رواية نعم أحببتك الفصل السابع عشر 17 بقلم انين الليل

ارجو المعذرة وانا تهمني تعليقاتكم على مضمون القصه 

لأن احسها العين والإحساس الي تعرفنه أخطائنا ومحاسنا

فأرجو التفاعل 

_____________________________________

بثينه 

شفت اياد كام على حيله ودخل للحمام وهوساكت ورجع اتمدد عه الجربايه وشرب علاجه ونام 

وانا بقيت كاعده حاسه روحي راح تطلع من الملل واهنا تذكرت الي صار بيه غلبتني دموعي وظليت اشهك 

اتمددت عه الجربايه وطفيت التلفزيون وسمعت صوت اياد عبالك يبجي لان داير وجهه وهو يگلي 

،،طفي الضوة ،،

كمت على حيلي وطفيته ورجعت اتمددت وانا احس باياد ما نايم ولا انا هم نمت ما ادري شبيه جان اكو تضارب 

بافكاري بيني وبين نفسي كلبي يم سعد ومن أتذكره وسوالفه و ضحكاته والگلاده الي لحد هسه 

مانزعتها ودائما اخلي ايدي عليها اخاف توكع چنت احن السعد واريد اروح أعيش ويا

وين ما كان وشلون ما يكون المهم ابقى يمه ما افاركه

بعدين فد شي يضربني ويصحيني يكلي 

= انجبي ولج بثينه انتي تزوجتي وهذا زوجج نايم على الجربايه الي يمج يمكن لو ما متصاوب چان اخذج غصبن 

عنج اشلون تسمحين النفسج تفكرين بشخص غريب وبنفس الوقت اياد يشوفه عدو وهو يگول بس ايلزمه 

يكتله خلاص ويكتلج ويا لا تتهورين كافي بثينه كافي اتذكري ابوج لو امچ لو زين العابدين شگد چان 

مقهور

وصوت ثالث يكلي

= ولج الله يساعدج على الي راح تشوفينه بس خلي يطيب هو سمعج تسبينا وتدعين علي 

=شنو عبالج يفوتها الج اصحي ياغبيه اياد ضابط يعرف شلون ويمته ياخذ حيفه وابد مو من النوع الي 

ممكن يترك حقه نسيتي شنو سووا لمن اجه للديوانيه وسعد حجى ويا سمعتي شلون سكت الرياجيل وما 

اهتم الاكبر واحد

انا من فكرت هيج خفت عبالي راح يكوملي صدك لفيت راسي بالبطانيه وما أدري يمته نمت

الصبح غافيه سمعت الباب يندك فتحت عيوني وما كمت ضليت متمدده عرفت اياد هو الي فتح الباب وحسيت 

جابو الريوك انا اتلصص النظر من جوه البطانيه شفت شايل الصينيه بيد وحده خلاها ع الطبله وما ندهني 

كعد يأكل ابحده تذكرت 

حجيت ويه نفسي = اووو لازم اكعد علمود اداوي جرحه اي مو احنه خدم عد ابن كركر دلوعة امه واجب علينه

بالمستشفى شوربه وعصاير وطبخ ونفخ للخطار ومن طلع خروف وعزيمه وهسه ممرضه شلون بلوه ياربي 

شيخلصني منها 

يعني لو اني من طلعت سدت الباب ما چان صار الي صار

ظليت انفخ كعدت بدون ما أسلم دخلت للحمام غسلت وجهي وطلعت اتقربت يمه عه الطاوله صبيت جاي وحليب 

واخذت نص صمونه واجيت عه الجربايه انا صرت اشرب وأكل الصمونه وهو ياكل ومن كمل راح غسل 

وطلع جكاره وصار يدخن بعدين جر نفس واجه اتمدد على جربايته انا اجيت يمه اتقربت هو يباوعلي بدون ما 

احچي رفعت التيشرت بصراحه رجفت من الخجل لان شفت صدره ولان عمري ما شفت اياد بدون قميص 

او فانيله شلت البلاستر اتعمدت اشيله حييل حسيت اتاذه وبديت اريد اعقم جرحه شفت الجرح شويه بعده بي دم 

كمت اخذت القطنه وبديت أمسح احس بي يتاذه وانا اضغط ع الجرح هو حتى ما گال ااخ 

انتظرت صرت انفخ علمود ينشف مررت ايدي ع الجرح شفت المعقم نشف اباوع الاياد مغمض فتحت 

الكبسولة رشيتها وخليت قطن ورجعت خليت البلاستر فوك الجرح واحنه ساكتين و هو بس عيونه تراقبني وانا 

احس بدكات كلبه من اتقرب علي حسيت وانا أعقم بالجرح برجفه لان اول مره المس جسم إنسان ومو اي إنسان 

واحد اكرهه وما اطيقه كملت شلت المخلفات ورميتهن بالسله ورحت غسلت اديه اندك الباب انا باوعت الأياد

اياد ::منو 

انا هيثم 

:: اي دقيقه يابه جايك باوعلي كمت من الفراش وبسرعه عدلت فراشه ورحت ابتعدت دخل هيثم 

السلام عليكم 

رد اياد :: عليكم السلام والرحمه 

.اشلونك اليوم 

هز راسه ::الحمد لله احسن من امس 

.وين الابره 

اشر بايده ::هذا العلاج على الميز وبي الابره 

طلع هيثم الابره ضربها الاياد راد يطلع اياد كله 

جبت العلاج الي كتبه الطبيب 

هيثم اي س 

اياد خزر وهيثم سكت 

هيثم //هذا العلاج بعد محتاج شي 

:: سلامتك ابقى خلي نشرب كهوه سوى 

.أشكرك سبقتكم من تحتاج اي شي بس اتصل اكون يمكً خلال دقايق 

:: مشكور ما تقصر 

.ولو تدلل صدك اليوم اذا تگدر تعال الشباب مسويلك حفله 

::والله هيثم اتمنى اجي بس مثل ما تشوف تعبان وابد ما اگدر 

..واحنا هم ما نضغط عليك ردناك تغير جو 

:: ما تقصرون سلملي عليهم وبلغهم شكري الجزيل 

..يوصل ان شاءالله من تحتاج اي شي اتصل 

:: ما تقصر تسلم 

..فيمان الله 

:: الله وياك

ظل اياد متمدد على جربايته قريب الساعه 11 الظهر گام بدل و صعر يباوع للمرايه وحاچاني هالمره بهدوء

بزو --ما كملها- :: بثينه انا راح انزل إذا يعجبج تنزلين 

،انا بدون ما اباوعله = لا ما اريد مالي خلك

،:: لعد انا راح انزل وادزلج غده 

انا بنفس برودي = ماكو داعي ما أشتهي

ما رد عليه طلع وضرب الباب وراه صارت الساعه بالوحده الظهر اندك الباب خليت الشال على شعري وفتحت الباب 

شفت عامل الفندق بيده صينيه وهو يگلي 

مدام الغدا 

اخذتها منه خليتها على الطاوله شفتها بيها اكل انا عاندت نفسي رغم اني شگد جوعانه بس ما أكلت 

طلعت من الفريز عصير جامد وكمت اكل واحس العصير ينزل نار بمعدتي

غلبتني دموعي وانا اكل بالعصير المجمد واحجي ويه نفسي 

= انا قبل تلث تيام وين جنت جنت بحضن امي ومحنة ابوي ومحبة اخوي وعشك سعد 

واهم شي ابيت اهلي اهلي الي يمكن ضيعتهم برعانيتي وعدم تدبيري 

هسه صرت يم واحد والله ما اعرف شكول علي سجان لو ضحيه لو مجرم

خنكتني عبرتي ونمت على وجهي وانا كاعده بالكاع بس اديه سانده وجهي عه الجربايه وانا ابجي

واتكلم بصوت مسموع = ليش هيج صار بيه قابل أول وحده انا انخطب والله اشتاقيت البيتنا وال امي

واخواني اشتاقيت الابوي واشتاقيتلك ،،،،استحيت ما كملتها،،،،،ظليت ابجي لمن ما صوتي راح 

حسيت الباب انفتح عرفته اياد ما تحركت هو راح كعد على الكرسي وصار يدخن 

ما اجه يمي رغم يسمعني وانا ابجي اجه أخذ علاجه وشربه واتمدد بملابسه ونام وانا هم اتمددت عه الجربايه ونمت 

كعدت على ايد تخزني باوعت شفته اياد

اياد بهدوء ::كومي اسبحي وبدلي علمود نطلع نغير جو واذا حابه تشترين شي يعجبج اهنا اكو اشياء حلوة هواي 

اناباوعتله وبنتر درت وجهي للجهه الثانيه كتله = ما اريد اطلع ما الي خلك 

جاوبني واعرف بي عصبي ::من واحد يحجي وياج دوري وجهج وانتي تحجين وردي باسلوب عدل لا اعلمج 

رديت علي وكتله = انت سالتني وانا جاوبت 

اياد بنتر ::العتب مو عليج على هذا الحمار الي يسال وحده مثلج 

طلع اياد بدون ما يسمع ردي وهو يتنفس بقوة انا دخلت للحمام سبحت ولبست برمودا قصير نص ردن موجود 

بملابسي ومشطت ورحت للثلاجه لكيته جايب فواكه اخذت تفاحه وموزه واكلتهن

وفتحت التلفزيون هو ما اتاخر تقريبا ساعه ورجع شفت بايده جنطه زغيرة مال سفر ما حجى اندك الباب كال 

،كومي صيري على صفحه وإداري هسه انتي ما تگليلي شلابسه

بدون ما احچي اخذت العبايه الاسلاميه ورحت خليت كرسي يم الثلاجه وخليت شالي على شعري وكعدت فتح

ايادالباب اجه هيثم وانطا الابره واياد كله 

::تعبناك ويانه ابو احمد 

:يمعود شسويتلك بالخدمه اني 

::تسلم والله 

:شسويلك ردناك تجي انت والمدام نعزمكم ما قبلت الشباب سوولك حفله اعتذرت 

::هيثم مو وكتها الجرح كلش ماذيني 

:الله يساعدك ان شالله شده وزالت 

:: الحمد لله والشكر 

ياالله انا اسمحلي 

:: الله وياك وشكرا جزيلا 

بالخدمه مع السلامه

راح هيثم واياد طبك الباب ورجع كعد ع الجربايه وصار يدخن 

اتقربت يمه وكتله = اتمدد خلي اغيرلك الضماد 

هو باوعلي ونزع قميصه انا ما باوعت بوجهه مديت ايدي وشلعت البلاستر وخليت المعقم وانتظرت وانا ادري باياد

 يباوعلي بقيت انفخ حتى المعقم يجف اشوف اياد يحك بايده يم الجرح يحركها 

على شكل دائره گلي :: الجرح جاي يحكني 

جاوبته بدون ما اباوعله = معناتها يريد يطيب 

فتحت الكبسول وخليتها وجبت القطن تلامست ادينا انا بعدت ايدي وصرت اضمد بالجرح لكن حسيت بجسم ايااد نار

 من كملت رحت اخذت الضماد القديم وشمرته بالسله وغسلت ايدي واخذتله بطل ماي وكتله 

= اخذ علاجك لان يمكن صخنت 

هو اخذ العلاج وانا صرت اباوع للتلفزيون واياد يكلب بالتلفون 

شفته يتصل

:: هلا حمودي شلونك 

انا الحمد لله زين الجرح ما ياذيني انتم شلونكم 

سمعت اياد يكول :: هاي يمته خو ما بي شي ياالله انا هسه راح اتصل 

عرفت هذا محمد اخو بس شنو كله

اتصل اياد وانا اراقبه ::الو السلام عليكم شلونك زيوني 

طفر كلبي من مكانه ورحت يمه 

:: الحمد لله اشلونك وشلون عمي 

اياد عكف حواجبه ::وهسه اشلونه 

انا هنا ما ادري شنو صار اتقربت من اياد واعت بي من كتفه 

بعدين صرت مقابيله وأسأله = شنو صاير 

باوعلي حط ايده عه السماعه وجاوبني بنتر ::كل شي ما صاير 

= لا اكيد اهلي بيهم شي اياد شكو 

خزرني بعيونه يعني اسكتي انا ابد = اياد كلي شنو صاير،،،،،،،،،،

انطاني التلفون 

::هاج احجي ويه زين العابدين

انا اخذت التلقون وارجف = ألو زيوني شلونك الله عليك شنو صاير 

زين جاوبني بعدم اهتمام // كل شي ماصاير 

=دا اگولك الله عليك 

.. ابويه البارحه تخربط وأخذنا للمستشفى 

،انابصوت عالي ممزوج بالدموع =شنو بابا وهسه هسه شبي ابوي حاجيني زيوني 

،زين/ اكلج والله ما بي شي ظغطه ارتفع والحمد لله اخذنا للمستشفى وانطو علاج وصار زين 

صرت ابجي واكله =زيوني الله يخليك خلي احجي ويه ابوي الله يخليك

زين //انا هسه بالمخازن وابوي بالبيت بس ارجع اخلي هو يحاجيج

بقيت ابجي واياد أخذ التلفون باوعتله 

اياد::ها زيوني محتاج شي 

الله يسلمك انت هم سلم ودير بالك

سد اياد النقال انا باوعتله وحجيت بخوف وعصبيه 

= اياد اتصل اريد اسمع صوت بابا 

رفع حاجيه 

،رجعت كتله بتوسل = اياد اذا ممكن اريد اسمع صوته البابا 

اتصل اريد احجى ويا الله يخليك 

،اشوف اياد يباوعلي وينفخ اتصل ::الو ها عمي اشلونك اشلون صرت طمني عنك 

:: اي حجي محمد اخوي كلي 

،::اني زين الحمد لله بس قلقلت عليك 

::اكلك هاي بتك خبلتني أخذ حاجيها

قبل لا ينطيني النقال اتدنى علي وهمس باذني

،اياد وهو صاك على اسنانه ::الي يشوف دموعج ما يكول قبل يومين

ردتي تنهزمين ويه واحد سكط وتعوفينه البابا

(باستهزاء كلمة بابا)مصخم وجهه فوك من العالم

أخذت التلفون وانا الم بحلكي واتنفس بقوه ابدي ارتكب جريمه بحق هذا الحقير حچيت ويه ابوي = الو بابا 

بابا حسيت بي زعلان /،الو 

ما اتحملت اختنگت بعبرتي وانا اگله = حبيبي باباتي شلونك 

,بابا /لا تبجين ما بيه شي شويه ارتفع ضغطي والطبيب كلي كل شي مابيك 

صرت اشهك من البجي = بابا حبيبي يعني هسه انت زين 

ابوي //اي كل شي ما بيه والله لا يظل بالج انطيني رجلج 

دفعت التلفون الاياد وانا اخزره 

اياد :ها عمي صدك انت زين يحتاج اجي 

،صار يضحك ويحجي ::ان شالله ما بيك شي يرادلك مره تجدد بيها شبابك

-انابكلبي = خو ابوك ياخذ على امك القوه الغاشمه مو جاي علىامي المسكينه 

اياد = والله الصدك عمي خالتي ام زين ما منها اثنين

انا متونس هواي حجي لا تفكر بينا انت دير بالك على نفسك 

رديت بگلبي = اي متونس ابن كريمه 

يالله سلم --انا = الله لا يسلم بيك ولا عظم 

،،،،،،لاتوصي حريص بعيوني 

اناادعي علي واگول = كون عمن عيونك 

(طبعا الرد جان بكلبي بس مو بيدي ودي اعدمه الاياد )

من سد اياد الخط ويه ابويه راح يدخن وفتح الشباك 

بقيت افكر كلت = إجت والله جابها هسه الح علي اخلي يرجعني البغداد وهناك إله اخلي يطلكني وج بثينه هاي

 =فرصتج لا تضيعيها هسه هو بالبدايه ايعيط ويستهزأ بس انتي اثبتي وابچي اي بثينه اياد رغم عصبيته ما 

يتحمل دموعج 

=يا ما يتحمل نسيت قبل يومين شسوى 

=كافي بثينه هذا ابوج من وره غبائج راد يصير بي شي المهم خليني ارجع ويصير خير اله ابچيك على زمانك

وصلت يمه وانا اشوفه يدخن وصافن كتله باصرار = اياد هسه ترجعني البغداد اريد اشوف بابا

اياد بدون اهتمام وحتى ما باوعلي ::خاف تجذبين مو توج حجيتي ويا

،انا اضرب بالكاع برجلي = ما اكلك اريد اروح اشوف ابويه

:: اكلج صوتج لا تعيطين وفوتي من يمي واتكفي شري 

= والله اياد اذا ما تاخذني اشوف ابويه انزل جوه للفندق وأظل كاعده وما اصعد إلا بالسيارة الي توديني البغداد

اياد اقترب مني وعيونه بيهن غضب ولزمني من شعري حيل وبعصبيه 

::شوفي ولج مو انتي الي توكفين وتتشرطين عليه وتعلين صوتج وتهددين بيه لا تنسين نفسج وياي  

انا كمت ابجي واناشغ وانا اكول = ما،ما اريد اروح اشوف ابوي وهدني لا تملش بشعري 

،اياد هداني وسحب نفس ::أستغفر الله هاي شلون بيها هسه اكوم أكفر بيها

،انا بقيت ابجي هو جاوبني ::،وج بابا مو حجيتي ويا وسمعتي صوته ما بي شي 

صرت احجي ويةاياد باستعطاف --

= الله يخليك اخاف بي شي وضامينه عليه اريد اشوفه عفيه الله يخليك اني من حجيت ويا ما عجبني صوته

  وحتى ماما ما حاجتني اكيد اكو شي ضامينه عليه وما يردوني اعرفه 

::كل شي ما ضاميين وعمي ما بي شي 

=وانا اريد ارجع اشوفه اريد اطمن انت شنو عليك كل ساع تخابر امك وابوك واخوانك وانا اهنا عبالك اسيره 

باوعلي واتحسر وظل ينفخ ويهز برجله ويگول ::صبر جميل وباالله المستعان هسه هاي شسويلها وتطيب 

بقيت ابجي واباوعله اخذ التلفون وخابر

= الو هيثم شوف طيارة بغداد بيش الساعه واحجزالنه

باوعلي ::كومي خاتونه لمي الملابس بالجنطه 

انا كمت طفرت اجمع الملابس واخليهن بالجنطه وحضرت فستاني الي

اجيت بي ولأن تماضر من كثر ما مرتبكه مخليتلي تراكين وبنطلون جينز وقميص وملابس داخليه اياد شافني 

طلعت البنطلون والقميص كلي بنتر :: شنو ذني 

بوعتله = البسهن غير 

كلي باستهزاء وامر ::اكلج هذن من جنتي عد بابا تلبسيهن عدي لا الوضع يختلف طلعيلج شي مستور تلبسينه 

انا ويه روحي -= ان شاء الله أرجع الحضن بابا وانت ترجع الحضن أمك وتشوفلك وحده تشبهه تزوجها الك 

وحتى جهالك يطلعون يشبهون امك يادلوعة امك 

رن تلفونه هو رد 

::ها هيثم 

اياد يسمع ويباوعلي ::يعني ماكو حجز اله باچر بالعشره الصبح 

::زين يابه احجزلنه بيها 

بليلتها ما اعرف شلون خلصت وما اعرف شلون نمت او لا لان الليل كله وانا افكر شسوي 

الصبح گعدت وشربت جاي اكلت نص صمونه الساعه بثمانيه اجه هيثم وصلنه للمطار وسلم 

اياد گلي :: امشي 

 وانا ما جاوبته بس چنت اتوعده بنظراتي و بكلبي اگله = اصبر انا الك اله اخليك تتندم ع الساعه الي اخذتني بيها 

مو بثينه الي تنضرب وتنهان وتسكت 

واسمعه خابر محمد كله

::جايين 

::لا تكلي شعجب سمعت بعمي واگع وهاي سوتلي مناحه تريد تجي تطمن علي 

:: جيب السياره وتعال للمطار

وره ما سدا من محمد اياد خابر ابوي ::الو هلا عمي هاي بتك خبلتني (ويباوعلي )اتگلي اكيد ابوي بي شي وما تردون

 تگلولي واله ترجعني اشوفه الابوي واطمن لو ماكو لا اكل ولا اشرب ياالله عمي جايين غدانه يمكم

تدرون من صعدنا للطياره وانا ابدي أسبق الطيارة ()بصراحه 

مو علمود اشوف بابا لا انا اهنا انانيه بس علمود أفتك من هذا البلوة)

گعدنا بالطياره وانا احس باياد يباوعلي لان انا دايره وجهي ع الشباك جريت نفس وانا انزل من سلم الطياره 

وصلنه الظهر اتلكانه محمدسلم علينه واتباوس ويه اياد وهو يكله 

هلا بالعريس صاير تخبل طايحلك العرس 

وباوعلي وكال /:اشلونج بثينه الف الف مبروك شدو حيلكم اريد واحد يصيحلي عمو 

انا رديت بگلبي = اي ليش لا ان شاء الله وره ما امك تزوجه وحده تشبهها اكيد راح يخلفون واحد يشبه الضفدع

كامل ذاك الوكت عود خلي يسميك عمو 

محمد انطى اياد مسدسه كله// هاك يمعود فكني منه 

احذه اياد وشافه وبعدين خلا بصفحته 

محمد باوع الاياد وكال /: عمي حسين من سمع جايين دز علينه انا وابوي ويوسف 

وعمي عباس كال أنريد لمه مثل كبل من زمان ما ملتمين

.اياد بصوت ناصي ::وامي

........محمد/:ماقبلت تجي ياخي انت ما تعرفها تزعل بحدها

وترضى ابحدها ومن كلنالها امشي ويانه كالت ما اجي اله اياد بايدي 

ويطلع العروسه من بيت ابوها البيتي

اباوع الاياد ضاج كلش حجيت ويه نفسي 

( اصطبر دقائق لاتضوج دقايق بس وتكون بحضن ماما ليش مستعجل )

وانا اكول = هم زين متجمعين علمود أحرجه ويضغطون علي ويطلكني 

اياد يسأل بمحمد على صحة ابوي ومحمد ايطمنه ويكله ما بي شي دار عليه اياد وگلي 

::مو گتلج ما بي شي بس شسوي لعنادج 

محمد //حقها ايودي ابوها وبثينه ما متعوده تبعد عنه بس ها منا ورايح لازم تتعودين 

انا ما جاوبتهم بقيت ساكته وصلنه البيتنا تلكاني بهاء فتحلي الباب دخلت من باب المطبخ

وشفت امي وخالتي حتى ما باوستهن انا اصيح = وين بابا وين بابا 

الكل عبالهم خايفه على ابويه لان سمعت بي مريض شفت ابوي حاصرته البجيه وفاتح أدي يريد يحظني 

اناشمرت الشال حضنته الابوي وشفت اياد دخل هو ومحمد انا ما انطيت مجال الاياد يسلم صرت احجي بصوت 

عالي وابجي = دخيلك يأبه جيب السچين واذبحني ولا تخليني ويه هذا الوحش 

= فدوة اروحلك ابوس رجلك اضربني كطعني بسنونك زوجني الحمال العامل بالبلديه 

بس فكني من هذا لو ما كو خلي طلقه برأسي وخليني ارتاح 

=بابا (وصرت اشهك ) انا راح اموت وتشيل خطيتي طوول عمرك اذا ابقى ويه ابن اخووك هسه اگلك خلصني منه

طبعا الكل بذهول وكفت وحسيت ابوي وهو حاضني كلبه ظل يدك وادينه يرجفن كلت خلي استغل وجود عمي عباس 

ويوسف اخو الاياد يم ابوي 

اياد كام ينتفض ويكلي ::وج تخبلتي انتي شتحجين

باوعت على عمي عباس رحت يمه وحظنته وانا احجي 

=عموساعدني الله يخليك من يوم الي أخذني ساجني ما شفت باب الغرفه لايجيبلي اكل موتني من الجوع ومن افك 

حلكي ويا يشبعني كتل لو تشوفونه الجسمي كله چدم زرك يوسف الله يخليك احچي ويه اخوك خلي ايطلگني 

اياد بذهول وخجل وابتسامه باهته ::انتي شتحجين وج انتي الي ما تاكلين مو انا ما اجيبلج اكل وكل ساع اسألج 

شنو تشتهين وتگليلي ما اريد اكل

انا باوعتله بتحدي = اي طبعا ما اكل كاضيهن علي لفات فلافل وانت تاكلهن الله عليك شفتني اكل لو طلعتني 

المكان اصلا انا هاي شكم يوم عايشه ع البسكت والماي

عمي عباس// وك اياد ليش هيج ويه البنيه شوفها شويه وتتخبل 

يوسف //شنو اياد موعيب هاي التصرفات 

امي /يمه بتي وجهه عبالك نوميه هي هاي المرجله خاله ما ترجيتها منك كتلك زغيرة وما تفتهم هي هاي الامانه

 الي كلت اصونها لا يظل بالكم

انا من شفتهم هيج تشجعت وصرت ابجي واكللهم = هو كل ساع يطلع رجولته علي اي ليش الجذب حرام بس شنو من

مرجله مره يملش شعري و يضربني ومره يغلط علي أشكال ويسبني ومن احچي يستهزأ بيه 

وبعدين حجيت بصوت عالي وتهكم ما يخلو من الاستهزاء وانا اهز بايدي 

( ترة وداعتكم هاي رجولته بس ضرب واله اي رجوله ماكو بالموضوع )

ا تخصرت وكلت = خلو يطلكني لو عنده ذرة رجوله 

وباوعتله وضحكت باستهزاء ويا ريتني ما سويتها ما حچى شي بقى مدنك باوعلي وصار يتنفس واتقرب عليه 

واهنا اويلي طلع الوحش من الغابه وهو عاض على شفته وابتسامه باهته 

لزمني من شعري حييل وطلع المسدس وخلا على جهة راسي وصاح بعلو صوته 

:: الي يلحكها اكومه واكومها بهذا المسدس 

عباس //لك انت شجاي تسوي 

يوسف //عوفها اياد لا تتهور 

::شسمعتوا الي يتقرب اهنا اموته واسويها مجزره (عاط بصوت عالي )

هاي مرتي افتهمتوا محد يتقرب عليها 

الفصل الثامن عشر من هنا 

شكرا لزيارتكم عالم روايات سكيرهوم