رواية فصلية الضابط الفصل السابع والثلاثون بقلم زينب نور
......... حسينه بحركه ورانه التفتنه اثنينه المصدر الصوت جمدت بمكاني
من شفت أبويه واكف ايباوعلنه بصدمه
من صعوبة الموقف الي أني بي دا احس انشليت ما اكدر اتحرك
بس اباوع الابويه بنضرات مليانه خوف
اتغيرة ملامح وجه من صدمه الى عصبيه وغضب بعيونه يريد يملخني ومركز بوارث
اجاني سحبني من شعري وهو يكولي
:- لا يا بنت الكلب تتواعدين من ورا ضهري وجايبه الجلب مالج البيتي
دفعني بقوه وكعت على وجهي
ورجع على وارث يضرب بي راشديات ويغلط علي وارث بس واكف ما اتحرك بس يباوع الايدي النجرحت وابويه فقد علي ورم وجه من الضرب اشوفه يرجف
اني ما اكدر اگوم على حيلي الرجيف ميخليني اسيطر على نفسي ورهبه الموقف الاني بي احس نفسي اريد اتقيئ
واني اشوف ابويه تعب وابتعد عن وارث كعد ومنزل راسه يلهث ويحجي بكلمات ما مفهومه
اتقرب وارث الابويه كعد على ارگبه مقابيله
ابويه رفع راسه ايباوعله بغضب وضاغط على اسنانه ونكلب لون عيونه احمر
اباوع الرجفة ايده من لزمه من ياخة قميصه ايعتعت بي
:- لك ما كفاك اخذت مني ثنين جايني بعد شتريد لاحكني على شرفي بعدك ما خلص انتقامك
گاله وارث:- حجي بس خلي افهمك والله مو انتقام،
ابوبه:- لك شتفهمني گو...... اد
عاااار جاي تتختل ورا بيتي ويا بنتي وانت تعرف ما انطيها الك الي بيناتنه مو ماي البيناتنه دممم تفهم دم دم وحروره اعدام حسام وشوغة امه علي وسكتت گلبه بعده بگلبي،
وارث :- بس انت تعرف كلش الزين اني احبها واجيت وكتلك الف مره عايدها عليك حجي اني طالب بنتك واريدها ولو تطلب مهرها اعيوني اشلعهن وانطيهن وشتريد اني حاضر
وسالفه اعدام حسام اني بريئ منها حاولت والله وروح ابوي حاولت اساعده وتنازلت عنه بس هذا حكم محكمه مو بأيدي
ابويه دفره برجله كاله
:- ومن ما انطيها الك تجي تختل بيها لو تريد تنهبها تريد تطين راسي ابنتي
رجع باوعلي وكالي
:- ولج ما اتوقعت كل هذا يطلع منج واني افكر بيج وشايل همج عبالي مريضه طلعتي عاشگه وتالي تتواعدين ويا بكل وكاحه ياااا صلفه تردين تنزلين راسي بالطين وتسوين سمعتي مداس
تدرين هسه من اصيح الوسام اخلي ايدفنج هنااا ويدفن وياج هذا العار الجايبته،
اتمنيت الكاع تنشگ وتبلعني ولا سامعه هل كلام من ابويه
الموقف الاني بي ما اتمنى العدوي
انتفض واجاني سحبني من ملابسي وكفني
جنت امنزله راسي وابجي
گالي:- تردينه
ساكته ما اكدر اجاوبه
رجع عاط بوجهي ويقوي سحبة ملابسي بايده
:- ولج باوعيلي كوليلي تردينه مستعده تتبرين من اهلج علموده
رفعت راسي بعيون مليانه دموع اشوفه
ايباوع بوجهي وخازرني وشواربه ترف من الغيض
باوعت الوارث واكف ورا ومنتظرني اجاوب
هزيت راسي بالنفي :- لا لا
گالي :- لا.. خايفه خااايفه مني يا صلفه واني شفتج قبل اشويه اتحضنين بي ولج عاد احترمي شيباتييييي احترمي موقفج وابن عمج ما صارله 4 شهور من استشهد
رفع ايده وبقوه ضربني على وجهي مره ومرتين وتلاثه خشمي صار يجري دم ولنار تطلع من خدودي وعيوني
الحد ما حسيت بنفسي انسحبت منه بقوه فتحت اعيوني
شفت وارث صاير كدامي واني ورا
وابويه مستمر يضرب بوارث راشديات
شفت ابويه اختل توازنه راد يوكع
لزمه وارث
بس ابويه دفعه ورجع كعد ويأشر بايده الي ويباوعلي بتركيز خازرني
گالي:- بعد ما اعترف بيج انتي مو بنتي ولا اريد اشوف خلقتج كدامي انتي عار عليه ولوما اخاف على سمعتي الصخمتيها جان دفنتج بمكانججج
رجع باوع الوارث
:- وانت يا تربية سز لو تجي باجر تعقد عليها وتاخذها
وبعد ما اريد اشوف اخلقكم يا ادفنها بأيدي واكول سكته قلبيه وكلشي خلص
گاله وارث:- صار باجر من الصبح اني يمكم
اجيب الشيخ يعقدلنه واخذها وياي
اباوعلهم وكعدت بالگاع ادموعي اختلطت ويا دم خشمي الينزف واشوفه ينگط بالكاع ما مستوعبه الي يصيرلي
شنو ابويه انطاني الوارث وبعد مايريد أيشوفني
أشر الوارث گاله
:- ولي من خلقتي لا بارك الله بيك ولا بالساعه الجمعتني بيك ما اريد اشوف خلقتك بعد باجر تعال اخذها وتولون منا اتفووو عليكم
وارث:- بس حجي بروح حسام عليك لا تأذيها هي مالها ذنب اني الي جبرتها تطلعلي
ما اهتم الوارث وشيحجي
گام وسحبني من ملابسي اخذني ويا للبيت
التفتت الوارث بعده واكف ايباوعلي ولقلق ولخوف عليه مبين بعيونه
امشي وره ابويه سحل بس بدون روح الموت يغطني ويطلعني
دخلني للبيت شافتنه زهور اجتني تركض متفاجئه اتريد تفتهم شصاير تمشي ورانه
فتح باب غرفتي ودفعني بكل قوته للگاع تفل على الگاع وهو يباوعلي وكالي
:- ياحيف تربيتي وتعبي بيج
طلع
اجتني زهوركعدت يمي لازمتني تمسح بخشمي بالكلنكس وهي تسئلني :-ولج شصاير باوعيلي فهميني خالي ليش سحل بيج شمصخمه
ما احجي شي بس اباوع بالكاع وابجي انهاريت اضرب على وجهي بحرگه
واملخ بشعري
اتحاول تفتهم من عندي شي ماكو لزمت اديا وتضرب بوجهي :-كافي ولج تخبلتي شصاير شبي خالو وياج شمسويه انتي
ندى :- ولج شافنيييي ولج شافني ويا وارث بالبستان شافنيي
زهور:- يمعزايه شسوين ويا وارث بالبستان
ومن شوكت تشاوفون انتي ويا هنا
:- ولج ما شايفته ولا متواعدين انتي تدرين بيه تعرفيني موطبعي هذا والله
بس قبل شويه خابرني اتوسل بيه حتى اطلع گالي بس احجي وياج دقيقه
بس ابويه ما اعرف شطلعه وشافنه
ولج تدرين ابويه بعد ميريدني ونطاني الوارث ويكوله لو تاخذها لو ادفنها واخلص منها ويكوله بعد ما اريد اشوفها
زهور :- اييي يمعزايه من ايدج تستاهلين ولج انتي شلون اطلعتي اله ما خفتي احد ايشوفج ما حسبتي احساب الهاي الحضه
عافتني وكامت من سمعت بصوت وسام رجع للبيت
واني ضليت مفرفحه ما اعرف شسوي مره الطم على وجهي ومره اسكت اكول جوز ربي اله بيها اراده حتى انجمع بوارث وكلشي يتصلح بعدين،
وخلص ذاك اليل بالبجي ولوم وما مصدكه ابويه ينطيني الوارث
بس صار وانطاني اله
الثاني يوم الصبح كعدت على صوت عياط وسام
من عرف تخبل يحجي على ابويه ايريد يعرف شنو السبب الخلا ابويه ينطيني بهل سرعه وشنكول للعالم غير تاكل روسنه وتقي ما صارله اربع شهور من استشهد والمن ننطيها الوارث الجان هو من الد اعداء حسام من وصل وارث وهو جان سبب الصار كوله
ومن وصل وارث هوه ولشيخ أول ما نزل من السياره هجم وسام علي وضربه
وابويه كوه سحبه من وارث و سكته وما اعرف شلون قنعه وسكته
ورجع خابر على عمو ابو حازم وحازم وصلو دخلو للهول يسئلون بابويه متفاجئين بقراره بهل سرعه وليش وشلون وما قابلين كلش على هل موضوع:
بس اسمع ابويه وهو يكول الهم
:- معليكم بنتي واني حر بيها بكيفي انطيها ما انطيها
عسا ما اذبحها محد يدخل بس انطيكم علم واخليكم على معرفه راح ازوجها الهذا ويأشر على الاستقبال ما مقتنعين بس مجبورين دخلو للاتستقبال وسام وحازم متخبلين من قرار ابويه يغلون من القهر
بس كعدو سوه وتفاهمم
وعقدلنه الشيخ وهاي المره الثالثه اعقد بيها واكول نعم وانت وكيلي
وصرت الوارث للمره الثانيه
ما جنت محضره شي من ملابسي مجرد بس لبست عباتي واخذت بجنطه يد صغيره بس الاشياء الكلش عزيزه عليه ولاحبها ولذكرى البقت من امي وحسام وصورهم وجهازي بس النواعم
وسلمت على زهور وبوست الجهال وحسومي هذا عزيزي حضنته حيل وابجي كوه عفته ما اعرف شلون راح اتحمل بدون ما اشوفهم وحسومي عبالك ابني وراح افارگه
وطلعت ادور بعيوني على ابويه ما شفته
شفت وارث منتظرني بالسياره
شفت وسام وحازم وعمو واكفين
ايباوعون على وارث بحقد الود ودهم ايملخونه نضراتهم تشرح البداخلهم
ما كدرت اروح او اسلم عليهم دا احس بالذنب طلعت منزله راسي بس ادموعي تنزل سكته
أول ما شافني وارث فتحلي الباب ورحت صعدت بالسياره ليورا ولشيخ صعد بالصدر
من طبك الباب شفت ابويه من بعيد واكف ورا الحوش ومخلي اديه ورا ضهره ويباوعلي بنضره اسف وقهر
ردت انزل اشرلي بايده لا تجين
رجعت سديت الباب
نزلت راسي وايديا على وجهي ابجي بحرگه عاضه ايدي
مشت السياره وبتعدت وبس صوت شهكتي مسموعه
رفعت راسي مبتعدين هوايه
طول الطريق ما وكفت اعيوني من الدموع
وارث نزل الشيخ يم بيته وتشكر منه
وطلعنه البغداد
وكف السياره نص الطريق ونزل جابلي ماي فتح الباب وكعد يمي رفع راسي وباسه وسحبني على صدره ولفرحه بعيونه اشوفها ما مصدك رجعت صرت بأسمه
فتح البطل وشربني
گالي
:- شو باوعيلي نداوي ارفعي راسج باوعي بعيوني ولح ما مصدك البارحه وين وليوم وين مو كتلج انتي الي من الله مسجله بأسمي اسمعيني ترا كلشي ايهون وداعتج كلشي سهل اهم شي رجعتي الحضني وابوج احنين وگلبه طيب بمرور الايام ايلين وترجع علاقتج بي وباهلج اوعدج بس مسئلة وقت وكلشي يصير تمام
باوعتله سوالي حركه بخشمه وحواجبه ايريد ايضحكني ابتسمتله بطرف شفتي ومسحت وجهي
نزلني وفتحلي باب الصدر كعدت يمه
وطلعنه البغداد رحنه بالاول للشقه الجان مكعدني بيها بقينا بيها يومين ابد ما تقربلي ولا ضغط عليه مخليني على راحتي والبس من ملابسي القديمات مبقيهن بالكنتور قافل عليهن مثل ما هنه بمكانهم ولضاهر اكثر ايامه يبقى هنا بالشقه مبين من ملابسه وعطوره
رحت كعدت مقابيله واني اريد يجاوبني على كلشي و افتهم زين من عنده فتحت موضوع حسام ويا كوتله
:- وارث اني رجعتلك وابوي اتبرى من عندي بسببك وما عندي احد بالدنيا حالياً غيرك فـ اريد من عندك تفهمني كلشي وتشرحلي ليش سويت ويا حسام هيج ما ترا بعدني حاقده عليك وما مسامحتك :
اتقرب مني وكعد يشرحلي كلشي وفهمني بهدو بحديث مطول وذكر كل تفاصيله
:- شوفي خلي افهمج واني هسه مستعد احلف الج بالقران الكريم يا ندى اني ما متقصد اخوج حسام ولا عندي عداوه ويا قبل
ما اشوفه ويا بنت اخوي
ومن هددته بوقت ما صار الحادث جان تهديد عابر تخويف لا اكثر ما ضنيت ارجع اشوفه مره ثانيه
بس انصدمت من رحت ويا ابو ثامر الجامعة رند وشفته انصدمت وتذكرت تهديداته عبالي نسه بس اكدلي ما ناسي تهديده ومن شافني وهو يسويلي حركات استفزازيه وسمعني كلام غثني بي استفزني بكل طريقه الصراحه كدر يستفزني وراني ارد علي بس اتجاهلته بوقتها ما رديت علي بس خليت احد يراقبهم هو ورند اذا صدك بعده ايريد ينتقم من عندي
وعرفت فعلاً اكو بينهم علاقة حب
واني من خوفي على بنت اخوي وشي اكيد هذا شرفي ندى ترا عرضي ولعرض غالي كلش غالي بالنسبه الي و ما اسمح الاحد يهددني بي كائن من يكون اذا جان اخوج او غيره
المهم حذرته هوايه انو يبتعد من عدها ويعوفها بحال سبيلها بس عاند واصر يبقى وياها اعناد بيه اضطريت ادخل ضرغام بالموضوع لان اني اعرف بضرغام رايدها وفدمره وضحلي انو يحبها وناوي يخطبها فـ كلت خلي يتزوجها ويفض السالفه احسن ما تكبر المشكله اكثر
بس من عرف بموضوع اخوج
وعرف برند تحبه تخبل منها لان جان يحبها وراد ينتقم من عدها ومن حسام.
بس اخوج جان كلش متهور لا يسمع الكلمه ولا يخاف من تهديد وما تحمل استفزاز ضرغام اله وقتله بدم بارد بدون ميرفله جفن واختفه بسرعه وقدمج انوي قربان غي سبيل يبعد عن نفسه الاذى
وبعد صار الي صار وراحو ضحية انتقام ثلاثتهم الله يرحمهم
فـ اني هسه الي اريد اوضحه الج واوصلج فكره واريدج تفتهمين زين اني ما حثيت ضرغام على استفزاز اخوج ولا كلت لاخوج اقتل ضرغام كل الي سويته بس ردت ابعد رند من انتقام اخوج وازوجها الضرغام لان اعرف بي يحبها
ما جنت اعرف راح تكبر السالفه الهل درجه ويصير هيج بس بعد صار الصار
وكل هذا ربج اله بيها حكمه واراده
هاي منيتهم واجلهم الله كاتبه هيج :
سكت ورجع اردف وهو مركز بعيوني
:- وجمعني بيج وخليتيني ارجع مراهق بعد ذاك العمر لج 40 سنه صار عمري واني عاشگ وولهان مثل الشباب المراهقين مخليتني اتحسر على شوفتج
بس هذا عقاب الي عاقبني بفد وحده ياثكل دمها ويا عنادتها بس الصراحه حبيتها بكل تفاصليلها بعد ما جنت كاره وجودها ابيتي سبحان مغير الاحوال كاتبلي اتعلعل تالي عمري اني وهاي شيباتي من وره زعطوطه شايفه نفسها عليه وضاله تتمنن عليه بكلمه احبك لو حبيبي اوووف يا لوعتي بيج ينديوا
ضحكت على وصفه الي وتذكرت كلمة انديوا وتقربت علي اكثر سحبني كعدني على رجله وشرحلي اكثر
وافتهت من عنده اكثر ومن اكدلي وسولفلي تفاصيل اكثر اقتنعت انو هوه مو سبب باعدام حسام بس جان يريد يحمي بنت اخو لان جان ابالع انو حسام جان ايريد ينتقم من عنده برند وميحبه صدك الله يرحمهم اجميعن
ثالث يوم طلعنه للمطعم واخذاني لسوك اشتريت ملابس الي وحتياجاتي جهزت نفسي فدمره لان كال بعد نرجع للبيت من فرحته بيه يشتريلي من كل حاجه 4 قطع
:- هاي شبيك وارث ترا هوايه ما اريد هلكد سشوي بيهن عندي تجاره شنو
:- انتي معليج الفلوس افلوسي ولمره مرتي انتي اسكتي معليج لا تحجين
اضحك على سوالفه وحركاته
بس دا احسه يخطط الشي يحجي كدامي بالغز او يبتعد من عندي وطول الطلعه هوه على اتصال ويا اسعد ومحمد وهناء واصدقائه ما اعرف شنو ايريد شيسوي
من رجعنه لشقه وكفت كدامه متخوصره
:- انت شعندك ليش دا احس كاعد تخطط الفد شي ومتريد اني اعرف هااا يله كول شعندك تخابر ومخبوص ومتريدني اعرف شي،
ضحك وهو يلف اديه على خصري قربني علي
:- الصراحه اني مشتهي اصير عريس واريد اسوي عرس وزفه واعرس عليج من جديد
ابتعدت من عنده واني
بعدني متفاجئ بقراره واكوله لا ما اريد
هو طلع جهازه واتصل بهناء كالها
باجر تجين وتاخذين ندى لصالون خليته كمل مكالمه
ندى :- وارث شبيك وليش من كيفك تقرر وهذا يا صالون ما اريد اروح ولا اريد زفه ولا شي بعدين انت تعرف وضعي نفسيتي ترا زفت اكثر الاوقات كاعده اجاملك ترا
وارث :- حتى لو ميخالف ومو بكيفج اني اريد اعرس وانتي تصيرين عروستي عاجبني اشوفج بالابيض مو من حقي!!
نزلت راسي مالي واهس كلش ولا اريد كاعده احس بتأنيب الضمير بخصوص تقي بعده ابالي ما اريد افرح بس شلون اخلي وارث يقنع
وارث :- والله اسويلج احلى عرس واحلى زفه
ولج الحد هاي الحضه اني ما مصدك جنت مخطط غير شي وصار شي ثاني وبعد احلى من تخطيطي سبحانك ربي الف الحمدلله ولشكر تكرهونَ شيئً وهو خيرً لكم
ندى :- يعني مصر اله انسوي عرس
وارث :- اي حيل وكلش وهواي وشرط زفه وبدلة عرس وندخل للبيت عرسان وايدج بايدي ولهلاهيل وجكليت ينطش فوك روسنه
سكتت شفته كلش مصر وفرحان اله واهس بس من داخلي شي رافض هالفكره ولا فرحانه ابد
ثاني يوم اجت هناء الصبح حضنتني وتكولي شسويتي بينه ولج من وراج وارث راد ايروح من ادينه وعرفت منها انو صاير بي سكر اتفاجئت
باوعتله:- وارث صدك عندك سكر ومن شوكت صاير بيك
جتن يورث بجگارته باوع عليه وهو مبتسم
:- ليش اكو غيرج يسوي بيه سكر عليتي گلبي عاللل انتي وابوج بس الحمدالله صار يمي العسل ما اطول بسلامتج اني لو انجلط لو اموت ما اتحمل كل هل حلا
:- لا اسم الله عليك وارث لتكول هيج ترا شبعت حزن ولطم كافي بعد مابيه حتى ابجي خلصت روحي
حضني حيل وهو يبوس بيه من خدي فديتتت ربج اني
ولكم احبها مو بيدي كدام هناء خجلت ادفع بي ميبتعد
لما هناء صاحت بي ابتعد يضحك ويحك بلحيته يله اليله اعرس عليج بليل عود هم استحي ودفعيني
ويغمزلي
ضربته على ايده
باوع الهناء وكالها
:- هناء افلوس وعندج شوفي شنو تحتاج اليوم اني اليوم عريس يبعد اخوج
و كال اني هم احتاج اروح لسمكري يحتاجلي حلاقه وحمام سوگ مال عريس
گام من يمي وهو يغمزلي عاض شفته ذايب فدخجلت كدام هناء فشلني
كالتله هناء
:- ها خير سالمين عليمن ذايب يبعد اختك عوزك بعد امطلها كدامي شهل حركات وارث استخفيت انت فدمره
كالها:- لا عمي ما مسوي شي وبعدين شكو اتباوعين بوجهي اذا مستحيه دوري وجهج خليني اسوي حركات وبركات للعروس
راح اخذ ملابسه وطلع يضحك
نضحك على سوالفه
هناء:- يله عيوني بسرعه يراد وقت ابين التنظيف ولحفافه ولمكياج
كلتلها :- ما اريد البس بدله مالي واهس
كالت :- معليج انتي ولج ماتدرين بوارث من اول يوم اجيتو ايخابر بيه ساطرني ايريد ايسويلج عرس وزفه واصدقائه جاين من بعيد وصار يومين مخبوصين بالبيت تنظيف وترتيب وتقى اجت من البارحه واشترالج غرفه جديده تركيه تجنن وانطاني افلوس اشتريلج تخم ذهب ايكول ما اعرف بهل سوالف انتي وياها روحي
وكومي يله اخذانه الوقت ولسوالف ما تخلص اسعد وصل ينتظرنه جوا
استعجلي
لبست ابسرعه وطلعنه نزلنه شفت اسعد نزل سلم عليه وتباركلي
اول شي اخذانه الابو الذهب اشتريت تخم ذهب كلش حلو
ورجعنه للسنتر مال فساتين الاعراس اختاريت فستان فخم بس نازك ملائم ذوقي اشتريته حتى يبقى ذكرى
وأخر محطه يم الصالون احس نفسي مخبوصه ومرتبكه ما مخططه الهيج شي وتمنيت بهيج اجوا البنات وياي مثل وكفتهن وياي وهوستهن بحفلة عقدي على تقي
بس ماكوشي ايصير مثل منريد خابرت ضحى ابجي اريدها وياي شجعتني انو استمتع بهيج يوم واعيش الحضه وانسى الحزن وتبارك هم سولفت وياي وكالت ادزيلي صوركم انشوفكم كلتلها اكيد اتباركلي فرحانات اليه يعرفن بيه احبه سديته منهن
وبلشن بيه تنظيف العاملات بالبدايه جسمي وبعدين وجهي ورتبت شعري وبقيته على لونه احب لونه وخلتلي مكياج خليجي
اسمع موبايل هناء ابد ما سكت وارث يتصل واسعد ولبنات من البيت خبصوها خطيه يله وبسرعه وليش اتأخرتوخلصت مكياج ولبست الفستان الابيض وهناء باوعتلي فرحانه وصلي على محمد وأل محمد
اتكولي ولج طلعتي جنج باربي وكفت اباوع على نفسي على المرايه اول مره احس بنفسي صدك عروس بس فرحتي ناقصه لو اهلي يمي واكفين وياي
جان هسه فرحتي ما انطيها الاحد
نزلت دمعتي من گلبي اتمنيتهم موجودين
واذكرت أمي لو يمي وتشوفني بالفستان
حسيت بأيد هناء اتطبطب على ضهري
عرفتني ابجي لان اريد اهلي
همست يم أذني
:-كلشي يصلح وداعتج اهم شي رجعتي الوارثج ما تدرين شنو صار بي من رحتي عنه ولج حتى سكر صار بي
افرحي اليوم انتي عروسه الحبيبج عيشي الحضه مو كل يوم تنعاد الافراح ولحضات السعيده:
مسحت ادموعي ولبستني البرنص خابرها وارث منتظرنا بالباب كالتله تعال ناخذلكم اشكم صوره واطلعها بأيدك من دخل
جنت دايرتله ضهري ولابسه البرنص
من دخل عبالك اول مره راح ايشوفني
رجفت اديا حسيته وراي واكف لزمني من اكتافي ودار وجهي علي رفع البرنص وباسني من راسي رفعت اعيوني
واشوف لمعة اعيونه مال الفرحه وابتسامته الاخذت گلبي وطالع كلش حلو وانيق بالون الاسود ولقميص ابيض وربطه ماروني عاصر ايدي بين ايده
اخذتلنه المصوره شكم صوره وطلعنه
كعدني بالصدر يمه وهو يسوق ويهوس الطريق كوله واصدقائه نزلو نص الطريق يرمون ويرگصون نزل وياهم ركص ورجع كمل الطريق
وصلنه للبيت نزلني ولهلاهل ولهوسات عبالك اول مره ادخل الهذا البيت اشوف الحجيه فرحانه وتطش جكليت علينه وتهوس الوارث
وتقى ترگص وتسويلي علامة بايدها مال اعناد للي يكرهون وتضحك وضحكتني وياها وسحبتني اني و وارث ركصتنه بنص الصاله
جانت الاجوا كلش حلوه نسيت حزني واني اشوف وارث فرحان وفرحتي بي اكبر ما جنت متوقعه ارجع اله جان شي بالنسبه الي شبه المستحيل
خلصت ذيج اليه جانت احلى ليله عمري مرت عليه بعد معاناة وحزن ودموع
جان مجهز جوازات السفر بس كملت الفيزا وره الحفله بثلاثة ايام سافرنه التركيا وجانت احلى سفره ما خلا شي بنفسي شنو أبالي سواليا طلعات ومطاعم وفرفرني باسطنبول كولها هو يعرف بيعا لان مسافرلها شكم مره وحتى يعرف من لغتهم شكم كلمه واهم شي اخذاني زرت اطرابزون ولبحر الاسود لحضات من العمر عوضني كل هاي السنين الفاتت
بقينه عشرة ايام ورجعنه للعراق جبنه هدايه للكل واني اختاريت هداية بنات وارث زها وزهراء حتى اقربهن الي بالفعل قربتهن الي وصادقتهن ولاحظت متغيره معاملتهم الي حتى ثائر و فاء اتباركولي ومالهم دخل بيه واستبرق اجتني هي ومحمد جانت حامل وفرحانين بيها وهي تداوم مرحله اولى بالجامعه
ونورس تداوم جامعه قسم التخدير بس عازله نفسها عن الكل كافيها شرها بخيرها
وامير طلع مزوج وحده هم عراقيه مقيمه اهناك وسامر مخلصها شهر بالعراق وشهر بأيران
خلصت أجازة وارث بعد شهر من عرسنه والتحق الدوامه
وكلما يلتحق اضل اوهوس مثل هذا الي يكول (الگارصته الحيه ايخاف من جرت الحبل ) واني هذا حالي من كد حبي اله اخاف اخسره
احس گلبي على ساعه يوكف من الخوف اتابع الاخبار واخاف اكثر بس هو كل مره ايطمني ويدزلي صور اله يكولي مكاني أمان ومسيطرين على الوضع
وصار ثلاث أشهر على زواجنه اشتاقيت الأهلي اريد اروح الهم بس ابويه حيل زعلان عليه وميقبل اروح اشوفهم توصلني كل اخباره من زهور نتراسل بالخفيه بدون علم ابويه
وضليت على تواصل ويا البنات تبارك وضحى وزهور واشوف صورهم ايدزولياها اشوفهم هم وجهال
وعلاقتي اني ولحجيه كلش حلوه وكل شهر اتعيد نفس السؤال عليه خايبه نديوا شنو السالفه ما حبلتي
ومن اكول الها لا تضوج وتضل تدردم عليه
شلون وارث عمره جبير دخل بالاربعين وهو ما عنده ولد
اكولها لعد بيدي شبيدي اني هم اتمنى اصير أم وكل شهر انتظر بس ماكو
هو كلشي رزق ربي اعرف واحكم شوكت ما يجي هلا بي
لما بشهر الخامس من زواجنه حسيت باعراض الحمل بس ما حجيت الاحد منهم لما جبت تحليل منزلي وجربته وطلت النتيجه ايجابيه
طرت احس الدنيا ما واسعتني من الفرحه بس خليته مفاجئه الوارث لما ينزل
وصادف عيد ميلاده ثاني يوم من نزوله للبيت وسويتله حفله خاصه بس بيني وبينه باليل استحي كدام الكل فـ بس بغرفتنه سويتها وجنت محضرتله هديه وصيت هناء جابتلياها جانت الهديه ساعه وقلم وبروش ذهبيات ماركه كلش حبيتهم ومن ضمن الهديه اشتريت اوفر اطفال ولتحليل غلفتهم على شكل بوكس هديه وقدمتها اله من فتحها اتفاجئ ايباوعلي ويرجع يركز بالتحليل ومن الفرحه ايحير شنو يسوي شايلني ويفر بيه بالهوا وما صبر لصبح اخذاني من ايدي نزلني للحجيه دخلنه الغرفتها فتح الضوء كعدت مفزوعه خطيه كالت
:- ها ولكم اشبيكم شصاير
كالها وارث وهو الضحكه شاكه حلكه
:- يمه هاي الفاهيه حبله وراح تجيبلي زعطوط مثلها واجيت افرحج وياي ما صبرت ابقه لصبح
وهي ما صدكت الخبركامت تهلهل اباوع لساعه بـ 12 ونص بليل اباوعلهم وميته من الضحك شبيكم عبالك صار اسنين ميصير عدنه اطفال
ومشة الايام جانت احلى ايام واني اشوف بطني تكبر ومنتظره أول فرحه الي
وزادت فرحتهم من سويت سونار وعرفنه جنس الجنين ولد
ندى :- وارث ترا من هسه اكولك مقرره اسمي ابني على اسم ابويه احمد
وارث :- لا اشو اله اسمي جابر هم اريد اسمي على اسم ابويه مو بس انتي
بالاول عبالي من صدك يريد يسمي جابر طلع يضحك عليه
ومن دخلت بشهر السابع طلعنه جهزنه اله احلى جهاز وفرحانين بي وعلى كلشي لازم نتعارك هو يختار شي واني اختار شي ثاني اذواقنه مختلفه بس بعدين ينجبر على ذوقي اقنعه انو اني الي تعبانه وشايلته ابطني مو اهو يسكت ويقبل يشتري الي اريده
ومخلصينها اعناد ولزعل ميخلص ابيناتنه
لما دخلت بشهري والاوجاع زادت عندي الحجيه تكولي هاي تشاليع لان قربت ولادته وكلش ثكلت احس نفسي عبالك بطريق اتكلب من امشي لما بيوم كعدت نص اليل على وجع قوي ابطني عرفت عندي اطلوگ و ماجان وارث موجود ملتحق الدوامه
اتصلت علي وكتله جانت الساعه بـ2 ونص بليل
احسه انخبص ويحير شنو ايسوي وهو بعيد عني كالي
:- راح اتصل على هناء تجيج هي واسعد نص ساعه ويكونون يمج بس اصبري وخليج قويه انتي سباعيه تتحملين الخاطر حمودي اول فرحه النه واني باجر من الصبح موجود يمج
نزلت يم الحجيه كعدتها انخبصت خطيه من عرفت رادت تروح الثائر تكعده هو ووفاء عود ياخذوني للمستشفى
بس اني رفضت وكلتلها
اجوني هناء واسعد بالطريق
وفعلاً نص ساعه واجوني اخذوني للمستشفى بقيت لصبح اطلگ ولوجع ملخني تعبت حيل بعد مابيه طلگه على طلگه وطك راس الهادي عندي
بس الطفل ما ينزل بعده بعيد
الدكتورات ملخني من الفحص ولوجع يزيد لما خلصت روحي.
و وارث ابد ما بطل اتصالاته ويا هناء يتوسل احجي ويا بس ما اكدر احجي عباره عن صريخ حتى شعري ملخته احير شنو اسوي اخر مره بس خلت الجهاز على اذاني اسمعه بس ما اكدر انطق تعبت وابجي اسمعه يكولي
:- نداوي حبيبتي بس قوي نفسج وصيري سباعيه الخاطر اوليدج حمودي
وبعدت الجهاز من اذاني واني اعيط هو يسمعني تخبل خابر على واحد بالمستشفى عنده عرف بي كاله سولها عمليه على الخاص وعلى مسؤليتي البنيه راح اتموت من البارحه الليوم ما مجيباتها
عاد الدكتورات اهتمن بيه وكل اشويه اتسويلي سونار اخر مره كالت الطفل نبضاته ضعيفه لازم انسويلها عمليه وبسرعه جانت الساعه بـ 10 الصبح
غمضت عيوني واني ابجي اسولف ويا رب العالمين
:- ياربي بعد كل هذا الوجع ولموت الشفته بالطلوگ راح اسوي عمليه دخيل اسمك يارب خلصني راح اموت
وادركت عظمة الأم بهل ساعات ولحمل ولوجع الي تتحمله الأم ومو عن عبث من گال رب العالمين ((الجنه تحت اقدام الامهات ))
واجت ابالي احجايت أمي من گالت ما يطلع راس اله يشيب راس وفعلاً
وفعلاً ألم الولاده يعادل 42 كسر عظم بالجسم وهو ثالث ألم من بعد الحرق ولغرق:
اخذوني الغرفه تبديل الملابس هناء ساعدتني لبستني وجهزتني
طلبت منها خابر وارث واهلي
ولممرضات يصيحون عليه استعجل
المهم اخابرهم اتصلت على وارث بالبدايه
ندى:- وارث اريد من اصحه اشوفك انت اول واحد واذا متت دير بالك على اوليدي وسمي احمد
وارث:- اسم الله عليج يرويحتي شنو هل حجي مجرد اتنامين وتصحين تلكين ابنج بحضنج
بس صيري سباعيه ما اوصيج واريدج اطلعين بسلامه وكلشي سهل انتي اسمينه مثل ما تردين مو اني يله بويه صيري قويه اني فد ساعتين واكون يمج
سديته من عنده ورجعت اتصلت على زهور ما جاوبت دزيتلها رساله
انطيتها علم انو راح ادخل للعمليات هسه
اخذت من عندي الجهاز هناء وهي تقرا عليه ايات قرانيه ورحت دخلت صالة العمليات.....
..... احاوا فتح اعيوني كوه اشوفهم مثل الخيال وهما يصيحون عليه وبأسمي يريدوني اوعى ويضربون على خدودي راشديات احاول احجي بس ما اكدر وحس صوتهم بعيد عني وهم يصيحون بأسمي بس كدرت ارمش وحركت لساني انطيتهم علم اني واعيه لما رجعت فزيت من الوجع من نقلوني من سديه الى سديه ثانيه صرخت بوجع وما ينحمل وكل جسمي يرجف بعدني ما مصحصحه زين احس بالهوسه يمي واني اوون من الوجع
ميزت صوتين احاول افتح اعيوني زين حتى اتأكد ميزته هذا صوت وسام وزهور
ووارث من الجهه الثانيه يحجي وياي ايصحيني وهو مقرب وجه يمي يكولي
:- كافي نوم ندى شسالفه اكعدي عاد عيب هنا اخوج وسام وزوجته احو يشوفوج
ابتسمت واني بقمة الوجع فتحت اعيوني اباوعلهم
اقترب وسام باسني براسي وهو يتباركلي ويتحمدلي على السلامه
وارث لازم أيدي ويطبطب عليها يتحمدلي على السلامه من الجهه الثانيه
وزهور تبوس بيه وتمسح بوجهي
وياهم حسومي جايبينه الي اشوفه.
ما اكدر احجي بس احس الدنيه ما واسعتني من الفرح من شفتهم
نقلوني الغرفه خاصه وجابولي الطفل متلهفه اشوفه انطونيا بوسته وباوعت الوسام كوتله
:- انت أذن بأذانه واريد اسمه احمد على اسم ابويه
وباوعت الوارث يضحك وهو يكولي
:- لعد اني شنو هنا خراعة خضره غير لازم ابو أيأذن بأذانه وهو ال يسمي
:- لااا اله وسام هو ايسمي ابني ابمكان ابويه
وجانت احلى ساعات
حمدت الله وشكره
سبحانه ما اعظم عطايا ونعمته علينه وعرفت ما ياخذ من البشر شي الى ويجبر بخاطره بشي ثاني يستحق هل تعب ولعناء ويكون الجبر من بعد التعب اله طعم خاص واحلى بهوايه
صح الموت اخذ من عندي امي وحسام وتقي بس انطاني احلى هديه عوضني عن تعبي بحمودي غناني عن الكل حتى عن وارث التهيت ويا بالرغم دا احس وارث ايعاملني مثل بنيته مو بس زوجته حنيته عليه مثل حنية الاب على بنته وهداني احلى هديه
كبر حمودي وصار عمره 4 شهور واخذته ورحت الابويه حتى اذا يطردني ميخالف المهم اشوفه واريح ضميري
ما اعترض وارث بالعكس فرح وكال اني هم اروح اخذ من خاطره بالكي يقبل ويانه
ورحنه سوه
دخلت علي كاعد بالاستقبال أول ما شفته ما سيطرت على دموعي ركضتله حضنته
:- افيييش يابويه شكد مشتاقه الريحتك راح يصير سنتين ونت معاقبني وحارمني من شوفتك
بقى واكف مثل المصدوم ما مستوعب جيتي اله
نزلت على رجله ابوسها وابجي اطلب منه السماح سحبني الحضنه وحضني ويبوس بيه وهو يبجي ولشهكه تطلع من گلبه لما وارث اتقرب وبعدني من عنده وسلم علي وطلب من عنده السماح
وشوفته ابني اخذا بايده بوسه وفرحان بي
وهو يكولي يشبهج كاعد اشوف ندى الصغيره
ورا الغدا وارث رجع واني بقيت يمهم واجن البنات تبارك وضحى شفتهم ورحنه لنجف زرنا امي وحسام وتقي
ما رجعت البغداد لما وارث خلص التحاقه ونزل للبيت واجه عليه اخذاني رجعنه البيتنه
ولصدمه اكتشفت نفسي حامل بطفل الثاني واني جنت مخططه وراسمه غير شي ابالي ضجت حيل مو وكته كلش لان حمودي بعده صغير واني امقرره السنه ارجع اقدم واداوم جامعه
بس من عرف وارث گام يهوس فرحان ويشكر من الله
وزها وزهراء فرحانات بأخوهم حمودي وكل وقته عدهن لو يم الحجيه اتهوسله
كلش ايحبو ومهتمات بي اباوعلهم وفرحانه بيهم منتظره وارث موعود نزوله
منتظرينه على الغدا بالصاله كولنه مجتمعين ويمنا استبرق ومحمد وخابصينه برفوله بنتهم شلون تمشي وتدردم عليهم ولكل يباوعلها وفرحان بيها بين اجدادها ثائر و وفاء يهوسولها
واسعد وهناء موجودين
وتقى اجتنه لان قربت تخلص العطلة الصيفيه واجت تشوفنه
دخل وارث جايب ويا جكليت ايطش على راسي وعلى الجهال ويهوس ويرگص وزها وزهراء وتقى وكفن ويا يصفكن اله ايهوسون الحمودي وهو شايله يهوسله
(( اصيار أول امس صبح للحزام ))
واني صافنه على هوساته مال عجايز يسمع الحجيه من تهوسله ومتعلم من عدها شكم هوسه
ولحجيه تحجي عليه اشلون ما قابله وابجي لان حامل
هوستلي وهم يصفكون وياها ويضحكون
(((خايبه انطاج الله وما قصر
حمودي وخيرات أكثر )))
وعشت وياهم احلى لحضات سعيده والله جبر ابخاطري وعوضني بأجمل تعويض دخيل اسمه
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
