رواية جسر الذكريات الفصل الثامن عشر بقلم مريم الحيالي
مريم: عززززة ولجن شلون وگع صدك تحجون
هاجر تبجي وجاوبتني مرتبكة... مادري مادري ولج بس سمعنه عيطة خالة ايمان ورحنة نركض لگينا الولد مصلوخة صفحتة كلها
مريم: صخام كوون ولجن بس لا الحرگ قوي
هديل: قوي صاعد على كليتة
مريم: الوضع كله اتوتر والسبعة مال امي سويناها وخلصنة بس بالنا يم يوسف حبيبي بعدة عمرة ٤ سنوات صغير
..... للعصر الخطار كله راح اجة ابراهيم سألنا
إبراهيم: منتهي الحرگ مالتة قوي حولوا القسم الحروق شافة الدكتور ايكول كون ايعدي مرحلة التسمم ... شلون وكع بس كولولي شكم وحدة انتن اهنا فهموني طفل مكدرتوله
هديل: ولك ملتهين والله وهو يلعب شودا للمطبخ مادري الجهال كلها اهنا بس هو رايح للمطبخ عبالك منيتة اخذته
إبراهيم: مادري عمو سرمد خطية اتخبل وزينة حالتها حالة ان شاء الله مابي شي شنكول بعد
هاجر: متسمع كلام كلتلها زينة لتجين جهالج انتي وين اتبقيهم مقبلت كالت لا اجي وحتى عمو سرمد
كلها لتروحين هوسة وباردة الجهال مرضى
مريم: هاجر بشرفج وكت لوم هسه الطفل ياالله ليروح ايصير بي شي .... المشكلة صح هاجر كلتلها لتجين خالاتي اهنا كلهن منحتاج شي بس هي زينة كالت لا اجي اخبز واسوي كبة هي نادرة ومرادت اتعوفنة بس احنة علمود جهالها وسبحان الله وكعت بابنها
... هسة بس كولولي الطفل شلون وكع فهموني مو يمكم هوو
هاجر.........
كاعدين كلنة بالهول ويوسف يمي اوكل بي داريگة واباوع على خليل يلعب اخاف عليه يوكع من الشباك عيني عليه ... مريم وزينة راحوا ايجيبون غفران وسلمى بنات زينة لأن بنتها سلمى مصخنة فد مرة
...اوكل بيوسف وبالي يم خليل كولساع يصعد ايباوع من الشباك واصيح عليه ... خليل انزل لتصعد لتروح توكع
هاجر: ياربي راح يوكع ولك خليييييييل انزل لتصعد بعد ... انداريت دانطي لگمة اليوسف داكله هاك يووو ..وماسمع غير العيطة ويوسف مو يمي شوكت كام مادري لأن بالي يم خليل خفت ليوكع
يمممممممممممة راح الطفل راح
كمت اركض رحت للممر وكفت يم باب الغرفة اني وهديل وعمتي غصون .... وابراهيم جان بالحمام ايمشط بشعره حتى يلبس الشماغ
بالمطبخ خالتي بيداء ومرت عمي نضال ... واكفين انباوع على خالة ايمان شلون دنكت طلعت طفل من الجدر واحنة مصدومين عالمنظر الي دنشوفة جدر فاصولياء جبير يسمط سمط
بسرعة مرت عمي نزعتة ملابسه وصلخت اللحم مالته .. احنة انخبصنة من ورة صياح هديل عبالها اساور لأن احنة مدنعرف منو الطفل جامدين بمكانة
عاد اني كتلها ولج اسكتييييي مو اساور اسكتي ... عرفت هو لأن ماكو جهال غيرهم همه وبنات هديل
هاجر: من شفته منزعتة ملابسة اتخبلت ... كمت اصيح يممممة يوسف يممممة هديل هذا يوسف
ابراهيييم يوسف ابراااهيم يوسف احترك احترك
كامت مرت عمي من الصدمة والرعبة بعز البرد هو ومصلخ اخذي وخلي جوة بوري السنك ... غسلت جسمة كله
راحت هديل تركض جابت جرجف لفينا بي ولگفة ابراهيم ونزل يركض بي
بهالاثناء اجتي خالتي كريمة اتعيط بحيث صارت هوسة كلشي مفتهمنة ويوسف ابراهيم اخذة ونزل
مريم: اي هو من نزلنة من التكسي شفنا يركض وكلها الزينة بسرعة تعالي وراحت تركض ويا ... يمة شنو هالمصيبة ياربي
..... الوضع اتأزم مرت عمي خطية تبجي وانقهرت حست بالمسؤلية بس هو قضاء وقدر يعني شي راد ايصير ومن الصدمة مدنعرف ليش راح للمطبخ اصلا وهو جان كاعد ودتريك بي هاجر
مرت السبعة وخلصت للعصر كلمن راح البيتة بس احنة بحالة قلق ... وكولساع انخابر لو على زينة لو على عمو سرمد ايكولون عالجوه وسوو جسمة بس الحرك قوي ولازم يبقى بالمستشفى
اهنا هديل قررت تجي يمنة اتعيش هي وزوجها وجهالها... لأن احنه جنة صغار وصعب نبقى وحدنا
مرت الايام وكاعدين بالهول صافنين جنه انصلي ونقرأ قرأن انسوي ختمة الأمي ... بس بعدنا هوسه لأن ناس رايحة جاية علينه
هاجر: شفتي من صافي نزل امي للکبر
مريم: اي
هاجر: فاتح الجفن مالتها جوة وبايسها .. ايكول من بستها نزلت دموع من عينها
مريم: اي لأن ماتت بحسرة شوفتة شكد رادت بس اتشوفه ... بس هذا حظنا وهذا قدرنا شيسوي ورغم هذا خسر وظيفتة هم لأن طالع بدون اذن من الامر مالتة
هاجر: احسن طبها مرض الوظيفة ماكو هيج شخص حقير ايكلك امي مريضة دتموت ...وايريد اجازة ومينطي
مريم: هاجر تحجي واني ابجي صعب اتقبل امي ماكو بعد وبس احنة الشقة فارغة تاكل بينه شبسرعة هيج امي راحت ... وصارت ذكرى ... ويوسف حبيبي على حالة يومية انخابرة
.... خلي اخابر زينة ...
زينة: الووو هلو مريم
مريم: هلو حبي شلونج بشري شلونة يويو اليوم
زينة: لا الحمدلله زين هسه اكل وجنت انظف مكانة حتى الحايط امسحه بالتعقيم والديتول الدكتور كال اهم شي ميتلوث الحرك
.... فتنة زينة اتلكتنا تبجي حاظنيها ونبجي مابيدنا شي عليها امي مصارلها شهر ميتة انوب ننفجع بهالطفل ... حظنت هاجر واتكلها
زينة: راح هاجر راح الطفل الشلتي بانفاسة وداريتي راح ابني هاجر راح ... يمة قلبي شيطفي نارة ولك يوسف امي شلون بيه والله داريتة حتى الحايط امسحه اكول حتى ليتسمم الحرك مالته والله اللبس جفوف يلا اوكله
مريم: حرفياً الموقف مو مال سوالف زينة متهسترة منتهية اتسولف بدون وعي وصوتها رايح مطبك من العياط ... تقهر حتى الصخر نبجي انباوع عليها ونبجي على حالها وحرگة گلبها
.... بقينة للعصر يمها اني وهاجر ورجعنة وطول ايام الفاتحة احنة يومية انروحلها معفناها ابد ... خلصت الفاتحة وكلمن رجع الحياتة احنه انكسرنة بأمنا وسندنا .. وزينة انكسرت واحترك گلبها بابنها الي لا عالبال ولا عالخاطر بس هذا حكم رب العالمين ومنكدر نعترض عليه
...مرت الايام وهديل اجتي استقرت يمنة جابت غراضها وكاعدين ... بس كل الهوسة ونلتهي مرات بس من نكعد وحدنا منتحمل فراك امي ابد .. بس ادخل للغرفة وابقى وحدي ابجي لا ارادياً من اتخيل هاهية امي ماكو بعد
.... اليوم الأربعين مال امي معزمنة بس رحنة للمقبرة ... وجبنة جرك وزلابية ووزعنا.. بيبي اووف يابيبي معافتنا ابد كل اسبوع والثاني هي يمنه تجي محملة بالمسواك سودة علية بالگوة تصعد الدرج
وتكعد تبجي واتنوح على امي وخالي حسن وخالي حسين
مريم: اهنا احنة اتأذينة هواية امي جانت شايله همنا وحملنا وكلشي ايخصنا مجنه انحس بشي نرجع نلگة كلشي جاهز وكامل ... بس ورى وفاتها حييييييل حسينة بالفرق وكوة دنمشي حياتنا عبالك امي صارلها عمر ميتة مو بس شهر ونص... اهنا اتخذنا قرار اني وهاجر بالغرفة بليل كاعدين وقررنا بأن.......
مريم: هاجر
هاجر: هاااا ... صافنة اباوع عليج كلت وراج شي احجي بلا
مريم: التقاعد يرادلة فترة يلا يتحول بأسمنا وعمر يادوب ايلحك البناته واحنه ايجار ومصطفى اخوج خسر وظيفتة .. لازم نشتغل
هاجر: هاي شبيج شنشتغل ... مو كلتي اترجعين اتداومين هالسنة يا شغل هذا
مريم: عوفي الدوام هو حظنا من الاول مصخم صار سنتين عكست ويانا كلش ... الحمدلله على كل حال بس لازم نعتمد على نفسنا منا وهيج
هاجر: مادري بس خليها ببالج محد راح يقبل وخصوصاً من ماتت امي بعد خوالج من سابع المستحيلات ايقبلون
مريم: الله كريم هسه باجر نحجي ويه اخوتج وانكول الهديل وانشوف
هاجر: وشنشتغل ؟
مريم: نور كلتلي فتحوا مول جديد بشارع الخيزران ورايدين موظفين ... بس مكالت التفاصيل خلي انروح ونفتهم
هاجر: مادري والله بس محد راح يقبل
مريم: الله كريم.... التفكير بكلشي موتني تعبانة نفسياً موت امي گلب حياتنا للأسوء وهاجر هم اكثر مني وهديل شالت حملنا وجتي هي ورجلها عافوا بيتهم وسكنوا ويانة ممرتاحين وشايلين هم الدنيا فوك راسنا
...... كعدنا الصبح اتريگنا ونظفنا وفتحنا الموضوع وية هديل ومكالت شي كالت روحوا شوفوا المول وشنو طلباتهم واني احجي ويه الولد ... اتفقنا وية جوارينا نور وامها العصر انروح وانشوف
هاجر: خلي انكول للولد مريم شلون خاف ميقبلون
مريم: امشي هاجر خلي انروح ونستفسر والله كريم بعدين عود نحجي وياهم
هاجر: ولا اتخافين ابد
مريم: شكو مسوين جريمة دمشي عاد ... بدلنة ونزلنة على نور ورحنة مشي الماكسي مول بالخيزران قريب على بيتنا وصلنا جان ازدحام لأن افتتاحية وجديد والدنيا مگلوبة فتنا نفتر حرنة شلون نستفسر ونسأل
نور: هااا شو صفنتن امشن سألن شلون التقديم
هاجر: وين نسأل متشوفين الدنيا مگلوبة راح اتورطونه ورطة انتي ومريم دشوفن
مريم: شبيج يمعودة امشوا يمكن هاي موظفة خلي نسألها
....مرحبا
الموظفة: هلووو اتفضلوا
هاجر: بس كالو اتريدون موظفات اهنا شلون نسأل نستفسر
مريم: اباوع عليها لابسة قميص ابيض قصير وفوكا قمصلة جلد سودة وبنطرون لزك ولابسة باج والشعر مفلول عبالك حفلة .... من سألتها هاجر كامت اتباوع علينا من فوك اليجوة
هاجر: شو صفنتي عيني وين نسأل ؟
الموظفة: حبيبتي يم الكاشير بس هي ازدحام والمدير ماكو مموجود بس منو اتريد تتوظف يعني المن
مريم: النا اني واختي... شو هاي معجبها شلون منا احنة الدنيا طالعة من عينا وهاي تتگلب
موظفة: بس اهنا عندهم نظام ولازم سيڤي اتقدمون واهم شي اهم شي اللبس والقيافة يعني ما اتوقع ايقبلوكم
مريم: هي كالت هيج لو ردت اموتها هاجر كوة لازمة نفسها اني ردت انزل عليها الا شوية احنة جنة لابسات اسود على امي مبدلات بناطير وقمصان بس بدون مكياج يعني مبين علينا الحزن
نور: ليش يمة جايات يشتغلن لو ايعرضن ازياء وبعدين هذا كلام المدير والنظام لو كلامج عيني... امشن مبين عليها متعرف شي
مريم: عفناها مجاوبناها صعدنا للطابق الفوك بس صدك قهرتنا هيج الدنيا تمشي عالمظهر واحنه ارقى اللبس نلبس بس غير هسه حزنانين ولابسين اسود .... التافها
هاجر: امشي خلي انشوف بلكت اهنا احد يعرف
مريم: فوتوا بلا خلي اسأل هذا الولد.. ازدحام ماكو محط رجل... رحت شفت ولد ديبيع وهم لابس قميص ابيض وبنطرون وباج الموظفين كلهم نفس الزي
.... السلام عليكم
امير: عليكم السلام اتفضلي
مريم: بس خالين اعلان بحاجة الى موظفين وين اقدم ؟
امير: اي صح نزلي يم الكاشير خلي ينطوج ورقة بيها معلومات وامليها وقدميها مثل السيڤي
مريم: جوة ازدحام وملتهين ماكو احد وسألنا موظفة وكالت ايريدون لبس وماعرف شنو من هالامور
امير: معليج ماكو هيج شي تعالي امشي اروح وياج اني
مريم: راح اتعبك اشكرك ... صحت على هاجر ونور ونزلنا وية الولد
هاجر: شنو منو هذا وين رايح
مريم: كتلة اريد اقدم وسولفتلة على هاي ام القيافة وكال معليج راح ايجيبلنه اوراق التقديم
هاجر: هو هم موظف يمكن لابس نفس الزي
مريم: اييي ... اجة الولد جايب بس ورقة وحدة وانطانياها
امير : اتفضلي هاي بيها معلومات امليها وجيبيها باجر.. هسه اتريدين براحتج بس الافضل بالبيت سويها هسه هوسة والمدير مموجود باجر تعالي حتى اتشوفي
مريم: شكراً الك تعبتك بس اريد بعد وحدة اختي هم اتريد اتقدم ويايه... راح جاب وحدة لخ الهاجر اخذناها واتشكرنا من عندة وطلعنا
نور: املوهن زين ولتغلطون بشي بلكت يقبلوكم ... وهاي المايعة معليجن بيها مبينة لوكية
هاجر: ختولي الا شوية جان كتلتها شايفة نفسها لا خلقة ولا اخلاق
مريم: جيبي خلي انظمهن بالجنطة بين منكول الاخوانج يلا انطلعهن ... وصلنا للبيت وسولفنا الهديل وكالت بليل اكول للولد واشوف شيكولون
هاجر: كومي الله اليستر منج ومن افكارج ومن روحتنا هاي
مريم: هاجر لاحظتي نفسج شكد نگيتي لو لا
هاجر: ابقي هيج ابقي عاندي
مريم: اجوي الولد بليل وهديل فتحت الموضوع وياهم وصارت مشكله الها اول ما الها تالي وناس اتجر طول وناس اتجر عرض ... ورفضوا ومقبلوا
هاجر: هاا شكتلج يلا حلووو هيج صوتنا وصل السابع جار مو كتلج ميقبلون
مريم: شلون بلا فهميييييني شلوون همه رفضوا بدون ميفكرون ميكولون ذني منو الهن ومنو يصرف عليهن انضل احنه تحت رحمة فلان وعلان الى متى فهميني
هاجر: هاي حياتنا مريم ماكو شي جديد عليج اصبري وانشوف وين تاليها ... كافي مشاكل كافي
مريم: عفتها واتمددت عالجرباية غطيت وجهي ودموعي اطلقت سراحها تنزل متوكف ابجي خنكة بصدري موتتني ليش هيج صار بينا ليش امي ماتت
استغفرالله لا اعتراض على حكم رب العالمين بس والله احس نفسي ضايعة مداكدر اتقبل الامر
هاجر: مريم تعالي اتعشي كومي
مريم: ماريد ... طفي الضوة ويااج وسدي الباب.. تعبانة وشبعانة قهر ماكو داعي للأكل ... نمت من بعد صراع والم وتفكير مينتهي كعدت الصبح ... عالريوك هديل كالت
هديل: وين الاوراق كتبوا بيها المعلومات وقدموهن اذا خابرو عليكم وقبلوكم بوقتها هم احجي وياهم بلكت ايقبلون
هاجر: هديل كافي شفتي المشكلة الصارت البارحة لأن رحنة وهمه ميدرون عوفن هاي السالفة بعدين عود هسه ماكو غير شغلة
مريم: اي مو على اساس الشغل مطشر بالشوارع شو لا شهادات ولا شي بس لا متأملة تتعينين مستقبلاً
ست هاجر
هاجر: لا اتعين ولا شي بس الحمدلله بعدنا مكدينة بالشارع ولا متنا جوع ماكو داعي انتي مصرة عالشغل شكو مو كلتي راح اترجعين للمدرسة
مريم: ومنو كلج ميته جوع ليش الاعتماد عالنفس صار شي مو زين وبعدين شلون ارجع مفكرتي منين المصاريف مال المدرسة والتقاعد مال ابوية اقل السنة يلا يكمل ويطلع لو هو بس حجي وهاهية
.... عفتها وكمت للغرفة للعصر طلعت الورقة ومليت كل المعلومات كتلها اتريدين تمليها امليها مقبلت ...ثاني يوم رحت وديتها مفتت سلمتها للسكيورتي الي بالباب جان اسمة محمد فهمتة وانطيته السيڤي ورجعت
هاجر: صدك تحجين مريم اتخبلتي مصطفى شراح ايسكتة
مريم: معليج بس اسكتي وهي تدبر... قفلت مادري شبية كلت لازم اعتمد على نفسي بعد امي وماكو منو النا ... والله وصدك ٣ ايام واكعد الصبح على اتصال من رقم غريب
.....الوووو
مريم: الووو منوو؟
...... مرحبا انتي مقدمة على ماكسي مول علمود وظيفة مريم مووو؟
مريم: اي صح مريم قبل فترة اجيت وقدمت
..... اوك عيني اذا اتكدرين العصر تعالي علمود المقابلة
مريم: ماشي عيني ان شاء الله اجي اشكرك ... سديتة وبقيت صافنة والله وصارت صدك بس شراح ايقنع صافي وابراهيم شلون بلا بهاي السالفة
هاجر: شكووو شبيج
مريم: خابرو من المول كالوا تعالي العصر علمود المقابلة
هاجر: جذب شبسرعة هيج خابروا
مريم: شمدريني مو كتلج قدمي كومي كتبي معلوماتج حتى العصر اخذها الهم بلكت هم ايقبلوج
.... كلت الهديل وهم رجعت كالت للولد وعياط وصياح الحد ما بالشافعات يلا قبلوا بس كالو متبقن لليل اترجعن من وقت ... يابة ميخالف بس دخلي ايقبلونا
مريم: رحت العصر وقابلت المدير والصدمة يطلع المدير تركي ... ويمة مترجم هو الي ينقل الكلام واتفقنا وكال راح اخليج على قسم الاكسسوار لان محتاجين موظفة واكو شفتين الدوام صباحي ومسائي ... كتلة اريد الصباحي يبدي من ساعة 9 الصبح وينتهي لل6 العصر حتى الولد ميحجون
قبل كال تمام ..
...... رجعت للبيت وسولفتلهم والولد ممقتنعين بس بالكوة بعد شيسوون والله وبلشت من ثاني يوم ... والولد امير هو وامة موظفين وهواااي ساعدوني وعلموني على شغلهم ... وجان ممنوع الموبايل وكامرات بكل الاقسام وممنوع نكعد نتحاسب بس واكفين ونفتر .. ووقت غدة وريوك وعشة بس 25 دقيقة الي يتأخر خصم من راتبة هيج جان نظامهم
نظام تركي
هاجر: شو مخابروني لو حاجية وية الكاشير
مريم: غييير انتي ضليتي تتعيقلين براسي كتلج قدمي ... اخخخخخخخ رجلي يمة موتتني ولج من ورى الوكفة
هاجر: وقبلوا متلبسين زي عادي
مريم: اي قبل حجيت للمترجم وكلة امها متوفية مصارلها هواي وكله عادي بس خلي اتسوي باج حتى تنعرف موظفة
هاجر : اي زين بلكت يطلعون حبابين وهاي ام القيافة هم شفتيها
مريم: شفتها المايعة جان اتكلي هاي شنو اشتغلتي قبلووووج ... كلتلها اي عيني قبلوني وعفتها ورحت
هاجر: ختولي يمعودة
مريم: لا شعليه بيها هي بالطابق الارضي مو نفس القسم الي اني بي ... مر اسبوعين اني اداوم ومرتين حجيت وياهم علمود هاجر وجان ايكلي خلي تجي والله وصدك اجتي وقبلوها وخلوها على قسم النسائية بنفس قسمي گبالي هاجر ... بس ممنوع انسولف بالبوكة لأن كامرات وايشوفونة نظامهم متعب وصعب حييل
.... وبلشنا شغل اني وهاجر وكمنة انساعد بمصرف البيت اني وياها ننطي كل شهر مبلغ الهديل ... والحمدلله استمرينا بالشغل صح تعب بس اتعودنا وبمرور الايام كمنة نشتغل فول تايم من ال9الصبح لل11 بليل خلينة خط ايودينة وايجيبنة وهو بيتنا قريب بس علمود بليل منرجع وحدنا واتعلمنا ويه الموظفين والموظفات علاقتنا حلووة بس شنو كلشي ممفتهمين ولا طالعين الكرايب لو رايحين لأن منلحك وعدنا يوم واحد اوف بالاسبوع ويادوب نشبع نوم بي من التعب ... وتصفيط البضاعات وهاي الاشياء .... تعبنا هوااي تعبنا البنات الي بعمرنا شابعات دلال وراحة واحنة من ماتت امي اتبهذلنا حييل اعتمدنا على روحنا بعمر اصغير وحتى خوالي رافضين ومن عرفوا بينا مقبلوا وخصوصاً خالي جاسم كال اني ادزلهن مصرف كل شهر ... بس الولد حجوا ويا وكالوله بعلمنا وشغل حلوو ومحترم يلا سكت
.....بعد مرور سنة
مريم:اليوم السنة مال يوسف حبيبي الله يرحمة ... قبل اسبوعين جانت السنة مال امي وهم سوينة اكل ووزعنة ورحنة للمقبرة وبيبي نزعتنا الاسود كالت لتبقن بي هواية بعد .. ونزعنا واحنة بالدوام هم المدير ديلح علينا علمود الزي
.... من البارحة هاجر وهديل وشهد واية بنات عمتي راحوا يم زينة اني مرحت بقيت يم الولد لأن ماكدر اغيب بس هاجر عندها اوف اني بعد الاوف مالتي مو هسه... اليوم اخذت شفت واحد بس مو فول تايم طلعت ب6 وصلني غسان ابو الخط ونزلت صعدت فوك بعدني ممبدلة كاعدة عالتخم فتحت نت واجتني الاشعارات دك رسائل
.... وينج مريم الوووو
.... مريم اذا متجين والنبي ازعل
..... ولجججج عوووبة ليش ما اجيتي وية البنات
مريم: شكو متكولولي شبيكم انطوني صبر ... قريت الرسائل ومجاوبت فتت عالفيس والگة شهد منزلة منشور مسويته اشارة وياية ووية زينة وهاجر واية وهديل كاتبة بي ...
شهد: مريم والله اذا متجين ازعل عليج وانطيج حظر من كل البرامج بسرعة كومي اجري تكسي وتعالي بسرعة يلا بدون نقاش
مريم: اتخيلوا كاتبة هذا الحجي عالعام ومنشور والتعليقات صارت بفلس .. خابرت على زينة وكالت الله عليج تعالي وكلنا ملمومين ومن هالحجي ... كلت عيب بعد كلها دتكول تعالي خابرت على مسؤل القسم مالتي كتله اريد الاوف مالتي باجر قبل مكال شي
.... رجعت اتصلت على غسان ابو الخط مالتي كتلة تاخذني للدورة البيت عمي ... لأن دنيا ليل وشته مو مال تكسي وحدي كلي عادي هسه ربع ساعة واجيج
مريم: اجاني غسان وخابرت على ابراهيم كتلة رايحة البيت عمو سرمد اني يم البنات ...وصلت البيت عمي واستقبلتني الشلة الكريمة
شهد: والله متستحين الا نزلت بيج منشور يلا اجيتي
اية: تتعيقل عبالك مديرة شركة كل ما كلنالها وكالت ماكدر
زينة: ولجن كافي غير اجتي بعد ... معليج بيهن حبي
مريم: ادبسزيات ادري بيهن هو هذا البطران والمرتاح... ضحكنة لأن ادري بيهن يتشاقن
هاجر: شلون باجر اتغيبين لو كلتيله الاحمد
مريم: اي خابرت احمد وكتلة خلي الاوف مالتي باجر وقبل
هاجر: اي زيين احسن حتى ميغيبوج
مريم: ثاني يوم اجوي عمامي واهل زينة وولد عمها اثنين وامهم وياهم كاعدين بالمدينة(الثورة)
..... سوينة غدة وصبينة ابن عمها خالد اعرفة ضايفتة بالفيس مجرد صديق يعني ولأن عرف بس مملتقية بي مشايفته هاي اول مرة فسلمت عليه وهو مجامل سبورتي يعني كملوا غدة وكمت اني والبنات نغسل مواعين ... اوكفي خلي اروح للحمام اغسل ايدي من الزفر وارجعلكم
زينة: تعالي لكفتج ولج وين جنتي ادور عليج
مريم: شكو ياستار وين بالمطبخ غير كاربتنه حضرة جنابج اكول كتلتي نفسج حتى اجي اثاري علمود المواعين
زينة: هههههههههههههههه لا ولج والله بس مشايفتج صارلي هوااي وتعالي عندي بشارة الج
مريم: يا ستار كووولي بشارة شنو؟
زينة: خطبوج
مريم: منو خطبوها
زينة: انتي ياحظي مرت عمي هسه حجت وياية ووية ايمان مرت عمج نضال كلتلها متنطونة بنتكم
مريم: كولولها لا مننطي بتنه ما اتزوج بالمدينة اني زينة سدي الموضوع ومو ببالي الزواج اصلاً
زينة: مادري بعد ايمان كلتلهم احجي ويه عمها وايصير خير
مريم: ان شاء الله... مسألتها المن خطبتني وبوقتها ماريد اعرف اصلاً رجعت للبنات للمطبخ ... واكفة عالسنك جان تجي مرت عمي كدام الكل كلتلي
خالة ايمان: خطبتج مرت عم زينة شتكولين والولد موظف وصغير
مريم: خالة عود صدك تحجين مكلتلج وين كاعدين همه ... وبعدين اني ممفكرة بالزواج حالياً
خالة ايمان: بكيفج اني العلية كتلج وهم فكري
مريم: هزيت براسي والبنات كلهم صافنين عليه لأن شي ممتوقع ومنو الخطبني... كمت ودزيت رسالة الخالد كتبتلة
.... امك خطبتني
خالد: هاي شنو هاي
مريم: هههههه والله اظاهر بدون علمك
خالد: لا والله هسه جاي اسمع منج هي حجت وياج
مريم: لا زينة اجتي كلتلي وامك حاجية وية مرت عمي هم
خالد: ايصير خير ان شاء الله هسه احجي وياها
مريم: مجاوبتة بعد بقينة بالمطبخ انسولف ونشرب جاي جان تجينة زينة مبتسمة... يا ستار منج اليوم
زينة: ولج خالد اجة الامة بالغرفة كلها يمة سامع خاطبة مرة وهاي المرة اني رايدها وأحبها عاد خطبتيها الي لو المن
مريم: هي حجت هيج واني في حالة صدمة وهاجر وشهد واية كلهم على فد كلمة شنووووووو
.... زينة شبيج شاربة شي ايحب منو ايريد منو شيخربط ابن عمج
زينة: وروح يوسف هسه اجة وكلها وامة كلتله هاهية يمة شكو بيها الابنية عجبتني اتوكل اذا اهلها ينطوها نخطبها
مريم: عززززززة شلون هيج ايكول واني اليوم يلا شفته يا حب هذا عيب هذا الحجي زينة مخاف على سمعتي هو كدام امة شلون هيج ايكول
زينة: كولي ياالله يمعودة وشكو بيها خطبج هوو والله خالد حباب مريم وموظف وايدللج ابن عمي وادري بي
هاجر: زينة اصبري خلي نفتهم شو سويتوها صدك وبعدين بعيدين علينا ومنعرف عنهم شي مو هيج بسرعة ...وغلط شلون هيج يحجي كدام امة مو عيب هسه شتكول على مريم عبالها عندها علاقة ويا
زينة: لا والله بالعكس شبيج .... هسه دسدوا الموضوع علما ايروحون ونحجي
مريم: حيييل ضجت الموقف صعب ومو حلوو ابد .. للعصر رجعنا وسولفنا الهديل وكالت ادري كلتلي خالة ايمان وشكو بيها اذا زين وخوش ولد ... شوو لليل وخابر عمو نضال على هديل وكلها خطبوا مريم
.... اني صافنة عود هذا صدك يحجي سواها هيج حقيقة وبسرعة خابروا عمي وكلوله شنو السالفة
مريم: حجيت ويا وعاتبتة وكتلة ليش هيج سويت وشلون تخطي هيج خطوة بدون متعرف رأيي كلي
خالد: مريم اني رايدج وانتي عاجبتني وخطبتج على سنة الله ورسولة وين المشكلة
مريم:سكتت مجاوبتة ... ثاني يوم عمي لؤي هم خابر بس عمي مقابل وعارض كال يختلفون علينا وعلى تقاليدنا ومتتوالم مريم وياهم ... بس سبحان الله من شي ايريد ايصير ايسكت الكل بحيث خلال اسبوع اتحددت قراية الفاتحة ببيت عمو نضال واجوي سدوا الشارع جايبين كومة عالم وكطعنة مهر سيد وصارت الخطوبة ..... 4 اشهر واتزوجنة
هاجر: بقيت اشتغل وحدي ورى زواج مريم متركت الشغل ... سنة ونص وهم رجع نفس الشخص خطبني الي من 2009 هو حاجي بيه ورايدني وشكد دورولة على مرة ومتصير واني شكد خطبوني وحجوا بيه وهم متصير ... اهنا كلنة خلي يجون حتى نتشاوف لأن اني من جنت صغيرة شايفته
..... حددنة يوم وجان يجي سامر وخالة نداء... اي لتتفاجئون خالة نداء الي جانت صديقة امي وسامر ابنها وابن عمو عدنان الله يرحمة الي جان خطيب امي سابقاً
هاجر: اجوي ببيتنا على غدة لأن همه كرايب وشفته السامر وشافني ... رغم جنت هم ماريد اتزوج وبعدني ممقررة بس قسمة وسبحان الله ... هم تمت الخطوبة وسويت حفلة ببيت عيال هديل صارت لأن شقتنا صغيرة ... والحمدلله مطولت بين مكملت جهاز واتزوجنا.... صرت مرت سامر
بعد مرور سنوااااات
10/10/2023
مريم: هااا هاجر شنو طلعتو لو بعدكم
هاجر: لا وين بعدني خلي يجي سامر ونتغدة ويجيبني ...وين انتي
مريم: بعدني بالبيت بدلت للجهال بس اخلي مكياج وابدل ... ب٤ اطلع لأن الكيكة ب٥ توصل
هاجر: اوك ماعندي شي بس ابدل للبنات وشهد راح تجي ويايه بس اية تتأخر تطلع من الدوام مناك وتجينة للمطعم
مريم: ديلا ماشي لتتأخرون ...وهديل خابرتها متكدر تجي لأن بناتها ضهري ولل5 يلا يجون اتكول ما الحك
هاجر: اي هم كلتلي ديلا روحي خلي اكمل
مريم: سديتة من هاجر وكمت خليت مكياج وبدلت ... اليوم عيد ميلادي وحبيت اسوي واجمع خواتي وبنات عمتي لأن صارلي فترة مشايفتهم اني ماطلع على احد ابد بس اخواني اروحلهم حتى البنات ماروحلهن مرات لأن خالد ميقبل بس اشوفهم كل فترة ننجمع بمطعم ونلتقي
..... حبيت هالسنة اسوي عيد ميلادي خابرت هاجر وبنات عمتي الي اكثر من خواتنة وابد علاقتنا مخربت الحمدلله عزمتهم وعزمت هديل هم بس مكدرت تجي ... سويت عيد ميلادي بمطعم شهريار
هاي كيكة عيد ميلادي ..
وصلت اني وجهالي للمطعم ... بعدهم البنات جانوا مجايين بقيت كاعدة اتفرج على العرس الي مسوي بحديقة المطعم شلون حلووو ... واسرح بذكرياتي للماضي
خابرتني هاجر كالت وين انتي كلتلها بنفس المكان الي كعدنة بي بعيد ميلاد بنتج ... اجتي هي وشهد كمت بوستهم وشهد حظنتني لأن مشتاقتلها كوومة مشايفتها صار هواي
هاجر: جبيرة هاي الطاولة هو منو بس احنة خلي انغيرها
مريم: هااا مو الجهال شلون خاف متكفي
شهد:اي صح جبيرة
مريم: كلت نكعد برة عالنافورة احلى
هاجر: ورى العشه نطلع الاجواء بليل حلوووة
مريم: كمنة غيرنا الطاولة اخذنة وحدة اصغر .. سوالف وضحك وصورنا سنابات ونزلنا عشه على ذوق كل واحد الحمدلله والشكر على النعمة الاحنا بيها
..... كوموا خلي ادفع الحساب ونكعد برى احلى خلي نتفرج عالعرس باعوا الاغنية شلون اتحمس لو بيدي هسه بنصهم وكلة ردح ردح
شهد: هههههههههههه خرب يومج ... بس صدك الاجواء اتخبل
هاجر: شوفي ابنج راح يمهم ويركص
مريم: خليهم يتونسون يمعودة... دفعت الحساب وطلعنة كعدنا بالطابق الفوك وانباوع عالعرس والعرسان شلون ايركصون ايخبلون وكومة صورنا
مريم: شغلوا اغنية راغب علامة اتحدى العالم .. وديركصون سلووا واني وشهد اندمجنا انغني وانصور ستوريات وهاجر واية صافنات علينا
هاجر: خررب ولج مريم راح ايطردونا والعباس لتصوريهم ميقبلون
مريم: هسه امة محمد كلها دتصور بقت عليه شبيييج
شهد: صوري حياتي معليج ...
ههههههههههههههههههههههههه .... شبييييييجن متكولولي
هاجر: والله بيجن شمرة منا الا اخليجن اتودعن العالم مو تتحدنا
شهد: هههههههههههههه
مريم: كاعدة دانشر بالسناب وشهد كلتلي
شهد: كومي مريم شوية
مريم: شكووو وين ؟
شهد: دكومي اريدج بشغلة شبيج
مريم: الله اليستر امشينا يلا ... كمت وياها
هاجر: ها وين رايحات بس لا للعرس اموتج والعباس
شهد: شوف هاي يا عرس هسه نجي ... امشي حياتي
مريم: نزلنا جوة اني وشهد .. شكو ولج وين رايحين
شهد: بعيد ميلاد هاجر جنه دنشيل واللتهينة ومسويتلها كلشي حتى هدية مجبتلها وهي زعلت مني بوقتها ... هسه تعالي خلي انسويلها كريب ونكتب عليه اسمها وشمعة
مريم: اممممممممم حلووووو خوش فكرة والله يلا تعالي ... دخلنا للمطعم وطلبنا كريب وكلناله للولد شيكتب عليها كال وين كاعدين كلناله بالطابق الفوك
رجعنا ورى شوية جابوا وهاجر اتفاجئت وفرحت بنفس الوقت
...... كاعدة صافنة اباوع وين جنه ووين صرنا عشنا باتعس الظروف والأمور بس رغم هذا وكفنا على حيلنا وكدرنا نتخطى صح مو بسهولة بس الحمدلله اتعلمنا من كلشي شفنا بحياتنا ... اني اتزوجت خالد الي لا عالبال ولا عالخاطر قسمتي ويا رغم جنت رافضة رفض تام ماروح للعزيمة بس شاء القدر بأن اروح حتى ام خالد تخطبني ... والحمدلله صار عندي طيبة وعراق وسند ... وهااااا نسيت اكللكم متركت حلمي حلم الدراسة الي الظروف جانت ضدي وعكست وياية ومكدرت اكمل مدرسة قدمت ثالث خارجي العام والحمدلله نجحت من اول دور ... وهسه داخلة معهد دادرس سادس ادبي لأن شملني قرار الوزير الي هو عدم الانتظار وان شاء الله انجح بمعدل مقبول ادعولي
..... هاجر الحمدلله اتزوجت سامر الي خطبها اكثر من مرة وحجوا بيها من امي جانت عايشة وسبحان الله متصير الحد ما رب العالمين كاتب الوقت المحدد الي اجه وخطبها رغم فارق العمر الي بينهم .. والحمدلله اتزوجت وحياتها مستقرة وهسه صار عندها ليان وريناد ... بس مرجعت للدراسة اتكول مالي واهس ماريدها
..... وهديل صار عندها علي ورى بناتها تقى واساور ... والحمدلله ورى متزوجت هاجر رجعت البيتها بالزعفرانية واستقرت مقصرت... ولا رجلها قصر الرجال الي وكف ويانة ونعم النسيب والابن بقى ويانة ووفة بأمانته الي امنته عليها امي ..
....واخواني صافي وابراهيم ... بالسيدية بعدهم كاعدين وحدهم صافي اخوية خطب وكطع مهر حتى محكمة وبقى الزواجهم فترة قصيرة بس شاء القدر بأن ميتم ويفسخ الخطوبة وهو رجع اتعين بالدفاع وصار جندي نفس شغلتة القديمة ... وابراهيم اخوية خلفة مال صبغ وميقبل يتزوج الا يتعين لأن هو خريج صناعة قسم ميكانيك
....وشهد دخلت كلية ادارة واقتصاد سنتين ورقنت قيد وعافتها القسم جان صعب ومتوفقت بي وهسه الحمدلله دتدرس غير كلية قسم علم نفس ان شاء الله يارب مابقى شي التخرجها متقبل تتزوج الا تتخرج ... اية اتزوجت ابن عمها والحمدلله صار عندها يزن وكملت كلية هندسة وهسه موظفة بوزارة العدل
الحمدلله هاي حياتنا وهاي احنة كلمن اسس حياة النفسة اسسناها من تعبنا وسعينا والامنا وصبرنا ... مخذلنا تربية امي وابوية لحد الان الجوارين من ايشوفونا ايكولون الف رحمة ونور على روح امكم وابوكم الطاهرين الحمدلله تركوا اثر طيب بقلوب الكل
....وان شاء الله كنا خفيفين عليكم .. ويارب كدرت اوصل قصتنا بالصورة الصحيحة وشكراً الكل شخص اتفاعل ويانه وقراها ...
..وخالتي كريمة هم انصابت بالمرض الخطير الي هو سرطان الثدي سودة علية اخذت كيمياوي سنة ونص واتوفت خالتي الحنونة ام قلب الطيب الي هي ومريضة وتمشي على عوجية واتروح الکبر امي تكعد تبجي وتشكي يمها اتكلها مريضة من بعدج خية ام.. الوكفات الزينة الي بحملي وبوالادتي معافتني ابد تجيني للمستشفى اتبوس بأيدي ابجي بالبنج اكلها اريد امي اتكلي سكتي حبيبتي اني امج ... الله يرحمها يارب
..... وبيبي الحنونة سهامة الطيبة ام كريم ام الهلا والمرحبا الي البيت جان منور بيها وبكعدتها ام الشيلة الحلوة الريحتها اتخبل مستحيل تجي وحدة بنظافتها اتمرضت وكبرت بالعمر وهم ماتت بيبيتي الحنونة... الحمدلله على كل حال ربي يرحمهم ويرحم اموات امه محمد
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
