رواية اصفاد الود الفصل الخامس بقلم زهرة الرمان
بسم الله الرحمن الرحيم
مساء الخير حبايب
💥 لانعلم اي قدر سيغير تواريخ حياتنا ولكن حتما سياتي ذلك اليوم الذي ننضر له على أفق السحاب
ولكن عندما يريد الله بين الكاف والنون كن فيكون
وتكن الأرض مسخره لحلم أحدهم
جواد بعد حادثه ولد عمه والصار ما جاب سيره سعدون ولا انه لان عرفت سالفه من كال جواد نسيبي هذا الموضوع مثل ما جان يعلمني شلونبق نوهم التجار ببضاعه حتى تنباع
ولهذا بقيت بنفس شغلي وبنفس تعبي ولا اكل او أمل
ومستمر اخذ غالب للملا او اي مكان
ووره الغده يجي سعدون اروح للمغازه يم شنشل صرت اعرف الصغيره والجبيره وانتبه اذا شنشل يغلط وصاروا يكولون جواد يعرف للفلوس وهو مافلح بقرايه وكتابه بس بالفلوس ما يلحكه القلم
أخذت اليوم غالب للحلاق وباجر شهر رمضان بقيت احوس اريد اروح لهلي بس سعدون ماكال تروح شلون ضليت بغرفتي وما كلت اروح لان بعد وكت على معاشي بس متعود كبل ليله شهر رمضان نلتم كل اهليتنه ونتباره الذمم ونسوي زاد بثواب وجه الله اخر غده كبل رمضان
أيست بس بليلتها وماكدرت عيني تاخذ النوم ليش مادري
طلعت افتر اشم هوا كلت بلكي انعس من افتر شواي
گرب الفجر نمت الصبح
طلعت على بيت سعدون اخذ غالب ابقئ يمه لحد ما يكمل وصرت احفظ وياه بدون ما ادري اقرا سور القرآن الي يرددهن الملا وصارت بوكتها اليحفظ يحولونه ع مدارس النظاميه الجديده وطبعا مايحق البعمري صرت جبير وفاتت بقيت اتحفط القرآن وي غالب
رديته للبيت طلع سعدون اليوم صيام ما مش غده رحنه عدنه شغل هواي رحت وياه. تتسوك التجار صايره هوسه
طاب وطالع
شنشل ما يلحك انه اعينه
وصيت الكهوجي يدخل سعدون وربعه يمه وانه رحت لشنشل خلاني وده عليه سعدون بقيت اوزن واشتغل بمجان شنشل
العصر يلا فضت قبل الفطور سعدون نوعا ما مرتاح كلت خل اكله اروح لهلي اشوفهم حتى لو بلا معاش بس اول يوم
كال اليوم وباجر شدتها وراها روح بقيت اشتغل لقبل المغرب
دخلت وشفت شنشل ويمه جم واحد ويسأل سعدون بشنشل
سعدون
جاي أكلك غير جواد منو جان
شنشل
مامش هو خليت جواد واجيتك
سعدون
جا الختم شنو صارله جناح لو شنهي
شنشل عمي انه متأكد من كتبت لسليم العبد قفلت القاصه
سعدون
جواد شايف ختمي
جواد
لا عمي وين اشوفه
سعدون شلون ابقئ أشك بروحي امشو محد يرد الا الختم يصير بيدي
جواد
بقيت افتر وصايمين والكل احسهم ما يدورون أجيت ع شنشل
عمي متأكد ما ناسيه هنا وله هنا
شنشل
جواد انصحك لوجه الله
جواد
اي
شنشل
اذا عدك طلع الختم وجن كلشي ما صاير
جواد َهذا ضنك بيه
شنشل
موش ضن بس خلني أكلك واحد كال السعدون انت تبحوش بالقاصه العصر
جواد
ابحوش (يعني يدور بيها) منهو كال خل اتواجه وياه
شنشل
جواد سعدون يحبك مايريد يخسرك أكلك شوفه منا منا اخير
جواد هايه تهيمه شلي بختم سعدون حتى ادوره
سمعت وراي صوت سعدون
امشي جواد
جواد
مشيت وياه وهو وجهه صاير دم
وصلنه لغرفتي سحب الباريه(حصير يصنع من القصب) وفرلشي يدور لكاه شاله من الكاع ملفوف بهدم اليه غيار من اسبح بليل البسه
سعدون
منهو غرر بيك كلي
شواعودوك
احج لاتسكت جواد آمنت بيتي وروحي الك وانت جنت بعيني كفو واطيح كبالي من اطيح شنهي استكثروك عليه وقشمروك احججججججج
جواد صوته بيها بحه خذلان وانسكار
واني ا هيس طلقات جلماته تدك بصدري
اريد انطق وماكدرت اريد افتح حلكي مامش جن لساني انعكد
سعدون
سكتت موش
انت ردت تروح لهلك اليوم كتلي اوكف هنا لاتمشي لما ارد
ام غالب وين صرت سعدون الفطور صار
سعدون افطروا انتم انه ماريد هسه عدي أشغال فتحت الجنطه أخذت فلوس ا كثر من معاشه وطلعت
وصلت الغرفه وأكف على نفس وكفته وع نفس وجهه هااك هذا معاشك وهذن فوكهن فلوس
جواد بدون اي كلمه حسبت جم يوم انه مشتغل واعرف حساب كل يوم بثواني لان حسابي سريع طلعت اللي
سعدون
تقرب لايدي خله الفلوس بيدي
جواد
ربيت اخذ بس حك اللي رايتك بيضا ابو غالب
تعمدت ماكلت عمي
سعدون
ابقه للصبح وروح
جواد
لا همياله اروح
سحبت هدمي وطلعت كلت ابات يم الشط وهو رمضان العالم اضل تروش
كعدت على بلم مخطي ودنكت بچيت لما اهيس عيوني بعد مالهن شوف كلش استهضمت ما صايره بيه
ذكرت حجي ابوي من كال لازم يكوه عودك يلا توكف بوجه الدنيا تنوكل اذا عودك طري
وماكدرت لا افطرت سمعت الملا يصيح سحور نوب امساك وانه ما دش ببطني غير الماي اول ما اجت سياره رحت لأهلي وصلت مغموم مهموم
كلت لأبوي اطلع وياك للزرع شاف وشي مكلوب ماحجه كال امش
وصلنه وأخذت المسحاه منه واشتغل بحركه وابوي يعاينلي وصابط
لحد ما وعيت الا ابوي يذب ع وشي ماي اخذوني للبيت خانكتني العبره
امي تنشد ابوي يكللها مابيه شي جيبلبه لكمه
وكلني ابوي كوه اكله صايم يكلي مالك صوم طيب وصوم.
بقئ وياي وماراح للكاع خلا امي وأهلي يوخرون
ابو جواد شوكت ما تهيس تريد تكلي شجرا عليك انه يمك
جواد
بقيت بليلتها بالبيت وثاني يوم طلعت وي ابوي سولفتله كلشي
ابو جواد. هذا واحد حاطلك الختم بفراشك يردونك تبعد من سعدون موش بعيد كون ظال مو تهد شغلك وتجي
جواد
لو يحطني بقصر عشعوش ماضليش شنهي انه روح لو حديده اهيس ريجي يبس من لكاه سعدون بهدمي وحجيه نار تسعر بروحي كلما اذكر
ابو جواد
فداك الشغل ضل هنا يمنه
جواد بقيت كم يوم رحت لگاطع وسولفتله ع الصار
وبقئ يصفك بيده
گاطع خايب كون انه وياك الا اهطره نصين
جواد
ماله ذنب لكه الختم بهدمي وبغرفتي
گاطع
جا موش يعرفك شنهي جم سالفه سواها بيك وامتحنك شماله شوف ارتاح وانوب اشتغل وياي خير من الله اخير الك
جواد
لا ماكدر اشتغل بقيت بالبيت لو يجيني گاطع
ابو جواد
جواد حجرتك كملت وامك عدها خشالات نجيب محمل (المحمل مثل مكمله لغرفه نوم العروس محمل وسرير حديد)
ونخظبلك ونعرسلك بت عمتك زهره
جواد
لا بويه لا زهره ولا زواج ولا عرس
ابو جواد
شني تضل ماتعرس بكدك انه ماخذ وعدي انت واختك
جواد
بويه خلني سكتت ابوي لان روحي تعلمت على ولايه شغلي يم سعدون جنت اتمنى تصير عدي فلوس ومغازه مثل سعدون
جم يوم واجاني گاطع اهله يحومرن عليه ياخذ بت عمه ومايرضه
گاطع
انه بله زهيه أخذت گلبي انت شمالك اخذ بت عمتك شمتاني
جواد
اريد يصير عدي فلوس وشغل ما اخلي يحتاجون هسه اجيبها ونضل كلنه حلوكنه للهوه عليمن
صرت ادور على شغل
وصلت يم دربونه اليهود بيها يشتغلون كلشي وشغلهم مضبوط ليعرفه ابوي تاجر مال ملابس وقماش وصلنه اسمه داود خشمه نحيف وشعره كثيف وجه ابيض شاحب بس هو من أغنياء الولايه
اشتغلت وياي هواي وابوي وصاني لا تذب روحك بالشغل وتخلي الناس يطمعون بيك على كد شغلك
ولا تأمن بأحد
داود وقت المغرب يعرفنه احنا مسلمين كال روحوا افطروا
نحل قبل الفطور بقيت هيج وبليل يم گاطع
لحد ما اجاني گاطع اليوم
شماله وشك.
گاطع
ولك جويد بصرني زهيه عرست جا انا شماله افادي ما يجابس على مره اهلي يردوني اخذ بت عمي وانه كتلهم اطوها واجيت خليت عمي وابوي يصيحون عليه
جواد
گاطع يرفض يزوج بنت عمه لان يحب بعده زهيه رغم يعرف مالهم درب سوا
مشيت بأيام اشتغل ولحالي بس ابوي ما عافني يجي وراي وينشد عليه يخاف من مكايد الناس
گاطع اجه فرحان لان بت عمه زوجت وخلص من انشده ليا وكت يكلي ماريد مره بعد اكو هيج زهيه تزوجت أكلك تبقئ عزابي
گاطع اي اضل
مر شهر رمضان واجه العيد لا چسوه ولا شي جديد بس
وحياتي ما يتغير بيها لان أجره داود كلش قليله يادوب تسد
لكن امي اول ما تلزم الفلوس تحبهن (تبوسهن) وتخليهن ع كصتها فرحانه بيهن تكول كليلات بس ابني يبات بفراشي مي خالف
اجاني گاطع اليوم العصر من حلينه كال تجي وياي اليوم اروح لمجان ابوي أنظف بمجانه
تواعدنه نروح كبل الفجر شغل ابوه
وصلنه لحد ما طلعت الشمس نغني ونشتغل انه وگاطع واجو العبابره الي يعبرون الناس من الشط العدهم بضاعه
لمحت رجال اعرفه هوه اي
خليف
نزل عليه وسلم عليه حضنته وأخذته من ايده. انت اليوم ضيفي
خليف
شلون كيفك اهلك ماكدر جواد انه عدي شغل هنا تدري من زمن إدريس شغلي ما يخلص سوالفي
جواد كعدنه يم جاي خانه سولفتله كل الجرا عليه هناك بقئ يفر بسبحته
خليف
هسه انت مرتاح هنا
جواد
مرتاح يم اهلي بس مهضوم لان انه ما سويت شي
بقئ بدون كلام بس يسمع وراح
اجت اختي تكعد بيه وكت روحتي للشغل فزيت لبست وركضت متأخر لان نبقى انه وگاطع بليل هواي
وصلت لداود اريد اشتغل وأصبح عليهم وسمعت صوت شلونك جواد
انداريت شتشل
شنشل
شلونك جواد
جواد
تفاجأت بوجود شنشل صار أشهر من تركت الشغل كلت بداخلي عده شغل يم داود
يسولف وي داود ومن شافني اجه وسلم عليه
داود
ابو سلمه خطارك جواد جاي عليك
جواد. هاا هله وكل الهله
أجيت يمه من عرفت جاي عليه مو لداود
شنشل
انه جاي عليك وهسه ترخصتلك من داود اكعد وياك شويه
. جواد
تفضل اذا الك بديرتنه شغله اعتبرها مكضيه
شنشل جا خوش انه جاي عليك وداني عليك سعدون يريدك
جواد. شنهي طلعت نكيصه بعد لو بوكه ثانيه
شنشل
لا يريدك ترد بشغلك
جواد. ليش
شنشل
ترد وهايه هيه
جواد الهاي هيه شنهي سعدون طردني لكه الختم بهدمي وانه ازلمه ماموثوق يردني هم يضل يمتحن بيه مثل اول مره وانوب يصير براسي شي
لا ابو سلمه جيتك على عيني وراسي بس رده ما ارد
انه هلتشوف اشتغل يم وأدم على اقلها يعرفون ابوي شني وانه شني
الديره الغرب مايثمنون لان مايعرفون
شنشل أبني سعدون مايثق لان ا لشافه مو هين ولد عمه ورابين سوه غدروا وهمه جانوا ياكلون بنفس الماعون
ويختبر الناس العنده بس انت اختبرك وأمن بيك وكربك لبيته وعرضه وأمن بس تعرف الشيطان ما مات...
جواد
ما الومه بس لازم مثل ما غربلني كون يغربل العده ويشوف منو سوه هاي العمله بيه
شنشل محد يعلم الغيب يبني العلم بالشوف
جواد وهسه شتغير الختم لكاه بفراشي يردني ليش
شنشل ماعرف سعدون كال تروح تجيب جواد وتجي
جواد اعذرني وجيتك على راسي واليوم بيات ببيتي تضل
شنشل
لا ما اضل عدي فره شكبرها بس عبالي اخذك اروح عدي جم شغله وااردلك بللجن تغير رأيك
جواد لا ابو سلمه اذا لاتتغده ولا تبات ارشد وتيسر ما ارد انه
راح شنشل وانه ردت عبره الهضيمه مال اول ما كالي سعدون روح لهلك
رجعت لشغلي وايام وانه اشتغل بلا كلام ولا عدي صحبه لاي احد غير گاطع هواي اليشتغلون وياي بس حتى من اريد اسولف ع كد شغل وبس
سولفت لأبوي وافقني الرأي ما ارجع
تمشي الايام ركض ركض وصارعيد الجبير وبيها راح ابوي وامي زياره هاي اول مره وانه ضليت بالبيت
اجاني كاطع بقينه برا نتعلل
وبايامها انخطبت ا خت كاطع لابن خاله
ورا كم يوم اجوا اهلي
واروح لكاطع لو يجيني بليل.
رحت اليوم ورا شغلي نشدت على گاطع كالو تلكاه يم النهر رحت
هااا شمضيع
لا يطلعلك عبد الشط
گاطع
هو عبد الشط يخاف من سحنتي (شكلي)
جواد ضحكت وكعدت هاا شنهي اليوم ماجيت عليه
گاطع التفكير جابني هنا
جواد خيرك
گاطع
تزوجت رضيعتي لابن خالي صار مده
وامس اجتنه خطار
تسولف وي امي
وانه سمعتهن
تكللها فضه كلما تكبر عيونها يبينن
تدري فضه بحلنه بت خالي وما أخذت لان عيونها من جانت صغيره صارن رمد شو هسه اختي تكول صايرات مثل العوره وانخطت محد ياخذها
انقهرت عليها جنه نلعب سوه حنينه كلش واحله شي جانت من دونه تستحي وما اطب للشط ويانه
جواد
ام شعر الأسود الطويل
گاطع
اي عفيه هي
جواد اذكر جانت ترمش على السريع وحت من تنظرب ماتحجي بس شنهي مقهور عليه ليش بله
گاطع
الزواج للبت مو مثلنه البنات الماتعرس تضل عله ع أهلها وتصير ثكيله وتتعارير موش مثلنه احنه نشتغل وناخذ شوكت مانريد
جواد الله يسهل عليها خطيه صحيح كلامك
گاطع
انه فكرت وطلعت براي..
جواد
شنهو
گاطع رايح اخذه
جواد صدددك شلون ولك مارضيت ببت عمك تكول عنها شطب ريحان لان تحب زهيه
گاطع
اي لان ماحب بعد أخذ بت خالي اخير
جواد
_گاطع صاحب گلب ابيض وعنده حنيه ماتشبه شكله دمعته رخيصه ورهيف روح بينما شكله
كلشي بيه خشن وضخم واسمر كلش
عارضوه اهله على بت خاله بس بعدين قنعهم لان ابن عمها متزوج غريبه وهي باقيه
قنع أهلها يتزوجها
بقيت ايام وايام نسوي تجهيزاته لعرسه وبفرح نغني وبونسه كملنه غرفته وخطبو ورحنه انه وابوي للخطبه وأهلها كلش خوش ناس
كم يوم وراحت ام گاطع أخذت الجهاز والملا عقدلهم
كملو بشهر كل التجهيز أخذت من امي فلوس اليه ضامهن واشتريت المحمل عليه مرصع بصفر(معدن الصفر ويصير اصفر لونه)
هاي صوغه عرسك
گاطع
شمالك ليش جبت المحمل ولك نريدك تلملم روحك حتى تعرس سوه
جواد انه ما اعرس هسه
لمن يصير عدي بيت من الخشب بيه جام وحلو يلا وكل هلي عدهم كل واحد عده حجره يلا
وصار عرس گاطع الي ما شاف مرته الا بليله العرس بقه ع وصف اخته
زفيناه وهاي اول ليله ما نبقى انه وگاطع
بقيت بالبيت
بس من الصبح قبل لا اروح للشغل امي وصيتها تجيب باجه من الگصاب وتطبخها أخذها لكاطع بصباحيته
صحت يهلعريس نايم لو كاعد
طلع گاطع يضحك وانه الجدر بيدي
خاب هاك تريك
شاف الباجا نزل الجدر وحضني هله جويد انعمله ولك تعبت روحك
جواد موش انه طبخها امي هاا ولك بشر رفعت راسنه لو شنهي بشر
گاطع ولك شمالك موش تعرف كلشي انت
جواد
اضن غموسك دسم
گاطع
امش روح لشغلك اخيرلك
جواد ضحكت ورحت
رحت لشغلي والعصر رديت لهلي ابوي وامي بليلتها بقو يلحون عرس عرس گاطع انت هم نريدك تعرس
جا هي شنهي عدوه زواج ماريد هسه
بقوا يقنعوني وشفنالك بت حموله وبت ناس خيرين واعرف من كرابتنه ابن عم ابوي وكلنه جنه بالجهل نلعب سوه لو بالزرع نلتم بس شايفهن بس من صغار بس يصير البت عمره عشره هلاليه تحسب جداتنه للبنات يكعدن يسمنهن النسوان نحودثهن (يحودثن يعني يهيأؤن البنت تكون شابه يعلمونها النساء الكبار العنايه الشخصية الشعر والجسم يعلمونهن الطبخ والخبز وأمور البيت تدريجيا من تكبر شويه يعلمونها شلون تعامل الزوج لحد ما تنخطب اما مكتوبه لشخص من الصغر او يجيها احد تتزوج هاي الفتره هي متعلمه كل هاي الاشياء وغالبا مايشوفون الزوج والزوجه الا بيوم الزواج)
جواد بقيت اماطل يوميه نفس الشي نزوجك حتى أولادك يصيرون بحلك ويشيلونك وهذا الكلام يوميه
كم يوم واجاني گاطع بقينا نروح لاماكنه ونروحلها انه وياه من داود يقفل مغازته يسافر
ناخذ كسريه ابوي ونروح نصيط طيور دجاج ماي
نتونس لو نخلي نيشان ونضرب انه وياه ونتراهن اذا احد فاز
نضرب بالتفكه مالت الصيد
سألته
هاا گويطع شتكول اعرس حلو العرس
گاطع
والله يجويد انه صحيح گلبي مخطوف بزهيه بس الزواج غير شي
جواد شلون ولك
گاطع يعني العشك مثل طيف حلو ومثل ماتتمناه بس العرس لا واعي وجايس بيدك النعمه الي الله قسمها الك
الله شال مني زهيه بس خلاها بكتر بگلبي (كتر يعني بمكان جانبي)
بس اختك هاي خويه تطيب المصيوب وتحل الحبل للمعكود مالك لازم بالشوفه أفعالها حلوه لسانها تكول عسل الحمدلله عوضني الله بيها اجر من الله نويتها لله أخذها طلعت خايب تعرفك تذكرك تكول جان مشعبث ويذب الرمل على روسنه هههههه
جواد
بقيت صافن على كلامه وعيونه تلمع من يحجي باسم زهيه بس بت خاله الها مجان صاير بكلبه بس كال تذكرك فززني وضحكت لان صدك جنت الم رمل وتراب واذب على شعرهن جنت احب الشعر الطويل وهنه جان شعرهن حلو وطويل أخبث عليهن بجهل
گاطع مثل الي خلاني احب فكره الزواج من فتحو اهلي الموضوع مره ثانيه كتلعم جا خوش كالو بعد الحصاد نروح صادف عد ابوي وكت الحصاد
رجعت اليوم للبيت امي كالت ابوك يكول خله يجيني للكاع من اختي ماخذه غداه كايللها بوكت الحصاد ابوي مايرد وحتى نوبات امي تروح وياه
رحت لكيت ابوي فارش جوه نخل ويمه زلمه ضهره اليه ماعرفت منو كلت الله يجويهم (الله يقويهم يعنى نوع من انواع السلام
تفاجأت سعدون؟!!!!!!
شكرا لزيارتكم عالم روايات سكيرهوم
