رواية زواج لدقائق معدودة الجزء الثاني الفصل السادس 6 بقلم زهرة الربيع

موافقش على جوازك علشان حايشك ليا..هردك لعصمتي  هترجعي من تاني مرت نوح الحاكم واكيد مفيش حاجه هتسعدك اكتر من كده

شروق اتسعت عنيها بزهول من جملتو وسكتت لثواني مش قادره تنطق وقبل ما يقول حرف تاني فاجاتو لما ضحكت بقوه من قلبها لما عيونها دمعو 

وكانت لسه هتمشي وهي بتضحك بس مسك ايدها بغضب وقال ...رايحه فين وبتضحكي ليه..قولت نكته وانا مداريش 

شروق بصت له وهيه بتحاول تبطل ضحك وقالت.... والله لو قولت اجدعها نكته ما كانت هتضحكني كده.... بذمتك هتردني لعصمتك وما فيش حاجه تفرحني اكتر من كده كمان... يا هنايا يا سعدي

نوح بص لها بضيق من سخريتها وقال.... ليكون ما هتتبسطيش ولا كيف ما قولتي لدولي اللي كان يعجبك زمان ما بقاش يعجبك دلوك

شروق قالت بسرعه.... بالظبط كده ..زين انك فهمت اني قصداك ...شيلني من دماغك واصل يا نوح لانك ما بقيتش تلزمني ولا تدخل ذمتي بمليم

نوح ابتسم بسخريه وقال ...ومين بقى اللي يعجبك ويدخل  ذمتك... الارجوز اللي جايباه وياكي تحت ده

شروق لسه هترد قاطعها وقال.... عايزك تفهمي حاجه مهمه تحطيها حلقه في ودنك انا مبقيتش عمدة البلد دي والكل ماشي بامري كده بالحظ... لاه انا في المركز ده لان الكل عارف ان عقلي يوزن البلد كلها باللي فيها.... واللي انتي بتحاولي تعمليه ده مهينفعكش واصل ولا هتستفادي منو باي حاجه

شروق قالت بضيق.... وايه هو بقى اللي بحاول اعمله

 نوح قرب منها قوي وحاصرها عند الباب وقال....بتحاولي  تنسيني بواحد تاني بس مهتقدريش ..مهتقدريش واصل.. لان لو كنتي تقدري تعمليها كنتي وافقتي على سند  ود عمك وكان ميت عليكي... لكن اللي منعك وقتها تتجوزيه هو اللي هيمنعك دلوك ...انا جواكي يا شروق عشقي في عروقك كيف الدم..ساكن قلبك ومتربع فيه

شروق اتوترت قوي من قربه وكلامه ونظرات عيونه بس في ثواني اتبدلت ملامحها واحتل الغضب عيونها وقالت ... عارف يا نوح لو انت لساتك موجود في دمي كنت قطعت شرياني عشان ميبقاش ليك اي اثر جواتي.... انا ممكن اتمنى العمى ولا اتمنى اني ابقى يوم واحد وياك ...انسى يا ود عمي القلب اللي انت بتقول انك متربع فيه احطه بيدي جوه النار ولا افتح لك بيبانه تاني

نوح بهتت ملامحه لما قالت كده ولما شاف الغضب اللي في عيونها اللي  بيلوم نفسه على انه السبب فيه اتنهد وقال... كل ده ليه ...عشان كام كلمه قولتهم وانا زعلان ومتضايق عشان كلام انتي اكثر واحده عارفه اني ما اقصدهوش كلام قولتو وانا محروق على اخوي اللي ابوي وهو بيموت وصاني عليه... كيف مقدرتيش الوضع اللي انا كنت فيه كيف حملتيني الليله كلها باللي فيها ...سامحتي الكل.. الا انا المذنب الوحيد لحد دلوك...سافرتي ومودعتنيش ورفضتي حتى تكلميني في التلفون...حرمتيني منك سنتين وذياده مع انك عارفه عارفه ان من صغرك مكنتش اقدر ابعدك عني يوم واحد ..بالبساطه دي نسيتي مين نوح 

شروق حاولت تقوى وقالت ....الكلام ده ما بقاش له لزوم دلوك ...انا قادره اتكلم  واعاتبك كيف ما بتعاتب... بس اللي بيلوم حد ويعاتبه هو اللي عايزه وانت ما بقيتش تهمني ..انا جايه عشان اقول لك كلمتين ....بعد من نبيل مليكش صالح بيه لاني هتجوزو  فخليها تبقى برضاك احسن ما تبقى غصب عنك كيف كل الحاجات اللي فاتت وعدت غصب عنك 

بقلم...زهرة الربيع

ولسه هتمشي احتدت عينيه بغضب وقال ...انسي الجوازه دي مهتمش وبلاش تتحديني يا بت العم مش في صالحك واصل مش انا اللي يتقالي غصب عنك

ابتسمت بسخريه وقالت بتحدي.... بكره الصايغ جاي السرايا علشان انقي شبكتي هبقى مبسوطه لو نقيت معانا .. انت عارف لاول مره هتشبك واشتري دهب والكلام ده والحاجات الاولى بيبقى لها فرحه واهو تفرح معانا انت برضك كيف ما قلت تحت في مقام ابوي

نوح ابتسم بسخريه وقال....معاكي حق الحاجات الاولى ليها فرحه خاصه علشان كده اول دبله هتلبسيها هتبقى مني 

شروق اتغاظت وقالت بغضب...مش مقاسي يا عمده لبسها لبت الوزير احسن انتو الاتنين اساسا لايقين على بعض والمنضره تشهد

نوح ضحك وقال....انا لولا العيبه كنت خليت الاوضه دي دلوك هيه اللي تشهد...بس انتي الغاليه الطاهره عمري ما المس طرفك قبل ما اردك 

شروق اتكسفت جدا وقالت بغيظ...اتردت الميه في زورك

نوح ابتسم كأنها بتغازله وقرب منها وقال بوقاحه...فاكره القميص الابيض اللي لبستهولي في ليلة جوازنا ...هموت واشوفو عليكي تاني فيه حجات كتيره متمني اعملها

شروق بصتلو بحده وقالت...القميص الابيض اللي قولتلي اني لبساه علشان اوقعك واجر رجلك بيه فكراه طبعا وده يتنسي اطمن هتشوفني بالكفن لابيض قبل ما تشوفني بيه

نوح اتصدم بجملتها ومسكها من درعاتها وقال بغضب...بس سدي بوزك اوعي تفولي على روحك تاني ربنا يجعل يومي قبل يومك

شروق بصتلو بدهشه وهو استغرب كمان نفسو وسابها وبص بعيد عنها وهو بيحاول يهدى وشروق اتملت عيونها دموع وقالت...هملني في حالي يا نوح ...حل عني طريقنا مبقاش واحد  

نوح كان بيتعذب من كلامها بس حاول يقوى وقال من غير مايبصلها....متتعبيش قلبي انا مليش في المناهده....وانتي ملكيش طريق غير طريقي وانتهى 

شروق كانت هتتجنن منو ومشيت بسرعه وسابته وراحت على اوضتها وهيه متنرفزه جدا واول ما دخلت لقت غنوه قاعده بقلق 

رزعت الباب وقالت بغضب شديد وزعيق.... انتي مهترتاحيش غير لما تجيبي رجلينا كلنا وياكي وكمان بتخلي حليمه تشوفك حليمه ما لقيتيش غير حليمه عايزاهم يولعو فينا عايشين

غنوه وقفت وفي ثواني شده سكين كانت على الكمود في طبق فاكهه وحطيتها على رقبة شروق بسرعه وقالت بغضب.... انتي بتزعقي لمين كده يا بت ها بتزعقي لمين ......الكلام ده لي انا 

شروق بلعت ريقها بخوف شديد وقالت....غنوه يعني من خوفي عليكي هو احنا مش في بيننا عشم ولا ايه

غنوه غمضت عينيها وحاولت تكتم غضبها ونزلت السكين وقالت... استغفر الله العظيم يا رب .....صلي على النبي يا اختي كده في سرك ولما تاجي زهقانه من بره ما تتكلميش وياي  واصل

شروق قالت بغضب مكتوم...بقالي سنتين بعالج فيكي يا غنوه ولسه قبل ما يكلموكي تشدي الزفت اللي في يدك دي انا معرفاش ليه كل حاجه ماشيه عكس ما انا عايزه

واتنهدت وقعدت على السرير بضيق وزعل 

غنوه زعلت عليها وقعدت جنبها وقالت..... زعلتي مني ولا ايه مقصديش يا بت ما انتي عارفه اني مبحملش اللي يزعق فيا وبعدين انا احسن من الاول كتير حتى بطلت احطهم في هدومي ..متزعليش مني عاد

شروق قالت بحزن....انا مزعلناش منك يا غنوه ...انا فيا اللي مكفيني لوحدي ...بس علشان خاطري يا بت الناس المره دي اتسترت المره الجايه معارفينش ايه اللي ممكن يحصل

غنوه هزت راسها بالموافقه وقالت..... حاضر والله هخلي بالي اكتر النقاب اتقطع مني من غير قصد ....المهم انتي مالك مين مزعلك 

شروق اتنهدت وقالت.... محدش مزعلني بس مخنوقه شويه 

غنوه ابتسمت وقالت ....عليا انا الكلام ده ...نوح مش كده 

شروق احتدت عنيها بغضب اول ما جات سيرته وقالت.... انا مفهماش ايه كمية الغرور اللي عنده دي... فاكر نفسه محدش قده على الارض

 غنوه ضحكت وبقت تلبس النقاب بتاعها وقالت ....وفيها ايه لما الواحد يبقى شايف ان ما حدش قده دي ثقه مش غرور

شروق بصت لها بغيظ وقالت.... هقولك ايه ما انتي زيه اصلا غنوه ضحكت وقالت..... ما تزعليش نفسك كده ليطقلك عرق وبعدين الجدع شكله واقع مفيهاش حاجه يعني لما تردمي على القديم وتعشيلك يومين

شروق قالت بضيق...ايه العبط اللي بتقوليه ده انتي لاخرى موضوع نوح ده انتهى من زمان...انا هتجوز نبيل الجدع شاري ومشايفنيش ناقصه حاجه زي غيره ....سيبك من كل ده انتي لبستي نقابك ليه رايحه على فين

غنوه قالت ببساطه... هنزل عادي

شروق قالت بغضب...هو ايه اللي هتنزلي عادي ..انتي هتقعدي هنه في الاوضه ومهتتحركيش واصل بعد اللي عملتيه تحت ده 

غنوه قالت بتوتر ....لاه مقدرش  انا اطق لو قعدت في الاوضه من دلوك هنزل اخذ لي لفه بس مش هعمل حاجه تاني والله

شروق مسحت على وشها بغضب وقالت.... يا غنوه ... يا غنوه انتي طول عمرك مستبيعه وبايعه حالك للموت وبتقوليلو  تعالى خدني بالحضن بس حرام عليكي تجري رجلنا وياكي والله نوح عنده استعداد يربطنا مع البهايم كيف ما كان عامل مع ود الوزير 

غنوه ضحكت وقالت.... هو عمل معاه ايه صوح

شروق ضحكت وقالت.... ولا حاجه ابوي حكالي ان الواد غمر منهم تحت وكان هيموت واخته اتصلت على ابوه جيه اخدوه بس ابوي بيقول كانت حالته صعبه ومعتبش هنه واصل بعدها

غنوه ضحكت وقالت.... احسن بالسلامه هي ناقصه قله حيا عقبال ما نلاقي صرفه لاخته ومتعتبش هنه واصل ولا انت رايك ايه 

شروق قالت بضيق....تاجي ولا متجيش انا مالي ما يولعو كلهم بجاز وسخ....اسمعي انا هدخل استحمى واطلع اخد لي نومه لان دماغي هتتفرتك ....متتحركيش من هنه فاهمه

 شروق دخلت الحمام  وغنوه نفخت بزهق وبدلت هدومها ومددت على السرير وبقت تحاول تنام وهي بتفكر في سند والحاله االلي وصلها بسببها هي واخوها وياترى هيبقى رد فعله ايه لو عرف انها عايشه

 كانت بتتمنى تقوله واللي يحصل يحصل ولو كانت وحدها اللي هتتأذي كانت عملتها بس وجود نبيل وشروق معاها وخوفها عليهم هو اللي مسكتها

 عند حليمه طلعت بره البيت وهيه بتتسحب لحد ما قابلت واحد وقالت.... جبت المطلوب

 الراجل طلع علبه صغيره من جيبه وقال .....لحقتي خلصتي اللي اديتهالك المره اللي فاتت متكتريش على الراجل ليطب فيها ونروح في حديد

حليمه قالت بغيظ.... يا عم اتنيل هو انت فيك فايده انت وحبوبك دي لساته كيف الطور يهد جبل وذاكرته حديد فاكر من وقت ما كان في اللفه.... امال فين كلامك ان الحبوب دي هتخليه يضعف وينسى ويتعصب والناس تفكر انه اتجن الا ما شايفه منها حاجه

الراجل قال بثقه. .. ما انا قولتلك يا ست حليمه انه مهيبانش عليه من اول علبه ولا تاني علبه انتي بس امشي زي ما قولت لك و انا متاكد ان الحبوب دي هتوصلوا للسرايا الصفرا بس الصبر 

حليمه طلعت فلوس واديتها له وقالت.....هسمع كلامك ولو اني مش عارفه ليه ياض يا عيسوي حساك كداب كده

عيسوي ضحك و قال.... والله ما كداب يا ست  حليمه بس هو نوح بيه شديد شويه ده شاب في اوائل عمره وكيف ما انتي قولتي كيف الطور يعني مش بالسهل اكده يتهد 

حليمه اتنهدت وقالت....طيب خليك ورا الكداب لما اشوف اخرتها ...بس قولي ياض لو سففتو العلبه كلها تجيب اجله ولا يقوم تاني ويقرفني

عيسوي اتخض وقال.....بس...بس انتي قولتي مفيناش قتل يا ست حليمه

حليمه ضحكت وقالت...ياض بقول لو مالك وشك اتخطف اكده ....يلا اخفى من هنه ومتخليش حد يشوفك وما تجيش هنه غير لما تسمع صوتي في التلفون واكلمك

عيسوي هز راسو بالموافقه و مشي وهي اخدت العلبه ودخلت البيت وهي بتتسحب تاني

 بس وهي رايحه على اوضتها حست بحاجه تحت رجلها بصت على الارض لقت فردة حلق مسكتها وبتبص لها باستغراب بس اتسعت عنيها بذهول شديد وبقى مش مفارق خيالها وقت ما شافت غنوه الصبح كانت لابسه نفس الحلق ده 

الحلقه كان طويل ومميز ومتأكده انها شافتها لبساه بقت ترتجف بخوف وصدمه وقالت... يعني....يعني ايه....يعني انتي هنه صوح يا بت الجزار عايشه  مموتيش كنت متاكده اني شوفتك متأكده

 وراحت على اوضتها بسرعه وهي بتحاول تفكر يا ترى غنوه متخبيه فين في القصر ازاي ممكن تلاقيها 

في يوم جديد كان نوح تحت هو وعمو ومعاهم راجل في الخمسينات وبنت محجبه في العشرينات 

حكم قال بابتسامه.... منورينا والله يا حاج فاروق 

فاروق قال.....بنورك والله يا حج حكم...و لو ان اللي بيحصل ده عكس عوايدنا صوح انتوا جيتوا واتقدمتوا واحنا وافقنا بس بردك اول عزومه المفروض تبقى في بيتنا 

بس مع ذلك مدام الامر يخصك انت والعمده يبقى البيت واحد ومتفرقش

نوح ابتسم وقال.... وانا متأكد ان البيت واحد وانك مهتعملهاش فرق الجيات كتير واكيد هجيب سند ونذوركم ونتغدى ونتعشى كمان....انا بس قولت الاولاد بردك من حقهم يشوفوا بعض قبل كتب الكتاب احنا ناس نعرف الله ونمشي على سنه رسوله 

فاروق ابتسم وقال....اكيد واجب  بردك يا عمده 

حكم ميل على نوح وقال...ما نزلش ليه لحد دلوك انت متأكد هينزل خايف يصغرنا وما ينزلش

 نوح كان بيظهر ابتسامه للناس عكس اللي جواه وقال لعمو .....طب خليه ما ينزلش كده وهو عارف لو طلعت هعمل ايه 

في الوقت ده نزل سند بضيق شديد و بص لهم بخنقه وقعد على الكرسي من غير ما يسلم على حد وقال....ها مين فيكم العروسه 

نوح داس على اسنانه بغيظ منه والراجل وبنته بصوا لبعض بذهول

فاروق  ضحك وقال..... يعني هكون انا يا ولدي مهي قدامك 

سند بص للبنت من فوق لتحت وقال ....متفرقش عنك كتير يعني يا عم فاروق 

نوح خبطه في رجله وبصلو بتحذير وقال بصوت عالي.... منورينا 

وزعق لسماح الخدامه وقال .....هاتي الشاي ولا نخليه شربات 

سند قال بضيق..... لا خليه شاي عادي انا لسه قايم من النوم ومشربت الشاي ولا فطرت

وبص لشيخ البلد وبنته وقال..... انتوا جايين تبيعوا لبن هنه

 نوح ميل عليه وقال بهمس من بين اسنانه.... لم روحك بدل ما اشربهم شاي في عزاك

سند نفخ بغيظ وسكت

و البنت كانت بتبص له بانبهار وكسوف في نفس الوقت

سند بص لها ورفع حاجب وقال بغمز..... عاجبك الطقم صوح... لسه اللي تحته احلى اقلع اوريهولك

 البنت شهقت بكسوف وابوها واقف وضرب عصايته في الارض بغضب وقال .....في ايه يا عمده دي قله حيا دي

حكم ونوح وقفو ونوح رد  بتوتر وقال.... حقك على راسي بس انا شرحت لك ظروفه من الاول

سند وقف وقال بغضب.... شرحت لهم ايه مالها ظروفي شايفني بخنق في الناس ولا ايه 

نوح قال بغضب شديد .....ده انا اللي هخنقك بيدي الصبر طيب يا ود حليمه 

شيخ البلد قال بغضب.... انا هاخد البت وامشي وانت و اخوك اتفاهمو براحتكم 

نوح قال بتوتر...انت تعالى معاي عايزك في كلمتين ...لو مش علشاني ولا علشان عمي علشان ابوي الله يرحمه صاحبك وحبيبك

شيخ البلد اتنهد بضيق ونوح اخده على جنب وبقى يتكلم معاه 

وسند قعد بضيق وبقى يشرب الشاي وهو بينفخ بغيظ بسبب العروسه اللي كانت رغم كل ده لسه بتبصلو باعجاب وعنيها بتطلع قلوب ابتسمت وقالت ....الشاي سخن تحب ابردهولك 

سند رفع شفتو بقرف وقال..تبردهولي..لا انا عديت الخمس سنين خلاص...وبعدين هو اصلا بارد...متلج ...مبيحسش 

فوق عند شروق كانت لبست وجهزت 

وكانت غنوه لسه هتلبس النقاب  بتاعها بس خدت بالها ان فردة الحلق مش موجوده قالت باستغراب.... ما شفتيش الحلق بتاعي يا شروق

شروق قالت ....لاه مشفتوش اجيب لك واحد من عندي

 غنوه قالت بقلق.... لا انا عندي بس عايزه اعرف وين راح 

شروق لسه هترد عليها الباب خبط فتحت الباب وكانت سماح قالت بضيق شديد.... ابوكي بيقول لك انزلي يا ست شروق عشان تسلمي على عروس سند بيه

شروق قالت باستغراب...عروسة مين... هو سنه هيتجوز 

سماح قالت بضيق....معرفاش يا ست شروق نوح بيه جايبهالو  و البت اصلا مش قد كده يعني ما تفتكرش سند بيه هيوافق عليها 

قالت كده ومشيت وشروق ضحكت على شكلها

غنوه قالت..بتضحكي ليه

شروق قالت.... ما فيش اصل سماح جايه وشها مقلوب ومضروب 100 صرمه وبتقولي ننزل نسلم على عروسه سند 

غنوه التفتت لها بذهول و قالت..... قولتي مين.... سند هيتجوز 

شروق لسه هترد عليها بس غنوه دفعتها بعيد عن الباب وجريت نزلت بسرعه 

وشروق جريت وراها وهي مصدومه وبتقول ....غنوه استني يا بت هتعملي ايه يا مجنونه انتي

بقلم...زهرة الربيع

 تحت نوح كان بيتكلم مع فاروق وقال.... يعني انا صارحتك من الاول بكل حاجه يا حاج وقولتلك انو مبقاش زي الاول والدكتور قال هيتحسن لو اتجوز و محتاج نوقف جنبه وانت لما كلمتني قلت لي انك موافق  وانو كيف ولدك وهتوقف معاه 

فاروق اتنهد وقال..... ماشي يا ولدي بس البت اها شافها كده خلاص لو عايزين تكملو هنخلص كل حاجه انا وانت من غير ما ندخلوهم في الموضوع

  نوح قال بسرعه...تمام... كلامك يمشي و.... 

ولسه هيكمل دخل نجاتي وقال بذهول.... نوح بيه فيه واحده عايزه تقابلك مضروبه قوي ووشها مش باينله ملامح 

 نوح بصلو باستغراب وقال....بتقول ايه....وسايبها بره يا جحش خليها تدخل 

بس قبل ما نجاتي يطلع دخلت واحده ووقعت على الارض من كتر التعب وقالت بصراخ.... عايزه ولدي يا عمده خدوه مني ضربوني وكانوا هيموتوني وخدوا ولدي

نوح قرب منها واتصدم بشده لما شاف ملامحها وقال ....جنه ....مالك يا بت فيكي ايه

وجري عليها علشان يقومها وسند اول ما سمع اسمها راح جري هو وغنوه واتصدموا بمنظرها كان وشها متبهدل جدا

نوح نزل جنبها على الارض ونجاتي جاب له ميه بقى يغسلها وشها وقال بغضب رهيب من منظرها .... في ايه ..مين عمل فيكي كده 

جنه نطقت بالعافيه وقالت... اخدو ولدي ...ضربوني واخدو ولدي

نوح قال بسرعه...هما مين..مين اللي مدو يدهم عليكي كده اتكلمي

جنه قالت بتعب.....ولاد جوزي عرفوا ان مصطفى ولدي مش اخوهم عرفوا انه مش اخوهم وضربوني واخدوه مني..في عرضك هيموتوه يا عمده وو وووو