رواية بيوت الصفيح الفصل الخامس عشر بقلم زهراء السراي
"عزيزي يا صاحب الظل الطويل..
حين أخبرك أنني لست بخير لا تخبرني أنها تهيؤات
وأني سأكون أفضل قريباً
أو أن العالم كله يعاني أيضاً
ليس عليك أن تُهدأ من روعي
قل لي أنك تُصدق ذلك ببساطة
فلا بأس بأن لا نكون بخير أحياناً
.
.
صِبى
_______________________
روحي حيث أنتَ
بعدك صارت الأيام تمشي ببطئ مثل الساعة العطلانة
تشتغل شويه وتوگف كل شي يذكرني بيك
حتى المنبه اللي جنت تصيح عليه الصبح من ازعاجه وصوته بعده يرن بس انت ماكو حتى تصيح بية
-صبيوووة طفي لا اكسره براسج
أعرف ان گلبك يحزن لحزني
بس أكتبلك لأن گلبي مزدحم مزدحم بحجي
مالي صاحب يسمعه أكتبلك لأنك جنت مو بس أخ
جنت گلب جبير يشيل حزني وما يتعب ولا يمل
فرقد حبيبي
وين ماكنت تكون
أنا بعدني أتركلك حصة من الجاي بالصينية
وأحجي وياك كأنك بس طالع وترجع حبيبي
البارحة شفتك بالحلم جنت تضحك
وبس هاي الضحكة رجعتني للحياة شويه
__________________________
سديت الدفتر اللي صار رفيقي بداله
وضميته تحت المخدة وگمت للبنات
اباوع لمُنى أحسها دايخة بموضوع
بس متحجي
و غِنى تاركة أيمن يتصل ويتصل ومترد
تگول آني مو جبانة حتى أحظره
خلي يدورني وآني گدامه وميلگاني
اني على ثقة هي تحبه بس خليها
تعرف مشاعرها شنو وتحدد مصيرها
ويا بدون ضغط
1
البيت صغير مرتب ونظيف بس محتاج
اثاث بعد اسبوع من گعدتنا وبعد ما تعبنا من النوم عاللحف كفراشات وشراء وجبات جاهزة طلعت عصرية بعد رجعتي من الدوام رحت اني وسومة اللي أسمها بالأساس سمية لسوق الاثاث المستخدم
1 تعليق
اخذت طباخ صغير وفراشات جديدة أسفنج
بطانيات أثنين جدد ويا العدنه كلش كافي
ثلاجة صغيرة فلسنا اني وغِنى ماعدنا غير
الاكل بالبيت وبعدنا ممسوين خط مولد
داومت ثاني يوم بعد مااشتريت الأغراض تعبانة وأحس مالي حتى خلگ أحجي الحر مرضني لأن بس عالكهرباء الوطني ويادوب تجي نص ساعة وتطفى ساعات
هوسة وشغل وعدنا قضايا مجانية لازم
يطلع عليها أستاذ أسد اني أرتب الملفات
وهو متأخر للتسعة يلا اجه
-صباح الخير صِبى
-صباح الخير أستاذ
باوع للمكتب مالتي هووووسة
والطبلة الوسطية اكواب الجاي والعلاج وگلاصات
المي ايديه من التعب ترتجف وحالتي حالة
ابتسم وگعد يرتب الطبلة الوسطية
-لا لا أستاذ اني ارتب المكان
-صِبى صايرلج شي متعبج شووو گعدي ارتاحي
حتى وجهج شاحب
گعدت مديت ايدي للبنادول حجه بصوت مرتفع
-ترررركي المسكنات
تقدم يباوع
-هاي من السبعة لهسه شگد ماخذه
-هاي ثالث حباية
شال الشريط شمره بالزبل
-متخليه عن كلياتج انتِ
-صداع أستاذ مجاي يفك راسي
-ترجعين للبيت
-لا أستاذ ماعندي شي
سحب الملفات مني وگعد
-اكو شي مااعرفه
-لا أستاذ بس انتقلنا من البيت لمشتمل
اصغر وبعدني مساحبة خط مولد وشويه حارة
-صِبى هاي مو من عندي تاخذين من راتبج وتسددين الحسابات فهمتي عليه
باوعتله حسيته انقذني بهالشغلة
ابتسمت للطافته
-مشكور أستاذ
-يلة يابة شغلنا هوووايه اليوم نروح لمنطقتكم القديمة
-شصاير أستاذ
-قضايا المجانية وكم شغلة نسويها هناك
ضروري نقابل اهلهم
-تمام أستاذ بس خل اعزل المكتب
-المكتب مطاير گومي ناكل شي واحنه
بالطريق
اخذنا الملفات اللي نحتاجها وطلعنا للمنطقة
بنص الطريق توقف يم أسواق ورجع صعد مي
بارد قطع كيك وعصير
فتحتلة الكيك والمي مديت ايدي الة هزلي راسة
-اكلي وشربي حتى يختفي الصداع
وفتحيلي قطعة وياج
فتحتلة غيرهة اكلنا وشربنا وطلع بينة للمنطقة باوعت ماتغير شي مشينا اباوع لمكان بيتنا
بمكانه مبني بيت مرتب صغير باوع بالملف وحجه
-من ضمن القضايا ولد قاتل أخته
تحت تأثير المخدر
-تدااااافع عنه
انصدم من شهگتي وخوفي
-لا أترافع ضده أمه محترگ گلبها
لأن أعمامه مخليله محامي
صفنت بوجهه وحرارة اجتاحت گلبي
-كتل منو من البنات
-تعرفيهم
-اي اي جانت أزهار ويايه بالمدرسة
منو منهم اللي قتلها أزهار لو بنين
-بنين
غطيت عيوني وماعرفت شسوي
مسحت دموعي ورفعت راسي
-اندل بيتهم أستاذ تريد نروحلهم
-اي
رفع ايدة بالملف وهو يضلل فوگ راسي
من الشمس وصاير مسافة عني
وصلنا بابهم دگيته واجاني صوت ام أنور
فتحت الباب وجهه مثل التراب والسواد
محاوط عيونها الصفر الحلوة
-ولج صباوي كتلها كتل بنونة
يممممممه مرد راسها مرد
احتضنتني وهي تبجي اي كلام
مواساة مراح يهدي گلبها المكلوم
سحبتني ودخلت بيه وهي تسلم عالأستاذ
-اعذرنا استاذ المكان مو من مقامك
خلة ايده على صدره ودخل وياها استفسرت عن وجودي ويا حجيتلها اني اشتغل ويا
بيتهم بسيط بلوك مسگوف جينكو
بس نظيف ومرتب وريحة بخور ترد الروح بي وصوت القرآن يصدح بأركانه گعدنا وصاحت
-زهرة ماي يمه
شوية وطلعت أزهار بس مو ازهار اللي أعرفها
لا شخص ثاني من الضعف متنشاف
وگفت ووكعت عينها عليه خلت المي بالگاع
وحضنتني
-صِبى وين رحتي
-البقية بحياتج ربي يصبرج
-أحس نفسي عايشة بحلم والله
قدمت المي واشرتلها أمها تگعد يمنه
بدأ الأستاذ يلقي اسألته عليها
-خالة اني من شفتج بالمركز گتلج
ضروري نعرف المخدر منين ياخذه
وواعدتج اخذلج حق بنتج بالقانون
-يممممه والله لو يصح بيدي
اكتله مثل ماكتلها يمممة يابنونة يمه
مو بت دنيا بت آخر جاية من المدرسة
وبعدها بهدومها متوضية ولابسة عباية
الصلاة ومتوجهة للقبلة يمه فلش راسها
وخلا طشاااااار
-انتِ عمو ليش متشهدين شهادتج ضرورية
-زين سرديلي الواقعة من بدايتها حتى
اعرف شسوي
بدت أزهار تحجي شصار وعيونها
خالية من الحياة وتباوع للفراغ
كأنها تشوف شريط فيلم سينمائي قديم ينعرض
كدامها
-داومت بالمدرسة ورجعت قبل
الامتحانات بأسبوعين تقريباً
امي رايحة تتسوگ واني بالبيت اسوي غدة
من رجعت هو أجه بس مبين متعاطي
هي تفتر عليه جوعانة اني اگلي بتيتة للغدة
وهو يحوم هي لابسة عباية الصلاة تريد
تتوجه للصلاة صاحلها
-وييين القوطية المخليها بالفريز
التفتتله وهزت كتفها
عيونه جانت حمر وتنذر بالشر صاح
بيها
-دوووووريها وخليها بگلاص وجيبلي زلاطة
وياج
-وتريدني واني متوجهة للصلاة احظرلك شرب
ومزة شگول لرب العالمين
تقدملها كفخها وكفر دفعته وهي تستغفر
واني صرت بيناتهم اهدي الوضع
-كااااافي تكفر حتى بركة مبقت بالبيت ياملحد
-بت الگ****د صايييييرات مؤمنات وانتن
جبيرتجن گ****ة
-مكبسلجي سكيييير ترووووح فدوة لطاري أمي
-اليوم موووووتج على أيدي
دفعته وباوعتله
-ولك أنوووور كافي عبالك أحنه عاييييشن مثل البشر ولك اوعى على نفسك
أخوووونا الوحيييد المفروووض تسندنا مو امي تطلع بدالك تلم قواطي وانت دايح وعمامي مقووووين
شوكتك تعررررف لييييش لأنك تشبهم
نفس الطييينة بدوها وياك بأدمان
وبعدين يخلووووك تتاجر وياهم
گام يفشر وطشر الغدة بالگاع وداس
علي تركته هي وطلعت
-شگول بس ادعيلك الله يهديك لأن
أمي مابطلت دعاء حتى تنهدي
اخذت المصلاة ودخلت لغرفة امي تصلي
لأن تعودنا على سوالف أنور بكل دخلة اله للبيت اكو مشكلة
اني گعدت بالمطبخ الم الاكل من الگاع
وهو طلع بره عبالي رايح اطمأنيت
والله هي ثوووواني بس
وارتفع صوت شهگة ركضت وأشوفه هناك
هي بالگاع تدفع بي والدم ينفث
من راسها وهو بالسكور صبانة الجبيرة
يضرب بيها ركضت ادفعه عنها
ضربني براسي شگ جبيني
اشرت عالاثر مال الخياط اللي براسها
وكملت
- شبه فقدت وعيي ورجعت صحيت جان
وحش كاااااسر عبالك غايب عن الدنيا
هي متمددة صامتة وهو يمرد براسها
من شدة خوفي لا يرجع عليه
شردت وقفلت علي الباب الحديد بالسرگي من وره
وطلعت بس بثوب البيت ودمي يجري
اعيط بالشارع التمت الناس واللي دخل
دخل واللي بقى يتفرج ويه دخول امي
وعياطها عبالها أنور يتعارك ويانه
من فتحو الباب لگو گاعد على جهة وهي
منتهية متوفية ماكو نص ساعة والدورية
اللي براس الشارع شالته
واخذوني اني وبنين بالأسعاف هي غطوها
اساساً لأن متوفية واني يحاولون يوقفون
النزيف ماكو اني صووووجي تركتها وياه
نزلت دموعها تشرح مدى حزنها وندمها
-اني لو باقية وياها وميتين سويه أحسن
والله من حلاة روحي انهزمت
حضنت كفوفها اطبطب عليها
وهي تبجي امها تحجي للأستاذ
-عمامه شغلهم بالكبسلة وهو مساومهم
يمكن يايفضحهم يا يدافعون عنه
والا همة مايشترونه بزبانة
شوف أستاذ اني من ضاگت بيه الوسيعة
دعيت الله يفرجها من يمه
واجاني بنفس اللحظة الكارت مالتك
على ايد واحد بالمركز من شفت أسمك
أسد الله غالب والله يايمة كزبر جلدي
وگلت راح تنحل بحق أسد الله علي ابن ابي طالب
طالبتها من الله ومنك كون يخيس بالسجن
يايمة حروووورة دمها بعدها بجفوفي
يمه واجهته وجان صاحي عبالك شيطان
يگلي بس أطلع حتى زهيرة أموتها
اذا طلعو عمامه يكتل بنيتي
واني بعد الله ماعندي غيرها
اريد بس ينسجن واهج ببنيتي
لغير ديرة ملييييت شوف هالأصابع تشگگت
من الگزاز والدوارة بالزبالة واني أدور
لگمة حلال اوكلهن ومااعتاز أحد وادگ بابه
بس هالمرة دگيت باب الله وبابك لا تردني
منزل راسه يستمعلها ويكتب
رفع راسه وهو يتأملها
-الشغلة يمي والله وحتى حماية ومكان أوفرلكم
اذا تشهد أزهار
باوعتلها امها
-أشهدي ومعليج هذا اخيج يتكفل بينا
هزت راسها أزهار وهو أستقام واگف
-الموضوع يمي خالة بس اريدج تگوليلي
انتِ مستعدة لأي حكم
-اللي يريده رب العالمين واللي يحقه القانون
حتى لو مووووته اني راضية
طلعنا للباب وأزهار ويايه
-صِبى انت تشتغلين ويا
-اي سكرتيرة
-خوش أنسان
-كلش خوش أنسان وميقصر والله
سلمت عليهم وطلعنا وهو يواعدهم بتعجيل المحاكمة
مشينة مسافة والفايل بيده يظلل عليه
ابتسمت شگد مفتقدة الأهتمام
طلعنا للسيارة
-هاي هي أستاذ خلصنا
-لا جايين الفريق التطوعي تبقين هنا ترتاحين بالسيارة
بين منوزع الوجبات
غمضت وذكرى سريعة مرت ببالي
واني اذكر خالتي تجيب الوجبة من عنده
فتحت عيني التفتت احاجي
-أستاذ الوجبات اللي توزعوها كل فترة منين
-هذا فريق تطوعي بدينا اني وزوج اختي
الشهيد الله يرحمه وويانه مجموعة اصدقاء
بمرور الوقت توسع وكبر وصار محط اهتمام هوووايه
من الشباب والبنات هسه تجي الباص وسيارة
الوجبات وتشوفين مجموعة منهم
ربع ساعة وارتفع صوت تلفونه يعلن قدومهم
مد ايده ليوره اكو علاگة اخذها طلع منها
يلگ مطرز علي أسم فريق ما لله ينمو
التطوعي قدمه اليه
-اذا تحبين تجين ويانه
اخذته واني أشكره
-أكيد أستاذ جايه
لبسته على قميصي لحظات
ووكفت السيارات نزلت ويا مجموعة شباب
وكم بنية تقدمله واحد جبير شويه بالعمر اصلع
احتضنه
-أبو نسب
ضحك الرجال
-اختك بدعت بالطبخ هالمرة وماقبلت اي واحد يساعدها وحتى ماخلتني ادفع شي تگول بثواب والدي
-گالتلي ودزيتلها فلوس
ابتعدت عنهم متوجهة للبنات يتشاورن بينهن
وكفت سلمت ابتسمت وحدة منهن
-ايييي هيج خل يزيد عددنا
مدتلي ايدها تسلم
-آني حوراء
-واني صِبى
تعرفت على بقية البنات
وحجت حوراء
-بنات خلي الشباب يوزعون الوجبات واحنه
نوزع هاي بكجات للبنات يستحون الشباب
يوزعوها سألتها وحدة شخليتي هالمرة
-مزيل تعرق فوط نسائية علبتين صابونة للوجه
ومعطر ومشط شعر
رجعت لسنواتي الماضية هنا وفعلا مخلية الاشياء اللي دائما جانت نقص عدنا
-يلة ياحلوات كل وحدة تشيل علاگة ونتوزع
صِبى خل انطيج شفقة الحر يذبح
راحت للسيارة ورجعت بيدها شفقة
لبستها وتوجهت للأستاذ
-أستاذ اني رايحة وية البنات محتاج مني
شي
ابتسم الشخص الواگف يمه
-شو ماعرفتنا عالعضوة الجديدة
-صِبى موظفة ويانة بالشركة
صِبى هذا أياد نسيبي
2
-تشرفنا أستاذ
-صِبى شغلة ساعة ونطلع نكمل شغلنا
-تمام استاذ
مشيت مسافة وصاحلي
تمشالي بهدوء ايده بجيبه
شگد انيق
-صِبى هاج السويج اذا حسيتي بتعب وحر
تعاي هنا التبريد باقي مشتغل والسيارة كذلك
احس جناحات بگلبي على مدى لطفه
مديت ايدي اخذته همستله
-لا تنسى أستاذ اني من هالبيئة
-بس برقة فراشة
گالهة وتركني ماشي صفنت شويه وردت
اكفخ نفسي هاي شبيييه احس اريد افقد
وعيي من يحجي هيج
مشيت هاربة من أفكاري للبنات وتوزعنا
لمدة ساعة تقريباً اجتمعنا يم السيارات
هو واگف يناقش بيهم على التمويل
كمل ملتفتلي اشر اصعد بالسيارة
صعدت بقى واگف حتى بعد ماحركت السيارات
باوعتله جبينه متعرق وحتى ميگدر يحجي
مديت ايدي لبطل المي اللي مخليته بجنطتي
-استاذ أشرب
اشرلي شويه
بقى هادئ گدام الهوى البارد دقايق ورفع راسه
طلعت العلاج شرب وتحرك ماشي جان هادئ
حيييل عكس جيتنه للمنطقة دخلنا الشركة
صعدنا المصعد للطابق الثالث بس دخلنا المصعد ماسيطر يبقى واگف گعد بالگاع
انخبصت نزلت بمستواه
-استاذ بيك شي
-صِبى
گوة نطقها
ماگدر يكمل مسح جبينه وحاول يوگف
ترنح راد يوگع مد ايده استقبلتها أيدي
توازن واشرلي
-بس ندخل المكتب
اتصلي ……
-تعب وماگدر يرد انفتح الباب مستند عليه
ماشي اول مادخلنا أنهار بباب المكتب قفلت الباب بسرعة وكعدت بالگاع يمه ثواني بس ولزمته النوبة
الكيلينكس بيدي خليته بين أسنانه شغلة دقايق ثلاثة او اثنين وانتهت النوبة وراها يدخل أغماءة جبت الكوشة من القنفة
خليتها جوه راسة بعدت الكلينكس من بين شفافه
جبينه وشعره يقطرون مي مسحته اله
جهازه بجيبه سحبته وفتحت القفل اتذكرة ١٩٩٠ مرتين
طلعت رقم حمزة من اول رنة فتح الخط
-ابووووو قسور العلم
-أستاذ أسد اجته النوبة تگدر تجي
-ويييين صِبى وين هووو
-هنا بالمكتب واني قفلت الباب لأن اغمى علي بباب المكتب مردت احد يشوف شي
-جااااايج
سد الخط ربع ساعة وصار يمنه دگ الباب
فتحته
جان وجهه شاااحب خوف على أخو
-تعاي ساعديني
سنده مگومه وساعدته نام
عالقنفة
-شبي شلون وگع
-طلعنا علمود قضية ومناك راح علمود توزيع للمنظمة
-حر وجهد اكييييد يوگع
گعد يمه منتظر يصحى نص ساعة فتح
عيونه وأستعاد وضعه شويه شويه
-أسسسسد ناووووي تموت
ياااخي ليش تهبطنا سووويها وأخلص
باوعلي الاسـتاذ فهم علي حمزة وسكت
-مابيه شي نوبة عادية
راح ارجع وياك للبيت تمام بس لا گلت
للوالدة
-ليش خليتها تعرف
-اني هم انخبصت يلا ارجعك گوووم
-صِبى تعاي
-نعم أستاذ
-قضية بنين عبد الله الاوراق يمج
رتبي كل شي نحتاجه
-تمام أستاذ
-باجر اكمل كل شي تعبتج ويانا اليوم
-ماكو اي تعب
توجه حمزة شال جنطته اشرله
-خليها يم صِبى تعرف شأريد
طلعو واني كملت شغلي كله لوقت الرجعة
للبيت طلعت بتكسي مارحت بسيارة الموظفين
تسوگت ورجعت للبيت لگيت سومة يم البنات
والضحك واصل للشارع لأن لازمة غِنى وحالفة
الا تحف شواربها
-طبعاً متلگين شغل بشواربج هاااااايه
-ولج صِبى وخرييييها راح ادفرها
ضحكت عليهن وهي گامت
-تدفريمن ولج
شمرت نفسها على غِنى مُنى واكفة تصيح
-السبع يطلع دم
و غِنى تگلها
-طبعا تطلع دم ولج غيييير وزنها تسعين
صاحت سومة وهي تجر شعرها
-ولج ٧٢ اخبل يا عود الگصب يا المسلوعة
-رشييييقة ياثلاثينية
-خااااايبة گلاااااااابج هيج مشمرين الزلم جووووه رجلين هاي الثلاثينية الماعجبتج
ضحكت غِنى وگعدت عدل
-والله صدقتي غير تخبلين عليج الله هالجمال الشايلته
وراثة من امج لو ابوج
-اميييي جانت تخبل الله يرحمها
هدأ صوتها وكامت
-يلا ولجن اروح اناملي ساعة
-دبقي تغدي شبيج
-بعدين صباوي غير وقت
طلعت للباب ورجعت دارت وجهه
-غنيوة المسلوعة اكو شغل تردين
-ايييييي اريد اكيد
-يم دكتورة نسائية بس شغل مرتب لأن دكتورة
معروفة بس المشكلة ل٨ يلة تخلص
-مو بعيدة ترى عالشارع بالعمارات الطبية يعني تتمشين
للبيت
رفعتلي غِنى حواجبها بمعنى شگلتي
-هاي هي اذا جان الشغل يخلصنا من وجهج الكئيب
شمرتلي بوسة بالهوا وراحت لسومة جعصتها
-تاخذيني باجر
-اذا بقيت عايشة بعد جعصتج هاي
ضربتها غِنى على كتفها
-يااااااابة حلقوم مو شحم
-تف خمسة وخميسة
ضحكت ودعتنا وراحت
هاي سومة انسانة مخلوقة من اللطافة والبشاشة
تضحك للهوا نظيفة ومعدلة وسمعتها طيبة بالمنطقة
والكل يحسبلها حساب بسرعة تآلفت ويا
البنات وهالشي احس فرحها لأن تعيش وحيدة
بالبيت بعد وفاة امها
راحت هي والبنات توزعن يساعدني
بقيت ارتب بالثلاجة وبين غدة وراحة
بالليل رحنه لسومة احنه وعشانه
گعدنا بالحديقة مالتها تونسنا وياها
سومة الها طريقة تدخل الگلب بلطافتها
خدومة محبوبة شاطرة وكلهن حاويتهن
لحد الان محاجية قصتها يمكن في يوم ما نعرفها
اليوم الثاني رحت ويا سيارة الشركة
بديت اشتغل وللعشرة الأستاذ ماكو
اتصل بيه جان صوته تعبان
-صباح الخير صِبى
-صباح النور استاذ شلون صرت
-تعبان صِبى هوووايه تعبان
تنفس ورد
-صِبى هذا الاسبوع تقريباً مااگدر
اجي بمكاني راح يبقى ذو الفقار بس
شغلي يجيني للبيت تگدرين تجيبين كل شي
سكتت افكر
-اذا متگدرين بس رتبيلي كل شي ودزي بيد
السايق
-لا أستاذ گلي شتريد اجيبه
-تمام اني منتظرج بالبيت السايق يندل
راح اتصل بي هسه كملي اوراقج والجنطة
وياج جيبيها القضايا اللي وقعت عليها
لستة ارقام المدعين لتنسيها
-كل شي خلي علية استاذ
ودعني وگعدت ارتب اللي نحتاجه ربع
ساعة نزلت لگيته منتظرني تحرك ماشي
بينة المنطقة مو هوايه بعيدة من الشركة
توقف ونزلت وامتدت عيني عالبيت العملاق
وعلى واجهته الحجرية الراقية والباب الجبيرة
المزخرفة دگيت الجرس وانفتح الباب عاملة سمرة
فتحتة خطت رجلي خطوات داخلة
جنت اعتقد هالخطوات راح تكون لمرة
وحدة ولظرف طارئ
ماجنت اعتقد أن الأيام مخبأتلي بداخلها
رجعة ثانية لهالبيت تاثيرها
راح يطال حياتي للأبد
.
.
.
مُنى
______________________
1
يقال أن تكرار الحدث ذاته
بالذاكرة يعطي أيعاز
للدماغ بأنه لا زال يحدث
متمددة عالمرجوحة بحديقة سومة
ومكنكة على شبكتها وأتراسل ويه
قمر اختفت لدقايق ورجعتلي
-مُنى ماما اجت هي ونعال راح اشوفها
أتصل بيج بالليل
-تمام
غلقت المحادثة واجتني سومة تتمشى
بيدهة صحن فواكه گعدت بصفي
-ها يحلوة
-سوووومة سويلي ضفيرة فرنسية
-الله غير تصير تخبل على شعرج
بس هاج اكلي هالصحن الفووواكه ترجع
الدم لوجهج وجهج أصفر
-سومة يمكن اذا اعيش يمج يصعد وزني للمية
-اوووي شماخذين من هالدنيا اكلي هني وعافية
البنات مااجن
-اتصلت صِبى تگول بحدود التسعة يرجعها سايق
المدير شغلهم هوايه و غِنى تلگيها مگابلة المراجعات
تسمع قصص
-هاي بثلث أيام صادقت المراجعات وگعدت
تسمع سوالفهن
-اذا شخص تعرض لبنية وخوفها
شلون تاخذ حقها منه
التفتتلي بقلق
-ولج منو متعرضلج
-هووو اني وين طالعة بس يمج وللأسواق
والسنافر بالشارع يرحون ويايه
حراسات اشتري وأرجع
-شلون متعرضلها
-متحرش بيها
ضربت خدها
-صخاااام ولج هاي منو
-ماكو احد على انستغرام شفت وحدة
تحجي عن هالموضوع وينطوها حلول
-اذا غريب تبتعد عنه قدر الامكان لأن الغريب مينحزر
واذا قريب يااما تصوره أو تسجله تسجيل
صفنت عليها وجعصت خدودها
-والله يا سوووومة افكارج جهنمية
بيدهة قطعة رگي خلتها بحلگي
وگامت من سمعت الجرس
دخلت غِنى بيدها حلويات
-هاااا حبايب
-الله يساعدج دكتورة غِنى
-سمسمية سويتيني دكتورة
-ولج سووومة
-سمسمية أحلى لايگلج
ارتاحت شويه وطلعنا للبيت
شغلنا المبردة للهول
وللغرفة حتى يبرد البيت و غِنى سبحت
وشمرت نفسها بالفراش نامت بالغرفة للتسعة رجعت صِبى وهم تعبانة متگدر حتى تحجي شمرت
نفسها نامت بلا اكل واني أستغليت الفرصة
صعدت للسطح اخذت فراشي وحلوياتي
اتصلت بقمر رفضتها ودزتلي رسالة
تمددت عالمفرش ورجعت أستذكر من حجتلي اللي صارلها وسبب خوفها تذكرت
كلامها والصدمة اللي صابتني بعد ما گالت گلمتها الأخيرة واني أسألها بخوف وترقب
.
.
-شصااار
انفتحت عيونها كأنها تستذكر اللي صار ونطقتها بروح رايحة
-أغتص بني
غطت بعد هالكلمة بنوبة بكاء طويلة
احتضنتها واني ابجي وياها لحد ماهدأت
أنفاسها
-شلووون گدر
-ماما راحت للدوام بعدها تبدي امتحاناتي
گلتلها قفلي الباب عليه مااريد اشوف
احد أريد أنام طلعت وتركتني اهذي لوحدي
-عمج هنا بالله تخربطتي احتاجيتي
شي شلون
-اخذيني لبيبي ام أسد ابقى هناك
-مااگدر اطمأن عليج من تبقين گبال عيني
1 ت
سدت الباب وطلعت مسرعة ليفوتها
الخط
بقيت بمكاني الوب رجليه اثنينهم
مكسورات ورضوض بكل مكان
وجروح بوجهي
متمددة وعيني عالباب مثل اللي متوقعة
حدث عظيم اعرف راح تكون بي
نهاية حياتي
فاتحة عيوني عالباب بكل قوة ارتجفت
أوصالي وآني أسمع صوت أقفال الأبواب يصدح
بالبيت وصوته يدندن أغنية قديمة
صوته كل ميقترب من الباب أحاول انكمش
على نفسي بس مااگدر بسبب جروحي
ورجليه حاولت اتقرب للكومدي اجيب
تلفوني ماكو
مرر اصابعة عالباب يدگدگ بخبث
ودفع الباب على كيف صوت صرير الباب
لازلت أسمعه بأذني والرعشة والخوف اللي
صابني خلاني أرتجف لدرجة اصطكت أسناني
دخل وعلى وجهه أبتسامة شيطانية
-ها قمرتي عبالج نمووووت
هههههههههه بس صار العكس تعرفين
خففتي عني عناء الحركة متگدرين تتحركين
واني جووووي هالسواااالف
هجم عليه واني احاول ادافع عن نفسي واعيط
سد شفافي بيدة السليمة
تناوش بأصابعه الطالعة من الجبس من جيبه
قطعة قماش بكل قوته دسها بحلگي وخنگني
قاومت وقاومت ملخ شعري وربط ادية عطت واني
أشوفة يسحب بملابسي بس صوتي يتكسر داخلي
بسرعة تقربلي عطت من الألم ثووووواني جانت حسيتها عممممر من الدهر وفقدت وعيي
صحيت على ايده تضرب على خدي جان خايف
ومرتبك مطلع قطعة القماش من حلگي ويهذي
-لا تمووووتين وتبليني لا تووووورطيني بنت القنادر
فتحت عيوني بكل قوووتي بصقت بوجهه ماابدى
أي ردة فعل غير مسح وجهه وفتح أيديه
-شووووووفي گ****ة أي حجاية تطلع ………
قطع كلامة مكمل وهو يفتح تلفونه
صورتي واني متمددة صدري وبطني كل شي
طالع وبجامتي نازلة ومبينة ملابسي
الداخلية عبالك متصورة بأرادتي
صرخت بصوت متحشرج
-ياجباااااااااان يا نذل ياقذرررر
-اي اي ايييييييي افتهمت بس هالصورة باووووعي
يمسح على ملامحي بالصورة ويحجي
-هالصورة الحلوة جماعتي بالأمن الالكتروووني
خبببببرة بتركيب الصور والفيديوات
شوفي نوووومتج الحلوة هاااااايه ينشروها على
فيلم والموووواقع الأباحية ترحب بكم هالصورة
تنتشر وياها محادثة وانت تحجين ويا حبيبج
فتح سكرين محادثة بيهة الصورة
-الله ليوفقك بعمر اوووووولادك اني دمرتني
-امممممم اممممم امممممم بعمر أولادي
بسسسسسس …………
تقرب من اذني يهمس بقذارة
-بس تخبلين ومن انت طفلة اني هاااااوي هالجسم
-اطلع اطلع والله والله اگول لخالو أسد والله لينتقم
منك والله
جنت منهارة غلطت وفشرت بكلام مامار على
لساني قبل دموعي ابد متوقفت تقدملي بيده التلفون
-شوووووفي
باوعت محظر الصور محادثة وصورتي
ومجهزها يدزها بشكل جماعي للكل
هدأت وسكتت وهو گعد بصفي
-نعقد اتفاق
هزيت راسي بالرفض واني احاول الف نفسي بحيث
ميشوف مني شي
مافهمت علي لحد ماتقرب من اذني
-انت بعد مثل المتزوووجات
عيوني مغوشة حتى مااشوف لوما هو بحقارة لبسني
نظارتي
-ياحلوووووة اني اخذتج
اني صح عمري ١٤ بس بيبي أم أسد وخالة أم نسرين جانو دائما يعلمونا أن جسمنا نحتفظ بي للي راح
يكون شريك حياتنا وان الرجال يفهم اذا البنية مسويه شي غلط واكو بيهن بنات قتلوهن بسبب ان مسويات علاقات غير شرعية قبل الزواج
باوعلي وشاف رجفتي وفهم بعقله الشيطاني اني
فاهمة
-يعنييييي ياحلووووتي ياقمرتي ماتتزوجين لأنج
مووووو بنية وعمامج تعرررفيهم شگد متشددين
يذبحوووووج من الوررريد للوريد بس يعرفون
سحبني من شعري مگعدني بجيت بسكتة
-لذلك وحفاظاً على هالرگبة الحلوووة بالليل الباب يبقى مفتوحلي وأسوووووي
اللي أريدة وصورتج بالمقابل بكيفج
هزيت راسي بالموافقة كذب بس حتى يطلع
رفعني ينزلني للگاع واني لافة نفسي دفعته
شالني شمرني بالحمام
مااعرف اللي صار بس الدم جان يابس
على رجليه بجيت وبجييييت لحد مختنگت وحاوووولت اغسل وأبجي ماكو طرررريقة خلاص للي
اني بي غير اطلع منا
اكو ملابس ممغسولة الية معلگة لبستها
ورگعت الباب حتى اطلع طلعني للغرفة
ووگف بالباب يمي بالغرفة
-اتفقنا مو
هزيت راسي وتركته واني اغطي وجهي
والتلفون بيدي سحبته من دخلت
ابجي واحس الغصات راح تموتني
اتصلت ببيبي أم أسد بقت تستفسر شبية
-بيبي تعاي اخذيني ماما بالدوام ………
-شبيج يمة لييييش تبجين
-بيبي بطني توووجعني راح تجيني الشهرية ومااگدر اتحرك حبابة
سدت التلفون وماكو بينه وبينهم مسافة ربع
ساعة بالسيارة
دخلي راكض
-وووووين رايحة بيبتج بالباب
-خل تاااااخذني اطلع معليييييك امووووت
نفسي بس ابقى هناااااااااااا هسه اموت نفسي
-بس تحجين شي انشر الصوووووور
-ماااااحجي ماحجي اطلع بررررررررررره
طلع راكض يفتح الباب شويه ودخلتلي بيبي
حضنتني لگتني منتهية من البجي
-اخذيني وياااااج بيبي
-والله لا اخلي أسد وحمزة يطيحون حظها والله الغبية ماتعرف تاخد اجازة
راحت للكنتور طلعتلي ملابس وجهزت كل شي
لبستني عباية الصلاة
-هنااااك اسبحج وابدلج سودة عليه
صاحت لخالو حمزة شالني لجوه
ورحت وياها بيومها العصر اجت ماما مفرفحة
بعد مااكلت رزالة من خوالي بالتلفون
-والله مخلية عمها يمها وشتريد يوگفلها
خالو حمزة عينه منها جان نازل اجازة
-بنتج مراهقة وهو رجال وجانت تحتاج اشياء خاصة شلووووون تتركيهة ويا الرجال
-والله لو مخابرتني اترك الدوام واجيها
بيبي خزرتها
-قمر تبقى يمي هنا
-شنوووو تبقى هنا
-اداريها واقريها اني
-ولججججج قمر تتركيني
-مو اتركج بس خليني يم بيبي استحي
من عمو أياد واولاد اخو من يجون اتضايق
ضرب خالو حمزة عالميز
-متروح قمر اووووولاد اخو شنو لج ميادة انت طفلة نعلمج بنتج مرااااهقة وتتضايق وحساسة
باوعتلي وتبجي
-انت مقتنعة تبقين هنا
-اي بيبي هم وحدها وية العاملة نتسلى أني
وياها
طلعت ماما زعلانة ومنها بديت رحلة اكتئاب ماطلعت
منها لحد الآن
ودعت هالذكرى الأليمة على صوت تلفوني
بالوقت الحالي ورنتة المميزة اللي مخصصتها
لقمر فتحت الخط واجاني صوتها المتغير
-ها قموووورة حبيبتي
-ها مناوي
-شبي صوتج
انهارت بس حجيت هالكلمة وبدت تحجي وتشرح
معاناة أعوام بلحضات
-تخييييلي جاية تاخذني تگللهم كافي سنتين
هنا اريدها يمي بعد بيت جدها اهل ابوها ميدرون بيها تفتر من بيت لبيت اني ادري هاي فكرته هووو دازها اليه
-لتررررحين عاندي
-عاااااندت وگامت تبجي وأتفقت وية خالو كل خميس وجمعة أبقى يمها
-ووافق
-شلون وهي ماتعرف ولا تدري بشي
ضحكت وكملت بمرار
-شلووون مافهمت وجعي عيوني المتغيرة
وجهي الذبلان صحتي اللي بالنازل
-شلون وانت محاجيتلها
توترت وحجت بعصبية
-هي اااااام ام الأمهات يحسوووووون جنت
مرات أبجي بالليل
أخاف أرتجف ما جنت أگدر أنام وهي
جانت تگول لتتعودين عالسهر اگلها مختنگة
تگلي صايرة دلوعة عود تتشاقه
حتى لمن شافت الحروق والكدمات بطفولتي
جانت تصدگ تبريراته السخيفة الها
مااتذكر مرة سألتني شبيج
-اني وياج أسمعج احجيلي
- كل شي بداخلي أنكسر مُنى جاي أحس اني وصخة
مو طبيعية كل شي بيه صار ثگيل حتى انفاسي
گمت أكره الليل أكره الغرف المسدودة أكره ريحة عطره أكره نفسي
ارتجف صوتها وكملت بحرگة
-كل ما أشوفه أحس جسمي يرجع يختنگ
كل شي يرجعلي لحظة بلحظة وثانية بثانية
حتى لو صار سنين بس كل شي محفور بذاكرة
جسمي
نوم مااگدر أنام حتى الضحكة صارت تمثيل
اضحك بس داخلي ميييت
-المفرووووض هو يحس هالأحاسيس هووو الجاني
وانتِ الضحية
سكتت شوية وردت
-أريد أفهم ليش اني بالذات صارلي هيج
أريد أصدگ إني مو قذرة مثل ماهو يگول
اريد أصدگ اني مو نجسة
أريد أرجع أتنفس من جديد بس مااگدر
-هوووو النجس وهوووو القذر والله نقية
انتِ وبريئة واطهر من عنده
تنفست بعمق وغيرت مجرى الحديث مثل
كل مرة
-الله يلعنة خل يولي اگلج مُنى
-گولي حبيبتي
-ندخل دروس خصوصية رياضيات وانجليزي
-لا عيوووني اني هذا السڤن مااخذ ويا دروس
-انجبي والله مضبوووط هو درسني بالثالث وشفتي
اخذت درجة كاملة
-ووين ان شاء الله ناخذ دروس
-ببيتنا
-لا مستحيل صِبى تقبل بس
انجليزي وين
-أستاذ جعفر اني جنت يمه تدريسه يجنن
-هاي هي وياج تمام
-دفكري بالرياضيات
-ماادري اشوف صِبى
ودعتني وراحت نزلت للبيت
اريد اغلق الواي فاي وأنام أجتني رسالة
من الرقم المعتاد اللي اساساً عرفته وكتبت علي حمزة
ابو گمزة
-ها تدريسي كخ بس المعاهد والأختلاط اوووووك
-اكيد اي
خليت ايموجي قلب بصف الرسالة
وكبسته بالرد وره شويه دزلي فيديو
لوحدة اكلتلها راشدي من الشاب اللي واگف گبالها
وكاتب
-ااااااخ لو بيدي
-حتى توووودع ايدك وتبقى اكتع طول العمر
-شوووووو گلبج قويان لجججج
-وليش اخاف منك شنو لازم عليه لزمة
-لا واثقة من نفسج وتحجين بدفع صدر
-ليش قابل كاسر عيني بشي واخاف
-خررررررررب لو بس الظرووووف والأيام تجيبج تحت ايدي جان عرفت شسوي
-ولهيج نشكرررررر الظروف والأيام
خليتلة سمايل مستفز يضحك
-هييييييين
-اوووگف عمووو دقيقة خفت داارتجف
ماحسيت بعدها بس اكلت بلوووووك
ضحكت علي ورة دقايق
اجاني أشعار دخلت رافع الحضر
ودازلي مقطع لبنية گصيرة
وواحد طويل رافعها على كتفه
وهي تعيط وتضربه على ظهره متعصبة
كاتبلي
-فيديو مستقبلي لحياتنا
صفنت واني انطي بلوك
حياتنا جمع مو حياته هووووو
اخذتني الصفنة واني أفكر
بنية هالشخص الغريب الأطوار
وياية ومااعرف المسقبل شضاملي
بالقادم بي ويا
.
.
غِنى
____________________
الخذلان أبشع شعور ممكن يتعرضله
الأنسان لكن يعلمنا رغم كل خيبات الدنيا
لا تخلي الخذلان يغير گلبك
خليك طيب بس احذر
حب بس بعقل
ثق بس مو بسرعة
والأهم لا تلوم نفسك على أخطاء غيرك مو ذنبك إنك كنت صادق بعالم مليان أقنعة
كل يوم من صار اللي صار
يتصل ويتصل مئات المرات لحد
ماانقطع اتصاله اتصلت رهام
مرة مافتحت الخط اللي سمعته
وشفتة كافي خيبة لمية سنة گدام
خلت گلبي صار قطع قطع ومااعرف بشنو
اجبره ورة اسبوعين حسيت ان گلبي مايتحمل يشوف حتى أسمه وتراجعت عن قراري
بعدم حظره سويت حظر لكل حساباته والخط تجاهل
لرسائله وهو هم بطل يتصل يبدو أنه مل وحس
ان هو غير مجبر عالتبرير
صِبى مرتين اتصل بيها وحجت ويا طبيعي
وهو هم يستحي يطلب منها يحاجيني
راح ندخل شهر تقريباً اني مفارگته مااكذب
أحس حياتي انثلمت ثلم جبير بغيابه بس
كرامتي جانت أهم هو ماقصر وعمررررري
ماانكر فضله علية وعلى اخواتي وخالتي بيوم
اللي احتاجينا
بس نقطة كلامه ويا رشا ومعرفتها
كل شي عن وضعي ومعايرها اليا بهالخصوص
خلاني احجز مشاعري كلها على جهة واطلق العنان فقط لكرامتي وكررررامتي لا غير
احس حتى انتقالتنا لهالبيت بيها خير ألنا
مكان صغير على گدنه ومعرفتنا بسومة جانت
شي انعش حياتنا الهادئة الكئيبة فهي بطبعها
صاخبة تنكت وتسولف وتتفاعل وياج عالكلمة
لهالسبب أحس ارتاحينا أكثر لگتلي شغل بمكان
كلش قريب عالبيت بسبب اختلاطها بالجيران
بدربونة المدرسة موجود بيت دكتورة نسائية معروفة
وهي صديقة الها طلبت مني اكون سكرتيرة الها
ومااگذب اني حالياً بحاجة لأبسط أجر اگدر البي بي
احتياجاتنا وأساعد صِبى لأن متگدر وحدها وميصفالها من راتبها غير مية ميكفن لمعيشتنا وطلباتنا كبنات
وافقت عالشغل بالمكان قريب مسافة خمس دقايق
مشي عن البيت الشغل من ٢ الظهر لثمانية تقريباً
يعني امشي وقت وهم استفاد وراتب شهري حلو
بديت أشتغل وكل يوم عندي گعدة وية مراجعة
أسمع معجزات حمل وقصص بنات مظلومات
واشكال الحالات
كل يوم اخذ ويايه دفتر الحجوزات وبالبيت
على رقم العيادة الخاص احجز للناس
افتح الحجز ب٩ الصبح وتهل عليه الأتصالات
يادوب الحگ افتح خط
لمن قفلت الحجوزات اجاني اتصال ولح لح لح
مارديت لأن اكو عدد محدد من المراجعين ووقت محدد
بس گلت خل افتح الخط
رفعت الخط واجاني صوت ولد شاب
-السلام عليكم
-وعليكم السلام الدكتورة موجودة اليوم
-اي نعم موجودة محتاجين حجز
-اي حجز بأسم غزل حسين
كتبت الأسم
-رقمكم ٣٧
-لا شدعوة قربيلنا الموعد وماراح ننساج بالفلوس
-انسى الحجز راح ينحذف عن اذنك
-لا لا يمعودة موافقين واعذرينا عبالي تاخذين
فلوس
-اخيييي حجزكم موجود ماكو داعي نتساير ونسولف
غلقت الخط وكعدت مُنى الهبلة تريگنا ورتبنا البيت
سويت الغدة صارت بالثنتين
طلعت اني للشغل و مُنى اجتها سومة يكعدن
يمكيجن لو يسولفن مرات الكاهن يبجن سومة
على امها و مُنى على خالتي
وهيج يقضن وقتهن
طلعت للعيادة الجو حار لابسة شفقة سودة
وية ملابسي من الحر والشمس دخلت فتحت
العيادة وبين ترتيب الكراسي شغلت سبالت تبرد
العيادة وغرفة الأنتظار ب٣ بدت الناس تجي
وزعت كارتات الدخول اللي يجي بموعده
واللي ياخذله فرة بالمجمعات حوالين العيادات
وصلت الدكتورة ٣ ونص وبديت امشي الناس
لحد السبعة بالليل باقي كم مراجع اباوع ثلث حجوزات
ماكو ومن ضمنهن اللحوح رقم ٣٧
رتبت الكارتات وباقي خمسة او ستة بين دخول
وفحص وبين تاشير علاج
كعدت اكتب حجوزات باجر اللي اجو حجزو من العيادة
منزله راسي واحس عيوني وكعت من التعب
صوت سويج او مفاتيح عالميز وصوت گال
-ممكن كارت حجز ٣٧
عرفته من صوته وگلبي تسابق ويا الريح
وكل خلية بدمي تحركت لهالبحة الحلوة
اللي بصوته
رفعت راسي باوعتله بلا اهتمام
-تفضل الكارت وانطيني ٢٥
طلع الفلوس خلاهن عالميز سحبت كارت متابعة
اكتب المعلومات
-اسم المريضة
-غززززل أيمن
-اممم تمام ومراجعة على شنو
-جيد جيد وحظرتك تدخل بدالها تسوي
الفحص
انحنى عالميز يهمس بخباثة
-هي الدكتورة تفحص گلوب گلبي تعبان
-ليش تنتظر وتتأخر اني انطيك العلاج
-على رأيج أمشي لو نهايتي بيها
-تمام شويه زرنيخ بكلاص جاي
-وأهون عليج
سكتت واشرتله
-تفضل أخي أنتظر حجزك
-اخووووج يابت الكلب
ضربت عالميز وهو يريد ينفجر ضحك
تمشى گعد بالكرسي اللي بصف الميز لزگ
دخلو الخمس مراجعين باوعتله
-حضرتك تدخل تجيك حملك
-اي ماجذبتي حاااااااامل بس حامل هموم
وتعب
تركته لحد ماخلصو الكل طلعت الدكتورة
قفلت العيادة ومشيت نازلة لحگني يتمشى
بصفي
-يابنية
-نعممممممم
-ممكن نتعرف
-تعرفت قبل وماحصلت بس كسرة الگلب
-اني جديد بالمنطقة عادي اتعرف عليكم
-اني كئيبة مااحب اتعرف شوفلك غيييري
صرنا بالشارع مشيت ومشى بصفي
-لهالدرجة بايعتني ولج شهر لا تردين
على اتصال ولا تفتحين رسالة وتالي حاظرتني
-هذا الشهر قليل بحق الخذلان
-بس أفتهم ………
-اني ماأريد أفتهم
-لج ويييين سكنتي احجي
وگفت باوعتله
-گدام عينك ساكنة بس يجووووز عيونك مشغولة بالمدام
رجعت أمشي وهو ورايه صار بصفي
-ليش رجليج طالعة
باوعت ماطالع شي بس كفوف رجلي من الحذاء الصيفي
ابتسم أبتسامة خبيثة ويباوعلي بسرعة فهمت
اتصلت بصِبى
-هااااااا الفاهية انتِ گايلتله وين ساكنين
-ولج حلفني بروووح فرقد وتردين مااگول
غلقت التلفون وعينه بعيني
-لعد ليش تسأل وين ساكنين مدام الفاهية گلتلك
-زيادة معلومات
-اي عووود الله يزيدك
باوعلي بنفاذ صبر
-تنطيني مجال اكل تبن لو اوووولي
-تفضل
خزرني وأستوعبت كلمتي
-والله اقصد تفضل احجي
-مااوگفج بالشارع اني هنا باقي يومين
-اي يم النسابة
خزرتة ورجعلي الخزرة
-لتخزرين لجججججج
هنا باقي ببيتي امشي اوصلج بس اسبح
واتصل بيج وعلى الله يا غِنى مترفعين الحظر
-ماارفعه
-حلفي حتى اطيح حظج
-وداعتك
-ااااااخ هيج داعتي الها حوبة
مشيت تاركته مشة بصفي ساكت
الى أن وصلني البيت ورجع دخلت تعبانة
سبحت حتى أصحصح صِبى تباوعلي تدري بنفسها
غلطانة
-لتباوعين صفح اني أيمن احترمه وأستحي منه
وبعدين لازم تسمعيله
-مااريد أسمع
-والله اطيح حظج شوفي وگفاته الأهل ميسووها
وزحمة تطوليها وهي گصيرة فهمتي عيب انتِ مو طفلة سمعي منه وافتهمي
-وكرامتنا
-كرامتنا محفوظة طلعنا من البيت وفلوس الأيجار
اخذهن والكلام مال اخته وخطيبته رجعناه الهن وطردتهن بأدب
-وهاي انتِ منطيته كل المعلومات العيادة ومكانها ورقم الحجز
دخلت الغرفة علگت المبردة وتمددت وكالعادة مُنى
و سومة طالعات ياكلن ازبري ويتمشن بالمنطقة
سديت باب الغرفة تمددت تعبانة واخذتني النومة
لحد نص الليل صحيت على ايد صِبى
-التاااافهة گعدي الولد خبصني بالأتصال
رفعي الحظر عيييب
بعدني ممستوعبة كلامها گالت بعصبية
-شو دجيبي
اخذت تلفوني تفتش بي شمرته علية وطلعت
بنفس اللحظة دگ الخط باوعتله هو
فتحت الخط يم راسي خليت التلفون مابيه
حيل حتى الزم التلفون فتحت سبيكر
-الووووو
-نعم منوووو حضرتك
-احترم
-انتِ خليتي بيها احترام بهالصوت بت عاااااامر
-شرايد
-بوووووووس
فتحت عيوني مستوعبة الكلام غلقت الخط بسرعة
رجع اتصل صحصحتله هالمرة فتحت الخط
-الوووو
-يابه حتى الألووو تنباس
-شبيك اخي مفطوم على بوس لو سمحت گول التريده
-شووووفي هاي الأخي يجي وقت اطلعها من عيونج
حتى اعرفج اني موووو اخي
-اووووي مشغولة گول
-هاي الاووووي تعيل بيه
كحيت وجليت صوتي
-شرايد أيمن
-اي هيج برزي عضلاتج وطلعي غني اللي جواج الأنوثة مو الج ضلعي
-تركت الأنوثة للمريضة رقم ٣٧
-اكبر بربوگ اطلبج ٢٥ مال الحجز
-هاي منو بربوگ
صفنت على نفسي واني اعيدها طگها ضحكة
-مشتاقلج
-حجي يفيدك
-سأليني وأرد على كل هواجسج وظنونج اقسم
بروح أخوج وروح أمي محاجيلها حرف
-وأختك الجبيرة
-سامعة
-منين
-من رهام ورهام تعرفيها شگد تحبج
ومو قصدها تقلل من قيمتج والله
حاجية وياها كأخت جبيرة شلون انت
شاطرة وطلعتي من وضعكم بمجرد كلامي
ومساندتي الج
-جرحتني رشا واذتني هووووايه
-ابوس الجرح
-أيييييمن شبييييك شصايرلك
-شبيج لج
ضحكت وهو ضحك
-فكيها لا أجيج لبيتكم يابه وسمية شلووون تحبني
والله تدخلني بدون ماتسأل
- تعرف شتگلي
سمع نبرة صوتي تغيرت وهدأ وترك الشقة وجاوبني
مستفسر قلق
-وتگلي دخليني دورات يمج اتعلم شلون اونس
المدير بدون محد يحس
-وبعد
-وتگلي أيمن حجالي كل شي انتِ مثيرة للشفقة ومجداية ونجحتي وتفوقتي بفضل فتات الاكل والفلوس من أيمن
-وشحسيتي
-هي ماهمتني بس كلامها عنك وانك انت حاجيلها
حسيت من ورا گلبي مثل قطعة گزاز رقيقة
تهشمت قطعة قطعة لدرجة ماعادت تنفع حتى
لأعادة التشكيل هي ماهمتني بس ……
-منو الهمج
-همني انت شلون واصل وياها لمرحلة من قوة
العلاقة تحجيلها عني وعنك
-اني اهمج
-اي هوووووايه
-كسرت گلبج
-اي
-وانقهرتي
-لدرجة فقدت بيها الثقة المتبقية بالناس
-انتهينا بلحظتها
-منو
-اني وياها عقد الشيخ وانفسخ
اختي الغبية سامعة كلامهن هي واختهة الجبيرة
لرشا يگللها راح تاخذ البيت
-ومنين عرفتتي اخت رشا راح اخذ بيتك
-انتظري اضيف رهام للأتصال
شوية واجاني صوت رهام
-مكالمة جمااااعية ها ياالنچر صدتها
-هي صادتني
ضحكت وسلمت
-البذاااااتة ولج حتى مكالماتي تتجاهليها
-زعلانة منكم
-والله والله وروح امي واخواني جنت اسولف
ويا اختي هيج سوالف عن شجاعتج وقوتج
انت واختج صِبى وشي جر شي يعني والله
والله مو قصدي اقلل منج بس سولفت عن
مكان بيتكم وهيج سوالف
-وشصار
-اخت رشا الجبيرة دعاء اسمها بس شنووو
اگبر بربوگ حاجية ويا أختي الجبيرة عشتو من شايفتج وگايلتلها هايه البنية منو
رشا گايلتلها هايه اللي متوسطلها
أيمن بالشغل هي اختي مشايفتج والله بس من عارفة أسمج اختي فالتتها گايلتلهم أيمن مگعدها ببيته
وكل اللي سمعته مني حجته الهن اختي غبية
وهنه ثعابين صغيرة كبرن الموضوع
وصار حجي سونج بواگة زلم
أيمن قاطع رهام وبدت سوالفه
-يابة أنا زلمممممة موافق أنباگ الناس شبيها
ضايجة غنيوة اذا تردين تبوگيني تلگيني
جاهز انا وجنطي وهدومي
-شكرا منريد
-العببببب أسمعي رهام هاي بعدها تحجي معلگ
وروح عمي عامر الغالي وتعرفين غلاوته عندي
اجيج حظج أطيحه
سكتت وهو رد
-تذكرت شغلة رهيمة يلا بلا مطرود طلعي من المكالمة
-اي يابه غِنى ورجعت رهام بيش الكيلو
طلعت من الأتصال وهدأ صوته واللي جنت خايفة
أن يسألنيا گاله
-غنووووة
-هممممم
-گلبك صاير خفيف
-اييييه ايه اليثگلن وية غيرك يمك أنت خفاف
-هاي الية
-شعندي أغلى منج أحجيله عواصف شعوري
فهيت واجاني سؤاله اللي جنت خايفة
منة حجه بصوته الحلو وبكل جدية
- شنو قصدج من گلتي
مشاعري جان لازم تبقى مدفونة
ناحيتك جنت بداخلي أحس بنقص
وخوف وترقب اني بيوم راح اتعير
بوضعي القديم بس متوقعت بهالسرعة
-خل أفهمك
-لا لا دقيقة لا تاكليني بلسانج
وحدة وحدة نشرحهن كلمة كلمة وحرف حرف
خوووش
-لا اسمها خوش التمام هاي للفاهيات
-خوش بس خل احجي
-گولي الج عشر ثواني
-شلون حافظ اللي گلته هيج
-الجهاز يسجل مكالمات وكتبتهن بوررررقة
-يممممممه
-مو أعرفج اني تربية ايدي ثعلب مااكدرلج
كل شي بالبراهين والادلة اسمعي بدون لتقاطعيني
شرحيلي اول سطر
ضحكت وهو يحجي بجدية
-عيد السطر الأول
-خووووش
مشاعري جان لازم تبقى مدفونة
ناحيتك
صفنت هاي اني شجفصت
-احجييي
-يعني يعني شسمه
-اي شسمه بالله
-يعني متحتاج شرح مو
-لا تحتاج شرح دقيق
-أيمن
-ماتعبر عليه من الاخير
جنتي تحبيني لجججج احجي
-ليييش تصيح
-ممصيح جاي نتناقش
-وهيج الشخص يعرض مشاعره على اللي
يحبها
هدأ صوته وضحكة حلوة صدرت منه
-يابووووية اليحبها
-هااا
-ووجعا من الأخير بلا فهاوة ولا عيارة طلعي غني اللي بداخلج وغردي
-والله مااحجي
-جا خل اگولها بدالج تحبيني تموتين
على جهرتي وتگولين بگلبج معقول هذا الحلو
صاررررر اليه وكل شويه تبوسين ايدج
وجه وگفة وتصلين ركعتين شكر لوجه الله
-اي وبموسم الحج راح اروح حج شكر والله
شنو أيمن الأزرك صار من نصيبي
-يااااااايابه نصيبج اخذيني حلال الج
اني وهوستي
-يبوووو مااحجي بعد
-اييييي سكتي واني اصفن حتى بسكتتج
-أيمن
-بعد رووووحي
-شلون صار هيج
-زاحفة
-لا جاي اطبلك واحسسك انت حلو
-اي حبيبتي طبليلي أستاهل گولي عليه
احلاهم
ابتسمت هو جان يتشاقه بس هذا احساسي
الصدگ
-أرجلهم وأحلاهم وشيخهم
سكت ثواني جر نفس قوي وذبه مرتاح
-جنت اعتقد ماراح ترهم بيوم
جنت اگول ………
-جنت تگول فرق العمر بينا
-بوقت الصرتي انتِ انا جنت رجال
سكت شوية ورجع يحجي
-جبير هواي عليج موووو
-جبير هووووايه بعيني
-اصغرلج واكون بعمرج
-لا اني اكبرلك وانتَ تبقى مثل ماانتَ
من شفتك اول مرة تبقى جبير بعيني
-غنوة
-همممم
-ياراحتي من بعد التعب
وبأبيات شعر من اللي يحبهن گلبه
ويعبرلي بيهن بكل وقت
گالها ودگ الها گلبي بعد موت وخوف سنين
-تعرف غلاتك لو بعد يحتاج ابين اكثر
يا البيك لهاني العمر ما ركزت بيمن مر
يافتشة عيووون الگلب ياميزتي البيها انغر
شكرا لزيارتكم عالم روايات سكيرهوم
