رواية بنت الكهوجي الفصل الأربعون بقلم احمد
تميم : گعدت يمو گلتلو احجيلي شنو صار علمود اساعدك وراح يبقى الكلام هذا سر بيناتنا لحد ما انت تحجيه او تگولي احجيه بدالك
زيد : توعدني
- افه عليك ليش اني اخلفت بكلامي وياك من قبل
- الموضوع هالمرة جبير كلش يجوز حتى انت تصير ضدي بيه
- اني وياك حتى لو الكون كلو ضدك بس احجيلي علمود اعرف شنو الموضوع
- تمام
- تتذكر ذيج المرة من اجت ام حازم وبناتها واني وياك جنا بالبيت وتأخرت اني
- اي اتذكر
- بيومها بدون قصد تواجهنا اني واديان عند باب الصالة واجت عيوني بعيونها وحسيت باحساس غريب من شفتها مرتبكة بسببي
من ذاك اليوم صرت كل ما اصفن اتذكر منظرها كل ما انام احلم بنظراتها وفوگ كل هذا عذاب الضمير اكلني اكل لان اخت صاحبنا حازم
قررت بيني وبين نفسي انو اتحمل لحد ما اتخرج واجي اگولك تخطبها الي وبنيت هواي احلام عليها وبكل مرة يزورونا بيها احس بفرح مو طبيعي
الى ان سمعنا بموضوع ابن عمها بوقتها تخبلت لا اگدر اتدخل ولا انت گدرت تحل الموضوع وقررت اني اساعدها بنفسي
باليوم الي اخذتها هي وامها واختها بالليل جنت افكر بفد طريقة اعرف كل الاخبار عنها بس ماگدر احجي ويا حازم او وياك بالموضوع
فجهزت ورقة بيها رقمي ومن اخذتهن تعمدت اوگف يم ساجية ( مجرى ماي ) من جهتها وقبل ما تنزل گلتلها انزلي من الجهة الثانية علمود الساجية
من نزلن امها واختها بدون ما ينتبهن انطيتها الرقم وهي كتلها الخوف گلتلها اخذيه وضميه واخذتو ونزلت وعفتهن ورجعت
بعدها خابرتني من رقم امها بس خبلتني لحد ما گالت الو كل شوية تتصل وابقى احجي ساعة وهي خايفة ماتگدر تحجي وياي
اخير شي گدرت اقنعها انها تحجيلي التفاصيل وگلتلها اني راح اساعدج بس اريدج دائما تحجيلي التفاصيل الي تصير وياج
واتفقت وياها ما تخابرني اذا ماكو شي مهم ما جنت اريد احجي وياها زيادة عن اللزوم تريدني احجيلك احساسي من تحجي وياي
- جنت اريد اعرف ليا درجة واصل بحبها .. احجيلي
- جنت بكل اتصال لا شعوريا افرح فرح مو طبيعي وكل حرف تحجيه احس نفسي طاير بالسما واني اسمعها من تنطقو
رغم انها مرات تضوجني بالاخبار الي اسمعها بس مجرد اني اسمع صوتها جان كلش كافي بالنسبة الي وبنفس الوقت اخاف يجي يوم وانحرم منو
الى ان اجى ذاك اليوم المشؤوم من اتصلت بي وعفتكم بالحديقة ودخلت داخل علمود احجي وياها بس جان وضعها مختلف
اديان : فدوة الحگني زيد
- شبيج اديان شنو صاير
- ولد عمي اجو هنا ويگولون لماما منا لاسبوع الزواج وگولي لحازم اذا وگف بوجهنا راح ننتقم منكم كلكم وخصوصا انتي وبناتج
- لا تخافين..............
هنا سمعت صرختها من واحد منهم كشفها انها دا تحجي وياي واخذ التيلفون وگال اذا تريدها تعال ل (العنوان) اخذ جثتها بعد ما نغسل عارنا
بوقتها عقل ما بقى براسي طلعت اركض وتفكيري كلو بانو شراح اسوي من الگي جثتها مشمورة حالها حال اي حيوان ما الو قيمة
وصلت المكان الي جانو بيه وجان واحد بيهم ماسكها وموجه السلاح براسها وثنين اجو علمود يتعاركون وياي بس من كمية العصبية ماگدرولي
لاول مرة بحياتي استقبل الضربة بدون ما احس باي وجع وكأنو الضربة هاي دا تزيد قوتي بدال ما تضعفني وتقلل من نشاطي
اخير شي وگعت واحد بيهم وصار بوجهي الي نهى عليها ومسكتو من رگبتو وبايدي الثانية مسكتو من ملابسو ورفعتو فوگ
جنت اريد اوگعو على حجرة بالگاع علمود اقضي عليه بس الي جان ماسك اديان ضربني طلقة وعلى اثرها گدرو يسيطرون علي
اديان من شافتني وگعت خلصت نفسها منو واجت صارت تحميني بجسمها علمود ما يضربوني وسحبها الي شايل المسدس من فوگي
اخذها وشمرها بالگاع وضربها طلقة ببطنها جانت كأنها بطلقة بگلبي هاي الطلقة الي حطمتني بكل ما تعنيه الكلمة من معنى
اجى الي نهى عليها بايدو سجين يريد يقتلني وماعرف شنو صار بس كل الي اعرفو اني اخذت السجين من ايدو وحطيتها برگبتو
اخوانو هجمو علي بس الي جان بيدو المسدس ماعرف بوقتها ليش ما استخدمو ماعرف اذا يريدني اتعذب قبل ما اموت لو تخربط بسبب الي صار
المهم مسكت حجرة ومن هجم علي الاول ضربتو براسو وفقد الوعي وضربني الثاني بالسجينة بايدي واني ضربتو بالحجرة وهو هم فقد الوعي
وشلت اديان واجيت امشي للبيت وجان كل خوفي انو افقد الوعي بالطريق واوگع وتموت اديان قبل ما ينقلونا للمستشفى بسبب النزيف
بس من وصلت البيت كأني وصلت بر الامان كأني وصلت للمكان الي اگدر اغمض بيه واني متأكد ان اكو احد راح يتكفل بالموضوع
هذا الموضوع كلو من بدايتو لنهايتو والباقي انت تعرفو ومن هسا اگولك بس تصحى اديان وتتحسن تخطبوها الي وتصير زوجتي امام الله وعبادو
- كل هذا صاير وياك واني ماعرف
- يعني شنو تريدني اگولك دا احجي ويا اخت حازم
- هسا كون صريح وياي .. قابلتها او شفتها وجه لوجه
- لا يا تميم اني ما تربيت على هالاشياء اني ضميري دمرني لمجرد جنت افكر بيها تريد اتواعد وياها واروح اشوفها بدون علم اهلها
ثانيا اني اريد اتزوجها مو اتواعد وياها فشلون تريدني اخليها تخون اهلها علمودي
- بس بالمقابل هي حجت وياك اتصال
- اني وياك نعرف الضروف الي جبرتها تحجي وياي ولو تعرفني ما اساعدها جان ما حجت وياي
واولاد عمها جانو بمكانهم من اجيت
- اي
- تمام
طلعت لزياد گلتلو ابقى يمك بين ما ارجع حاول يستفسر وما جاوبتو ورحت عالسريع ركبت سيارتي وتوجهت للمكان الي وصفلياه زيد
نزلت من سيارتي جان المكان كالعادة فارغ مابيه احد شغلت فلاش التيلفون ويا ضو السيارة لگيت اثر دم بس قليل لان صاير عليه تراب
حركت اثر الدم برجلي علمود لا يكون واضح بالنهار وتأكدت ان المكان خالي ورجعت للمستشفى لگيت زيد نايم وسألني زياد گلتلو ماكو شي
زياد : اگلك زيد شنو قصدو بالي سواه
تميم : شنو من قصد
- اليوم جايين الشرطة يحققون وياه وگايلهم ما اريد اشتكي على احد
- شو مادري اني
- هو حجالي قبل لا ينام
- وما حجالك السبب
- يگول اريد اخذ حقي بايدي
- لا راح ياخذ حقو ولا راح يلگيهم اساسا
- شعرفك
- حازم يگول مو موحودين ببيتهم فاكيد سوو فعلتهم وانهزمو
- ماعرف والله بس لنفرض عرفنا مكانهم شتسوون
- ماعرف بوقتها راح اقرر
- بس انت گلت من قبل انك تحاسبهم
- الموضوع اكبر من ما توقعت
- احجيلي
- بعدين لان وعدت زيد ماحجي شي
- تمام
تميم : الي جان مريحني بالموضوع ان زيد واديان علاقتهم جانت سطحية كلش لدرجة مو متلاقين قبل هاي المشكلة
هذا الشي راح يكون لصالحهم بس اهم شي هسا انها تصحى من الغيبوبة وتستعيد عافيتها علمود نزوجهم قبل ما ينتشر الموضوع
بس لازم من تصحى احجي وياها انو تگول لاهلها ما تتذكر شي وبنفس الوقت ما تنطي خبر للشرطة علمود اگدر اتصرف براحتي
الحلو بزيد انو ما حجى شي من گعد وهذا هم راح يكون بصالحو اهم شي ما يعرف حازم هسا ويتخربط تفكيرو ويمنع زواجهم
زياد : صدگ تميم
- شنو زياد
- زيد شنو قصدو من گال لاخت حازم ديري بالج على نفسج
- اولاد عمها مهددينها هي وامها انو راح يقتلوهن اذا حازم منع زواج اديان من اخوهم
- ذول شنو من ساقطين
- عبالهم الدنيا تايهتلهم بس تطمن اخوك كسر شوكتهم
- الي اعرفو زيد واديان ثنينهم متأذين وجان بينهم وبين الموت شعرة
- صحيح بس راح تعرف بعدين كلشي
- اروح اجيب عشى اجيبلك شي وياي
- سلامتك
- الله يسلمك
تميم : مر ذاك اليوم طبيعي وجان روتيني مجرد اروح للبيت وارجع للمستشفى لمدة 3 ايام بس خلال هالثلاث ايام تغير الوضع
لان جنت ابقى لحالي بالمستشفى وزياد جان يرجع للبيت لان خليتو يرجع لدوامو وبقيت بس اني اخذت اجازة وزيد لان متصوب
وحازم واهلو يوميا يجون من الصبح للمغرب ويرجعون بخيبة الامل وتبقى اديان نايمة مثل ماهي بس صارو يگدرون يشوفوها
باليوم الثالث بعد ما گعد زيد الساعة 8 بالليل اجى الدكتور فحص زيد وگال باجر يگدر يطلع بس لازم يبقى مرتاح علمود يتشافى بسرعة
سألتو عالدوام گال لبداية الاسبوع الجاي يگدر يداوم بس يقلل حركتو شگد ما يگدر حتى بين المحاظرات لا يطلع من القاعة يكون افضل
تشكرت منو ودخلت لزيد وحجيتلو الي گالو الدكتور
زيد : اريد طلب
- اطلب وتدلل
- اخذني الها
- لا زيد ذيج المرة قدرت وضعك وحطيتني بوضع كلش مو حلو
- تميم اقسم بالله دا احترگ من داخل لا تزيدها علي انت وانت تعرفني حتى لمس ماراح المسها
- يا زيد اعرف وضعك بس صعبة افهمني
- بس اشوفها اقسم بالله ما المسها او اگلك انت ابقى خارج الموضوع الذنب علي
- قسم بالله راح تفضحنا انت
سندتو وباوعلي وهو يضحك واخذتو لغرفتها وجان اكو كرسي سحبتو يم السرير وگعدتو عليه وطلعت خارج الغرفة انتظرو وهو بلش يحجي وياها
زيد : بضحكة انكسار .. غريبة الحياة مو يا اديان غريبة لدرجة اني اريدج وانتي تريديني وبنفس الوقت گاعد يمج وماگدر المس ايدج
غريبة كلش لدرجة انو اني الي تأذيت اكثر منج گعدت قبلج غريبة لدرجة انو مجبور اتحمل العذاب واني اشوفج نايمة ومغمضة
تدرين شنو اتمنى اتمنى انو من اگعد الگيج يمي بالغرفة وتباوعيلي بابتسامة وتحجيلي انو اني گعدت قبلك وانت جنت بغيبوبة
اگعدي خليني اكحل عيوني بشوفتج اگعدي خلينا نرسم احلامنا سوا ونحققهن سوا ونتحدا الكون كلو سوا ونكون لبعض ، مع بعض ، نكمل بعض
ادري بيج متأذية هواي وادري صعبة عليج تگعدين هسا واعرفج تعبتي بس اريد اوصيج وصية وحدة وهي ارتاحي بس لا تروحي
وكوني متأكدة يا اديان انو راح ابقى وياج وانتظرج تگعدين طول العمر ومستحيل اتخلى عن حلمنا مهما طال الزمان
رغم وضعي هذا وحزني عليج بس مرات اضحك من افكر بشكلج من ارجع للبيت وتكونين من معصبة بسبب الجاهل واصير احرگ اعصابج
زيد : نزلت راسي ولمحت بطرف عيني اصبعها تحرك وفورا رفعت راسي وركزت عليه ثابت گلتلها افه عليج وصلتي زيد رسميا للخبال
وفزيت من تحرك اصبعها مرة ثانية بوية بوقتها احس گلبي صار يگمز من الفرح وصحت باعلى صوتي تمييييييييم
تميم : جنت واگف يم باب الغرفة وما حسيت الا صوت زيد رج المستشفى وجان صوتو يدل على انو مصدوم وكل الي اجى بتفكيري اديان ماتت
اول ما دخلت شفتها تون وزيد گال بسرعة جيب الدكتورة ورجعت ركض جبت الدكتورة بين ما وصلنا لگيتها گاعدة وجانت تباوع لزيد وتبجي وهو يهدأ بيها
جانت الدكتورة تريد تفحصها واني مركز على زيد شلون دا يحجي وياها بهدوء ويحاول يطمنها وكأنو اب دا يحجي ويا بنتو
جان مقرب الكرسي من راسها ومسك وجهها بايديه ويحجي وياها لحد ما هدأت شوية وفحصتها الدكتورة وگالت وضعها كلش زين بس تحتاج كم يوم راحة قبل ما تطلع
تشكرتها وراحت وجان زيد يباوع عليه ويضحك مو مصدگ نفسو وهي تباوعلو وعيونها تجري دموع بهدوء گلتلها اديان بوية انتبهيلي
زيد : مو وقتك تميم اطلع اطلع بعدين
تميم : ههههههههه ترا اطلعك انت خارج .. المهم اديان
اديان : ها
- شوفي راح يجون اهلج ويسألونج عن الي صار الي اريدو منج تگوليلهم ما اتذكر كلشي مفهوم
- ليش
- اسمعي مني وگليلهم ما اتذكر كلشي واذا اجو الشرطة گليلهم ما اريد اشتكي على احد اهم شي محد يعرف بالي صار لحد ما تتحسنين
- بس هم حاولو يقتلون زيد
- انتي تثقين بي مثل ما اخوج حازم يثق بي
- اي
- لعد خلي هالموضوع سر بيناتنا احنا الثلاثة لحد ما يجي الوقت المناسب
- تمام
- وانت استاذ زيد يلا لغرفتك
- بالي خلق ابوك اطلع شوية اريد احجي وياها
- الك دقيقة وحدة راح اطلع انطي خبر لحازم انها صحت وارجع اخذك
- اتفقنا بس اطلع هسا
- ههههههههههه طالع طالع
طلعت واني اضحك على تصرفاتو وخابرت حازم من گلتلو اديان گعدت تخبل من الفرح ولو بكيفو يطلعلي من التيلفون
سكرت منو ورجعت اخذت زيد وجانت اديان وجهها احمر كأنو طماطية من طلعنا گلتلو شگلتلها وهيج خجلانة گال شدخلك بيني وبين زوجتي
من گال هيج شبعت ضحك عليه وصلتو لفراشو وگلتلو هسا نام وارتاح بعد ما گعدت حبيبة قلبك وعفتو وطلعت خارج
باوعت الساعة 11 بالليل وخابرت امي بشرتها بگعدة اديان وگالت باجر اجي ازورها وشوية واجو حازم وامو واختو يركضون ركض
حتى ما لحگ يتشكرني دخل فورا عليها وبقيت خارج تقريبا نص ساعة واني خايف انها تضعف گدام حازم وتحجي الي صار اخير شي طلع حازم
حازم : مشكور والله يرحم والديك
تميم : العفو بس اريد اوصيك بشغلة
- اي گول
- وصي اديان اذا اجو الشرطة يريدون يحققون وياها لا تحجي شي
- اصلا هي ما تتذكر كلشي
- ليش ما تتذكر
- ماعرف هسا رايح للدكتورة
- تتذكركم انتو
- اي اكيد
- لعد هاي اثار الغيبوبة منا لباجر تلگيها متذكرة كلشي
- تمام
- المهم وصيها تگوللهم ما اريد اشتكي على اي احد لا تگوللهم ما اتذكر شي
- ليش
- نريد ناخذ حقهم بايدنا الدولة ما تفيدنا بشي
- تمام راح اوصيها بس زيد ما حجى شنو الي صاير
- بعد ماعرف شنو الي يخليه يبقى ساكت
- اني لو ما اعرف زيد جان گلت بسبب الي صار صارت عندو صدمة وخايف لهذا ما يحجي
- لا زيد مو من هالنوع
- من تتذكر اديان اخليها تحجي كلشي من الاول للاخر
- اي علمود نعرف تفاصيل الموضوع
- إن شاء الله
- المهم روح انت هسا ابقى يمها اكيد مشتاقتلك وبعدها لكل حادث حديث
- تمام
تميم : رجع لغرفة اديان وهو فرحان واني رجعت طمنت زيد انها ما حجت شي وبقو حازم وامو واختو يم اديان الليل كلو
شكرا لزيارتكم عالم روايات سكيرهوم
