رواية ارحموني ولو رحمة مرة الفصل الثاني والثلاثون 32 بقلم فراقد حسن علي

منى /بقت يمي عمة هناء

والبنات خواتي مريم وفاطمة 

ونسرين وياسمين 

وياهن كوثر بت عمه هناء

-البنات مريم وفاطمة نظفن المطبخ وغسلنه

-وعمة هناء حارت ويه أسلام تخبل من الخوف بس يبجي

-وام رامي حارت ويه أفراح تبجي جوعانة 

-كوثر أحتارت ويايه كومتني بالكوة 

دخلت للحمام بس شمرت مي على روحي

وطلعت جسمي كله يرجف 

-انوب افراح مردت كلبي 

جوعانة وتبجي ومتقبل تاخذ الممية 

-شويه واندكت الباب وتدخل علينا 

عمه شمس،، وعمه كمرة،، وعمه نجمة 

وياهن جهالهن 

واختي هالة 

وهذاك النويح والبجي 

-ماكو اقل ساعة وتدخل علينا 

جده صفية وخالات أركان 

وهم نويح وبجي

-ومنو اليجي اكعد واسولف كل قصة من جديد وشلون صار الحادث

-بعدنا بهوستنا وضرغام جاب أقبال ،، وأمه 

ومرت أخوه ،،وأخته 

وهو وأخوه ابو محمد طلعوا للمستشفى

اسم الله الناس والاقارب والمعارف وصلهم الخبر ان فرح ماتت محروكة وكبل 

ما عدهم تفاصيل 

-يابه الاخبار العائلية تنتقل بسرعة بفضل 

التليفونات دكول لواء الذيب 

بقيادة أبو الوليد بالرد السريع

بس رنة وحده وأصغر خبر يطش بسرعة 

عمه هناء وعمه شمس استلمن المطبخ وطبخن الغده للناس الموجودين

أركان/بس انطيت خبر لجماعتي عندي 

حالة طارئة وغلقت التلفون ماعندي مجال 

ارد على الاتصالات مخبوص ويه أبويه وامي

-واكفين اني ومحمود ورامي وابو رامي

ومحمود يلوب ودموعه بطرف عينه 

اني اعرف محمود من يخاف لو من ينغث 

يكوم يسحك جكاير سحك 

ويسوي جكاره سحبتين 

وتبقى أيده ترجف 

-ضرغام أتصل على محمود لان جهازي مغلق

وأستفسر من عنده شنو السالفة 

-ودخلوا علينا العزوة عمامي و اولادهم 

وعيونهم تنفث شرار 

-عمي باسم شوفت دموعه تكسر الخاطر يسأل على فرح ودموعه تكطر على وجهه

-بقوا يستفسرون شنو 

وشلون صار الحادث

وليش رفل سوت هيج بفرح 

-وشلون أخوانها تعدوا عليه و داسو بيتنا 

وانوب ضربوني واني بداخل بيتنا 

-اجاني ضرغام بالملابس العسكرية 

وياه أخوه ابو محمد ،،

وهم بقوا يستفسرون 

نوري/محمود بويه دبرلي اسعاف

خرج البت من المستشفى هنا يلوثها ومايعرفون يداوها وتبقى مشوهه يعرفون هنا بس يعذبون بالمرضى ويلصخون جلدهم بدون تخدير 

2 

محمود/عمي كول غيرها وين اخرجها 

الدكتور يكول/ نراقبها لباجر يخافون على كلياتها تيبس عروكها من الحرك 

باسم/بويه خرجها أعالجها بطب العرب افضل واسرع من طب المستشفى

محمود/عمي صدك تحجون شنو طب عرب هنا خوش اعتنوا بيها وداروها 

اسحاق/ول يابه مو هل ابوك متكوم واكع يكول صريخها فزز اهل المكبره صالخين جلدها بدون تخدير ،،خرجها نعالجها بطب العرب

اركان/عمامي كلهم وكفوا بوجه محمود بس هو معاند يريد يبقيها 

وهم معاندين اكثر من عنده يردون يخرجوها ويعالجوها عند طبيب العرب

*وأكيد بالاخير أنتصرت كلمة عمامي ومحمود خضع لكلمتهم 

-وعمي باسم قفل كام مايسمع من محمود وكام يرطن عجمي على راسه وحملة مسؤولية حرك فرح 

لان ما يكدر على مرته رفل 

-صارت تلفونات بين حجي نافع وابويه

الحجي يكول/ما قلبت على الولد هنتهم وضربتهم كبال العالم لان تجاوزا على أركان 

-بس شلون اركان يضرب رفل و يمد ايده عليها ويتقاوه على حرمة 

-وابويه يرد عليه /رفل السوته مو شويه وحركت فرح والبت بين الحياة والموت 

-علاء نسمعه يكمز ويصرخ /تكعدون للعشاير

وعمي نوري يصرخ عليه/ احنا نفصلك ونفصل عشيرتك مربع

-المصيبة رفل مجذبة عليهم وخوش مألفة الهم قصة تكوللهم /اني ماحركتها هي كاعدة تمسح الكاع وطخ جسمها بالطباخ وأنكلب عليها الجدر

-واركان تهمني بحركتها وهو يكرهني

وضربني علمودها وطردني بالشارع

لان اخذت افراح ارضعها

-عمي نوري صارت عيونه بكصته

كال للحجي / هسه تجيب وحده من نسوانكم 

وتجي تشوف بعينها حرك البنية متعمد لو طاخة الطباخ وصار القدر 

-يمكن اقل الساعة وأجانه للمستشفى

الحجي وياه جنته الجبيرة زوجة علاء

دخلت المرأة على فرح تشوفها

وهو الحجي صاير وجه بكد الشخاطة 

يتعذر من هذا ويرد يتعذر من هذاك 

طلعت البنية تبجي و شاورت الحجي 

وهو صفك ايد بيد ويستغفر 

انوب أنشلش ما يعرف شيسوي 

بس دنك بوس راس عمي باسم 

وأخذ جنته وطلع 

-ادارة المستشفى ماقبلوا يخرجون فرح

بس طلعناها على مسؤوليتنا 

وطلعنا اسعاف على حسابنا 

ونقلناها لبيت جدي ناصر

راح وياها محمود وعمي باسم وامي 

-واحنا كلنا رجعنا للبيت 

عمامي محزمين وشادين أحزامين 

على بيت ابو علاء ويردون يهدون عليهم

بس ابويه واكف بوجهم ماينطي بالحجي 

-وصارت هوسة وصياح ولجة تشيب الراس 

انوب الجهال تخبلوا من الصياح والعايط

-خالتي سهام تخبلت على فرح 

اخذت بناتها ورجعت للبيت 

اخذهن عمر ابن عمة نجمة ورجع بيهن

وهالة رجعت وياهم 

منى/شبعت بجي من سمعتهم يسولفون

على فرح وشلون عالجوها 

واخذوها من المستشفى لبيت اهلنا 

-امي اخذت البنات ورجعت 

وراحت وياهن هالة 

بقن عماتي وخالات اركان بالبيت 

وتعالوا شوفوا الهوسة والصايح

وهذا يكعد للعشاير ، وهذاك يكعد للفصل 

-للعصر وهم كاعدين على أعصابهم

ابو علاء خطية اجه بس هو وحده 

على ابويه مدنك راسه ويسأل عن فرح وهو يحجي و يبجي متفشل من عملة بنته رفل الحقيرة 

-للعصر وهم كاعدين على أعصابهم

وابويه يحجي ويبجي مايريد يخسر صداقته وخوته وياه من وره سوالف غيرة وخبث النسوان

-الحجي بكلامه كسر شر عيون عمامي

كال/هسة أجيب ولدي وأذب حهم فدوة جوه رجلين أبو أسلام 

-وبنتي العاق رفل اذب حها جوه رجلين أم أفراح 

-واني متكفل بجميع مصاريف علاج البنية 

-ومو حجي لا وداعة الخوة ادفع روحي فدوة لخوتنا اني وعادل 

انتم ٤ أخوان 

وحسبوني اني اخوكم الخامس وغلطت بحقكم وشتفصلون اني حاضر وجاهز 

عمي نوري هو واركان كالوله // رفل تطلك وبعد مالها رجعه للبيت وحاضرها وغايبها 

يوصلها على أخر حباية 

-هو خطية متفشل هسه لو يكلوله نذب حها يمكن يوافق كال /شتفصلون اني حاضر

وانعل ابو رفل لابو الجرت كراعها 

طلعت عرمة وكحة على خالاتها 

-للمغرب فضت السالفة بمراضاة الطرفين 

-لان اذا فصلوا اركان لان تعدى على رفل وضربها ،، اهلنا يفصلون بيت الحجي اكثر 

اول شي /رفل تنسجن لان اركان يريد يقدم عليها دعوى قتل متعمد 

وثاني شي/ تهجم اخوانها على بيت ابويه عادل ودوسة حرمة البيت وهم يعرفون ماكو احد بالبيت ويعرفون الكل بالمستشفى لان عدنا قدر 

وثالث شي /تهجمهم على اركان هو بوحده وهم أثنين ،، وتهجموا عليه بيتا وضربوه وبشهود الناس هو مريض وخشمه يكت دم 

-والحجي مدنك راسه ،، وماد ركبته يريد العفو والسماح ويبوس بهذا ويرجع على هذاك ،، ويبوس بالصغير قبل الجبير 

ويتعذر من الجميع 

حتى اني صاح عليه وبوسني على راسي كدام أركان ابويه وعمامي 

-لليل وره ما فضت الهوسة كلنا رحنا لبيت اهلنا قفلنا باب بيتنا وطلعنا 

محمود/طلعت ويه الاسعاف

كعدت يم فرح ويايه امي 

وعمي باسم كعد يم السايق

يدلي على الدرب

-اني ماراضي عن طلعتها من المستشفى 

بس كل أهلنا شمروا اللوم عليه

وحملوني سبب حركتها بسبب رفل 

محمود/طلعت ويه الاسعاف

كعدت يم فرح ويايه امي 

وعمي باسم كعد يم السايق

يدلي على الدرب

فرح/طلعوني من المستشفى ودوني لبيت اهلي ،، وبين ما طلعت كلساع واحد داخل عليه يسلم ويسأل عن حالي 

-بهذاك اليوم من كثر ماسلموا عليه 

كلت ويه نفسي// هاي لحظات الوداع 

ماخفت من الموت رحبت بي و أتمنيته

من كثر الالم والوجع حسيته هو المنقذ الوحيد اليرحمني 

-وامي فاطمة تبوس بيدي وبوجهي وبشعري 

وتبجي وكلساع دنكت عليه و بوستني

حسيتها بهاي بوساتها تريد تخفف عني الوجع

كاعدة بصفي وتقرا القران الي حافظته على كلبها ،، تحاول بالتكدر عليه تخفف عني 

-اجاني محمود لفوني هو وامي بجراحف المستشفى وستروني 

وحولوني هو و اركان و عمر و يونس

و عثمان و خالد و جاسم اولاد عمامي 

وياهم شاب غريب بس واكف بعيد ويوجهم

من سرير المستشفى لسدية الاسعاف 

شالوني من الاطراف وخلوني على السدية نزلوني بهدوء بس فرفحت من الوجع

والولد كاللهم//كلبوها على صفحتها الطريق طويل

-شكثر استحيت من طلعوا السدية لباب المستشفى وصعدوني بالاسعاف 

الناس المرضى والمراجعين يباوعون عليه ويكولون// الله يشفيها ، سلامات 

طالع بس وجهي يمكن عبالهم مسوية عملية

-صعد ويايه محمود وامي فاطمة 

وابويه باسم صعد بالصدر

وابو الاسعاف شاطر ما يروح على الطسات

بس حتى هذا مشي بالسيارة يوجعني ويأذيني ويلجم الحرك 

-وصلنا لبيت أبويه 

بالطريق كلساع اغفى وارد أصحى 

الوجع ما يرحم مرد روحي مرد 

والنعاس قفل عيوني

-دخلوني كبل لغرفة أمي ونزلوني على جربايتها موجود بس ابويه ومحمود وامي 

والولد صاحب الاسعاف

-بديت اغفي بعد ما اكدر افتح عيوني 

صدك لو كالوا النوم سلطان 

هواي متوجعة ومتأذية 

بس عيوني قافلة بديت اغفى وارد اصحى

محمود/عمي باسم بس طلع ابو الاسعاف 

طلع بوجه على بيت أبو بريسم 

ابو بريسم رجال جبير بالعمر ومعروف بالمنطقة عنده محل مال اعشاب 

ويعالج الناس بالأعشاب ودواء طب العرب مثل ما نكول 

اجه ويه عمي باسم الرجال ومرته 

وجايب بيده جنطة جلد جبيرة وتنقفل من فوك ،، قفلها كبس

قبل من جنا نشوفه شايل هاي الجنطة 

نكول عليها جنطة المطهرجي

-الرجال دخل ويانه على فرح 

شاف حركها بس من فوك من بداية ظهرها

كال /عرفت نوع حركها 

واعرف شلون اعالجها 

بس لازم المرأة تعالجها اني ما اكدر اعالجها وأتكشف عليها أستحرم واخاف من الله 

وهي خطية تتحرج 

اني اكمل علاجها واحضره الها

وام بريسم تجيكم يومية تعالجها ،

بس لازم انتم تعالجوها ويانه بالعلاج الطبي الخاص بالحروق والالتهاب 

كتله/هاي سهلة خليها عليه اني اعالجها بعلاج الحروق الطبي 

-أني صح دكتور بس أختصاصي اسنان 

اكو شغلات مو اختصاصي احتاج لمضمد متواجد ويايه ونعالجها سويه 

تحتاج تبديل كانولات 

تحتاج تعويض بلازمة 

دورات لابر الالتهابات والمسكنات 

وعلاجات خاصة بحالتها 

ولازم تنظيف يومي لحمايتها من العدوى والاصابة بالجراثيم 

-الرجال طلع علبة جبيرة بيها شلون الفازلين

سألته/شنو هذا 

جاوبني /علاج علاب مشتغله عمك بايده 

بقوة الله بي الشفاء العاجل 

واهم ما بهذا المرهم يخفف الوجع 

ويقلل من الالتهابات لان بي زيوت مضادة للجراثيم وتقلل من تحمر الجلد والورم 

وتمنع العدوى وتعالج هذا النوع من 

الحروق وتقلل من التشوهات والندب 

-علم زوجته شلون لازم تكشط الجلد الميت 

وتنشف الحرك بالشاش (عملية تنظيف تام ) 

وبعدين تدهن ظهرها بهذا المرهم 

-ولازم هذا التنظيف يصير بشكل يومي 

ولازم يصير جدول يومي ويتوزع بالتساوي 

يوم لهذا المرهم الأبيض 

ويوم هو بيده يحرك كمية جبيرة من صفار ألبيض ويحول الصفار على شكل زيت 

وينمسح مكان الحرك بريشة جبيرة 

-اتخبلت وانثولت من هذا الحجي 

هسه اني شجاني وطلعتها من المستشفى

لو مبيقها مو أحسن من هاي السوالف 

شما أشوف عيني راح تشوهة وتتلوث

-كتلهم// اليوم عوفها بدون غسل

خطية شافت الضيم من كثر الوجع 

المراة ساعدتها ومسحت كل الحرك بالمرهم

فرح/دخلت عليه المراه 

كومني محمود من الجرباية وامي وياه 

ساعة يلا وكفت على طولي ماعندي قوة 

جسمي بايد من الوجع 

-شكثر خجلت ومتت بدمي من المراه الغربية وامي لان اني متكشفة بدون ملابس كبالهن 

-محمود وكف كدامي وبدأ يفتح بالشاش

وامي والمراه يصبرن بيه 

لان ويه كل فتحة شاش روحي تطلع من الوجع لان يلجم الحرك

فتح كل الشاش وبقى واكف كدامي

ولزمني من ايديه وساندني ويصبر عليه 

-المراه بدت تدهن بظهري بهذا المرهم الأبيض 

اني من الوجع نبتت أصابعي بيدين محمود 

و بس دموعي تكت وارجف

ماعندي صوت أصرخ لو احجي 

-وزاد عليه القهر المراه تكول /لازم تبقى نايمة جفي على وجهها ،، وتبقى مكشفة .

ياربي رحمتك شنو ذنبي ابقى هيجي مكشوفة واصير فرجة للعالم 

محمود/ميخالف عمري لا تبجين كولي يالله

هسه اغطيج بجرجف خفيف

وارجع لبغداد اروح للمستشفى اجيبلج صداري هاي الخاصة بالعمليات تصير مفتوحة من الظهر تفيدج حاليا 

واجيبلج جراجف نظيفة خاصة مناك 

واجيبلج بلازمة ومغذيات وابر التهابات 

وكلشي يدبر الخاطرج اذا مو مو بالفلوس

يدبر بطرق الصداقة والمعارف

فرح/بعد ما المرأة عالجتني بهذا المرهم حسيت شوية خف الوجع 

نوموني جفي على وجهي 

وغطوني بجراجف المستشفى الاجيت بيهن غفيت دقايق لان تعبت وبعد ماعندي حيل

محمود/رجعت لبغداد وبوجهي للمستشفى

اتصلت على كم واحد من الاصدقاء 

جهزولي احتياجات و ادوات وعلاجات خاصة بالحروق هل كدروا يطلعوهن اليه

ابو المذخر صديق عزيز 

ويعرف يدبر أموره 

واكو واجب وفضل بيناتنا 

جهزلي بعض الامور الطبية اللي احتاجها 

من المغذيات طبية باانواعها 

والكانولات 

وأجهزة الاعطاء للمغذيات والبلازمة

وعلب أسرنجات 

واهم شي الأبر المسكنة ،و ابر التهابات

وباقي العلاجات الأزمة 

فكرت اذا احتاج بعد شي ما اكلف على جماعتي خلف الله عليهم ما قصروا 

جدي سليم 

لو سلمان زوج عمة شمس 

يدبرولي من المستشفيات اللي يداومون بيها 

-رجعت بليل بس غديت خركة من التعب يادوب دخلت وسلمت 

كتلهم /خابرولي على سلمان يجي يخليلها كانولا ،، صدك اجه الرجال وما تعذر 

واستلمتها بالعلاجات المناسبة 

بالتوجية من قبل دكتور اخصائي 

تواصلت وياه عن طريق صديق مشترك 

-وانوب سبحان الله المريض تصير روحه

بطرف خشمه وبسرعة يبجي وبسرعة ينقهر

ويحسن الناس تباوعله بعين الشفقة 

ويشوف نفسه صار ثكيل على أهله

وهم كل الاهل شايلينا بالصلوات 

وما منهم قصور بس اقل كلمة 

لو أقل حجايه من عدهم ياخذ على نفسه ويحسبها عليه

-امي فاطمة حارت بزمانها 

يوم تجي تبات يمي كلبها ما ينطيها تعوفني 

ويوم ترجع لبغداد تبقى يم منى 

ومن تجي تجيب اسلام وياها

-منى نساوتها متعبة وتلعب الروح 

ترجع شكو لكمة تدخل المعدتها 

وكل يوم ماخذها اركان معلكلها مغذي 

وبس نايمة متشوف دربها من النحول والصداع 

-ابويه عادل واركان كل ما صارت عدهم فرصة يرحون ويرجعون عليه 

-يومية يبجون ويايه من تجي المرأة 

ادخلني للحمام هي وامي وتغسل ظهري

بمي دافي وصابونة ركي تصوبنها بالشاش

وتمسح الدهن وتغسل ظهري بعدين بمي نظيف وترجع تنشفه بشاش يابس

-صح المراه تنكع ظهري قبل بساع

بس من تمسح الدهن وتكشطة ينلجم الحرك 

وابقى اصرخ من الوجع ،

-بس كل هذا الوجع

ارحم من وجع المستشفى 

هناك شكد حقراء

ميرحمون المريض

-يوم تدهن ظهري بالدهن الابيض 

عبالك بي مخدر ،،

-ويوم تدهن جسمي بدهن صفار البيض

وتمسحه اليه بريش كبار ،،

-ونحتار منين نجيب الريش 

أهل الديرة كلهم عرفوا بسالفتي 

والناس الطيبة اللي يدورون أجر 

يا بيت عنده دجاج لو بط لو بش يشلعون منهن الريش الكبار ويجبوهن النه

يكعد محمود يغسل الريش بالديتول 

ويشره على جرجف نظيف 

ثاني يوم تستخدمة المراة 

-والبيض شكثر امي توصي بالنسوان ،

ونشتري بيض بط كبار ،،بيض بش ،،

بيض دجاج ،، ونطلع بس الصفار

وابو بريسم هو بيده يحركه ويطلع من عنده الدهن

-وهذا ضيم الغسل والتنظيف بشكل يومي يوم ينغسل الدهن الابيض

ويوم ينغسل دهن صفار البيض 

-انوب ما بقى مكان بيدي من الكانونات

صرت منخل من التزرف 

محمود يخليلي بلازمة لان الحرك يبش سوائل

-ويخليلي مغذي بعد ما يقيس ضغطي وسكري

-ويومية ينطيني ابر مال التهابات

ومرتين باليوم صبح وبليل ،،

-وابرة مسكنة بس بليل يضربها اليه بفخذي

لان مكان العضلة عندي كله محروك

-بالنهار اتمشى بالغرفة او بالبيت 

بس ممنوع خالد و عثمان اولاد عمو أحمد ينزلون من فوك لان لبسي بس الصدرية مال العمليات يبقى ظهري مفتوح 

جسمي بس من كدام مغطى

وامي تقفل باب الحوش للأمان 

-والطامة الكبرى وين 

العفو ما اكدر أكعد بالتواليت 

هنا كلش تأذيت ونفسيتي تحطمت 

ابقى بس أبجي لان من أكنبص ينلجم الحرك 

افخاذي من وره كلها محروكة 

لازم أبقى واكفة 

-وسالفة الثانية حتى أنحرج أسولف بيها

بس مجبورة اكول هاي الفقرة حتى 

يعرفون اللي يلومون شنو جرى عليه من عذاب و وجع ،، وهن كل النسوان يعرفها فترة أيام الشهرية

أجتني واني بداية ايام حركي

ما اكدر البس ملابس لان الحرك بفخاذي قوي

ويلجم بلبس الملابس وبالذات الاستيكة 

من تضب على اللحم 

شفت عذاب نفسي بس الله يعرف بي

خلصتها هذيج الايام بس بجي ولطم 

لو ميتة ولا هيجي مذلولة 

-شكثر امي 

والبنات خواتي 

وعمه هناء و كوثر 

وعماتي 

شكثر ساندني وشجعني وصبرني 

بس هواي تعبت وانذليت 

كلشي بصفحة وابقى مكشوفة بصفحة 

-محمود بليل يمد طوله ويه طولي 

وابد ما ضاج من عندي لو تقزز لو تنرفز 

بالعكس يبقى يسولف ويايه ويصبرني

يكلي //هذا اختبار من ربج ولازم تتحملين

و استغفر الله ما يصير تجزعين 

وربج راح يجازيج اجر وحسنات 

وكولي الحمد لله حركج يتماثل للشفاء

واني متأكد العلاج ماشي صح 

ومراح تبقى عندج تشوهات وندوب

-اما بنتي أفراح هاي المسكينة عذابها بحثاً أخر 

بس أبد ماكطعت رضاعتها

صح ما اكدر اكعد بس اني واكفة ارضعها

واذا اتعب من الوكفة اسحبلها الحليب بالملاطة واخلي بالممية تشربه

امي حاولت وياها ما تقبل بالبداية تاخذ الممية بس من تجوع وتنطيها لا تشفطها

وعودتها على حليب الهوش 

حبته اكثر من القواطي 

وبقينا نشربها حليب الهوش

-هاي معاناتي بقيت وياها شهور 

بين علاج العرب 

والغسل اليومي والتنظيف والدهون 

وعلاج الطب على ايد محمود

يكولون لان سمينة ما اطيب بسرعة مثل الشخص الضعيف اسم الله على الجميع

-بس الحمد لله يوم عن يوم اكو فرق 

وبدا ينشف الحرك ويبني الجلد 

وبديت اكدر انام بهدوء على ظهري

بس الكعدة لازم فراش عالي وترف مو صلب

يعني مثلا مندر أسفنج هش اكدر اكعد شوية 

وارد أنجطل

-أختصرت معاناتي بشي بسيط من الكلمات 

من اول يوم حركي لاخر يوم بيت أبويه باسم

الحمد لله والشكر لله طبت بالتمام والكمال 

بس لون ظهري و افخاذي صار لونهن يختلف عن باقي جسمي والحمد لله ابد ما صار عندي جلد مكرمش او حفر أو ندوب مقززة

وكدرت ألبس ملابس مثل باقي الناس 

ورجعت لبغداد ويه محمود و افراح 

اجى أخذني ابويه عادل وامي فاطمة 

وابويه ذبحلي طلي جوه رجلي 

كمت ابجي ما ادري أنقهرت 

ما ادري فرحت برجعتي سالمة لهذا البيت

ابوية بوسني على راسي

وامي فاطمة كالت//الاربعاء اسوي سفرة 

لام البنين بجاه بختها يم الله ندبتها وماقصرت كومتج اليه بسلامة 

-منى فرحانة برجعتي تكول// هسه يلا ردتلي روحي ،،جنت احس نفسي غريبة من دونج

فرح /اي واضح عليج ضيم الغربة 

من هذا صدرج وركبتج المعلوسة 

كامت تضحك الفطيرة تكول /اذا عندج خافي عيوب لو بوطرة لو حمره وردية انطيني 

كل العندي خلصن من وره مالتي الزنبور الاصفر 

-الفرحة برجعتنا لأسلام يحير شيسوي 

مره يضحك

مره شيلوني 

مره يركص

ميعرف شيسوي عود مكيف برجعتنا للبيت

هو لوتي مكيف على افراح يبوسها من حلكها ومحمود من كل عقله يطرده وهو يضحك عباله يلعب وياه 

-بعد ما كفت الهوسة وخلص اليوم 

لليل أنجمعنا اني ومحمود بغرفتنا 

وهاي اول ليلة من بعد هذاك اليوم الاكشر تنسد علينا باب الغرفة لوحدنا 

بقى يلوب لحد ما نامت أفراح 

بس الصراحة خجلت من عنده 

صح هو على ايده عالجني 

ويعرف كلشي ،، وشاف كلشي كدام عيونه بس بهذيج اللحظة حسيت نفسي مشوهة وما اريد اتكشف كدامه خاف تكش روحه من عندي بهاي اللحظات

-بس هو أبد ما حسسني بشي

لبست دشداشة نوم مستورة 

هو بدا يوخرها من يم جتفي ويبوس بظهري

يكول/تبقين بعيوني وبكلبي فرحتي ولا تخجلين ما اشوف بيج شي خربان لو ناقص 

صبح علينا الصبح بخير وسلامة

ورجعت الحياتي القديمة بس بدون رفل

محمود/يابه اتصل على ابو علاء 

اليوم العصر اروح أطلق رفل يم الشيخ وبعدها نمشي بأجراءات طلاق بالمحكمة

-اتصل ابويه على ابو علاء 

اشوف ابويه عقج حواجبه 

ويكوله/ترى أحنا هل شهرين ساكتين لأن أنشلشنا والبنية طلعت من حلك الموت ومحمود ما صار عنده وكت حاير بمريته 

شكرا لزيارتكم عالم روايات سكيرهوم