رواية ارحموني ولو رحمة مرة الفصل الثالث والثلاثون بقلم فراقد حسن علي
محمود/اشوف ابويه عقج حواجبه
شنووو رفل حااااامل !!
ومن شوكت سالفة حملها ؟؟
وليش يا ابو علاء ما بلغتني بخبر حملها
-أنصدمت شنو حامل !!
//يابه هذا الخبر جذب ،أكيد هاي السالفة من تدابير امها
عادل/يابه ماسمعت هو الزلمه بنفسه بلغني ويكول حامل والها يمكن ٣ أشهر من الحمل
محمود /يابه جذب
وهاي سالفة من تدابير رفل وأمها
ومحد يعرفهن بكدي
فرح/محمود كدام كل أهلي أكولك
وأنت بكيفك بعد أختار
لو اني لو رفل !!!
-لان البيت البي رفل لا أدخله ولا أكرب صوبه بعد مالي حيل لخباثتها وتدابيرها
محمود/فرح لا تخيريني لان ماكو غيرج تاخذ مكانج بكلبي
-ريحي بالج ونامي رغد
رفل ما ارجعها على ذمتي لو تكولي هسه حامل بدرزن ولد
عادل/وشنو ذنبه الولد يعيش يتيم
وابوه موجود بالحياة ويصبح تربات مراه
محمود/بويه جذب مو حامل هاي لعبة جديدة من عدهن
لا تخبلوني وين اكو رجال مايعرف بمرته حامل لو لا !!!
تذكرون من أخذنا افراح للبدوي ابو أيوب
يمكن جان عمرها ٦ أيام
بهذاك اليوم تلاغيت وياها
وصارت بيناتنا لغوة قوية وجلدتها بالأحزام
وهي جانت حائض ومن يومها هجرتها
منين حبلت بعد ؟؟
-واذا تصر على كلامها وتكول حامل
الطفل مو أبني !!! فخليها تحترم نفسها وتنلصم
وما ارجعها لو توزنوها اليه من ذهب والماس
-رحنا العصر اني وامي وأبويه
وبعد السلام و ضيافة الحجي
وترحيبه الحار بجيتنا
ولا عبالك جاين على قضية طلاك بنته
-أم علاء وجها يخرمش وتجرح بالكلام
-وعلاء وخالد كاعدين يمنا بس شامرين
وضعهم على الصامت
-رفل ابد ما طلعت علينا
// عمي من رخصتك اريد رفل تجي تحضر هنا وأسولف وياها بشهود جميع الحاضرين
-ردت عليه أمها /مالها خلك تكعد
حبله ونساوتها براسها وهواي تعبانه
//ميخالف خالة شغلة خمس دقايق و ترجع تنام
-كام علاء يناديها
أجتي تمشي وياه بالغصب
اباوع عليها لابسه تراكسود صيفي نص اردان
ونفس حالها مابيها شي متغير
وبطن ماعدها ابدددد
مبينة جذبتها هذيج وينها واضحة لعبة من عدهن
سلمت على امي ،، وأبويه
واني سلمت عليه من وره خشمها
-دخلت بالمفيد بدون اي مقدمات بالكلام
*رفل شكثر الج هسه حامل
-ردت عليه /هسه اليه ثلاث أشهر
//رفل كومي بدلي هسه اخذج للدكتورة تسويلج تحليل حمل وسونار
لان اني متأكد انتي مو حامل
-كبت عليه امها ،واخوها علاء
*وشلووون تكول مو حامل قابل
نجذب عليك
-خليت امها تلغي براحتها لان صلفة ووكحة صوتها عالي
درت وجهي على علاء
//شوف ياخويه الواحد من عدنا يعرف بمرته حامل لو لا
وهي بوجودكم جميعاً خلي تنكر كلامي كدامكم وتكول جذاب
صارلي شهور هاجرها
وأذكرها بعد هجرتها من يوم التلاغينا بي وهي تعرف شنو سبب اللغوةوما اريد افتح دفاتر عتيكة للأجرام اللي هي تعرفه ،، وجلدتها مره وحده بالحزام وكانت بيومها حائض ومن هذاك اليوم بعد ما تقربتلها منين بعد حبلت!!!
-بس كملت كلامي وامها انخرطت
وطلعت لسانها عشر أمتار
// شنو قصدك وعيب عليك
احترم نفسك انت دايس بساطنه
وشنو معناها تنكر حمل مرتك
لو تريد تسويلك سالفة حتى تطلكها
//خالة لا ناكر ولا ادور سوالف
والخباثة والتدابير مو ثوبنا
//لا دوخين نفسج بجميع الحالات اني مطلكها ما مستعد اجني مج رمة بيتي يوم تق تل اخويه
يوم تق تل بنتي يوم تقت ل مرتي
من ارجعها احسب حساب تقت لنا بالجملة
-صارت هوسه ومصايح وعايط
هذا يحجي وهذاك يكول
وابو علاء تخبل أفتهم كلامي اتهام لشرف رفل
//عمي شرفك هو شرفي
واني متأكد رفل مو حامل
كوم امشي ويايه ناخذها للدكتورة
وبشهادتك اسمع الكلام المضبوط
-محد يسمع ومحد يقتنع وكلهم يصرخون
//يابه بدون مصايح وعايط
كومي رفل اخذج للدكتورة
واذا حامل تبقين على ذمتي بس بيت اهلج هنا تعيشين ولحد ما تولدين اخذ الطفل واطلكج
بجميع الحالات بعد ما نرهم سويه
السوتي مو قليل
السوالف الاجرام القديمة انتي تعرفيها وتذكيرها مووو
وحركت فرح وهسه سالفة اختراع الحمل
-كمت وكفت على حيلي منتظرها تتحرك وهي بس تبجي ما ترد عليه
// يلا شمنتظره كومي ورايه شغل
عمي من رخصتك امشي ويانه
وبلكت تجي وياها وحده من البنات جناينكم
ما اريد لا امي ولا امها يرحن ويانه
-ألذبحني هي لا تحجي ولا أدافع عن نفسها
بس تبجي ومدنكه راسها
وأمها مستلمه المنصه بدالها
-وترد عليه امها /بنتي لا تطلع
ولا توصل باب الشارع ،
وعيب عليك تسويلك سالفه وتجذب حملها
وعيب عليك تشمر بالحجي وتتهم بشرفها
//منو جاب طاري الشرف لا تلزكين بالسوالف من يمج ،، بنتج هاجرها ومامتقربلها
منين حبلت يعني ،، هسه سالفة أحجوها لمخبل هم ما تخش دماغه
-بعد نقاشات طويلة وعريضة
وهذا يحجي ،،وهذاك يكول
واني مقفل ماتبقى على ذمتي
ومصر على الطلاك
-خصمت الحجي وياهم نهائياً
تعبت من السوالف والعايط والصريخ
واعرف هاي الهوسة والسوالف كلها من تخطيط امها
واذا اخذتها هسه للدكتورة تنكشف جذبتها
وعلى كولت أبو المثل الحك العيار لباب الدار
// عمي رفل تبقى يمك
ومصروفها يوصلها كل شهر
ومن تولد تبلغني اجي أخذ الطفل بحظينته
وبساعتها أطلكها
المراه اللي أدور مشاكل من جوه الكاع
وترفس نعمتها برجليها ما تصيرلي مراه لو تثالث الدنيا
- خليتهم بهوستهم وطلعت
واني متأكد مو حامل
وياخبر اليوم بفلوس باجر بلاش
هي تكول عليها ثلاث أشهر ومصيرها تولد
شكد انتظرها ست أشهر
اني وياها لحد نهاية لعبتها
فرح/رجع محمود يغلي نارر أعصابه
وامي وابويه ضايجين ووجوهم مجفيه
-من كالوا /مصرين على ان رفل حامل
ومحمود ماطلكها ينتظر ولادة الطفل
لحد ماتجيب ياخذه ويطلكها
أنخمط كلبي من الخوف هاي حية رگطه وكلشي تسوي
-مرت الايام عاديه مابيها شي جديد
حياتي صارت بين افراح
وشغل البيت
ومحمود ودوامه
بس التفكير موتني خاف محمود يتغير ويحن لرفل ويرجعها
-بيوم كاعدين كلنا نشرب جاي العصر
واتصل الحجي على ابويه وكال / رفل أزحلكت من الدرج وطرحت الجاهل
محمود/هههههههههههه
يابه احلى خبر للجذب سمعته بحياتي
يابه بلغ الحجي على مجالهم نمشي
بامعاملة الطلاك
فرح/وزعت واهلية بيوم اجاني الفرج
محمود طلك رفل عند الشيخ
وبعدين مشوا بمعاملة طلاق بالمحكمة وخصم الموضوع وياهم انطاها الحاضر والغايب وغرفتها وغراضها من أول ساعة بعد الطلاك
الحمد لله والشكر لله من خلصت و ارتاحيت
من غضب أسود أسمه رفل ،، احس حتى حياتنا استقرت من فاركتنا
-الحمد لله منى أخذت سونار
وصلوات على النبي بيها توم ولد
الحمد لله احنا عدنا وراثة التوم من العمات والخالات
-أركان بكثر ما فرحان بكثر ما خايف
بس اجتي وبشرتنا يكولها //يالصفيرة من هسه شايل هم لولادتج
من هسه ادور دكتور شاطر مو دكتورة
واسويلج عملية احسن شي
وابرد راسي من التفكير
-بيوم ولادتها يبووووو خبصنا شدوا روسكم يكرعان
دكتورتها حولتها على مستشفى اهلي
وراحت من الصبح للمستشفى
وياها أمي فاطمة وامي سهام
وهو قلق ومتوتر خبلنا كلنا وياه
راح وياهم أبويه عادل
يكول // هذا خبل لا يروح يتعارك ويه كادر المستشفى
-وصلنا للمستشفى وهو كمل كل الاجراءات
ودفع الحساب
بعد ما سلمت على اهلي
هو خطية بوسني على راسي وراح أنهزم
حتى ما اشوف قلقه وخوفه
بدلوا ملابسي ولبسوني صدرية العلميات
وهوسه العملية وكف كلبي من الخوف
-من طلعوني من الصالة بين النايمة
وبين الكاعدة ، يعني واعية واسمع صوت الموجودين بس ما اكدر اسكت
ما أسيطر على روحي
//اركان تعال يمي
اركان أنطيني ايدك
اني أحبك ،شبيك وين رحت بس تعال هنا
اركان/زعت العافية وراح حيلي بين ما طلعوها اليه سالمة
-حولناها من سدية العمليات لسرير الغرفة
واني كاعد بصفها ولازم ايدها
وهي تبجي وتنادي باأسمي
//ماروكو هذا اني كاعد بصفج لازم أيدج
أششش كافي لا تبجين
-بعد ماكملوا الممرضات الصغار ولبسوهم
وشايفهم طبيب الاطفال
الحمد لله وضعهم طبيعي
جابوهم للغرفة مخليهم بحاظنه حلوة ونظيفة
-سميت واحد منهم (فضل )
أشرت البنية بقلم الجاف على ايده
وسميت الثاني (سبع )
أثنينهم سميتهم على أسماء ألعباس ابو فاضل كل ما أنخاه ما يفشلني
فرح /خليت تلفون امي يمي
وكلساع اتصل على أركان
اسمع صوته يريد يبجي،
يكول /بعدها اني اخابرج من يطلعوها من العملية
-شو باوعت الساعة اني الملكوفة وخبلت الرجال ويايه ماكو ثلث ساعة دكيت عليه يمكن ٤-٥ مرات
-شويه ودك عليه خرب حظي هذا يحجي ويبجي
اركان/ام الفيران منى الحمد لله جابت هي والصغار بخير ،، يلا روحي
*يااااا سد الخط بوجهي
-ثاني يوم طلعوا منى للبيت
الحمد لله أوضاعها زينة هي والصغار
-اركان خبلها سوه بيها حالة نفسية
كلساع وجاي سألها /خو ماعندج نزف
شلونها أوضاعج ،،خو ما متوجعة
وهي عمليتها توجعها بس متكدر تحجي تخاف لا يتخربط ويوكع كدامها
-صار عدنا بسلامة ٤ جهال بالبيت
أسلام فضل و سبع
أفراح وأمي وأبويه طايرين بيهم
وأمي كلساع وكالت// بنتج كبرت شوكت تحبلين مره ثانية ،
اني الله رزقني بس باأثنين ولد
وماعندي حظ جان خلفت أكثر
أنتي و منى أريدجن تعوضني وتمللي البيت جهال
-والحمد لله هاي أخر أخبارنا لهذا اليوم
لسنة (( ٢٠١٩ ))
كلنا بخير وعافية وصحة وسلامة
-وبعدنا كاعدين بنفس مكان سكنا بغداد
واهلي وعمامي ساكنين بالمحمودية
-وهنا رجعنا لبيت الجد والجدة
وملينا البيت جهال على كولت أمي
أني ومحمود صلوات على النبي
صار عدنه (٦) جهال (٤ بنات و ٢ ولد )
(أفراح،،عادل،،فاطمة،،زياد،،رحمة،،مودة)
-افراح //الحمد لله نجحت للصف الخامس الابتدائي
-عادل و فاطمة //توم
سميناهم على أسم امي وأبويه
نجحوا للصف الثالث الابتدائي
-زياد // هسه سجلته بالاول ابتدائي
هذا حبيب روحي كل جهالي أحبهم
بس هذا اله معزة خاصة بروحي
لان ماحسيت بحبالته هواي خفيفة
ولا عذبني بولادته بين ماوصلت لبيت الجده
جبته بحوشهم ،، هي المرأة بس لمتني
-رحمة ،، ومودة / توم
هذني عزيزات أمي فاطمة هي سمتهن
هسة عمرهن ( ٣ سنوات)
-الحمد لله أني أبد ما ستخدمت موانع حمل
متفقين اني ومحمود على أتفاقنا القديم
لا اخذت حب مانع
ولا باقي وسائل منع الحمل
لان محمود يكول// بيها مضار عليج
-الحمد لله والشكر لله أجيب عند الجده
واراجع فقط بالرعاية علمود المتابعة الطبية
واللقاحات
-عندي فاطمة طلعت على أبوها
صار بيها تكسر بالدم بسبب الباگله
الطبيب يكول هم عامل وراثي
-وعندي أفراح وكحة وعرمة ولسانها عشر امتار
أمي تكول /لان سبيعي تصير هيجي وكحة
واني أكلها /لا هذا دلال محمود الزايد الها
ورضعت من رفيله وخوش ورثت من عدها العرامة
-يعني ما تخاف من عندي ولا من ابوها
بس انكول أجاج أركان تخلس
لان بصوت واحد يصكرها
مرتين صلخها براشدي بولها على روحها
تبقى سنة تجر عدل مثل المسطرة
وبعدين من يروح مفعول الراشدي
تتفرعن وصوتها يلعلع
تحصل راشدي ثاني من عمها تستعدل
-محمود مخلي البنات على كلبه
ويمسح عليهن مثل البزازين
وما يخافن من عنده
عكس عادل و زياد صاكرهم وما منطيهم مجال يتنفسون
بس اني مخليتهم كلهم على كلبي
البنات والولد يخافون من عندي
اني أحمس بروحي علمودهم
ومرات أضربهم
(( أني اربي وادلل ))
-منى و اركان الحمد لله صار عدهم ٥ جهال
(٤ ولد ، وبنية وحده)
(أسلام،،فضل و سبع ،، غضنفر ،، أمتنان)
-أسلام / نجح للثاني متوسط
-أركان ومحمود وحتى ابويه عادل
خوش صاكرينه
تربية ودلال مامقصرين عليه بشي
و مراقبينا مراقبة شديدة
يخافون عليه من ولد هذا الوكت
-فضل و سبع /نجحوا للصف الثالث ابتدائي
فضل / هادي وفقير
عكس سبع/ يمه وكح وحرك
أدكه منى بالكاع يرجع يكمز عليها نفس السبرنك
-غضنفر //هسه عمره (٤) سنوات
هم مشعوذ ووكح يهمش بأخوانه و بجهالي
-يعني مرتين تعاركنا اني و منى
من وره سبع وغضنفر يعجنون جهالي
ونبقى متزاعلات أسبوع أكثر
وابويه وامي يرزلونا ويصالحونا
واذا اركان طبكلهم الأحزام يجرم بيهم
يركضون يسون امي درع كدامهم
-أمتنان // هسه عمرها سنتين
هاي اللوكية مال أركان
وتعرف شلون تخمط كلبه وتتلوكله
-منى تستخدم أبر منع الحمل
اركان ما يثق بيها بالحب المانع تزاغل وياه
-ولاداتها بس فضل وسبع جابتهم عملية
غضنفر وأمتنان لا توديها امي للجدة
-والصراحة أحبالتها لعبان نفس
من تحبل لحد ما تجيب تبقى تزوع الاكل وتعيش على المغذي
-وبيوم الولادة نلزم انذار من وره اركان عوزه بس هو يجب بدالها
يخبصنا ويقلقنا يخوف الما يتخوف
-وروحتنا لبيت أهلي ما أنطول هواي مثلا هذا الاسبوع أروح الخميس العصر وارجع السبت
الاسبوع اللي بعده منى تروح هي وجهالهاهم تروح الخميس العصر وترجع السبت
-وأبويه والولد فلشوا البيت وعادوا بنائه من جديد ،، التصميم الجوه بقى على نفس الخريطة القديمة
بس البيت الفوك لا تغير بنائه
-صارت النا غرفتين فوك
اني ومحمود بغرفة
والغرفة الثانية رتبتها للبنات ينامن بيها وحدهن بليل
وياهن أغراض وملابس أخوانهن
-والولد ينامون جوه ويه ولد عمهم أركان بالغرفة الجانت قبل مالتي بصف غرفة امي
-منى واركان هم صارت عدهم غرفتين غرفة الهم خاصة
والغرفة الثانية لغراض جهالهم
ومرات ينومون أمتنان يمهم
ومرات لا يدعبولها يم بناتي
-امي وابويه وطلعت اسمائهم للحج
وراحو لبيت الله حجوا بخير و سلامة
-أبويه عادل الله يرزقه العمر والعافية هسه عمره (٥٥) سنة
-وأمي فاطمة ربي يخليها خيمة على روسنا هسه عمرها (٥٢) سنة
-محمود بعده ألصبح يداوم بنفس المستشفى والعصر فتح عيادة للأسنان خاصة بي يمنا بالمنطقة
-واركان مكان شغله زين ومرتاح بي كم مره نقلوا بس على حجايتج //بالواسطات والدبگ أحصل المكان الزين وحالياً هو ضابط برتبة ( رائد )
-محمود و اركان مرتين طلعوا للعمرة مره محمود أخذ امي وراحوا لبيت الله ومره راحوا بس محمود واركان وحدهم
-ما احجيلكم بسلامة من نكعد على سفرة الغده لو سفرة العشه ، ماشاء الله (١٧ نفر )من مختلف الاعمار من امي وابويه ومحمود و اركان
واني وجهالي ٦ ومنى وجهالها ٥
-امي وأبويه من يسولفون يكولون// الله عوضنا بالخير صح رزقنا بس ٢ ولد
بس هسه عوضنا بخلفتهم
-امي بالمنطقة معروفة العلوية ام محمود
وابويه الحجي ابو محمود
ومحمود ينادوه ابو عادل
ومرات ابو أفرا ح
واني أم افراح
اركان أبو أسلام
منى أم سلام
منى شايلة أسلام بعيونها
وهو أبنها ابدددد ما حاسبته أبن رجلها
ومرات من يضربه أركان و تفزعلة
تجيها فد ضربة علموده
-اركان هواي يخاف على أسلام
من اصدقاء سوء وسوالف هل وكت
مايرضاله على الغلط
-لحد هذا وكتنا الف الحمد لله والشكر
ربي العالمين يكول بالقران
((وَأَمَّا بِنِعْمَةِ رَبِّكَ فَحَدِّثْ))
وهاي اني اعتبرها نعمة
جدرنا واحد ،، والضميم واحد
كله عند امي وهي أبد ما مقصره علينا
-وأني و منى هو بعد بيتنا
الحمد لله ماكو بيناتنا معاينة على الشغل
لو على غير شي
بس مرات نختلف علمود الجهال بس ساعة
ويروح الاختلاف بعد ساعة شيطان
-هي خطية لحد هسه تخاف من اركان
مو خوف و أنما أحترام
لان اركان عصبي ،، واذا تعصب يتخبل
بس يكولها// بس ،، هي تقطع النفس
-هاي كدام الكل هي محترمته ومقدرته وكلمته وحده ما تنزل للكاع بس بيناتهم وبغرفتهم لا هي تشحطه وتعرف شلون اطلع حقها من عنده وهو صدك يحبها ويموت عليها
-اني ومحمود لا نختلف
تعلمت على هدوءه كدام الكل هادئين وبغرفتنا هادئين
وشكثر ما احبه هو يحبني بعد أكثر
-بس صارت بي شغلة مو حلوة
يخاف على البنات وخوفه بخبال وتعقيد ٢٤ ساعة يراقبهن
-صح يلعبن ويه أخوانهن و ولد عمهن
بس مايخليهن وحدهن لازم يلعبن كدام العيون
وبليل من ينام يقفل عليهن الباب
-وحتى الولد كلساع ينزل يشوفهم ويرد يصعد
واركان بي نفس الطبع يراقبهم
وابويه عادل هم يراقب الجميع
لان مشعوذين وحركين نخاف يسولهم سالفة
لو يحركون البيت لو يخنكولهم واحد
-وبالنهار من يروح للدوام يبقى يتصل مرتين و ثلاثة
*ديري بالج على البنات
*عينج عليهن لا تغفلين عنهن
*اذا صار بيهن شي أعدمج
*هذني مسؤوليتج راقبيهن
*لا تخلين الولد والبنات يختلون لوحدهم هم اطفال ومايعرفون الصح من الغلط
*ديري بالج من اسلام و سبع و غضنفر ترى مراهقين وتخوف هاي أعمارهم
*من تصعدين فوك وصي امي عينها على البنات ،، لو تصعديهن وياج
يبووو هذا الحجي حفظته على ظهر كلبي لان هو خايف ونقل الخوف للجميع
-اني لحد هسه أعشق شي أسمه خياط اي شي اشوفه معروض بالسوك
أشتري قماش وأخيطه
وأطلعه احلى من خياط السوك
-حتى دشاديش ابويه ومحمود واركان اني أخيط الهم
ما اريد امدح بنفسي بس مرتين خيطت لاركان بدلات عسكرية لان قماش بدلاتهم شتوي وصيفي ومدحني عليهن
منى بقت على نفس طبعها
أتحب اتابع مسلسلات عربية
واخذتلها فترة اتابع مسلسلات تركية
وانوب رجعت على المسلسلات الهندية
-محمود واركان ما مقصرين علينا بشي
وابويه وامي مدللين الجميع
-محمود بقى على نفس رشاقة جسمه
بس اني الا سويت نظام غذائي
هو محمود نظمه إليه يلا رديت ضعفت وأستقر جسمي بعد الولادات
-اركان سمن بس ماعنده كرش ابد
بس جسمه مليان
ومنى بقت نفسها اليشوفها يكول لا حبلانة ولا جايبة ومنين تسمن اذا تركض ليل ونهار وره سبع و غضنفر
------------
أما الباقي من شخصيات التي ظهرت في قصتنا
بيت عمه نجمة
-أقبال /سوت مشكلة وهوسة اول مرة ويه أخت ضرغام الصغيرة العايشة وياهم
-و بوكتها ضرغام عاجنها عجن
لان صوتها عالي وهن متمالشات من الشعرحتى من الكتل ايدها مكسورة
-وبقت زعلانة شكد بيت اهلها
من بلغوا هي حامل يلا رجعها
-وعدة الأشهور وهم سمعنا أقبال زعلانة مرة ثانية ،، وهي ما صارلها سنة من عرست
-بس هلمرة ضرغام جارم بحالها ومتخبل عليها ،، لان راجعة متلاغية ويه أخته
و زامخة بوجه أمه
لازمها وكاضي بيها توبة
ومدخليها مستشفى لان حامل و مهددة بالطروح وخايفين على الجاهل
-وبقت زعلانة بيت أهلها لحد ما ولدت وهو مخبل مو صاحي
جاي ياخذ الجاهل حتى يطلكها
وهي تخبلت كالتله /رجعني وبعد متسمع صوتي بس لا تاخذ ابني من عندي عاد رجعها بعد ما سوالها جرة اذن مثل ما يكولون
-ومن هذاك اليوم أقبال صارت أدمية وبس شويه تتفرعن يعرف ضرغام شلون يصكرها
-وهاي أخبار أقبال بهذا يومنا
من تشوفوها ولا تكولون هاي بنت عرب
لا بنت بغداد بلبسها وحجيها
ام ضرغام وياها وياها عادت صياغتها
-وهسة عايشة بس هي و ضرغام
وجهالهم ال (٤) والام ،، بيتهم
-أخو ضرغام المتزوج طلع بيت لوحده
وأخته تزوجت حماه أختها يعني خوات أخذن الخوان
-وحالياً ضرغام ضابط عسكري
برتبة (عقيد)
أختي هالة /الحمد لله جابت عند الجده بنية سمتها (رواسي)
-ورافد /تخرج وصار ضابط ملازم
بس بي شغلة مو حلوة تعلم يشرب
ويومية وكابه العركة بيت عمه نجمة ابوه مايرضى بالدرب الاعوج
-وبعد فترة تعرف على وحده من اهل المنطقة اللي يداوم بيها ،، وصادقها
ويجيب ويكت عليها من الراتب
يا مصرف ،،يا رصيد ،،يا هدايا
يا عزايم وطبات وطلعات ومطاعم
-هالة اخذت رواسي وزعلت بيوم راد يمشي عليها و يخطبها
-عمي نوري وعمي حامد وعمي اسحاق
وعمامه ولد عمي حامد صحوا على زمانه
خلوا وسطاني ودفرات وكفخات
-لان أثنين من جماعته جاين على ابوه للبيت وهو بالدوام ما يدري بيهم
ومسولفين لعمي عليها
حشاكم مو زينة سمعتها
وهو صديق رافد نفسه اللي يسولف عنها
يم عمي مصادقها ويواعدها
بس رافد جذبهم
-بس الحمد لله لابد ما يظهر الحق
الله كشفها ولزمها رافد بيده بالاتفاق ويه هذا صديقه رايحة وياه لبيته
وهو الرجال مزوج وعنده ٢ جهال
ومرته رايحه لاهلها خطار
وهي الادبسزز جايه وياه للبيت
ينام وياها بس هي بعدها بنية
يعني ميطخ بكارتها وعدكم الفهم
ورافد جان موجود بالبيت وكابسها نايمة وياه لازمها وشابعها كتل مطلع بيها ضيم السنة الضحكت بيها عليه
واخذت من عنده لهدات فلوس
وهجمت بيته
وبسببها هالة زعلت ومتقبل ترجعله
-وهاي يومية جايب واحد ويريد يرجع هالة
وهي سودة عليه أنسلت من البجي والقهر
تكول/من اشوفها ادزله صورها
وهي حلوة ونازكة ولبسها مغري
اموت من القهر لان هواي غيرت بنفسي لخاطره بس ما يجي بعيونه
لان تخبل عليها وبس هي يشوفها بالدنيا حتى هجرني بسببها
-عاد بيوم هو طكت روحه
لان كل مره يجي و يتعذرلها
ويكلها /جانت نزوة وهي أكلت عقلي بسوالفها لان شيطانة وام درب مو مثلج فقيرة وعرفت تستغلني
واني اعترفلج صح وكعت بشابكها
بس الحمد لله ربج خلصني منها
سامحيني غلطت بحقج
ارجعيلي أني حبيتج وما حبيت غيرج ،
صدكيني جانت نزوة
وهالة معاندة متقبل ترجع وحقها الا الخيانة جرحها اسم الله لا يطيب ولا يبرى
عاد اخذ رواسي من حظنها وطلع من بيت اهلنا
وهي تخبلت تفرفحت روحها على بنتها ولحكته لبيتهم
-ومن عدها رافد صارتله عبرة
وهسه هو ضابط رتبته (نقيب)
وعايش ويه أختي هاله
وعدها صلوات على النبي (٤) جهال
((رواسي ،محمد،،عبد الله ،،وياقوت))
-عمر /كوثر بت عمي أحمد صار قسمته وعدهم بنيه (تغاريد)
-يعني هاله أختي وكوثر صارن نسوان حمه
يموتن على عمه نجمة وهي تموت عليهن
رافد وعمر يموتون عليهن
وحتى عمي مجبل يحبهن
-وحماهن يونس شايلاته بالصلوات
عمتي كاعد ادورله على مراه
يردون يزوجونه
----------------
-بيت عمه كمرة
-خواتي مريم وفاطمة الحمد لله اجتي قسمتهن وصارن يم عمه كمرة
مريم صار من قسمتها عدنان
وفاطمة قحطان
يعني خوات توم أتزوجن أخوان توم
تزوجوا بنفس اليوم
-مريم وعدنان عدهم بس ولد واحد اسمه (أحمد)
-فاطمة حبلت على الاربعين ،،
بس مريم خطية كاعد تراجع صار عدها تكيس بالمبايض
-نوال بعدها لحد هسه ما متزوجة
تجيها القسمة بس مو هلكثر زينة
لو الولد المتقدم تطلع بي لوله
لو اهله ويه بيت عمتي مايتفقون
وماتصير القسمة
-ثريا حاليا مخطوبة لصديق قحطان على العيد زواجهم
-ونسيم بعدها صغيرة
--------------
-بيت أبويه باسم
بقى بالبيت بس امي وابويه
وياسمين ونسرين
-امي بعدها تخيط للناس تكول /هذا رزقنا
وهم اكضي الوكت ويه النسوان بالسوالف
-وابويه بعده على الفلاحة
وينزل المحصول للعلوة
الحمد لله عايشين بخير وصحة وعافية
ورزقهم خير من الله
--------------
-بيت عمي أحمد وعمه هناء
-عثمان تخرج من السادس الادبي
و دخل كلية تربية قسم عربي
والحمد لله تخرج و تعيين بس بواسطة
وصار مدرس عربي بمدرسة بالولاية
-تزوج بنية غريبة عرفها بالكلية
من أهالي المسيب
خوش بنية وحبابة وبنت اوادم
بس خطية لهسه ماصار عدهم جاهل
صارلهم هاي سنة الثالثة من زواجهم
خالد بعده طالب بالاعدادية
--------------
-بيت عمي محمد وعمه رجاء
-عمه رجاء خطية بين ليلة ويوم
أسم الله طلعت بيها جغدة بصدرها
بين ما راحت وراجعت للطبيب
طلعت مو زينة
بسرعة شالوا الها الثدي الايسر
واخذت علاج كيمياوي الله يجفيكم الشر
بس الحمد لله من عدت فترة العلاج
رجعت اوضاعها كلها طبيعية
لا انتشر المرض ولا ابد
الحمد لله بسرعة قضوا على المرض
-عمي محمد طلع أسمه للحج
و راح لبيت الله ورجع بخير وسلامة
بس بعده على نفس اخبالاته
بس صار الحجي محمد ابو جاسم
-بناته هبة / أزوجت غريب
صارت قسمتها عن طريق مراه من اهالي الديرة تخيط يم امي وشافتها بالصدفة
وخطبتها لابنها ،،وصارت القسمة
الولد زين وياها ويحبها ويحترمها
بس عمتها شادة وياها بعد تعرفون سالفة العمة والجنة ما تخلص
-رغد /اخذها ابن عمي نوري الصغير
على شرچ هي الثانية
بس كل وحده من النسوان كعدها بيت لوحدها
لان خطية مرته الاولى ما خلفت
جابت بس بنية وكعدت
صارلها ٨ سنوات ماخلت للداي دوه وماكو وين متروح عند الاطباء يكوللها// عقم
وعند اطباء العرب يكولها// عندج بس هاي البيضة يسموها بيضة عاكر
-وهسه رغد حبله عليها الشهر السادس
-وتغريد اخذها طه أبن عمي سلمان رجل عمه شمس (( طه أبنه الأول من مرته الاولى ))
-وجاسم طالب بالاعدادية
رسب سنتين وتأخر بالدراسة
----------------
-بيت عمه شمس بسنة ٢٠١٧
بيوم حنة طه عمتي عزمتنا
رحنا اني وامي والبنات لبيتهم
لان طه يعتبر ابن عمتنا شمس
وتغريد بت عمنا محمد
-هناك شفت مخلد جعلته أخويه
سلم عليه وسلمت عليه وما شاء الله شلون صاير هيبة ربي يحفظه من كل سوء وكل شر
ويخلي خيمة وظل على حريمه وعياله
*نور بنت عمه صالح زوجته الاولى
*وأصيل بنت خاله الجان يحبها
خطية ترملت زوجها أستشهد بالانفجار
وعدها ٢ ولد ،، عاد اخذها زوجة ثانية
*وبشاير زوجته الثالثة
أخت صديقه ضابط وياه بالدوام
صايرة عدهم مشكلة ومخلد مدخل وحالها
ومخلصه من حلك الموت وصارت القسمة
-يحاجيني وعيونه بالكاع يكول// أخيتي شلونج ، عساج مرتاحة بهاي الدنيا
شصار عندج أطفال
كتله/ ٦ جهال ( ٤ بنات و ٢ ولد )
كام يضحك وجان يكول / البنوات من هسة محجوزات لاولادي
وممنوع يطلعولي اولاد عمهن
لو اولاد خالاتهن
بهذاك الوكت صدك أعدم اليوكف بوجهي
كتله/الله كريم منا لهذاك الوكت متعرف ربك
شضام للبشر ،،
//أنت شصار عندك من جهال
ضحك وكال// بالصلاة على محمد
بعدد فريق برشلونة لان اني كتلوني للنخاع
استحيت أكله شكثر العدد
ضحكت على ضحكته وسكتت
-وهسه طه وتغريد ينتظرون ابنهم
تغريد حبله وعلى حساب عمه شمس
تجيب ويه جيت الحجاج
شلون تحسبلها مااعرف
-وعهود بالابتدائي
-ترجمان و لقمان ،، توم بنية ولد
بعدهم صغار عمرهم ٤ سنوات
---------
بيت الحجي نافع ابو علاء
-الحجي بعده صديق وأخو ابويه عادل
لحد هذا يومنا
وابد ما خرب صادقتهم طلاك رفل
-ولده علاء وخالد ،
عزلوا عن بيت ابوهم
لان ام علاء مراه شرانية
ولسانها سليط توجع بالحجي
وجناين يومية رايحات زعلانات من وراها
-ورفل اااخ يارفل لليوم ما ناسية دكتها الحقيرة ويايه كل ما ابدل واشوف ظهري اشبع قهر جسمي صاير لونين من وراها
شكثر حقودة وحقيرة
-من حقارتها الجناين عازلات
وهي وامها يتدخلن با أمورهن
ويومية مسويتلهن مشكلة يا ما ينظفن بيوتهن ،، يا وسخات ،،يا ما يدارن الجهال
-الحجي بزع و مل من مشاكلها
باتالي زوجها لابن اخو ساكن بوحدة من قرى الحلة ، وهم على شرچ
بس شنو رجلها مايرحمها يكومها بكتله ويكعدها بكتله
ومن تجي زعلانة يرجعونها اخوتها
-نعرف أخبارها عن طريق ابويه عادل
يسولفله الحجي عن عايلتهم
------------
-اما عن أبو ايوب البدوي
هو رجل بدوي رحال ،، يومية ينتقل من مكان لمكان أخر يبحث عن الزرع والماء
أخر مكان كان متواجد بي هي بادية السماوة
-هو لا دجال ولا مشعوذ ولا سحار
بس الدكتور محمود يكول عنه
/هو رجل حاكم للجن
وعنده خرز نورانية (جيدة) يساعد بيها الناس ويخلصهم من الشر
ما ياخذ فلوس بدل المساعدة
ياخذ نوگ (جمال أو جمل )
لان النوگ عزيزة عند البدو
-بسنه ٢٠١٥ توفى الله يرحمه
عرفوا بي عن طريق العم أسحاق
أحتاج لمساعدته عنده حصو مسنن بالكليات
والاطباء كالوله// الا عملية ويطلعون اله الحصو
وبعد ما دورا عليه وحصلوا عايلته
كالولهم // توفي الله يرحمه
-بس الخرز عند ابنه الجبير أيوب
بس مو بمعرفة وحكمت أبو الله يرحمه
-وزوجته ام أيوب موجودة ربي يرزقها
العمر والعافية وتساعد الناس بوصفات طب العرب ،، وتساعدة الاطفال الصغار
مثلا تسوي المتن الهم
لو الطفل المكنفذ تعالجه ،، لو الممغوض
يعني الوصفات الحافظتهن عن ابو ايوب
توصفهن للناس
-------------
-كعدنا بليل اني ومحمود نسولف
وتذكرنا شريط حياتنا
فرح /محمود تعرف شنو أصعب شي بالحياة
من الجرح والألم يجيك من أقرب الناس إلك
وأنت جنت أقرب شخص اليه
بس أذيتني بصغري وما رحمتني
ومن عرفت بيوم حنتي من مخلد أني مو بنية فقدت السيطرة على تصرفاتي ،
وحصلت كتله الهسه كل ما أتذكرها جسمي يوجعني
محمود /مديت أيدي ولزمت خدها
فرح روحي ...
حسيت ببرودة الثلج بخدها
حسيت أني لا هذاك طفل الصغير الذي أرتكب جريمة بحق الطفولة
ولا هسة أني الشايب مثل ما تسميني
بشرتج رجعتني للماضي بسعادة
وراح أبقى أفكر بهذاك الطفل كل ما لمستج
وراح يبقى يطارنا هذا الطفل حتى آخر العمر
بس أسالج ماكو طريقة لنتخلص منه!!
فرح /محمود لا تقشمر عليه بسوالفك
بيوم الاكتشفت موضوعي
حسيتك أكثر الناس حقارة لان كسرتني
وبعد ما سألت عليه وأنطيتني ظهرك
وأني جنت بهذاك اليوم بأمس الحاجة إن ألزم أيدك
حتى أخلص من الموت بس مالكيتك وخلصني الغريب
محمود / أاااخ فرح روحي
أتمنيت أبقى هذاك الطفل وما أكبر أبد
ًما أنافق وأصنع أني راضي بزواجي من رفل
ولا أراهن على ان خبر حلملها جذب
ولا أكرها كره العمى بيوم الحركتج
فرح /أسكت محمود لا تذكرني بالماضي
واني اصلا ما ناسيته بس أتناساه
جنت أموت من القهر من ادلعها كدامي رفولة
وهي تجي وتتحشك بيك
جنت بليل شكثر أبجي من تصعد تنام يمها
واكول عليك أنت زوج سيئ وتجذب عليه
من تكول أحبج بس الج
وانوب تصيح اسمي بدلع
واحس بي الحب من عندك اليه
ابد ما جنت أعرفك احسك كلساع بشخصية من شكل
محمود /أني احبج بس الج وحبيتج من جنتي بلفة كماطج
والصار وكل سالفة مو بيدي ولا بيدج
لان جنا صغار ومو واعين شنو الموضوع
بس اني أحمل اهلي واهلج مسؤوليه الصار
لان رعاية الأطفال مو مهمة ثانوية،
والحرص على مراقبتهم وتربيتهم
هي مسؤولية وواجب مقدس على الوالدين
فرح /الحب اني اكول هو توفيق الأهي
وما أشكّ ان أغبى الناس هو من يبحث عن الحب بكلب شخص يكرهه مثل حالتي اني رفل
أو يدور عليها بالكتب الجذوبية اللي يبيعوها الناس الفايخة للمراهقين
ويوهموهم ان الحب يجي صدفة
لا ماكو شي يجي بالصدفة
كلشي مخطط من عند رب هو أعلم بكل شي
محمود /اني وياج وكلامج صحيح
اذا كان الحب صدفة او هو مخطط الأهي
بس صدكيني ماكدرت أدافع عنج من البداية
لاني خضعت لاوامر أبويه
وكسب رضاه الوالدين هو سبب توفيقي وصولي لهنا وعيشتي
شكرا لزيارتكم عالم روايات سكيرهوم
