رواية لاجل الحب الفصل الثاني عشر
:أنا موافقة أتجوز معتز.
و طلعت على اوضتي و أنا قلبي يتقطع مليون حتة.
دخلت شقتي ،المكان اللي جمع بيني وبين أدهم،مش عارفة لساني نطق ازاي أني موافقة على الجواز ، بس فريد صعبان عليا و كلام الناس ممكن يطول ولادي أكتر من كده،و هما ملهمش ذنب في كل ده.
أما في الاسفل
رامي بصوت عالي: أنا مش موافق على القرار ده.
حماتي: نجاة موافقة.
بص رامي لمعتز: و أنت رايك ايه ، أنت ليه ساكت كده.
رد معتز: أقول ايه.
سألت سمر: أنت موافق انك تجوز نجاة.
مردش و خرج من البيت كله، الحقيقة الفرق بين أدهم و معتز، ديما أدهم يواجه اي مشكلة عكس معتز فكل مشكلة يهرب و يلتزم الصمت....
رامي: بابا بلاش ،علشان خاطري بلاش ازي نتحمل نشوف مرات أدهم مرات حد تاني حتي لو اخوه.
قال حماي: دي الحل علشان نمنع كلام الناس.
و دخل أوضته و حماتي وراءه.
سمر: رامي ما يمكن راي ماما صح و ده أحسن حل.
رد باعتراض: لا مش صح .
في الليل
نايمة في حضن ولادي و أنا دموعي مش بتخلص ازاي أكون مرات اخوي أدهم بعد ما كنت مرات أدهم حب عمري.
كانت ليلة صعبة ، أول ما النهار طلع خدت ولادي و روحت المقابر أزور حبيبي.
: أدهم ليه كل ده حصل، ليه مش قادرة أتحمل، ردي عليا قولي أنك موجود و كل ده كابوس، قولي أنك موجود و مفيش حاجة من كل ده هيحصل، أنا آسفة يا حبيبي ،أنا مش خاينة و لا نسيتك ،أنا عملت كده علشان ولادنا ،فريد صعبان عليا، سامحني يا أدهم سامحني.
قالت فريدة: هو بابا خلاص مشي.
بصيت لها و انفجرت من العياط ،حضتني هي و فريد.
: كفاية يا أم فريد علشان العيال.
كان صوت معتز، مردتش و فضلت حضنه ولادي قال: فريد فريدة.
جريوا عليه و هما يقولوا: عمو معتز.
حضنهم و قال: بابا قولوا بابا.
بصيت بغضب و قولت: لا ملهمش غير اي واحد هو أدهم ،أدهم و بس.
خدت ولادي و مشيت و هو وراءنا.
مر أسبوع و أنا قافلة على نفسي شقتي ، و جه يوم الخميس يوم كتب الكتاب.
نشرت حماتي الخبر لكل للمنطقة.
قبل كتب الكتاب ،طلبت أقابل معتز، ،طلع لي شقتي ،كان الباب مفتوح ،واقف قدم الباب و هو يبص في الارض،قال: نعم يا أم فريد.
ردت بهدوء: سهلت عليا الموضوع يا معتز، أنا فعلا أم فريد و أفضل كده بالنسبة ليك ،مرات اخوك و بس.
مرات أدهم حب عمري اللي عمري ما أحب أو أقبل راجل في حياتي غيره، أنا اتجوزتك بس علشان ولادي، خايفة عليهم من كلام الناس، بعد كتب الكتاب أنا اطلع على شقتي أنا و أدهم مع ولادي، موافق على كلامي.
كان لسه بيص في الأرض و قال: موافق يا أم فريد.
أخذت نفس و قولت: أنت مش ملزوم بأي حاجة ،يعني من حقك تحب و تجوز و تعيش حياتك ،أنا و أنت اخوات بس.
قال بتنهيدة: موافق يا أم فريد.
: شكرا يا معتز.
= العفو
و نزل معتز و أنا بعده بشوية و تم كتب الكتاب.
قالت حماتي بسعادة: يلا خد مراتك و أطلع شقتك يا معتز.
اتصدمت من الكلمة و قبل ما أكلم ،قال معتز بهدوء: الجواز على الورق بس يا ماما ، احنا طول عمرنا اخوات و هنفضل كده، أنا و نجاة اخوات و بس.
اتكلمت حماتي باعتراض و قالت: و أنا مش موافقة، فاهمين، يا تكونوا متجوزين بجد ،او اقطعوا علاقتكم بي.
بصيت أنا و معتز لبعض بحيرة
مش عارفه حماتي عايزة ايه تاني بعد كل ده.
صرخت بعصبية: لا يمكن اسمح أن راجل يدخل حياتي بعد أدهم.
قالت بتهديد: يبقي تخرجي برة البيت و ملكيش عيال عندنا.
