رواية جذبني فمك البني الفصل الثاني 2 بقلم عبير إدريس

نثرت العمر بدروبك واكول تدووم.

ماضنيت عشكك عشك ليله ويوم..

.

.

.

اكذب اذا كلت ماخفت من كلام ايفين خفت ورجف كلبي هم ، فكرت وفكرت وفكرت لحد ما قبغ راسي طار وما وصلت لحل نمت وبراسي كتله هموم ثاني يوم رحت للدوام وبراسي الف حسبه ، ادهم خلاني ادور حول نفسي بدائرة مغلقة شافتني نسرين حايره راحت جابت نسكافيه نطتني واحد وهيه اخذت واحد ، شربت شويه وباوعتلي من فوك الكوب..

سيلين : شبيج تزرزرين بعيونج..

نسرين : ما مرتاحتلج شضامه احجي ..

سيلين : ما ضامه لتخافين...

نسرين : اكلج ليش احسج كتله غموض وتمشي بالكاع اعتبريني اختج واحجيلي فتحيلي كلبج..

رفعت تك حاجب وباوعتلها ، مجاوبتها...

نسرين : شهالنظرة هاي ؟

رفعتلها ايدي وهمست..

سيلين : تشوفين هاي ايدي واصابعي ..

نسرين : اي..

سيلين : ما اثق بيهن..

نسرين: مافهمت..

سيلين : لتفهمين احسن...

عفتها حايره بزمانها وكمت اكمل شغلي دامشي اجاني مسج على رقمي باوعت رقم غريب عكدت حاجبي فتحته مكتوب..

(كافي غرور الغيمة البيضة انجلت عن حياتج واجتي السوده بدالها راح موسم الحمامات هسه موسم الغربان ، وحظج السيء هو صديقج الوحيد ، تعرفين شغله جنت اعرف سوء صحبتج بس ماجان عندي القوة افاركج نصيحتي لتخسرين ناس ازيد )

يعني جان يعرف معقولة؟؟ زين ليش محجه واستمر ويايه رجفت ايدي لزمتها حيل ، تمتمت بكلمات مسموعه ..

لو بس اعرف ليش ترجفين ليش دثبتي، الهي راح افقد عقلي والله ماضل شي واتخبل...

منين سمع كلامي ويه نسرين منييييين معقوله هيج قريب عليه وينه رحت ادور مثل المخبلة امشي سريع باوعت بكل مكان ماموجود كمت امشي عكس ارجع ليورة واباوع ،الطخت بواحد سمعت صوت اغراض ارتطمت بالكاع من التفت المدير ، شهكت ولعنت حضي العاثر ، باوعلي بنظرة مليانه غضب ، نزلت للكاع الم بيهن حجه بصوت حاد ...

_ عوفي كلشي من ايدج واخذي راتبج وطلعي ..

سيلين : استاذ اسفه مو قصدي والله..

_ ماعندي مكان لضعاف العقول والمهملين ساعه عايفه شغلج وتحجين ويه نفسج اضافه ادائج متراجع وتأخيرج عن الدوام كل يوم نص ساعه وتقديم حجج واهيه...

عافني وراح ضليت افر بأذني لزمت كلبي اريد اسيطر على نبضاته زادت بحيث حسيته يضرب بجدار صدري بقوة ويطلب من عقلي يهدأ من روعته ...

مشيت بتوتر اخذت جنطتي وطلعت حتى ما مريت و اخذت الراتب مال اسبوعين الفاتت حسيت بأهانه كرهت نفسي ، نضراته مقرفه باوعلي كأنما نكرة كدامه مو بشر ،

رجعت للبيت ارتاحيت ساعه وبلشت اقره كلت على الاقل احضة بدراستي لا كلهن اضيعهن

لزمت الدفتر وبلشت اقره وادون ملاحظات ، هذا الدفتر كلش كبير من صف ثالث عندي ولحد الان مخلصانه اوراقه اني من النوع اقره و اكتب مااحفظ اله هيج، وصلت ورقه مكتوب بيها ...

تعرفين سيلي ماردت استعجل واوضح مشاعري دفعه وحده حتى لا تحسين بشده هيامي بيج وتاخذين موقف مني ، حاولت اكثر من مره اسيطر على نفسي واخليج انتي تبدين الحديث وانتي تبادرين بالحب ، بس شنو الصار اني البادرت متشكر محاولاتي الفاشلة بالبعد لان ماكدرت اسكت اكثر واضم بكلبي ....

فركت وجهي مستغفره، سديت الدفتر وكمت فتت للحمام سبحت وطلعت لفيت شعري ونمت كلامه كله يدور براسي ، شوكت كتبلي هذا الكلام اكيد من العام ..

يارب يارب ، نجيني من الاني بيه ، كعدت الصبح ميته جوع لان نمت بدون عشا وغده مشتهيت سويت اكل ، كعدت اكل وصافنه بكل الاحداث الصارت اريد اربط شي بشي ماكدر كأنما حلقات مسلسل مفقوده والمؤلف مات وضل المخرج وحده يصور بدون نصوص مكتوبه بس افعال...

كمت نظفت المطبخ ورحت كعدت بالهول ، دك موبايلي باوعت نسرين ، رجعت راسي على الكرسي الهزاز وبديت اهز اروح وارجع جاوبت..

سيلين : الووو هلو نسرين..

نسرين : هاي وينج ليش البارحه عايفه الدوام وطالعه واليوم ممداومه..

سيلين : بكل بساطة انطردت..

نسرين : جذابه .

سيلين : براحتج لتصدكين باي..

نسرين : لحظه لحظه انتي ليش حديه مو قصدي اكذبج بس تفاجأت ليش انطردتي..

سيلين : حظ اعوج..

نسرين : احجيلج ويه المدير ويرجعج لتشيلين هم..

سيلين : ديري بالج تسويها مادام انطردت ما ارجع لو اموت جوع ما ارجع للمكان النطردت منه ..

نسرين : متكليلي شخصيتج شنو ، تركيبتج عجيبه غريبه ، اول مره بحياتي اشوف بنيه بهيج قوة وشموخ تترك مكان رزقها علمود كرامتها وهيه بأشد الحاجه للفلس..

هزتني كلماتها ماعرف ليش حبيت احجيلها عنه حبيت اوصفلها شلون بنه شخصيتي بعد ما جانت مهزوزه ، بس مشكلتي اخاف احجي بيه لأي احد صرت اغار من نفسي عليه ، سبحان الزرع حبك بكلبي..

نسرين : يمعوده وين رحتي..

سيلين : وياج وياج..

جريت نفس وذبيته..

نسرين : باعي باجر ادورلج شغل بلكت اقاربي يقبل يشغلج ..

سيلين : محد يشغلني لان مو خريجه..

نسرين : معليج انتي خليها عليه هو صارله فتره يتوسل بيه اشتغل وياه واني مرتاحه بمكاني ولان انتي ويايه ما ردت اغير المكان هسه اكله عليج..

سيلين : اريدج ويايه اذا قبلوني..

نسر

ين : ميخالف اذا اكو مكان اجي وياج..

سيلين : تمام من رخصتج حبي اروح انام راسي مو تمام..

نسرين : براحتج عمري..

راحت واني رحت لغرفتي نمت ، وياريت ما نمت كضيتها كوابيس شلون اول يوم عفته رجعتلي الحاله ، والله شور بيه على السويته بيه، ابد متهنيت واي شي اتوجه عليه ينسد بوجهي ، شلون اكفر عن ذنبي وتسامحني ابيع عمري بس تسامحني ونرجع مثل قبل..

كمت نظفت الشقه على السريع ، اندكت الباب باوعت من العين السحريه ، جارتي ام عبد فتحت الباب طبت شايله بطاله حليب جاموس خلتهن بالكاع ..

ام عبد : وهذا الحليب اجاج بعد ..

سيلين : عاشت ايدج بس فدوة ردت خمره مال جبن ماجبتيلي .

ضربت كصتها حيل ..

ام عبد : راح من بالي باجر اروح واجيبلج..

سيلين : فدوة ام عبود اريدج تتسوكيلي مثل قبل وانطيج شكد متريدين لان تعبانه ومالي خلك اروح للسوك ...

ام عبد : كتبيلي شنو تحتاجين وباجر الصبح امر عليج اخذها..

سيلين : عاشت ايدج..

ام عبد : وايدج مع السلامه..

سيلين : الله وياج ..

راحت سديت الباب ومر اليوم كئيب لان ماعندي شي اسويه صار الليل رحت للغرفه مددت حاولت انام مكدرت تالي خليت سماعات بأذني ضليت اسمع ونمت ،

كعدت الصبح على صوت هوسه وحجي بالشارع لان شباكي يطل على الشارع العام،

كمت ردت اشوف الساعه بيش الموبايل مخلص شحن ، هسه شلون اعرف الساعه ،واني كل ساعات البيت واكفات مابيهن باتريات شكد مهمله صايره وعجوزيه

كمت فتحت الشباك باوعت هوسه والناس ملتمين قريب سيارتي كمت بدلت ملابسي لبست حجابي وطلعت باب الشقه رديته ، رحت دكيت الباب على ام عبد متفتح ، هاي وين خاف راحت للسوك بس ما

اجتني الصبح كالت امر اخذ القائمة مال مسواك ، عفت ونزلت الدرج نسيت الباب مفتوح راح من بالي ، اول ما طلعت من باب العماره صاح ابو عبد مأشر عليه...

ابو عبد : هاي صاحبه السياره تعاي يابه..

عكدت حاجبي ..

سيلين : شبيها السيارة ؟

ابو عبد : فات واحد ابو جاجر سوده مألف ، وضربها..

سيلين : صدك والله..

ابو عبد : اي والله روحي شوفيها ..

تقربت من السياره الصندوق كله رايح صاير قوطيه ..استغفرت ربي جريت نفس والتفتت لابو عبد..

سيلين : ماعرفتو منو؟

ابوعبد : لا والله بسرعه راح..

سيلين : عمو هسه شلون شسوي..

ولد جان واكف كال.

_ اني اصلحها الج وتكلفه التصليح عليه بس فلوس المواد عليج.

سيلين : انت سمكري ..

_ اي اني سمكري وعلاوي بنجرجي وان شاءالله مانقصر وياج اخيتنه انتي.

سيلين : رحم الله والديك راح اجيب السويج والفلوس شكد تريد ..

_ شي اولي جيبي ٢٥٠ وبعدين اذا احتاجيت ابلغج واذا ماعندج خليها..

سيلين : ميخالف العصر ..

_ ميخالف...

رجعت صعدت للشقه تفاجأت الباب مفتوح اكثر من ما عفته اني متأكده رديته جان شبه مسدود معقوله الهوه فتحه لو اني متوهمه وعايفته هيج طبيت وسديت الباب...

رحت للغرفه طلعت فلوسي حسبتهن مابيهن ١٠٠ الف شلون قهر ورايه ايجار ومولد ومنا طلعت السياره صفح ، راح اضطر اسحب من البنك سامحني ادهم اعرف هاي تعتبر سرقه بس منين اجيب ، منزلت كلت العصر من اروح اسحب فلوس و انطيه السويج فد مره..

صار العصر بدلت وطلعت اخذت تكسي وبوجهي للبنك ، سحبت ٥٠٠ الف ، والندم وتأنيب الضمير ماكل كلبي اكل..

اعرف رمز السري للماستر كارد مالته ، كلشي اعرف عنه ادق التفاصيل ..

استلمتهن ورجعت رحت بوجهي لأبو عبد ...

سيلين : ها عمو ..

ابو عبد : ها بنيتي الله يعينج على المصيبه والله لو عندي ماقصر..

سيلين : عمو الله يستر عليك ويحفظك كافي شايل همي..

ابوعبد : دبرتي فلوس..

دنكت راسي وحجيت بحسره..

سيلين : دبرت ..

مديت ايدي لجنطتي حسبت ٢٥٠ وخليتها بيده هيه والسويج...

سيلين : عمو اريد يرجعها جديده عفيه..

ابو عبد : تدللي راح اوكف على راسهم ولو همه خوش ولد وحبابين يخافون الله بشغلهم بس مع هذا اوكف..

سيلين : فدوة لعينك عمو يلا اروح اني..

ابو عبد : الله وياج..

صعدت بايتين دك موبايلي نسرين...

سيلين : الوو .

نسرين : جيبي البشاره..

سيلين : شكو احجي..

نسرين : باجر عندج مقابله الصبح ..

سيلين : وين؟

نسرين : اقاربي الكتلج عليه شرحتله ظروفج كال تعرف للحاسبه اذا تعرف خلي تجي نختبرها ، تعرفين لو لا..

جريت نفس ..

سيلين : ليش هو اكو شي ماعلمني عليه..

نسرين : حبيب الكلب..

سكتت مجاوبتها..

نسرين : احجيلي عنه والله الفضول يقره الف شلون تعارفتو وليش تعاوفتو..

سيلين : باجر ساعه بيش اروح ودزيلي العنوان برساله..

نسرين : غلسي غلسي اريد اشوف ليوين ..

سيلين : يلا اروح اني تعبانه وعاشت ايدج وكفتج ما انساها..

نسرين : وايدج ...

سديته وصلت للشقه دخلت وسديت الباب ، علكت الضوايات ظلمه الجو بدايه شته رحت للمطبخ خليت القوري على النار وفتت ابدل ملابسي لبست دشداشه فانيله خفيفه ، لبسي بلبيت كله هيج ماعندي احد لهذا ماخذه راحتي باللبس

رحت للهول علكت التلفزيون وكعدت اكلب بالقنوات عفيه ولا قناه بيها حظ مدري اني صايره نفسيه

سمعت صوت ال

قوري كمزت رحت للمطبخ طفيته همزين ما احترك لو ما يطلع صوت اني مادري، يرادلي منبه مثل صوت القوري ، بكل شغله تخص حياتي لان صايره هواي انسه..

صبيت جاي شربت ما اشتهي اكل اي شي...

رجعت لغرفتي الجو حلو يسوي واهس واحد ينام ، وكالعاده خليت بأذني السماعات وغفيت ، لو الدنيا تحترك ما احس وتعودت على هذا الشي لان اني افز من اقل صوت بس من اخلي سماعات ماعرف ليش اخدر على صوت الموسيقى وانام ،وهذا تعلوم من تعلومه الي من جان يهجر عيني النوم واروح اشكيله علمني على هاي الطريقه..

كعدت الصبح اول ما فتحت عيني ، شميت ريحه غريبه ، خلتني اكمز من فراشي لو ما البنكه طافيه جان راسي راح بيها ،

هاي ريحه عود ، نفس العطور الجان يجيبها اليه ، زين منين اجتي هاي الريحه اشم بنفسي جسمي مليان منها ، شميت فراشي مابيه لزمت مخدتي عصرتها بعصبيه وقربتها من خشمي مليانه من هذا العطر وملابسي جسمي متشبع بيها عبالك غاسله بالعطر..

هو جان من يشتاقلي هيج يسوي يرش عطر بمخدتي وينام ايفين جان تحجيلي ..

كلبي كام يدك سريع كمزت ادور عليه بالشقه منين فات وشلون طب شلووووون ،

افتر وادور الطخ اصبعي الصغير بحافه الباب شاغت روحي كمت ابجي ردتها حجه،

كعدت بالكاع وحضنت نفسي خدرت روحي من التعب والخوف والاشتياق والندم وعذاب الضمير..

كمت نزعت ملابسي جلبت الدشداشه بقراصتي تنرفزت جريتها حيل انرعطت شمرتها بالكاع ورحت للحمام فتحت الدوش كاسرت المي سويته دافي دخلت جواه واجلف بنفسي اريد يروح هذا العطر هواي بيه ذكريات وياه ماريد اتذكر كلشي ماريد كمت ابجي جوه المي كملت صارت كبالي مرايه الحمام واكفه بدون ملابس اباوع لوجهي ماشوف زين بسبب البخار العليها مديت ايدي مسحتها نزلت عيني على ركبتي ومديت ايدي تحسستها لنهايه عنقي ، حاوطت خصري وتحسست بطني ، بالضبط مثل لمساته ، حضنت روحي بقوه وغمضت كأنما هو حاضني، تنهدت واني استذكر كلامه من جان يتغزل بيه ...

مرة جنت ارسم شفتي باللون اللي يحبه ودخل للغرفه تقرب مني حاوط خصري وهمس بأذني ...

ادهم: انتي هم تعشقين طول عنقج والعروق البارزه بيه ،مثل ما انه عشقتها ...

هزيت راسي ب اي..

ادهم : خلي ابالج انه معجب بيج اكثر من اعجابج بنفسج.

هزيت راسي ب اي

ادهم : تعرفين مرات بشنو اشبهج....

رجعت راسي على صدره شدد لزمته على خصري همست..

سيلين : بشنو؟

ادهم : اله اغريقي ..

ضحكت ..

سيلين : مسامعه بيه...

ادهم : همه هواي ...

قرب شفته من بشرتي طبع قبله رقيقه قرب انفه شم جلدي ومشه ببطئ باتجاه ركبتي ويرتفع لأذني صعودا لشعري ويرجع مره ثانيه لركبتي ، غمضت اقاوم روحي ما اريد اضعف بعدين صارت شفته على اذني وهمس يعدد ...

ادهم : ابولو ، ارتميس ،اثينا، آريس ،افروديت ،

هيرا ،هيدز ، ديميتر وبعد هوواي تحبين اعددهم الج ..

جاوبته بروح خدرانه احس كوه واكفه ابين اني مسيطره بس لا فاقده كلشي ...

سيلين : لتعدد بس كلي اني المن اشبه من ذوله...

ادهم : افروديت ..

سيلين : شمعنى ..

ادهم : هذا اله الحب والجمال..

سيلين : مممممم حلوو..

ادهم : بعدين اشرحلج عنهم واحد واحد..

سيلين : ادهم دماغي تعب هواي صارت بيه معلومات..

ادهم : اريدج بعد وبعد تفوقيني بكلشي اريدج قويه بالف رجال..

سيلين : متخاف مني ..

ادهم : الصراحه ..

سيلين : اي ..

ادهم : اهابج ..

سيلين : ليش ؟ ومن شوكت..

ادهم : ليش عوفيها احتفظ بيها لنفسي اما من شوكت.....

سرت بروده بجسمي واني اتذكر ، رجعت باوعت على وجهي الشاحب بالمرايا ، شميت جلدي بعده متشبع بهذا العطر ، جنت ارش منه قليل يضل اسبوع بملابسي هسه مغركني بيه ، بس لو اعرف شلون فات للغرفه ومنين طلع ، سحبت المنشفه لفيتها على جسمي وطلعت ..

دك موبايلي رديت..

سيلين : الو

نسرين : وينج موعد المقابله طارت منه نص ساعه ..

سيلين : جايه مسافه الطريق..

نسرين : لتتأخرين.

سيلين : ماشي..

سديته وبدلت شلون مجان لان احس عقلي بيه شي ماعدت انسانه طبيعيه ، لبست الجنطه وطلعت نزلت الدرج ببطئ بايه بايه عبالك عجوز ام السبعين سنه راحت قوتي وياه ،، وصلت باب العماره شفت عمو ابو عبد..

سيلين : صباح الخير عمو..

ابو عبد : صباح النور والعافيه ، اليوم متأخره..

سيلين : اي والله تعبانه ..

ابوعبد : خير ان شاءالله سلامتج..

سيلين : الله يسلمك عمو فدوه كللهم يستعجلون بالسياره..

ابوعبد : من عيني تدللي..

سيلين : اروح اني مع السلامه..

ابو عبد : الله وياج..

اخذت تكسي ورحت للمكان الدلتني بيه نسرين ، وصلت حاسبت ابو التكسي ونزلت ، اتلفتت منا ومنا ماكو احد ، حمدت ربي يعني مشافني بلكت جاز مني تعب مل ولو المثل ادهم مستحيل يتنازل عن حقه..

دخلت للشركه ، كلولي انتضري انتضرت نص ساعه ودخلوني على المدير ، سلمت اشرلي اكعد كعدت ...

_ شلون الصحه..

سيلين : الحمدلله ..ابتسمت..

_ اسم حضرتج..

سيلين : سيلين وضاح..

_ اسم الوالده ومواليدج..

سيلين : الوالده تمارة جاسم ،

مواليدي ١٩٩١..

_ تخصص خريجه لا ..

سيلين : اني مرحله ثالثه كليه الاداب قسم اثار .

_ حلو ، عندج معلومات منوظف هنا اذا ما متخرجه و لازم يكون عندج بالقليل خبره ٣ سنوات..

سيلين : اعرف بس اني اجيت من طرف ولد اسمه محمد...

_ هااا العفو انتي اخته .

سيلين : لا اني صديقه اقاربه..

_ اهلا وسهلا كال راح تجي اقاربي عندج خبره بالحاسوب..

سيلين : اي عندي..

_ تعرفين لبرنامج الوورد(word)

سيلين : اعرف الوورد والمايكروسوفت اكسل وباوربوينت..

_ كلش زين اذا تعرفين ذني البرامج وضابطتهن توب..

سيلين : اي ضابطتهن ..

_ روحي على السكرتير ، وانطيه هاي الورقه ومعليج بالباقي..

اخذتها منه تشكرته وطلعت ، حتى بالشركات الاهليه الواسطه تلعب دور اذا عندك واسطه يفضلوك على ابو الشهاده والعنده كفاءه ،

لو ما اقارب نسرين اني اشتغل هنا...رحت للولد نطيته الورقه قراها وكال تفضلي مشى ومشيت وراه وصلنه لغرفه بيها ٣ موظفين بنات ثنين و ولد حجه وياهم وصاهم عليه وراح سلمت عليهم وكعدت على ميزي حجينه بخصوص العمل وعلموني على شغلي وبلشت

اني من النوع بسرعه استلم المعلومه لهذا متعبتهم ادهم جان دائما يكلي عقلج مخيف لان شنو يحجي احفظ مرات يردلي رقم يكلي كتبيه اني احفظه ما اكتبه..

فمره جنت كاعده يمه واجاه اتصال ردوله رقم اشرلي سجليه من سده كال..

ادهم : رديلي الرقم سيلين..

رديته على الغيب باوعلي وصفن عليه.....

ادهم : وين كتبتيه بوجهي اقريه بالورقه ورديه لتغلطين برقم..

سيلين : حافظته شبيك ..

ادهم : صدك تحجين ؟سيلين هذا شغل مو لعبه..

سيلين : اي والله اطلبه واذا مو نفسه عاتبني..

لم شفته لداخل حلكه وهز راسه ماراضي، عباله الرقم بيه غلط ، اتصل ،باوعت عليه ابتسم يعني نفس الولد طلعله ، اشرتله يعني هاا اشرلي اوك ...

بيومها ضل يسألني يكلي شلون حفظتيه الرقم صعب واكله ذكاء عن ذكاء يفرق ويضحك...

تنهدت واني اتذكر ذيج الايام ، رجعت اشتغل خلص الدوام ورجعت للبيت ، اول ما فتت كبل لفراشي بدون ما ابدل نمت على وجهي والنومه نومه لليل يلا كعدت ، ..

ثاني يوم رحت للكلية ردت اخذ اجازة مقبلو ، كلت اغيب واشوف شلون ادبرها ولو يومين بالاسبوع اداوم بلكت يقبلون الشركه ينطوني يومين اجازة ، رحت للشركه اشتغلت بهدوء بدون كلام اني من النوع ما اكون صداقات ابد منغلقه على نفسي لأبعد الحدود بعد الشفته بحياتي صرت ما أأمن حتى بنفسي ...

انتهى وقت الدوام واخذت تكسي للسوك نزلت افتريت شويه اخذت كم شغله مسواك وبعدين اخذت حماصة توست ، القديمه عطلت ، رجعت للبيت جانت الساعه اربعه ونص ، تنهدت براحه مجرد تذكرت صار يومين هو ماكو مختفي

خليت الغراض بالمطبخ وفتت بوجهي للحمام سبحت وطلعت اندك الجرص

مشيت وانشف بشعري باوعت من العين ماكو احد كبالي ، لو ام عبد جان شفت خشمها يتوسط العين بس هذا منو ...

خفق كلبي بخوف مجرد اجه على بالي معقوله ادهم ، صحت منو محد جاوب التفتت ارجع واسمع صوت قفل الباب كأنما واحد يفتحه ضليت جامده بمكاني ،

وكفت وعيني على القفل شوكت يندار وينفتح واشوفه كبالي ، خلي يجي شيسوي قابله ولا هالخوف والترقب المعيشني بيه ،

انتضرت ماكو لا انفتح الباب ولا سمعت اي صوت حتى فكرت اني كاعد اتخيل

زين والعطر الشميته بملابسي ، هو دخل للشقه متأكدة ، احتمال بذاك اليوم جان موجود خاتل من نضربت سيارتي ونزلت عفت الباب مفتوح...

بس هسه لا اتخيل متأكده اتخيل اي سيلين هذا الخوف خلاج تتصورين اشياء بعقلج ما الها وجود...

حضنت نفسي ومشيت للمطبخ اتلفت من الخوف ،وكفت اخذت نفس و طلعت المسواك غسلته اريد الهي نفسي وما افكر رجعت كلشي بمكانه

جبت الحماصه مال توست فتحتها وخليتها يم باقي الاجهزة اله صنع القهوه ومسخن الماء وخلاط كلهن خالتهن بركن بالمطبخ ، اضافه للكلاصات واكواب القهوه رتبته وكفت اباوع عليه مابيه نقص ،

هذا الركن كلش احبه راحه نفسيه مجرد اباوعله ، اخذت الرشاش ومي بالسراحية ، افتريت على زرعه زرعه سقيتها وغسلت اوراقها ...

صفنت على الزرع والصفنه رجعتني وين لبيتنه ولحديقتنه مرت لقطات من حياتي كأنما مشاهد من فلم وكاعد اشوفه كدام عيني...

بذاك الوقت جان عمري ١٦ سنة مكيفه بنفسي كبرت وفرحانه وكلي غرور بشكلي وبمظهري الانثوي اللي بلش يبرز جنت اختار لبس يبرز مفاتني ...

وصفي فتاه ذات ملامح باردة ارتسمت على محياها عذوبة ورقة والدتها الكردية الأصل وملامح عميقة وحاده كأبيها ذات وجنات متوردة ووجه بيضوي مائل للحنطي عينيها سوداء بلون الليل ذات رموش كثيفة وعيون ناعسة تعلوها حاجبان كثيفان سوداوان ينحرفان صعودا فوق الجفن الناعس...

كنت كأي فتاه في مقتبل العمر راودتني احلام طيش الشباب بعد ان بلغت سن المراهقة حبيت ابن عمي وكان اله نصيب كبير من الخذلان بحياتي ، لم اتخيل يوما بأن احلامي تموت في مهدها بعد ان دمرها شخص تحت مسمى الحب في عمر الثامنة عشر ..

شويه شويه نفتح ملفات حياتي المركونه واعرفكم على مشهد مشهد شلون عشت ومن شنو عانيت...

حياتي جانت صعبه وقاسية

ظروف عائلية زرعت بداخلي صفات عديدة منها المزاجية الحادة

والانانية وحب الذات ..

قاسيت وعانيت الكثير بكيت طويلآ ولم اجد من يربت على كتفي ويحتضني الأ القليل وكانت وراء هذه الحنيه رغبات انانية لهذا فقدت الثقة بكل من حولي....

اول مشهد تعريفي ابديه من بيت اهلي سميته ..

(الملف الاسود) ابلش وياكم من اخر الاوراق الحزينة

بهذا البيت يسكن رجل كبير بالهم مو بالعمر اسمه وضاح هذا الاب الحنين الطيب انرزق بزوجه انانيه وعديمه المسؤولية تحب نفسها وعدها شعار انا اولا ، بيت تعبان حياطينه مبنيه ببلوك وملبوخه طين، بيه غرفتين وحده لبابا وماما والثانيه اني واختي المريضه التصغرني سنتين ...

بيوم كعدت والنفسية احسن ظروف والدي استعدلت والحمدلله خلصنه من المشاكل ...

من فتحت عيني على الدنيا لحد هذا عمري كله مشاكل وعراك بين امي وابويه ..

كمت لبست فستان قطني بيه ورود ناعمه جان مقسم من فوك محدد خصري وينزل كلوش من جوه ، طلعت بحديقتنه كعدت اسقي الوردات زرعهن بابا وترك مهمه السقي عليه لان عنده شغل ميلحك ..

جان كل يوم يرجع من الشغل ويشوف الحديقه يثني عليه ويمدحني لان معتنيه بيها هيه كلش صغيره مربعه بس عندي جنه ، اخذت الصونده ورشيت الزرع ، اندفع باب البيت التفتت بابا شايل طبقة البيض بيد وبيده الثانيه الصمون ، سديت البوري ورحتله..

سيلين : صباح الخير عمري ...

وضاح : صباح النور اليوم من وكت كاعده..

اخذت من ايده الغراض وحجيت..

سيلين : تعودت على الدوام وتعرف ماحب اسهر انام من وقت لهذا اكعد من وقت..

وضاح : مو عطله هسه عدكم نامي شبعي نوم.

سيلين : طالعه عليك ماحب اكعد متأخره..

ابتسم وعيونه التعبانه تلمع ...

وضاح : حبيبتي هسه شنو نتريك سوه لو ننتظر امج تكعد..

سيلين : ماما هيه وال ١٢ زين اذا كعدت تعال نتريك وبعدين هيه وايفين ياكلون سوه..

وضاح : اي والله صدك اني راسي بده يوجعني ما شارب جاي..

سيلين : اسم الله عليك هسه بس تاكل لكمه وتشرب جاي تصحصح..

دخلت للمطبخ سويت ريوك وكعدنه ناكل بهدوء ، كملنه ..

وضاح : الحمدلله والشكر..

سيلين : الف عافيه..

وضاح : الله يعافيج، يابه اني طالع عينج على اختج هاي امج لا ابالي.

سيلين : اعرف بابا مايحتاج توصيني..

وضاح : علاجها بوقته انطيهيا ..

سيلين : حبيبي كل يوم توصيني واكلك صار لاتاكل هم ..

وضاح: عفيه بنيتي سباعيه غير خايف عليها يلا يابه اني رايح..

سيلين : الله وياك .. بسته بخده وراح...

طلع بابا وصلته للباب ورجعت كفيت السفره وغسلت المواعين ورجعت كلشي بمكانه ، حتى اذا ماما كعدت متحجي ..

ضليت افتر بلبيت ماعندي شي اسويه و الوقت ميمشي كلت احسن شي اروح لعمه ياسة ..

طلعت وسديت الباب ورايه ورحت لبيت عيالها همه مقابيلنه دكيت الباب طلع ابو زوجها سلمت عليه رد عليه من وره خشمه ، كلت بكلبي هذا شبيه ..

_ فوتي عمتج بالمطبخ..

سيلين : شكرا ..

دخلت لكيتها تغسل مواعين اول ما شافتني ضحكت ..

سيلين : فدوة لوجهج الحلو عماتي..

ياسة : هلو عمري توني كلت بكلبي وين الله وتجي سيلين جنت ضايجه والله..

سيلين : ليش ضايجه هم سمعوج حجي..

ياسة : ليش همه يا يوم سكتو ..

سيلين : عمو ادهم شعجب ساكتلهم..

ياسة : ملتهي بين الدراسه والسفر وين يوديني يكول ما أأمن عليج اله يم اهلي..

سيلين : سفرته تطول..

ياسة : ماعرف ..

سيلين : زين واللغه شلون يدبرها..

ياسة : هاي شبيج غير عنده جنسية صارله سنين هو هناك رجع قبل سنه لهنا ورد سافر ...

سيلين : رجع علمود يشوف هذا الوجه الحلو ويقاتل عليه وياخذه..

ياسة : صدك قاتل يلا صرتله ، بس تدرين متندمه..

سيلين : ليش ما مرتاحه وياه؟

ياسة : بالعكس مرتاحه وياه ويحبني يموت عليه وحنين بس اهله تعبوني وحيل تأذيت منهم..

ياسة : زين اذا رجع عمو وين تستقرون..

ياسة : كال نروح لبغداد و اقدم على تعين بجامعة من الجامعات..

سيلين : لعد ومعامل ابوه ومحلاتهم منو يلزمهن اذا رحتو..

ياسة : يمعوده هو ابوه حرمه من كلشي لان عاندهم واخذني وهسه اخوه الاصغر منه لازم كلشي.

سيلين : وعمو ادهم كلشي ماعنده فلس من كلشي.

ياسة : لا عنده خير من الله بس ضامهن بالبنك كال من ارجع اشتري بيهن بيت وشكد يبقه افتح مشورع صغير على ما اتعين..

سيلين : ان شاءالله ...

ياسة : امج شلونها ويه ابوج بعدها متعبته..

سيلين : لا احسن صارلها كم يوم ماشيه عدل..

ياسة : خاف مكفيها بالفلوس.

سيلين : هو من ينطيها فلوس تحلو الدنيا بعينها وتخلي حياتنه وردي ، خلي يقصر عليها شوفي شلون تكلب علينه وتسممنه ..

ياسة : لا تحجين على امج هيج عيب..

سيلين : مليت والله ياعمه مليت يعني عايفه البيت عليه كله واختي مرضها وعلاجها براسي وحتى من تتعب وتتخربط اني اسهر عليها وبالدوام عندي واجبات واريد اقره كلشي ما الحك امي دمرتني..

ياسة : شبيدنه عليها متكليلي صار سنين على هذا الحال وكلنه تكبر تنعدل تالي نفس الشي..

سيلين : تمنيت ميته ويه خواتي وخلصانه ولا ضاله ويه امي.

ياسة : اسم ال

له عليج شلون حجي هذا يكرب الكلب شبيج انتي..

خليت ايدي على وجهي وبجيت بحركه كلب..

ياسة : ترديني ازعل عليج مو؟

سيلين : لا سكتت بس جنت مخنوكه والله..

ياسة : حقج ياعمري حقج تهون صدكيني لابد بيوم تتندم على السوته و تحس على نفسها و تكوم على بيتها..

سيلين : ما اتصور غسلت ايدي منها ،،

مسحت دموعي بردني ،،، شو بيتكم سنطه وين عيالج..

ياسة : راحو لبيت جدهم عرس ابن عمهم عكب باجر ..

سيلين : وهاي تبقين وحدج لو يرجعون..

ياسة : لا عمي يمي مشفتيه من اجيتي..

سيلين : لا شفته هو فتحلي الباب..

ياسة : اي بقه يمي ...

سيلين : اي زين حتى متخافين وحدج ، عمتو راح ارجع خاف ايفين تكعد اسويلها ريوك وانطيها علاجها..

ياسة : روحي الله وياج..

رجعت للبيت والتزمت اختي من اكل وعلاج وحتى اسبحها ، ايفين بسبب مرضها تأخرت بالدراسه سنتين ، والسنه الجايه قرر والدي يرجعها لان نفسيتها تعبت كلش وبس تبجي اربع وعشرين ساعه ...

مشت الايام بس التعب بيها ماحسيت بيوم عندي ام وحنينه عليه وتحس بيه ، اهم شي نفسها ، بابا تعب وصحته تراجعت خصوصا بعد وفاه خواتي ، وليش هيه ترحمه ، بس تشوفه كاعد تكوم تصيح اطلع اشتغل شعندك كاعد ، يكوم ويطلع كم مره حجيت وياه كتله ليش هيج تسمع كلامها ابقه ارتاح يكلي اطلع اخلص من النك مالتها تاكل راسي اذا مارحت وجبت الها فلوس ،

وبيوم كاعدين الظهر اندك الباب واجانه خبر دمرنه وقضى على اخر امل عدنه بالحياة....

الفصل الثالث من هنا 

شكرا لزيارتكم عالم روايات سكيرهوم