رواية كريات الدم السوداء الفصل الرابع والعشرون بقلم زحل
ولدت من رحم الضل
كحقيقةٍ ترفضُ الإنكار،ملامحُها مرآةٌ للنجومِ حينَ تتكئُ على سوادِ السماء، لكنَّ الأرضَ التي سارتْ فوقَها لم تعتدِ احتضانَها، والعيونُ التي نظرَتْ إليها لم تبصرْها
إلا غريبةً عن النور.قدر وكأن القدر خط مسير حياتها بأاحرفه كم كرهت اسمها بل كانت تمقته لكن هو ايضا من المفروضات عليها وليس اختيار .
،،قدر..
اتوسل مثل الطفل .الله عليك عوفني مااحجي
شي بس وديني لامي وين خذتوها .
_نشف حلكي من الصريخ وهو ينضرلي بشماته
عرفت ضامن محد يسمعني ،ماكدرت اتلاوه ويا
خارت قواي جرني مدخلني اباوع للبيت فارغ
دنكت عله ايده ابوسها دفعني ،كأنو تواسيلي تحرضه.عليه .
محمود:مو توسل بيجن فاروق
مافكيتنا شرجن .
_ايست منه وعرفت ماراح يرحمني
رغم الالم وقسوة ضرباته ،ماردت يعوفيني
ردته يموتني وكل ضربه اكول هسه تطلع روحي واخلص لان مايخلصني من الانه بي بس الموت.
محمود:اريد اطلع كل قهر
فاطمه من عيونج.
_شمر الصونده الي بيده ودنك عليه جرني من شعري ارتعبت من قربني للجربايه الموجوده بالغرفه ،فكيت عيوني بصدمه شيريد يسوي ، بس لا يعتدي عليه لااا،حاولت اخلص نفسي منه رافضه الحركه شد عله قبضة ايده حيل احس فروة راسي انتشلعت ، رفسني وهو يغلط .
_عافني والتفت نضراته ادور
بالمكان ،يمكن تعب لو يدور عله شي اقوى يضربني
تقدم للفراش جر المخده نزلت دموعي وانيت بخوف وعبرة اباوع عليه واحجي بكلبي اي واخيرا راح اخلص ما اقاوم ولا اتوسله حته بسرعه يخنكني همزين خل يموتني .فززني من تفكيري تصرفه فلت الوجه مال المخده شكه .وتوجه عليه لميت رجليه لصدري نزل لمستواي هزيت راسي لا.
محمود:مديهن خل اربطهن افضلج
ليش تخليني اكسرهن.
2
_ضليت مدنكه راسي
كام عله حيله وخله رجله عله جف رجلي
وضغط بقوى وحركها بخبث ،شهكت احس
جف رجلي اتمزق صرخت بوجع وانه استسلم قدمت رجليه اثنينهن بطاعه ،دنك شدهن واشر عله اديه سلمتهن بدون اعتراض احس انحصر الدم بجفوفي تاكد من شدهن كام منطيني ضهرة،
محمود:اصرخي براحتج .
_ مشه خطوات وصل للباب والتفت عبالي راح يرجع عليه مد ايده طفى الضوى وسد الباب وطلع ،وسلمني للعذاب وكأنو جسمي بده ينطي ايعاز لكل ضربه وصدك لو كالو حرورة صواب مانوجعت من جان يضرب بيه ومنا بدت رحلتي ويه الالم ،شسكن وشنو الي انتجي عليه ياكتر اصوابه اعمق ضلمه ماشوف
، يبس حلكي ماكو بجوفي سائل ارطب بي بلاعيمي
MY hopes
محمود:مديهن خل اربطهن افضلج
ليش تخليني اكسرهن.
_ضليت مدنكه راسي
كام عله حيله وخله رجله عله جف رجلي
وضغط بقوى وحركها بخبث ،شهكت احس
جف رجلي اتمزق صرخت بوجع وانه استسلم قدمت رجليه اثنينهن بطاعه ،دنك شدهن واشر عله اديه سلمتهن بدون اعتراض احس انحصر الدم بجفوفي تاكد من شدهن كام منطيني ضهرة،
محمود:اصرخي براحتج .
الكاع بارده وهذا زاد من حالة الالم ماغمضت ضليت الوب تمنيت لو منتحرة ،بيش الساعه شكد مر وقت مااعرف رفعت راسي من سمعت طكت المفتاح دخل عيونه كتلة غضب . بصوت واهن وماينسمع كتله امي .
محمود:انعل ابوج لابو امج
احتركت روحها بنار .ذبيتنا بطركاعه ليش مو لمجن من الشارع ورباج هاي جزاته.
_وين وديتوهاا.
محمود:نكسه وحته الكاع مارادتها
لهسه بالثلاجه خل يوصلون اهلها
ونسلمجن اثنينج حته يدفنوجن سوى.
_مشطت المكان بنضرات سريعه
جربايه ام النفر وتعلاكه مال ملابس
ماكو حته شباك اشرتله عله حلكي
بمعنى عطشانه.
محمود:لو ماحرام منع الماي
جا مااطيتج مجعه.
_طلع ورجع بيده بطلين شمر عليه
واحد والثاني فتحه شرب منه وخلاه بصفه ،
حجيت بذل جا شلون اشرب كام فتح اديه
ورجع كعد بتعب ،منتجي ويباوعلي خفت من نضراته نقذني صوت نقاله طلع يجاوب المتصل . ردت بس اوكف عله رجليه ماكدرت حاولت افتح رجليه مالحكت دخل والشر يتطاير من عيونه .مالحكت احمي وجهي.
محمود:اله احرك روحها
واخليها ماتغمض حته لو دفنوهاااا.
_وكانو ذكرني شلون شكلها وهيه عله السديه
وعيونها مفتوحه وعبالك تباوعلي شكد حاولو الممرضين يسدون عيونها قبل لا ياخذونها مانسدن تالي غطوها شهكت وانه اتوسل وحلفته بكل شيء
بس خليني اطلع خلوني اودعها اريد اسد اعيونههههها
بيدي ولج يماااااا .
محمود:اصرخييي.
_شد اديه وطلع
هلكت من البجي وطاقه ماضلت عندي حاولت افك اديه بسنوني ماكدرت والمصيبه المفكرت بيها شربت الماي كله وهنا كرهت حته امي وروحي والدنيا ،
زحفت متقربه للجربايه سحبت الغطوه العليها نزلت دموعي مابيها مجال ،احس مثانتي راح تنفجر
رفعت نص جسمي وستندت عله ذراعي صعدت وماكو غير حل ادررت عله المندر لان السفنج يحبس الماي .
ثالث يوم دخل بيده علاكه شمرها يمي ودنك فتح اديه
محمود:تزقنبي بسرعه .
_حجيت بعبرة اريد الحمام . رفع راسه باوعلي
وكأنو ذكرته دار نضراته بالغرفه عكد حواجبه
حسيت بي يدور عله مصدر الريحه دنكت .
محمود:سويها عله روحج.
_شلت راسي باوعتله متفاجئه.
ماجنه يشوفني وقبل مايطلع طفى
من خوفي ماتحركت خاف يتذكر اديه مفتوحه ويرجع عليه ، رفعت ايدي لوجهي اتحسسه بخوف ومن كثر الوجع عرفت ورم ويجوز حته صايره بي كدمات واثار اكيد لان جان يتعمد يضربني عله ، رغم الضلمه الي تحيطني حركت جسمي اريد اعرف شنو بضهري حته استند عليه ،انتجيت وكل العتب والنوح مايشفي جرحي،وينها دفنوها يمه تحسين بيه لولا يمه يمه
يمه وعله هذا الحال ايام،
حسيت بجوع بطني ضلت تقرر بس مادنيت للاكل
عرفت بي يريد يوصلني لحال انو اقضي حاجتي جواي
ضوى الصاله يبين من الفتحه الي بارضيه باب الغرفه زحفت مثل الطفل خليت اذني اتسمع ماكو صوت
مروقت وانه كاتمه النفس حته اعرف اذا بعده موجود احجي بكلبي وينج ليش هيج عفتيني وين اروح يمه لادليتيني اهلج ولا اطيتيني عنوان ،وهيج
ايام وليالي ماعرفت عددها ولا حسبت اخلص الوقت وانه احلف واتحلف بس كون اطلع منا شراح اسوي بيكم وارجع اون وينك ياطارق ،معقوله هنت عليك
وارد عله روحي بعذر لا مستحيل بس اكيد صاير ويا شي اي اذكر بالمستشفى كالت فاطمه مسوي حادث
الجوع كافر وانجبرت ادنه للعلاكه حاولت مااكلها كلها اخذت نص من الصمونه بس موبيدي يمكن الانسان يتحمل الجوع اله العطش ماينصبر عليه .وصارت ريحه الغرفه لاتطاق ،والغريب جان يتعمد يخليلي ماي.
محمود:هسه حسيتي بفاروق شلون
جان يتاذى من يشوف يعقوب عاجز والحاجه
جوى واستغليتن هل شي .
_لحد هاي الحظه وانه اعتبرة
ابوي وماذليته وتدرون كلش زين
توسلته يطلعني للحمام رفض.
محمود:لضوكج المر الي تحمله منكم فاروق.
_عرفت راد يوصلني لهل حاله وما طاوعته
امتنعت عن الاكل وصرت اسد جوعي بشيء قليل
عله امل يرحمني بس ماتوقعت كل هل حقارة منه
وشكد جانت امي تحجي عنهم مااصدكها،اعتب عليها
لو احزن لفقدها لو الومها وين ودوج يمه دفنوج شكلتي هم سالت روحج عني كلتي بنتي وينها ،رفعت راسي اباوع اله دخل ايده عله خشمه متقزز من ريحه الغرفه
وماجنت اعرف هاي ،حرب نفسيه شنها عليه ويا رخص روحي عله هل الذل.شمر العلاكه ودار وجهه راد يطلع صحت ورا اكتلني واخلص وخلصني .
محمود:نهايتج مثل امج لاتستعجلين
_ويمكن عقلي وصل مرحله
رديت عليه، بااستفزاز نصيحه تتخلص مني
لان اذا طلعت منا عايشه راح اراويك الويل.
محمود:عود خلي ابوج وعمامج يكاموني.
_ماعندي اهل بس اكو شرطه .
محمود:جنتنا وادمنت هيه وزوجها
الولد سلمنا للدوله تعاقبه ومنها يتعالج.
واحنه ناس عشائر خو مانودي حرمتنا للسجن
عالجنها بطريقتنه ،وهواي مدمنين فقدو عقلهم
بفترة العلاج مو شي غريب .
_فكيت حلكي يعني يريد يوصلني للجنون
غمزلي بمكر ،،
محمود:شلون جنتن تعاملن فاطمه .
واستغليتن حالتها .
_ماجنت اصدك من تكول امي
شر اعمالهم وضلمهم .
محمود:بشنو ضلموجن لان سترو عليها
ولج امج ضلمت عشيرتين اهلها والشخص الي نهبته.
_بعدت من يمه ازحف مثل المعوق
وفشلت كل محاولاتي لاستفزازه حته يكتلني ،جنت اتمنه يرجع يعذبني وبلكي ضربه بالغط مثل ماصار ويه امي وتنهي حياتي.وغيرت الخطه بااستعطافه وبلكي هل طريقه تغير من الي اباله زحف متقربه يم رجليه شتريد مني ليش حابسني عاقبتوني واخذتو ثاركم وامي راحت وهيج بعد مايخاف فاروق عله ورث لو فلوس واذا عله الجنسيه انه اروح وياكم وين ماتردون واكول موبتهم .
محمود:لا شلون مو بتنا غير
مرت ابنا واكيد تنتهي عقوبته ويطلع
هم يلكاج متعالجه .
_ترى هو مااعتدى
عليه ولا صار بينا شي
محمود:وليش ماكلتي هل كلام بوقتها
هسه منو شر اعماله ومنو ضلم .
_دنكت لان كلامه
صح شكول هذا كله سببه امي
عافني وطلع ،وصرت مااعد الايام وجنت اسمع
عن نعمة العقل و يكولون العقل زينه،بس مرات الانسان
يمر بضرف يحتاج يفقد عقله حته يكدر يتحمل
وتخليت عن عقلي وعجيب شلون تغير وضعي وصرت
مااهتم ياخذني الحنين وابجي واتعب واسكت
احرك برجليه الي ورمن وصارن مثل الخشب
حته من فتحهن ماكدرت اوكف لو ادوس الكاع .
محمود:حركيهن كومي.
_حاول ايوكفني ماتوازنت مااحس بيهن
ولا يوجعني بس منتهيات ،جرني يريد يطلعني من الغرفه جلبت بالجربايه ،
محمود:امشي خيسه كتلتني .
_سحلني لغير مكان حته ماباوعت
للبيت لان ماابالي اشرد ،استغرب تصرفي دفعني
بغرفه ثانيه وهو يحجي.
محمود:هاي حمام هنا .اتزقنبي واغسلي .
_طلع وقفل الباب
سحبت الغطى الموجود وسندت نفسي عله الحايط
وهيج صارت نومتي الم رجليه لصدري واضل اقدم بجسمي وارجعه لحد ماادوخ مرات اضرب راسي بالحايط، انام واكعد وانه بمكاني تجيني حاله اصرخ اصرخ لحد ماامل واسكت وكدر يوصلني لمرحله الجنون سمعت خطواته
مالتفتت ولا جني اشوفه دخل
مستغرب تصرفي تقرب يتاكد اذا غافيه.
صرخت بوجهه كام مزعوج و يغلط عليه.
محمود:اي اي جايكم .
_شويه وسمعت صوت اكثر من شخص
يحجون ركزت صوت مرة زدت بصريخي
قاصده يوصلهم صوتي، دخلوو يباوعون بصدمه
درت وجهي عليهم ، المراءة تحجي ويه محمود .
!!هاي شنو ليش هيج .
محمود:بعد انه فهمت الحجي .
وانتو موغشمه عن هيج وضع شنسوي ملينه
حاولنه بكل طريقه نعالجها ماانكر ابنه هو الي علمها.
_سكتت من تقربت تباوع عليه
ركزت بوجهي صفنت ثواني
كامت وهيه تخلي اديها بخاصرتها
موجهه كلامها الهم.وتحرك نفسها بطريقه غريبه.
!!باوعلي زين
شتشوف .
محمود:مافهمت ،
_ردت وهيه تفتر كدامه وتحجي بمكر.
!ياعيني ،لاانه لابسه بجامه كصيرة
ولا فاركه شعري من النص و
ضافرة كصايب اثنين.مال تمشيهن عليه غلطان
وماراح اسالك شكد عذبتها حته وصلتها
لهل حاله بس السؤال المهم اذا ماتعرضت لل....
_بسرعه جاوبها.
محمود:لا لا اصلا احنه
جنه مانعين اختلاطهم بس
استغلو الضروف وتممو زواجهم.
_باعت عليه ورجعت تنضر لمحمود بشك
والرجال الوياها صافن وعيونه متركزه عليه.
محمود:هسه شكلتو تستلمونها
لو نسلمها الكم بالمركز؟
!!مو من صالحك ولا تروح رون
لان انته اول المتضررين .
_هيه تحجي ومحمود صافن عليها
حلوة وطويله ومبينه ماتخاف اشرت
لرجال الي وياها طلعو اسمعهم بس مااميز كلامهم
شويه ورجعت بس هيه كرفصت كبالي.
!!سبحان الي يخلق من الشبه اربعين.
_ضليت احرك نفسيي بطريقه عشوائيه.
فاجئني تصرفها .غمضت عيونها بأاسف
تقربت تحجي بصوت ناصي .
_ سكتت وعيوني
عليها برجاء هزت راسها بمعنى اي وكامت.
اشرت لمحمود يتبعها طلعو شويه ورجعو وياهم ولد شاب باوعلي والتفت عليها.
!!اي شفت ياسبحان الله الشبه
كارثه ،
_رد عليها
!!شنو شبه نسخه ثانيه.
!!اي بس كون مثل موهبتها .
_خزرها بعدم رضا ودار وجه لمحمود
تقدم عليه وذاك من خوفه رجع بخطواته للحايط.
!!شوف وولك
كل اواقها توصلني وعود من يطلع
ابنكم نتفاهم .
_هز راسه محمود بطاعه.
التفت الولد ،للمراة كالها.
!!يله جيبيها راح اطلع كدامكم .
_دنكت عليه
!!يله اطيني ايدج
التكسي بالباب
_نزلت دموعي
ونيت بقهر وانه اششرالها عله رجليه ،خجلانه من وضعي ريحتي الي ماليه الغرفه شلون راح اصعد وياهم بالسيارة ،باوعتلي محتارة كامت نزعت
صايتها وشدت شالها مثل الربطه التفت بالغرفه
ماعرفت شنو ادور كل هذا ومحمود عيونه عليها
اعرف نصراته القذرة بس هيه ولا اهتمت وكانو
تتعمد بحركتها ،صاحت منبهته من صفنته عليها .
!!لاتصفن وروح جيبلي اي شي الف البنيه بي
الله يخزيك عله هل دكه .
_رد عليها بأانزعاج .
محمود:شيويلها هيه قذرة مو هذا حمام
تتعمد توسخ نفسها .
!!روح حضر سيارتك انته توصلنه
حته ادخلنه جوى لان راح البسها صايتي .
_اشرتله اطلع وتوجهت لجنطتها
جرت نقالها ،ومن خلال حديثها عرفت تحجي ويه الولد الي اجه وياها كالتله تعال شمرت نقالها ودنكت عليه جرتني موكفتني .
!!سندي روحج بس خليني البسج.
_جابت الصايه وسدت الباب
بسرعه خلت ايدها بدشداشتي شكتها
شهكت وانه اخلي اديه عله جسمي احاول
استر نفسي دفعتها مااهتمت بسرعه سحبتني
وفلتت اردان الدشداشه ولبستني صايتها .
!!هيج احسن
هاي جنها كلبيه ومامبين منج شي
لحد مانوصل وعود ابدلج .
_اندك باب الغرفه
تقدمت فتحته دخل الولد الي جان وياها
اشرتله شيلها.
!!اخذها للسيارة مال السافل
هو يوصلنه احسن.
!!خوش جا اكول لاتكسي يروح.
!!اي خلي يروح .
_طلع بلغه التكسي ورجع علينا
تقرب راد يسحبني كعدت بخوف وخجل
_تكابلو عليه طلعوني
محمود واكف بالكراج ركض قبلهم فتح
الباب الخلفي مال السيارة صعدوني .وصعدو بس الولد وهيه والرجال الي جان وياها ماعرف وين راح طلعنه من المكان اباوع حاولت احفض الطريق .منطقه مكطوعه مسافه يله وصلنه الشارع العام اصفن وين راح ياخذوني منو هذول معقوله خوالي اي لان هاي المرة حلوه وبياضها مثل امي . نبهني صوت محمود يسالهم .
محمود:منا ندخل افضل .
_التفتت عليها ودموعي
تصب وين ماخذيني
غمضت اعيونها اطمني
تحسرت بصوت مسموع .درت وجهي للجامه بدت الدنيا تغرب ،اباوع منطقه مثل السوك من الجانبين محلات وبساطي واكثرها معزله ستوتات وعرباين دخلنه بفرع ضيق جدا بحيث مسافه وطبك محمود ماكدر يدخل السيارة بعد .
محمود:هنا .
_ردت عليه المراءة .
تقدم شويه ،واشرت للولد
!!انزل انته جيبلي عربانة
رسميه.حته نكعدها بيها خو مانشيلها
مااريد قال وقلت امنلي الطريق وياك
وصي الجماعه.
_وبس نزل الولد التفت عليها محمود.
وهو يقدم نقاله الها،
محمود:هذا رقمي اول واحد سجلي يمج.
محمود:عله مود نتواصل بخصوص المحكمه
وخاف يطلبون شهادتها لو علمود القسام الشرعي.
!!تندل بيتنا ورقم الولد يمك اتصل بي وبلغه
وحاليا لاتفكرون بشيء لحد ماانشوف وضع البنيه
ويطلع ابنكم من السجن .
_تحجي وهيه دايره وجها تباوع لداخل الفرع
انتفض محمود معترض عله كلامها.
محمود:اتفقنه وخلص بعد ماله داعي نعيد.
_اجه الولد يجر بعربانه مال معاقين
نزلت دموعي اذكرت ابوي ايوب ،اخر ايام جنت اخلي بهيج عربانه واطلع بي للحديقه .نبهتني وهيه تنزل اطتني ايدها اتقربت للباب سحبتني والولد كابلها كعدوني بالعربانه نزعتني الصايه ولبستها.
محمود:هسه شنو .
!!كطيعه شوكت تهمدون
لازمات العتب تحسبن الداخل والطالع.
انعل ابو شرفكم
_شوارع ضيقة،جدا اباوع شنو هل منطقه الغريبه
نساء تمشي وعبالك بيت مو شارع
تحسه المكان خاص بيهم كل كم خطوى الاحظ مجموعه واكفين يسولفون لو يتشاقون وهنه وحد تحجي ويه الثانيه من بابها رغم اكو ولد شباب بس
مامتقيدات ولاجهن يشوفنهم بدون عبي والكلبيات الابساتها غريبه ركزت هذا البس شايفته بس بالمسلسلات المصريه هيج دلع وفتحات من الجوانب
بيهم بشرته غامقه والي متوسطه وبيها صفار
والي ابيض اشكال مختلفه بس الغريب عبالك عائله وحده وكل مانمر عله شخص يتلكانه يسال بفضول
بس الي وياي جانت كلش حديه وترد بطرف خشمها
ومجرد مانعبر من الشخص الي يحجي وياها تسبه وتغلط عليه غريبه تصرفاتها .قطع تفكيري توقفهم عن المشي التفتت عله الولد وهيه تنضر لنساء واكفت عله بعد مسافه عنا.
!!اخ لاتذكرني
اريد افرغلها اذا ماخليتها تفقد الذاكرة
بس خليني اخلص من سالفتك.
_رفع حاجبه بااعتراض وتقدم عليها
حجه من بين اسنانه .
!!كفي منها وديري بالج اسمع
مسويه شي ترى احرك الصعده عله راسج.
!!ولك راح تلعب بينا لعب
كل عقلك اخليها ،شوفلك حل قبل ما يوصل
الخبر لام ماام طيبه ،
!!خل تعرف بلكي تضغط عليه يعوف القندرة
حته انعل والديها واسحلها احبسها بالكراج.
!!واذا هيه فرته وعاف ام طيبه
وشلون لو رادها ،شسوي مو ايصخم وجهي
ويدفني من يعرف هيه مفينه ،
_سرع بخطواته
متوجه عليها رجعت بخوف
محتميه بالعربانه.
!!اعدمج موتكولين احطج بيدها
واسلمها الكل ، اتفقنا مايتقربها ولا تخلينه
يختلي بيها،وهيه اساسا مارايدته .
!!بعدك مصدك
ولك صار فترة وهيه تحوم عليه
لحد ما خلته يعقدها ،ولك افهم.
_ضحك الولد وتقدم خله اديه بالعربانه
وهو يرد عليها برود،
!!تجذب ماتريده ولا تحبه ولا راح
تخلي يتقرب منها ،كل هذا حته تضغط عليه
ماتعرفينها بكثر ماانه دارسها تحبني بحيث
تشتم وجودي عله بعد اميال ،
_هزت ايدها ماقابله .
!!يله عايزه وجابلي مصيبه
_رد عليها الولد.
!!خليج حذرة لحد ماانشوف نهايتهم شنو.
!!!ها شني
_ردت عليهن وهيه تمد ايدها
لراسي وافتهمت من حركتها رادتني ادنك
حته مايركزن بوجهي ،دنكت وهنه يفترن
عله العربانه ويتفصن بيه صاحت بيهن.
!!!خيررر شنو ثلاجه وتعاينين عليها
شنو هل مرض البيجن ،
_ضحك الولد وهو يجر العربانه للجه الثانيه
وكفها كبال بيت والتفت صاح عليهن.
!!امشي صوله مابقت بالكدر باكله جوعان
رحمه لامج سويلي تشريبه وكثري دهن
_عافتهن يتلفتن ودفعت الباب
وهيه اتصيح
!!ام اعطوببب وينج.
_شويه وطلعت بنيه
بعمري او ازغر ملامحها حاده
وسمارها يلفت النضر،باوعتلي وردت تباوع للمريه
كمزت من صاحت بيها .
!!مطوله بصفنتج بت المطي
تعاي وياي خل اندخلها.
-منو هاي خير شنو من مصيبه سويتي
ومنين جبتيها .
_حس كلبي ورجعت ذاكرتي لكلام امي
عن هل مكان نزلت دموعي تقدمت البنيه رفعتني حاولت اعين نفسي حته اساعدها دخلني وهنه يداهرن اباوع طارمه زغيرة بس كلش نضيفه وبعدها توجهن بيه جوى استغربت البيت من برا كلش تعبان والي يشوفه يكول خرابه بس الصاله تختلف صاحت بيها المراءة وحسب توقعي امها .
!!!اخليها بغرفتكم .
_خير خو خليها بغرفتج مو انتي جايبتها.
!!اي شيخه سووونه .
سونه:غير نفهم شنو السالفه.
_نبهني من صفنتي عركتهن الي من خلالها .عرفت اسم البنيه سونه حلو الاسم بس غريب .عافني والتهن وحده ترد عله الثانيه
!!بعد ماتردين اخذ اذنج
بلي يجيني ترى بيتي.بت الصخل .
سونه:والله ياسلوم هو فعلا صخل
لو ماصخل ماسلمج البيت عله عموم تحمليني
ايام ان شاء الله بس يكمل امورة خطيبي
اكيد اطلع منج.
_التفت بخوف من شمرتها بالنفاضه الي كبالها
لا وشنو هل اسماء الي كلها بحرف السين .طفرت سونه مبتعده النفاضه صارت اربع قطع كامت سلوم تريد تلزمها وهاي شلون الطفل تفتر منا ومنا .استغربت شلون هيج تحجي ويه امها .اخر شي تعبت الام
كعدت وهي تحجي.
سليمه:ترى لازم الركن وحلف
اذا مانهتيني هل المهزله يسحلج .
سونه:اشتكي عليه ،هاي وحده والثانيه
كولي هل كلام للباشا.
سليمه:اي نكول اكيد خو مانغشه
كومي اخذ البنيه سبحيها وانطيها شي تلبسه لحد ماروح للسوك .لا اهلس اعطوبج.
_وبسبب كلام امهاصارت عيني عله شعرها استغربت شعرها حلو والغريب ناعم وكثيف صح سامعه عن اصحاب البشرة السمراء يصير شعرهم بي تجعيده قويه بس هاي شعرها ناعم وسواد فاحم وكثيف وكلش حلو ،تقربت عليه وهيه تحجي.
سونه:ماتحرك لحد ماتحجين منين
جبتيهاوشنو سالفتها .
_ركزت بوجهي تتفحص ملامحي
عكد حواجبها ،والتفت عله امها
سونه: يتراولي شايفتها بت منو هاي اي شكلها مو غريب احجي وانه هسه اجلفها الج جلف.
_التفت الام جرت جنطتها
طلعت جكارة شعلتها.طريقتها بالتدخين غريبه
تنفخ الدخان ليفوك ،ردت وهيه تضحك
سليمه:كرايبي ماتشوفيها تشبهني
خو مو بت صوله.اكيد ماتعود لاي شخص
منكم شوفي لونها .
_التفتت سونه تنضرلي
بشك غمضت اعيونها تستذكر .
سليمه:يله ولج لحد يدخل علينا
مااريد احد يشوفها .نوب تعال ياعمي شايلني.
سونه:اي ضميها بالبوفيه جوه النضيده
مو عله اساس هيه بطل ...
اكيد تنشاف.
سليمه:لا ابد ديري بالج هيه فترة وترجع لزوجها
خطيه صارت عدهم مشكله وخلوها يمي .
سونه:وهيه معوقه لو شنو.
سليمه:لا مسوين حادث هيه ورجلها .
سونه:ورجلها وين .
سليمه:مسجون الضاهر جان سكران
ومن ماخذينه للمستشفى مكتشوفين
يتعاطه ماخذته الحكومه .
_هن يحجن وانه ادموعي تصب
يعني كل عقلهم بيت حجي احمد يردون يثبتون
عليه هيج تهمه لا والمصيبه يكولون متزوجه وهذول مصدكين ،اي لو ادري كل هذا يصير جان قبلت بكلام طارق ،قطع حديقهن صوت شهكتي .
سونه:يااا عليمن تبجين
ترى بالزايد ينحكم سنه ويطلع .
_رفعت راسي اباوع عليها
اريد اسال واخاف ،معقوله هذا المكان الي ذكرته امي.
سونه:لاتصفنين خل اسبحج وارتاحي
واليل طويل ونشبع سوالف .
_هزيت راسي بمعنى اي
لوت شفتها بطريقه غريبه وهيه تسال امها.
سونه:اكلج هيه خرسه
لو شنو .
سليمه:ترى فحطتيني شكد تسالين.
سونه:غير اعرف،
جا شلون راح تجاوبني اذا سالتها.
_كامت امها دخلت لغرفه وهيه تحجي.
سليمه:امشي سبحيها
وعود بعدين احجيلج خل امدد ساعه.
_دفعتني بالعربانه لباب الحمام
كوى نزلتني ،ضربت عله رجليه بقهر
شبيجن هيج عيني شويه .رادت تدخل وياي رفضت
اشرتلها لا هزت ايدها ماقابله تقدمت فتحت الماي وكاسرت حرارته ،وكل شويه تصفن بوجهي تتاكد
معرفتها بيه .
سونه:هسه لوتحجين جان فوخت كلبي
مو كتلني التفكير معوده،زين راح اسالج
وانتي جاوبيني.يعني اذا اي هزي راسج هيج مثلي واذا لا سوي عكسي الاشارة
_تحجي وتحرك راسها
غمضت عيوني بأيجاب .
سونه:انتي تشبهين امج .
_نزلن دموعي وانه اهز راسي لا.
سونه:يا عليمن بجيتي
زين تشبهين ابوج .
_هزيت راسي لا .وهنا زدت بالبجي من كالت.
سونه:ياااا جا لاامج ولا ابوج
جا شني نغله. يله نكعي روحجي بين ماجيبلج ملابس.
_طلعت وانه اختليت بروحي ونيت بصوت الدمع مايروي قهري،يمه تعاي فهميني يمه بس كليلي شنو اتصرف وين اروح حايرة
وماعرف شسوي ،متاكده هذا المكان الي كلتي عليه
يمه شو حته همه نابذين وجودي .بلعت غصتي بدخولها علكت الخاولي بالبسمار الي بضهر الباب
سونه:يا بعدج مانازعه ديله عيني
شوفي لا تستحين ،ماباوع .بس خل اساعدج .
_ماعرف ليش التزمت الصمت
وفضلت عدم الكلام .ردت اعرف شنو السالفه وبنفس الوقت ماردتهن يسالني لان مابيه احجي دنكت البنيه
جرت الصايه نزعتني .دارت تعلكها والتفت عليه فكت عيونها بصدمه دنكت بخوف وخجل بسرعه فتحت الباب وصاحت بعلو صوتها .
سونه:سلوووووم وينج.
_شويه واجت امها مخترعه .
سليمه:شبيج بت الكلب شكو وكفتي كلبي.
_حاولت استر روحي دفعت الباب وهنه يتصايحن.
سونه:ولج هاي البت منين جبتيها
ولاتكليلي حادث ،هاي ملتمه عليها عشيرة مال ساقطين وكاتلينها .
سونه:ها حادث،وروح امي اشهركم
واروح اشتكي ولج منين جبتوها معقوله صفيتي ويه ..........
سليمه:سدي حلكج ،سبحيهاونيميها بغرفتكم
لحد مايجي ابوج ،وانه اسولفلج
_هزت راسها بمعنى اي
راحت امها وهيه ،سبحتني بحذر
منين ماتلزمني اون حاولت اخلي رجليه جوه الماي الحار بديت احرك بيهن دنكت بدون ماتسالني ضلت تفرج بيهن .
سونه:يوجعنج .
_هزيت راسي لا.
سونه:جا شني بيهن ليش هيج
صارن معقوله مكسرات .
_ضلت تصب عليهن ماي حار
اخر شي ترست الباديه الي موجوده ودنتها عليه
شالت رجليه وخلتهن بيها .حسيت الخدر بده يزول
_حركت رجليه
نزلن دموعي همزين صارن احسن .
كامت وانطتي الخاولي ،اشرتلها طلعي نشفت
ولبست ،وطلعت اتجه مثل الطفل الي توه يخطي .
سونه:تعاي هنا مددي
خل اجيبلج اكل.
_دخلتني بغرفه وراحت
شويه واجت ،بيدها اكل .خلته يمي وطلعت
صفنت شنو الحل شسوي شلون اتصرف لليل وهنه مادخلن عليه ،عيوني مابطلن وعبالك هسه يله اطوني الحق ابجي عله امي ،احجي ويه روحي هم لو ذول ميخالف شو المريه مبينه زينه،ومن كثر الخوف والعذاب الي عيشنيا محمود تمنيت يطلعون همه اهلي .
وياريت ماتمنيت ولو باقيه يمه لحد ماميته.
هذا بارت لعيونكم وكلكم
تعرفون هاي الايام الاولى من رمضان وخطار وعزايم
ربي يعوده عليكم بالصحه والعافيه
صيام مقبول ان شاء الله .
بنات الغموض حلو
ولا تدوخون اكيد راح نعرف كلشي بالبارت الجاي
لان فضول سونه اقوى منكم وراح تضل تفتر لحد ماتعرف كل شي
شكرا لزيارتكم عالم روايات سكيرهوم
