تفكرين تتحسسين
جواهر... لا مدااتحسس هسه شكتلج
دره... صار
كملنه العشه ورحنه احنه البنات حتى نغسل مواعين
جواهر... تخلص المواعين ولمن نسوي كعدة بنات مابيها شغل يلا تضهرين نفسج روحي صلي هسه وطولي بالصلاة شكد متكدرين.
دره... ماشي
وكفنه نغسل بالمواعين امي ونسوان عمي بقو كاعدين والمواعين علينه احنه البنات
زمن... اشو ماكو دره متجي تساعدني
جواهر... داتصلي
زمن... جان انتضرت تصلي ويانه
جواهر... لا هي متحب تأجل صلاتها ابد
زمن... ماشاء الله
رحمه... هي وين تكدر تشتغل هي مقعده
جواهر... لا شنو متكدر كلشي تشتغل بالبيت دره اصلا الاعاقه مجرد اسم وعيونج
رحمه... مااصدك هي وين تكدر هو احنه الي الله معافينه كوه نشتغل وبعدين اختج ياحسرتي عليها منو حيفكر يتزوجها اذا هي عاجزه
جواهر... المرض مرض النفس اكو هواي ناس متعافي جسدها بس نفسيتها مريضه معوقه من داخلها عكس الي روحه متعافيه ومعوق بالضاهر
فرق جبير ست رحمه
دره... ومنو كلج اني معوقه رحمه انتي عيونج تسوف الضاهر وبس
رحمه... اني اسفه دره مو قصدي
دره... محد بينه انسان كامل رحمه
كل انسان بي نقص بشي معين الكمال لله وحده
هاي شوفة عينج اني صح معوقه بس الله اكرمني بعقل وذكاء يعادل بروفيسور
الاولى على شعبتي كل سنه ومرات اني اصححلها لمدرستي لمن تحل واحيانا اروح احل مسائل مال مراحل قبلي
برأيج هذه النعمه مو اجمل من نعمة المشي على الرجلين
رحمه... اكيد منو ميتمنه هيج يفتهم ويعرف وكلها تباوعله بعين جبيره
دره... وداعتج كلها تكن الاحترام الي وفارضه وجودي بكل مكان ادخله
من المديره لااصغر طالبه بالمدرسه تحترمني ويتمنون عدهم ءره من تحليلي وفهمي للامور
صح اني كدامج معوقه بس بيوم من الايام راح اشوفج منو دره وشتكدر هذه المعوقه تسوي
اذا تقسين النجاح بالزواج لعد قيمتج ومكانتج المطبخ وغسل الحمامات
وفرت الكرسي دره بسرعه وراحت يمهم
رحمه... شبيها هيج تحجي هو اني شكلت تره مجنت اقصد شي
جواهر... شوفي رحمه كلامج نوبة الثانيه فكري بي قبل لاتحجين اصلا هي محجت شي غلط
رحمه... اختج شحتكولين لعد
جواهر... اجينه بيتكم داتهينونه؟
زمن... صلو على النبي شبيكم
جواهر.. ورحمه... اللهم صلِّ على محمد وآل محمد
زمن... خلص لعد لتفتحون بعد اي نقاش
جواهر... كملنه غسل المواعين من سكوت لاهي حجت ولااني
عجبني رد دره هوايه
كلامها جان ممزوج بالقوه وبالكبرياء ولامبالاة سكتتها وخلتها متعرف شنو تحجي وهذا الي مفروض منه ينكال...
رحت ولكيت النسوان بيناتهم كاعدات سوالف وعمي وابويه بالهول يلعبون طاولي
رحت كعدت اني وبنات عمي يمهم تقريباً..
حليمه... والله ياعيني الدنيا هذه مو امان
جميله... اليوم بني ادم تدخلي بيتج توكلي وتشربي وتخلي على راسج اول مايغدرج هو
حليمه.... وج عيني غداااااار البشر غداااار خوفج من الي تسويله معروف بسعاد
بسعاد... مو كل اصابعج سوه حليمه لو خليت قلبت
حليمه... اني عليه نصحتح
شيماء... انتبهي لكلامج حليمه عود من واحد يرد عليج عود كولي ماحجيت شي
حليمه... وشحجينه يمه شبيج نطبتي من يمج لايكون اخذتي على نفسج
شيماء... لان انتي تقصدني ولو ماتقصديني جان محذرتي بسعاد وخصيتيها وانتي تعرفين هي داتساعدني
حليمه... هه مو علساس هي داتساعدج دخليني ساده حلكييييي ليش تحجينييييي
شيماء... لاااااا صدك انتي زودتيها شتحجين يمه شعندج احجيييييي
بسعاد... ياجماعه صلو على النبي شبيكم
حليمه... متشوفيها شلون نكت وعيونها حتطلع من الغلللل
جميله... اشششش لايسمعون الرياجيل دكافيييييي
بسعاد... حليمه اذا متسكتين وتغيرين الموضوع احنه نطلع
حليمه... لعيونج ام جواهر بس كليلها لمرت حماج تسكت احسن
سكتوو بس بقت نظراتهم وحده للثانيه بحقد وغيره جنت اشوف نظرات الغيره بعيون نسوان عمي عبد الودود من ناحية شيماء حتى جميله الي جان مو هامها عمي عبد الودود صارت مثلهم وماتحب عمه شيماء هواي
لما بديت اكبر واصير واعيه لهذه الحياة بديت أفهم أنو أحياناً مو كل شخص ينكره معناها هو مو زين او ممكن يكون مؤذي أحياناً لما تكون مميز وناجح تنكره
عمه شيماء جميله ورقيقه بكل معنى الكلمه رغم شكد مر عليها حزن وقهر بس بعده جمالها طاغي عليها لهسبب صارت فوتتها لأي بيت مصدر رعب وتهديد لكل مره والسبب بنفوسهم مو هي،
لأن عمه شيماء قمه بالاخلاق والاحترام
لما دخلت يم البنات وسمعت سوالفهم الي كانو مندمحين بيها ويحجون ودره اختي فاكه حلكها وترمش بيعونها من الصدمه لما سمعت كلامهم
خليت ايدي على حلكي بخوفه وكأنه حجيت كلمه غلط وانتبهت عليها
انتبهو عليه
زمن... شبيج جواهر
جواهر... انتو ماتستحون تحجون بهيج حجي شنو هالكلااااااااااام
رحمه.. شبيج جواهر عيني لعد لو ماانتي الجبيره بينه
جواهر .. ولان اني اكبركم اكللكم هالكلام هذا عييب وبعدين انتي دره شبيج صافنه لكلامهم
رحمه.... لتبيعين ثكل يمنه ست جواهر
جواهر.. اشششش وسدي حلكج ابيع ثكل يمكم شنو شلاكيتني ست
رحمه... والله؟ هه شوفي جواهر اولا اني مااصدك ماكو بنيه متحب لو حتى بداخلها ثانيا انتي لو طايحتلج الفرصه وجاي واحد معترف بحبه الج جان كيفتي بس انتي محد معبرج اصلا هاي بطلتي من المدرسه وكعدتي على امل تتزوجين محد دورج
جواهر.. اني مابطلت علمود اتزوج افتهمتي لو لا اني ضجت من الدراسه ومااحبها ومليت قررت اعوفها كتابه واعرف اكتب على شنوو
رحمه.. هه قنعي نفسج بهذا الحجي ست
جواهر .... باعي انتي طوختيها حيل لهنا ولزمي حدج وكلمه زايده منج اذا سمعت مراح يصير خير
رحمه... وشتسوين مثلا ست
جواهر... اروح لعمي الي هو أبوووووج واكله بنتك تتمعشك وي واحد يوميه واكفلها بالركن مال المدرسه
رحمه.... هههههه خوفتيني زمن لزميني داارجف اي دجربي تكليله علمود اكلبها للايه على اختج دره واخلي حتى حبيبي يكلهم اعرف دره مااعرف رحمه وخليها تنكلب عليج مو عليه عيونييييييييييي
جواهر... حسبي الله ونعم الوكيل انتي شنوووو
امشي دره على مايبدو وجودنه صاير مامرحب بي
طلعنه اني ودره بره شويه وابويه كال يلا يابنات امشونه
عمه شيماء بسرعه كامت واحنه وياها تبعتنه امي وطلعنه طول الطريق كل واحد بينه يمشي من سكوت وكأنو يفكر بلي صار ويا الا ابويه كان فرحان يمشي وايديه مجتفها لوره ظهره وبيده السبحه ويسبح ويسولف وي امي الي تبين كالعاده ماكو شي وتضحك لضحكه
الايام تروح وتجي بيوم ماشفنه الا الباب ندكت فتحها ابويه للباب جانو زلم هواي بالباب وبيهم معگلين مبينين من هيئتهم شيوخ عشاير جبيره
الشيخ.. سلام الله على صاحب الدار اعرفك بنفسي ان كنت ماتعرفني
انا الشيخ جبلان ولد الشيخ حازم ولد الشيخ جبلان الشيخ... الشيخ... الشيخ... شيخ عشيرة ال....
وياي شيوخ عشاير ثلاث ونواب الشيوخ وكبار العشاير واجينه اليوم بسالفه يمكم
عبد المجيب... ( متفاجئ) اي اي تفضلو كل الهلا بالشيوخ كل الهلا
صاح ابويه... سوو درب...... يالله..... تفضل شيخنا
دخلو الشيوخ ودخلو وياهم اخوة شيماء شيماء اول ماشافتهم
نخطف لونها وخافت تسائلت شكو هاي ليش كل هالزلم والصدمه الاكبر دخل فهد واخوه ولد اخوته جانو هواي
امي مباشرة عرفت كالت.. شيماء تعالي وراي
راحت وراها وصارت تحجي وياها...
علت الاصوات بالاستقبال وصارو يحجون الاستقبال اساساً ماكفى للزلم
البعض بره واكف
الشيخ... اولاً احنه اجينه بطلب نطلب كريمة حجي حمود واخوتها كالو الراي يم عمنه حجي عبد المجيب وكريمتنه يمهم من يوم مامات زوجها هي ماتريد تتركهم لاأجل ابن المرحوم صح هالكلام يبوي؟
عبد المجيب.. اي صحيح هي ماتريد تحرمنه من ريحة اخوي
الشيخ... لااجل هذا احنه اجينه طالبينها بالحلال على سنة الله ورسوله لفهد ابن حجي نعمان
وهذا فهد جدام عينك يكول الي الهم حگ علينه ياخذو الرجال عفى عن الي صار وطالب السماح ويريد يفتح صفحه جديده وياكم
عبد المجيب.. لو كانت مشكله بيني وبينه ماكنت زعلت منها
لو كان زعل كنت سامحته
شيخنا الي بيني وبينهم مو مشكله وراح نفتح بعدها صفحه جديده الي بيني وبينهم دم وموت وكبور ونسوان ترملت وجهال تيتمت
الشيخ... وهو هم صار عليه نفس الي صار عليك هذول هالي داتشوفهم ويلاد اخوته ايتام وعمومتهم الي بقو هو معيشيهم
ولاميهم
عبد المجيب... اني اصفح عن الكل الا هذول تهمو اخوي بقتل اخوهم واخوتي البقيه راحو غدر مالهم ذنب
الشيخ الثاني تكلم... احنه ندري بوجعك والي صار وياك مو شي سهل وينحمل بس هو هم صار وياه نفس الي صار وياك
ثار ونرد من سنين
تعذرونه شيخ
الشيخ.. ماكو خاطر لجيتنه
عبد المجيب... جيتكم على العين والراس بس الي بيني وبينهم ماينحل ومو اني الي اعفي عنهم بالاخره وقت يتلاقى الخصمان اخوتي الي راح شبابهم جوه التراب هم الي يعفون مو اني ياشيخ واذا على البنت البنت رافضه تكول مو انه الي اتزوج جتال رجلي
فهد... واني شجابني وكتلت عبد الرحمن شيخنا وروح اخوتي ماكتلت رجلها والله ماكتلت احد بيهم
عبد المجيب... البنت ماتريدك هي مو بالغصب
فهد.. اني ردتها قبل لاياخذها اخوك
عبد المجيب... وهاي اخويه اخذها وخلفت منه الي تريده هسه شنو
فهد... التفت لااخوتها وتكلم... طليااااان انتو طليااااااان حماها يتدخل بيها
الشيخ.. اطلع بره فهد
فهد... شيخنا البنت رايدها من زمان ابوها عارض قبل هسه حماها!
الشيخ... كلشي بالإجبار إلا الزواج يافهد اطلع وتانينه بره
فهد... طالع شيخنا طالع لون نشوف تاليتها
أباوع لفهد ابن حجي ذياب طلع وأعصاب صاير عمه شيماء عيونها مابطلت دموع وامي تهدي بيها
بسعاد... على كيفج شيماء وداعتج مايصير الا الي تردي بالنهايه
شيماء... النذل لطخ سمعتي وخلاني بحلك الناس وهسه جاي بكل صلافه جايب شيوخ وجاي يطلبني
بسعاد... هذا مخليج باله حيل ومراح يهدج هذا ابد
شيماء... والحل فهميني شلون شسوي
بسعاد... شيماء رفضج اله لان اخوته كتلو عبد الرحمن لو متريدي ك شخصه هو
شيماء... لان اخوته كتلوو عبد الرحمن مااريده
بسعاد... هو شعليه
شيماء... شتحجين انتي ام جواهر شنو السنين خلتج تنسيييين
بسعاد... علمودج احجي اني راح يبقه وراج تره من قبل لايصير الدم جانت أي عائله تتمنه واحد من ولد حجي ذياب يطلب بنتهم
والله ناس زينه هم لو مالشيطان دخل بيناتهم عمي وحجي ذياب صحبه وناس تحب ناس لسنين
شيماء... لاتحجين ام جواهر الله يخليج اذا خوش ناس وهيج سوو لو موخوش ناس شيسوون
بسعاد... كتلج دم بعد ابنهم شافو مكتول والناس جابت شرفهم بالطاري شترديهم احنه لان ندري بالحقيقه ولان هم ولدنه محروك گلبنه عليهم وإلا لو نباوع من جانبهم يمكن نعطيهم شوية حق
شيماء... مستحيل انتي شتحجين ام جواهر الي مات رجلي والي داتدافعين عنهم هم الي كتلووووه
بسعاد... صدكيني مو دفاع عنهم بس هذه الحقيقه كتلج اني بيت شيخ ذياب جانو معروفين قبل من زمان ابو حجي نعمان عائله معروفه بسرتها الحسنه وكرمها وثرائها وعزوتها اني مدااجمل بيهم لكن صدكيني لو ماصار الي صار ماكان خليتج دقيقه وحده تفكرين انج تقبلين بفهد
شيماء... يشرب!
بسعاد... مع الاسف ماعرف ابوه لو كان عايش كان حيقبل هذا وضع ابنه
شيماء... النذل يكله للشيخ ردتها وابوها رفض عزه شكذاب
بسعاد... يطلع نفسه مظلوم كدام الناس
شيماء... والعمل
بسعاد... ننتظر عمج ابو حواهر نشوف شيكول
عوده للمضيف...
الشيخ... وتالي ياابو حواهر تردنه؟
ابو جواهر... ابن اخوي مايربه عند جتال اخوي ومرت اخوي ماتريد تعوف ابنها
وكف الشيخ وكفكف عباته گال... سوولنه طريق
ابو جواهر... غالي شيخ وجيتك هاي على عيني وراسي بس اتمنه تعذرنه
الشيخ... معذور يخوي معذور
طلعو الزلم كلها ابوي وصلهم للباب واحس من نظرته وعيونه الي تشرح قصص وروايات عراقية كرار صلاح كل اوجاعه انو شال هموم فوك همومه
اجت شيماء... عمي شصار
عبد المجيب... فوتي عمي فوتي جوه اريد احجي وياج چلمتين
جواهر... أحيانا الجمال يكون نقمه المرآه الي تكون ضعيفة جنح تتعب بحياتها هواي
عمه شيماء الحياة يوميه تشيل بيها وتحط
لااكو استقرار ولااكو من تخلي راسها على كتفه وتشكيله ويكلها اني عندج ماعدها من يحتويها فعلا
رغم احنه وياها لكن هي تحس انها ثقيله علينه وتخجل من اي مشكله تصير بسببها وتبقه تتشكر لما نساعدها بشي
احساس الضياع بشع جداً واتخاذ قرار لحياة جديده جداً صعب
كل شخص بينه اله حياته وبيها آلالام تكفيه
كلام امي عن بيت حجي ذياب كان صحيح
هم همينه عانو ومرو بنفس الي مرينه بي
ووجدي وحجي ذياب ماتو من الحسره والقهر على ولدهم
....
عبد المجيب... فهد طلبج اليوم وجايب شيوخ وجاي الصراحه مااعرف اخوتج خلوني بموقف محرج اني وياهم تلازمنه قبل كم يوم وهسه يحجون انو ماكو شي بينه ومشيتها كدام الوادم
اني مو من حقي ارفض او اقبل القرار قرارج انتي
شيماء... عمي ابو جواهر اني مااريد اتزوج
عبد المجيب... شوفي بنتي انتي بعدج صغيره والعين عليج اني اشوف تتزوجين وتصيرين بضل رجال بحميج ويستر عليج
شيماء... وانحرم من ابني
عبد المجيب... ليش تنحرمين روح وياج اني مااحرم ولد من امه بس كلت هيج كدام الناس شجاوب لعد
شيماء... بس هالانسان هذا مااريده
عبد المجيب... بكيفج يابه حياتج هاي وانتي قرريها
شيماء... الله كريم عمي
دنكت وراحت للغرفه
مرت الايام جانت بروتين حياة طبيعيه لكن صراع وحرب في عقل عمتي شيماء
اما احنه للبنات يوم بعد يوم نكبر وتزداد مسؤوليتنه ووعينه وفهمنه اكثر واكثر
بيوم كنا مددين بالسطح اني وعمه شيماء وخواتي امي جانت تصلي صلاة الليل
دره... ياترى النجم هم ينزال بعد متخلص البشريه ويجي يوم القيامه
شيماء... امم مااعرف بس شنو هالسؤال الي إجه ببالج؟
دره... جرت نفس وكالت... يعني هيج اتسائل قصدي أنه ممكن يتغير العالم بعد هذه الحياة يتغير كلشي ممكن تصير أشياء أحنه جنه منتوقعها؟
شيماء... طبعاً
بعد منموت ونصير مجرد رفات قبل لانكون عظام اساساً اول ماندخل للقبر او تطلع الروح من الجسد يبدي كلشي يتغير
راح ينرفع عن نظرنه الحجاب الحاحز الي من خلاله نكدر نشوف أشياء بالحياة ماجنه نشوفها وإحنه عايشين
راح نشوف الجن والشياطين وأرواح الناس الي نحبها... سكتت وختنكت
دره... وإحنه راح نتغير؟
يعني اذا جان شخص ميشوف ومات راح يشوف؟
شيماء... إي راح يشوف اذا جان مريض راح يطيب من مرضه
دره... حتى لو مشلول؟!
شيماء... ياعمري الله يطول بعمرج
دره... عمه شيماء هاي الحياة مااعرف شلونها ماتعطي كلشي
شيماء... الحمد لله لو الناس متساويه بكلشي كان الحياة توقفت لازم يصير اختلاف لازم اكو شي عندج كامل عند غيرج نقص علمود ناس بحاجة ناس
جواهر... لهسبب ياعمه لازم نكون مدركين ونصبر
شيماء... الحمد لله...
باوعتلي وابتسمت
كبرتو يابنات وصارت حلوه السوالف وياكم
ام جواهر... تعالو يابنات ناكل رگي
شيماء... اكلو بالعافيه مااشتهي اني
ام جواهر.... لاتزعليني منج تعالي ناكل
شيماء... تتوقعين فهد أيس وبعد ماله علاقه بيه
ام جواهر... اكيد هو جاب بعد شيوخ ومارهمت هذا ايس
شيماء... گلبي مامطمن لهذا الهدو
فجأه ندكت الباب بقوووه تفززنه كلنه
بخرعه هاي شكو منو يدك الباب هيج
نزلنه نركض فتحت الباب امي
جواد ابن الجيران... عمه بسعاد الحكي فهد ابن حجي ذياب وعمي عبد المجيب متلازمين بالشارع وناس ضاربه ناس
بسعاد... ضربت خدها... وين هم هسه؟
جواد... عمه الناس داتحاجز بيهم بالشارع والناس ملتمه
صاحت نطيني عباتي جواهررررر
ركضت نطيتها العبايه وعمه شيماء وكعت بالكاع وصرنه نتصارخ عليها
عمه شيماااااء كعدييي كعدييييي
على صراخنه نسوان الجيران اجو شكو شصاير
لكوها لعمه شيماء واكعه واحنه ملتمين عليها
حجيه صبريه... جيبي دهن الورد شويه نشممها تصحى بسرعه يمه
ركضت جبت دهن الورد ونطيته الها وصارت تشممها وتطبطب غلى خدها
لحد ما صحت وصارت تحجي وترجف وتبجي شصار عمي ابو جواهر خو ماصار عليه شي خو ماكتلوه روح ابني وين
حجيه صبريه... اهدي يمه ماكو شي عمج هايته بالباب يم الجيران على كيفج يمه روح هياته
جرته لروح عانقته وصارت تبجي
هناك واتذكرت اختي دره بالسطح ركضت من دون وعي لكيتها مفرفحه روحها من البچي
جواهر... والله مو قصدي بس التهيت عمه شيماء تخربطت
دره... سمعت عرفت روحي ضلت تلوب ومكدرت انزل
جواهر... اعذريني خيتي والله اسفه والله سهيت عنج
دره... ساعديني خل ننزل اشوف ابويه خاف يكتلوه جواهر
جواهر... الله ياخذهم لبيت حجي ذيااااااب ونخلللللص
سندت دره على ظهري ونزلتها
امي طولت بليلتها مارجعت عرفنه من الجيران رايحه وي ابويه بالمستشفى فهد ضارب ابويه بحديده على راسه
راحو الجيران بليلتها وبقينه وحده مگابله الثانيه ونبجي
صار الصبح واحنه ماغمضلنه جفن
للتسعه الصبح تقريبا اجت امي تنهت وتعبانه كالت اروح اسبح جواهر يمه حضري ملابس لأبوج ولكمه
شيماء... شلونه وضعه فدوه طمنيني
النذل فاتح راسه بالحديده وهسه هو واخوته بالسجن
شيماء... عساهم لاطلعو
بسرعه حضرنه الريوك وخليته لابويه بالسفرطاس وملابسه واخذته امي وراحت
يومين ماشفنه الا امي وابويه جايين للبيت فزينه كلنه لاابويه نتلكاه
حضناه وامي كالت... يابنات على كيفكم ابوكم تعبان خل يمدد يرتاح
زمرد... والله يابابا اشتقنالك هوايه
بتعب... واني هم والله
سندته امي وصلته للغرفه مدد على السرير يرتاح
سويتله العصير وجبته اله
شيماء راحت للسوك اشترت معلاك ولحم كالت هذا نخصصه لعمي نشوي على النص وياكله
ياقوت وماس كل مايشترون شي يجيبوله لاابويه وطول الوقت يمه يدلكوله وهو يضحك مراات يكللهم كافي بويه مرتاح والله مرتاح شوفتكم هاي داير مدايري تنسيني كل همومي وأوجاعي
داريناه لاابويه ويمكن الي خلاه يتشافه بسرعه حبنه إله وخوفنه عليه
عمه شيماء جانت تلوم بروحها كل هالفتره واحنه نصبر عليها عمه مالج ذنب لاتنقهرين
مشت الايام وهم بيوم اجه ابويه كال سوو درب تفضل شيخناوطبو الشيوخ نفسهم وياهم ساده معممين وناس مبينه ثگال ومرتبه كلش...
تحاوطنا أقدارنا مهما أبتعدنا عنها...!
شكرا لزيارتكم عالم روايات سكيرهوم
