رواية هشاشة قلب الفصل الثاني عشر بقلم العباديه
ثُـم إنـي نادمـه على كل لحـظه..
ظننتُ نفسي فيـها شخـصاً مُمـيزاً..
لايجـرؤ قـلبك على كسـرهُ بسـهولـه..
~~~~~~~~~~~~~~~~~~~~~~~~~~~~
شلونكم حبايبي مشتاقتلكم هذا بارت تعويض عن الأيام السابقه وتعبت بيه.. اتمنى تقدرون تعبي بتفاعلكم..
ثُرىٰ ..
كمل محاضرته واني متجاهلته نظره مانظرتله اصلاً .. ومتعجبه على نفسي شلون سويتهه .. بس ثُرىٰ على كلشي تكدر فديتها .
قبل لايطلع باوعلي وكال :-
- ثُرىٰ تعالي طالبج بمكتبي !!!
يمممه عزززا شيرييد مني بس لا يعاقبني لان حجيت عليه صخام بويهج يثُرى رحتي بيهه !!
رحت وراه وآني أرجف وخايفه وفكري كله شيريد مني !!
دخل للمكتب وآني وگفت بالباب .. أشرلي وكال
- إدخلي
تذكرت كلامه من حچه وياي رأساً گتله :-
- ماادخل
خزرني .. رأساً دنگت مااريد عيني تصير بعينه.
گال :-
- إدخلي تره مااجلدج
لا والله هيَ هاي العايزه بس تجلدني...
(كلتها بداخلي)
- إستاذ انتَ گتلي لاتدخلين لأي مكتب وحتى لمكتبي واني عند وعدي
- هاا يعني من توصل إلي ماتدخلين بس من توصل لاأحمد تركضين ركض !!!!
وسعت عيوني مصدومه أحسه نبرته بيهه شك !
ومدري شحسيت نفسي من گال هيج .. إصابع الإتهام جاي تتوجه عليه واولهم هوَ !!
دنگت والدمعه بطرف عيني تتلألئ .
- ماادخل لأي مكتب .. إستاذ إذا تريد شي هنا إحچيه
- لا مااحچي هنا تريدين تدخلين بكيفج ماتدخلين هم بكيفج
- اكيد ماادخل
- تمام لعد براحتج
هوَ دخل للمكتب وسد الباب واني ظليت واگفه مصفصفه !
جاي يتهمني عينك عينك وهوَ شعليه بيه امي ابوي !!
رجعت للقاعه وتلگتني نرجس
نرجس.. هلا والله بإم الواسطات عمي لو كلهه هيج الواسطات لو ماتنراد
- ياواسطات هاي؟؟
- ابو خاولي وابو گزگوزه على گولتج ..والدكاتره كلهه عرفتج ودكتورة أسماء خلتلج اسم بالجامعه فوگ شطارتج والله وأنعرفتي يثُرىٰ والدكاتره محتارين بيج علمود يوصلوج !!
- صدگ عود؟؟ يعني اني لو عندي واسطه هيج حالي؟؟ ماشفتيهم شلون واحد يذبني على الثاني وبعدين وإذا عرفوني طالبه شاطره وأحضر وست أسماء جيرانه لااكثر ولااقل
- لا والله شوف الطلاب وين وشوف انتِ وين !
- نرجس شبيج شنو الطلاب اني وحد مثلاً تره طالبه حالي من حالج
- هلبت واحد يطلبني بمكتبه !!
عطت بيهه رأساً
- اكلج تره انتِ زودتيهه حيل يعني يطلبوني لمكتبهم عندي شي وياهم ؟؟
- الله أعلم !!!!!
إنصدمت صدمة عمري !! ظليت صافنه عليهه ومحتاره شأحچي ! اقرب الناس الي هيج تحجي !!
حچيت بنبرة تهديد
- إسمعيني ولج ذذذذاك إستاذ ماهر وذاك إستاذ احمد روحيلهم وخل يطلبوج اني ماعليه ولاتدخليني بتفكيرج الشاطح فهمتي لو لا؟؟ ولو عندي شي وي واحد منهم مااخاف منج إذا هاي إنتِ تدرين بكلشي هيج تسوين جا الغريب شيكول؟
خليتهه ساكته وتعوج بحلگهه وتقوس بحواجبهه مستهزأه !! روحي فااارت وإنصدمت ..!
رجعت لأأهلي ابچي هم من موقف هذا ابو خاولي وهم من هاي المشيط حيه .
...............................................................
قربت الأمتحانات مال أخير السنه وإمتحنتهن بدون مااشوف أي بشر لاماهر ولانرجس ولا أي شخص يهمني .. اروح بطريقي وارجع بطريقي .. حتى من أخلص حل الاسئله اطلع .
خلصت السنه على خير وإستلمت النتيجه ناجحه واني متأكده من هالشي .
مرن شهرين وبلشنا بالتجهيزات لزواج وليد ونهى .. يوميه يطلعون سويه يكملون شغلهم .. عقدت محكمه وبعد إسبوع زواجهم .
بهالفتره آني سمنت بحيث كل ملابسي ماتجي عليه .. لان بس أكل ونوم وأحشش لاهم ولاغم . حتى الشغل مرات أساعدهم لان ماعدنه شي تقوى بالليل تنظف وامي التطبخ .
أحس عيوني صارن زروف چفچير من الخدود .. حتى من أضحك احسهن ينطمن .
رحت وزنت لگيت وزني صاعد 69 رغم چان 57 .. ظليت ألطم على راسي وابجي عود بلكي أضعف .
ذني مگابلاتني ويضحكن عليه .
نهى.. دُبه حميسه تاكل هريسه
- وليييي زعطوطه ماچنهه راح تتزوج
تقوى.. لج ثريا صدك تحجين هاي دموع صدك ولجن تعالن شوفن
- ما ما اريد اضعف
النوب ابجي وهنه مسنحات ضحك .. لما شويه إنتبهت لروحي وطبگت وياهن ع الخط وشبعت ضحك يمكن صارت بيه حاله نفسيه لو تخبلت .
مروه.. والله لايگلج السمن باع الخدود يبووو
ظلن يگرصن بخدودي مكيفات مرات اشوف نفسي حلوه واني سمينه ومرات لا اجزع لان ولا لبسه تجي عليه .. فساتيني جانن مخصرات هسه فتحت التخصيره وهم ضيكات
.
.
.
مر إسبوع واليوم حنة نهى .. كلنه مخبوصين ونحضر .. زواجهم بقاعه واكثر فقره مريحتنه لانظفنه ولاتعبنه .
آني رحت وياهه للصالون وإعتنيت بنفسي لان حاسني گلبي راح اشوفه . اريد اشوف شمتغير بشكله وشصاير بيه سمنان ضعفان .
بالحنه لبست فستان ماروني ومكياج بسيط وسويت شعري تسريحه برم .
نهى لبست بدله من إختيار وليد لون سمائي هم طلعت تچتل .
إجه علينه عم وليد أخو ابو خاولي بس ماعجبني يبصبص فصلني تفصال خفه ويهه .
دخلنا للقاعه بدون مانشوف شي وولا لمحته ابو الرزايل . والقاعه هم بس للنساء .
الحفله تجنن والاجواء عجبتني ردحت لما طحت صفح بلكي اضعف شويه صايره چني مدام نفيخه .
ثاني يوم العرس .. لبست فستان لون وردي هادئ ومكياج بلونه والنوب ام الصالون سوتلي مكياج من هذا التمام .
رحنا لبيتنا لان إسماعيل كال ماتطلع الا من بيت اهلهه .
اني مچلبه بنهى وحاصرتني البچيه اليوم راح ياخذهه وليد ونبقى إحنه وجوهنه مصفصفه .
كالو اجت الزفه واني إنهديت ابجي ونهى هم بجت وتقوى تصيح عليه
تقوى.. ثريا خدودج صارن حمر ارحمي بحالهن (وتغمزلي)
تريد تضحكني بس اني ياحيف اتخيل ادخل للبيت بدون نهى وافرفح بجي .
مروه.. بس ولج بس راح تفگرين البنيه حتى مكياجج خربتيه طلعتي عبالك مهرج
سكتت لان اشوف نهى كلما ابجي تفرفح وياي .
مسحت دموعهه وحضنتهه وعدلت وجهي .
دخلوا وليد وإبوه أخذوهه .
وإحنه وراهم .. رحت لبست جبه بس احسهه تريد تنفجر عليه .
سويت الشال بدنبوس واحد وشمرته خاف تخرب التسريحه وطلعت عيوني مدمعه ومدنگه .
البنات مو وياي راحن يصعدن بالسيارت واني بقيت وحدي .. طلعت ادور على سياره اروح بيهه ومنتظره واحد ينقذني ويصيحني .
ظليت افر بعيوني واباوع بالسيارات .. من بعيد اشرتلي تقوى من سيارتهن وصاحتلي .
رحت امشي على كيف..
السيارات ساده الشارع..
جايبين العشيره كلهه حضرتهم...
قبل لااوصل سيارتهن لاحظت سيارته !!
يمه گلبي فزز وفرحت..
ظليت ادور بعيوني اريد اشوفه وين..
إلتفتت وأشوفه واگف يم سياره وعيونه عليه ومبتسم .
يعني جان يشوفني من جنت يم الباب مال بيتنه .
كملت طريقي ..مدنگه وگلبي دمامات وتدگ بيه مشتاقتله .
وصلت لسيارتهن صايره لخه والهوسه تكتل .
همستلي مروه ..طلعت راسهه من الجامه
مروه.. خايبه وين جايه روحي وي امي روحي
- هي وين امي؟
- وي ماهر (وتغمزلي)
- لا لا مااروح وياه
- لج روحي شوفيه صارلج هواي ماشايفته
- لا لا مااريد
- ظلي السيارات راح تحرك .
ظليت واكفه ومحد تقبل تسويلي مكان .
سيارة الزفه تحركت واحنه واكفين .. والسايق راد يطلع .
اني واكفه بمكاني اباوعلهم وعيوني مدمعه .
تقوى.. ولج ثريا روحي وياه
- مااريد.. روحوا انتو اني راح ابقى بالبيت يم الولد
- ولج المن عدلتي شكلج اذا ماتحضرين العرس
- خلوني هنا وروحوا.
حركت السياره مالتهم واني نزلت دمعتي . محد يهمه بيه حتى امي نستني وذني النسوان خبيثات محد قبلت تسويلي مكان .
توجهت للبيت بيأس والدمعه مستقره بعيني .
شويه وسمعت إسمي
- ثُرىٰ .. ثُرىٰ
من سمعت "ثُرىٰ" والصوت فرحت وظليت اركص بگلبي .
إلتفتت عليه وعيوني مليانه دموع .
- شلونج؟
- زينه
- تعالي يلا ليش رجعتي؟
- ماكو مكان
- لعد تعالي بسيارتي .
عود ردت اتبغدد مثله واشوف الـ(لعد) بلساني وصدك وازلگ من كد ما مستثوله گتله:-
- علد انتَ مو مقبط؟
عگد حواجبه بإستفهام
- شنوو؟؟
- آآءء .. جا سيارتك مامقبطه؟
عززا همزين تلاحگت روحي "علد" النوب صخام بويهي .. من الثول حتى حلگي إنعوج رغم اني مرات هم اتبغدد ويخبل عليه البغدادي .
گال :-
- لا لا بس امج وخالتج بيهه
مشى ومشيت وراه للسياره مالته .. والله وتذكرني من صدگ فرحت بس مابينت فرحتي .
صعدت بالسياره وامي انهدت بيه
- جا ليش مارحتي وي اخواتج لما انترست السياره
- ماادري عبالي اكو مجال
- بطلي فهاوه وانتِ تلكين مجال
ياا ياا تريد تذب قهر نهى بيه اي والله هوَ هذا حظي ياهو اليجي يذب حرگته بيه صايره دوشگ رزايل .
كعدت يم الجامه وعينه عليه .. يباوعلي ومبتسم .. بعيونه نظره عجبتني . اظن خديداتي أثرن بيه .
وصلنا للقاعه..
شلون لوتي هوَ خله امي وخالتي نزلن يلا كال :-
- اني راح اصف السياره
- لا خل انزل
- مااخطفج بس اشوفلهه مكان
سكتت.. وامي راحت تركض لنهى تريد تساعدهه بالبدله واني خو محد ذاكرني عبالك زايده عدهم .
النوب إلتفت عليه وطگهه ضحكه..
يا ياااا شبيه هذا ؟
اني صدگ ضجت حسيته يستهزأ بيه .
نترت :-
- هااا شنو؟؟
رجع إلتفت عليه وضحك..
باوعلي بتمعن وكال :-
- هههه شنو هاي الخدود
يا يا هذا انتَ الجبير الثكيل الرزن مااصدك والله وأثرن بيك الخدود ياابو الرزايل .
إبتسمت وظليت ساكته..
بس ضجت مااريد السمن ولا احبه..
كلساع يضحك واني ميته من الحركه .
لگه مكان للسياره صفهه بيه ونزلنه..
اشرلي بإيده عود امشي كدامي ...
اني مشيت بس گوه امشي عبالك معوقه خاف بارزه من وره والنوب السمن منا يبو ياريت ميته ولا هالفشله .
من دخلنا للقاعه همس قريب عليه :-
- امشي براحتج يابه تره لايگلج السمن
عزا عزا عزا والله ولا اصدك هذا نفسه ابو الرزايل لو مبدليه ؟؟..
لا خل اشوفلي واحد يسمطني راشدي حتى اصدك..
القاعه مختلطه واحنه مسترين اما أقاربهم عادي عدهم البنات فاتحات شعرهن ولابسات لبس شايفته بس على أجسام العارضات .
اكو وحده لابسه فستان أبيض قصير وبيه لمع ومسويه شعرهه تسريحه تچتل وجمالهه چتال .
لاطشه بأبو الرزايل لطش .. وهوَ يسولف ويضحك ولا عبالك نفسه ابو الرزايل المغندب .
اني من ساره لزمته غرت..
مو الا هاي مچلبه بيه الا تتمركص..
شصار بيه تشعوطت من الحرگه بس مابينت شي .
كلهه رگصت بس اني استحي ارگص بجبتي.. عبالي ننزع..
ماتسوه الفستان لبسته وتعبت..
خلصت الحفله وزفوا وليد ونهى للفندق .. اني هنا متت بجي والنسوان يصيحن"عياره" حقهن مايدرن شكد حنينه وخصوصاً إحنه سرنا واحد كعداتنه سوالفنه كله سويه .
أمي بقت وياهه وإحنه ابو الرزايل راح يوصلنه .
اول ماگال آني اوصلكم اجت هاي ام الابيض كالتله ؛-
- ماهر شنو توصلهم واني منو يوصلني؟
- خلي عمار يوصلج (أخ ماهر)
- لا شنو عمار انتَ وصلني
- اني راح اوصل البنات امهن أمنتني عليهن
- لعد انتظرك لما ترجع
- لا لا اني اتأخر وخاف انتِ تعبانه اشوف تروحين افضللج
- اووف حروح .. بس اطلبك توصيله ها
- هههه تدللين يابه
إحنه واگفين منتظرينه بس من گاللهه "يابه" شصار بيه رغم مندمجه وابجي..
بس ركزت على هاي الكلمه...
هاي بس إلي .. هيَ شنو ويگولهه الهه..
رحنا للسياره وصعدنا .. اني وجهي صار أحمر وعيوني مدمعه أريد بس أوصل لااهلي ادخل بفراشي واشبع بجي بهيج مواقف اني افقد .
تقوى همستلي :-
- ولج ثريا بس بجي
مروه عناد بيه كالت بصوت عالي :-
- ثريا على هذا البجي خدودج راح يفشن وبعد بيمن نگرص !
ظليت اكرص بيهه برجلهه وهيَ تضحك .. هوَ من شافهن يسكتن بيه تدخل بالموضوع حضرته وكال :-
- هاي إختج تزوجت هيج سويتي من انتِ تتزوجين شتسوين
ظلينه وحده تباوع بالثانيه متفاجئين .. مروه همست بصوت مسموع
- الله يساعد الياخذج
هوَ كال بهمس ؛-
- اي والله !!
عززا شنو هذا صاير كلش انه إلك ابو خاولي تقلد عليه انتَ احسن مني ابو فنتيخه .
وصلنا للبيت .. لگينه الكهرباء طافيه يبوو والله فگر هذا اليوم .
إسماعيل.. ثريا فوتي رشي السطح خل ننام فوك
- اي رايحه
اخذت إبريق ترسته ماي وصعدت لفوك .. رشيت السطح وطلعت ريحة التراب افيش شكد احب هاي الريحه .
ظليت أستنشق بهدوء وراحه واني ارش . جبت الكراتين من جوه فرشتهن ورحت للبيتونه اخذت الفراشات..
صعدن البنات ظلينا نفرش بس ضايجين..
رحت تشلبيت على الحايط واباوع للشجره مال حديقتنه واخذتلي فره ع الحيطان البقيه شفت الفرع وابو المحل معزل . احب اصفن ع الشارع
باوعت للجيران هم ظلمه يعني مو بس احنه طافين..
نزلنه جوه سوينه صينيه تعشينه ع اللايت لان محد أكلت بالحفله إنخبصنه بنهى .
ناكل ونتذكر مكانهه والولد ضايجين خو أسماعيل صاير فلم .
كملنا وصعدت لفوگ تلمست الفراشات لگيتهن باردات .. وكفت ع الدرج وصحتلهم .
- يلا تعالو الفراشات بردن ومن تجون جيبوا صلاحية ماي إليه
تربعت بفراشي صاير باارد تمددت واتمغط .. دقايق وصعدوا .. انطتني تقوى الماي خليته يم راشي لان اعطش هواي .
وگعدنا نسولف .. لما باوعنه بمكان نهى فارغ وكمنا نتذكر ايامنه سويه نتحسر .
إسماعيل.. تتذكرن من چنه نوكل الحمامات بهذا المكان
حسن.. اي ونهى تسوي خبز كبار وانتَ ماتقبل تعلم بيهه تسويه صغار وهيَ ماتعرف
اني انهديت بجي والبنات وياي .. إسماعيل طلع "سلام الله عليه" إنشوده ع السيد الصدر . وحط الموبايل بنص الدائره الگاعدين بيهه إحنه .
ظلينا نتذكر ونبجي .. وحمدت ربي لان بنيه واكدر ابجي واني اشوف اخواني حابسين الدموع بعيونهم ويرمشون خاف تنزل دموعهم ..
إسماعيل بعد ماتحمل نزلت دمعته اول مانزلت دمعته گام بسرعه ماحب نشوف ضعفه..
موسى انهد بالبجي واسماعيل يطبطب على متنه
- كافي انتَ رجال كافي
موسى.. رجال بأفعالي بس من توصل لااختي مااتحمل راح اشتاقلهه البيت يفرغ بدونهه
- ادعيلهه الله يوفقهه وهاي هيه
ظلينه ندعيلهه وإسماعيل صاح بينه وگمنه نمنا
رحت نمت بفراشي وجبت فراش تقوى يمي لان جان مكان نهى وماقبلت افرشلهه بيه .
خليتهخ تجي يمي وطبگنا فراشاتنه سويه ونمت بحضن تقوى وظلت تتلمس براسي وتسولفلي قصه .. هاي من قبل هيج
- تقوى اليوم سولفيلي قصة گشر الرمانه
- ولج هاي طويله خل اسولفلج بانه بانه
- لا لا گشر الرمانه
ظلت تسولفلي واني اغفي رغم سامعه القصص مليون مره بس كلما تعيدهن الي اتحمس واتشوق للاحداث عبالك اول مره اسمعهن .. هاي العاده شما اكبر مابطلهه احب يقرولي قصص واني انام..
كعدنا الصبح على صوت إسماعيل ينده بينه والذبان يطنطن فوك روسنه مسويات حلفه عزيمه علينه خوش طُعم...
إسماعيل..ولجن يلا اكعدن راح تطلع الشمس لا العالم تشوفجن كومن
جريت البطانيه على راسي واني اصيح
- عوووفني اناام نعسانه
- كملي نومتج جوه كومي
أيس وسكت واني اخاف من سكتته لان وراهه شي .
كال بنبرة تهديد
- والله احسب للتلاثه شوفن هاي صلاحية الماي متروسه اذا ماكعدتن تلكنهه فوك روسجن
لحظات واحنه نزلنه طياره لجوه كل وحده فراشهه فوك راسهه وتركض رغم النعاس بعيوننه بس ندري بيه يسويهه .
دخلنا بالغرفه وكملنه نومتنه .. صارت بـ8 اندك الباب وصوت رجال دخل للاستقبال .
شويه واجاني اسماعيل يريدني اسوي جاي .
كمت اتأفأف النومه طلعت زقوم .. سويت جاي وماي وسمعت الصوت مو غريب عليه ..والله وچنه صوت ابو الرزايل .
قربت اكثر وطلع صوته هلو بلو شعنده جاي من الصبح .
اسماعيل اخذ الصينيه مني واني اتصنت .. اثاري جاي على مستمسكات مدري شنو شعليه اني المهم هوَ إجانه وصار گرايبنه .
للعصر اجت امي وهم هوَ موصلهه...
زين زين طايله رجله وصاير خوش يجينه..
نهى ووليد سافروا وامي رجعت تبجي واحنه وياهه ع الواهس .
مر شهر يلا رجعوا ورحنه سلمنه عليهه ببيتهم بس لگينه الامه مگلوبه .
اني صرت نادره وماكو احسن مني..
رحت للمطبخ وظليت اساعدهن..
گدر المرگه ع الطباخ ام وليد كالتلي روحي شوفيه هاي ام الابيض الشفتهه بالحفله عرفت إسمهه "جنات" هيَ شافتني وطگتهه النداره .
سألتني
- انتِ الطالبه الي وي ماهر؟
- اي آني
ظلت تخوز بيه وعيونهه منططه..
وگفت فتحت الگدر وهيَ اجت وكفت يمي لازمه البيز بإيدهه .. الغيره صابتهه كالتلي :-
- عوفيه اني اشوفه
سكتت..
خليتهه هيَ واكفه يمي صفح بس اني ماخذه الجهه الاكبر لان واكفه مقابيل الطباخ .
ماادري شلون بلحظه سحبت الگدر عليهه من شفته راد ينصب عليهه تلاحگت الموقف وسحبت الگدر بكل قوتي لان تمزلگ...
اول ماسحبته المرگه إنلطت وطفرت على وجهي ..
حسيت نار وشبت بخدودي وگصتي .
عطت بكل صوتي ولزمت وجهي...
هيَ إنرعبت ظلت ترجف وراحت تركض..
ظليت اصرخ وابجي .. المرگ يفور وصار على وجهي حسيت روحي شاغت..
إجت امي تركض واني مفرفحه.
- شبيج يمممه بنننيييتتييي
اشوفهم كلهم يباوعون عليه ووجوهم مصفره صح وجع مو طبيعي بس الوجوه ماتبشر بالخير..
ظليت ابجي واعيط.احس الجلد انصلخ
وجوههم مخلوسه..
اريد اعرف السبب اليخليهم هيج مذهولين..
- انطوني مرايه اريد اشوف وجهي
نهى.. ثريا لازم مستشفى عوفي المرايه
- اريد اشوف وجهييييي
ظليت ابجي..
نهى إتصلت بوليد لحظات وهوَ ومرتضى وماهر فوگ روسنه .
ماهر... كومي كومي للمستشفى
ظليت اشهك وابجي اريد اشوف وجهي
- خلوني اشوف وجهي شصار بيه مااامااا
اجت موج تركض بإيدهه مرايه اول ماانطتنياهه اريد اخذهه .. إبو الرزايل سحبهه منهه بقوته وعاط بيهه
- هسه وقتهه ..كومي انتِ كوميييي
ظل يعيط عليه واني ابجي .. رحت للمستشفى بسيارته طول الطريق ابجي كله من وره هاي ام فچوچ..
ظليت اشهك وابجي .. لما نتر بيه
- ثُرىٰ كتلتي روحج انطي مجال خل نوصل تحملي
- راح اموت اكلكم راح اموت انتم ماتصدگووون
سكت.. بس وجهه مايتفسر..
محد يحس بالوجع الا صاحبه..
وصلنه للمستشفى... واني اشوف المحترگين گدامي شصار بيه..دكيت رجلي الا نرجع خزرني
واكلتلي رزاله من ابو الرزايل والله تسوه حياتي .. طببني غصب وعوزه بس يسمطني راشدي .
اول مااجه الدكتور بإيده مگص ظليت ارجف ودموعي تصب و بعد مادريت بشي ..
كعدت مضمدين خدودي وكصتي..
ظليت اصرخ وابجي
- يمه خديداتي انحسدن حسدوهن المايخافون الله
امي كالتلي
- ولج هسه وكتج
- والله حسدوهن لو ميته ولا هذا الحرك راح اموووت
نطق ووجهه مغندب :-
- هسه يجي الدكتور وينطيج مسكن الآم
شويه وإجه الدكتور انطاني مسكن وكال الاربعاء تروحين للعياده علمود ينطيني علاج حتى مايبقى اثر ..
ظليت ابجي من الوجع..
تذكرت نهى وخربت العزيمه من وراي..
لا والله اني شعليه هاي ام فچوچ هيَ سحبت المرگه..
اصلاً لو مو انه هسه هيَ محترك جسمهه كله..
كتلهم يرجعوني لااهلي ويرجعون للعزيمه .. امي ماقبلت
- ماما شنو ذنب وليد ونهى ؟؟ وليد ارجع انتَ كملو العزيمه اذا تخربطت يجيبني اسماعيل
امي كالت
- حتى اسماعيل اجه من الشغل للعزيمه والولد وياه تروحين وحدج للبيت؟
نزلت دمعتي هم من الألم وهم مامستعده اواجه الناس بوجهي المضمد .
صعدنه بسيارته وهوَ طول الطريق معصب وحواجبه معگوده ويسوق سريع .. حتى وليد ماتجرأ يحجي وياه من عصبيته .
رجعنه لبيتهم وإم ماهر مبينه ماعاجبهه الوضع تباوع علينه بإستصغار وعبالك كدامهه حشرات مو بشر . تغسل ويهج
رحت كعدت يم نهى بالصاله لان نهى ووليد بيتهم وحدهم وهاي لان عزيمه جايين علمود البيت جبير .
ظلت تحضن بيه وتقوى ناصبه عليهه تريد تضحكني .
تقوى..تره هاي ثريا مو وليد (وتغمز)
نهى.. متسوفله ولج السيد علمج
- مگرود صوته مااسمعه مو الا يعلمني
- احمم
- عن قريب يعلمني بعد بس اسبوع ويعلمني
باوعتلهه بشك
ثُرىٰ.. وين يعلمج وشلون؟
- لج راح يخطبني
- وليش اني ماادري .. يعني فوك مااخذتيني وياج لحفلة التخرج فوك ما راح تتخطبين وماادري؟
- لج فرحانه خليني بواهسي شبيج ام خدود
- اشش لاتذكريني بخدودي لاابجي عود توهن طگن وصارن حمر ومتفحات هسه خوش احتركن من عيونجن
- غير ماتردينهن هاي إجاج تفشيش طبيعي بدون ريجيم.
رغم هذا كله والوجع بس من اطلب مرايه محد ينطيني ..
اجت موج توسلتلهه
- فدوه موج حبابه مرايه عليج الله
موج.. مااگدر والله
- هسه شعليكم انطوني مرايه معقوله شحة مرايات
- والله ماهر يلعب لعب بس ننطيج مرايه
- ماهر شعليه؟؟
- هوَ حذرنه !!
- صخام بويهي جا شصاير بحالي حتى
لهالدرجه ماتردون تصدموني !!
سكتت واني افكر بداخلي ليش مايخليني اشوف وجهي هسه !
.
.
.
كملت العزيمه ورجعنه ابو الرزايل سوانه دربين .. الولد درب واحنه درب ماقبل وليد يوصلنه الا هوَ .
من رجعنا كال لاامي
- مو تخلوهه تشوف وجهه !
يا هذا شعليه ؟
- وين اكدر مااشوف وجهي هسه رأساً اروح للمرايه زين وصبرت وماشفت شكلي بمراية السياره .
مكعديني بالوسط والمرايه الي بالوسط مطيرهه لفوگ خاف اشوف وجهي !
خله حلف على امي عن لا اشوف وجهي !
وامي كالتله مااخليهه منا للاربعاء لما يفتحون الضماد .
اول ماوصلنا وردت انزل رجع حلفني
- ثِرىٰ تره داحجي لمصلحتج مااحط بجيبي شي تمام.
- اي مااشوف
- وعد؟؟
صفنت لان نيتي جانت ارجع اشوف وجهي .. من صفنتي عرفني رأساً كال :-
- شوفي جنتي ترديني بس اسكت وتروحين تشوفين وجهج
- اي وعد مااشوفه
ابتسم بوجهي ونزلت .
.
.
.
صار يوم الاربعاء واني صابره وماشايفه وجهي .. للعصر بدلت علمود نروح للعياده اني وامي .. لبست فستان طويل وجواه بنطرون . وحطيت بس كحله مال عرب بدون مااشوف چهرتي .
طلعنه اني وامي وانصدمنه بالباب واكف ماهر !!
رأساً التفتت على امي
- شجابه؟
باوعتلي شكلهه هم مستغربه
- ماادري
نزل وتقدم ناحيتنه .. عينه عليه ونظراته مانشالت عن عيوني .. ياا هاي خليت كحله هيج صار بيك جا لو احط باقي المكياج شتسوي..
كال لاامي
- حاجزين عند احد؟
- اي حاجزين عند دكتور
- اني هم حجزت بس نروح على حجزي افضل
- بكيفك
وصلنا للعياده ودخلنه رأساً رغم السره واصل للمريخ .
تفاجئت من دخلنا طلعت دكتوره العبب طلع يغار الطنطويلو .
فتحت الضماد وعقمت مكان الحرق وانطتني علاج .. وسمحتلي اشوف وجهي .. يممه شصاير بخديداتي ردت اصرخ بالانكليزي.
صايرات حمر على بنفسجي ونص الجلد مصلوخ .. رأساً بجيت هوَ خزرني وكالي :-
- ها ثُرىٰ بدينا؟ خليج قويه كله يروح بالعلاج
- يأذيني
- هسه يخف الألم
كتبتلي علاجات ورحنه للصيدليه رادت امي تدفع لعب لعب وظل يحجي عليهه .
استخدمت العلاجات وصار وجهي زين واختفت الآثار نهائياً طلعت خوش دكتوره من طرف ابو الرزايل بعد..
مر اول شهر اجتنه نهى زياره كلنه فرحانين بيهه بس اجت محمله !!
امي واسماعيل ظلو يحجون وهيَ ماعليهه بأحد .. جايبتلنه ملابس ومشتريه لاامي تلفون امي مااخذته وظلت تحلف
نهى.. ماما والله من مصرفي ماماخذه شي من البيت .. يوميه وليد ينطيني مصروفي واني مااحتاجه لان مامقصر عليه بشي اخذيه عليج الله
ظلت تحلّف بأمي كوه قبلت اخذته بينما اني مامهتمه منين جابته المهم اجوني ملابس ع الجاهز .. كلش فرحت بيهن لان عن قريب خطوبة تقوى حسب كلامهه لما يتعين يلا يجي ومابقى شي ويطلع إسمه .
خابرتني نرجس واجه إسماعيل الموبايل بإيده .. إحتاريت اجاوب لو لا ؟؟
غير مااحجي وياهه المن متصله؟؟
نهى تدري أشرتلي ردي..
رديت عليهه واجاني صوتهه تبجي!!.
حسب مافهمت محتاجتني لان واكعه بمشكله!!
اكول معقوله متصله اثاري علمود مصلحتهه..
ماانطيتهه كلمه وسديته منهه..
ماانسى كلامهه لما اموت..
نهى جانت كاعده من انطيت الموبايل لااسماعيل كالتلي :-
- شكد اكو جوه ايدج هسه؟
- 60 ألف
طلعت موبايلهه فلتت الخط وطلعت الرام وانطتنياه !!
استغربت
- شنو هاي ؟؟
- خلي إسماعيل يشتريلج خط من ذني العندج وخابري بيه صديقاتج
امي تخبلت ظلت تصيح عليهه
- ولج نهى هسه شيكولون ؟؟ شبينه ماعدنه؟ خليهه اني اشتريلهه حتى لو نوكا
نهى.. ماما شبيج عندي والله اني اشتري وخلي موبايلي لثريا
- ولج نهى هسه يكولون داخلين على طمع
- مو اني خطبتهم همه الي خطبوني
- نهى اسمعي حجايتي ورجعي الموبايل بعد يومين تصير بينكم مشكله لاسامح الله يظل يعيرج
- ماما شلقضيه سويتيهه كلش هسه اخواتي واريد اشتريلهن سويت جريمه
- بس مو تنطين موبايلج
- اني باجر اطلع اشتري هوَ وليد كال شتريدين اطلعي اشتري لان استحي اطلع وياه ف اگول راوست موبايلي
سكتت امي بس ماراضيه .. اما اني مكيفه وطايره ومحلقه بالسما .
موبايل اخر اصدار واجاني لباب داري ارفضه ليش..
اول شي سويت حساب فيس بس علمود اطلع صفحة ابو الرزايل .
خليت نهى تسويلي وعلمتني عليه ورأساً بحثت صفحته اول ماكتبت ماهر الـ... بالانكليزي طلعلي .
ظليت اگلب بصفحته منشوراته كلهه خواطر فصيحه وفيديوات بيهه حكم . همزين مفعل المتابعه والمنشورات يعني اكدر اشاهد صفحته بدون طلب .
دزيتله طلب صداقه والصفحه بإسمي بالانگليزي .
لحظات ووافق ع الطلب يعني مكنك الاخ .
شويه واجتني رساله منه
- اهلاً وسهلاً نورتي الفيسبوك
رديت عليه واني داخلي يرجف
- بنورك استاذ
بعد مارد عليه رغم شافهه..
مر كم شهر وقرب الدوام.. اجتنه نهى تسوگت للكليه وهم اشترتلنه وياهه طبعاً اكثر شخص مستفاد اني..
واني مثل المگبره مااگول لا كله اخذه..
داومت اول يوم بالكليه محد وياي..
نرجس مسويه أنضمام لشلة شرشبيله..
تعرفت على بنيه بالمرحله الرابعه هم حبابه..
ظليت مااثق ببشر.. علاقتنه صارت سطحيه
اول ايام ماداومت وضايجه حيل..
لما صار تلث أيام ولكيت رساله ع الماسنجر من ابو الرزايل يممه شصار بيه طرت طرت
- ليش متداومين؟؟
فرحت رأساً جاوبت
- تعبانه
- سلامتج .. بس تره بلشنا ناخذ محاضرات ولحد الآن 4 محاضرات فاتن عليج
- ياا.. استاذ وشلون اخذ المحاضرات؟
- شوفيهن عند صديقاتج
- بس كون مامحذرهن ينطن
- ههههه لا
جاي اسولف ومااحس الا اتصال كاميرا..
عزا يتصل عليه كاميرا..
شفت رجليه طالعه..
لابس تراك رصاصي..
اني اشوفه بدون ماارد بس هوَ مايكدر يشوفني...شبعت ضحك النوب يحرك بأصابعه.. لحظات وانتهى الاتصال..
طول يلا اجت رساله :-
- اعتذر الموبايل شمر واتصل بيج بالغلط
- ههههههه انصدمت بالاصابع طلعت بوجهي
دزلي ضحكه طوووويله خلتني اشبع ضحك
شويه وكال :-
- تدرين البنات كلهه تسويلي إغراءات وتتقرب مني بس اني ادري بسوالفهن ومانطيهن مجال !!
إستغربت شجاب هذا الموضوع ؟! رأساً كتله
- اني وياهن؟
- لا لا ابد انتِ بعيده كل البعد عنهن
كتله :-
اني اشتغليت الفرصه مادام يريد يفضفض خل استغل الموقف
- عندي سؤال إلك بس اتمنى تجاوب
- تمام انتِ إسألي سؤال واني إلي حق اسأل
- زين.. ليش طلعوك من جامعة بغداد صحيح الحجي السمعته ؟؟
- اسمعي اني اول مره راح احچي السبب واول شخص راح يعرف انتِ
اني مدري شحسيت من كال اول شخص انتِ حسيت نفسي معلگه بالسما.
كال :-
- اني طلعت من الجامعه بذاتي مو همه طلعوني لان ردت المرحله الرابعه ومانطونياهه وماقدروني رأساً قدمت على جامعة ذي قار ولحد الآن محد يعرف السبب وهاي انتِ اول وحده تعرفين شي خاص بيه
- ها
- اي..واجه دوري اسأل
- إسأل
- شنو سمعتي؟
- سمعت انو عندك حبيبه بالجامعه وتركتك ف ماكدرت تكمل علمود هيَ موجوده والعميد طلعك علمود سمعة الجامعه
اني سمعت هذا الكلام من ساره وصارله هواي يحوس بكلبي
رد عليه :-
- ههههه لا مستحيل اسوي هيج ويه طالبه واصلاً مامفكر بالزواج نهائي
مااعرف شلون كتله بسرعه
- لشوكت؟
- اولاً ناوي اتزوج ببغداد وبيتي هسه ديبنون بيه وثانياً مستحيل افكر اتزوج طالبه عندي او وحده من الجامعه حتى لو مو طالبه عندي .. اخاف من هذا الكلام وهاي الاشاعات مثل ماطلعت هاي الاشاعه وسمعتيهه راح تصير على زوجتي المستقبليه ف خليني على إختيار الوالده افضل واني هم اذا لگيتهه مااتأخر لحظه !!
شكد جنت طايره بس من شفت حچيه سچينه وانغرست بوسط گلبي !!
كتله واني الدمعه بطرف عيني
- الله يرزقك بنت الحلال
راح واني هم ماذبيت نفسي.. وحاولت اقنع نفسي واخلي الشي طبيعي بس وين الدمعه مچلبه بيه..
ثاني يوم داومت السنه جايتنه بنيه عميه وجايبيلهه رحله مال طلاب .. اني ردت اصالحهه بس عدهه صديقه..
اني واگفه بباب القاعه مالتنه والقاعه هوسه كلهه الطلاب تسولف واني بس صافنه ماعندي أي صديقه مقربه..
منتكيه على باب القاعه ومر من يمي ابو الرزايل ووياه دكاتره اثنين عفس حواجبه وسد إذنه كال :-
- صووتجن
- زينين
- صوتجن صوتجن مو شلونجن
اني عبالي يكول شلونجن اثاري يكول صوتجن عود قللنه لان هوسه وصوت عالي .
هوَ إنتبه للموقف ومات ضحك .. وجهه صار احمر من الضحك ويعض بشفته يريد يحبس الضحكه .
اني هم اضحك بس فشلانه..
عصر عيونه وضحك من اعماقه والدكاتره الوياه ميتين ضحك...
يبو ع الفشله صخام ولطام..
واحد منهم يجينه ومدرسني بالمرحله الاولى كاللي
- شلونج ثُرىٰ وين صرتي بس كون نفس مستواج بقيتي
هوَ حجه هيج وهذا عقچ حواجبه وظل يخزر بيه وبيه ورافع حاجبه
- اي استاذ نفس مستواي الحمد لله
- والله اني قلقان عليج خاف ينزل مستواج وانتٍ طالبه مجتهده
- ههه شكراً إستاذ
ضحكت لو إجتني الخزره صاروخيه.. خزرني وأشرلي بحواجبه عود ادخلي . اني ظليت واكفه لان هوسه كاللي:-
- ثُرىٰ إدخلي جوه منا الدكاتره
- استاذ هوسه جوه
خزرني واشر بحواجبه بنفاذ صبر كال بنبره عبالك يهدد بيه :-
- ادخلي ثُرىٰ
دخلت ركض واني افكر بخزرته هاي غيره لو شيسموهه ؟؟
.
.
من رجعت للبيت اجت بنيه جيرانه رادت ادرسهه يوميه وتنطيني مبلغ بسيط اني مارفضت من ارجع من الكليه بدل ماانام اخذهه ع الاقل استفاد من المبلغ..
هيَ بالثاني متوسط واني ماعندي كتاب ف اضطريت اراسله بلكي يدبرلي هوَ عنده معارف هواي..
بالـ2 ونص دزيتله :-
- السلام عليكم استاذ بلا زحمه عليك إذا تكدر تدبرلي كتاب ثاني متوسط
رأساً جاوب وهذا احلى شي احسه مهتم بيه بسرعه يجاوب
- ياماده؟؟
- فيزياء
- تمام تدللين
- شكراً
داومت ثاني يوم والبنات يتنادسن واحس اكو شي بيه ويقلدن عليه !
كعدنا بالكافتيريا اني وفاطمه صديقتي الجديده
شفت نرجس بإيدهه موبايلهه ومتوجهه علينه.
اني درت وجهي وغلست عليهه..
وصلت يم طاولتنه انطتني الموبايل مالتهه.
رفعت راسي عليهه كتلهه :-
- شكو؟؟
اشرتلي ع الموبايل وكالتلي
- شوفي
اخذت الموبايل وشفت .. اول ماشفته توسعت عيوني مصدومه !!!!!
أنصدمت صدمة حياتي !!!
- أحـدهـم أراد أنْ يـقـتل مـابداخلي
فـ قتـل حـبه ..
~~~~~~~~~~~~~~~~~~~~~~~~~~
ثُرىٰ
كعدنا بالكافتيريا اني وفاطمه صديقتي الجديده
شفت نرجس بإيدهه موبايلهه ومتوجهه علينه.
اني درت وجهي وغلست عليهه..
وصلت يم طاولتنه انطتني الموبايل مالتهه.
رفعت راسي عليهه كتلهه :-
- شكو؟؟
اشرتلي ع الموبايل وكالتلي :-
- شوفي
اخذت الموبايل وشفت .. اول ماشفته توسعت عيوني مصدومه !!!!!
أنصدمت صدمة حياتي !!!
منشور مكتوب بيه ( نبارك للأخ ماهر الـ... بمناسبه عقد قرآنه !!) ومسوين إشاره لإستاذ ماهر وصورته هوَ والدكاتره سويه !!
شفتي رعشت وحيلي باد..
بلعت ريقي بصعوبه والعبره خنگتني..
ماتحملت قساوة المنشور رأساً إنحدرت دمعه حاره على خدي ووكعت ع الموبايل !
الغصه صارت بوسط صدري ومااگدر احچي !
إيدي گامت ترجف..
ظليت ارمش بعيوني مصدومه..
شفتي ترتعش.. اريد اصدك الشفته مااگدر .
طلعت من الكافتيريا رأساً اريد اشتم هوىٰ احس النفس ضاق عليه ومااگدر اتنفس.
مباشرةً طلعت من الكليه لبيت أهلي مااتحمل ابقى ثانيه بالكليه .
وصلت للبيت بدون مااشوف احد رحت للغرفه طلعت موبايلي اريد اصدك الشفته واريد اشوف شوكت سواهه وإنطاه گلبه !!
ركضت فتحت الموبايل ورأساً لصفحته ودخلت ع المنشور أمس الساعه بـ3 مشايته !!
يعني وره ماراسلته بنص ساعه !!
شمرت الموبايل وظليت اشهگ وابچي .
دخلت مروه تفاجئت بوجودي..
تهز بيه وتستجوبني تريد احجي..
بس اني مااكدر اريد اصرخ واريد ابجي براحتي .
هيَ لوحدهه سحبت الموبايل وفتحته شافت المنشور .. صفنت عليه وجرت حسره .
كالت :-
- چا شگلنه؟؟ تعاليتي وانكسرت رقبتج .. اكيد اخذ من مستواه وعلى مرام إمه وإختياره
عطت بيهه
- مررررروووه البيه يكفيني گلبي يريد يوگف وعيوني مغوشه كلمه زايده تلكيني بالنجف اطلعي احسللج.
هزت إيدهه وطلعت.. بقيت اشهگ وابجي ليش سوه هيج ونظراته؟؟وغيرته؟؟وخزراته؟؟
تمددت واني بملابسي ذبيت الشال حسيته يخنگني .. تمددت بفراشي وطفيت الاضويه وظليت ابجي واغفي .. مااعرف شكد مر وقت
دخلت مروه جايبتلي غده رفضته وماإلي شهيه لأي شي. كعدت مكرفصه ومروه مقابيلي تواسي بيه..
موبايلي ع الميز الصغير .. لحظات ورن صوت المسج مال الماسنجر بإذني.. ماعندي شخص اراسله غيره بالماسنجر كله.
اول ماسمعت الصوت صبت دمعتي وظليت اشهگ..
مروه رادت تشوفه عطت
- عوففييييي
بهالأثناء دخلت تقوى باوعتلي وباوعت لمروه والصدمه تعتلي ملامحهه..اشرت لمروه من شافت حالتي
- شكو؟؟ شبيهه ثريا؟؟
مروه.. الأفندي خطب
شهكت ولطمت على صدرهه
- عززززاااا
مروه نترت بيهه بعصبيه مفرطه :-
مروه.. شكو هوَ شنو عزه رجال عزابي وخطب عليش العزه؟؟ منطيهه وعد؟؟ منطيهه كلمه؟؟ اختج من وحدهه تحلم وهاي نتيجة احلامهه
تقوى.. مررروووه لاتحجين هيج
حجيت والعبره ببلعومي وكوه ينسمع صوتي
- حقجن ماشايفات نظراته ماشايفات إهتمامه.. كل القاعه صار إسمهه "ثُرىٰ" يلهج بأسمي ليل ونهار حتى مرات احسه يرزلني حجه علمود يحجي وياي هاي غير غيرته من الاساتذه ومن احجي وي استاذ احمد يتخبل. غير خزراته وغير عيونه الفاضحته شأريد احجي؟؟.. يتأملني مثل القطعه الثمينه ويخاف عليهه تتخدش....
مرات احسه منتظرني اجي اصرحله واني طبعاً هم چنت منتظرته بس الاثنين خسرنه من تقدم هالخطوه.. صح مامنطيني أمل بس نظراته من يحجي وياي جانت أملي وفرحتي وتخيلاتي كلهه عليهه.
حبيته وتعلقت بيه وخصوصاً شخصيته تنحب بسرعه وهوَ هم ماقصر بأهتماماته علقني بيه وهسه خطب !!
احبه ياربي شلون بيه راح اموت احس بلوكه وگعدت على گلبي اني شجابني شورطني؟
مروه.. خل يولي لو صدك يحبج اجه وخطبج
- سبق وگاللي مااخطب طالبه عندي ومو من الكادر التدريسي هم
مروه.. يعني مخليج تأيسين بس انتِ لاطشه
تقوى.. مروه شبيج يختي؟؟ اسكتي افضل وانتِ كومي تغدي وخل يولي مايسوى دمعه من عيونج الحلوات كلهه تتمناج وهوَ الخسران ماكو بنيه بفطارتج بهالوقت.
..
يگلها : آعـذريني قسيـت وياج
يلـما مثلـج بنـيه حبتني
.
.
.
ماإلي شهيه لشي ومااريد اشوف احد.. إتصل موبايلي گعدت على حيلي شفت إسمه !
سحبت نفس وإنطيته رفض .
دخلت لرسالته ع الماسنجر لكيته كاتب بيهه
- ثُرىٰ أگدر اجيكم؟ جايب الكتاب وياي إذا تكدرين اطلعيلي
من شفت رسالته عبالك ذكرني ظليت ابجي وأناشغ .. ظل يتصل والموبايل بإيدي لزمته وشمرته بالحايط يلا سكت وهديت .
لحظات وإندگ الباب مال بيتنه.. سديت إذاني وتمددت .. امي ماشفتهه ماادري شگايلات البنات..
دخلت مروه وبإيدهه كتاب انطتنياه
- هذا الكتاب منه انتِ موصيته عليه.
- جيبي
وكفت واني مقرره احرگ الكتاب وماهر وياه
اخذت الكتاب واريد اطلع
مروه.. ولج مخبله وين موليه
دفعتهه وهيَ مچلبه بيه
مروه..ولج ثريا امي ماتدري بيج كلنالهه مريضه اذا تشوف عيونج تشك تعالي لاتفضحينه مساع رادت تدخللج وگوه لزمناهه ثررريااااا
- وخري خل احرگه وخررري
دخلت تقوى وأثنينه
ن كعدني وسحبن الكتاب من إيدي
تقوى.. كااااافي تخبلتي شبببيييججج انطمري واسكتي مامتوازيه تسوين هيج اذا تريدين طلعي من كلبج الكتاب شعليه؟
- مااريد شي يذكرني بيه
- باجر تلگيه كدامج بالكليه وعود هم سوي هيج امداج يالغمه
مروه.. عمت عينج اذا يشوفج هيج يحس بلذة الانتصار خليج قويه
- اي مو عندي معركه ويحس بالأنتصار
- ولج كومي رتبي شكلج بينيله مايهمج شي ولا معلقه حياتج عليه
- اي بس خل اشبع بجي أريح گلبي الي انسرق
- اشبعي خيه اشبعي
تقوى.. هسه وين نلگه البوليس تلزم ماهر ويرجعولج گلبج
ضحكن بس اني ماضحكت عود يريدن يغيرن عليه جو بس اني وين كلما اتذكر المنشور اشبع بچي..
بجيت بجيت بجيت لما أيست وطحت صفح.. تالي كمت مسحت عيوني وخليت باودر وكحله اخفي آثار الدموع
طلعت سلمت على أهلي حتى مشتاقتلهم كله من وره القاسي صار نص يوم ماشايفتهم.
صليت وكمت ساعدت بالعشا وتعشينه وسوالف أسماعيل كالعاده تشبع ضحك واني كلما احاول اضحك ارجع اتذكر الصار وانتكس.
ثاني يوم داومت لبست أرقى لبسه عندي وخليت كحله ومورد خدود شويه..
دخلت للكليه وتوجهت لقاعتي لگيت القاعه محد بيهه يلا همزين خل اگعد.
گعدت وظليت اراجع.
شويه وحسيت شخص دخل للقاعه رفعت راسي ومتأكده ميه بالميه هوَ.. لان دائماً يجي من وكت .
مثل ماتوقعت دخل ..كال"صباح الخير" واني رديت عادي ماخليت شي يبين عليه.
خله الجنطه مالته ع المكتب وظل يطلع أوراق ويسفط.. رفع راسه باوعلي صافن اني مدنگه واسوي نفسي مااشوفه .. سحب نفس راد يحجي ماتحملت ابقى رأساً خليت وگمت هوَ باوعلي بنظرات متحسره تنهد ودنگ ..
طلعت بره ع السريع إفتريت واني گوه مصبره روحي.
صار وقت المحاضره...دخلنه وجانت اول محاضره إله.
گعدت بالرحله واليوم البنيه صاحبة الرحله مامداومه يعني بس اني بالرحله.. شرح المحاضره وگال انقلوهه.. ظل يفتر بس هالمره مايضرب بالقلم.. هالمره يضرب بالحلقه !!
كلما يمر من يم ستيج يضرب بالحلقه !! وگف يم الستيج مالتي ضرب بالحلقه صوتهه رن بإذني وغرس قامه بگلبي..
ظليت مدنگه ابين مامهتمه وحتى بشكله ماباوعت..
حسيته صافن عليه...
ظل واگف يمي...
من شافني مامهتمه..
تنهد بغضب وعگد حاجبه..
راح وگف يم الميز مالته....
گال :-
- طلعولي صفحه 10 .
اني ملزمتي كامله بس الطلاب كل فصل وحده يعني صفحه 10 من الفصل الثاني ماادري ياصفحه بلمزمتي .
هوَ متقصد هيج يسوي كل مره يگول إسم الموضوع وإحنه نطلعه سواءً بالملزمه الصغيره او الچبيره..
إنداريت ع البنيه الوراي وگتلهه على إسم الموضوع وهوَ ماصدگ رأساً نتر :-
- ثُررررىٰ إندااارري
- إستاذ بس اخذ إسم الموضوع
- اني گلت الصفحه وانتِ طلعيهه
- ملزمتي قديمه
- مشكلتج شوفيلج صرفه مو تظلين كلساع ملتفته.. هذا الحجي مايمشي وياي بحجة الملزمه كلساع ملتفته !
دنگت راسي..
ادري بيه يريد حجه عليه..
البنيه الوراي رأساً همست :-
- الصفحه 68 عندج
حيل على عناده..
طلعتهه وظليت أأشر بالمحاضره .
كملت تأشير..
رفعت إيدي مخنوگه گتله :-
- أستاذ أگدر اطلع؟؟
نتر بعصبيه ومخنزر بوجهي :-
- لا خل انطيكم تحضير واطلعي
هزيت راسي وسكتت..
إنطانه التحضير وكملنه..
اني اريد اطلع احس نفسي مختنكه..
كلما اباوع بحلقته نفسي ينكطع..
خل اطلع وارتاح لان بس ابقى لحظه اموت..
بنيه كالتله "اريد اطلع" غير فشلهه فشله من هاي التمام .. شكد حقير ونذل عود إذا كلتي اطلع اسوي بيج مثلهه..
خليت وسكتت إلمن احچي بعد عايزه فشله لو رزاله.
ظل يفتر بالقاعه منتظر وقت المحاضره يخلص يلا يطلع.
تعب الظاهر .. تعال وتكركح يمي !!
گعد على رحلتي .. جسمه على الخشبه العريضه ورجليه صارن ع الخشبه الصغيره.
مسافة سانتيمات وتطخ إيدي بإيده !
طلع إيده البيهه الحلقه وحطهه على رجله !
عود شوفي خطبت !!
ظل يلولح بإيده وحاطهه على رجله صايره مقابيل وجهي كلشش..
اني متت من القهر .. رفعت حاجبي بإستهزاء وابتسمت تك خد..
تدنيت ببطئ مستهزأه..ومقوسه حواجبي
انطيته صفحتي نص من ظهري وخليت إيدي على خدي .
هوَ شافني هيج سويت رأساً كام .
وگف وظل يخوزر بيه بعصبيه وضاغط على شفته حيل . وعيونه مجحضه يريدن يطلعن .
كور قبضة إيده وعصر عيونه بقوه وطلع من القاعه كلهه.
عباله يحرگ گلبي مايدري احرگه مايحرگني.
يريد كون يگعد يمي وابجي من اشوف حلقته هه !
كملت محاضرات وطلعنا.. رجعت للبيت ولگيت نهى عدنه كيفت وظلينه نسولف.. تباوعلي بشفقه بس مافتحت الموضوع وياي سوت فضل..
- ولجن وين موبايلي؟
مروه.. شدراني امس رگعتيه بالحايط وين راح ماندري
- ياا امداني كله من وره ابو الرزايل راح الموبايل.
رحت دورت عليه وادعي كون يشتغل.. شغلته مابيه شي بس فطر ومن شغلته اشتغل. كالت نهى هذا الفطر باللزگه مو بالشاشه همزين.
صفنت عليه وتحسرت كالت بقهر :-
نهى.. خوب مامقهوره؟
- يا عليمن اصلاً ماعليه بيه بس اعتب على اختي مااعتب ع الغريب
- انييي؟؟؟
- اي جا ياهو جدي
- شمسويه؟؟
- تدرين بيه راح يخطب وبالجذب ماكلتيلي واني اراسل بيج.
- لج والله ماكدرت اگول خاف تنقهرين
- اول وتالي ادري ع الاقل اسمع منج ولااسمع من الغريب هسه لو اني ادري مااتشمتت نرجس بيه
- ثريا طلعي من بالج كافي
- طلعته بس هوَ يريد يحرگ گلبي.. يتحارش گوه مروّه
- غلسي
- اي اليوم درت وجهي عنه بس شصار بيه يمكن راد يسمطني راشدي ينطبع بخدي لما اموت
- اشو شخصيته ثگيله مو مال تحارش
- شنو قصدج اني اتحارش؟؟
- خايبه لا مو هيج قصدي بس هوَ احترگ گلبه لان تجاهلتي ف بيج وماتتجاهلين
- زين منو خطيبته؟؟
- خليهه مفاجأه إلج لباجر تعرفين خطيبته منو؟
- عليج الله منو؟
- انتظري باجر وتعرفيها اني اكوللج
- مااتحمل
- لا تحملي لباجر
- زين حلوه؟
-والله كلمة الحق تُقال...البنيه تجنن كلش حلوه
- احلى مني؟؟
إبتسمت مجامله
- اي احلى منج
- يححح ولج اني اختج
- واذا اختي اني داكول كلمة الحق
- امم غيرتج الـ(دا) تتبغددين عليه
- ههههه نتأقلم ويه الوضع الجديد
.
.
.
ثاني يوم رحت للكليه وتفاجئت من ابو الرزايل دخل ووياه جنات الحرگت خديداتي !!
صحيح اني سحبت الگدر بس هيَ سحبته متقصده لان اني جنت واكفه يمه رادت تحرگ صفحتي بس تفاجئت من سحبته .. زين بخدودي ولا بكل جسمي..
اجت تتفيك وتعوج بحلگهه ام فچوچ ظليت مصدومه شكو المن جايبهه !!
ظل يشرح وهيَ گاعده على ستيج ويانه منتبهه لشرحه.. اني اتخبل منهه لان احلى مني .
دار وجهه بعدين عرفنه عليهه والله وطلعت دكتوره ام فچوچ.
طلع هوَ وهيَ بقت تشرحلنا اسلوبهه وطريقة معرفتهه بالطلاب وتعوج بحلگهه چنهه بيهه شرجي .
لما طلعت وانصدمنه بساره وكفت وكالت :-
ساره.. بنات تصدكون هاي تصير خطيبة دكتور ماهر !!!
فتحت عيوني على وسعهن مصدومه !!
معقووله !!!!؟
ظليت مصفصفه ومحتاره على ياجهه انقهر !
مو گال مااخذ من الوسط الدراسي نهائياً اشو ماخذ دكتوره ووياه جايبهه !!
يريد يحرگ گلبي اكيد !
ظليت اتحرگن واغلي وهيَ تباوع بيه تتذكرني وع الأغلب غيرانه مني..
خلصت المحاضرات ورجعت للبيت ميته قهر .
سولفت لنهى وكالتلي... هيَ هاي المفاجأه !!
يعني جانت تدري بيهه .. شوفتني صور خطوبتهم واني اتحرگن.. ام فچوچ لابسه بدله لون فستقي وهوَ قاط لون نيلي والكشخه والهيبه تچتل.
نزلت دمعتي ورأساً كمت لان واعده نفسي بعد ذيج الليله ماابجي دمعه عليه.. بس من شفت هيبته ونظرات عيونه تذكرت كلشي..
نهى ماتبقى عدنه جايه تسيوره صغيره وراح تروح ظليت ضايجه طالعه روحي ومنا وليد صاير مايخليهه اكثر من أربع أيام.
للعصر الولد طلعو للشغل ونهى نايمه متناسيه جية وليد نهائياً .
إندگ الباب بس شنو عبالك معزوفه تربد وتكسر .. محد موجود من الولد .. اني طلعت ركض ادري بيه هذا عليوان هيج يدك الباب.
صحت
- وسم وزقنبوت عليوان جايتك اله اكسر راسك
فتحت الباب ورأساً سحبته من أذنه لوره الباب خطيه ظل يضحك
- ولك شكايتلك اني مو ناهيتك من هاي الدگه؟؟
