رواية هشاشة قلب الفصل العاشر 10 بقلم العباديه

‏"كَـان الأمـر صـعبـاً للـغايــه

يُشبه التـحدث بعد ركـض طوِيـل."

~~~~~~~~~~~~~~~~~~~~~~~~~

حسيت صفطت يمنه سياره ظليت اتراجف وجسمي كله يرتعش .. 

مااگدر ألتفت خاف يطلع شخص يريد يخطفنه النوب شأسوي وين ادگ وين الطم .

إلتفتت صفح باوعتلهه بس طرف عيني لمحت السيارع هاي سيارة أسماعيل يمه دخيل بختك نقذتني .. درت وجهي بأكمله ورحنا ع السياره بس شنو شصاير بيه .. وجهه صاير أحمر وعصبي وشرايينه بارزه مبين شافه .. رأساً اشرلنه ع السياره وطلع راسه من الجامه 

نتر ؛-

- اصعدددن بسررررعه

صعدنا وهوَ التفت علينه وعاط

- شكال هذا؟؟؟

رأساً كتله :-

- ماگال شي 

- ثُريا لاتخبلني كال شي بس شنو؟؟

- انتَ شلون شفته؟

- ولدد واعرف سوالف الولد 

- ماادري شگال

- حسابي وياجن مروه وثُريا اوصل وشوفن شأسوي ظلن لاتحچن .

ظلينا نتراجف اني ومروه ووحده تباوع بوجه الثانيه احنه شعلينه اني مالابسه سمائي ولا مروه . بس فدك لابسه قميص سمائي مشطب 

فدك نقضتنه من كالتله :-

- اسماعيل هوَ صچمني البنات ماعليهن واني ماعرفه ولد عابر بالشارع قابل كايلتله

- شگااااال؟؟

- مااگدر اگول شگال 

إسماعيل...فددددك شگااااال؟؟؟؟

دنگت وكالتله

- هيج قلد على لبسي 

اجت عينه بنفس المكان التصجمت بيه لان صدگ مضبوبه ضب وهيَ من راحت لابسه عبايه بس من رجعنا ذبتهه لان توصخت حسب كلامهه .

عاط بيهه

- هذذذاااا لبسسس هذذذا؟؟؟ حقه يصچم ولو ساحبج بالشارع ماألومه هسه هيَ البنت تنتبه للبسج ف كيف الولد ؟؟

فدك.. معليك بلبسي اهلي يعرفون بيه

- ماكو اهلج هسه انتِ بمسؤليتي اني جبتج واني ارجعج مو مال تطبقين عليه ذني السوالف مال اهلي وولي امري فهمتتتيي وبعدين ليش نازعه العبايه وتدرين بلبسج مضبوب وجسمج يجيب التايه ؟؟

ظل يرزل بيهه ونزل عليهه دوسه ونص ..

ظلت تبجي لان حست بغلطهه وإسماعيل كلش أنفعل وجهه صار احمر ومعصب حيل 

فدك.. اني شدراني يذب حچي عليه وبعدين نزعت العبايه لان ضايقتني وماكدر امشي بيهه كلساع اتعثر

إسماعيل... هـه !! خوش حجه

- اني مامجبوره اجذب عليك لامسؤل عني لاابويه

- كاافي اسكتي مااسمع صوتج امسحي دموعج وهذا آنه إله والله أعلمه 

اني رأساً گتله

- إسماعيل وين تعرفه؟؟

نتر بيه :-

- شعلييج

مروه تقربت يمي وحاصره الضحكه تستهزأ بيه الحقيره .. همستلي :-

مروه.. احسللج هيج؟؟

- وسم عود اني واسطتي قويه يمه عبالي يكلي بالحقيقه عود إلي خاطر وكذا تالي فشلني تعلم من ابو خاولي

- والله تخيلاتج واسعه حييل 

- اششش اسكتي انهديتي البنيه تبجي ع الاقل سكتيهه يالعاقله

وصلنا للبيت وإسماعيل ظل مغندب وهاي الثانيه گضتهه بواچي شلون إسماعيل رزلهه وهيَ المدلله مال اهلهه عشتو . خالاتي كلهن مدرسات ووحده دكتوره وحالتهن عالي العال .

ظلت متكأبه اليوم كله وماتحچي وي أحد لما صار الليل دكت رجلهه الا تمشي بالليل ماتذكرت حضرتهه تريد اهلهه الا بالليل .

إسماعيل عاند وكال مااوصلهه خل تركع راسهه بالحايط .

هيَ سمعت هيج وظلت تبجي وتصيح اريد اهلي

اني لزمتهه تحشيش

- اوكفي اوكفي خل اخابر خالتي اكلهه تسويلج حليب بمميه وتدزه الج

- ثريا مو وقتج مااتحمل اكعد لحظه وي هذا المعقد 

- عمت عينج اذا اخييي معقد عمي انتِ ماتشوفين لبسج 

- ثريا مو وقتج والله مو وقتج روحي طافره 

- اوكفي خل اشوف حسن اذا يقبل ياخذج

همست :-

- لا أريد إسماعيل يوصلني

تخصرتلهه وباوعتلهه بشك 

- ها شكو ليش إسماعيل؟؟ مو توه جان معقد

- لج لا مو بلكي يأنبه ضميره ويعتذرلي

- وشتستفادين من يعتذرلج؟

- يرجعلي قيمتي

- تره إسماعيل ماماكل قيمه من محرم .. ان شاء الله بس جيرانه يطبخون انه اگله يجيبلج

- اهووو عوفي القيمه روحيله خل يوصلني

- يلا رايحه لخاطر دمعاتج خطيه كسرتي خاطري

رحت لغرفة إسماعيل .. هوَ بيتنه اربع غرف وحده إلنه البنات واثنين للولد إسماعيل وحسن سويه.. وموسى وحمزه سويه وامي بغرفه .. الاستقبال احسن شي ببيتنه .

دكيت الباب على اسماعيل والبلوه هاي تتصنت علينه ساحله روحهه چنهه ثُرىٰ ام گصايب .

طلعلي اسماعيل وشكله كله معصب وعيونه بعدهن حمر حتى خفت منه ردت اشرد وارجع لااهيلتي بس بعد صرت بموقف ماانحسد عليه

كتله لبگ ع السرعه .

- اسماعيل فدك تريد تروح لااهلهه تعال وصلهه تبجي على امهه تريد مُلهي 

خزرني يممه وعلي ردت اشرد بس مدري شخلاني صامده وواگفه مقابيله وادري بيه من يعصب دربه مايندله .

إسماعيل.. ثُريا روحي كليلهه مااوصلهه لو ترگع راسهه بأربع حيطان واذا طلعت من الباب اكسر رجليهه 

- يح .. شبيك سمعو ؟؟

- ثررررررييااا روحييي راح اطلع حرگتي بيج

- اي اني هذا حظي ياهو اليجي يريد يذب حركته بيه 

كلت كلمتي واطفر ..شردت للغرفه هيَ سمعته من كال هيج خلت وخنست بعد ماسمعت صوتهه والله وطلع اسماعيل خالسهه مثل ما ابو الرزايل خالسني .

تدثرت ونامت وظلت بدون عشا .. سوينه العشا وإلتمينا اول ماگعدنه إسماعيل باوعلنه كلنه كأنما يتفقدنه هسه لو ابو الرزايل بيهه مجال بس مو ابو گزگوزه .

رحت كملت المحاضرات البقيه .. وشويه واجتني طالبه كالتلي :-

- دكتور ماهر طالبج بمكتبه

- اني؟؟؟؟؟؟

- اي انتِ ثُرىٰ مو؟؟

- اي اني بس شيريد مني؟

- يريدج مااعرف شيريد

يمه إجاك الموت ياتارك الصلاه اكيد شافني بمكتب ابو گزگوزه .

دكيت الباب واني مستعده على أتم وجه للرزاله . 

سمعت صوته معصب من كالت تفضل .. دخلت بس اختلست . يمه ويهه مايبشر بالخير 

اول مادخلت كاللي بنتر؛-

- ثُرىٰ سؤال واحد جاوبينياه؟

- اي استاذ تفضل

- شتسوين بمكتب استاذ احمد

هوَ ده المتوقع .. يعني توقعته يسأل هالسؤال ومحضره نفسي الحمد لله

- أستاذ لفيت الهدايا وياه

- ليش ماكو غيرج مثلاً؟؟؟

- مااعرف

- اكو مية طالب يروح ويساعدونه والشباب اصحاب نخوه وانتِ شلون تدخلين بمكتبه هيج بدون علم احد؟؟ هسه شيكولون عليج؟؟

ظليت ساكته ومدنگه مااعرف لساني تلّيم اخ لو مخليني مجاوبته وبس ساكت ومنطيني مجال الا اغردله تغرد 

رأساً نتر :-

- ماتحجين انخرستي؟؟

يمه هذا شنو كاعد بأفكاري اعوذ بالله .. اشو كلما افكر بشي يطبقه شنو الموضوع راح يخبلني

- لا إستاذ ان شاء الله ماتتكرر

- ثُرىٰ حالياً صرتي اقاربي وبيناتنه صلة قرابه ف اني احذرج من هالباب تريدين تاخذين نصيحتي ك دكتورج او ك قريبج .. إستاذ احمد ابتعدي عنه 

هزيت راسي بقبول ..

أردف

- فهمتيني؟؟

- اي اي فهمتك إستاذ 

- تمام يلا هسه روحي وبعد لاتدخلين لأي مكتب حتى لمكتبي 

- اي

هذا طردني بس بنزاكه عود يكلي لاتجيني بعد ايا نذل ..

نرجس.. ها شيريد

- نذل .. صدگ نذل والله إنك نذل 

- يا شبيج شكلتي

- امشينا للكافتيريا اريد اشرب عصير .. عصير اريد اشرب .. اريد اشرب عصير 

- يا يا شبيج مشكله اليوم يمه اسم الله البنيه تخبلت

- امشي ولج

رحنا للكافتيريا وظلينا نسولف لما تصير وقت طلعتنا اني واستاذ ماهر .. ايباه والله فخامة الاسم تكفي .

~~~~~~~~~~~~~~~~~~~~~~~~~~

ماهر 

إسمي ماهر دكتور بجماعة ذي قار قسم العلوم الفيزيائيه .. من اني صغير احلم اصير دكتور واهلي ساندوني وحققت حلمي .. بس صار تعييني بالناصريه ف اضطرينه ننتقل من بغداد للناصريه علمود احقق هدفي .

اول سنه عدت على خير .. بس ثاني سنه من شفت طالبه ملامحهه طفوليه وحتى تصرفاتهه كلش استفزتني ومرات ينكسر خاطري عليهه وعلى فطرتهه .. ارزل بيهه لايفيد .. افشلهه لايفيد .. قصدي كله بهاي الرزايل بلكي شويه تستعدل وتمشي عدل بس ياحيف والله ولامشت عدل ظلت نفسهه نفسهه .

وجهه دائري أنف نحيف يعتلي عينان واسعتين .. شفاه بارزه .. وأسنان صغيره متلألأه وجذابه .. بشرتهه بيضه وبيهه ملامح طفوليه وخصوصاً ضحكتهه . ماادري ليش ميزتهه عن كل طالباتي واحب احجي وياهه تضحكني رغم ضحكتي مثل الهلال مره بالشهر تنشاف ..

حبيت اغير من شخصيتهه واخليهه شويه قاسيه حتى تكدر تعيش .. بهاي فطرتهه ماتعيش وي هالذئاب لو تأذن بالجامع

~~~~~~~~~~~~~~~~~~~~~~~~~

ثُرىٰ

قبل وقت الطلعه رحت للاداره علمود ابو الزرايل داز عليه. لكيته بالاداره واكف عبالك منتظرني .. اول مادخلت كال :-

- ها شنو اوصلكم لو لكيتوا خط؟

- لا والله إستاذ معتمدين على الله وعليك

اني كلت هيج وهذا ظل يضحك من اعماقه ومصدك يضحك .. هسه اني شگلت ابنل ابنل .

باوعلي مبتسم وكال

- لعد شلون؟ اني عندي شغل كلش مهم ولازم اطلع بسرعه لان العميد اليوم موكلني مكانه تعرفين .

عرفته جاي يخبث وياي لان شافني بمكتب ابو گزگوزه والله ويريدني ارجع وحدي ابو خاولي

- لا استاذ اروح وحدي عادي

- لا يابه شنو وحدج بس هسه اشوفلج دكتور يوصلج

ظل يفتر عليهم كلهم وكلهم مشغولين ويطلعون مية عذر .. بهاي الحاله حصرتني البجيه حسيت نفسي انذليت واحد يذنبي ع الثاني استاذ قاسم يصيح (والله حالف اي طالبه مااوصل) واستاذ عزيز يصيح (خل يوصلهه استاذ عصام) .. كام واحد يشمرني ع الثاني .. كله من وراك اسماعيل ليش ذليتني ..

اخر شي طلعت من الاداره صاح وراي

- ها وين رايحه؟

- اخابر اخويه حسن يجيبلي تكسي ويجي

- لا اني اخابره

- لا لا اني هسه اتصل عليه

جذب اني متوجهه لمكتب إستاذ احمد ماكو عندي حل غيره .

بعده بمكتبه لان دائماً يتأخر ..

دكيت الباب وسمحلي بالدخول ..

دخلت وهذا وكف مكيف وطاير ويرحب بيه اني لعبانه نفسي منه بس على عناد ابو الرزايل والله لااخليه يتشعوط

كال؛-

- ها ثراوي خيرج؟

عزززا صرت ثراوي يمه من شوكت هاي ؟!!

- استاذ والله اخويه سافر لغير محافظه وولا استاذ يقبل يوصلني لااهلي بلا زحمه عليك اذا ماعندك شي وصلني بطريقك

- تدللين عيوني الج بس يصير الوقت تعاليلي واني اوصلج

- تمام .. شكراً استاذ ماانسى معروفك 

- لا لا هذا واجبي

طلعت من مكتبه واني شعور خوف داخلي .. ماادري شسويت ومادري شجاي ألوص بدل مااكحلهه عميتهه .

صار وقت الطلعه واني رحت لمكتب استاذ احمد لكيته يقفل بالدولايب .. رأساً ضحك واشرلي ع الباب وكال

- جاي جاي اطلعي كدامي سيارتي تلكيهه بباب الكليه اوكفي يمهه ودقايق واجي

رحت وكفت يم سيارته ومنتظرته شوكت يجي .. 

لحظات ووكفت وره سيارة ابو گزگوزه صفطت سيارته بس بشخط مبين مال واحد محترك ولزم بريك قوي بحيث صوته طلع 

طلع راسه من الجامه وصاح :-

- تعاااااي تعاااااي

‏أنــا لا أريـد مُجـرد البقـاء حـيـاً . 

أُريــد أن أعـيــش .

‏~~~~~~~~~~~~~~~~~~~~~~~~~~~~~~~~

ثُرىٰ

لحظات ووكفت وره سيارة ابو گزگوزه صفطت سيارته بس بشخط مبين مال واحد محترك ولزم بريك قوي بحيث صوته طلع 

طلع راسه من الجامه وصاح :-

- تعاااااي تعاااااي

يمه متت من شفت شكله معصب وعروقه بارزه خو العيون يبوووو الله لايراوينياهن لو معميه بهاللحظه احسللي .

من الخوف تصنمت وبقيت واگفه بمكاني لااروح ولاارجع عبالك صنم هندي .

نتر بصوت شبه عالي :-

- ماتجيييين؟؟؟؟؟؟؟

رجليه وحدهن تتطاگگن سويه وركضن يمه وكفت مقابيل سيارته واني ارجف .. يرعبني حيل إذا يعصب .

بدون مايباوع بخلقتي الجميله گاللي :-

- إصعدي ع السريع

فتحت الباب وشمرت دقله بالسياره بحيث التنوره تلفلفت تلفلف صرت عبالك قرنابيطه .

گعدت واعصر بأصابعي وهوَ زايط ابو عكروز .. كلساع اخطف عيونه بنظره من المرايه الي بالوسط .. من شافني كلساع اخمطلي نظره طلع نظاره شمسيه ولبسهه !

شكد نذل حتى من هاي حرمني الحقير .

بس من طلعهه عبالك صنم صيني وهوَ يسوق إيده تسللت وطلعهه وچكهه على عيونه خفت هالعيون الزگل .

يسوق سريع ابو فنتيخه عود معصب .. واني شلون مااحب السريع مكيفه وطايره وأضحك .

ظليت اطگطگ بأصابعي لان گامن يوجعني .. كل إصبع اطگگه مرتين .

من سويت هيج تخبل .. رأساً نتر :-

- أصابعج !

سويت روحي غبيه گتله بفهاوه :

- ها؟؟ شبيهن؟

احسه گوه مقاوم مايلكمني ببوكس نتر:-

- لاتطگگين قلقتيني

عين وعماد لزمت إصبعين وطگگتهن .. إلتفت عليه وهوَ يسوق خزرني حيل ورجع إلتفت يسوق .. يمه هيَ لحظات بس غير متتت من الخوف .

ظليت مثل البزون الضام راسه مدنگه راسي وخزرته تتكرر ببالي .

هسه شعليه هوَ غير أصابعي يوجعني وطگگتهن بكلشي حاط خشمه .

همس بغضب :-

- ثُرىٰ انتِ تعانديني لو شنو؟؟

يمه هذا عن شنو يحجي بسرعه گتله :-

- اني؟؟ لا لا ابدد

- لعد شيسموهه من رحتي لمكتب احمد؟؟ ممكن اعرف؟؟

اجيت اگله مو ممكن بس خفت من الراشدي لايجيني طياري ثلاثي الأبعاد .

گتله :-

- اريده يوصلني لان بس هوَ عنده غيره 

وگف السياره بقوته بحيث حسيتهه انشخطت بالگاع . دار وجهه عليه نزع النظاره وطلعن العيون ويلااااه .. والخزره بعيونه تجدح .

نتر بصوت عالي :-

- شنو قصدج اني ماعندي غيره؟؟؟

ظليت امتمت ومااعرف شنو احجي !

- لا والله لا بس ماادري شنو شعوري من كلكم واحد يذبني ع الثاني وعبالك هم ثقيل وگعد على گلوبكم

عصب ووجهه صار أحمر 

- اني ردت اسويلج گرصة إذن من احمد تروحين ترجعيله ليششش؟؟

سكتتت.

همس بصوت غاضب :-

- بسيطه

ظليت ارجف وسكتتت مااكدر احجي كلمه .

وصلني للبيت بس شنو سياقه مال واحد يريد ينتحر بيك .

بسرعه نزلت لااهلي اركض واصيح بگلبي

- هلي يامن ضيعوني 

دخلت للبيت ألهث من الخوف .. بس الگعده وياه بنفس المكان توترني وتقلقني .

إسماعيل بعده ماجاي واني دخلت عطت بأخواني عشتو

- انتم زلم مشوربه شبيكم ماجيتوني ماكلتو هاي العجيز خطيه تظل وحدهه 

حمزه.. والله اني عندي دراسه

موسى.. واني چنت بالشغل

حسن.. ماخابرتيني من دكتورة أسماء

- وين حافظه رقمك وبعدين منيلك موبايل

- ثريا انتِ مطفيه شبيج؟ صارلي شهر اشتريت صرصور بعينج

- ياا صدك جا ماتنطينياه العب حيه

- لا لا جذب مااشتريت اتشاقى وياج

- ديلا ميته على حيتك خل اروح ابدل وباجر انتَ توصلني 

- اي صار

- اوف والله ياسمعو مكانك خالي وين خليتنه ورحت چني تايهه مثل العميه بلياك

- امشي ولج واحنه مو بعينج؟

- اي بعيني وهل اشوفكم وصلتوني ورجعتوني .. ذله بحياتي ماانساهه مدرس يشمرني على مدرس وانتم هنا مكركحين

- غير وصينه اسماء

- شعليهه بيه ابتلت واصلاً مو هيَ توصلني استاذ ماهر 

- اي مادام ماهر هاي هيه صار گرايبنه بعد

- لا عمي مااريد انتَ تجيني باجر

- اي اي اني اجي بس اسماعيل يمكن يجي بالليل 

- لا خطيه يجي تعبان ويروح يبتلي بيه 

- بكيفه بعد 

- يلا خوش 

رحت للغرفه سولفنه شويه اني والبنات لما صارت الساعه بالـ2 ونص واني مانايمه صخام بويهج ثُررىٰ .. ركضت تدثرت بديباجي ونمت لان اذا أسهر مستحيل باجر اكعد للدوام.

نهى.. ولج ثريا تعاي بس هاي السالفه كمليهه عليج الله

- تگلبي من يمي وبعد لاتكولين ثريا اسمي ثُرىٰ الحاضر يعلم الغايب فهمتوو؟

- لا والله خاف متقبلين؟

- لا اقبل ولاتتبغددين مايلوكلج يلوك بس لاابو خاولي 

- لا والله يلوكلي فدوه إلي

- متواضعه الله يحفظج

- خجلتيني

- دكومي كومي وينج وين الخجل شكلج ما خجل انتِ

- يلا انطمري رايحه اخابر ولودتي

- باع اسمه معقد مثل عمه حتى مايصيرله دلع 

- اسكتي ثراوي (وتغمزلي)

عود لان إستاذ أحمد صاحلي ثراوي والنوب كلهن لزمنهه عليه كامن يصيحني ثراوي واني احب اسم ثُرىٰ .. ثُرىٰ وبس والباقي خس .

.

.

.

نايمه بعمق واتحلم چن گاعده بالكليه ع الستيج مالتي ووجهي مبتهج واضحك بصوت عالي وبلحظه دخل القاسي تقدم عليه وبإيده ورده وشكله مبتسم وعيونه تلمع من الفرح !!

وكفت متصنمه وصافنه بعيونه اريد اشبع عيوني شوف بيه واريد اضمه بگلبي على جماله ورجوليته الطاغيه .

كلما يتقدم خطوه گلبي دگاته تزيد وتبقى تتضارب ويه انفاسي المتسارعه ..

وصل يمي مبتسم وعيونه لامعه .. رفع حاجبه بمكر وأبتسامة خبث مرسومه على شفافه المشدوده ..

قدملي الورده الحمره وكال 

- أحبچ ملكة گلبي !!

يممممه بهاللحظه شصار بيه متت متت گلبي يدگ ودموعي نزلت فرح .. ركضت عليه حضنته وابوس بيه واصيح بعلو صوتي (أأأحببببك) ضحك من أعماقه ابتعد وبعدها ركض عليه شالني ويفتر بيه وآني فاتحه إيديه مثل الطير الحر ..!!

..

فزيت مرعوبه من حلمي على گلاص مـي نگعني ..

گعدت أرجف وأعيط وأنكث بملابسي بسرعه واشهگ من الفزه 

- شبييييككككممم ؟؟؟؟

أُمي عاطت بيه 

- ولج الساعه بـ8 راحت عليچ الكليه صخام الصخمچ 

إنتبهت للساعه فكيت عيوني على وسعهن وطفرت أرجف وألبس بملابسي ومعصبه على امي وأعيط لان ماگعدتني .. گلبي انخمش اكيد راح اترزل والله متأكده .. أكيد هسه راح يدخل للمحاضره الوهواس داهم أفكاري وافقدني سيطرتي ..

ركضت بسرعه بسرعه بدلت بتنورتي الرصاصي وقميصي المشطب بالأبيض وماروني لازگه بيهن على طول السنه .. 

ركضت للكليه ارجف وادعي كون بعده ماداخل للمحاضره .

صعدت بسرعه بالفورتات همزين وگفولي وارجف واركض حتى مالبست شالي عدل ..أصلاً زين من لحگت غسلت وجهي .. 

گاعده بالسياره وكلساع وگـلت للسايق

(فـدوه استعجل)

لما عاط بيه گدام العبريه فشلني ابنل ابنل ..

ردت اغرد وارد عليه بس مااگدر لازم يوصلني 

ذبني ع الشارع العام وركضت للكليه حتى حذائي ماأدري شلابسه ووجهي ماشفته اصلاً 

دخلت للكليه هددوءء يمممه صخام اكيد بالمحاضره هاي هيه الله يرحمني 

بقيت متردده ادخل لو لا . ؟؟

شفت وسام ابو الكافتيريا گـال

- ادخلي ادخلي اليوم هادئ ويضحك

- خويه هوَ من يشوفني يعصب والله خايفه

ضحك وهز إيده

- أدري شبح وتخافين منه يابه دخلي راح تروح عليج المحاضره وبعدين هوَ توه دخل ماصار دقايق 

وكفت مقابيل الباب اصعد إيدي وأنزلهه خايفه لايطردني .. دائماً يطرد الطلاب بس إذا هادئ ويضحك يدّخل وهسه يگول وسام هادئ !

مديت إيدي ع الباب ونزلتهه ..

اخخ ياربي راح اموت من الخوف شو خل ادگ وشيصير خل يصير .

سحبت نفس وعدلت شكلي ووگفت بشموخ أتظاهر القوه وآني داخلي هـش . مديت إيدي بكل قوتي ودگيت الباب !!

ماكو صوت !!

عززااا !!

دگيت الباب مرة اللخ هم ماكو صوت !!

گلت شو خل ادخل .

فتحت الباب ومديت بس راسي !!

القاااعه هدددوءء وبس هوَ واكف چان يشرح المحاضره وتوقف من سمع الباب وشافني

طلعت جسمي كله من وره الباب وگتله بخوف 

- آآءء ... أستاذ ادخل؟ 

رد بهدوء وجمود وأحسه گوه متمالك أعصابه علمود مايسمطني براشدي

گال ببرود 

- من دگيتي الباب آني كلت تفضل؟ 

سكتت..//

- جاوبي

رديت بخوف وإيديه ترعش وشفتي ترجف

- آآءء .. لا ماگلت 

گال ببرود وجمود واشر بأصبعه السبابه ع الباب 

- إذن تفضلي برررره 

تحولت نبرتي لتوسل لأن ادري ميفيد وياه هواي طارد طلاب گدامي بس ذولاك أغنياء يطلعون ويستنسخون المحاضره ويقروهه إذا آني الحرف يطير مني بعد استغبي وماعندي استنسخ

- إستاذ فـدوه خل ادخل والله اخذتني النومه والسياره مال اخويه عاطله اضطريت اجي مشي فـدوه استاذ بس هالمره 

طبعاً چذب لاسياره ولاشي هوَ زين من عنده بايسكل هيَ مال صديقه واخذهه منه

گال بنفس نبرته

- تفضلييي برررره 

الطلاب كلهه تباوع عليه وآني منظري ميسمح ابدد شكلي كله مخربط ولبسي مبهذل 

- استاذ فـدوه والله اول مره وآخر مره .. إذا فوتت محاضره وحده ارسب فـدوه 

بقيت أعصر بدموعي بلكي ابچي وسويت القاعه مسرح مال تمثيل .. زفر نفس بعصبيه وكال بنفاذ صبر ويه رفعة حواجبه 

- ادخلي وهاي آخرررر مررره 

- اي اي والله اخر مره 

دخلت للستيج مالتي گعدت ونرجس گرصتني وهمست

- (ارتاحيتي على هالمسرحيه من الصبح)

- خايبه اسكتي عني كله من وراج

ضحكت عليه وهزت إيدهه كالت (اني شكو)

بقى يشرح وآني مركزه بنظراتي ويه حركات إيديه وتأشيراته للدرس والكلمات من تطلع من شفته ورزانته وثگله يخبلل وخبلني وياه 

بقيت امشي بعيوني على جسمه المربوع وعضلات أكتافه وصعدت بنظراتي لرقبته البيضه المغطاة بياخة القميص مال الزي الرسمي .. ووجهه الضاوي بذقن مدبب ولحيته الخفيفه وشواربه الخفيفات سحرنّي .. وعيونه الواسعه وشمرة حاجبه وثخنه ..

تسريحة شعره المرفوعه وثخن شعره الفاحم ومصفوط بترتيب ويه عگده حاجبه من تتطبگ گصته ينزل شعره بإغراء عجيب .. 

نزلت على حذائه تللممع ويه خرطة بنطرونه

نزلت عيوني على حذائي يبوووو تفشل وعلي مال هسه اطم روحي على هاي الحذاء ..

تذكرت الحلم .. ابتهجت أساريري وضحك وجهي ويه صفنتي بيه وبجماله صار عبالك واقع ..

فزيت من صفنتي على إيد نرجس بخاصرتي همست من بين فتحات قليلات بشفتهه 

- ولج إنتبهي راح يرزلچ 

- اييييييي 

ظليت فاغرة الفم بشكله

وهوَ يداعب مُخيلتي حسيت نفسي طرت بالسماء بالاستمتاع بشكله الجذاب مثل القمر المتألق بسماء بغداد ..

تذكرت شكلي من طلعت الصبح يبوو يخززي .. اتذكر عندي مرايه بجنطتي اي همزين حاطتهه إحتياط شو خل اشوف چهرتي .

تسللت إيدي بهدوء للجنطه وكعدّت المرايه بوسط الجنطه ونزلت جسمي ووصلت وجهي يم المرايه وبقيت اعدل بشالي واروح منا ومنا على جهة المرايه لان صغيره حيل مال باودر وشالعتهه ..

فزيت على صوته العصبي ورج القاعه رج خلى كل الطلاب يلتفتون عليه مصدومين نزلت كلماته بإطرائي على راسي مثل الزلزال

- ثُثثرررررررى

رفعت راسي بسرعه وعيوني مدمعه وابلع بريقي من الخوف .. بطني مباشرةً خبطت وشفتي رجفت من الخوف والرعب .. 

إرتعدت اوصالي وبقيت ارمش بعيوني حابسه الدمعه !! 

لا هاي هيَ خل اقره على روحـي السلام من هسه ..

شفته واگف ويباوع على جهتي وعيونه تريد تطلع من الغضب وصاك على اسنانه حيل ومقوي قبضة إيده ع القلم ويزأر عليه مثل الاسد !

الفصل الحادي عشر من هنا