رواية منار والبارود الفصل السادس 6 بقلم مرج البحر

منار:::

خلص كلامه وطلع صعد لغرفته ولا عبالك مسوي شي..اني ارجف والطم ع وجهي..تندمت لو ادري ساكته لو محاجيه وياه لو مصاعده الغرفته سوده بوجهي خسرت كولشي. خسرت كولشي راح الشي الوحيد الي محسسني اني..صح وغيري غلط..اخذ عذريتي..كسر عيني مثل مكال اباوع دمي ع الجرجف لطخات صاير..ارجع افرفح..والطم ع وجهي....بعدين اخذت نفس فكرت اخاف يجي عمو يلكاني ابجي بغرفته والجرجف ملطخ..وعيب عمو يحس صاير شي

بغرفته لفيت الجرجف خليته بالغسالة وفرشت جرجف غيره دخلت لغرفة ملوكة اباوع النفسي بالمرايه الي ع الحايط نفنوفي مشكوك من الطول للطول..وحالتي حالة ودموعي يجرن..مطايقة نفسي كل ما اتذكر شلون لازمني بقوة شلون..اخذ مني روحي بلحظات عيوني يجرن وحدهن..اخذت نفنوف ثاني دخلت للحمام..اغسل بجسمي حيل عبالك اريد اوخر اثار اديه من على جسمي ..بدلت ورجعت للغرفة مخليه ايدي ع حلكي وابجي..ما اريد احد يسمعني لاعمو..ولا الطفله النايمه..بس الله اريده يسمعني..

صار الصبح ودموعي منشفت حسيت عمو بالمطبخ لان من اجه من الخفاره ..ساعة بالثنين كبل دخل الغرفته...

بدلت لبست ملابس الدوام كلت ما ابين شي العمو..لان اذا يعرف مراح يخليني اروح لاهلي..طلعت كعدت يمه:

بنيتي منورة شبيهن عيونج شنو باجيه..

لا عمو..ليش ابجي..بس البارحة بقيت اقره للصبح عندي امتحان..وكل شويه اغسل عيوني حتى ما انام.وتحسسن..

هاااا..على كيفج ويه نفسج بنيتي ليش اتعبين عيونج الحلوات..

عمو راح اروح للكليه..

طلعت عادي صعدت ويه الخط..احس..راسي راح ينفجر..من البارحة ابجي..واليوم لازم ابين طبيعية دخلت للكلية بس مدخلت للمحاظرة منتظرة تصير الساعة بثمانيه ونص حتى اروح لبيتنا لان..بابا واحمد يطلعون للمحل هيج وكت..صارت بثمانيه ونص رحت لبيتنا تلكتني ماما:

هااا..منار..يوم شعجب جايه..الصبح..شبكتها وبجيت:.

يوم..حضنيني خليني يمج..

شبيج يوم خوفتيني..

يوم بس حضنيني..

حضنتني :.

يمه اسم الله شبيج منورة احد مأذيج متعاركة ويه رجلج..

يوم لتكولين..رجلي..هذا وحش..حيوان..ما اريده اريده يطلكني..

يااااا..اسم الله يطلكج شنو استهدي بالرحمن كل الازواج يتعاركون ويتصالحون..

يوم ما اريدة يصالحني اريده يطلكني....

دتعالي خلي نفوت جوه ارتاحي واحجيلي..

دخلنا جوه فكرت شكولها اكولها بلي صار البارحة بس شلون اني كايلتلها قبل احنا اتزوجنا بالفندق..

يوم شصار ضربج ..مصعب بس احجيلي..

يوم ممتفاهمين هو عصبي يصيح ويضرب وميحترم..اني ما اريد ابقه وياه..

لا بنيتي شنو تتطلكين هسه الناس تكول مصارلها شهر واطلكت ويخلون بيها الف انه...من يجي عليج اني احجي وياه..بس لتحجين لابوج ولاخوج وتكولين زعلانه..كولي مسيرة..لو ماره بيكم افتهمتي..

يوم اريد انام منايمه من البارحة راسي راح ينفجر..

نامي بنيتي..نامي غطتني نمت مدريت بالدنيا بعد..كعدت ع صوت موبايلي باوعت الساعة بالثنتين الضهر..بس موبايلي بيه 22مكالمة برقم غريب..يدوك..فتحته..

الووو

وين انتي لج..

مصعب..

اي صخام..وين انتي هسه..

اني عند اهلي وبعد ما ارجع..اليوم تجي اطلكني..

ههه..منو يكول!!

اني اكول..

دكافي زمالة..تكول طلكني شنو هيه لعبة!!

اي لعبة..مو البارحة جنت لعبة باديك هسه كمل اللعبة وطلكني..؟؟

ومنو يقرر..الطلاك..انتي!!؟

اي اني..

متأكدة؟

اي..متأكدة وياريت تستعجل؟

ماشي هسه اروح لابوج احجي وياه ونفضها..بس انتي الخسرانه..

لا والله اني الربحانه لان التعيش ويه واحد حقير وسافل مثلك..تخسر كولشي..

ها..يعني تعرفين اني حقير وسافل..يعني كولشي يطلع مني!

شتقصد؟

اقصد من اروح لابوج..هسه يسألني ليش تريد اطلك..بنتي..وبما انه اني حقير وسافل راح اكوله والله عمي لهنا وكافي صارلي شهر متزوج بتك..بعد ما اكدر اخليها ابيتي..اني. سويت العليه سترت عليها..لان لكيتها مو بنيه وبقيت كل هالوقت ساكت حتى استر على عرضكم وبعد ما اتحمل لازم اطلكها..

سكتت بقيت صافنه هذا..شيخرط..

كتله:

انت شنو من بشر!

اني مو بشر..اني حيوان على كولتج!!

بس..بس لا..لا انت متخوفني متكدر تسوي هيج!!..

لا اكدر اسوي هيج وحد سافل وحقير وحيوان توقعي كولشي منه..صح راح تصير طلابه واحتمال تصير مال عشاير بس بالنهايه راح تنفضحين انتي واهلج على خالي بلاش..وانتو مناقصين فضايح!

مصعب..انت شتريد مني..مو كافي..الي سويته..مو اخذت مني اعز شي عندي..مو كسرت كلبي وعيني ودمرت كولشي حلو بداخلي..بعد شتريد

اريدج هسه ترجعين للبيت مثل الحبابة..ها..وترجعين بسكته وبهدوء..

ليش تريدني ارجع..بعد شتريد مني اكثر..

معليج شريد منج..استري ع نفسج وع اهلج ورجعي مثل الحبابة..وتجنبي شري..ترة لحد الان مشايفه وجه الشر مالتي!

 وجه الشر؟ لعد الشفته منك شنو!..الله ياخذك      

اصلا بعدج كولشي مشفتي..يالله ارجعي للبيت

سديت التليفون..

كعدت ابجي هذا صدوك يحجي يجوز صدك يسويها ويتبله عليه غير بابا ينجلط اذا صارهيج شي..

كمت رحت لماما..كتلها:

يوم راح ارجع لبيت عمو ابومصعب 

جان بابا يدخل للمطبخ:

هله منوره..شو مشفتج من اجيت..

رحت يمه:

هلو بابا جنت نايمة..اليوم ماكو محاضرات كلت اخلص الصبيحية يمكم اشتاقيتلكم..

تشتاقلج العافيه بابا بشري شلونه مصعب وياج.

ها بابا..زين..مصعب..كولش زين..عصبي شويه بس كلبه طيب..

اي هو العصبي دائما كلبه طيب..

بابا راح اروح..

اي غير تتغدين يابابا..

مو عمو خابر يكول تعالي تغدي ويانه..

ها يعني صار.عمو احسن من عدنا..                

لا العفو..بس تأخرت الساعة فوك الثنتين..

ماشي باباتي خلي احمد يوصلج..

لا بابا شدعوة همه بالشارع الثاني اروح مشي..

بكيفج بابا 

طلعت من اهلي كوه..حاصرة دموعي وصلت لبيت عمو.. لاكاني بالباب:                                       

شو تأخرتي اليوم عمو..

هااا..موكتلك عدنا امتحان والاستاذ سوالنا محاضرة اضافيه..

فوتي بابا تغدي..اكيد هلكانه من الجوع..

لا عمو تغديت بالكافتريا مال الكليه..

دخلت لغرفة ملوكة سديت الباب ملوكة..تلعب بالصاله..

شوية وشفت الباب انفتح..شفته واكف منتجي ع يده الباب يباوعلي رفعت راسي مسحت عيوني..ابتسم باستهزاء وطلع..وسد الباب..

ومرت ايام اجازته بس احسن شي سوا هو محاجاني ابد ولا سألني عن اي شي يدخل ياكل ويصعد لغرفته..ابد مصار بينا اي حجي برغم احنا بنفس البيت بس مرات التفت الكا..يباوع عليه بسرعة يسوي نفسه يباوع بغير مكان اني هم ما اكدر اباوع بعيونه هوايه مدري..شبيه يمكن مكسورة عيني صدوك يمكت ما الي كلب..اشوفه كبالي..ورغم كل هذا اني مكرهته غير المفروض اكرهه يربي ما اكدر اكرهه..ما احبه بس ما اكدر اكرهه..احس الي بداخلي اله فد شي يختلف عن الحب والكره..وباخر يوم اجازته جان نايم طول النهار..اني جنت اقره لحد 12بالليل استغربت شفت عمو دخل للصاله بس وجه..اصفر..كوه يمشي دخل للمطبخ قلقت شبي عمو خفارته يوميه بالثنتين تخلص..اشو رجع من وكت وكبل دخل للمطبخ..كمت وراه شفته امدد بالكاع وبطل المي بيدة والثلاجه مفتوحة..يااا..شبي عمي..رحت يمه..:.

عمو..شبيك..عمو..حاجيني بس امدد عبالك ميت..وميتحرك.ما اعرف شسوي ركضت صعدت ردت ادخل اصيح مصعب بس قافل باب غرفته كمت ادوك بالباب حيل مثل المخبلة..واصيح..ودموعي يجرن:.

مصعب..مصعب اكعد عمو مدري شبيه..مصعب..اكعد

.اكعد....

هو كعد فتح الباب شافتني اصرخ باسمه وافرفح دموعي يجرن:

شبيج..منار!

عمو..عمو مدري شبيه واكع بالمطبخ يتنفس بس ميتحرك..ركض نزل..واني اركض..وراه..

وصل يم عمو..اني كمت اصرخ:

مصعب..شبي عمو..مصعب اخاف مات..

لج اسكتي لتبجين مابيه شي..غيبوبه سكر..

شاله واخذه للسيارة..

ركضت:.مصعب اروح وياك..

لج فوتي جوه..ماكوشي هسه..نرجع..

وعافني افرفح وطار بالسيارة..اتصل عليه ميجاوب..وره ساعة جاوبني:

مصعب..شبيه عمو..حاجيني:.مابيه شي..كعد كتلج غيبوبه سكر..

ليش هو بيه سكر..

اي بيه سكر..

بس مكلي..

اي هو ياكل كولشي ميتحامه باقي ع العلاج..واحتمال نسه ياخذ علاج..وصارت عنده غيبوبه..مو اول مره تصير بيه..

يعني راح يرجع مابيه شي..

اي فد ساعة لخ ونرجع....روحي نامي.

لا ما انام الى ان ترجعون

وره ساعة رجعو..مصعب سانده دخله لغرفته..وكعد بصفه...

اني كعدت يم رجليه موكفت دموعي هو خله ايده ع شعري..

اسكتي بنيتي لتبجين..

عمو شلون ما ابجي..وكعت كلبي..

نسيت اخذ علاجي..تخربطت..ورجعت للبيت رغم اخذت من الصيدليه بس لان تأخر العلاج وكعت..هسه تتعودين عليه..

لا عمو اسم الله عليك..ان شاء الله بعد متنعاد..

روحي نامي بنيتي..

عمو وجهك اصفر اخاف جوعان...اسويلك شوربه..

بابا راح تصير بتلاثة ياشوربه نص الليل باجر..عندج دوام

لا عمو هسه اسويلك..ورحت ركض امسح بدموعي وسويت شوربه ..وجبتها كيفت من اكل الشوربة..ونام..طلعت من يمه باوعت الساعة بالاربعة الاربع..شفت مصعب مبدل ملابسه العسكرية ونازل وبيده جنطته..

وكف يمي:

منار اني..رايح..ديري بالج ع ابويه واكدي عليه ياخذ..علاجه بوقته واذا صارت هيج حاله لترتبكين ولتبجين اتصلي ع دكتور محمد..حسان موجود رقمه بجهاز ابويه هو يجي للبيت ويسوي اللازم..

يصير اتصل ابابا ويجي ياخذه للمستشفى.

بعد احسن..

ماشي..وديري بالج ع ملاك ما اوصيج عليها..

ماشي لاتهتم....

مشه خطوتين والتفت عليه اجه وكف..كبالي..خله جنطته بالكاع..استغربت صارقريب مني..رفع راسي وخر شعري عن وجهي اني مبهوته هذا شديسوي..اتقرب مني باسني ع عيني اليمنه ..وع عيني..اليسره ..وحضني هيج بحنان..اني بهتت..اكثر ما اعرف شديصير عبالك مسطورة..وره دقيقه وخرني ابتسم بوجهي..يربي اول مرة يبتسملي هذا شبي...بعدين دنك شال جنطته وطلع من..باب الصالة اني ركضت اريد اكوله ليش هيج سوه بس مكدرت احجي بعدني مثل المصدومة..بابتسامته..بقيت واكفة يم باب الصاله وصل للباب الخارجي هم..التفتلي..وابتسم بس عيونه جانت بيها نظرة غريبة حسيت كلبي انقبض عبالك ديودعني..عبالك رايح وبعد ميرجع للابد..يربي شبيه مصعب وشنو هاي النظرة الي بعيونه والابتسامه الحلوة..

شفته طلع من الباب وسد الباب وراه..كلبي حيل انقبض اكثر واكثر..واكول لنفسي لا ماكو شي..ماكو شي احتمال حضني حتى اداري عمو وملوكه..بس لا..لا جان اكو ..شي مختلف بوداعة الي..حسيت كلبي طلع من صدري من طلع من الباب مشيت دخلت جوه..اكول لنفسي ليش باسني بعيوني..جنت اسمع البوسات بالعيون فال موزين..بالوداع..واليبوس..بالعين يعني رايح وبعد ميرجع..ربي..شديصير..اسم الله عليه..اسم الله ع شبابه اسم الله ع عيونه الحلوة..هسه اني شبيه نخبصت شبيه هيج افكر اعوذ بالله من الشيطان الرجيم..يا الله برد كلبي....

برد كلبي..وابعد هاي الافكار من راسي وان شاء الله يرجعلي سالم غانم بجاه كولمن عنده جاه