رواية اغفري لي الفصل الثلاثون بقلم أوتار حزينة
جانت ترد مختصر ومبين عليها ضايجه ومتوتره
واجت الفرصه الي اريدها
تقدمت عليها رجعت
ليوره بحذر
كلت مبتسم
«،،،هاي شبيج بس لا خايفه مني
ردت بنتره
«،،،لاا ليش انت شتريد تسوي حتى اخاف منك
«،،،ماراح اسوي شي يخوف بس اريد
احجي وياج بموضوع
يمامه
جاوبني هالجواب وكلت بگلبي
جذاب يالعار ونيتك نكسه
رديت
«،،،احجي من يرجعون اهلك
«،،،نوو مايرهم
جاوبني بغمزه وتقدم عليه بسرعه ردت انهزم منه بس جنت بين الكاونتر وبينه من لزمني فلتت
منه بس جرني من خصري عطت
عوووفني حيوان
كتم حلگي بايده ورفعني لفوك مشى كم خطوه
خليت رجلي بين رجله ووكعنا سوه ردت اكوم لزم رجلي وسحبني علي من صار فوكايه وثبت ايدي عضيته من صدره بقوه عافني وضربته راجدي
خليت كل قوتي بي اجه بخشمه
صاح
«،،،ااخ نعل اهلج
فزيت ،،،،وانهزمت منه
للغرفه الي بيها يمامه
طبيت ردت اسد الباب هو دفعه بقوه
وطب عليه رجعت ليوره وگلبي هبط من
شفته قفله والشر بين عيونه
وخشمه يذب دم
مسحه وكال
بغضب
«،،والله اليوم فلا اعوفج مادام طلعتي
دمي
فريت راسي على الغرفه شفت مگص
على الميز بسرعه اخذته
ووجهته علي خزرته
بغضب وصحت بي
«،،خطوه اللخ واخلي هالمكص بگلبك
تقدم عليه صرخت
«،،لاااااتتقدم والله اقتلك اذا قربت خطوه اللخ
صفن عليه تقدم يتفرس بملامحي
مهيب
وكفت بمكاني صافن عليها شلون
واكفه وتخزر بيه
بغضب
العيون هي نفسها والخزره هي كلها شراسه
وقسوه وقوه كلت
«،،،والله هاي انتي
«،،،،ااطلع ولك اااطلع مناااا
صرخت بيه وهي ماده ايدها بالمگص
عليه نفس المشهد شفته مااعرف
شصار بيه من عرفت هي
نفسها الي خلصتني من
الموت رددت
«،،،،لاتخافين ماراح اذيج
خزرتني بنفس النظرات الي مانسيتها ابد
تقدمت صاحت بيه
تأشر بي بوجهي
«،،،لااااتتحرك ولك
رجعت ليوره كلت
«،،،وداعه امي ماراح اذيج بس گولي انتي
هي مو الي انقذتني
«،،اافتح الباب وواطلع
«،،،والله راح افتحه بس گولي انتي هي مو
«،،،،ااي
صرخت بيه ودمعتها نزلت كلت بگلبي
«،،،خرب بيك مهيب شسويت
«،،،اافتح الباب ولا تخليني اقهر امك بيك
«،،،،راح افتحه بس اهدأي واسف واعتذر منج
يمامه
دمعتي نزلت من قهري من السواه بيه ومن
قهر الدنيا الي ماجاي ترحمني
عرفني وسال وجاوبته شفته تندم وكام يعتذر
ماهمني اعتذاره وردته بس يفتح
الباب حتى اطلع
تحرك خزرته كال
«،،،،،،لاتخافين اريد افتح الباب
فتحه وطلع من يمي يردد
«،،،،خرب بيه شسويت
لبست عباتي بسرعه وشلت يمامه
هي والجنطه طلعت وكف مسافه
عني وكال
«،،،اسف حنين والله ماعرفت انتي هي نفسها
الي انقذتني
«،،واذااا ماجنت ااني تعتدي عليه سيااده
الضابط يل حامي العرض والوطن
سكت انهديت بي
«،،ولك انت شنو ماتخاف الله بخواتك لا تطلع
بيهن حوبتي وحوبه باقي البنات الي
انت متحارش بيهن
حجيت هيج ومشيت وكف كدامي
وكال بارتباك
«،،كتلج اسف واعتذر منج والله عبالي من
ذني ال
خزرته وقاطعته بصياح
««،ليييش ااانت شفت عليه هاااا
«،،،ماشفت شي والله بس اني
هم قاطعته
«،،انت واحد ساااقط وماعندك شرف وحرامات
هذوله الطيبين اهلك
«،،كااافي ولج واعرفي ويامن كاعده تحجين
نتر بيه بغضب جاوبته بعصبيه
مو هامني لا هو ولا رتبته
«،،لااا كاعد اعرف ويامن احجي وي سياده
النقيب الي المفروض يحمي العرض
مو يعتدي علي
ماجاوب مشيت من يمه طلعت للشارع
كاتمه دموعي شفت رجال جبير
بتكسي وصل جماعه وكفته
ووصلني للكاظميه
نزلت مشيت ابجي طبيت لبيت ورحت
للغرفه كعدت يمامه بحظني طلعت قهر گلبي
بجي قوي وادعي على اهلي بالموت
لان ذلوني وبهذلوني واني
بعمر صغير
مهيب
ظليت اروح واجي بالصاله كاره روحي والسويته بيها طلعت هي واني ردت اعتدي عليها
الي انقذتني من الموت
جانت هي نفسها
حنين واني
صخمت روحي كدامها وسودت وجهي
دفرت الكرسي وكلت
«،،،خرب بيه شسويت وشلون راح اصلح الي
سويته بيها وهسه اذا امي رجعت
وخاله ام ياسين وياها
وسالو وينها
شراح احجي شأجاوب
ماظليت بالبيت طلعت للكاظميه ردت اعتذر منها على السويته طول الطريق ارتب كلام
براسي وصلت نزلت مشيت
بخطوات واسعه لبيتهم
دكيت الباب وره
مشوار هي طلعت حالها حال والدموع
على خدها خزرتني وانهدت
«،،،شتريد ولك
«،،،،اسف واعتذر منج
ردت احجي بعد بس شكو كلام رتبته براسي
ضاع وتبخر كلت
««،،اني يعني مااعرف شلون اعتذر منج على
السويته
«،،،،روح منا وبعد لاتشوفني خلقتك
سدت الباب گضبته وكملت بتوسل
«،،،بداعه بنتج اسمعيني اني والله تندمت
لان سويت هيج بس والله عبالي انتي يعني
«،،،من ذني الي تعرفهن موو
جاوبتني بخزره والعيون تلمع من الغضب
كملت
««،،وهسه عرفت اني مو منهن موو
سكتت كملت
««،،انت شنو ماتخاف ربك بروحك باهلك ذوله
الناس الطيبين الي ماتفوتهم صلاه
ولا فرض
سكتت وكملت
«،،،بس صدك من كال النار يخلف عار
،،،،ااني مو عاار ولج
ابتسمت بس باستهزاء وجاوبت
«««اي واضح من السويته قبل شويه
ماكدرت ارد لساني الي محد يكدرله سكت
يمها كملت
«،،،لاتخاف ماراح احجي السويته لاهلك حتى
لاتوكع من عيونهم بعد اكثر
رگعت الباب بوجهي وخلتني اضربه
بوكس مشيت صاير نار واعصاب من السويته
بيها وهي صاحبه فضل عليه ومن وره
لسانها الي مدته عليه ورزلتني
رزاله تسوه عمري
صعدت بسيارتي حركت بشحطه وطلعت من
يمهم
جنات
وره العشه مهند اجه لبيت اختي ابراهيم جان
ماكو طالع كعد بالاستقبال وتفاجأت من طلب
مني سيارتي سألته
«،،،يعني تروح بيها بشغله وترجعها
«««،لا اريدها اليه اروح بيها للشغل واقضي
شغلات البيت
«،،،اي واني بيش اروح عيني برجلي اروح للدوام
«،،،لا اجري خط
صفنت علي يحجي بروده وضايج دانيه
كالت
«،،،اذا تريد سياره ماتروح تشتري وحده
شكو جاي على سياره جنات
«،،،عندي جمعيه بس تتاخر يله استلمها وكلت
اخذ سيارتها لان تبهذلت من الدوام
وطلبات اهلج
«،،،مو اجاك كم مليون من قائد ماتروح تاخذ
بيهن سياره
نغزته وجنت اعرف اذ بيهن ذهب لمرته
كملت بروده
«،،سيارتي ماانطيها مهند لان اروح واجي بيها
حالي من حالك انتظر تقبض جمعيتك
وروح اخذ وحده
«،،،،هيج الحجي جنات
نتر بيه دانيه حجت
«،،مهند انت مو تعرف هي اخذتها للدوام يعني شلون تريدها تنطيها الك وتخلي نفسها بدون
سياره
«،،،،اي مو انطت بيتها لهذا العار اشو ماماتت
من وراه
كمت وصحت بي
،،،،ااحترم روحك ولك ااني اكبر منك
صاح بيه من كام
«،،،اانجبي ولك وسدي حلگج
دانيه انهدت بي
«،،،اانت انجب يااطايح الحظ وامشي
اطلع منا وبعد لاتجي وتشوفنا خلقتك
«،،،تطرديني ولج
«،،شلون ماااتريد تحسبها ااحسبها
صاحت بي رد
«،،،،بسيطه دانيه رايح اني بس والله ماراح
انساها الج لهاي السالفه
خزرني وكمل
«،،،،حرام عليه تنطيني سيارتج بس
حلال تعوفين بيت شكبره لذاك الي ازوج
عليج من وراج وطلگج
بس والله حيل بيج السواه
كريم وابو زايد وعساج
بكسره بعد اكبر
حجه هيج وطلع دانيه صاحت وراه
«،،موو الله كسرك وخلاك ادور خلفه وهي ماكو
وكله حوبه بنت عمتك لان فضحتها
بين الناس
كعدت ابجي من الكاعد يصير بيه لا ذاك
رحمني ولا اهلي كاعد يعوفني بحالي
فوك السواه مهند امي خابرت تصيح بعالي الصوت،،،،،شلون رفضت انطي سيارتي
وليش دانيه طردته وابويه
خابر ابراهيم زعلان ويعتب عليه شفت
روحي جبت المشاكل لبيت
اختيوحياتي صارت جحيم دعيت بحرگه
گلب على كريم وكلت
«،،،،حسبي الله عليك عساك ماارتاحيت بحياتك
ولا شفت الراحه بيوم
لا كدرت انام ولا غفت عيوني وهاي الشي
صار بيه من اول يوم عرفت بي
هو ازوج عليه
الليل صار ثگيل عليه واحس ظلامه كام
يكتم على نفسي كمت راسي
يوجعني وكلت بدت نوبه
الشقيقه
دوامت نزلت من سيارتي تعبانه ومرهقه ومقهوره
وكل شي مو زين بيه
طبيت للمصرف وهم اسماء من شافت اثر الدموع بعيوني،،،سالت حجيتلها على الصار
انقهرت عليه كلش وكامت تحجي
على اخويه
عمو جمعه طب
كال
«،،،ست جنات المدير يريدج
«،،،تمام
جاوبته وكمت الشغل اني استلمته لان ست
خديجه اخذت اجازه مرضيه رحت
لمكتبه السكرتير ماكو
دكيت الباب سمعته
كال
«،،،،تفضلي
طبيت وكلت
«،،صباح الخير استاذ
ارشد
دزيت على جنات حتى احجي وياها
بموضوع يخص روحتنا لبغداد طبت عليه
سلمت رديت
«،،،،صباح النور
انتبهت عليها باجيه وملامح القهر بوجهها
كلت
«،،،،تفضلي اكعدي
كعدت ماادحك عليه كملت
«،،،،ست جنات عدنا روحه لمؤتمر بشغل واريدج
تجين وياي انتي واستاذ امجد وست
اسماء
ترددت بعدين ردت
«««،يعني مايصير تاخذ احد بدالي
«««،لااا لان انتي ماخذه مكان ست خديجه ولازم
تجين بدالها ووياج ست اسماء
سكتت كملت
«،،،اكو مشكله اذا رحتي ويانا
«،،،لا ماكو مشكله استاذ بس شوكت نروح
«،،،باجر بأذن الله نطلع من الصبح وخلي بالج
نرجع بليل
«،،تمام
جاوبتني وكامت وهي نفس الشي تجنب
ترفع راسها كملت
«،،،اترخص اني
«،،تفضلي
طلعت من يمي ذبيت حسره كلت
«،،،والله حرامات هالعيون الحلوه تبجي
ومن وره منو من ورة واحد عار مايسواله فلس
ظليت طول اليوم مشغول بيها ورجعت من
الدوام وهي بعدها بالي وصلت
بيت اهلي نزلت الحرس
اجوي سلمو عليه
مشيت للديوان مال
ابويه جان بره ومنفصل عن بيتنا
طبيت هو كاعد ويمه ناس
سلمت وكعدت يمهم
شربت گهوه اسمعهم يحجون ماافتهم شي
لان هي رجعت احتلت عقلي وگلبي
ترخصت وره مشوار
وطلعت مشيت للبيتنا طبيت من المطبخ
امي كاعده وبحظنها تماره بنتي
شافتني كامت ادكمز
وتصيح
«،،،بابا ااده
ابتسمت ورحت اخذتها من امي بستها
وكلت
«،،،هلا ياروح بابا وعيونه
كعدت يم امي وكلت
«،،شلونج اليوم حجيه
«،،الحمد لله بخير يمه
ابني ادريس اجه هم من شافني فرح واجه
بسرعه عليه شمر روحه عليه حظنته
وبسته كلت
«،،،هلا بالسبع مالتي
تماره دفعته تفر بوجهي عليها وتحجي
كلام مو مفهوم
«،،تريدك بس الها
الحجيه حجت مبتسمه ادريس صعد
وكعد بحظني وصارت معارك
صفنت عليهم وهم بس
الي يخلوني اطلع
من حاله الكآبه الي صارت بيه
ووياهم وحده دخلت عالمي مره اللخ وگلبته
من جديد
جنات
من رجعت من الدوام شفت بيت ام ساره كاعد
يشيلون من المشتمل الكاعدين بي رحت للمطبخ سلمت على دانيه
سالت
«،،،،،شنو ذوله جيرانكم بيت ام ساره
راح يشيلون منا
«،،،اي خطيه كملو بيتهم وراح يكعدون بي
«،،هاا
«،،يله روحي بدلي وتعالي تغدي
«،،،،اي
صعدت لفوك افكر اخذه واكعد بي لان الى
متى اني اظل كاعده هنا بيت اختي
لا اني ماخذه راحتي ولا ابراهيم
لان تقيد بيته من ورايه
صح هو مايحجي وشايلني على راسه بس
اني كمت استحي منه لان امي وخواتي
سون الدرب گحل عليهم بحجه
يشوفني يجن من
الصبح ومايروحون لليل يكعدن يحشن
بالناس ويعيدن بسالفتي اني وكريم ماعدى
المشاكل الي كامت تصير بيتهم
على العشه حجيت ويا
وكتله
«،،،ابو يوسف تكدر تشوفلي هذا المشتمل الي گبالكم حتى اخذه واكعد بي
صفن عليه وبعدين على اختي سال
«،،،،خير جنات سامعه شي من عندي من اختج
حتى تريدين تاخذين بيت وتكعدين
بي
«،،لا والله ماسمعت شي والله يرضى عليك
انت وياها ماقصرت وياي بشي
ووكفت اليه وكفه اخ
غصيت وتذكرت مهند شسوه بيه من وره
سيارتي كملت
«،،،اخويه اني الى متى اظل يمك يعني انت تعرف
الوضع راح يطول ولازم استقر بمكان
حتى اني اخذ راحتي
وانتو هم
«،،والله احنا ماخذين راحتنا ومعتبرج اختي الله
شاهد ومو ضايج منج بالعكس ونس
صرتي لاختج بالبيت بس
لان كلتي انتي ماماخذه راحتج
ماراح اضغط عليج واكلج
ادللي اشوفلج البيت
واخذه الج بس
جنات منو راح يكعد وياج
سكت وكمل
«،،يعني مايرهم انتي وحدج تكعدين بي حتى
لو جان قريب من عدنا
يوسف حجه
«،،،اني اكعد وياها
ابوه صفن علي وابتسم گله
««،،ها يعني راح تعوفنا اني وامك
«،،،ههه لا يابه هو بيتنا راح يصير كبال
بيت خاله يعني شمره عصا بينا
بس امي تصيح تلگيني
يمها
«،،،هههه والله صدك هاهيه ولك اكعد وي
خالتك وصير سند الها
«،،،ابشر حجي والله لاصير الها سند ورجال
بس اخط شوارب
ضحكنا على سوالفه الحلوه ابن اختي جان عمره
13 بس سبع ومعدل بليل اني كاعده
بغرفتي خابرني رقم غريب
عبالي كريم لان جان كل فتره
يتصل
انطيته رفض ردت احضره اجت رساله
على الواتس
«،،،،مساء الخير ست جنات اني ارشد اخذت
رقمج من السجل وخابرتج على
طلعتنا لباجر
كلت
«،،،عزه هذا المدير
جاوبت
«،،،اهلا استاذ واعتذر اذا انطيتك رفض
«،،ماصار شي اني خابرت حتى اگلج باجر
لاتجين بسيارتج اني اجي وياي
استاذ امجد وست اسماء
ونطلع لبغداد
«،،،تمام
«،،بلا زحمه دزي الموقع مال بيتكم
«،،اي استاذ
دزيت الموقع كتب
«،،باجر لازم بالسته نطلع
«،،،تمام
جاوبته كتب
«،،تصبحين على خير واعتذر على الازعاج
«،،،وانت من اهله وماكو اي ازعاج
انطيت خبر لابراهيم ودانيه بروحتي
ثاني يوم اجه بموعده صعدت يم اسماء
وطلعنا لبغداد اسمعه يحجي وي استاذ
امجد على الدوام والمؤتمر
جنت ماانام من وره قهري
والتفكير بالصار
بيه
مااعرف شصار بيه راسي ثگل ردت اصحح
ماكدرت سندته على الجامه اثاوب
وعيوني تدمع مااعرف
شلون غفيت ورحت
بسابع نومه
كعدت وره ماادري شكد عيوني صارت
بعيونه جان صافن عليه بالمرايه
عدلت روحي وباوعت
للطريق سالت
اسماء
«،،،وصلنا
«،،،لا بعد نص ساعه نطب بغداد
«،،ها
طلعت جهازي والتهيت بي بس جنت كلما
ارفع راسي المحه يباوع عليه
ومن يشوفني يدير
راسه
كلت اكيد كاعد يفكر بالي سمعه وشافه
من كريم بذاك اليوم خجلت منه
كلش ونزلت راسي
بعد مارفعته
وصلنا وتغدينا على حسابه وراها حظرنا
المؤتمر انتبهت كم واحد سلم علي
وگله شيخ
ماعرفت ليش هيج كالو اله جنت اشوف الكل مهتم
بي ومسويله قدر جبير ويتعاملون ويا
باحترام زايد
كملنا المغرب
راسي صدع من السفر والطريق ودوخه
الحجي بالمؤتمر صعدت يم اسماء
تعبانه من وجعه
سالت
«،،،ها جنات هم الشقيقه هاجت
«،،،اي والله وماجايبه دوايه وياي وراح
تعبني كلش بالطريق
هو اجه صعد واستاذ امجد ويا سال
««،،احد محتاج شي قبل لانتوكل
«،،،لاا
جاوبته هي حجت
««،،والله استاذ جنات هاجت الشقيقه مالتها
ونست اجيب الدوه وياها يعني بلا زحمه عليك
بلكي نشوف صيدليه حتى
تاخذ الدوه
وتشربه لان خطيه النوبه من تجيها تعبها
كلش
«،،،تمام وسلامتج ست ماتشوفين شر
«،،شكرا استاذ
جاوبته بفشله حرك من شاف صيدليه
وكف وسالني
«،،شنو اسم الدوه مالتج
«،،،اني هسه اجيبه
جاوبته نزلت ورحت للصيدليه انطيت اسم
الدوه للصيدلي هو طب واجه
وكف مسافه عني
اخذت الدوه وانطيت الفلوس مشيت
هو طلع كدامي صعد واني وراه سال
«،،عندج مي
«،،،ها لاا
«،،،لحظه
هم نزل راح لمحل بصف الصيدليه رجع وره
لحظه شايل علاكه فتح الباب من
يمي وكال
«،،تفضلي
اخذتها منه عبالي بس مي صعد حرك
وطلعنا
«،،اشربي الدوه لاتروحين تتخربطين
«،،،،اي
جاوبت اسماء فتحت العلاكه شفت مي
وعصاير ونساتل وكيك رفعت
راسي جان يباوع عليه
بالمرايه
كال
«،،هاي حگ الطريق الج ولست اسماء
«،،تسلم استاذ
هي ردت علي اني كلت
«،،شكرا الك
شربت دوايه وهو هذا الدوه من اشربه انعس
وراسي يثكل وهم نمت ماكعدت الا
تقريبا وصلنا
وصلني اني بالاول نزلت سلمت وراحو
غاده
غفيت بحظن حمزه واول مره عيوني تنام
براحه جنت فرحانه بي وباعترافه
اليه واني هم فرحت كلش
لان كتله احبك وحسيتها
من صدك طلعت
من گلبي
فتحت عيوني ،،،،،، نايم وغافي خال
ايده على خصري وايد اللخ
نايمه عليها جان قريب
كلش مني صفنت
بملامحه عبالك
اول مره اشوفه
حمزه حلو اسمر وعيونه وساع ضخم وجسمه
متروس وطويل الي يشوفه يكول
يلعب حديد مزين خفيف
حاجبه نصه مشيب
وشاربه هم من
اثر الوحمه
اذكرت كلام الاء صديقتي من كالت
رجلج حلو وانعجبت بي بذاك اليوم ماغرت
بس هسه كمت اغار بجنون واريده
بس اليه
فتح غمضت عيوني بسرعه وسويت روحي
نايمه لمني لحظنه بهداوه وباسني
من راسي ردد بصوت
ناصي
«،،،احبچ ياجفن يارمش ياعين احبچ
يابعد عيني ونضرها
ابتسمت وفتحت صفن بعيوني كمل
بصوت متغير
«،،،هلا بحيلي وبعد حيلي
ضوه عيوني وسهر ليلي
گلبي كام يكمز من الفرح وحسيت بروحي
راح ابجي من هالكلام الحلو قرب
وباسني بهداوه وجابني
لصدره حسيته
ضاع وضيعني ويا وخر بصعوبه
وكال
«،،هوه ربج تارس الدنيا لچن انه اريد هوه
ريتج
رجع باسني بس هالمره بقوه هم شمني
من رگبتي وهمس
«،،،،،احبج يا اجمل ماخلق ربي من عباد
احبج يااجمل ذنب سويته
جنت عبالي اخجل منه ابتعد بس كلامه
دوخني وخلاني احظنه وارد
«،،،،واني هم احبك يااجمل صدفه صارت
بحياتي
صفن بعيوني كملت هايمه بي وعاشگته
عشك جبير من بسته من خده الي
بي الوحمه كلت
«،،،انت الله خله بيك علامه وخصك بيها اليه
انت بس اليه حمزه
فتح كملت عيوني بعيونه الي ضاعن من
وره كلامي كملت
«،،عيونك هاي اليه وگلبك هذا
خليت ايدي على كلبه كملت
«،،،بس اليه
سكتت وكملت مبتسمه وكل كلمه احجيها
اكد عليها گلبي
«،،،انت روحي وگلبي وعقلي واهلي
وناسي واماني بهل الدنيا انت ابويه ورجلي
وابو بيتي وابو ابني انت الاول والاخر
وانسد السجل
«،،اوف ولج شسويتي بيه
حجه هيج وباسني وخر يبوس بخدي
يردد صاير
نار
«،،،ولج راح اگضج وماارحمج
وخرت منه بسرعه وكعدت خجلانه من الي
حجاه كعد صافن عليه بعيون ذبلانه
ومبتسم كال
«،،،انتي عذاب اليه
كمت من يمه اردد بخجل
«،،،،،النومه تاخرت وجهي اغسله
«،،،هههه
خرب ضحك وانتبهت اني كاعد اخربط بالكلام
كلت ومشيت لباب
«،،،اروح
فلتت منه ومن الي كمت احس بي
طبيت لغرفتي رحت للحمام وكفت
كدام المرايه صافنه على وجهي
صاير دم وعيوني تلمع
من الفرح
اذكر كلامه وحظنه وبوساته ابتسمت
خجلانه من الصار قبل شويه
غسلت وطلعت
هو طلع من الغرفه مبتسم والوجه
يضحك غمز وكال
«،،،اجيبين بويه واخذ حگي منج
مربع
گلبي كام يدك بجنون مشيت بسرعه اسمعه
يضحك بصوت قوي طبيت المطبخ
رانيه واكفه تحضر بالريوك
يمها بيبي وعمه
شافني ابتسمن
الخجل زاد كلت
«،،،تصبحون على خير
«،،،،،هههه قصدج صباح الخير
رانيه ردت انتبهت فشلت عضيت شفتي
وكلت
«،،،ها اي صباح الخير
«،،،هلا يمه شلونج اليوم
بگلبي كلت ورد جوري
تاخرت بالجواب مبتسمه واذكر
الصار
«،،،نحن هنااا
رانيه حجت يم اذني فزيت وجاوبت
«،،،ها الحمد لله زينة
«،،،هههه
خربت ضحك هن ابتسمن هو طب كال عيونه
عليه مبتسم
«،،صباح الخير
«،،،هلا يمه صباح النور
كعد يم بيبي سالته خجلانه
«،،شتريد ريوك
««،كلشي من ايدج حلو وطيب
خجلت بعد اكثر من جاوب هيج شفت
رانيه تلعب بحواجبها كلت
بهمس
«،،،انجبي
«،،،هههه
خربت ضحك جعفر طب وكال
«،،،،ريوكج حبيبه تره طگنا الجوع
«،،،شتريد اسويلك
«،،،كلشي من ايدج طيب وحلو
««،هههه
خربت ضحك حمزه هم والحجيه وعمه
هي ويانا صفن علينا وفر راسه
وسال مبتسم
«،،خير اشوفكم تضحكون
««،ماكو شي بس قبلك حمزه هم كالها
لغاده
رانيه حجت هو صفن على حمزه ابتسم
بس ماحجه شي تريكنا كل ساع
يباوع عليه والفرح بملامحه
كال
««،،يمه لاتسون غده اليوم راح اشوي سمج
عقجت خشمي كمل مبتسم
«،،،وراح اجيب منسف مال دجاج الج
«،،،تسلم
جاوبته مبتسمه جهازه دك كام وكال
«،،من تكملين جيبيلي جاي
«،،،اي
راح من يمنا جنت مكمله صبيت اله واخذته
شفته بغرفته طبيت بالجاي كام
اخذه مني يحجي
وي واحد
«،،،،تمام بس گله الاتفاق مثل ماهو
اي ابو عمار انه كتله اخذهن لچن علي
التصريف يعني اذا ظلن ماانباعن
يرجعن علي
عفته يحجي وطلعت من يمه
رحت لغرفتي رتبت كم شغله وغسلت
الحمام جان غاسل يمي
خليت هدومه بالغساله
وشغلتها طلعت
هو طب سد
الباب وكال
«،،،،راح اروحن لابو طلبه
«،،ها يعني هسه
«،،اي
«««،ليش يعني اعرفك تروح العصر
ابتسم وقرب مني اخذني لحظنه يتفرس
بملامحي بشوگ رد
«،،،مطلوب نذر اله ولازم اوفي
صفنت علي وسالته
«،،،شنو هذا النذر
«،،،نذرت بس تحبيني مثل ماحبيتج
الا اذبح طلي واحني رايه واطش،حنطه
لطيور ربج يم باب ابو طلبه
تفاجأت وجاوبته
««،صدك حمزه انت يعني هيج نذرت
«،،،اي بويه ولو رايد الله روحي هم انطيها
وفدوه لعيونج تروح روحي ياغيده
وكلشي املگه
عيوني غورگت ودمعتي نزلت مسحها
وكال
«،،،،كتلج لاتبجين تاذيني دموعج
شفت النظرات تغيرت والوجه صار دم
عرفت راح اسمع كلمه منه تخليني
اخجل
وخرت منه اردد
«،،،،شتريد تلبس
ذب حسره وجاوب
«،،،الدشادشه الرصاصي طوخ
طلعتها اله اخذها مني لهيت روحي ارتب
بالفرشه بدل كال
«،،،لاتعبين روحج اركدي بويه مابقى
شي وذبين حملج
انداريت علي واكف يعدل باليشماغ
والعگال صفنت علي من صدك
شگله شيخ سال
مبتسم
««،،اروحن اخلي من ذاك عطري الي دفنتي
ابتسمت هو ضحك بصوت وكمل
«،،،والله عدالي جاتله واحد ودافنته
بالبستان
«،،عوف هاي السالفه
«،،،هههه غير لو اكدر كلما اذكرها اخرب ضحك
عليج
««،،كافي حمزه
جاوبته فشلانه وخجلانه جعفر صاحه
كال مبتسم
«،،يله راح اروحن اوفي نذري
«،،،الله وياك
يمامه
من رجعت خاله جانت طبيعيه عرفت هو ماحجه
شي لان اجه وهن ماكو واني هم
ماحجيت شي من سالت
ليش رجعت كتلها
كليتي كامت توجعني وصرت فد مره
ويمامه هم ماسكتت ظلت بس تبجي وتعبتني
اقتنعت بالكلام وطلعت جهازي من جيبها وكالت
«،،،هذا جهازج لكيته فوك الفرن
جان صرصور وقديم هي انطته اليه
حتى من تروح للشغل تخابرني وتطمن عليه
اخذته منها كالت
««،«الحجيه ظل بالها عليج خلي اخابرها
اطمنها
«،،،اي
خابرت عليها حجت
«،،،هلا ام منير اي وصلت والله متخربطه
يمكم كليتها توجعها ورجعت من
شافت نفسها بعد ماتكدر
سكتت شويه بعدين ردت
«،،لا تسلمين لادزين مهيب
نزلت راسي كارهه حتى اسمه مو عاد
شگله ردت
«،،لا حجيه والله كتلها اوديج كالت مايحتاج
اني راح اروح لصيدليه اجيبلها
دوه تسلمين والله يخليلج
الحجي والولد
الله وياج
سدت الخط كامت وكالت
«،،اروح انظف ياسين واغسله
«،،تمام خاله
طلعت من يمي صفنت على يمامه غافيه
بحظني روحي انمردت وانقهرت كلش لان شلت
هم وين راح اشتغل حتى اكدر اصرف
عليها هي والله ماجنت شايله
هم روحي ولا اريد شي
من هالدنيا ردت
بس اوفر الها الي تريده وماردتها تحتاج
شي
تمددت وخليتها يمي بجيت بشهگه مخنوكه
وادعي على اهلي العارات بالموت
ثاني يوم هي راحت وحدها الهم وايام
مرت مارحت وياها بحجه مرضي بليل
بجيت على حالي لان جنت محتاجه فلوس ليمامه
صارت جبيره وقوطيه الحليب كامت تخلص
بسرعه وحليبها جان غالي وويا
حفاظات يعني يردلها مصرف
يومي واني ماظلت عندي
فلوس وراتبي ظل
يم الحجيه
شلون اطلبه منها راح تسال ليش،بطلتي من
يمي شراح اجاوب اكول لكيت شغل
بغير مكان خاله ام ياسين
راح تسالني وين لگيتي شغل وليش
ماتردين تروحين للحجيه دخت ودوخني
زماني وانلعب بيه طوبه واني
بعدني بعمر صغير توني
صرت 18
ورة كم يوم بليل ساعه 12 من نامت خاله
يم ياسين وظليت وحدي اني ويمامه
جهازي دك باوعت اله جان رقم غريب
گلبي ندسني وكلي هذا هو انطيته
رفض رجع اتصل هم رفضته
اجت رساله
«،،،،حنين اني مهيب بداعه بنتج افتحي الخط
اتصل جاوبته بعصبيه
«،،،انت شتريد مني ماكفاك السويته بيه
ماكفاك گطعت رزقي وخليتني بدون شغل
اختنگت من حجيت هالكلام هو رد
«««اسف والله تندمت لان سويت هيج وانتي
صاحبه فضل عليه
ماجاوبت كمل بتوسل
««،حنين والله كرهت روحي لان تحاا
سكت كملت اني
«،،انت شنو بس فهمني شناقصك نقيب
وابن ناس معروفه وابوك وامك ذهب وسمعتهم
مثل الورد ليش،،،هيج سويت ماتخاف
الله بعرضك لا فد يوم
هم يصير بخواتك
السويته بيه
مارد كملت بغضب ودموع
«،،،روح وبعد لاتتصل وحسبي الله عليك انت
وكل واحد مايخاف الله بعرض
الناس
سديت الخط وحضرته ذبيت جهازي ابجي
بشهكه ثاني يوم خاله راحت الهم
الضحى اندك الباب طلعت
شايله يمامه
فتحته لكيت علاليك يم العتبه صفنت
عليهن مديت راسي باوعت للشارع
لمحته هو حرك وراح
رجعت باوعت عليهن فتحت وحده لگيت
ست علب حليب وعلب سيرلالنك اللخ حفاظات
وكلينس معطر وبوطره وشامبو اطفال
وضبه فلوس ام خمس وعشرين
طببتهن لجوه ورحت لجهازي فتحت الحضر
دكيت علي ترميشه لان ماعندي
رصيد خابر حجيت
قبله وبعصبيه
«،،،تعال ااخذ الجبته مااريد اي شي منك
«،،،،هاي ليمامه مو الج
«،،،ااكلك تعااال اخذهن
صرخت بي جاوب بهدؤ
«،،يبنت الناس كولي اليه شلون اكدر اعتذر منج
واخليج تسامحيني تره لا ليلي
ليل ولا نهاري نهار من
السويتو بيج وانتي صاحبه فضل
عليه وانقذتيني من الموت
سكتت كمل
««،اعرف بروحي شسويت واكرر اسفي الج
الف مره مو مره وحده واعتذر منج منا الما
الله ياخذ امانته مني
««،ليش انت تعرف الله
جاوبته بعصبيه رد بغضب
«،،،كافر اني يولي ابو جهل اني
سكت وبعدين كمل بنبره اهدأ، ،،،بس احسه صار
نار
«،،ام يمامه اني اكرر اسفي الج واعتبري الجبته
هديه لبنتج والرسول تره قبل الهديه
«««مااريدها تعال اخذها
«،،يابه اعتبريها من راتبج مو بعدج مو ماخذته
من امي هاهيه اعتبري منه
سكتت كمل
««،واتمنى ترجعين للبيت لان هي ادور على بنتج
وفكدتج انتي وياها واني وحگ هو
الله بعد مالي شغله بيج
««،اي صدكت
«،،،يابه ازين شاربي بالقندره اذا بعد
الي شغله بيج
مارديت كمل
،،،اني لازم اروح واتمنى منج تسامحيني على
السويته لان والله اني شكد دورت عليج
حتى اساعدج وشفتي بذاك اليوم
من انقذتج من ذولاك الجلاب
شلون حجيت وياج
بس انتي انهزمتي
مني
نترت بي
«،،ماجنت اريد منك مساعده اني اعرف ادافع
عن نفسي كلش زين
سكت وجاوب وره لحظه
«««اي يابه انتي ذيبه وماكو منج
«،،كااعد تستهتزء حضرتك
،،،يامال الجتله شبيج بس تعاركين الاوادم اعرفج
ذيبه وكاعد امدح بيج
سكتت سمعت حجي يمه كال
«««مع السلامه واتمنى اشوفج بيتنا عن قريب
سد الخط كعدت وصفنت على الغراض
الي جابهن اعرفه تندم،،،،،، لان عرفني
اني نفسي الي انقذته بس شلون ارجع لبيتهم
وهو سوه هالشي ماعرفت شاسوي
اروح ادور شغل لو ارجع اشتغل
عدهم
مهيب
كملت دوام شلون مااعرف كعدت بكافي انتظر الولد بالي كله يم السويته بهل البنيه وكرهت روحي كلش لان سويت هيج ومااعرف شجاني
وليش تخبلت عليها واني،،،شايف اشكال والوان
بس هي جانت مختلفه كلش ثكيله وماتهزها
كلمه غزل ولا نظره بالعكس جنت اشوفها تضوج
وتشمئز من هيج سوالف بس كلت هاي تبيع
ثكل وبعدين تجي للدرب بس لا طلعت
مو مثل ماجنت اتصور گضبت
خشمي اذكر شلون ضربتني
وعضتني من صدري
كلت بقهر
«،،،،حيل بيه واستاهل لان تحارشت بشريفه
ومستورة
ونيت من قهري رددت
«،،،والله وكت اني النقيب مهيب محمود اترزل
من وحده زعطوطه بكد الشبر ومااكدر
اردها بس والله من ايدي واستاهل
الصار بيه شبيه اثول
اعمى ماعرفتها هي
نفسها الي
خلصتني بذاك اليوم
سكتت اشوفها بين عيوني مو هي متغيره
كلش لا الخلقه نفسها ولا الجسم
ذيج وين وهاي وين
والعيون جانت طافيه وحزينة
ماافتهمت شنو فلمها هي جانت تبيع كلينس
والناس ترحمها شوكت ازوجت وجابت
هالبنيه وشلون هيج تغيرت
من فاره لغزاله تخبل
من حلاتها
«،،،الله يساعدك ولك
انتبهت الولد اجوي كعدو يمي كلت
بدون واهس
«،،هلا
صفنو عليه سالو
««،خير بيك شي
ماكدرت احجي الي بيه لان السويته ماينحجي
لاحد وعيب بحقي احجي كدامهم
لان خفت اوكع من عيونهم
لان اني شفت نفسي
واحد مايستحي
وبلا اخلاق
جاوبت
«،،،تعبان من الشغل
«،،ها عبالنا مضروب بوري من وحده
بگلبي كلت
««،لا والله ماكله رزاله من وحده ومضروب
قندره من هاي الزينة
ورثت جكاره واخذت نفس طويل اريد احرك
روحي بيها اسمعهم يحجون ماافهم
شي ترخصت وره مشوار بحجه
التعب ورجعت للبيت طبيت للمطبخ رحت
للصاله امي وابويه كاعدين سلمت
وكعدت يمهم اسمعهم يحجون
بسالفتها ابويه حجه
«،،«ام منير انطي فلوس لام ياسين خلي تودي
حنين للدكتوره خطيه صارلها جم يوم
ماتجي علينا وخاف هاي مريضه
كلش وماتحجي الها
««،اي اني هم كلت هيج وباجر من تجي راح
انطيها فلوس حتى توديها للدكتوره
تشوف شبيها
ساكت مااكدر احجي شي امي ذبت حسره
وكملت
«««والله جانت مسوي حس بالبيت هي ويمامه
وگلبي صاير نار عليها اريد بس اشوفها
واخليها بحظني لان تعلمت عليها
كلش
حجتها بتاثر ومبين عليها مقهوره ابويه رد
«،،،اي والله اني هم تعلمت على هالطفله اسمعها
تبجي وتناغي واحس اكو روح بالبيت
وهي هم البنيه حبابه وخدومه
كلش
كمت امي كالت
«،،يمه مهيب اذا تكدر باجر اخذها وي خالتك
للدكتور
«،،،الله كريم يمه منا لباجر اشوف اذا
كدرت اروح عليهم
مشيت من يمهم وصعدت لفوك كعدت بغرفتي
صافن ومااعرف شلون اكدر ارجعها
لهنا
غاده
كاعده بليل احجي ولي ليلو كالت اجه
قائد ترخصت وراحت،،،،كمت احضر تعلوله
لحمزه جان كاعد يم جده يحجون
بسالفه تخص البستان
رحت للمطبخ خليت فواكهه للكل شلت
صينيه وديتها للمجلس طبيت
سلمت على الحجي
الي تعامله وياي
تغير عن الاول
هو شافني
كال
«،،،حمزه اخذ منها
جان منزل راسه شافني كام واجه
عليه مبتسم وكال
««،تسلمين بويه
همست
«««لاتاكل هوايه تعلولتك يمي
الوجه ضحك ورد
«،«ادللي ياجمره گلبي
من يگلي هالكلمه حالي يتخربط
وگلبي يكوم يدك سريع مشيت من يمه
مبتسمه لان هاي سمعتها
من اعترف بحبه
وهو عباله
اني نايمه
وديت الصينيه اللخ لعمه وبيبي الي حجت
«««اريد اگله لابو جمره حتى يعزم زلمه رغد
وعيالها على الغده
«،،،اي عادي بيبي كولي اله وخلي يعزمهم هذا
الخميس شدكولين
««،اي هو هم هيج
كمت وكلت
«،،،محتاجين شي
«،،،لا يمه تسلمين روحي ارتاحي
طلعت من يمهن اخذت الصينيه مالتنا
ورجعت لغرفتي خليتها على الجربايه علگت
التلفزيون وكعدت انتظره ماكو شي
يسوي واهس وخليته على
افلام كارتون توم اند
جيري هو طب
شافهم ابتسم وكال
«،،،ها بويه المود اليوم كارتون
«،،،ملل ماكو شي حلو
كعد يمي كلت
«««حمزه بيبي تريد تعزم رغد ورجالها واهله
على الغده
«،،اي شكو بيها شوفن شتريدن وانه حاضر
««،ماتقصر ابو علاوي
ابتسم من رديت هالرد وجاوب
«،،شوكت يجي واشوفه بحظنج
«،،هانت ماظل غير كم يوم ويشرف
الوكح
«،،هاي شي اكيد راح يطلع وكح لان ابوه
جان هيج
صفنت علي
واجه بالي شلون هد على بيتنا واخذني غصب
وكلت وي نفسي الله اله حكمه وسوه
زين من بدل العار بواحد
نار
ابتسم وانتبهت لروحي اني طولت بنظراتي
علي نزلت راسي هو كال
«،،عدالك سرحتي بشي لچن شنو هو مدري
رجعت باوعت علي تنهدت وجاوبته
مبتسمه
«««كتلك انت مو شويه وابنك شلون مااشوف
راح يطلع مثلك ويشلع گلبي
««،هههه هذا الشي اكيد ومن هسه حضري
روحج تركضين وراه بالبيت
والبستان
«««هههه راح يصير عندي مارثون اركض
وره جهالك وماالحك
سكتت من صفن عليه بذيج النظرات الي
تلعب بروحي لعب كال بصوت
متغير
«««تريدين بعد جهال ياجمره گلبي
افتهمت وخجلت منه كلش كمت من يمه
اردد
«««اشيل الصينيه
«،،،انه اوديها اكعدي ارتاحي
هو شالها وطلع من يمي طفيت التلفزيون
ورحت للحمام غسلت وجهي بغسول وفرشت
سنوني طلعت هو راجع مطفي الضوه
كاعد يحجي وي واحد بشغل
كعدت
يمه
اسمعه واثاوب راسي ثكل ومااعرف شلون
نمت حسيت ايد اخذتني لحظن
دافي ولمني بي بهداوه
نمت مرتاحه للمره
الثانيه واحس
بامان بحظنه
ليلى
بليل كاعده احجي وي غاده على وضعي،لان
بديت اذب من راسي واي شي اكله مايثبت
بمعدتي وهالشي تعبني كلش
قائد طلب مني اخذ اجازه طويله وفكرت اخذ
لان جنت تعبانه كلش وهم مليت لان غاده مو ويايه هو طب اشر بعيونه ابتسمت وسويت مثله
كلت
«،،،يله حب اروح لان قائد
اجه باي مح مح
ابتسم سديت الخط كال
««،،،اريد مح مح
«««ههه تره مو مقصر رايح جاي المح ماخذها
مربع
قرب وكال
«،،غير لو جاي اشبع منج
صفنت علي من يتغزل بيه العيون تذبل
والوجه يصير دم باسني بهداوه وبعدين صارت
اقوه ضعت ودخت بين ايده
همس من يم شفتي
««،،إخ ليبه دش
ضحكت وكتله
«،،هاي شنو
انتبه ورد
«،،،هاي احبج بالالماني
«،،الله شكد حلو
خله عيونه بعيوني
وكمل بنظراته الحلوه
«،،زايت ايخ دايش گنه هات ماين هرتس اندلش
آين تسوهاوزه غفوندن
«،،،ههه هاي هم شنو معناها
«،،،معناها ياشريان گلبي
منذ ان عرفتك واخير قلبي وجد له وطنا
گلبي كام يدك سريع واذكرت ذيج اللحظه
الي سالني بيها انتي وطن لو
منفى وجاوبته
انت وطن وبدت قصه حبي اني
ويا بسته من خده وجاوبته
«،،وانت هم وطن وروح وقلب وكلشي بحياتي
والحمد لله قصه حبي اني وياك
انتهت مثل مااريد وجنت
احلم
«،،اي تعبنا جثير ليلى يله صرنا سوه
«،«اي وجاينا نفر ثالث
ابتسم وباوع لبطني ردد
«،،تعرفين شاريد
«،،اي بله شتريد
«««اريد بنوته تشبهج بكلشي
صفن عليه وكمل بصوت متغير
««،اريدها بيضه وعيونها مثل عيونج
يعني نسخه ثانيه منج
ابتسمت وجاوبته اريد اتحارش بي
«،،،خاف تطلع تشبهك
«،،وشبيه ااني عبالك مو عاجبج
«،،،ههه لا والله تعجبني واموت عليك بس
حبيت اتحارش بيك
«««لااا بينت يابه وزعلت
«،،ارضيك
«««مااريد
كام يجر ثكل بسته من خده وكلت
«««شبي حبيبي صاير مايحب شقه
«،،كاعده تتنمرين عليه جثير
وراح ازعل واروح
لسعاد
«،،،هههه كول والله
«،،،حرام احلف واني جذاب
رد يضحك وكمل
«،«كاظم ماخله بنفسه لا اسمج ولا اسم امي
اثنينهن غنى عليهن
«،،ههه والله صدك بس اغنيتي احلى مو
«،،اي طيحت حظي بالغربه اسمعها وروحي
محتركه ومعطبه
صفنت علي من حجه بتاثر لزمت خده وكلت
«،،،انسى الماضي قائد وخليك بالمستقبل
الملامح تغيرت بلحظه والمزاج هم
باوع عليه بنظرات حايره والقهر ترس
ملامحه
«،،،صعبه انسى العشته هناك لان انتي ماتعرفين
شصار بيه هناك ولاا اا
سكت ماكمل جاوبته
««،اني مايهمني الصار هناك الي يهمني انت
رجعت اليه وقصتي وياك انتهت
مثل ماجنا نريد ونحلم
جاوبني بوجه مطعون
«،،ياريت مصدكج بذاك اليوم جان لا رحت
لهناك ولا صخمت روحي بشي
لحد هسه معذبني وكاره
روحي من وراه
جنت اشوفه يصير هيج ويحجي كلام مو مفهوم
ويسكت وعبالي الشرب سالته
««،قصدك الشرب قائد
سكت وغمض عيونه بقوه
«،،مااريد احجي شسويت خايف لااخسرج
گلبي هبط من سمعت اخر شي سالته
بخوف
«««ليش انت شسويت هناك وخايف تحجي
وتخسرني
ماكدر يرفع راسه ولا حجه شي شهگت
وكتله بصوت يرجف
«،،،عرفت نسوان قائد
شكرا لزيارتكم عالم روايات سكيرهوم
