رواية خادمتي ولكن الجزء الثانى الفصل السابع و الخمسون 57 بقلم لولو طارق

مر وقت كبير مازن خد عيلته وراح حدد معاد فرح كريم وسما وخدو قعدتهم وروحو كلهم ما عدا كريم الا قاعد مع عروسته وبيتعشى معاها 

............

وطارق انسحب من جمب ليزا الا ماسكه فيه اول ما نامت .. وطلع برا يكلم حور الا مشتاق لها جدا .. وبيتصل فديو عايز يشوفها وبيتصل عليها ومنتظر الرد ولسا ها يرد .. وضحك بأعلى صوت لدرجه ان محمود خرج له برا 

مروان : عامل ايه يا طارق  ايه رايك فى المفاجأه دى 

طارق وهو بيضحك : جميله ياعمى طبعا .. المشكله ان حور ملهاش كلمه بتبعنى فى ثانيه 

مروان : لا خد على كدا عشان حور بنتى مش ها تسمع كلام حد غيرى ثم كمان يا راجل مش تتقدم لها وبعدين احنا نوافق  الاول و بشروطنا و اتكلم براحتك 

طارق بيضحك : ماشى يا عمى الاتشوفه وكل شروطكم مجابه ..  اكلمها مؤقتا طيب 

مروان : لا ماعنديش بنات تكلم شباب 

طارق : ياعمى ارجوك عايز اشوفها واكلمها واوعدك كل الا نفسك فيه ها اعمله والله 

مروان بتصميم : لا لما تبقى تتقدم لها .. خد كلم مامتك 

طارق : اتفقتو عليا هدى 

هدى : حبيبى يا طقطق .. وحشتنى والله ما اتفقت عليك يا حبيبى 

طارق : دا الدنيا كلها متفقه عليا تعذبنى بس بطريقتها وحط ايده على راسه من ورا و بيفرك  فيها جااامد 

هدى بزعل : بعد الشر عنك من العذاب يا حبيبى ليه بتقول كدا يا طارق 

طارق : ابدا يا حبيبتى بهزر .  بابا فين 

شريف بيشاور بايده : انا اهوو  .. عامل ايه انت وعمى خربتها والا لسا 

طارق بيضحك : جدا .. هى خربت ومش عارف المها وربنا .. مزاميزو يا عسل منور القاعده 

مازن : حبيبى يا طقطق مش عارف تاخدنى معاك اجدد شبابى انا كمان 

طارق : احنا فيها تعالى 

مازن : لا خلينا احنا الطالعه الجايه .. وقفل معاهم .. وواقف بيشوط اى حاجه برجله بعصبيه 

محمود قرب عليه وحط ايده على كتفه : مالك يا طارق 

طارق دفس راسه فى حضن محمود : كان نفسى أكلمها واسمع صوتها واشوفها واحس انها جمبى 

محمود : ولا تزعل انا ها اتصرف وها اخليك تكلمها 

طارق : انا ها اتصرف يا حودا .. ولو عايز اجبها هنا وربنا اجبها .. بس  مش عايز عمى مروان يزعل منى 

محمود : عين العقل هى بردو لازم تحس ان لها عيله واهل وحد بيدافع عن حقها مروان اتصرف صح  تعالى ندخل نريح فى اوضة ماكس دا كمان .. انا تعبت .. ودخلو ومايكل دخلهم الاوضه  وخرج  .. الاوضه مليانه صور كتير جدا ومدليات رياضيه .. وصور مع بنات على البحر واوضاع لا تناسبنا بالمره .. 

طارق ضحك بهستريه : الواد مأضيها يا حودا وخاربها .. لا كدا انا ها اروح فى داهيه لما الاقى المزز دى قدامى . .. وهنا الشيطان زى الحربايه بيتلون على كل لون 

محمود : 😂😂😂 احنا لو شيرنا الصور دى ها تترفد من الشرطه وتتحاكم محاكمه عسكريه بتهمه الخيانه العظمى .. وحور ها تقطعك وتحطك فى اكياس 

طارق نام على السرير : اه يا حودا من حور دى مش عارف ها اروح فين تانى بسببها 

محمود : خير يا حبيبى ان شاء الله خدنى جمبك فى السرير الشبر دا .. ونامووو وراحو فى النوم من تعب اليوم كله 

اشرق شمس يوم جديد لطارق .. مايكل صحاه بدرى جدا هو ومحمود وخرجو بهدوء عشان يبتدى يعمل لطارق التحاليل وكل اللازم الا على اساسه يشوف ها يبتدى معاه العلاج منين .. خلصو ورجعو تانى لان النتيجه قدامها وقت على ما تظهر .. دخلو البيت لقو ليزا قاعده جمب سندرا ومستنيه طارق بشوق ولهفه .. اول ما دخل خدته فى حضنها وماسكه فيه زى الاطفال ودخلت اوضتها وهى ماسكه فيه 

((الحوار مترجم ))

ليزا : أعلم إنك لستو ماكس ولكنى اراك فيه 

طارق خرج نفسه كأن جبل اتشال من على قلبه : هذا شئ اسعدنى كثيرا .. حتى لا تصابى بصدمه اخرى انا لا اريد انا اتحمل ذنبك 

ليزا : أتعتقد اننى لا اعرف ابنى .. صحيح من يراك ويرى ماكس لايمكنه ان يفرق بينكم سوى بالتحليل DNA .. او بعض العلامات المميزه فى اجسادكم التى تتشابه ايضا كثيرا .. نفس الطول والحجم وكل شئ 

طارق : عرفتى أزاى  انى مش ماكس 

ليزا : عندما انسحبت من جانبى وانا احتاجك بشده  .. وهذا ليس طبع ماكس .. كان يعانقنى  بقوه ويظل بجانبى حتى أسترد قوتى .. لكنك ايضا حنون كثيرا ولاحظت بعض التحفظات فى التقرب منى ما اسمك الحقيقى 

طارق : اسمى طارق 

ليزا ابتسمت : انتى من أصول عربيه على ما اعتقد طارق 

طارق هز راسه : مصرى 

ليزا : معقول 

طارق بيحط ايده على شعره : عشان الشعر الاصفر والعيون الخضرا .. عادى عندنا كتير من دا  

ليزا : سمعت عن مصر كثيرا 

طارق : مش ناويه تزوريها 

ليزا : لن اقدر صحتى متدهوره كثيرا 

طارق : استعجبت كثيرا عندما رأيت صور ماكس كله طاقه وحيويه ومحب للحياه عندما يعود سوف ينكسر لمجرد ان يراكى بهذا السوء 

ليزا : لن يرجع انه رحل وترك ليزا بمفردها فى الحياه 

طارق : مفيش  اثبات انه رحل يمكنك الانتظار دائما هناك أمل ويمكنه الرجوع 

ليزا : بعد اختفاء سنه كامله 

طارق : نعم جدتى اختفت 24 سنه كامله وعادت ومعاها امى فى سن الشباب ..   دائما هناك أمل 

ليزا :  معقول هذا الكلام 

طارق : جدا .. وطلع تليفونه وبدء يوريها صور جدته ومحمود وهدى مامته وشريف وجده بها .. وبيتكلم عنهم كتير 

ليزا : أنتم عائله جميله جدا طارق 

طارق : احنا بقالنا كتير بنتكلم ايه رايك ناكل والا ها تغيرى رايك عشان مطلعتش ماكس 

ليزا : انا  اريد ان أقضى وقت كبير معك وأكل واسترد صحتى من جديد وجودك اوجد أمل جديد بداخلى حقا ارى ماكس امامى وهذا يريح قلبى 

طارق ابتسم ومسك ايدها قوامها وطلع على برا  وبيتكلم بصوت عالى خلى الكل يضحك .. احنا جعانين يا جدعان .. الاكل فين  وليزا قلدته ... وسندرا ومايكل مش مصدقين نفسهم 

محمود بيتكلم عربى : انت صدقت نفسك والا ايه 

طارق : عيش وروشها يا حودا ..  خلاص كله بقى على المكشوف وبيكلم ليزا المبتسمه وبيقولها تقول زى ما هو بيقول بالعربى ..  قولى كله على المكشوف 

ليزا بتضحك : أوله إل المهشوف 

طارق بيشاور على ليزا : شفت يا حودا اوله إل المهشوف .. وبيشاور على محمود انت مهشوف وبيشاور على نفسه انا مهشوف كله كله مهشوف والا ايه يا مايكل يا عسل 

مايكل : أسل  ههههههه .. أسل 

طارق : اهو اتجنن يا حودا من كلمه واحده عربى ال واحنا بنقتل نفسنا عشان نتعلم انجليزى  .. عايزين ناكل يابشر 

محمود : ياااد اهدى تعالى يخربيت جنانك 

طارق : بحبك يا مايكل وحاسس ان خرابها على ايدك 

مايكل : بحبك ماكس  

ليزا : ارجوك قول له طارق .. انا اعرف كل شئ 

مايكل : ليزا ابنتى 

ليزا : لا تقلق انا بخير وسوف اكون بخير من اجل ماكس وبتبص لطارق سوف يساعدنى كثيرا يا أبى انه حنون وطيب القلب 

مايكل وسندرا حضنو بعض وبيعيطو 

طارق بيعيط عياط مصطنع واترمى فى حضن محمود : الناس دى ها تخلينى اعيط يا حودا .. بقى دا الا ها يعالجنى دا عايز الا يعالجه 

محمود : ههههههه ماتعملش فى نفسك كدا 

طارق : سيبنى يا حودا انا فاض بيا خلاص عايز اتجوز حور الهبله واتلم فى حته كفايه عليا كدا   

كلهم ضحكو على شكل طارق ومحمود .. وقضو وقتهم مع بعض طول الوقت ضحك وطارق بيحاول يرتب مع كريم عشان يكلم حوووور بعيد عن مروان او اى حد محتاج جدا يسمع صوتها وتديلو دافعه حتى لو بطريق غير مباشر وكريم وعده انه ها يكلمها حتى لو ها يخطفها برا البيت 

****************** 

منير مش مبطل رغى مع هيدى فى التليفون وهى بقت مياله له كتير .. وبدأت تعجب بيه او يدخل قلبها ... وبيحاول يقصر المسافات عشان يتجوز على طول زى العصابه مايقعدش كتير خاطبها زى ما مؤمن عايز 

****************

ريم بنوم جمب أحمد : حبيبى تليفونك بيرن 

احمد خد التليفون ورد وبعد فتره قفل 

ريم : ايه راجع الشغل 

أحمد : ايوا بس بعد بكرا ان شاء الله انا وكريم 

ريم : بسرعه كدا يا أحمد 

أحمد : ها أعمل ايه مش بمزاجى واتعدل قومى جهزى الفطار على ما اخد شاور 

ريم : حاضر يا حبيبى ..  وقامت وواقفه فى المطبخ بتجهز الفطار .. لقت أحمد جاى من وراها وضمها جااامد .. ما تزعليش منى 

ريم بابتسامه : ابدا مش زعلانه .. كل الا يهمنى انك تبقى بخير دايما 

احمد قرب على خدها باسها : انتى بتعملى ايه فى الطعميه 

حور : بقليها فى الزيت عشان ناكلها 

أحمد : هى على شكل بنى ادمين والا انا بيتهئلى 

ريم : هههههه منا كل ما انزلها بالمعلقه تلزق فيها وتعمل اشكال غريبه .. هى مش كلها طعميه فى الاخر 

أحمد : ايوا  ما انتو لاقين شباب زى الورد بياكل وهو ساكت وبيدلعكو كمان 

ريم : لو ها تدلعنى يبفى تعملى الفطار وتجيبه فى صنيه على السرير وتأكلنى 

أحمد : اروق البيت بالمره واقولك أمرك يا ست هانم عايزنى اربط الايشرب فيونكه والا على جمب  .. وارفع الجلبيه لحد الروكبه والا ايه يا ستى 

ريم : اه وتحطى عينك على جوزى شكلك داخله على طمع 

أحمد رافعها وهى بين ايديه وقرب من شافيفها باسها برقه .. ايوا طمعانه انتى مش طمعانه 

ريم : الطعميه يا احمد 

أحمد : اه يا لئيمه طمعانه فى الطعميه كوليها كلها  حلال عليكى 

ريم : انحرقت اوعى اطلعها 

أحمد : انتى ها تنقذيها مش ها تطلعيها ووقف ساعدها فى الفطار وقاعدين مع بعض بيفطرو 

ريم : هو مفيش جديد فى وضع طارق وحور يعنى هو ها يرجع لها والا لاء

أحمد : ماعنديش اى فكره طارق ما بيحاولش يتكلم معانا هو بيحبها بس لسا ما قررش 

ريم : هو ليه سافر برا دلوقتى 

أحمد : جدو محمود خده يغير جو حاسين ان فى ضغط نفسى او حاجه مدايقه فا قال يبعد بيه عن هنا شويه احنا ها نقضى قعدتنا على طارق وحور 

ريم : صعبانه عليا جدا ونفسى اشوفها مبسوطه  وكمان طارق لايق عليها 

أحمد بيتنهد وبيبص فى اللقمه الا ماسكها .. وسابها وقام 

ريم : رايح فين يا احمد 

أحمد : الحمد لله شبعت .. اعملك ايه تشربيه معايا 

ريم : انت اديقت منى 

أحمد : ابدا والله ياريم .. تشربى ايه بدال ما ارجع فى كلامى 

ريم : ماشى ها اشرب ينسون 

أحمد ضحك : ليه ها تغنى يا ام كلثوم  والله عليكى حاجات غريبه وسابها ودخل المطبخ 

ريم : هو الينسون بقى حاجات غريبه اليومين دول 

أحمد واقف يعمل ينسون وفنجان قهوه . . وبيفكر فى طارق الا فعلا كاسر فرحة الكل .. ربنا يجبر بخاطرك يا صاحبى وصب القهوه والينسون وخرج وريم بتلم فى الفطار .. فتح التلفزيون وحاطت رجله على الترابيزه وبيشرب القهوه ريم قعدت جمبه بهدوء وخدت مج الينسون وبتشرب هى كمان  

أحمد : ها نروح عندنا انهارده 

ريم : ياريت بس اعدى على ماما وبابا وبعدين عندكو وتبقى السهره هناك 

أحمد بيهز راسه : تمام 

ريم : شكلنا اتسرعنا اننا نمشى من الفيلا 

أحمد : ليه بتقولى كدا 

ريم : حاسه أن انت مش مبسوط وحياتنا فاضيه قوووى عكس ما كنت هناك 

أحمد : انتى ليه احاسيسك ضاربه 

ريم تنحت وبتشاور على نفسها : انا 

أحمد : عندك انفجار احساسى غير طبيعى .. لا وحول فى المشاعر 

ريم : انا 

أحمد : الامور عندك كلها داخله فى بعض وعامله كوارث جوا 

ريم : انا 

أحمد بيضحك  : ايه الزمبلك وقف على انا ... ايوا انتى يا ريم .. ياماما احنا فى شقه لوحدنا فا طبيعى يبقى فى نوعا ما هدوء فى حياتنا  عشان انتى كنتى عايشه جوا المغامرات معاهم .. قولتلك تعالى نسافر قولتى لا خلينا فى شقتنا .. إتأقلمى عشان دا ها يبقى الطبيعى 

ريم : كل دا انت واخده عنى 

أحمد : مش واخده ياريم انتى طول الوقت بتفسرى الامور غلط لازم يبقى ليكى نظره فى تقيم كل شئ حواليكى  مش تختارى وبعدين تحسى بالندم والغلط ..  دا عيب خطير ممكن يهد حياتك اختارتى كملى التجربه وبعدين قررى 

ريم مسكت دراع وقربت منه : خلاص يا أحمد براحه عليا 

أحمد ميل بجسمه عليها وسند راسه على كتفها : انا بفهمك مش بهاجم انا عارف وفاهم ان اى بنت بتغير حياتها وعيشتها فى الاول بتبقى كل الامور صعبه عليها ومع الوقت بتتعود .. بس انا مش عايز انتقاد لكل حاجه طول الوقت وتردد اوكى 

ريم : اوكى خلاص بقى 

**************** 

مر يومين ... والامور هادئه او تكاد تكون ممله عند الكل ... وكريم مش عارف يستفرد بحور بعد ما مروان نزلها الشغل وبتروح وترجع معاه وهو كمان رجع شغله هو وأحمد وتقريبا بييكلمو طارق كل يوم احمد ومنير وكريم  ... وطارق قاعد مخنوق وعلى اعصابه سواء من النتيجه الا مايكل ما جبش سيرتها وكل الا طالع عليه منتظر ظهورها مازال هناك وقت ودا شكك محمود لان معروف عنهم السرعه ... وكمان ليزا بتتحسن بطريقه ملحظوه جدا ولا يمكن تاكل غير مع طارق ويوميا بتنتظره لانه رفض يقعد معاهم فى البيت وقاعد فى الفندق هو وجده ... قامو زى عادتهم راحو لبيت مايكل ... وقاعد معاهم ... 

******************* 

محمود استغل ان طارق قاعد بيتكلم مع ليزا وسندرا خرج هو ومايكل برا وللاسف طارق خرج وراه بخفه لانه متوقع النتيجه او حاسس ان مفيش أمل 

((الحوار مترجم ))

محمود : مايكل ارجوك قول اى شئ 

مايكل بأسف : محمود الوضع سئ للغايه وانا لا اريد ان احطم ذلك الشاب الجميل ... انا اعرف ان الانجاب فى البلاد العربيه شئ مهم جدا ولكن الامل ضعيف جدا محمود 

محمود حس انه داخ مره واحده وكان ها يقع ومايكل مسكه وطارق انسحب ورجع تانى  لليزا 

مايكل : أنت بخير 

محمود : الحمد لله ودموعه بتنزل لوحدها 

مايكل : محمود لن ايئس مع طارق وسوف ياخذ علاج مكثف وعلى أعلى مستوى حتى لو النتيجه ضعيفه فا يمكننا تحقيق انجاز ولكن سا نحتاج لوقت كبير 

محمود بعياط : الوقت الا انت عايزه انا مش ها اسيبه لو فى أمل دا وحيد امه وابوه غير كسرة نفسه والبنت الا بيحبها 

مايكل : لا اريده ان يعرف هذا الكلام كل ما اريد ان يعرفه  ان هناك بعض المشاكل ولبد من العلاج المكثف والاهتمام خلال تلك الفتره 

محمود هز راسه : حاضر  

طارق دخل اوضه ماكس وطلب من ليزا محدش يدخل عليه فضل كتير بيلف فى الاوضه ودموعه عمله زى الشلال .. وبيلوم نفسه انه سافر وحس بأمل وعلق حور فيه ووعدها من تانى .. ها يقدر يكمل طب ها يجيلو الجراءه يصارحها زى ما قال لها دخل اتوضى وفضل يصلى وقت كبير وكل ما محمود يفتح الاوضه براحه ويبص عليه يلاقيه بيصلى يرجع تانى 

طارق خلص صلاه وعينه فى الارض قاعد يستغفر كتير مش حاسس لا بوقت ولا ناس ولا اى شئ فاق على رنة التليفون وكان كريم بيتصل فديو  .. فتح الخط لقى حور قدامه رافع راسه لفوق بوجوع وبينه وبين نفسه ليه دلوقتى  

حور : طارق رد عليا انت مش عايز تكلمنى 

طارق بيبص لها وساكت الكلام واقف زى الرصاصه فى زوره 

حور : طارق ارجوك قول اى حاجه ومره واحده برقت لما لقت واحده بتقرب عليه وبتحط ايديها على كتفه 

طارق بإرتباك بص لليزا وبص لحور  الا رمت التليفون لكريم وبعدها الخط قطع