رواية منار والبارود الفصل الرابع 4 بقلم مرج البحر

هدني ومشه بعدين التفت وكال..

ماشي..الايام جايه هواي..

وطلع وسد الباب وراه..

من طلع ارتاحيت..من شوفته بس مكان لزمته يوجعني..اتلمس بيه واكول :

اوي انشالله روحة بلارجعة ورمت زنودي عساها بعافيتك

ورجعت كملت الزوليه وكترتها ولميت الصوندة والفرجه شفت غرفة زغيره كلت يمكن مخزن فتحت الباب فعلا جان مخزن مال ادويه خليت الصونده انتبهت اكو كاميرات بالحديقة اكيد عمو مخليهن ع مود المخزن..رجعت دخلت جوة نظفت البيت رجع عمو وياه ملاك..كعدت يمها الطفله حيل محبوبه وبسرعة تتعلق بالناس بقينا نلعب فتحتلها موبايلي طلعت الها لعبه مال الفقاعات كيفت التهت بيها..بعدين كالت جوعانه وكلتها وبدلت ملابسها ولميت بقيه الملابس خليتهن بالغسالة..وفكرت شسوي عشه اكو لحم مثروم وطماطه..وخيار..وخضرة..كلت خلي اسوي كباب مال بيت وفعلا عجنت الكباب عمو دخل نام لان تعبان كال كعديني بالسبعة لان عنده خفاره من 8..الى2بعد نص الليل..يعني راح يتأخر لازم اسويله عشه من وكت..والتهيت ارتب بالبيت صعدت فوك لكيت غرفة هذا...

الخبل صايره مزبلة نظفتها..ع السريع وطلعت ملابسه الوصخة كومتهن بالحمام..كلت من اكمل العشه واغسل الاماعين عود اشغل الغسالة واغسلهن..وصارت الساعة بالسته العصر بديت اكلي كباب..وثرمت زلاطة بالسبعة الاربع كعدت عمو خطيه كعد تعشه وبينما دنتعشه دخل مصعب..بكلبي اكول هسه وكت جيته ..عابت حتى بالعشه ما اكدر اتهنه دخل كعد بصف عمو..حضرت عشه وخليته كدامه وكمت خدرت جاي لعمو وسمعت عمو يكول:

تعالي كملي عشاج بنتي..

لا عمو اكلت هوايه شبعت..

شكلتي بنتي بعدج ممخلصة نص خبزة..وسمعته..يكوله:

يابه اليجوع ياكل وحدة ميحتاج عزيمة..

كبر لازم يعلق على كل حجايه..مسوي نفسه ..الكل بالكل..خلص عمو عشه وشرب جاي وطلع..شفت ملاك تلعب بموبايلي..مكيفه ع الالعاب بس موبايلي خلص شحن وطفه..اخذته خليته ع الشحن..

هو كلي:.

سويلي كهوه ..

شفته يصعد..

كتله غير تشرب الكهوة وتصعد..

من تكمل صعديها الي..ودكي الباب مو ادخلين كبل..

ماشي..

من صعد عاف..موبايلة وسويج سيارته وباكيت الجكاير والجداحة ع الطبلة بالصالة شفت..ملاك راحت يمهن كلت.:

من اكمل الكهوه اصعدهن اله كملت ..الكهوه..اجتني ملوكة كالت..

خاله شنو هذه بموبايل بابا..باوعت عززززة..عزززة شنو هاي الصور هاي فاتحة الماسنجر ومطلعة رساله وحدة دازتها لابوها..بس شنو وحده مصلخة..وصور ثانيه تخزي..يربي شافتهن الطفله..اخذت الموبايل منها وخليت السويج.و الباكيت بالصينيه وصعدت دكيت الباب كال دخلي دخلت خليت الصينيه ع الكومدي وانطيته موبايلة:

مصعب خلي رمز لجهازك..

هو رأسا كام من مكانه لزم ايدي..

شنو شكلتي!؟

كتلك خلي رمز لجهازك..لان بيه شغلات ميصير احد يشوفهن!؟

خرب..لج انت شتحجين؟ منو سمحلج تفتحين جهازي..

شفت اتعصب حيل..

اوكف دقيقة خلي احجي..تره اني مفاتحه جهازك بس ملوكة فتحته وجابته لكيتها فاتحة الماسنجر ودتباوع ع صور ..العفو..اقصد صور محلوة..

وانت مصدكتي طلعتي حسابي وتفرجتي ع خصوصياتي..

والله كولشي مشفت..بس..هي رأسا انطتني الموبايل وفاتحه الصور بسرعةاخذته..من ايدها..وجبته..يعني هي طفله ميصير..تشوف هيج صور وانت تشمر موبايلك وين مجان فكتلك خليله. رمز حتى متفتحه..

متاكدة مشفتي شي معقوله مفتحتي باقي الرسائل..؟؟؟

لامفتحتهن مثل مكلت هاي خصوصياتك..وخصوصياتك متهمني بشي..

هد ايدي وكعد..

اني رأسا طلعت من غرفته..شكد لزمته تأذي..عبالك ايده جلابتين مو ايد بشر..كل ميلزمني يخلي اثر بالمكان..

نزلت من فوك.عشيت ملوكة ونيمتها..خابرت ماما:

الوووماما..مساء الخير..

مساء النور حبيبتي 

ماما يكدر احمد يجيني هسه..

خير بنيتي خوماكو شي..

لا ماكو شي بس ردته يجيبلي كتبي وغراضي مال الدوام باجر اداوم..

ياااا..شنو اداومين غير..ماخذه اجازة اسبوع..

لاماما باجر اداوم ما اريد المحاضرات تتكوم عليه..

يوم بعدج عروس يامحاضرات ياكليه..

يوم كتلج راح اداوم باجر..اذا احمد ميكدر يجي هسه باجر الصبح امر عليكم واخذهن..

يوم معقوله رجلج يقبل اداومين خصوصا هو نازل بس سبع ايام....شلون يخليج اداومين..

يوم هو كلي داومي..

والله ما ادري هذا رجلج شنو من عريس..طبعه عجيب غريب..

هسه شنو راح ادزيهن..

خلي اشوف احمد يقبل يجيكم...لو لا!

ماشي..

وسديت الخط وره نص ساعة تقريبا اجه احمد..مصعب نزل من فوك من سمع الجرس مال الباب..

اخذ الكتب منه والغراض احمد مقبل يدخل كال تعبان ونعسان..وراح..

مصعب صعد بقيت اني ارتب بغراضي بكنتور ملوكة وملابسي السود هم طلعتهن..صفطتهن ملوكة نايمه ع جربايتها..اني وين انام..رحت ادورع فراش انام عليه لكيت ع الكنتور مال عمو بطانيات ودوشك اسفنج نزلت..بطانية ودوشك ومخدة..فرشتهن ونمت..كعدت الصبح لكيت عمو ديسوي ريوك..شافني كال :

جبت كيمر عرب يخبل..

الله عمو شكد احب كيمر العرب.

وكعدنا تريكنا..صارت الساعة بالسبعة وعشره دخلت بدلت ..رحت للمطبخ..

عمو اريد اروح للكليه..

اي عمو هسه اخذلج تكسي يوصلج..

لا عمو اروح..ويه البنات احنا عدنا خط..اوكف براس الشارع يجي ابو الخط..بس شلون اخاف مصعب لو ملاك يكعدون يردون ريوك..

روحي عمو اني اطلع منا وره التسعه همه يكعدون يتركون واني اروح..

ها..زين لعد..

ردت اروح..كلي اوكفي..خله بيدي 25..

هاي شنو عمو..

خليهن بجنطتج بنيتي..تحتاجين شي تصرفين شي!

لا عمو ممحتاجه شي..

كتلج خليهن بجنطتج..شنو تكسرين حجايتي..

لا العفو..شكرا عمو..

طلعت رحت للدوام عادي..البنات استغربن لان رجعت ثاني يوم ولابسه اسود كتلهن زوجي متفهم وميضغط عليه قبل البس اسود وارجع للدوام..المهم خلص الدوام اخذت سجل من صديقتي..سمر..لان كاتبه بيه المحاضرات مال اليومين الفاتن..فاخذتهن حتى انقلهن وارجعن ثاني يوم رجعت للبيت..ساعة 12..لان المحاضرة الاخيرة مدخلناها جان الاستاذ مجاي..دخلت لكيته كاعد يم ملوكة هي بيدها اصباغ ترسم..شخابيط وكل شويه تجيبهن اشوفهن اله وهو يضحك ويلعب وياها..كلت بكلبي شعجب يلعب ويه بنته..همزين ..عنده شعور بالابوة..دخلت للمطبخ لكيته متسوك ..سويت تبسي ع السريع..وتمن..وصبيت اجه عمو..كال:

شنو رجعتي من وكت.؟

اي مدخلنا المحاضرة..الاخيرة الاستاذ مجاي..

اصبلك غده..!!

ولحكتي اطبخين..!؟

عمو قابل طابخة خروف هو تبسي وتمن..وروبه..

نعمه من الله..كعد عمو يتغده...وكعد ملوكة يمه..وكال:

تعال تغده بابا..

يابه اروح اتغده بالمطعم ما احب التبسي..

هسه انته ضكته ومتحبه!!؟؟

لا اضوكه ولايضوكني رايح اتغده بالمطعم..

وطلع..كلت بكلبي خفه..وراحه..روح اكل بالمطعم سم وزهر..وكعدت يم عمو اكل..الحمد لله..تغدينا وشربنا جاي..عمو كال:

بنيتي بدلي لملوكة اخذها وياي..رايح للسوك.

اي عمو هسه ابدللها..

بدلتلها..وطلعو بقيت وحدي..بدلت ملابسي ولبست ترلك اسود.وغسلت الاماعين..ورتبت البيت..كلت خلي اكعد..اكتب المحاضرات مادام ماعندي شي..

وكعدت اكتب شويه وسمعت الباب انفتحت..اهووو..هذا الخبل اجه..سويت نفسي ممنتبهتله سمعته كال:

صعديلي كهوتي فوك!

هسه اسويلك بس اكمل كتابة هذه الصفحة..

بقيت مدنكة اكتب..الى ان خلصت الصفحة شفته كعد ع القنفة كبالي..اشو مصعد فوك..مو كال صعديلي الكهوة فوك ليش كعد هنا..رحت للمطبخ سويت كهوة وجبتها خليتها ع الطبلة ورجعت اكتب..ماكو لحظة وشفته اجه يمي صب الكوب..مال الكهوة كوله ع السجلات..عزززة..عززة هذا شسوه السجل مال سمر شكد عيب هسه شأكوللها..رفعت راسي..شفته رجع..كعد ع القنفه يباوعلي شلون راح اتصرف..بسرعة كتله:

ليش!!!؟؟؟

كال:

حتى مرة ثانيه من اكولج سوي شي..تطفرين مو تكوليلي والله اكتب..الصفحة يله اكوم هسه خليها الصفحة تفيدج!!

باوعت السجل مال سمر..صار شحاله من الكهوة..رأسا..عيوني جرن..هو يباوعلي مبتسم..كلبت السجل همزين بيه تقريبا محاضرات..مال 10ايام يعني اكدر اعيدهن اذا كعدت اكتبهن من هسه..فكرت ما اريده يتشفه بيه ويشوفني ابجي..هو يكيف..يبجيني..مسحت عيوني وكمت..دخلت للغرفة بدلت..ردت اروح اشتري سجلين حتى انقلهن..واحد لسمر وواحد الي..وقبل ما افتح باب الصاله..

كلي:

وين رايحة؟؟

اشتري سجلات؟

هيج بكيفج اطلعين بدون متكوليلي؟

مصعب السجل الي غركته بالكهوة مو مالتي مال صديقتي..يعني باجر لازم ارجعة الها..

مترحين!

لا..اروح..لازم اروح..فتحت الباب..شكد سريع بسرعة صار كدامي لزمني من شعري..

مصعب..شبيك..يعني فوك مخربت السجلات متخليني..اروح اشتري غيرهن؟

لج انتي شنو من بشر..متفهمين بالكلام من اكلج مترحين يعني مترحين؟؟

ولوه شعري....

ماشي...ما اروح..اخابر عمو خلي يشتريلي لان هو بالسوك..؟؟

لوه شعري اكثر..

اخ...اخ شعري..هدني كطعت شعري مصعب كتلك ما اروح..

هدني وكال..

لتخابرين عمو..ولايخابرج..اني اروح احيبلج من المكتبه الي براس الشارع..

وطلع..راح جاب سجلات ورجع..اول مدخل..كال:

سويلي كهوة وصعديها فوك

رحت ركض سويتله كهوه..صعدت..دكيت الباب كال:

دخلي..

دخلت خليت الكهوة وطلعت هو جان لازم موبايلة يكلب بيه نزلت من الدرج ادعي بكلبي..

الله ياخذك..انت وهذني الحقيرات الي تتراسل وياهن..

نزلت بديت اكتب رجع عمو العصر..هو وملوكة..

عمو اشو تأخرتو!

عمو اخذت الطفلة لامها خطيه هذا ابني كلبه من صخر. يريد يخليها اشوفها كل اسبوع..،

ها..اي عمو زين تسوي..

عمو شتحب اسويلك عشه..

والله مشتهي دولمة!

اي اسويلك..ليش لا..

لعد راح انام..واخلي ملوكة بحضني..انتي التهي بالدولمة...

فتحت العلاكة لكيته جايب سلك ولحم مثروم وتمن عنبر وكشمش..وباقي مواد الدولمة كعدت خبطت المواد وكعدت الف بيها تأخرت هوايه لان الدولمة تأخر واتعب.كلت ميخالف خطيه عمو مشتهيها وجايب موادها..خلصت لف خليتها..ع النار رجعت اكتب..خلصت تقريبا ثلت المحاضرات كلت بالليل اسهر عليهن واكملهن..عفت السجلات بالغرفة وطلعت ريحة الدولمة تخبل ملت البيت..شفته نزل من فوك:دخل للمطبخ..مبين اجه ع ريحة الدولمه احتمال يحبها..واجه ع ريحتها..بس ميستاهل ياكل منها..هذا الخبل..المغرور..سمعته يكول:

صبيلي..دولمة..

انتظرعمو هسه يكعد وتعشو سوه..

ما اكدر انتظر..صبيلي بسرعة وكثري..

ماشي..اني اصب واكول بكلبي..تاكله سم..وتذبه دم..

صبيت ماعون جبير وخليته كدامه..بعدها حارة وهو يلكط بيها ع السريع عبالك مشايف..دولمة

وطلع عمو..

الله ريحة الدولمة تخبل..

اكعد عمو خلي اصبلك..

صبيتلة..

كعد ياكل..وكال..

شلون دولمة تخبل..

بالعافيه عمو..هو ياكل ويباوع لمصعب اكل ماعونه كوله ع السريع كام غسل ايده وصعد..

بعده ديصعد الدرج..عمو كله:.

بالعافيه بابا..

الله يعافيك يابه..!

وصعد..

عمو كلي..

كعدي تعشي بنيتي..صبيت..وكعدت..

شفتيه المصعب شلون مشال راسه من الماعون نسفه نسف..

ههه..اي مبين عليه يحب الدولمة..

اي خطية..حيل يحبها جانت المرحومة تسويها ع موده..كل اسبوع..ومن توفت لليوم هو مماكل دولمه ..متشوفيه طاح عليها مثل المشايف!

ليش خو زوجته تسويلة دولمه..

سوسن عوبه طبخها مطيب..اصلا مجان ياكل من ايدها..

هااا