رواية جذبني فمك البني الفصل الخامس 5 بقلم عبير إدريس

هو

شـايف من تجـيك الطعـنة من احـباب !

گلولها يگول آنه ناسي ومن زمان!

وهي زيـن تذكــرت هــنيالـها ..

هي

ينطيك گلبك ننتهي..

وبس بالاحلام تشوفني !

هو

والله بعد ما ترهم وتنحب

اردلك ليش وانت الجرح المجرب

.................

صافنه على الضوه الداخل للغرفه من جوة الباب واحجي ويه نفسي هذا شعلكه واني نمت طافيه كلشي ، كمت افكر اني متوهمه وعلكته ونسيت ،

بس الغريب وين ؟

من اسمع نفس ويايه بنفس الغرفه وماكدر اكوم اعلك ضوه واشوف منو ولا اتذكر موبايلي وين خالته واعلك لايت ،

والاكثر شل حركتي الخوف تجمدت بمكاني ماريد اكوم ويعرف اني حسيت بيه لان ماعرف رده فعله شنو راح تكون...

رجليه ترجف اريد اسيطر عليها ما اكدر حسيت كلبي صار بركبتي من الخوف ...

اعرف بيك موجود يمي واعرف انت اقرب اليه من شهكه نفس لان هاي حجايتك انت دائما تكول اني اقرب الج من شهكه نفسج لهذا اعرفك انت هنا ادهم..

جريت البطانيه وتغطيت لحد راسي غمضت عيني بخوف ردت اغفة مكدرت ماعرف شكد مر من الوقت استسلمت للنوم او بالاحرى فقدت الوعي ماعرف من الجوع او الصخونه لو تأثير العلاج..

كعدت الصبح جانت الشمس داخله من الشباك عيوني كوه فتحتها باوعت بالغرفه ادور على اثر يثبت هو جان موجود لو الحسيته البارحه حقيقه مو حلم ولا تخيل ولا هذيان بسبب المرض ماكو كلشي مثل ما عفته

كمت متكسره وريحتي ياويلي كلها مرض...

اخذت المنشفه وكبل للحمام سبحت وطلعت رحت للمطبخ خليت القوري على النار وسلكت بيضه نص ستاو بلكت اكدر اكلها لان بلاعيمي ماكدر ابلع اي شي ،

اللي لفت نظري وخبلني اكو خاولي صغير مشرور على يده الكرسي واكو طاسه على الميز هذا الخاولي جديد جنت ضامته بالكاونتر وهاي الطاسه صارلي كومه مامستخدمتها،،،،

شمرت كلشي من ايدي وركضت لبست وطلعت من الشقه والرعب مالي كلبي يعني هو جان موجود هو سوالي كمادات مو بابا هو باسني هو تحسس حرارتي سمعت نفسه يمكن مجرد امد ايدي جان لزمته ، يعني مجنت اتخيل ولا احلم هذا جان واقع ، ليش ماحجيت وياه ليشششش ما حاولت ...

بس اوكفي لحظه انتي كد المواجهة ؟

سيلين انتي كده شبيج تخبلتي ، لا لا هو يحبي ميأذيني والدليل البارحه سهر عليه ؟

لا هاي احلم اي اني اتخايل واحلم وهسه ابو عبد يأكدلي هذا الشي..

امشي واحجي ويه نفسي اريد اقتنع اريد اطمن روحي اهدء روعتي ...

نزلت وصلت باب العماره لكيته كاعد ..

سيلين : صباح الخير عمو.

ابوعبد : صباح الخير بنيتي شلون صرتي..

سيلين : الحمدلله زينه انت شلونك..

ابتسم وكال..

ابو عبد : بخير ماشي حالي استغربت سؤالج عليه..

سيلين : هاي شنو عمو قابل اول مره اسأل عليك..

ابو عبد : عوفج مني بنتي محتاجه شي شو وجهج مخطوف لونه..

سيلين : عمو ورة ساعه ١٢ يكدر واحد يدخل للعماره اذا انت نايم..

ابو عبد : اني ما انام اله اتأكد من سكان العماره كلها صعدت يلا وراها اقفل واصعد طير بشر ميكدر يفوت بس شنو سبب سؤالج صاير شي..

سيلين : عمو ماصاير شي بس اني مرات اتخيل اشياء تخوفني لان عايشه وحدي تعرف بنيه وتصير ضعيفه تخاف من كلشي لهذا سألتك ردت اتأكد..

ابوعبد : امني اذا طير فات اني عندي علم انتي يايوم فتي للعماره لو طلعتي منها واني ماموجود بس اذا طلعت بشغله ضروريه عبد يتواجد ، هذا محلي باب العماره واعزل ساعه وحده بليل وافتح من الصبح ..

سيلين : ريحتني عمو تسلم..

ابو عبد : هله بنتي..

عفته ورجعت امشي تطمنت نوعا ما بس من رجعت للمطبخ وشفت الخاولي والطاسه صابني الاحباط ، يعني اني اتخيل لو هو هنا زين اذا اجه منين جاب المفتاح شلون كدر يدخل وعمو عبد اكدلي محد يفوت اله هو عنده علم ..

ياربي احفظلي عقلي معقوله كمت اتخيل اشياء ما موجوده لو اسوي شغلات وما ادري بنفسي..

دك موبايلي رحت للغرفه دورت هذا وينه ، تبعت الصوت لكيته على ميز التواليت ، باوعت هاي نسرين..

سيلين : هلو نسرين صباح الخير..

نسرين : هلو بيج شنو اليوم مامداومه؟

سيلين : تعبانه والليل كله مصخنه مكدرت اروح شمدريج انتي ؟

نسرين : خابرني محمد وكال اليوم صاحبتج ماداومت وماماخذه اجازه..

سيلين : ماشي اروح فد شويه واخذ زمنيه..

نسرين : يمعوده هاي شركه اهليه يعني تغيبين منا يطردوج منا..

جريت نفس قوي .

سيلين : صح يلا اروح اني تأخرت..

نسرين : الله وياج..

سديته منها وكمت بدلت شلون مجان صايره ما الي واهس لا بلبس ولا بمظهري ولا بأي شي عكس قبل شلون جنت اهتم بأدق تفاصيلي خصوصا ايام الكليه...

طلعت سديت باب الشقه توني اجر المفتاح من الباب لفت نظري منظر رجعني بذكرياتي لقبل كم سنه....

شفت جارتنه تضرب بنتها رجعتني لأتعس ايام بحياتي من جانت ماما تضربني اذا قصرت بشغل البيت لو جادلتها ،

جنت دائما احضن نفسي لان ماعندي احد اشكيله اواسي نفسي بنفسي لهذا جان ادهم دوم يسألني ليش تحضنين نفسج عباله بردانه لو فد شي يوجعني ميدري بسبب امي ضعفت شخصيتي وخلتني اخاف من خيالي...

مره صار ويايه موقف كلش

اذاني وهو جان شاهد عليه شافني من حضنت نفسي ، كعدت بالكاع ابجي بحركه كلش انقهر عليه وبنفس الوقت مابيده شي يسويه ويخفف عني الوجع...

كعد بمستوايه وكال...

ادهم : باعيني شو رفعي عينج مو احجي وياج ..

باوعتله عيونه مليانه قهر وقلق عليه...

ادهم : صح الصار صعب وجبير بس يهون وانه وياج وياج بكل خطوه لحد ما توكفين على حيلج..

كمت اصيح...

سيلين : ماكدر اوكف على حيلي اني انسانه ضعيفه عديمه الشخصيه وهذا اللي وصلني لهذا الحال كل مره اوكع وارجع اكوم واصبر بنفسي وتالي ارجع اوكع من جديد بس هلمره وكعتي قويه تهد الحيل....

ادهم : لا غلطانه انتي قويه واكو قوه بداخلج بس تظهر حسب المواقف اصلا انتي انسانه ناضجه بالنسبه للبنات البعمرج ...

ماعرف جان يحجي صدك لو يريد يمتص غضبي لو يرجع ثقتي بنفسي...

سيلين : مو قويه اني مو قويه اني ضعيفه فاشله اني ضعيفه ...

ضليت اردد بالكلام واباوعله...

عض شفته وهز راسه مستحسف على الصار بيه وعلى انهياري..

جنت منهاره وبس ابجي جسمي كله يرجف ...

ادهم: ليش البجي ياعيني مو فطرتي كلبي ..

سيلين : اني ليش عايشه شنو الشي الزين بيه شو حياتي واني وكلشي يتعلق بيه عباره عن صفحه سوده مصخمه..

ادهم : ظروفج جبرتج على بعض الشغلات وانتي سباعيه وعرفتي شلون تتجاوزيهن وتحمين نفسج واختج بنفس الوقت ، صدكيني بيج صفات هواي حلوة لو بس تحاولين تحبين نفسج جان هواي امور اختلفت..

سيلين : هو اني اريد اكره نفسي علمود ابطل غرور غروري بنفسي وكعني بهواي اخطاء خسرتني شغلات لاتعد ولا تحصى ..

ادهم : اضافه للغرور عندج هواي صفات هدوئج ، طيبه كلبج حنيتج على احبابج ، بداخلج مزيج من الصفات الحلوة وكلها بنسب متفاوته شي يشيل شي كل صفه عندج تظهر بموقف معين وساعتها تنطين كل موقف حقه بس انتي متحسين على نفسج لان صايره عباره عن كتله سلبيه ، بس المقابل يحس بيج ويشوف اللي انتي ماشايفته وانعمت عيونج عنه...

سيلين : انت شايف انسان ضعيف يقوه بمرور الايام اني مشايفه ...

حجيتها واني مصدومه بيه عبالك يعرفني من سنين وعايش ويايه ..

مسح على راسي بيده نزل راسه بمستوى راسي وهمس قريب اذني وهاي اول مره يسويها ..

ادهم : كومي غسلي وجهج وتعاي نحجي يلا حبابه ...

وكف مدلي ايده رفعت عيني المليانه دموع مديت ايدي جانت ترجف لزمها حسيت بحراره ايده سرت بجسمي اول مره ولد يلزمني ....

مشى ومشيت وراه وعيني على ايده الشابكه اصابع ايدي ، جانت حاضنتها بقوه بحيث دمرات جفه بارزات..

غسلت وبعدها دخلنه للمكتب مالته اشرلي على القنفه اكعد ، كعدت ، راح جاب مي وقدمه الي اخذته بيد ترجف شربت شويه وخليته على الطبله...

كعد على القنفه المقابيلي خله رجل على رجل وكال ...

ادهم : ارتاحيتي نحجي..

اشرت براسي اي..

ادهم : تمام ، باعي سيلين انتي شخصيتج تحسيها ضعيفة مو صح هذا جان نهايه حديثنه ..

سيلين : صح؟

ادهم : شنو السبب الخلاج هيج تعتقدين..

سيلين : كلشي اسويه افشل بيه ما فد يوم نجحت بشي ابسط مثال دراستي مكدرت اطلع معدل بيه حظ ويمكن حتى معهد ميدخلني.

ادهم : لحظه نحلها وحده وحده عوفي موضوع الكليه هسه الف طريقه الها بس تعاي نعالج داخلج بالاول انتي داخلج يحتاجله صيانه بعدين نجي للعقل نغذيه بافكار صحيحه يلا ذاك الوكت ندخل العلم ونتطرق لأمور الدراسه..

سيلين : وهاي شلون حلها..

ادهم : يمج الحل كلشي بيدج انتي تكدرين تبنين نفسج من فشلج..

سيلين : عمو انت تضحك عليه لو شنو تره اني دمي محروك وكاعد ارجف وانت مدري شتسولف..

ادهم : انه ملاحظج من جيت لسه تردين تصيرين واووو ومن كلها كامله وماعندج اي خلل بحياتج وتحاولين تثبتين لنفسج انتي صح وانتي كامله مو؟؟

سيلين : صح ..

ادهم : بس ماكو هيج شي بالحياه ، ماكو انسان كامل فكره الكمال شيليها من راسج ، لتضلين تفكرين اسوي هذا ما اسوي هذا اركز على هذا اتجاهل هذا ، لازم اسوي فلان شي وابذل بيه جهد ومجرد تفشلين ترجعين للصفر وهذا اللي كاعد يتعبج السعي لتحقيق الكمال يتعبج يسلب منج الراحه راح تشوفين نفسج عباره عن نكره وكل متسوين شي تفشلين بيه وبهيج تزداد اخفاقاتج بالحياه ..

سيلين : عمو اني مو اريد اوصل حد الكمال اريد انجح بشي واحد اريد فد يوم اتوجه على شي ويكمل شنو اسوي يصير عكس منين ما التفت تنسد بوجهي فهمتني..

هز راسي مبتسم ..

ادهم : فاهمج ميحتاج افهم ، باعي انتي شايفه الحياه عباره عن وحش جبير تخافين تجازفين بشي لا ياكلج ويأذيج لهذا دائما ضاله بمكانج واكفه جازفي بتجربه وكولي انه راح اسوي هذا الشي وما اسعى للكمال بيه صار صار ما صار اعيده مره ثانيه وعاشره الى ان انجح ،

انتي مجرد ما تشيلين من راسج فكره الكمال وما تستسلمين للفشل ، ودائما رددي فكره الكمال هي العدو ، بهيج راح تجتازين هواي امور هاي اولا ثانيا راح تبدعين واخر شي تشوفين نفسج نجحتي وتوفقتي ...

سيلين : عمو الكلام حلو وسهل بس الفعل صعب وانت احسك عايش بعالم وردي..

ضحك حك شعره وبعدين حك لحيته ...

ادهم :

كلنا عدنه فيض من النصائح مرات تكون نابعه عن حسن نيه اجي احجيلج وانه ما اقصد شي ومرات تكون النصيحه مقصوده ،

نصيحتي اليوم بيها قصد وقصد كلش جبير انتي خليتي لنفسج قواعد وكاعد تمشين عليها وانه بنصيحتي الج وكلامي وياج جاي اكسر هاي القواعد واهدمها لان القواعد احنه نخليها ونكبرها ونخليها خط نمشي عليه بقيه حياتنه لكن هذا اكبر خطأ ليش لان القواعد يجب ان تكسر كوني فاشله ب اتباع القواعد تمام وهذا اول درس اعلمه الج بخصوص الثقه بالنفس وتطوير الذات والمجازفه بخوض تجارب احنه نريد نسويها بس مترددين ....

هو كال هذا اول درس علمته الج بس ميدري هذا ثاني درس تعلمته منه لان اول درس علمني شلون اصبر على المصيبه وشلون اتجاوز الحزن واخلي لحظه فرح تشارك لحظات حزني واليوم علمني شلون استقبل الفشل برحابه صدر وبوجه مبتسم واعيد تجربتي الى ان اوصل للأريده ....

فزيت على صوت الموبايل يدك بيدي ، ضحكت هاي اني وين صفنت الوكت راح عليه والام وبنتها رايحين واني سارحه ب افكاري وب ادهم....

جاوبت على الاتصال موظفه ويايه بالدوام نزلت الدرج واحجي وياها صعدت السياره وانطلقت للدوام ...

اول ما وصلت رحت اخذت اجازه واعتذرت توبخت لان اعتبروها شغله تغليس مني او اهمال واعدتهم متتكرر رجعت لمكتبي كعدت اجتي رشا زميلتي كعدت يمي.

رشا : شنو السالفه اليوم تأخرتي هواي ...

سيلين : تعبانه وجنت مريضه يعني مو بقصد..

اشتغل بالحاسبه واحجي وياها..

رشا : متريكه..

سيلين : سويت بيضه سلك وعفتها صارت ويايه سالفه نستني الاكل وحتى نفسي..

رشا : جايبه لفتين تاكلين ويايه ..

رفعت راسي باوعتلها اني جوعانه وكالت لفتين ..

سيلين : اذا اكو جاي اي اريد.

رشا : اروح اجيب واجي..

سيلين : راح اتعبج..

رشا: لا ولو..

راحت وره شويه اجتي جايبه كوبين جاي خلتهن على الميز وطلعت لفات كعدنه ناكل ، شربت اول رشفه من الجاي لعبت نفسي..

سيلين : شنو هذا.

رشا : شكو شبيج.

سيلين : بارد ثلج..

رشا : جذب لج توني حميته..

سيلين : تعاي خلي اصبعج بيه وشوفي..

رشا : صدك تحجين شنو اخلي اصبعي بيه..

ضحكت فجأة لكيت نفسي اتصرف مثل تصرفاته احجي مثله اسوي الشغلات الجان يسويها بيه ..

رشا : حجيت شي يضحك..

سيلين : لا بس تذكرت موقف راح احجيلج ولو اني ما احب احجي عن نفسي بس عجبني احجيلج..

رشا : اي اعرف بيج حتى مرات نسولف بيناتنه نكول هاي مدسوسه من المدير لهذا نتجنب الحجي كدامج وحتى بالشغل منسخت..

سيلين : ههههههههه اي اني اقارب المدير ضلو خافو مني.

رشا : احجيلي الموقف لتغلسين..

مجرد ما بلشت احجي الضحكة شكت حلكي.

سيلين : اكو شخص عزيز عليه كلش بس لتكليلي منو.

رشا : ما اسأل بس كملي..

سيلين : مره راد مني ريوك جنت نعسانه هو اغلب الاحيان يتريك بالدوام بس عجبه بذاك اليوم يتريك يمي ..

رشا : زين ..

سيلين : سويت ريوك بنص عين وتعاجزت اسوي جاي حميت مال الليل..

رشا : عزه بعينج صدك تحجين..

سيلين : اي والله سمعي، اجه كعد يتريك شرب شويه ولعبت نفسه صاح..

ادهم : هذا شنو ؟

سيلين : شنو؟

ادهم : الجاي ؟

سيلين : شبيه؟

ادهم : عبالك عصير بارد فوكاها مابيه شكر..

سيلين : لا بربك يمعود جان يفور على النار..

ادهم : يفور والشكر وينه مر علكم ..

اني اصريت الجاي حار وبيه شكر وهو صافن عليه المشكله يعرف بيه من اكذب رفع تك حاجب وجر اصبعي خلاه بالكوب ...

ادهم : يلا شو ما نجويتي لو حار جان كمزتي ..

سيلين : ايدي اتركها شبيك..

ادهم : العفو نسيت ..

سحب ايده وبعدها فتره من قوت علاقتنه كام يخلي اصبعي بالجاي يلا يشربه مرات يعني مو دائما اسأله ليش يكلي يرادله شكر..

سيلين : اجيبلك ..

ادهم : لا صار عسل...

حجيتها جنت مبتسمه مجرد رجعت للواقع غصيت بدموعي..

رشا : حياتي مبينه تحبيه لعد ليش افترقتو.

سيلين : لا منو كلج احبه ، وما افترقنه مسافر.

رشا : يعني مو نفسه ابو الورد.

سيلين : ليش انتي وين شفتيه؟

رشا: اعصابج ماشفته بس من اجيتي وسألتيني جان واضح الارتباك على وجهج..

سيلين : ماكو هيج شي تتخيلين ، شكرا على اللفه كلش طيبه ويلا نرجع نشتغل هواي سختنه وماضل وقت ونطلع..

رشا : هم صح يلا نرجع نشتغل وبالعافيه على اللفه هههه..

سيلين : الله يعافيج ..حجيتها ودنكت اشتغل بعصبيه ضليت الوم بروحي ليش حجيت عنه ليش ليش ...

كمل الدوام رجعت للبيت صفيت السياره نزلت اباوع عيون عمو ابو عبد طايره يباوع منا ومنا اني هم كمت اتلفت على نضرته رحت يمه وكفت وهو ما انتبه عليه..

سيلين : ها عمو صاير شي شو اليوم عيونك تزرزر ههههههه اله اكللها لخاله ام عبد عمو يباوع على غيرج..

صفن بوجهي ورجع باوع على الشارع العام عاقج وجها ، اني هم باوعت وين يباوع...

سيلين : عمو وين تباوع شكو قلقتني..

ابو عبد : يابه فهميني سالفتج تره عقلي وكفتي..

سيلين : عمو شنو سالفتك يوميه نفس الحجي اذا تريد اشيل منا واغير مكاني كول افضل ..

ابوعبد : لا بنتي اني تره خايف عليج لا اكثر..

سيلين : غير افه

م من شنو خايف..

ابو عبد : صار كم مره من تطلعين الاحظ سيارة وراج تمشي بالروحه وبالرجعه ومن توصلين للعماره يطبك ليغاد وره شويه يروح ..

سيلين : عمو اكيد صدفه..

ابو عبد : لا لا مو صدفه متأكد مو صدفه هذا قاصدج..

سيلين : والحل اعوف المكان شسوي يعني..

ابوعبد : بس فهميني مهزومه من احد ، اكو ناس تهددج احد مراقبج مرات احس عندج علاقة بناس عصابجيه عذرا على الكلام بس وضعج مو طبيعي واللي جاي يصير وياج مشكوك بيه..

سيلين : عمو من باجر ادور مكان ثاني ليضل بالك..

عفته يحجي ومشيت اجه ورايه صعدت وهو هم صعد صاحني.التفتت عليه..

ابو عبد : يابه انتي لازم عندج عمام خوال صديقه ادري طالعه من زرف الحايط حتى مرات يخطبوج شباب مني بس من يسألون عنج ويعرفون وحدج كاعده يتجنبون الموضوع والصراحه بده الحجي يتألف عليج..

سيلين : همه شلونهم الناس عادي متعوده سمعت اشكال وشفت اشكال ، عمو من النهايه هاي حياتي وهذا وضعي يعجبك ابقى هنا كلي ما يعجبك من باجر اشوفلي غرفه بأي مكان واكعد بيها.

ابو عبد : لتنسين اني هم حقي اسأل عن المؤجرين لان انتي كاعده مقابيل عائلتي هم اخاف عليهم واخاف على نفسي لا وراج بلوه يا بنتي ..

سيلين : تعبتني واني ابررلك ماعندي شي وكتلك وراح اعيدها عليك للمره الألف اذا انت شاك بيه او ضايج من وضعي اشيل وريح راسك..

ابو عبد : لا ضلي اني ما ارضه تتبهذلين اني وعبد نشوف سالفته هذا شنو شعنده يلاحكج..

صعدت والعن بنفسي الضيعتها...

فتحت الجنطه ادور على المفتاح ماكو ضليت استغفر ربي وكنبصت بالكاع ادور فردشتها ما موجود ..

استغفر الله ربي وين راح لميت الغراض ونزلت لعمو عبد.

سيلين : عمو فدوه يمكن ناسيه المفتاح بالشقه من طلعت بلكت تنطيني النسخه الثانيه..

ابوعبد : بس اني شفته بيدج من نزلتي..

سيلين : صدك والله لعد وين راح ..

عصرت دماغي تذكرت اي صح من قفلت الباب وجانت المره تضرب بنتها جان بيدي، لعد وين وديته معقوله وكع مني.

ابو عبد : وين صفنتي.

سيلين : ما ادري وين خالته يمكن ضيعته او واكع مني ماعرف..

ابوعبد : امشي افتحلج الباب بالنسخه العندي واروح استنسخ الج واجي ومره ثانيه يابنتي انتبهي ليروح ياخذه ابن حرام ويفوت بشقتج وانتي ما موجوده اني ملتهي..

سيلين : اي هم صح حقك مره ثانيه انتبه اكثر..

صعد الدرج كدامي واني وراه وصل باب الشقه باوع ورجع التفت عليه .

اشرتله براسي بمعنى شنو ؟

ابو عبد : هذا المفتاح بالباب ..

سيلين : عمو مستحيل انت شكاعد تحجي اني بيدي دورته ماكو.

راح للباب فتحه كدامي واشرلي ..

ابوعبد : هذا شنو بنتي انتي مبين عليج تعبانه يرادلج راحه لو شوفيلج طبيب زين يعالج حالتج مره تجيني تكليلي واحد دخل للشقه ومره المفتاح وسالفه المسواك وهواي شغلات مجاي ابلعها .

سيلين : شكرا عمو على النصيحه الضاهر اني فعلا تعبانه ومحتاجه طبيب...

هز راسه مراضي ماعرف مقهور عليه...

دخلت للشقه وراسي يريد ينفجر شمرت المفتاح والجنطه وكعدت على القنفه خليت ايدي على راسي ، شنو الديصير ويايه شبيه اني ضليت افكر واستذكر المواقف كلها تالي ايقنت عقلي بيه شي لهذا قررت اروح طبيب نفسي احسن حل لان اذ ضليت هيج اكبت راح اتخبل وفعلا ثاني يوم رحت سألت ودلوني على طبيب رحتله جانت جلسه تعريفيه من شنو اعاني وليش اختاريت هذا الطريق شنو اللي وصلني لهذا الحال ثاني مره بلشت احجي عن طفولتي كلها وشلون عشت وصلت لبيت جدي وغمضت عيني وكمت احجي للدكتور اللي خانكني من سنين بالضبط مثل ما جنت احجي لأدهم لا استحي ولا هو يتعب او يمل يسمعني ويساعدني بس المشكله هذا الدكتور مكاعد يأثر عليه مثل ادهم بكلمتين اقنع هذا يحجي جرايد واحس بالي مو وياه ، بس انجبرت احجيله لان حسيت براحه ماعندي احد اشكيله او بالاحرى ما أأمن ...

_ احجيلي من وصلتي لبيت جدج شصار وياج ؟

سيلين : توالت المشاكل بسبب والدتي يوميه سالفه شكل الى ان طردونه عمامي من البيت ضلينه بالشارع ماما خابرت على اخوها ماقبل يستقبلنه رجعت اتصلت على عمتي ياسه دزت زوجها وحماها اجوي حجو ويه عمامي ، هذه جانت اخر مره اشوفه بيها وبعدها اختفى اربع سنوات..

_ منو عمج اختفي لو خالج؟

سيلين : لا زوج عمتي.

_ بعدين نرجعله كملي..

سيلين : اجوي واحنه بالشارع ست ساعات ضبط منتضرين عمامي يحنون علينه ويدخلونه للبيت وجانت دنيا شتا وبارده واختي مريضه ، استقبلوهم عمامي وضيفوهم وفتحو الموضوع جان الذم على ماما بالاتفاق يعني كلهم على كلمه وحده بس الصار عمو ادهم ما نطاهم عين يحجون اكثر رزلهم بطريقه مؤدبه رغم جان اصغر منهم بس افهم وعقله يوزن بلد..

ادهم : يابه احنه اهل عشاير وناس معروفين وانتو كذلك ، ذني بنات اخوكم ما يحتاج اوصي عليهن ، الشفته والسمعته من اختكم اللي هيه زوجتي ومن بنت المرحوم الكبيرة هنه ما مرتاحات ومغبون حقهن من الاخير عدهن حصة ابوهن هنا ولازم تنطون حكهن..

عاطو عمامي انت شدخلك وشعليك ومن هالحجي ...سكتهم ...

ادهم : الدخلني لان حرمه من نص بيتكم استن

جدت بيه معناها كلكم ماكدرتو تسوولها شي لهذا التجأت لزوج عمتها الغريب وشكتله الحال...

صلاح : شنو قصدك ماكلين حقهن.

ادهم : حشى انه ماكلت هيج يابه انتم سمعتو نطقت بهيج كلام..

كالو لا ..

ادهم : لا تكولني شي ما كايله ياعمي من الاخير انه ما طالع منا اذا ما ماخذ حك اليتيمات وياي...

وفعلا عمو ادهم نطاهم مهلة واخذ حقنه منهم ، وطلعنه من بيت جدي رحنه وياه لبيته ضلينه اربع ايام وحجه ويه ماما اتفقو يشتريلها بيت بسليمانيه يم اخوها خابر خالي وكلوله دور بيت بهلكد سعر علمود اجيبهم ، مطولت السالفه وخابر خالي كال البيت جاهز تعالو رحنه لبيتنه الجديد صح صغير بس جان حلو ومرتب غراض مابيه خالو كال اني اشتري كم شغله والباقي عمو ادهم كال اني اجيبهن وهيج استقرت حياتنه الحمدلله ضل المصرف خالو وماما كعدو على صفحه اتفقو على شنو ماعرفت لهذا يومي....

الفصل السادس من هنا