رواية نعم أحببتك الفصل الواحد والعشرون 21 بقلم انين الليل

اياد 

وصلنه البغداد وتلكونه اهلي فرحانيين بس امي لازم تكون الها بصمه ويه بثينه لان امي مو بس تكره بثينه لا 

هي من البدايه ما قابله اخطبها لان هي تكول اريد وحده من بنات اخواتي لو من بنات اخواني تدير بالها عليه 

وتلم كبرتي مو محمد عشك بت عباس واخذها وانت تاخذ بت حسين انا اريدلك وحده من كرايبي والشهاده ال الله 

رغد بت عمي ما مقصره من جانب ابوي لو من جانب امي وگدامي امي تسمعها كلام بس هي لان تحب محمد 

تعبر وهذا الشي خلانه كلنه نحب رغد ونحترمها

وانا اعرف بامي تكرهه البثينه لان هاي ما ترد السانها والكلمه تردها عليها عشره فامي ابد ما ترتاح البثينه 

وادري بثينه هم ما تحب امي 

واشتغلت الحرب البارده بين امي وبثينه خصوصا من خطبتها وهي ما قبلت فصارت امي كل ما نروح البيت عمي

 تجي ويانه وتسمع بثينه كلمه كلمتين وهاي هم ترد وامي دووم تاخذ ردها على انو سبب رئيسي ما تقبل ابثينه 

تصيرلي زوجه لان دووم تگول السانها طويل او وكحه

ورغم كل الي صار وشكم مره حچيت وياها او ويه عمي ويه منال وزوجها وهي قافله ما تريدني لكن انا ما قطعت 

الامل ويمكن الصدفه هي الي خلت زواجي من بثينه يكون امر واقع والكل قابل ومحد يحچي

من رجعنا البغداد بتنا ابيت اهلي ثاني يوم الصبح رحت البيت عمي حسين وقبلها خابرت عمي وكتله يدز على 

منال ومظفر وصلنه انا بقيت بالديوان يم مظفر واجه عليه عمي وزين العابدين و راح عمي يم بثينه وانا كلت 

الزين :: بلا زحمه عليك رايد عمي وخالتي

زين راح صاح الهم اجومظفر من شافهم اجو ما بقى راح طلع للحديقه انا كتله 

::مظفر وين رايح شنو انت غريب 

مظفر /:مي خالف اياد انا بالحديقه وانت اخذ راحتك

باوعلي عمي وكلي //ها بابا ايادشلونك شخبارك شلون بثينه 

اياد ::الحمد لله عمي نعمه بخير 

عمي //عساكم بالخير المهم راضي على بثينه 

:: اي عمي راضي بثينه ما منها حبابه ومطيعه وتسمع الكلام 

احس بخالتي فرحت // الحمد لله والشكر 

::اطمني خاله بثينه حبابه والي صار منها قلة فهم وطيش

خاله //شنريد غير تكونون مرتاحيين من يمنه نفرح الكم 

  :: الله يخليج 

 • خير يمه ايودي انت مو غريب ومنال وهبه أخواتك ليش بقيت بالديوان 

جريت نفس قوي :: مي خالف على مود بثينه تشوف اخواتها وتسولف وياهن 

خالتي /:ها ايودي ليش دزيت علينا

::كل خير بس انا قدمت استقالتي 

خالتي بتعجب //يا يمه ليش شعجب

عمي //تحجي صدوك انت 

جريت نفس وكتلهم ::اي والله تعبان من اتصوبت احس مو مثل قبل بيه حيل كلت اقدم استقالتي وارتاح 

عمي //انت ادرى بنفسك بس الوظيفه ضمان 

::صحيح عمي وهم انت تدري بشغلي شگد متعب وانا مو مثل قبل 

   عمي // وشناوي تشتغل

قبل ما اجاوب عمتي گالت //. حسين الشغل ظال. احسن مو ذاك اليوم اتصوب لوما لطف رب العالمين يمكن اسم الله الرحمن 

عمي //. اي بابا شقررت تشتغل 

جاوبته ::الحقيقه عمي انا عندي شكم فلس وعندي صديقي فاتح مشروع بلبنان وراح اشاركه واريد اخذ بثينه ونسافر 

يعني راح اشتغل انا وياه وهم نغير جو وترتاح نفسيتنا واكيد بثينه تروح وياي لان انا مسويلها مفاجئه وهناك اخليها تقدم اوراقها وتكمل انا كلت اخلي عدكم علم

عمي //بابا اياد هي مرتك واكيد انت تحافظ عليها والمرة تتبع رجلها وين ما يروح وهي صح غلطت انت تعرف 

بيها فد وحده (سكت وباوعلي وكلي ). واحنه دللناها ازيد من اللازم اوات......... 

  قاطعته :: عمي شتحچي بثينه زوجتي وگتلكم غلطه وراحت بوكتها لا تفكرون بيها وهاي بتكم روحو اسالوها 

وهيه اتكللكم شلون مداريها واحبها رغم الهسه زعلان عليها بس تبقى زوجتي

عمي //اعرف اياد وادري بيك گلبك چبير وانا مأمنها عندك هي عرضك وكرامتك ما يحتاج اوصيك 

 :: وانا ما استغني عنها صحيح غلطت لكن اعرف بيها ما متقصده وعلى كلامك مدللينها وانا هسه أحاول 

انسى وهي هم ما مقصره وياي گايمه بواجبي على اكمل وجه

خالتي //. وليش السفر اهنا وافتح مشروعك 

عمي //. صحيح اياد او خلي اكلك ضم فلوسك واخذ محل الاطارات الي ...

هزيت راسي :: لا عمي احب ابدي ابحدي واعتمد على نفسي وهم اريد اغير جو 

خالتي بحسره//ويمته مقررين تسافرون 

::والله خاله هسه الطياره بعد اربع ساعات موعدها 

احس بخالتي ضاجت //يعني صار خمس تشهر ،ما شايفيها تجيبها بس ساعه اياد يمه مو كافي عقاب زغيرة 

وغلطت وربك يسامح وانت فاهم وجبيروالي يحب يسامح

جاوبتها ::عمه شتحجين ياعقاب ما بيناتنا شي اسئلوها شنو جاهل اني ما افتهم شي راح وانتهى بوكته

خالتي //بس يمه ما شفناها ووين !،،،عمي قاطعها 

 • • وفيقه هاي شبيج الولد يكول عدا شغل هذا الي جاي يسوي كله الهم والجهالهم ادعيلهم الله يوفقهم 

انا باوعت المرت عمي الي گوه لازمه نفسها وما تبچي :: وداعتج وداعة بثينه بس اتمم شغلي اجيبها 

على ما تشبعين منها وعد وهسه لا تكلولها راح نسافر خليها الها مفاجئه

خالتي //الله عليك اياد الخاطري انا تدري بيه شكد احبك ومعتبرتك ابني دير بالك عليها 

::بعيوني خاله 

رحنا للصاله بقينا نسولف وبثينه ويه اخواتها وامها صبو الغدا وكلنه كعدنا هي كعدت بصفي وصرنا ناكل بعدين 

شربنا جاي وانا وكفت كتلها ::ياالله هم ياالله نروح 

وشفت خالتي الدمعه بعينها وحاجت بتها //روحي يمه الله وياج وديري بالج على رجلج

من شفت خالتي بجت هي ومنال ومنى الصراحه انقهرت عليهن خليت بثينه تصعد بالسياره وانا رجعت 

على عمتي اتقربت منها وبستها براسها ::عمه وداعتج ما اكدر افارك بثينه رغم خبالاتها لو اكدر افاركها اخليها 

اهنا بس تعودت عليها صدكي باقرب فرصه نرجع وتضوجين من عدنا 

خالتي باستني بخدي وگالت /:المهم عمه هي مرتك قابل ما اعرفك لو ما اعرف اخلاقك ديربالك عليها تبقى بت عمك 

وعلى گولتك تحبها وتتحمل اخبالاتها

جاوبتها :: عمه احبها البتچ ورغم غلطتها الي ما تغتفر غفرتها الها وما خليت امي تعرف واخذتها ورحت للبصره حتى 

ما تسمع لو كلمه من امي وهسه اريد اسافر حتى ارتاح وانسى واذا تبقيين تبچيين صدگي ما راح ارتاح واعتبر نفسي 

ظالم 

خالتي ابنسمت //لا يمه ها اها ما راح ابچي صدگني ايودي هسه امنت على بتي وراح انام مرتاحه

بستها براسها :: ادعيلنه الله يوفقنا 

الله يوفقكم ويسعدكم ويحفظك الها

💟💙💟💜💙💟💜💟💟💙💟💜💙💟💜

بثينه 

من وصلت الاهلي وره فراق خمس تشهر انا ما مصدكهشفت ابوي وامي ومنال ومنى وبهاء وهمه 

فرحانيين بوجودي رغم احس بابوي بعده زعلان عليه لكن من عرفو من اياد انو هو راضي عني وسعيد وياي 

الكل فرح وحتى ابوي اجه وصار يسالني عن احوالي

بعدين اياد دز على امي وابوي واجو اهلي وياهم اياد واتغدينا وشربنا جاي 

اشوف امي حچت ويه منال وهي ضايجه الصدك انا خفت بس لان ما حاچني بشي انا سكتت وبينت الهم انا مرتاحه 

وسعيده وبعد الغدا بنص ساعه اياد گلي :: ياالله نمشي

انا هم بسرعه گمت ورحت اسلم على امي واشوف الدمعه بعيونها هي ومنال ومنى 

وتوصياتهن الي ادير بالي على رجلي واسمع كلامه انا متعجبه شنو قابل مسافره اشو بيت عمي خطوتين

زيوني كلي رايح وياكم حسيت اياد ما راح يرجعني الاهله فرحت

 وانا أمني النفس أبيت أجار او ملك حتى لو غرفه وحده المهم ما 

اشوف امه بالرايحه والراده وتسممني بنظراتها وحجيها كافي علي 

خبالات ابنها الي ما تنبلع والي خلاني اخاف من خيالي

مشت السيارة واياد وزين يسولفون انا حجيت ويه زين 

= تدري زيوني مشتاقه التماضر وخالتي رجاء شكد ليش ما دزيتوا عليها 

زين / خابرناهن خالتي وتماضر بالزياره وكالن بس يرجعن يجنه للبيت وهنه هم مشتاقاتلج خو تماضر 

كل ما تجي بس تبجي عليج وتصعد الغرفتج وترتبها ان شاء الله تشوفيهن باقرب فرصه 

= ان شاالله

اياد :: زيوني شد حيلك نريد نفرح بيك 

•. بعده وكت على گولت امي الحك على شلعان الگلب 

اياد ضحك :: لا عمتي ما الها حق تحچي هالشكل ماك شلعان كلب اذا واحد مقتنع بالثاني (دار عليهه ويحجي باستهزاء )

:: مو صحيح بت عمي 

باوعتله وما جاوبت بقو يسولفون ع الشغل وع السيارات لان زين توه مشتري سياره حديده 

 وانا ما اشتركت وياهم احجي ويه نفسي = لا لو أبقى أبيت عمي احسن واتحمل عمه كريمه ولا ابقى ويه هذا 

المكروه خمس تشهر ما شايفه الشارع بالبصرة زين ما صار بيه كساح وهسه حضرة جنابه قدم استقالته وراح يشتغل 

حر يبووي يعني يجوزيروح شويه ويكظيها يمي وأبيت ابحدنا ياربي صبرني هذا شيطلع بيه من عوقد 

، ياالله المهم اشوف اهلي يجون ويمرون واعرف أخبار سع،، ما كملت اسمه

(نا شحجي ويه هذا المتوحش لازم ما أفكر حتى بالأحلام غبيه ومتسرعه )

التفتت خفت خاف سمعني اباوع للطريق وانا مستغربه 

بس دقيقه هذا الطريق اعرفه اي هذا طريق المطار وين يريد بيه اياد هالمره 

= تره ما صارت صرنا عبالك ابن بطوطه يوميه بمكان 

= شضاملي من مصيبه دخيلك ياربي

ضليت أراقب الطريق واياد يباوعلي بالمرايه 

وصلنه المطارسئلت زين واحرك بايدي = زين احنه وين رايحين 

،،،!،،،،زين يبتسم /بثينه حبيبتي اسئلي زوجج انا وصلتكم وراح اخذ السياره وارجع لان حضرة ابن عمي 

شغلني سايق عنده 

:: افه زيوني مو باچر اتعبلك بعرسك لعد منو يزفك 

 ضحكو واياد انطاني جنطه وكلي كدام زين ::اريد اخذج شهر عسل حبيبتي تستاهلين ياروحي

حسيت بكلامه بي نوع من الاستهزاء انطى مفتاح السيارة الاخوي وسلم وكله:: من توصل خابرني 

زين //وانت اياد بس توصلون طمنونا وما اوصيك دير بالك على بثينه

اياد ::صار اول ما نوصل اخابركم وبعدين اغلق الشريحه خير شر ما اريد احد يزعجنا بشهر عسلنه 

زين العابدين وهو يضحك /:تستاهلون بس لا يصير بيكم سكر من كثر العسل

ضحكو اثنينهم وانا ميته قهر اجه يمي زين وكلي // ياالله بثينه مع السلامه 

انا حضنت زيوني وبسته وهو باسني برأسي ما تحملت وكعن دموعي 

  زين //. هاي شبيج بابا كبرتي صرتي مره متزوجه مو من ادنى شي توكع دموعج 

بعدين راح الاياد وكله /: اياد دير بالك على هاي ام دميعه 

اياد بابتسامه ::لا توصيني بيها وصيها الها تدير بالها عليه وان شالله دموعها بعد ما تنزل

اتسالمو وراح واحنا رحنا كعدنا بالانتظار وانا ما فاهمه شي وأخاف اسئله وين رايحين 

يصير عليه عصبي لان مبين ضاملي فد شي صارت الساعه بالاربعه ونص كلي ::ياالله نمشي

مشى قبلي وهو بيده الجنط وانا ورا وطلع جوازي وخلا بايده والتذكرة بوسط الجواز إلى ان وصلنه للضابط انطاني 

جوازي الضابط بس شافه سلم علي طلع يعرفه بسرعه ختم وخلينه الجنط بالتفتيش واستلمناهن ورحنا صعدنا بالطائرة 

واكتملو الركاب كعدت يم الشباك وهو كعد ابصفي وخله حلكه على أذني وانفاسه تطخ بركبتي وهو يتنفس قوي ويحجي 

وياي بهمس ::مرة ثانيه من تردين تسألين اي شي وجهي كلامج الي على اعتبارانا زوجج افتهمتي

هزيت راسي بدون ما اباوعله وكلبي يدك الف يالثانيه 

اياد باستهزاء = عفيه بالشطورة الي تسمع الكلام لا تخلين هذا الهمجي المتوحش يطلع من القفص ويبدي وياج 

رحلة العذاب

واشر على نفسه وهو يبتسم 

هزيت راسي وانا أشعر بغيض واحتقار النفسي

=هلكد انا صرت جبانه اخاف من الضرب والغلط 

= اي اخاف مو بس ضرب واغتصاب واهانه للكرامه واعرف هذا الشي انا السبب بي لذلك اسكت احسن الي

اكتملو الركاب وشدينا الحزام وطارت الطيارة وانا ما ادري وين مسافرين يجوز مهاجرين وبعد ما اشوف اهلي 

حبست شهكه بكلبي وعيت على الكابتن وهو يعرفنه بنفسه ويرحب بينا ويتمنانه سفرة سعيده الى لبنان

اهنا اياد اتقرب عليه حيل وهو يبتسم ويحجي ::سمعتي احنا وين رايحين يعني احنا راح نسوي شهر عسل بلبنان

 تستاهلين لان شطورة وتسمعين الكلام ولو اجه متاخر بس ان شالله اخلي ايامج كلها عسل وعلى كولة اخوج ديري 

بالج لا يصير بيج سكر

رغم كلامه الي كله استهزاء واحس ضاملي مصيبه لكن من بااوعتله وعيونه اجت ويه عيوني 

شفت بعيونه لمعه وهو يباوعلي حسيت انو يريد يكلي انا بعدني ذاك اياد الي يحبج ويموت عليج وانا مسامحج 

لكن هو ما كال بس دار وجهه عني

وكملنه الرحله واحنا ساكتين عبالك اغراب افكر انا بعيده عن اهلي لكن اياد يمكن ياذيني بس مو بكد اذيته الي من 

اخذني لشعل حطب وانكل ماي لازم احاول اخلي يسامحني او اذا ما يريد يتركني ولازم اغير تصرفاتي ويا 

وصلنه المطار بيروت وكملنه الإجراءات وطلعنه

واتلكانه ولد شاب ازغر من اياد سلم علي واتباوس ويا

الحمد لله عه السلامه يا سبع 

كان الولد يتكلم اللهجه العراقيه 

اياد ::خاب يا سبع صرت كنفذ وداعتك بس اشواك تبزز كل خير ما بيه 

الشاب /افه لو اشوف بعيني ما اصدك 

،اياد يضحك ::،،هههههه صدك يونس وداعتك 

يونس /:اشلونك ايودي الحمد لله على سلامتك

اياد :: الله يسلمك اعرفك هاي زوجتي 

يونس باوعلي /:،،،الحمد لله عه السلامه ام اسد نورتو لبنان بس يامدام والله خوش مروضته الهذا السبع 

اياد المحد يوكف بوجهه هيج صاير يباوعلج ياالله يجاوب 

اياد ::وانت شلونك شحال لو ما مخليتك طلي

يونس /:افه عليك وداعتك من تجي خبالاتي عليها ما تشوفها اله تذبلها دمعتين وتكعد تكلي 

تئبرني ابن عمي 

تمشي بجنازتي وتكفني باديك لا تزعل حالك انا كتير اسفه 

اياد كام يضحك ويكل اليونس /:كافي يالله أخذ الجنط وخلي نروح لان تعبانين عود بعدين سولفنه على بطولاتك

ركبنا بالسيارة وصارت تمشي بينا المناظر تجنن رغم كان الوقت ليل الهوى بارد والنسيم يخبل 

ومشت السياره وهمه يسولفون يونس يعرفه بالاماكن وانا ساكته وبنفس الوكت خايفه شفت جبل بعيد 

المنظر حلو بس موحش وصلنه النفس المنطقه الي بيها الجبل 

شفت بيت بمزرعه وصلنه للبيت ويونس انطى المفاتيح الاياد وكال

،،اخليكم ترتاحون وباجر ان شاء الله تجي زوجتي تسلم عليج مدام

انا ساكته حتى ما جاوبته بس كوه ابتسمت راح يونس بالسياره وانا دخلت ورة اياد فتح الضوة وشفت بيت ما ادري شقه 

او كوخ باوعت عجبني المنظر لان بيت مرتب صاله بيها ميز طعام اربع كراسي وطخم قنفات ودفاية خشب 

عجبني صرت افتر بالبيت رغم التعب عبالك راح أسكن بي مو عبالك شكم يوم ونرجع

البيت بي صاله كبيره غرفتين نوم ومطبخ طبعا وما ننسى الحمامات 

ورحت شفت المطبخ زين واسع بس مو كلش

اياد راح الوحده من الغرف وأخذ جنطته وانا شلت جنطتي ودخلت النفس الغرفه شفتها حلوة رغم اثاثهالبسيط 

خليت الجنطه و رحت اشوف الغرفة الثانيه شفتها تشبه الأولى فكرت خلي اجيب ملابسي واخليهن اهنا أحسن أخذ 

راحتي أكثر بدل ما انام يم هذا المعقد

رجعت أخذت جنطة ملابسي ورحت للغرفه وانا ما ادري باياد يباوعلي 

حطيت الجنطه على الجربايه واريد أفتحها ودخل اياد عبالك نسر عيونه يجدحن نار انا بس شفته صرت ارجف

متت من الرعب اتقرب وهو يعض على شفته ولزمني من جتفي بقوة وحجى وياي بصوت بي حركه ونبرة قويه

::اسمعي لج ما تنامين بغير غرفه إلا انا اكلج افتهمتي 

انا رغم خوفي ورجفتي نزعت أيدي منه بألم هو كلي 

اياد ::ردي افتهمتي

جاوبته بصوت عالي = اي افتهمت افتهمت سامحني ارجوك نسيت حتى النفس لازم ما اتنفسه اله بامرك عندك شي 

او تهديد تريد تكلي علي 

اياد :: انچبي وياالله رجعي الملابس للغرفه وروحي خليلي اكل 

انا بنرفزه ما تخلو من الاستهزاء = صار تامر امر

اخذت الجنطه ورجعتها للغرفه وعفت الملابس ما طلعتهن

ورحت للمطبخ لكيت على الطباخ طاوه عليها غطا وجدر فتحت الطاوه لكيتها حارة وبيها كبه والجدر لكيت بي شوربه 

بوسطها دجاج ولكيت عه الكاونتر حافظات بيهن سلطه وتبوله عرفت انو هاي اكيد زوجة يونس هي الي سوت كل هذا 

خليت الأكل بالمواعين وجبتهن ع الطاوله وقررت اكعد ويا واكل واذا ما يعجبه هو يروح الغير مكان ياكل 

وفتحت الثلاجه ولكيت لبن وببسي جبت اثنين و خليتهن ورحت أغسل اديه شفته كعد 

بدأ يأكل وهو ساكت واجيت بكل برود كباله سحبت الكرسي وكعدت

اكل هو من كمل راح يغسل وكلي :: خلصي وسويلي چاي

انا هم رحت للمطبخ سويت الجاي وصبيته وما لميت السفرة جبت كوبين شفته كاعد بالصاله فاتح التلفزيون 

كعدت مقابيله وكمت اشرب بالجاي وانا اهز برجلي وهو يباوعلي ويشرب من خلص خله الكوب ع الطاوله 

اجيت أخذه دنكت لزم أيدي 

اياد ::اكعدي 

  غمضت وكعدت

اياد جر نفس قوي وكلي :: انا راح أنسى شلون عليتي صوتج لان عاذرج بعدج ما ماخذه ع المكان والمفاجئه

وانا اكلج اهنا انتي براحتج عيطي واذا تردين اكو هواي حياطين شوفي 

 (وصار اياشر باصبعه ويعد باستهزاء) واحد اثنين تلاثه سته عشره خمصطعش ويجوز اكثر تكدرين تضربين 

راسج بيهن 

::وحتى لو تردين تلطمين عادي شنو تردين سوي لان اهنا محد يسمعج وأحب اكلج انو هذا البيت هو بيتنا 

الي راح نعيش بي انا جاي اهنا اشتغل وما أدري يمته ارجع البغداد شهر شهرين سنه

:: ويجوز ما ارجع فيابت الناس خلي عقلج براسج وخلي السفينه تمشي تره اذا غركت انتي وحدج تغركين وبالتالي 

انتي الي تخسرين ها وبعد شي انتي ابد لا تطبخين ولا تدنيين ع الطباخ انا اجيب اكل من اجي افتهمتي

انا باوعتله واهز برجلي وجاوبته بكل برود رغم خفت من كلامه 

= اوكي بس علوا تحطلي تلفزيون بالغرفه ما طول ما اطبخ عاد اتمدد واباوع اكضي وكت

وخليته وكمت اخذت الكوبين مال الجاي ورحت لميت السفرة وانا ميته من القهر واحس يطلع نفسي نار من خشمي

 واحجي ويه نفسي

=وبعد شضاملي يا نذل يعني بعد سجن مدى الحياة وما أشوف اهلي 

= واهلي ليش مبينه علامات الرضا على وجوههم شنو شحاجيتهم 

حتى ما عارضو على جيتي الهم ساعتين ورحت 

=بس ما طول هيج يا اياد انا الك بعد ما أعبر شي كلمه بكلمه شتسوي سوي ضرب وانضربت 

اغتصاب واغتصبتني ضيم وشبعتني والله بعد فلا اعبر شي

رحت نمت على الجربايه بعد ما غسلت المواعين وانا هم غسلت ورحت تمددت

وهو بقى كاعد ع التلفزيون وانا تغطيت ونمت 

الصبح حسيت على اياد كعد شفته نزل من الجربايه الظاهر كان نايم ومتغطي ابحده

انا ويه نفسي = وهو المطلوب همزين

كمت حضرتله الريوك وكعد يتريك وهو ساكت وانا هم كعدت مقابيله واكلت 

وشفته راح للغرفه وبدل وصار يدخن واندك الجرس اشرلي البسي شال لبست وهو فتح الباب واجه يونس وزوجته 

يونس سلم وعرفنه /:اقدملكم زوجتي سعاد وبالجلفي اسعيده 

واباوع على زوجته كلها //هذا صديقي أيادوهذي زوجته 

اياد ::أهلا مدام تشرفنا 

سعاد /هله خيي اياد انا الي الشرف 

بعدين باوعتلي وسلمت علي سئلتني /مرحبا شو اسمك

عرفت أنها لبنانيه جاوبتها = اسمي بثينه 

سعاد /اسمك حلو وانتي كتير حلوه ومهضومه 

انابابتسامه = عيونج الحلوات حبيبتي اهلا بيج 

اياد باوع اليونس ::ياالله خلي نروح

يونس /:والله ابو اسد لو ما عزيز ما اعوف سعاد لو لحظه

اياد هز ايده وكله ::مو من اكول مسويتك طلي تزعل دياالله امشي

طلع اياد ويونس وظليت انا وسعاد كانت مرتبه وحلوة وجهه ابيض وعيونها لونهن اسود بس كلش حلوات 

ولون شفايفها وردي وكانت محجبه ومحنكه وملابسها سبور غايه بالاناقه 

عرفت أنها هي الي طابخه العشا شكرتهاوشربنةكهوه وصرنا نسولف

شلون تعرفت على يونس الي صارله سنتين بلبنان وشافها وانعجب بيها وتزوجو قبل سنه وشهر ولحد الان ماكو أطفال 

وهي سالتني عن زواجنا انا واياد فهمتها انو هو ابن عمي وخطبني واتزوجنا زواج تقليدي 

ساعتين كعدنا بعدها سعاد أستاذنت 

انا مسكت بيها عه الغدا لكن هي كالت ما تكدر تبقى لان عدها شغل

سالتها شلون ترجع

كالت انو يونس منطيها سيارته ورايح هو واياد بسيارة اياد 

انا ما فهمت شنو يعني اياد عنده سياره 

سعاد سالتني /:بسينه بتعرفي تسوئي 

جاوبتها = لا والله ما اعرف اسوق 

سعاد /:ولا يهمك بس ترتاحي سجلي معهد سوائه او ازا بتحبي انا بعلمك 

جاوبتها =ان شاء الله

سلمت وراحت وانا فتت للغرفه اتمددت على الفراش رحت للثلاجه طلعت تفاحه ولكيت عصير جامد بالفريز طلعته 

وانا ابتسم واكول 

= اياد خالي عصير بالفريز يعرف احبه بس مو عبالك هذا الشي يخليني احبك انا يوم عن يوم اكرهك اكثر ما تتوقع

اخذت باكيت العصير ورحت للصاله وصرت اكل وانا ما احس ابرودته 

واجه اياد وفتح الباب ودخل ويا علاكة اكل وكارتون 

باوعت خلاهن على الطاوله اخذت العلاكة الي بيها اكل 

وعرفت من صورة الكارتون جايب تلفزيون هو أخذ الكارتونويا للغرفه وغسل وبدل وطلع

لكاني خاله الأكل ع الطاوله وانا منتضرته وهو يباوعلي گعدنا اكلنه واحنه ساكتين 

ومن كمل راح للغرفه وكلي :: جيبي العده تلكيها بالكاونتر اريد ادك التلفزيون 

رحت وطلعتها واخذتها للغرفه انطيته العده 

وهو مطلع التلفزيون من الكارتون 

باوعلي وظل يخزرني كلي ::خلي يولي بالليل اسوي

درت اريد اروح للصاله لزم ايدي ودار وجهي علي وصار يباوعلي وهو يتنفس بقوه ومد ايده على وجهي وكعددني 

وهو ساكت اتمدد وسحبني يمه على الجربايه 

ما ادري ليش حسيت بي غير كل مره اتقرب يمي وهمس وهو يلعب بشعري 

وكلي بهمس بأذني واحس بحرارة انفاسه واصبعه فوك شفايفي

  :: اباوع الشفايفج لونهن ازرك حسيت يدورن علي بخوف 

انا بلا مبالاة = لا متوهم بس هاي لان توني كليت عصير جامد لگيته بالفريز فااكيد بردت

اهنا انتفض وكعدني وعيونه بيهن غضب وضربني كفين على خدي فر راسي وهزني حييل 

 :: اعرفج حيوانه مو مال احترام بس مو صوجج صوجي انطيتج اكثر من اهميتج عبالي اتغيرت اخلاقج 

ياحقيره بس انا الج ادب سزز

طلع وسد الباب بكل قوته وانا كعدت ألوم بنفسي او احچي بصوت مسموع 

= ليش هيج سويتي بثينه مو مبين يريد يبدي وياچ صفحه جديده

= انتي غبيه يا بثينه ليش ما كسبتي

= ليش كسرتي او هنتيي رجولته هاي ثاني مره 

= طبج طوب اتلكي الي راح يسوي بيج تعرفينه شكد قاسي وما ينسى بسرعه منو الج اهنا بهذا المكان غبيه ومتهوره

 ولج نسيتي نگل الماي بالسطل لو تجميع الحطب لو من خفتي ورحتي يمه طردج من ريحة الدخان 

= غبيه يا بثينه تستاهلين شنو يسوي بيج

ونزلت دموعي ما ادري ليش هالمرة نزلن يمكن ندم لو قهر او ،،،،،،،

قررت اطلع واعتذر منه ورحت للصاله ما لكيته طالع وقافل الباب 

الصدوك تندمت لان حجيت ويا 

قررت من يجي اعتذر منه

الفصل الثاني والعشرون من هنا 

شكرا لزيارتكم عالم روايات سكيرهوم