رواية نارا حيدره الفصل الخمسون 50 والاخير بقلم نمارق رحيم

٢٠٢١/٤/٢٦ - مستشفى أربيل - ٩ مساءً

___

اللهم في تدبيرك ما يغني عن الحيل وفي كرمك ما هو فوق الأمل ، وفي عفوك ما يمحو الزلل فبقوة تدبيرك وبعظيم كرمك أسألك يا رب أن تدبر ولادتها بأحسن التدابير ..

يارب قد زاد ثقلها و ألمها و تعبها، اللهم هون على حبيبتي وسهل عليها ماتبقى من حملها ويسر لها ولادتها وقر عينها بطفلتنا يالله

اللهم اني اسئلك هون الطلق وحسن الخلق

لزمت راسها بخشونه ايديه .. ها ناري صار الموعد ؟ اصبري گلبي اصبري هيه ساعات وكل الألم يروح والحلوة مالتنا تنور الدنيا..

ناردين: ياحيدرا موجوعة حييل احس سچين ببطني اريد اولد وارررتاح..

-تولدين يروحي وترتاحين سهلة يناري بس اتحملي شوي هسه طيبة اتجيب الملابس ونطلع..

طيبة استعجلييي بوووويه وينچ نمتي خوما نمتي ؟..

طيبة:- دقيقة اجيت خوية شسالفة ههههههه ناردين ام لسان ،قوي روحچ چقه ابرة وتولدين لاتخافين..

ناردين:- هييي شنييي ما خاف شنييي اگلها دا اطلق تگلي چقه ابره أوووي..

طيبة :- ههههههه ولج اطلگ اطلگ مو اطلق شني رصاص خو ما رصاص

حيدرة :- يابه بحال ضحك هسه استعجلي..

- ييممااا اذا متتت و اني اولد تحرم عليك كل البنات حيدرا والنبي ما اسامحك اذا تحب غيري ، ما تتهنئ الي تاخذك منفووووس

-بوية صدك چذب زواجيش ادري انتي خبلة من زمان ومن صرتي حامل زاد خبالچ وهسه بطلوگچ تخبلتي رسمي..

-اخخخ يمماا بطنيييييييي

-خر* بحظي الگوا*

شلتها وخليتها بحضني غطتها طيبة بعباية وطلعنه.. فتحت باب السيارة خليتها ورا لزمت ايدي..

-وييين رايح؟ ماتروح ماترووح اذا تعوفني دقيقة بهيچ يوم ما اعرفك عشر سنين..

-اگول انچبي حبيبي منتظر نعلان يجي گايله من ساعة تعال وبعده ماجاي ابن الاوادم..

دقايق واجا سالار صف سيارته ونزل..

سالار:- ها حبيبتي سلامات ها خير إن شاءالله رح تنفجر القنبلة الي صارلها ٩ اشهر منتظريها؟..

حيدر: نعلان وين چنت صارلي ساعة انتظرررك

سالار: عمي غير طننن ازدحامات من المغرب والله العظيم علئ اساس حضر تجوال ونص الناس طالعة بالگوه اجيت..

مد راسه لسيارة باوعلي وضحك وهو يگول:- هاا ناردين شني نايم گاعد

ضربه حيدرة على ظهرة وگاله بأستعجال.. انچب وحرك السيارة خل نروح..

سالار:- هههههههه بويه أشاقة الله يساعدچ بعد اخوچ الله يگومچ بالسلامة يارب..

...

حركوا السيارة وطول الطريق اهات وصرخات والم ما متأدية مثل ما دا اتأدة بهذا اليوم!..راسي بحضن حيدرة يبوسني ويهديني ويگلي انا وياچ علئ الموت لا تخافين..

سالار يسوق وطيبة تقرا قران حسيت روحي راحت حسيت داتطلع من الوجع الفضيع..

شغل تبريد ورش عطر اهتديت شوي ولازمة قميصه حيل حاضنته من رگبته صرت اعض بي وهو يبتسم يگلي اخذي راحتچ..

السيارة صارت هدوء بس أني ابچي بصوت ناصي الوجع يجي ويروح يخف ويقوة..

نص ساعة يلا وصلنة من الأزدحامات حاجز حيدرة مستشفئ خاص قبل يوم لان ما شاءالله مستشفيات الحكومية كلها كورونا..

دخلنا واني بحضنه شايلني خلاني علئ السدية وغطاني بقيت لازمة ايده واسويله بيدي لاتروح وهو يرفع حاجبة ويبتسم..

همس بحنيه يحاول يزيح الخوف عني:- اعرفچ قوية وسباعية وما تصعب عليچ الولادة خوش ناري؟..

-بس حيدرا خايفة حييل ما ادبرها والله..

-اشششش يروحي لا تحچين هيچ والله الم ساعة وتالي تولدين وتكحلين عينچ وسفه ما تتحملين ساعة لطفلتنا؟..

-اتحمل اتحمل..

-چَا لا تخافين يروحي وبعدين اتذكري ان نتيجة الالم رح تولدين طفلة تشبهچ ويروح كل الالم والوجع من تشوفيها صدگيني..

-احبك والله..

-علي الـكرار يحفظچ يروحي..

اجتي دكتورة فحصتني وگالت:- عدها ولادة هسه وقع علئ الاوراق..

الغرفة بيها بس اني محد موجودة دكتورة طلعت داتجهز نفسها حتى تولدني..

وأني لازمة بطني ضليت اصرخ بحيدراا فدووة لاتعوفنييي اصرخ و ابچي هرجت المستشفئ بصوتي وعياطي..

دخل للغرفة ركض لزمت ايده قوي وهو يگلي اهدي حبيبتي انا يمج رح ابقى واگف يم الغرفة انتظر قُرة عيني..

-ما ترووح تبقئ هناا يمي فدوا..

-لا ناري شلون ابقى ما يصير يابه..

-شنو ميصير والله ما اولد اذا عفتني..

-تخبلتي بعلي..

دخلت دكتورتين، گالن اله نريد نولدها ممكن تطلع، هنه گالن هيج و الالم زاد عضيت ايده

بكل قوتي يمكن دم طلع منه..

گال وهو بلگوه كاتم.. تمونين حبيبي تمونين..

طلع من الغرفة وتقربن عليه باوعتلهن بنظرة بريئة ممزوجة بخوف وتوتر..

-شسمه شنو رح تسون بيه؟؟..

ضحكن بهدوء.. ولبسن الكفوف..

-ولچ يمممممااا..

....

حيدرة

مرت ساعة ونص .. سمعت صوت بچي عرفتها ولدت ركضت للباب الغرفة الولادة انفتح.. طلعت الدكتورة لازمة الطفلة وأبتسامة عريضة مرسومة علئ وجهة..

-الف مبروك خويه ولدت بنيه.. الولادة كانت صعبة بس اجتازيناها وهي والطفلة بحالة جيدة وبخير ..

فرحتي بوقتها ما انطيها لأحد مباشرة سجدت علئ الأرض اللهي لك الحمد، حمد الشاكرين..

طيبة: عمري الف مبروك اخوية حبيبي والله فرحانة الكم من كل گلبي تستاهلون بعد العذاب هالحلوة تسعدكم وتفرحكم وتنسيكم المُر..

سالار: شرفت ضلع خالها يابه تتربى بعزكم ودلالكم..

أبتسمت وسكتت ضليت أردد اللهم صل على محمد وال محمد اللهي لك الحمد..

طيبة: يا حيدرة ليش البچي حبيبي..

سالار :عوفي براحتة هذن دموع الفرح اكيد..

حيدرة: وعلي فرحان گد الدنيا..

سالار: شوف الله شلون عوضك دير بالك على وردتي لا تذبلها بعدما زهرت وبالك على وردتك الصغيرة بنتك وربي يديمكم شريد اني بعد اهم شي سعادتكم..

حيدرة: لاتوصيني حبيبي بعيوني الاثنين اخليهم قواريري..

تقدمت الها بكل لهفه وحب اخذتها من الدكتورة بتوتر وايدي ترجف شفتها وأبتسمت بعمق وراحت الرجفة من صارت بحضني..

سبحان الخالق المبدع.. سبحان الله على جمالچ بوية نورتي الدنيا يادنيتي..

نورتي الدنيا ياحبيبه ابوها وناره.. نورتي الدنيا نورسين..

رفعت راسي وشفت الساعة صارت ١١:١١

ابتسمت هالوقت مميز ولدت بي .. تاريخ يوم ولادتي وهي تاريخ وقت خروجها من غرفة الولادة ..

بستها بكل رقه حتى ما اخدش ترافه خدها الناعم..

التفتت على الدكتورة وسألتها:- زوجتي حالتها مستقرة مو؟..

-اي نعم بس الالم وتعب الولادة عادي هالشيء دائماً يصير ويا الي يولدن تصير زينة ان شاءالله والبنات رح ينضفنها من الولادة حتى تگدر تشوفها لزوجتك ..

-تمام إن شاءالله خويه..

كبرت بأذنها الأذان وبستها..

الدكتورة: الف مبروك ما شاءالله كلش حلوة..

- الله يبارك بيچ يابه اي الحمدلله علئ التمام الخلقة اهم شيء بعافيتها وسليمة ما يهم الباقي..

-صحيح وزوجتك حيل حلوة اول مرة نشوف بنيه سمرة ملامحها مميزة وجميلة كلش..

رفعت حاجبي وعصرت ايديه بصبر:- ممنون منچ خوية والله وياچ ..

هزت ايدها وراحت .. گعدت علئ الكرسي دقايق واجن اخذنها للغرفة الاطفال الحدّث ..

...

ورا ساعة دخلت للغرفة گعدت يمها فتحت عيونها الشلني الخضر وكُل يوم لون بستهن بحب وهمست بأذنها..

-الحمدلله علئ السلامة يا سلامتي وعافيتي..

همست بكلمات متقاطعة:- حيدرتي وينها بنتي؟..

-ها ياروح حيدرة هسه يجيبوها جاي يغسلوها..

-اريد أشوفها فدوا..

-ناري حبيبتي اصبري بس شوي ؟

هزت راسها "اي" وسألتني:- حلوة ؟

- حلوة تشبهچ حَيل

-صدگ! اني ردتها تشبهك وماخذه من ملامحك..

- هههههه لا تشبهچ نفس عيونچ الأحبهن

شايله جمال امها و حُسنها

أبتسمت ورفعت ايدها بستها وحاير شنو أسوي.. ضليت متأملها وألعب بشعرها..

-حبيبتي تدرين.. ما اعرف شلون اشكر الله على هالنعمة الكبيرة رزقني بحبيبة ترفه صارتلي زوجة وأم وصديقة .. وطفلة منها وأنعم عليه هواي جازاني بيچ بعد التعب الي عشته بحياتي

-ياروحي الف الحمدلله حيدرتي بس دفو ايدك من تحضن ايدي تنسي التعب كله

-احببببچ..

ابتسمت:- اني اكثر احبك ولا تگول أنت ترا نتخارب..

-هههههههه ماتبطلين سوالفچ ماشي بويه انتي أكثر..

باسني بخدي بقئ يمي نص ساعة يسولفلي حتئ انسى الالم ويلطف الجو بمواقف حلوة..

دخلت الدكتورة لازمه الطفلة خلتها بالسرير بصفي وراحت..

-جيبها اشوفها متلهفه على شوفتها والله..

ابتسم وگف شالها من سريرها وگعدت صارت تبچي خلاها علئ صدري..

-جعلني فدوا لبنتي..

رفعت راسي اباوعله مبتسم بحب وارجع اباوعلها تبچي.. شوي وسكتت ضلت صافنه بوجهي..

-اروح فدوة للصفنه حبيبي داتشوف هاي اني جبتها للدنيا ههههه عمري بنتي..

-واحلى جوهرة جبتي للدنيا جوهرتنا الثمينه وقارورتنا الرقيقة بنص گلبي اخليها..

-باع ايديها شگد صغيرة وناعمة..

-لا تگولين باع

-اوي ما تبطل انت من هذا الرد..

-اي من تبطلين ما تگولين هالكلمة الي تنرفزني..

-باع باع باع واشتره

-تسودنتي رسمي..

-مسودنه بيك.. يمته نطلع ؟

-نامي هسه ويصير الصبح ارجعكم للبيت..

-صدگ خواتي وسالار وينهم ؟..

-سالار اخذ طيبة ورجعو علمود بنتهم الصغيرة منار عايفيها بالبيت وجايين الاذكياء..

-ههههههه والنعم الوالدين زين والبقية وينهم ؟..

-حسن ونبراس شوي ويجون ورائد ونور بالبيت يجهزون الغرفة والاكل علمودچ..

-فدوا اروحلهم مايقصرون..

-اي يلا ارتاحي حبيبي نامي فد شوي واجي..

-لا شنو انام خليني اتأمل بنتي وما يجيلي نوم وهي يمي..

-براحتچ يا راحتي بس گلت هيچ علمودچ تعبانه انتي..

-كل التعب يروح هسه حبيبي صدگ سميتها ؟..

-اي مو اختارينه اسمها " نورسين"

-اوي فدوا لنورسينتي..

-يلا ناري هسه رايح اكمل الاجراءات حتى نطلع الصبح من وقت..

-إن شاءالله يلا روح يبعد عُمري..

-احبچ وكحه..

-اموت عليك بس شنو وكحه يااا صرت ام حبيبي بعد منا وجاي گول زوجتي العزيزة كبرنه..

-لا بالله؟ تبقين وكحه وبنتي الصغيرة 

شما كبرتي وحتى لو ترستي حضني اطفال تبقين طفلتي الصغيرة و بعيني ما تكبرين

-شسمه ليش تتحارش بيه بالكلام گلبي رچيج ما يتحمل..

-اخخ يالشسمه عذبت حالي وفرهدتني..

-هههههههه هو شسمه الشسمه..

ضحك:- انچبي يناري..

-حاضر حدحد

-مريضة ماگدر احچي توچ ولدتي..

-اي وهاي الفترة شهر و ونص ما اخليك تگعد يمي ولا تقترب ..

-شنيييييييي ليش بوويه سلامات ؟؟؟

-لحد ما اطلع من الاربعين

-شني بوية ميته اسم الله عليچ واطلعين من اربعينچ!

-هههههههه لا اقصد اطلع من النفوس

-حبيبتي اذا ماتعرفين اسكتي فشلتينه.. وتگول كبرت..

-المهم المعنى شبيك

-اي صح خليفيدج هالحچي..

-عابت لهل شكل..

-العذبچ يابه..

-عذبتك اني هم ترا

باس ايدي وهمس.. اثنينه تعذبنه..

دخل حسن وهو لازم باقة ورد حمرة ودخلت ورا نبراس .. اجتي تبوسني وگعدت يمي تباركلي..

حسن: لك هلااا عمييي وينهاا ..

حيدرة: الناس تگول الف مبروك الحمدلله على سلامة مو جايه حاميه اخذلك راشدي بعد..

حسن: ههههههههه حقك اسفين الحمدلله على سلامة نارحويدر..

حيدرة: حويدر شني گوم اطلع منا گووم لك..

ناردين: يمعودين ريلاكس اهدو توني ولدت راعو مشاعري المعوقة..

نبراس: حساني شوف خطيبة ابني هشام اووي شهالجمال يا چنتي..

حسن: اي طالعة عليه على عمها..

حيدرة: بس لايسمعك خالها سالار..

حسن: مروتك والله يشگني شگ..

ناردين: خطيبته شنو خو ماكوشي شعندي مزوجة بنتي لهذا الخبل ابنكم..

نبراس: محجوزة والله حجزتها وتحبه وين لاگيه مثل هشام لوز مو شاب..

-الي يسمعچ يگول عمره 20 ، مو سنة

حيدرة: حسن خابر رائد گله حيدرة رح يجي الصبح خلي نور تتفقد غرفة بنتي تشوفها اذا ناقصها شغله..

حسن : لا اطمئن شينقصها مليانه ترستها ترس للمحضوضة بنتك..

-عينك لك..

-بعدروحيي اشاقة يابه..

.....

ناردين

ارتاحيت بالمستشفى نمت هواي وگعدت بـ١٠ الصبح .. سوو اوراق الخروج وطلعنة..

صعدت للسيارة گعدت بالصدر وبحضني نورسين نايمة..

اباوعلها و اتأملها بحب من الفرحه عيوني ادمع كل ما اشوفها شعور الامومه يجنن ما مصدگة ولدت كائن لطيف من لطافتها اريد اكرطها

شغل السيارة ، يسوق و كل شويه

يلتفت علية ويبتسم و يعصر ايدية

-دير بالك من الطريق حيدرتي..

-تدلل ناردينتي..

-ههههههه احبك..

-مو بگدي بس خل نوصل للبيت..

-وشنو تسوي عزه بعينك؟..

-اطلع ضيم الـ9 اشهر

-لا حبيبي شهر ونص ماتوصل يمي..

-يا گو* * گالچ ؟..

-الزم لسانك..

-اسفين يابه..

-مو گلت بعد ما اغلط؟..

-هسه انا غالط عليچ سابچ لو تردين بس تتعاركين وياي ؟..

-صرت ادور عركات اني ؟ خوش

-لا اله الا الله لو تبطلين نكد چان ارتاحيت!

-نوب طلعت نكدية شكراً ماتقصر

-ناردين بطليي هلسووالف..

-صوتك شبييك ماتشوف نورسين نايمة 

هسه تگعد وتبچي من صياحك!..

-دخل نوصل للبيت واعلمچ ادوس بالبطن وتگلي حيدرة اوووي ليش تصيح..

ضحكت ورفع حاجبه سكتت بسرعة..

ضليت ساكتة خفت لا احچي كلمة و يشمرني من السيارة..

....

وصلنه للبيت فتحلي الباب نزلت امشي وهو ساند ظهري وشايلتها بيدي..

اول ما دخلت هلهلن البنات

حيدرة: الطفلة يمعودييين..

ضحكن وضحكت وياهن نغزته بچتفه..

همس.. بسيطة بوية يجي الليل

-انشووف بطولاتك عود..

سوالي بيده بمعنى اصبري ..

صعدت للغرفة بناها لنورسين غرفة كبيرة

بيها كاروك والالعاب وكنتورها ..بلون الوردي.. اختاريناها سويه ورتبناها..

خليتها بالكاروك "السرير الصغير" بستها وغطيتها.. رحت سبحت وگعدت استشور شعري..

صار الظهر اجتي طيبة كالت سويت غدة الچ تعالي تغدي..

-ما اشتهي اريد انام نعسانة..

دخل حيدرة.. ناري انزلي تغدي حتئ تتقوين اذا مو الچ لنورسين شلون ترضعينها وانتي بلا اكل

-شنو ارضعها!؟..

ضرب گصته لا ربحنه واضح المستقبل المزهر لبنتي..

-يا شبيك اشاقة ههههههه يلا نازله اتغدة..

-امشي گدامي شو..

-بس صلِ على محمد والله نازله شبيك..

رفع حاجبه معاجبه ونزل ..

نزلنه جوه بس اني فاطره لان ما اكدر اصوم بهاي الفترة فگعدت اكل و هم يباوعولي 

كلهم صايمين دنيا رمضان..

الطاولة كبيرة كلنه مجتمعين كل اثنين گاعدين بصف الثاني..

اني وحيدرة ..طيبة وسالار ..نبراس وحسن.. نور ورائد

والأطفال هشام وبسملة مخليهم على الكرسي الهزاز ويشربون الحليب بالممه.. .هدوء..

بده رائد يسولف ويحش بأصدقائة ويسولفنه على مواقف صارت ويا..

لمتنه تحلى دائماً بسوالف رائد الحلوة يطلعنه سوالف من زمن الانبياء ..

حتئ اكو سوالف سامعينها منه ومن نور 100مرة و يحچيها مرة الألف بس يغير بالسرد..

رائد : هذاك اليوم صديقي

سالار: ضلع قصدك قبل سنتين..

رائد: دخليني احچي المهم چنه گاعدين عدنا واجب ودانلبس ملابسنه العسكرية ونجهز روحنة..

سالار : والسلاح ضاع منك و اضطريت تاخذ سلاح صديقك أياد و العميد عرف بيكم و عاقبكم اثنينكم وبليل شردتو من المخيم وتلوگت لحيدرة حتئ يحچي ويا الرئيس

لان چانو اصدقاء ..

ابتسم حيدرة وغمز لحسن..

حسن: وتوته توته خلصت الحتوته..

رائد: الله ياخذك نعلان مو جاي اسوووولف..

نبراس: لان سامعيها مليون مرة والله حتى حفظناها احچي سالفة جديدة..

رائد: زين خلي اسولفلكم مقلب يشووگ شگ..

سالار : اخذ فارة ميته و دخل لغرفة استراحه حيدرة خلاها ورا ايده حتئ ما يشوفها و گله غمض عيونك جايبلك هدية وحيدرة صدكه و غمض عيونه عباله جايبله فد شي تالي مد ايده وخله رائد الفارة بحضنه انفزع حيدرة وتالي شالها وراح يركض ورا ركضو بالمخيم لحد ما خلاها ببنطرون رائد و رجع لشغلة

حسن: وانگلب السحر علئ الساحر

رائد: الله ياخذكم كوووون دروحو مو وجهه سوالف انتو..

حيدرة: ومن هذاك اليوم لليوم هذا .. بطل يشاقيني ويمقلبني لان يدري حظه اطيحه..

ضحكنه وضلو يسولفون واحنا بس نضحك على سوالفهم ، رائد خطية بس يحچي بدايه السالفة وسالار وحسن يحرگوها عليه ويسولفوها لان سوالفه حافضينها ويبقى يسبهم..

......

عزلت المواعين طيبة ..وحيدرة سوالي عصير عنب شربته گوه لان ما احبه يسوي حامض بي ليمون بلا شكر..

بليل گعدنه بالصالة كلنه..

حيدرة: احم الله بالخير..

الولد جاوبو.. احچي لاتستحي يمعود

حيدرة: هههه لا شستحي ..اريد احچي وياكم بموضوع..

-اي اتفضل نسمعك..

-دام كاعدين والكل موجود اريد كل شخص يوعد ويوقع..

..شنو ؟!!

-لحظة اصبرو هسه ارجع..

گام راح للمكتب والعيون كلها عليه عبالهم ادري واني مثل الاطرش بالزفة..

ناردين: والله ما ادري شيريد شبيكم اكلتوني بنضراتكم الخطيرة اوي..

سالار: اممم صدگناچ لاتحلفين..

-وداعة نورسين..

دقايق واجا لازم بيده ورقة وقلم..

-اللهم اجعلهُ خيراً..

حيدرة: اي الله بالخير بوية شلونكم احوالكم اموركم طمنوني..

سالار: مو علينه ابدي بالزبدة..

حيدرة: ههههههه شوفوا هذه ورقة اول شي

كل واحد يكتب اسمه ويوقع..

حسن: باع بوية اذا طلعن اوراق تنازل املاك اتبره منك والحسين!..

حيدرة: لا ياحيوان هسه وقعو ومعليكم..

رائد: عن نفسي لو تنبت نخله براسك ما اوقع لان ما اثق بيك كلشي يصير يمكن ورقة طلاقنه اني ونور..

حيدرة: هاي شبيكم صدك جذب يمعودين شهالسمعة..

ناردين: اني اوقع على كلشي منك واني مغمضة لان واثقة بيك ثقة عمياء.. جيب الاوراق حتى اوقع حبيبي..

حيدرة: لككك عمييي دسمعوا الكلام شكثرر احببـچ يا يابه يابوية يا باباتييي..

ناردين: هههههه يروحي..

..بعدما وقعت اول وحدة اخذو الورقة

وكتبو اسمائهم وقعوا مع تاريخ ٢٠٢١/٤/٢٧

حيـدرة: رح احچي وانتو رددو وراي بدون تردد ولا تتأخرون، شحچي احچو تمام؟..

..تمام تفضل احچي..

حيدرة: أقسم بالله العلي العظيم..

رددنه ورا.. نقسم بالله العلي العظيم

حيدرة: قلوبـنا على بعض مهما قست بنا الحياة ومتاعبها..

رددنه ورا..

حيدرة: انهُ عهداً بيننا أن نُرمم كل منا انكسار الاخر أن نبني حطامنا سوياً أن نكون البقاء وقت العدم..

ابتسمـنه بحب.. نقسم بذلك أجمعين..

حسـن: حتى وإن كانت مشاكلنا كالأنهار ستكون صداقتنا السرمدية شاطئ الأمان لنا..

سالار: الله حيوووو..

رائد: كافي يالحمزة رح ادمع يولو شهالمشاعر..

گال حيدرة تعالو هنا يمي ..اجينه كلنا وگفنا سويه بوسط الصالة

مد ايده وگـال..

حيـدرة: تقسمون انو ما رح تتغيـرون ابد وعلاقتنه القوية تبقئ مهما المشاكل الي رح تواجهنه مستقبلاً ايدنه تبقى حاضنه بعض..

ابتسمنـه وخلينه ايدينه فوق بعض

وشدها قوي.. نقسسم..

حضنته وباسني براسي ..بقيت اباوعله بعيونه وعيوني دمعت واضحك من الفرح..

-الله يديمك إليه سنين ما تنعد ياسندي وضلعي الثابت ياعمري وحبييي

باس ايدي وگال..يا ملكي وملاكي وكل املاكي..

____

صعـدنه لطابـق الفوق.. دخلت لغرفـة نورسين اخذها مني حيدرة وظل يبوس بيها..

-ها شوي شوي على كيفك..

ما رد بس ضحك ورجع يبوس بيها ..

-اي عمي هنيالها هم اخذتك مني من اول يوم وصرت تحبها اكثر مني وهم اول ما تگعد اول خمس دقايق تحضنها وتبوسها..

غمزلي ورجعها علئ الكاروك نيمها وغطاها .. وتقرب علية..

حيدرة:- ها ؟

-ها

-اشـم ريحه غيره؟..

تقرب عليه اكثر سحبني وحاوطني 

من خصري لصدرة ..

-تغارين ؟

-تريد الصراحة لو اچذب ؟

-لا چذبي شو

-ما اغار عليك منو انت اصلا ما تهمني

-لك يابه هههههههههههه والصراحة ؟..

-اعكسها..

-ممم يعني ؟..

- ما اعرف بس غرت لان حسيتك 

صرت تحبها اكثر مني وعيونك صارت كلها عليها..

-بويه انا احبها لأنها منچ..

باسني بخدي وهمس.. والله احبها لأنها منچ غير بنتي شلون ماحبها .. وانتي هنا "أشر علئ گلبة"

مستحيل بيوم ينقص حبچ ولا تقارنين

حبچ بأي شخص .. ابدد ياناري

- ممم زين اقتنعت بس اغار بعدني..

-زين هسه گوليلي منو انتي ؟..

-ناردين..

-واني شگلج ؟..

-ناري..

-ليش؟..

-لان اني ناراحيدرة..

-وبعد شكلـچ ؟..

- دنياي الوحيدة ..

-وبعد..

-بنيتي الصغيرة..

شدني اكـثر لحضنه وعيونه مركزه بعيوني طلع اصابيعي وصار يحسب و يحچي..

- انتِ نَهاري و نُورِي 

انتِ نِعمَتي و نَعيمِي 

و نسِيمي و نجّمي 

أنتِ ناري و نهُوري 

نَظَري و نوَتي 

نظيرَي و نحّري 

و أنتِ نَجوَتي و نجَاتِي

-يابعد عمرها لنارك ونورك

- حبيبي زين انا منو..

صفنت بوجهه وتالي ضحكت گلت اله..

-أنت حدحدناردين..

-هههههههه حلوو لقب جديد ؟

-اي ..لا داشاقـة هههههه باع

-لا تگولين باع لخاطر العزاز

-هههههه تمام ما اگول، يلا اسمع

طلعت اصابيعه وصرت احسب و احچي..

- شهمـي ، شجـاعي ، بطـلي ،مصدر سعـادتي ، ملجئي ، مجرتي ، كوكبي ، غرامي ، بئر أسراري ، ، جنتي ، ملكي ، مملكتي ، ملاكي ، جميلي ، قطعة من قلبي، مصلحتي ، ماضيي ، مستقبلي ، ساحرني ، مسامحي ، عزيز قلبي ، حبيبي ، عشيقي ، هوسي ، نفسي ، متنفسي، بلائي ، ابتلائي ، كارثتي ، احلامي ، واقعي ، ضحكتي ، جمالي ، سعادتي ، عنادي ، هدوئي ، جنوني ، صحتي ، عافيـتي ، نقطة ضعفي ، مصدر قوتي .

-وانتي حبيبتي ،وراحتي ،ومعركتي ،وعراكي 

وانتصاري،ومبتغاي، وتناقضي ،وحبيبتي دائماً..

تبـادلـنه النظـرات العيـون الـي كلـها حـب

وهـو محاوطـني مـن خصـري

همسـت احبـك .. حيـل و هـاي الكلمـة

بس الله يـدري بيـها شگـد كبيـرة

همـس اعشقـچ .. حيـل والسبـع سنـين الـي عرفتـچ بيـها احـلئ سنيـن عمـري

رقـم ١١ كـلش احبـه لان كل حدث حـلو

صـار بهذا اليـوم !

تاريخ يوم ولادتي ١١/١١

تاريخ اعترافچ بحبچ الية ١١/١١

تاريخ الي اعترفتلچ بكلشي بحياتي ١١/١١

وبالأخير تاريخ وقت ولادة نورسينه ١١/١١

- و هلرقم كلش كبير بالنسبة الية ورقمي المميز

كلشي ابتدأ بيوم الي شفتك بي صدفة

ما چنت اؤمن بالحب من النظرة الاولئ

قبل ان اشوفك! هيچ احس رب العالمين زرع حبك بگلبي بدون سابق انذار .. بيوم وليله عرفت بروحي احبك يا روحي انتَ ..

- تصدگين انا هم! حبيتچ من اول ما اعترفتيلي بحبچ اليه .. بس چنت انكر هذا الحب لان اگول خبلة و طايشه و مراهقة

بس بيوم و ليلة صرت اغار ، و أحب ،

وما ادري بنفسي ! لحد يوم الطگ گلبي و مابيه اصبر بعد و اعترفتلچ چان يوم كلش حلو 

ما انسئ ابد شعور عظيم حيل بيومها حسيت انولدت من جديد حسيت بشعور خَضـر كُـلشي بـيه،

همست..

-اني وأنت بالعشگ خلي نكـتب..

-حبنه يبقئ وللأبـد رقم الصعب..

نمنـه سوية و نورسين بيـناتنه باوعت على الساعة وضحكت بفرحة..

-حيدرا

-هـا ينـاري

-شوف الساعة

- ١١:١١

- حُـب كلـش چبـير الـك.

- عُـشق كلـش عظـيم الـچ .

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم