رواية هشاشة قلب الفصل الرابع عشر بقلم العباديه
فـلتسأل عيوني ..
لماذا أراكَ فيها بهـٰذا الحب؟
وقلبي تركني وسكنك..
ماذا فعلتَ بي ..؟؟؟؟
إحساسي معك . . أحتللت جزيئات وقتي . .
ورسمت لي بنظراتك . . وغيرتك . . وقربك . . معك حاظري سيكون . .
أنتَ . . أنتَ
جعلتني أرتفع .. وأحلق بأحلامي كلها معك
وأنتَ . . أنتَ
قمت بتركي لأهوىٰ . . وأرتطم بواقع مؤلم . بترككَ لي . .!!
أصبحَ . . قَلبي هش . . يُعاني الخذلان
رُبما أنـا إنسانه جامحه بالحب !!
وأنتَ لا تستحق كُل هـٰـذا... !!
قويه أنـا بـكَ أو بدونك ...
سأكمل حياتي . . . .
لـٰـكن سأظل أعاني هشاشة القلب !
الخاطره بقلم المبدعه ام جود
user32967927
~~~~~~~~~~~~~~~~~~~~~~~~~~~~
ماهر ...
من إجت العطله ظليت اتذكر ثُرىٰ واشتاق لسوالفهه ولروحهه المرحه .. مااعرف هاي الطالبه بالذات كلشي بيهه يجذبني .. ابسط شي كلما اشوف الدرج أتذكرهه وأضحك .. دائماً اني مسلط عليهه أي موقف تطلّع بيه طفولتهه اكشفهه ..
من تحچي وي الدكاتره..
يشتعل عندي أحساس الغيره..
مشاعر جديده.. وغيره..
أحاسيس تنمو مثل اليرقه..
بالبيت يگلولي انتَ بخيل بضحكتك بس وياهه انسى البخل..
طفوليتهه تضحكني وبراءتهه تسحرني.. خصوصاً بالعطله من شفت خدودهه وشلون سمنانه كلش عجبني شكلهه لايگ عليههه السمن وزايدهه جاذبيه.. والاحلى من هذا كله خجلهه وشلون تستحي تمشي لان سمنانه .. خلتني أنسى نفسي .
بس من إحترگن خدودهه تخبلت وضجت حيل .. مالحگت تتهنى بيهن يمكن اني حسدتهن كد ما ركزت بيهن وببشرتها الورديه .
.................
والدتي تلح عليه علمود موضوع الزواج وكبرت واريد اشوف جهالك وووو...
گتلهه اخطبيلي على معارفج.. مامفكر بيوم اتزوج طالبه عندي رغم مشاعري دتزيد ودتنمو بس أتغاضى عنهه واگول مشاعر وهميه لاأكثر بس علمود اتهرب من هالشي .. إضافه لشخصية ثُرىٰ أحسها ماتنفع تكون زوجتي وأم بيتي .. اني شخص جاد ونظامي بشكل .. واحب زوجتي تكون مثل شخصيتي أو مقاربه .
ثُرىٰ احسهه طفله مو گد مسؤليه وزواج مااگدر أأمن بيتي بأيدها , عفويه وماتحس بالمسؤليه ماخذه حياتهه ونسه وطيش وحركات طفوله .. صحيح مامجربهه بس خلال سنه عرفت شخصيتهه شنو..
خطبت بنت خالتي "جنات" دكتوره جامعيه ماقاصره جمال أو شخصيه إضافه لشخصيتهه القويه وغرورها خلتني اشوفهه مثاليه وأتغاضى عن باقي صفاتها .
لكن اشوفهه تذب نفسهه عليه وتسوي حركات اني مااتجرأ اسويهه بس أصبر وياهه يمكن لان خطيبهه وجديد عليهه ف فرحانه بيه وهيج تسوي .
للحظه تندمت على ثُرىٰ وكلت لو كانت مكانهه معقوله هيج تسوي ؟؟
استغفر الله طردت الافكار من راسي وحاولت افهمهه واجاريهه..
اكثر شي حرگ گلبي ردة فعل ثُرىٰ من خطبت توقعتهه تنقهر أو تضوج بس صدمتني من دارت وجهه عني ومتجاهلتني !!
من سوت هيج شطت من الحرگه ومحتار بشنو اطلع حرگتي .. خزرتهه وهيَ متجاهلتني عادي عدهه الموضوع !! اني ليش اريد احرگ گلبهه وإذا خطبت ؟؟!!
راسلتهه واريد اعرف شنو ردة فعلهه وشتكول .. لان تتصرف وي الأمر طبيعي ولا عبالك..
حاولت استفزها بس إنصدمت من إجابتهه !!
خلتني أحتار شأگول..
حرگتني وخلتني اشتعل بنار وانطفي بنارر
حسيتهه هانتني وقللت من قيمتي وأستاهل !
اني ليش راسلتهه؟؟ وليش ابرر تصرفاتي إلهه ؟؟؟؟وليش أغار عليهه وليش وليش ؟؟؟؟؟؟؟؟؟؟؟؟؟؟!!!!
~~~~~~~~~~~~~~~~~~~~~~~~~~
ثُرىٰ...
امي حچت بالموضوع ويه خالتي ام فدك ورحبوا بالفكره وظلينه نسولف لما شويه نريد نطلع ونسمعلك طلق كلش قريب على بيت خالتي .. وصوت عياط مال ولد !!!!!
ركضت خالتي فتحت الباب واني وراهه مديت راسي شفته ولد شخصيه وهيبه ولابس زي عسكري وحاط المسدس بإيده ورمى طلقتين لفوگ !!
فدك ظلت ترجف وتبجي !!
وخالتي هم ظلت تصيح عليه وتتوعدله !!
احنه مصدومين شكو وشصاير ماندري ؟!!
خالتي صاحت
- فففدددددك شجابه هذا شجاااابه؟؟؟
ظلت تبجي وترجف وتصيح
فدك.. مااعرف مااعررررف
- فوتي خابريه لا والله انتقم منج انتقااام
ركضت لموبايلهه رفعته وظلت تخابر وترجف .. حچت وياه وراح !!
اني وأمي وتقوى صافنين .. امي سألت خالتي :-
- منو هذا؟؟
- خيه واحد خطبهه ورفضناه لو الأمه انگلبت على روسنه يگلهه اكتل اهلج واكتل اليخطبج واخذج ومااخليج تتزوجين
- ياا
امي دب الخوف بوجهه احنه بعيدين عن المشاكل مو النوب يكتل اسماعيل وهوَ عمود البيت.
إنسحبنه ومن وصلنه للبيت امي حذرتنه مانحجي لااسماعيل على الشفناه بس نكول ابوهه مايقبل وخلاص .
خطيه أجه نص الليل تعبان .. تلكيته مبتسمه لان وره هالشي ينتظره خبر صاعقه بالنسبه إله .
- الله يساعدك
- ويساعدج
- شعجب اليوم متأخر
- اخذت شفت ثالث الصبح والعصر وهسه بالليل من 8...لـ12 اريد ألم روحي وراي زواج ومصاريف هواي هم يله اجمع مبلغ زين كون مااقصر عليهه بشي
حچايته خلتني ادمع والعبره خنگتني .. خليت وطفرت من يمه مااريد اشوف شكله من يدري .
ثاني يوم من كعدت شكله مگلوب گلاب وبس يزمخ
حتى اني خفت منه ولا حچيت وياه .
وصلني للكليه وراح .. بقيت طول اليوم قلقانه علمود إسماعيل .. حتى ابو الرزايل مامهتمتله ولا عبرته اصلاً.
طول ماگاعده يخوزر بيه ونظراته غاضبه !
مااهتميت واني مقرره بعد مااباوعله اصلاً..
شرح المحاضره وزاد وقت من محاضرته.. ظل يسولف وي الطلاب بهالوقت..
ساره ونرجس وشلتهن سويه كاعدات كلهن..
گالتله نرجس :-
- دكتور شنو رأيك لو نصبغ قاعتنه بلون حلو وهادئ يريح النظر احسن من الأبيض وعلى حسابنه من كل طالب مبلغ بسيط
هوَ جاوب بأريحيه كاللهه :-
- اي عادي شنو المشكله اذا تحبون جمعوا مبلغ واحسبوا تكاليف الصبغ وبالنص عليه اني اتبرعلكم
نرجس.. زين دكتور شنو اللون نختاره؟؟
- هذا شي بكيفكم انتو شوفوا لون واتفقو عليه
ساره.. دكتور شنو رأيك باللون الاخضر عكروكي ؟؟
اول ماسمعتهه طفرت التفتت عليهه لكيتهه مثبته نظرهه عليه مبتسمه بإنتصار وشماته ورافعه حاجبهه ونرجس يمهه تضحك .
هوَ سوه الامر عادي كال :-
- خوش لون حلو .. بس لو تختارون لون وردي لو سمائي يفتح النفس ويسوي واهس للدراسه
سكتن وبس يتمضحكن !!
ظليت اتشعوط من الحرگه..
شكد حقيره هالنرجس..
هسه عرفت ناسي !!
اني شكد غبيه اثق بأي بشر يلاكيني !!
وهذا اكبر غلط ارتكبه بحياتي..
اتوقع كلهه مثلي.. وماتسوي شيطنه.. بس طلعت غلطانه حيل !
رجعت للبيت ضايجه وطالعه روحي خابرت فدك رأساً
- فديكان هسه تشرحيلي شنو هذا وإلمن جاي وشيعودلكم؟؟
ردت وشهكت تبجي
فدك.. ثريا شأسوي بروحي اكتلهه وارتاح؟؟
- شبيج احجي؟
- هذا الضابط قبل فتره تعرضت لتحرش وهوَ ساعدني وعاقب الشاب التحارش بيه من عرفني وعرف اسمي مدري منين دبر رقمي وخابرني وظل يوميه يتصل ويراسل اني اجاوبه على گد السؤال لان اله فضل عليه بس تفاجئت من يريد يخطبني..
رفضته وگتله مااگدر اتزوجك..
عباله هنت رجولته وقللت منه..
إجه لأبويه وخطبني وگالله بس اشوف البنيه وارجعلك جواب..
من اجه بابا حاچاني اني رفضت..
رفضت لو گلب الأمه وظل يعيط عليه..
يگلي علقتيني بيج واحبج واني مامسويه شي..
من اليوم اجيتو خطبتوني..
حبيت استفزه راسلني..
هوَ بالأصل مستمر يدز رسائل مامبطل..
اول مارسللي رساله جانت قبل لاتجون..
كتله :- اني هسه راح انخطب واخلص منك..
من سويت هيج إجه رمى وسوه هذا الموقف..
- خوش انتِ عندج تاريخ عظيم وي التحرشات
- اي گد ما جمال
- دگعدي لاتتفنگحين عليه بس اريد اسألچ سؤال
- اسئلي
- هم تراسلين إسماعيل لو معلقته بيج؟؟
- اي اراسله بس هوَ مايقبل يگلي مااريد ألوث برائتج بعلاقه خليني رأساً اخطبج واليوم خربت فرحتي گلبي هسه يريد يوگف تدرين صار سنتين من إسماعيل اعترفلي بس كال ألم نفسي واتقدم وهسه خربت بسببي
- إسماعيل إذا يحب يحب بصدق وحبه مابيه دغش ف حاولي لتخسريه
- ان شاء الله بس كون ماگلتيله على هذا؟؟ والله اذا يدري يشنقني
- لا محد گال شوفي ابوج شيسوي
- بابا خابره وگالله شلون ترمي بالمنطقه وممكن تعرض حياة شخص لخطر اكدر اشتكي عليك واسجنك .. يگل لبابا هيَ الحكومه كلهه بإيدي شنو تسجنني بكيفي ارمي وبكيفي اتصرف
- ياا عزا هذا مبين خطر
ظلت تبجي وتشهگ وتندب بحظها الخلاه گدامهه..
سديته منهه واني كلش مقهوره على حالهم..
ظليت ساكته وإسماعيل بس معصب ويدخن !!
لااول مره اشوفه يدخن !
ماگدرت احجي وياه خاف يعيط بيه ..
قرر هوَ يحجي وي خالي ابو فدك ويگله اريدهه وامي تعصر بإيديها وتدعي خايفه لاتصير مشكله وي هذا الضابط والنوب يصير شي بإسماعيل..
شكد حاولنه وياه يكعد ماقبل كال هسه اروحله
طلعله بالليل ورجع ميت من الحرگه ويصيح الا اقتله..
امي ظلت تلطم وتهدي بيه وهوَ ينشال وينرگع..
النوب هد على أمي يكلهه ليش ماكلتيلي..
كلنه ظلينه خايفين وعايشين بحالة رعب..
حسن من شافنه شلون واكفين ونبجي بزاويه سحبه وظل يعيط عليه ..
حسن... هذا انتَ النحسبك ابووونه هيج تسوووي شوف اخواتك شلون خايفات ويبجن عليمن علمود مررره؟؟؟؟ هوَ كله بخبال شبيك اكعد وخل نتفاهم ماكو شي ينحل بالعصبيه
اسماعيل التفت علينه من شاف حالتنه شلون متكومين وامي تبجي والولد مجلبين بيه .. فرك وجهه حيل بعصبيه ودخل وي حسن للغرفه وسدوا الباب..
ظلينه خايفين..
شويه وطلع حسن كال :-
حسن.. ماعليكم مايصير بيه شي دام اني موجود مااخليه وإذا هيَ تريده ناخذهه من حلگ السبع
امي بجت وكالتله :-
- هاي من بدايتهه مشاكل جا النهايه شلون؟؟
حسن.. ماكو شي يمه ليش تفاولين مادام اله نفس بيهه خل يتوكلون
- جا شأريد اني غير سعادته بس خايفه عليه من هذا الضابط واحنه ماإلنه ظهر بس الله يباوعلنه
- ان شاء الله خير لاتخافين
من سمعت كلام حسن تطمنت شويه..
ثاني يوم اخذني حسن للكليه لان إسماعيل نايم وحتى للشغل ماطلع وماشفناه ولااجه صبح على امي هاي اول مره هيج يسوي !!
وصلني للكليه وراح..
دخلت أتمتخر بمشيتي..
شفت لجنه شكدددد وكله لبس وتفيك..
مدري شعدهم جايين؟؟ خير ياطير ؟؟؟؟
الكليه مخبوصه بيهم يجيبون ويحطون..
حتى ابو الرزايل مخبوص خبص...
كلساع واشوفه يطلع من مكتبه يمشي سريع..
يروح بإيده ورقه ويجي بإيده ورقه !
اخذنه اول محاضره وچانت لاام فچوچ..
گوه طقتهه اصلاً ماكدرت اهضمهه توغف على گلبي..
تدرس بينه وتعوج بحلگه بس هيَ كلمة الحق تنگال تفهم وتشرح زين .. طبعاً جا غير خطيبة ماهر شلون ماتشرح زين .
كلساع وواحد صچمها وماضابطه القاعه..
الهوسه تكتل ومن يتغزلون بيهه تظل تضحك لاترزل ولا هاي مكيفه بالغزل عشتو ..
اني اول رحله وي البنيه العميه همزين سترت عليه من جابت الرحله كلشي ماادري بالاخير لان كله سوالف هل افهم زين..
كاعده بالمحاضره ودخل ابو الرزايل..
أشر عليه وكال :-
- من رخصتج دكتوره بس اريد اخذ ثُرىٰ دقايق وارجعهه الج
هوَ يعاملهه رسمي بوقت المحاضره بس بالاستراحه عادي..
هيَ من شافته هيج كال ظل تزأر عليه وتنفخ بروحهه تريد تاكلني !
اني هم ظليت مصفصفه شيريد مني؟؟
گالتله والحرگه مبينه بصوتهه :-
- اخذهه عادي... اصلاً وجودهه وعدمه نفس الشي لان مسفطه !
عززا هاي اني المسفطه؟؟ جا منو كام مساع شرحلج ياحقيره .
كلتلهه :-
- ست قبل شويه جنت اشرح شلقضيه نسيتي ههه
حسستهه عبالك مخرفه بس بشقه هه.
ظلت تنافخ ومخنزره بوجهي دطيري تريد تفشلني عود ام الگلگ .
هوَ أشرلي بإيده بحركات متتاليه وينتر :-
- يلا يلا امشي معليج
ابتسمت بوجهه وطلعت وراه .. ظلت تركع براسهه بالكردي ههه.
مشيت وراه دخل لمكتبه ولزم الباب يريدني ادخل .. باوع بوجهي ودنگ كال :-
- دخلي
نصيت راسي اريد اذكره بكلامه . . رأساً فهمني وعرف اليدور ببالي كال :-
- ثُرىٰ دخلي رجاءً محتاجج كلششش !
يا محتاجني النوب؟؟ شيريد ؟؟
مدري شحسيت من گال هيج .. كل مشاعري وأوجاعي هاجت عليه من هالكلمه "محتاجج" ظلت تتردد ببالي !!
دخلت مدنگه..
طبگ الباب ودخل وراي..
راح كعد على مكتبه ومتوتر..
ثنه إيديه على المكتب وباوع بوجهي بتمعن..
كال :-
- ثُرىٰ بنصف السنه شفتي نرجس إمتحنت؟؟
رفعت راسي ماتوقعت هيج سالفه بايخه واني شعليه بنرجس
كتله :-
- استاذ اكو سجلات وطلعوهن قابل اني ادري
عصب وعكد حاجبه نتر بعصبيه وصوته علّه :-
- ثُرىٰ جاوبيني رحممممه للللله
خفت من شفته بهالعصبيه ووجهه صار دمايه وكلساع يفرك شعره ومخربطه لااول مره عكس كل مره مسفط تسفط..
ظل يضرب خفيف ع الميز بأصابعه ويهدأ بنفسه.. اني حبيت استفزه وألعب بأعصابه مادام محترگ
گتله :-
- إستاذ بعدنه ماممتحنين نصف السنه عود من امتحن اگلك
خزرني وعيونه توسعت بعصبيه .. طبگ حواجبه ورفعهن وشرايينه طگت .
من شفته هيج وابو فاضل ظليت ارعش من الخوف رأساً دنگت مااريد اشوف وجهه المرعب
كال بهدوء :-
- تستهزأين بكلامي شنو؟؟؟
رديت بسرعه وخايفه
- لا لاااا استاذ حشاك
- إذا تگدرين تفيديني احچي شفتيهه لو لا؟؟ واذا ماتكدرين ف اخذي راحتج مااخذ من وقتج
من شفت عصبيته وتوتره انكسر خاطري لان مو اول مره يسألني .
دنگ ومقرب اصابعه الابهام اثنينهن ويفر بيهن بتوتر .
گتله بهدوء :-
- اي
رفع راسه عليه مستغرب وعكد حاجبه
- شنو إي؟
- اي ممتحنه بيومها اتذكر قبل الامتحان راجعنه سويه بس بعد الامتحان اني طلعت من وكت لان فشلتني .
ضربته بسمار بس غلس عليه كال :-
- شفتيهه دخلت بالقاعه؟
- اي دخلت بالقاعه وامتحنت
- ها
- اي
تنفس براحه ورجع ظهره بالكرسي لوره ظل يفر بالكرسي صافن عليه واني كاعده .. ردت اكوم قبل لايطردني بس عيونه تتفحصني بحنيه كال :-
- شعجب ماسئلتي ليش ؟؟ اعرفج فضوليه
رفعت راسي متفاجئه
- هاا اني؟؟
- لعد منو؟؟
- عليمن اسأل؟؟
- علمود نرجس
- لا شعليه بيهه
- ماتحاجيهه شنو؟؟
ماحبيت افشله لان ذاك اليوم مفشلته فشله تسوه حياته .. كتله بإبتسامه كاذبه :-
- اي صارت بيناتنه خلافات
- اها
- اي
وگفت وهوَ وكف وياي ! شبيه هذا اليوم؟؟
الله يستر من هالسستر ..
مشيت للباب وهوَ وراي يمشي طلعت وسديت الباب بعده مامطبوگ لزمه بقوه وطلعلي راسه مداه عليه صار كلش قريب صفن بعيوني بسرعه ابتعدت خطوتين تنهد بحسره وطلع گدامي .
رجعت للقاعه وام فچوچ تخوزر بيه صاحتني يم الباب كالتلي :-
- شيريد منج ماهر؟؟
باوعتلهه متشمته قوّست حواجبي وكتلهه :-
- شغله
نترت بيه :-
- اي شنو الشغله؟؟
- كاللي لاتكولين عود اذا تريدين إسأليه
- اي طبعاً اسأله اكيد يگوللي
ابتسمت بشماته ورجعت لمكاني .
رجعت للبيت وكلساع اتذكر نظرات عيونه وشلون يتفحص بيه .. استغفر الله ربي الرجال خطب شعليه بي ..
اااوووف بس گلبي شيقنعه ؟؟
تونه صبينه غده واكلنه نسولف ونضحك وحتى اسماعيل شويه زين ويسولف علمودنه خلصنه غده ولمينه المواعين..
وكفت ع السنك اغسل مواعين واندگ الباب بقوه . . .
گد ما الدگه قويه طلعت اركض حتى نسيت الولد موجودين وهمه محذرينه نطلع نفتح الباب اذا همه موجودين..
فتحت الباب مديت راسي انصدمت بنهى بالباب وبإيدهه جنطه چبيره وعيونهه حمر دم .
واستاذ ماهر وراهه..
رجعت راسي بسرعه لان مالابسه شال..
هوَ كالهه :-
- يلا راح اروح اني
نهى.. هاي هيه روح الله وياك
صعد بسيارته وراح !! نهى دخلت وبجت اول ماشافتني !!
اختلست ورجليه بادت !
- نهى شبييججج
اهلي اجو يركضون
مسحت دموعهه ع السريع وابتسمت بكذب .. الولد تخبلوا وهيَ عدهه الأمر عادي .
اسماعيل صيح عليهه
- شكو شصاايررر غير تحجيين؟؟؟
نهى.. ماصاير شي شبيكمم؟؟؟
حسن.. نهى تقنعيني ماصاير شي ووجهج مگلوب غير جيتج بهالظهريه التصلخ ومحد دخل وياج شبينه نبزز
نهى.. خل ادخل اتنفس وافهمكم
دخلت للصاله كعدت واحنه ملتمين عليهه خايفين .. تقوى ركضت جابتلهه ماي شربته ونباوعلهه بخوف .. ضحكت وكالت :-
نهى.. شبيكم راح اغص انطوني مجال
اسماعيل هز راسه بعصبيه ونتر بيهه :-
- نهى تره وترتيني احجيي
نهى.. خويه كل الصار اني حامل وهاي رجعتي من الدكتوره الطفل بخطر وراد يموت من سمعت دقات قلبه ضعيفه انهديت ابجي ووليد يسكت بيه من شافني هيج كال روحي لااهلج ارتاحي عدهم لما يستقر الطفل يلا ارجع وهوَ جابني !
باوعتلي بتوسل خاف احجي لان شفت ماهر جابهه .. اني غلست وسكتت عرفت صاير شي وهاي كلهه جذبه
مروه.. ودوامج شلون؟؟
نهى.. هوَ كاللي اسويلج اجازه بس تمتحنين الامتحانات يدبرهه الي بواسطه
اسماعيل..وليش مانزل؟؟
نهى... هيج وقت لازم يعزل الصيدليه وخله بيهه عامل ف راح يركض
حسن... ماجاي اصدگ بكلامج
نهى.. شلقضيه يعني تشكك بيه؟؟ اني شنو مصلحتي اچذب عليكم اذا صاير شي اجي واگوللكم غير اخواني حتى توكفولي بس ماصاير شي صدكوني
هز راسه بهدوء وكالهه :-
- ارتاحي هسه ونشوف
- اي رايحه اتمدد
كامت وكلنه گمنا وياهه ..طگتهه ضحكه
نهى.. ياا شبيكم غير اريد ارتاح ادري جاييني تنگون عليه
ثُرىٰ... بس اني اجي وياج اسفطلج ملابسج
نهى... ههههه تعالي
دخلنا للغرفه اول مادخلت انهدت تبجي وتشهگ .. حضنتني بقوه وتشهك خلت راسهه على كتفي وتجر نفس بصعوبه متت خوف وحصرتني البجيه
- نهى نهى شبيجججج
نهى... ثُرىٰ راح اموت من القهر راححح اموووت
- اسم الله شكوو شصاير
دخلت امي ووراهه تقوى ومروه شافنهه وماتفاجئن .. امي تقربت يمهه كالتلهه بصيغة تهديد :-
- شوفي نهى مشيتي السالفه على اخوانج بس عليه ماتمشي انطيج وقت ترتاحين وتجين من كيفج تسولفيلي كلمه كلمه فهمتي ؟؟
سكتت وبس دموعهه تنزل بهدوء
- فهمتتتتييي نهههههى فههمتتتيي
نهى.. اي فهمت
طلعت امي وتقوى ومروه منتظرات تحجي.. تقوى اشرتلي براسهه عود گليلهه
ثُرىٰ... نهى شصاير ياعيني غير تحجين؟؟
نهى.. باعي اني صار فتره متخربطه واتقيأ وكل أعراض الحمل عندي عرفت نفسي حامل ومن جابلي وليد التحليل وطلع صدگ كيف وطار من الفرح .. مدللني دلال .. شأشتهي وشأريد وشأتنسى يجيب .. عايشين اني وياه احسن عيشه ومتفاهمين بشكل وحياتنه هادئه ومربوطه بروابط الحب ..
أمس گال :-
- بما إنو مرتي حامل وراح يصير عدنه عنون خل نعزم عمي ماهر وخطيبته
اني رأساً طفرت :-
- لا لا كلشي ولا خطيبته لو اموت ماادخلهه ببيتي
استغرب وعكد حاجبه
- ليش؟؟
- مااحبهه تتفيك هواي وتنحثل واني مااحب هيج شخص احب البشر على طبيعته
- وشعليج منهه المهم هسه نعزمهم نبشرهم حتى الوراهه نعزم اهلج هم نگوللهم
- لا اعزم ماهر وأمه احسن من خطيبته
- ها تمام حبيبتي بكيفج
خابره وعزمه گالله عود اطلع من الدوام من وكت علمود نجي .
خلص مخابره إلتفتتلي مبتسم
- بيج حيل تطبخين لو اجيب جاهز؟؟
- لا لا بيه حيل
تقرب بهدوء لمس بطني وظل يمشي إيده عليهه بحركات خفيفه تقشعرني .
- خوب مامتعبج الفصعون
- هههه قابل منو أبوه
- اه؟؟ هيج صرت ؟
- ههههه خل افلت قبل لاتكنكن عليه
شردت من يمه اضحك وهوَ يضحك
ثاني يوم گعدت من الصبح حضرت الاكل سويت 3 اطباق رئيسيه غير الاكلات السريعه ,, من كبب وبورك وسمبوسه .. كله حضرته .
صارت الساعه بـ11 اجت أم ماهر هيَ وموج رحبت بيهن وكعدتهم بالصاله .. أم ماهر خلصتهه تقلد وتكشكش .
قدمتلهه ماي بالصلاحيه.. لازمتهه من اليده الجانبيه وبإيدي الثانيه الكلاص .
أشرت بإيدهه بإشمئزاز وتعفس بملامح وجهه
ام ماهر.. لا لا عيني انطيني الصلاحيه اشرب بيهه مي
صفنت بوجهه مصدومه
- ليش؟؟
- شنو ليش غير انتِ لزمتي الكلاص بإيدج .. انطيني الصلاحيه اشرب بيهه بس لتلزميهه كولهه
انطيتهه الصلاحيه من اليده واني ميته حرگه هاي بدايتهه هيج النهايه شلون.؟؟
رحت للمطبخ ووليد گال خل افرش بالاستقبال السفره وانقل الاكل علما يجي ماهر لان بالدوام ..
ظل ينقل بالأكل وكلساع مسويلي حركه لو يگرص خدي لو يبوس گصتي ويبعد بخصلات شعري عن عيوني من ادنگ ارتب الاكل .
المطبخ بيه بابين واحدع الصاله وواحد ع الطارمه يعني ام ماهر تشوف شيسوي .
وگفت ع السنك ارتب مواعين الزلاطه وحسيت بأنفاسه على رقبتي .. همس
- كملتي حبيبتي
إلتفتتله
- اي كملت بس خل اقطع الليمون
- ها لعد اني رايح اكعد بالاستقبال علما يجي دكتورنا
طلع هوَ ودخلت ام ماهر للمطبخ تباوع وتكشكش رغم البيت يلمع نظافه وكلشي مرتب ونظيف وحتى لبسي مثلهم مبدله .
كالت بمياعه كالعاده مثل ماتحجي
- الله أعلم شمسويه للولد يدخل ويطلع لازگ بيج
- شنو قصدج شمسويه يعني؟؟
- انتن تعرفن بسوالف السحوره ماسحوره
- وشعرفني بهالسوالف قابل شفتينه كاعدين ليل ونهار عند الكشافين والسحاره الحمد لله حتى كشاف ماشايفه بحياتي
- اي مبين من خبلتيه للولد عبالك اميره مقابيله هو َكلچ انتِ بنت الفگور !!!
تخبلت من كالت هيج انهديت عليهه
- ومن شوكت صار الفقر عيب؟؟ اذا احنه فقرنه مانستنكف المهم عايشين بلگمة حلال وبعدين هسه تريديني تقنعيني طلعتي للدنيا غنيه تره الغنى بس لله وحده ويكدر رب العالمين بلحظه يگعدكم ع الحديده ف لاتحجين هيج يعمتي لان الله يباوع
هيَ تخبلت من حجيت هيج عبالهه اسكت مثل ذني التچمغ بيهه
انهدت بيه وتعيط
- وشنو قصدج احنه ناكل لگمة حرام؟؟ وتدعييييين عليييينه لج انتِ من تزوجتي وليد الخير لفه على وجهج وعلى اهلج الفگور صار براسكم خير وتحچون وتراددين فوكاهه !!!
دخل وليد يركض ويصيح
- شكو
موج... وليد جاي يتشامرن بالحجي
وليد كال :-
- نهى روحي للغرفه
من كال هيج متت حرگه يعني يطلعني اني الغلطانه؟؟
- ليش اروح للغرفه اني ممسويه شي هيَ الي بدت وتصيح بنت الفگور ششايفتني مجديه منهه
ام ماهر.. هاك هاك باع اللسان باع الصلافه ترادد بيه بعين صلفه ماكالت اكبر مني واحترمت شويه
- إذا اكبر مني ليش تصغرين بروحج وتريدين نصيحلج أُمي
هيَ ماتقبل واحد يصيحلهه بيبي من احفادهه كلهم يصيحولهه "أُمي"
- لج انتِ صدوگ متستحين قليلة ادب وتربيه
وليد نتر :-
- نهى روحي للغرفه اني هسه أشوف الحق ويامن
نهى.. لا حق ولا شي مااروح لأي مكان اني ماغلطانه وماسويت شي هذا مكاني هنااااا
عاط بعلو صوته وشرايينه برزت ووجهه صار احمر
- ننننههههىىىى ررروححييي
اني من حركتي ماكدرت الزم اعصابي هم عطت بصوت اعلى من صوته :-
- والنبي ماارررررررووح
فتح عيونه مصدوم شال الماعون مال الزلاطه ورگعه بالكاع من حرگته نزيت ورجعت لوره خايفه .
بهالاثناء دخل ماهر لان بابنه بيه خيط سحب .
من شاف وليد متهستر ويعيط .. هم عاط بيه بدون فهم لان شافه يعيط عليه
ماهر... ولييييددد لتعيط على مرتك... فهموني شكووو؟؟؟؟
وليد... روحيي داااكككوول رررووحي نهىىىى دتكسرين كلمتي؟؟
جاوبت بقوه ومامتهزه
- حلفت مااروح وعند حلفي
وليد.. لو تروحين للغرفه لو .....
ضحكت بإستهزاء
- كمل كمل لو اطردج بره البيت بس ماكو داعي اني اطلع بدون مطرود
ظل يأشر بإيديه بعصبيه ويصيح والغضب باين بكل جزء بيه
- انيييي كللللتتت هييييججججج؟؟؟؟؟
ماهر... ولييييدد اسسسكت لتحجي شي اهدوا اثنينكم معصبين ميصير هيج اذا تبقون واحد يكبس وواحد يرفع تصير مشكله جبيره
نهى.. لا ماكو داعي اني رايحه لااهلي
مشيت وانطيتهم ظهري
وليد.. نهى اذا طلعتي واني ماقابل مستحيل ارجعج !!!!!!!
إلتفتت عليه ودمعتي صبت !!
مسحتهه بسرعه لاتبين ضعفي وكتله :-
- وهاي اني رايحه
خليتهم واگفين بالمطبخ مصفصفين ودخلت للصاله وحالفه ماادخل للغرفه وبعدني على موقفي .. صحت موج اجتني كلتلهه تلم ملابسي .. امهه تصيحلهه مناك
ام ماهر.. مووووج شنو انتِ خدامتهه وتجمعين ملابسهه ناقصه إيد رجل
سمعت صوت ماهر عاط وهيَ خنست
دليت موج على مكان الجنطه وخليتهه تلم ملابسي جابت الجنطه واني لبست وطلعت للمطبخ لگيته گاعد بالگاع وثاني رجليه وايديه عليهن ومدنگ وشكله مخربط .. شعره مكفش وعيونه حمره .
من وكفت رفع راسه باوع عليه بعتب وصفن يباوعلي من رجلي لحد راسي وصدره يرتفع وينزل بعصبيه ويتنفس سريع فاحط . دار وجهه عني وعيونه مركزهن على رجليه .
بلحظه گلبت بيتنه گلاب .. قبل شويه چنه شمحلاتنه مثل العصافير..
ماهر أشرلي ووگف گال :-
- اني اوصلج
طلعت للسياره واول ماكعدت انهديت ابجي واشهگ .. ماهر يتنهد ويذب حسرات .. التفت عليه مستحي حيل ووجهه احمر
- نهى اني اعتذر نيابة عن الوالده قسم بالله مستحي منج
- لا شعليك انتَ
- معليج بحچي وليد مال ماارجعج تره جذاب هسه من يهدأ البيت عليه ويخلى مكانج يظل يضرب اخماس بأسداس
دنگت ابجي وهوَ يهدي بيه
وصلني للبيت وراح .......
ثُرىٰ... صخام بويهي هاي هيج سوت بأقل من ساعه لو باقيه اكثر شتسوي همزين يمه ماتزوجت ابنهه جان مراويتني النبي عربي
مروه.. شو دكعدي انتِ صاحلج هسه هوَ وماتزوجتي
ثُرىٰ... لا يباا اني مااقبل لان هاي امه حيه
رغم نهى تبجي بس شبعت ضحك
نهى.. ولج هسه هوَ خاطبج وانتِ ماتقبلين هههههه خرب يومج
- اي عمي اضحكي راويني هالسنينات اللؤلؤات اشبع بيهن شوف
- ههه
بدت الأبتسامه تختفي بالتدريج ورجعت بجت
نهى.. اني غلطت راددتهه شلون سويت هيج ماادري حتى اني متفاجئه من نفسي والله ولاارادد ولا اعلي صوتي بس اليوم من دون الأيام فقدت
مروه.. لا والله زين جاوبتيهه حتى بعد ماتعيدها وتندگ بيج لو ساكتتلهه تظل تزيد ماتنقص بس من سويتي هيج تابت وهسه
اسبوعين يمل ويرجعج وكولي ماكالت
تقوى.. لاتنسين الحمل اثر عليج خلاج تفقدين اعصابج تصير خربطة هرمونات
خليناهه تنام وتمددنه يمهه حاضنينهه واني أتلمس ببطنهه بيهه عنون فدوه لله شوكت يجي يونسني .
للعصر گعدت وكلساع تتفحص الموبايل تشوف متصل لو لا وكل مره تخيب آمالهه بعدم وجود شي يدل على اشتياقه مثلهه !
ظلينه نحاول نضحكهه وسولفت لاامي وامي لامتهه لان راددت ام ماهر وهيَ اكبر منهه وحتى نهى متفاجئه شلون ردت لان نهى بطبيعتهه مسالمه وماتحب المشاكل ابد تقريباً احنه عائلتنه كلهه هيج.
داومت ثاني يوم واجتني نرجس تشهگ وتبجي وتصيح "ساعديني" ظليت متفاجئه شكو
نرجس.. فدوه ثُرىٰ فدوه ماعندي غيرج
- شكو شصاير ؟؟
نرجس ..........
گالتلي كلام خلت شعري راسي يوگف !!!!!!!
فـمَـا أكـثَرَ الأخـبَار إنْهُ قد تـزَوَّجَ !
فهَـلْ يـأتِـيَــنِّي بِـالطَّـلاقِ بَـشِـيرٌ ؟
~~~~~~~~~~~~~~~~~~~~~~~~~~
ثُرىٰ
داومت ثاني يوم واجتني نرجس تشهگ وتبجي وتصيح "ساعديني" ظليت متفاجئه شكو
نرجس.. فدوه ثُرىٰ فدوه ماعندي غيرج
- شكو شصاير ؟؟
نرجس... ثُرىٰ فدوه سوي علاقه وي دكتور احمد !!!!!
گالتلي الكلام خلت شعر راسي يوگف !! ظليت مصدومه وموسعه عيوني عليهه اريد افترسهه بقوتي..
عطت بيهه
- شنو شنو شنوووووووو؟؟؟؟
نرجس.. اوكفي لتفهميني غلط فدوه خل اشرحلج
- وشكالولج عني مثلاً ؟؟؟ انتِ صدك وحده ادبسزز وحقييرررره
- لا لا عليج الله بس خل اشرح .. اسمعي دكتور احمد بذيج الفتره تقربلي وكام يتودد عليه وقشمرني بعدين عرفت علمودج لان اني صديقتج طلب مني انسقله وياج واني رفضت لان مااحجي وياج هوَ هددني يگلي
"بجرة قلم احرمج الكليه" ومستقبلي هذا فدوه ساعديني سوي شي
متت من الحرگه
- والله لانعل ابو الكليه اني شعليه وتورطيني كايلتلج يلعب بعقلج ذاك احمد وروحيله اني شكو؟؟؟؟ وبعد من تحجين انتبهي لكلامج لا ورب العزه اراويج وجهي الثاني تره لحد الان اني مامسويه شي شنو اسوي علاقه وي احمد ششايفتني اسوي علاقات ؟؟؟
- لا ثُرىٰ مو هيج فدوه ابوس ايدج بس خل اشرحلج شسوه
عطت بكل صوتي
- مااااعلييييه شسوووه مااعليييه
- انتِ تكدرين تساعديني والله تكدرين
دفعتهه وعطت بعلو صوتي
- كتلللججج مااااعللللييييه
ظلت تسحب بيه وتريد تبوس ايدي واني ادفع بيهه ماانسى كل كلمه كالتهه بحقي لو اموت..
خليتهه وطلعت روحي فايرررررره بحياتي ماتوقعت هيج توصل نذالتهه حتى تصيرلي جرة إذن من أي بنيه بعد .
رجعت للبيت لكيت نهى بالحمام وتتقيأ..
- اهوو بدينه بسوالف النساوه الله يساعدج يممه موت
ماتحجي وبس لازمه راسهه وكاعده مكرفصه وعيونهه تجري
غسلتلهه وكومتهه وهيَ تبجي..
همست الهه :-
- تبجين على وليد لو من النساوه؟؟
نهى... اثنينهن
ظلت تشهك وتبجي
نهى.. هذا أقسى وقت امر بيه المفروض هوَ اقرب الناس يوگفلي مو عايفني
- انتِ عفتيه
- يعني تريديني اسكت واخليه لو يطردني لو ترزل بيه براحتهه
- اسكتي لاتعيدين السالفه ويحترك گلبج مو زين ع الطفل
سكتت وراحت تبدل ملابسهه .. نساوتهه كلش صعبه بس تتقيأ وتتوجع واني وياهه احس اني الاتنسه مو هيَ..
العصر گعدنا..
لمينه البيت واني غسلت البرانيه ..
اندگ الباب واني بره بعدني...
فتحته وتفاجئت بنرجس وامهه وياهه !!
ظليت صافنه لااخذ ولاانطي..
إمهه ابتسمت بوجهي ابتسامه مزيفه تخفي خوف وقلق جبير..
- شلونج يمه
- اهلاً خاله تفضلو تفضلو
سديت الصونده ودخلت لاامي كعدتهه يمهن ورحت بدلت دشداشتي وقدمتلهن ماي..
ردت أطلع من الاستقبال بس ام نرجس كالتلي :-
- اوكفي بنيتي تعاي خل احجي وياج
- ها خاله اي
كعدت مقابيلهه ونرجس يمهه مدنكه وتلعب بأصابعهه..
بلشت تحجي عن الثقه وعن الصداقه انطتني محاضره شطولهه وقصتلي قصة حياتهه حتى دخت منتظرتهه شوكت تسكت..
اخر ماتوصلتله
- ثريا انتِ مثل بنيتي مستقبل نرجس بإيدج !!
رفعت راسي عليهه كتلهه بنتره :-
- خاله اني شعليه قابل شأسوي؟
- شوفي بنتي خطأت خطأ جبير ولو يدري ابوهه وعلي يشنقهه بس اني مااهون بيهه وهم اكلت مني المقسوم حتى ماتعيدهه وتخسر هيج صديقه مثلج..
- هوَ شنو شصاير اني شعليه؟؟
- شوفي هذا دكتور احمد متقربلهه وسوالف وضحك وهدايا ....(قطعت كلامهه)
نزلت راسهه وظلت تبجي وتمسح دموعهه بشيلتهه اني متت گلبي انكسر بالنص.
أردفت
- صعبه عليه اكول بنتي هيج بس والله اذا يدري ابوهه يگلب الدنيا وحتى اني يطلگني بهالعمر تقبليهه يبنيتي
- خالتي اني بشنو اكدر اساعد؟؟
- اسمعيني خل اكمل..
من تقربلهه احمد كالهه انتِ عاجبته ومخيل عليج من زمان ولان نرجس صديقتج تقربلهه من رفضت هددهه بس مااهتمتله.. كام واخذ دفترهه مال العام نصف السنه مدري وين وداه وغير بالسجلات وخابر اللجنه مال بغداد على الكليه وكاللهم جاي ينجحون بالطلاب بدون امتحانات.. اجت اللجنه ودققوا ولگو صدك لادفتر نرجس ولادرجه إلهه بس الشهاده وع الاساس مزوره.. انطوا لدكتور ماهر مهله علمود يلگه الدفتر لو فصل هوَ ونرجس يعني لا دكتور ماهر يداوم ولا نرجس وحتى يمكن ينسجون
- عززااا اشو ماسمعت هيج..زين اني شنو اكدر اسوي ؟؟
- احجي وي دكتور ماهر يحجي ويدكتور احمد لان هوَ صديقه حسب ماسمعت
- زين ليش اني احجي وي دكتور ماهر؟؟
- غير هوَ اقاربكم؟؟ بلكي وين الله وام البنين يحل هاي المشكله نذر عليه ذبيحه لوجه الله.. اذا يدري ابوهه يموتهه واني هم ماادري والله العظيم لما طاحت كلشش يله گالتلي
أمي گاعده وتسمع وكلساع طاگتني بخزره واني أتهرب من نظرات عيونهه .
ام نرجس.. ها يمه تحجين وياه؟؟
- خوش اني باجر اروحله واحجي وياه
- فدوه رحتلج
كامت عليه المره تبجي وتبوس بيه !!
والله هضيمه واحد يتوسل علمود ضناه !! لو محترمه نفسهه ومامسويه هيج جان ماذلت امهه
هالذله !!
طلعن وامي هدت عليه لعبت بيه لعب
- انتِ غبيه من يوم يومج اني شكلت مو كلتلج لاتدخلين نفسج بالمشاكل؟؟ محد يلوم اسماعيل من راد يبطلج والله تتقشمرين بسرعه وهسه يثريا اذا طحتي بمشكله والله والله ابطلج وتحلمين بالكليه
- جا اني شعليه؟؟
- شعليج وهذا حاط عينه عليج؟؟ اكيد من شافج كال خفيفه بلكي بيهه مجال مايدري عقل ماعندج
خفيفه !!!
من سمعت كلام امي ظليت اشهك وابجي وادگ على راسي شطت من الحرگه
- الا تردوني اتكدر يله ترتاحون حسره عليه الضحكه حسره عليه اسولف كل كلمه وكلتو فاهيه ، مخبله وهسه خفيفه بعد بعد طلعوني جايه من الشوارع والله لو اموت وتخلصون مني ولا هاي العيشه الحاطين عينكم بس على ثُرىٰ ياهوَ الكام وصاح بيهه... دوشك رزايل وسويتوني المخبله سويتوني كل الصفات المو زينه مايلگن بس ثُرىٰ
كعدت بالكاع ومددت رجليه ابجي معقوله صدك حچيهم؟؟
شبيه عقلي؟؟ صدك اني مخبله؟؟
رحت لفيت راسي وظليت ابجي جوه الغطه..
اجت نهى تگعد بيه وتهزني..
- ثُرىٰ گومي انتِ جبل مايهزك ريح... ثُرىٰ ثراوي ها ماتذكرتي مهوري يلا انتِ مو تريدين نصيحلج ثُرىٰ تدللين بعد ليل ونهار اسميج ثُرىٰ بس لاتبجين منو يضحكني
- نهى وخري عني والله طاگه روحي
- لج كومي معليج بأمي هسه تهدأ أعصابهه وتصالحج كومي لاتبجين بعد روحي
- ما
عاطت عيطه نززتني
- اخخ ييمممه تحرك
كعدت ركض
- شنوو؟؟
- لج الطفل تحرك تعاي حطي ايدج على بطني
تتلمس ببطنهه وتضحك وتصيح تحرك .
حطيت ايدي كلشي ماكو !!
- شو ماكو؟؟
- هاي داحس بيه اني
- ياا بس انتِ شنو؟
- تلمسي وشوفي
ظليت اتلمس بس كلشي ماكو !
دنكت على بطنهه حطيت اذني كل عقلي اسمعه لو احس بيه .
رفعت راسي ولگيتهه حاصره الضحكه بشفتهه.
اول ماكعدت عدل ضحكت من اعماقهه
نهى.. هههههه يلا كافي بجي .. نصبت عليج يمج حذاج شيحركه وهوَ بعده لحمه
- يعني مايتحرك جذب!
- اي ههههه
بعدني اريد ارزلهه وسحبتني لحضنهه وتضحك..
ظليت هادئه بحضنهه...
وظلت تسولف عليه من راحت شهر عسل..
وتسولفلي على مواقفهه هيَ ووليد بس كلساع تجر حسره تشگ الگلب..
هذا طلع قاسي مثل عمه..
بالجذب لاخابر ولاسأل عليهه وهيَ تتحرگن..
المغرب گمنا صلينه وسوينه العشا..
أمي دايره وجهه متنگه واني هم زعلانه..
تعشينه واني بس ساكته والسفره هدوء قاتل عكس كل مره..
إسماعيل قره ملامحي گال :-
- شنو هذا الهدوء الغير مُعتاد؟؟ شصاير ثريا اليوم ضايجه ومبينه باچيه وامي وجهه مايگصه الطبر فهمونه شكوو؟؟
امي رأساً ردت عليه :-
- ماكو شي يمه كمل اكلك لايظل بالك
حسن.. ليش ماتحجون عود؟؟
- هسه غير كلنالكم ماكو شي لاتلحون
سكتو وكملنه عشا.
امي دوم تگول "الزلم ماتتورج بكلشي" دوم تسولفلنه تگللنه الرجال مو كلشي يدري لان بعد يومين يعير وتبقى السالفه براسه مو مثل المره.
وهاي طبيعتهه..
الا اذا تصير سالفه جبيره يلا تحجي لااسماعيل..
كملنا وغسلنا المواعين وكفينه البيت..
من ردت انام... امي دخلت الغرفه كالتلي :-
- باجر روحي حاجي ماهر وگليله على هذا احمد كلشي تحجيله بالتفصيل وهوَ يحلهه لاتدخلين روحج بمشكله فهمتي؟؟
دنگت حاصرتني البجيه من اسلوب امي كله نتر واني مامتعوده على هيج .
- اي فهمت
طلعت معصبه وعاگده الحواجب... ردت ابجي وذني ظلن يضحكن بيه مايريدني ابجي
مروه... ياأُختي صح نحجي عليج وندري بيج نسبة السخافه زايده عندج بس مامتعودين عليج تبجين
تقوى.. مرررروه شنو سخافه؟؟ تره جاي تجرحين بمشاعرهه هاي اختج
مروه.. قابل مجذبه
تقوى.. اكرمينه بسكوتج لو سمحتي .. اصلاً حياتنه بدون ثريا باهته هيَ التضحكنه بسوالفهه وعفويتهه شفتي اليوم ع السفره ضوجه وملل لان هيَ زعلانه
حضنني نهى وتقوى ومروه تباوع هزت ايدهه وراحت
نهى.. عابت هالوجه ولي وبعد لاتسوين وي اختج هيج
مروه... شمسويه كاتله جدهه بس حچيت كلمة الحق
- خلي الحق الج ياام حق
ظلينه نسولف ونضحك ومتجاهليهه وبس تتحرگن وكلساع تعوج شفتهه ماعاجبهه.. لو تهز إيدهه
فرشنه بالگاع ونمنه وهيَ بقت لوحدهه ع السرير.
صرت بالنص ونهى وتقوى محاوطاتني..
نطفي الكلوب وهيَ تشغله.. نطفيه وترجع تشغله.. نهى عاطت بيهه خنست.
تونه نريد نغفه وانشال الغطه من علينه..
دفعتني وتضحك
مروه.. وخري سويلي مكان
- ماإلج
- ما اريد مكاني
تقوى.. تعالي يمي
دخلت بيني وبين تقوى وظلت تبوس بيه بكل قوتهه
مروه.. آسفه آسفه شعندي غيرج اني حبابه
ظلينه نضحك عليهه وهيَ تبوس بيه
ثُرىٰ... ولج خدي شفطتيه
مروه... اشفطه الج بعدد
ضحكنه ونمنا..
كعدت الصبح بدلت وطلعت تريكت وصبحت على امي عادي ولا عبالك متعاركين اي همزين فكت وجهه مااتحمل زعلهه.. صبتلي حليب وابتسمتلي يممه غير ردتلي العافيه.
كملت ورحنا للكليه..
اول مادخلت رأساً لمكتب استاذ ماهر..
دكيت الباب ومتأكده موجود..
اجاني صوته ودخلت صبحت عليه وكتله :-
- إستاذ انتَ سئلتني على نرجس واني كتلك امتحنت بس دفتر نرجس استاذ احمد الماخذه
استغرب وعكد حاجبه
متفاجئ !
- شنو؟؟ احمد شعليه؟؟
ظليت أعصر بأصابعي ومحتاره شلون اشرحله؟؟
- هوَ آآءء .. شسمه شسمه
عاط بصوت شبه عالي ؛-
- شسممه احجيييييي
- طلب من نرجس شي ومن رفضت سوه هيج
- اي شنو الشي غير اعرفه؟
ظليت اعصر بأصابيعي مااگدر اكله شراد ابو گزگوزه..
باوعلي مخوزر ونتر :-
- ثُرىٰ احجي شكووو؟؟
- إستاذ صيح لنرجس خل تجي تسولفلك مااگدر احچي
- ليش متكدرين؟؟
دنگت وتنهدت بقلق
- ماأكدر
- تمام هسه حدزلهه طالبه تصيحهه
طلع وسد الباب شويه ورجع گعد بمكانه يفتر ع الكرسي ويباوع بيه رافع حاجبه ويضرب بالقلم بحركات متتاليه ع الميز بس صوت القلم مسموع .
دخلت نرجس شافتني وانهدت بجي !!
هوَ ظل صافن يباوع بيه ويرجع يباوع بيهه !
كالهه :-
- اكعدي فهميني شكووو؟؟
- اي
توجهت للقنفه الكاعده عليهه اني رادت تكعد اني رأساً طفرت .. وگفت وهيَ انصدمت من سويت هيج ظلت تشهگ وابو خاولي مصدوم يباوعلنه..
غيرت طريقهه وراحت ع القنفه المقابيلي گعدت عليهه
هوَ فر كرسيه عليهه وكالهه :-
- اشرحيلي كلسي بالتفصيل
- دكتور هيَ السالفه << شرحتله كلشي >>
من وصلت لطلب ابو گزكوزه ماحچت بس هوَ ماتخفى عليه خافيه كالهه :-
- شنو طلب منج دكتور احمد ورفضتيه؟؟؟
باوعتلي ودنگت..
بلعت ريقي بصعوبه وكالت :-
- كاللي اريدج تنسقيلي وي ثُرىٰ واسوي وياهه علاقه لان هيَ صديقتج !!
اول ماگالت هيج طفر واگف.. فتح عيونه على وسعهن وعصر إيده بقوه !!
التفت عليه يزأر وميت حرگه...
خزرني بغضب وضرب بإيده ع الميز
عاط بعلو صوته :-
- لعد شگلت اني شگلللتتت؟؟؟؟ ياما حذرت وحذرت بس محد ياخذ النصصصيييحه توقعت طبعاً
يباوع بيه ويحجي معصب ووجهه مدخن.. گتله بنبرة خوف وصوتي يرجف :-
- استاذ اني ماعليه والله
ظل يأشر بإيده ويهززهه حيييل
- شلووون معلييج شللللووون؟؟؟؟
- شنو اني شسووويت؟؟؟
دار وجهه وانطانه ظهره فرك وجهه حيل بعصبيه وإندار يسحب نفسي بهدوء ويحاول يهدأ نفسه .
ثنه إيديه ع الميز وسحب انفاس فحطان أشرلي بإيده بحركات متتاليه :-
- اطلعوا برررره اطللعووا
نرجس.. دكتور والدفتر
ضرب على الميز بقوته وعاط بعصبيه
- اطلعووووو ددداااكووووول
طلعنه نتراكض والخوف مالي گلوبنه باوعت بيه نرجس وبجت اني مااهتميت إلهه واصلاً ماباوعت بجهرتهه الزفره .
لخاطر امهه حاچيته ولخاطر دمعتهه الكسرت گلبي بالنص .
رجعت للقاعه وافكر بتصرفه وحرگته من گالت نرجس كلماتهه..
ليش هيج يتصرف شنو معنى تصرفاته؟؟
شويه واجت بنيه كالت يريدج..
رحت لمكتبه دخلت لگيته كاعد ع الميز الاوراق كومه مقابيله ويگلب بيهن ووجهه محتقن..
رفع راسه عليه كال بنتر :-
- يكول احمد ماكو هيج شي ومامهدد نرجس اصلاً
باوعتله بإستهزاء :-
- چا يگلك مثلاً
- اعرف تره اني مو غبي بس اريد دليل عليه
- دور الدفتر بمكتبه
باوعلي يستهزأ بيه
