رواية فصلية الضابط الفصل الخامس عشر 15 بقلم زينب نور

........... دخلو ثائر و وفاء هرجو البيت بصوتهم باوعت من بين ايده وضهره كلت بگلبي هاي هيه التمت عليه بس ما خفت جنت خاتله ورا ضهره واني متأكده ميخليهم يوصلولي مايسمحلهم يضربوني سامح بس النفسه يضربي ويهيني براحته اسمع وفاء دكوله

وفاء:- شو انت كادر بس على وليدي وما كدرت على الفصليه تربية الشوارع 

 ذبيت الصوج ولذنب كله براس امير وطلعت مرتك شريفه مو هي الخلته يحبها مو هي السحبته تسويله اغرائات لحد ماوكعته وخلته ايخون عحتى عمه 

 ابني موهيج تربيته

بس هاي الحيه لعبت بعقله 

وسهام وسناء يأيدن بيها 

وثائر يتهدد عليه يريد يموتني ذابين الصوج كوله بيه حسيت نفسي مثل الخروف ابين ذيابه يردن بس يفترسنه ينهشن لحمه 

صاح بيهم وارث يرعد عليهم بصوته الطرش اذاني 

 وارث:- يستاهل اكثر وقليل بحقه هذا ابن الحرام ماغزر بي تربيتي وجنت احسبه صديقي موبس ابن اخوي هيج يجازيني يتحرش بمرتي ولكم ما صايره وبعد ما اريد اشوف خلقته الزفره 

وقسم بالله اذا شفته اخلي طلقه هلمره براسه مو بصدره كلكم تشهدون عليه وكولو ما كال وارث ومرتي ماعليكم بيها اني احاسبها ما احاسبها بكيفي هذا الشي راجعلي مالكم دخل:

: طلعت سناء هيه وبناتها مفرفحه وزعلانه وحلفت بعد ما تدوس عتبة هذا البيت وبيت ثائر قررو بهل يومين يطلعون من البيت مأجرين بيت ويردون حصتهم من هذا البيت عافهم بقمة هوستهم وسحبني من ايدي وطلعني ويا اشرلي اصعد صعدت ركض بس الهث من صعدت الدرج تعبتني دخلت الغرفتي سمعت صوت سيارته رحت باوعت من الشباك مال غرفتي يطل على الگراج وشارع شفته طلع بسيارته رجعت اخذت ملابسي ودخلت للحمام سبحت وطلعت شفت سهام صاعده تريد تدخل غرفتها صحت عليها 

:- الله ينتقم من عندج والله مايضيع حق مضلوم

 التفتت باوعتلي وضحكت بستهزاء كالت

سهام:- تستاهلين اكثر قليل بحقج هذا الي يصير 

عفتها ورجعت اريد ادخل غرفتي صاحت وراي اتريد تقهرني اكثر 

:- شكدخطيه ابن عمج راح ينعلس بسببج

 ما هتميت الها دخلت غرفتي بس تأكدت هيه ورا سالفه المراسله ويا تقي فكرت لازم اكشفها بس شلون لازم اكو دليل عندي حته وارث يصدكني ماعندي غير انتظر اشوفلي فرصه واخذ موبايلها رحت مشطت شعري وجففته حسيت نفسي جوعانه أريد أكل رجعت نزلت للمطبخ شفت استبرق تسوي عشا ساعدتها سئلتها اذا تعرف اخبار عن حسام وتقي

 گالت

استبرق:- ما نعرف ايشي عمو ميسولف شي هنا اصلاً تحسينه عبالك غريب بالبيت حتى مياكل هنا بالبيت ما اعرف وين مخلصها 

رجعت گالتلي 

:- صدك عندج عجز بالقلب 

هزيت راسي الها وأكلت لفه واني واكفه يمها گالت

:- ولج تدرين امير اول ما صحى سئل على منو كولتلها 

:- ميهمني ولا تسولفيلي علي كل أذيتي من ورا كالت

:- اعرف بس هو مخبل كل هذا السوا عمو بي وبعده يسئل عليج خايف عليج من عمو 

ضحكت بأستهزاء 

ندر:- خايف عليه ليش اصلاً هو منو سبب اذيتي استبرق اترجاج لا تسولفيلي عنه ابد عوفينه من هذا الموضوع 

صدك راح تنتقلون البيت جديد سمعت اهلج قبل شويه هيج كالو 

                                            

              

                    

كالت:- اي صح بابا وعمو تعاركو علمود نفس السالفه وعمو يكول لو اني لو بيت ثأئر بالبيت وبابا قرر هو الي يطلع وراح ياخذ حصتة مال الورث من هذا البيت ونشتري بيت جديد 

هزيتلها راسي سولفتلها عن المحادثه الي مراسل تقي كالت 

استبرق :- ماكو غير سهام منو غيرها اله مصلحه يسوي هيج

 رجعت كالت

:- لج بله انتي شريجتج وهيج تصرف وياج من غيرتها 

:- زين اني اختي تصرف وياي مثل الشريجه ليش راح تخبلني ما اعرف شبيها تضوج من عندي وتنقل الامي سوالف اني اصلاً ما مسويتها كولتلها

:- اني اعرف ليش باوعتلي كولتله هيه تحب محمد بس محمد ميحبها فتحت عيونها متفاجئه هزيتلها راسي أكدلها 

:- واشوفه يباوعلج بالختله ونضرته الج مال عاشگ ابتسمت بخجل كالت 

استبرق:- اي ادري بي بس ما ادري بنورس تحبه 

كولتلها 

ندى :- اني شفتهم وسمعت حديثهم باربعين ضرغام

 باوعتلي بزعل

استبرق:- وليش ما كولتيلي 

جاوبتها 

ندى:- شأكول مثلاً غير نورس تموتني اذا عرفت اني كايله عليها 

شفتها ضاجت كلش كولتلها 

:- وانتي شنو هم عاجبج تحبينه كالت :

:- وحتى اذا عاجبني اذا اختي اتحبه شلون اخلي عيني علي واحبه واني اعرف بأختي معلك گلبها بي

 :: سمعت صوت سيارة وارث ونفتح باب الكراج عرفته رجع صعدت بسرعه الغرفتي دخلت الهث كوه اتنفس وگبي يدك سريع رحت باوعت من الشباك من ورا البرده شفته فاتح باب السياره وباقي كاعد بيها يشرب جكاير رفع راسه ليفوك وباوع لشباك وينفخ الدخان حسيته عرف بيه اباوعله رجعت ليوره ما اريده يشوفني رجعت اشوفه احس نفسي مشتاقتله وما حاقده علي لان ضربني كرهت نفسي ليش بعدني احبه بعد كل الضرب ولموت الشفته بأيده بعدني اريده انتبهت لكيت نفسي ابجي دموعي تنزل شفته مركز بالشباك مثل الي يريد يتأكد اكو احد ورا لو يتوهم عفته ورجعت السريري گلبي ينغز بيه رحت فتحت الكنتور اريد اطلع ملابسه تفاجئت مالكيت اي شي باقي بالكنتور من ملابسه وكل اشيائه ماخذهم فرفح گلبي دخلت بنص الكنتور وسديت الباب عليها ما اعرف ليش بس اريد ابجي بصوت وخاف واحد يسمعني خليت اديه على وجهي وكمت ابجي من كل گلبي اريد ارتاح بس احس بعد اريد اعيط بصوت بعدني هيج ونفتح باب الكنتور رفعت عيوني شفته هو وعلى وجه علامة الاستغراب عكد حواجبه وخله ايديه بحزامه ويباوعلي بنضره ما اعرف افسرها أشرلي براسه اطلعي فشلت من الفشله زدت بالبجي وطلعت امسح بعيوني وجهي دار وجه كالي

وارث:- تعالي هنا اعلمج شلون تاخذين العلاج وشوكت 

بس يحجي وياي من دون ميباوع عليه ولا يتقرب من بعيد اشرلي على العلاج وكالي

وارث:- لا تنسينه ضروري هذا وهذا عند الحاجه من تبدي تصير عندج الاعراض اخذي من هاي الحبايه وقبل العلاج أكلي فدشي

 ما جاوبته وهو ما انتظر اصلاً اجاوبه عافني وطلع وشفته دخل الغرفة سهام عصرت ملابسي بأيدي وسديت الباب بقوه ضليت افتر بالغرفه مثل التطلگ اروح وارجع واكل بأضافيري من القهر هاي فرحة سهام اخذت حبايه من علاجي وحاولت انام بس ما اكدر ضليت اتگلب بمكاني الووب الخنگه الي بصدري احس مثل الجبل كاعد على انفاسي 

انتبهت للوقت شفت الساعه بـ 3 بليل واني مثل السمجه المطلعينها من الماي دفنت وجهي بالمخده وكمت اعيط بصوت بس موعالي حسيت اكو حركه ورا الباب بسرعه سويت نفسي نايمه انفتح الباب وخطوات بدت تقترب يمي وتغلغل عطره بخشمي احس گلبي كام يرگص يعني اجه يطمن عليه يعني بعدني اهمه حسيته انحنى عليها ويباوع بوجهي عدل الغطى مالتي شويه وحسيته طلع بس سمعت طبكت الباب فزيت وكعدت عالسرير ولضحكه شكت حلكي واحس گلبي گام يركص من الفرح انتبهت اني عالشنو هلكد فرحانه غميت نفسي بأديه اسولف ويا نفسي شمالج يالتوحه فرحانه على شنو مجرد دخل شافج وطلع مابقه يمج ارجع ابرر اله ميخالف المهم اجه يتطمن عليه يعني بعده يحبني ومهتملي رجعت لفيت نفسي بالحاف والابتسامه على وجهي بسرعه غطيت بالنوم ما فزيت اله لمن سهام كسرت الباب عليه كعدت مثل المخبله مفزوعه 

:- اكعدي لج ام الزلم كافي عياره وتتمرضين براسي 

غميتها من ورا الباب وكمت طلعت نزلت وراها شفت الصاله مليانه اغراض البيت ثائر يردون يحملوهن بالسياره البيتهم الجديد مأجرين لان عرفت امير اليوم يطلع من المستشفى وضعه مستقر ما كدرت ادخل للمطبخ واكفات بي وفاء وبناتها وسهام رحت يم الحجيه كاعده على سريرها وتنعى وتبجي عرفتها على بيت ثائر شلون راح يطلعون وهيه متعوده عليهم كسرت خاطري ترددت ادخل خجلت من عدها اكيد راح يكولون هيه سبب عزالهم وطشرتهم اضطريت ادخل للمطبخ وعساني ما دخلت شافتني وفاء دخلت وهيه استلمتني اكس مربع حجي وفشار وتتهم بيه عالساس اني الي مجرجره أمير ومخليته يحبني جنت ساكته ما ارد مالي حيل مشاكل ولا الي طاقه اعارك شافتني ما ارد زادت بالشتايم باوعتلها وكلتلها 

ندى:- مبينه تربيتج بأبنج ما يحتاج اعتب عليج

اني حجيت هيج وهيه هجمت عليه خلت اديها برگبتي ودفعتني على الحايط طلعت روحي ادفع بيها بكل قوتي ما تبتعد ونورس واستبرق يسحبن بيها ويتوسلن بيها ماكو حسيت راح تطلع روحي عيوني طلعت من حلاة روحي رفعت رجلي ورفستها برجلها عافتني وكعدت بالكاع تصرخ كسرتني ولكم اني فاتحه حلكي اريد اشبع من الهوى عيوني يجرن دموع ما اكدر احجي كوه امشي لازمه الحايط وطلعت للكراج كعدت اسمعها تحجي بس ما اميز شدكول اتجاهلتها محتاره بنفسي صارت عادي كل يوم هيج اموت وارجع من جديد حسيت الهوسه خفت دخلت للمطبخ غسلت وجهي وسويت كوب حليب شربته ودخلو العمال ينقلون بأغراض بيت ثائر اني ختلت يم الحجيه كعدت دك موبايلها جاوبته وارث ما اعرف شنو كالها بس باوعتلي وكالتله 

الحجيه :-اي يمه هسه اسئلها

 سدته من عنده ولتفتت عليه.

:- ندوه شربتي علاجج لو بعدج 

 تذكرت ماشاربته كولتلها

ندى:- لا بعدني 

كالت 

:-بسرعه اصعدي اشربي علاجج ونزلي هنا يمي حتى اني اذكرج بي

 هزيتلها راسي وكمت صعدت شربت علاجي بس لاحظت اكو علاج جديد ماشفته البارحه ويا البقيه وما أشرلي علي وارث كلت جوز نسه يكولي علي واني ما منتبه اله اخذت من عنده حبايه ونزلت ............

الفصل السادس عشر من هنا 

شكرا لزيارتكم عالم روايات سكيرهوم