رواية نهوة عمامي الفصل الرابع عشر بقلم مرج البحر
سارة: هذا كلام سيف واني نايمه ما ادري بروحي ساعه اضحك ساعه ابجي ساعه اصرخ واني طبعاً كاعده بس مو بوعي وبقيت اكثر من ساعتين اني على هذا الحال واخر شي احس ضهري انكسم بالنص وفزيت وعيت على نفسي وكلت لسيف الحكني راح اموت من الم ضهري ضربوني على ضهري سيف كال انتي تدرين شنو جنتي تسووين كتله لا والله ما حسيت بس من ضربوني على ضهري وانشليت صرت ما اكدر احرك رجليه وثاني يوم الصبح سيف خابر اهلي واجه اخي سالم ومرت عمي عزام لن امي جانت بالعمره واخذوني يمهم وبقيت اكثر من اسبوع ما اتحرك ورجعت دكتور مفاصل وكال صاير عندج انزلاق بالفقرات الخمسه الاخيره وصار سيف وين ما يكلوله على سيد يروح ويجبه وبعدين خابرنه السيد البلعماره وكال راح انطيج كلمه ترددينها بس ابد ما تعوفينها كتله شنو كال تكولين باسم ياهو كتله شنو معناها كال همه الجن يخافون من هاي الكلمه وبقيت اردد بيها وصدك ثاني يوم كدرت امشي بس قليل وبعدين واحد من الساده كال لسيف اذا تكدر تجيب ذيب وخليه بلبيت وصدك سيف خابر صاحبه عنده ذيب وجابه وبقه الذيب يمنه بالبيت اسبوع بالنهار نربطه لن نخاف على الاطفال بس بليل كل احنه نام بغرفه ونقفله علينه وندخل الذيب يبقه للصبح يفتر بالبيت والحمد لله من جبنه الذيب راح الجن والله اكثر من ثلاث اشهر احنه عشنه معانات بس عدت والحمدلله
بس معاناتي وي بيت حميد و ولده ما تخلص
.
.
.
.
.
بعد مرور فترة
وبيوم 15شعبان سيف راح لكربلاء واني اتفقت مع مرت ياسر ومرت عمي حاكم ومرت اخوي رسل وسوينه عشاء ورحنه للامام سعيد نحيي هذا الليله المباركه ورحنه قبل المغرب بشويه وزرنه وصلينه وقرينه زياره وادعيه والحمد لله وبقينه لحد الساعه 10بليل ورجعنه للبيت واول ما طبيت لبيتي بعدني ما فاتحه الباب عرفت بيتي بي شي وجانت وياي زينب بت ياسين ومؤمل ابني وكلت لزينب عمه البيت احد طابله مو على سدت ايدي زينب كالت عمه خاف يوسف طاب كتلها ما ادري هذا الحجي بعدنه بلطرمه الخارجيه ومن فتحت باب المطبخ ودخلت للغرف لكيت الكنتور مفلش ومبيوك فلوس اني اتهسترت وكمت الطم على وجهي وطلعت رحت على جيرانه المقابلينه عدهم كامره والمره من شافت حالتي كالت خاله راح تموتين على كيفج كتلها خاله والله مو الي ذني امانه يمي لو ماخذين مالاتنه والله ما انقهر ولا اتخبل بس ذن امانه عمتي اقبال جانت رايحه لبغداد عدها مراجعه للدكتور موجود بيتهم مرت حسين حماي وايات حماتي وهاي ايات من سمعت بالصار كامت تحجي وتلوم بيه وليش عايفه بيتج وحتى اليريد يروح ما ينام بالامام مثلج رحتي من العصر ولنص الليل وانتي ماكو واني عقل ما ضل براسي وهاي تلعلع فوك راسي عفتها ورجعت على بيت ام حنين جيرانه وخطينه طلعت التصوير من الساعه الرحنه وبقينه نباوع اني ومرت ياسين وام حنين والساعه ب ثمانيه وانشوف ابن حماتي جنان يطلع من بيت عمي حميد ويروح يطفر على بيتنه ويبقه اكثر من ساعه ويطلع اني نقلت التصوير بتليفوني ورجعت للبيت ولكيت فاضل ابن عمي ومن شاف التصوير كال اني هسه اروح على حسين هو الباكنه اسمه حسين فاضل كال اني هسه عفته يم اهلي بلكت الكاه بعده وراح فاضل ورى شويه رجع وجاب الفلوس وفاضل كاض حسين ملخه تملخ ومرت حسين حماي مخابره على عمتي اقبال وخابرتني عمتي اقبال وكالت
الفلوس ورجعن بعد لا تكلين لسيف من يجي من كربلاء كتلها عمه شلون ما اكله واني بيتي نداس والكنتور مفلش كتلي
اي هو طفل لا تكولين واذا على الكنتور من يشوفه كولي يوسف ومؤمل تعاركو وفلشوه
لا عمه هذا الحجي ما يفيد اني من يجي سيف اكله بلصار وهوه يتصرف كالت
هسه يعارك اخته جنان وتصير مشاكل
لا جنان شعليها قابل هيه موديه ابنها حتى يبوك
وسديت التليفون وبقيت الليل كله اني ما نايمه من الهبطه وثاني يوم سيف رجع ورى صلاة الضهر ومن طب اني جنت انضف بالبيت وعيوني مورمه من البجي من شافي كال
هاي شبيج ليش هيج وجهج
ما بيه شي الحمدلله على السلامه وزياره مقبوله ان شاء الله
عوفي الزياره كولي شبيج
البارحه هذا الشي الصار وسولفتله وهوه تخبل بسرعه ركب دراجته وراح على بيت جنان
من سيف راح على بيت جنان وداك الباب وطالعتله جنان ومسولفلها وشايفه التصوير وسيف طاب على حسين لاكيه نايم ومكعده شابعه كتل ملخه تملخ وجنان باقيه تتعذر من سيف وسالها سيف على رجلها كالتله بلشغل وسيف راح على رجل جنان للشغل ومسولفله ومراويه التصوير والرجال ما قابل وكايل لسيف شتريد اني خسار بس بيت عمي حميد ما قبلو عليه لن سولفت لسيف وحماي حسين كايل ليوسف ابني جان يمهم وصل هذا الكلام لا مك الس*اقطه بت الس*اقطه بعد لا تطب لبيتنه اجه يوسف وكال يمه عمو حسين هيج كال
اني كتله خل يولي اني ميته على بيتهم وبعد يومين عمتي اقبال رجعت من بغداد والعصر اني رحت يم بيت حماي ياسين ودزيت على عمتي اقبال اريد اعاتبها على كلام حماي حسين واول ما طبت لبيت ياسين كامت تصيح عليه الصوج كله بيج شكو عايفه بيتج ورايحه باقيه لنص الليل وهو مو ابن جنان البايك لا هذا ابنج يوسف اني بقيت صافنه كتلها شلون يوسف وهوه ابن جنان الطفر وبقى اكثر من ساعه بلبيت كالت
اي هوه طافر يدور على يوسف يريده يروح وياه للسوك
يعني هسه السالفه كلها ذبيتوها براس يوسف وكتلها انتي تقبلين على كلام ابنج عليه من يكول س*اقطه بت س*اقطه كالت
اي حسين ما مجذب
انتي تحجين صدك عمه اني س*اقطه واني المنطقه كلها تحلف بشرفي بس ميخالف ما كول غير حسبي الله ونعم الوكيل على كل واحد يحجي عليه وخليت وطلعت من بيت ياسين ورجعت للبيت وقت المغرب اني جنت اصلي وسيف هسه طب من الشغل واجه يوسف يركض ويصيح وكال بويه بيت جدي ذابين البوكه براسي ويردون يطلعون حسين من السالفه سيف تخبل راح عليهم وتعارك هوه واهله وغلط على عمتي اقبال لن هيه متجاوزه عليه بلغلط وكايلتله بيك خير لم مرتك من البيوت وهوه متخبل لن يعرفني ويعرف تربيتي وكايللها والله سارةاشرف من الشرف ومتعاركين هو وابوه وسيف رجع للبيت وعمي حميد وعمتي اقبال راحو للمركز مال الشرطه وشتكو على سيف وثاني يوم الصبح سيف راح اشتكه على ابن جنان وصارت مشكله شكدها وشكبرها لن الشرطه طلعو القاء قبض على ابن جنان سيف راح للمحكمه على مود الشكيه مال اهله ومن داخل للقاضي ومسولفله ومراويه التصوير وسيف كال للقاضي اهلي من اول ما تزوجت همه ما يردون زوجتي واكثر من مره رادوني اطلكها وهسه لن ما خذت كلامهم وكالتلي همه اشتكو عليه والقاضي دز عليهم ومتنازلين على الشكيه بس متبرين من سيف بالمحكمه وثاني يوم الصبح سيف راح للمحكمه وتنازل على ابن جنان لخاطر جنان بس والله ما خلصنه من المشاكل ويوميه مسوين سالفه جديده والاقارب كلها درت بأن سيف متجاوز على امه وابوه على مود مرته وكلام اشكال نسمع
و فات سنتين احنه ما نحجي وياهم واني قاطعتهم كلهم حتي بيت حماي ياسين وحمواتي كلهم والله يلاكوني بالشارع وجه بوجه ما اسلم عليهم لن الله شاهد عليه ما فد يوم اني غاثتهم واسمع انواع الكلام والله وجنت ما ازعل بس من وصلت السالفه على شرفي لا هاي عندي صعبه
واحنه والله من اول بدايه السالفه سيف ما قبل يشتكي بس من شاف اهله اشتكو عليه بعد اربعة ايام هو اشتكه مهم قطعت علاقتي بيهم بس بعدين دخلو الاقارب و صالحونه اني وسيف وبيت
عمي حميد وهم مهما يكون يبقون اهله مااكو شخص يتبره من اهله
وفاتت اشهر والحياة مستمره و سيف ترك سوالف النسوان وصار يصلي ويصوم والحمد لله وبسنة 2019 عمي عزام ومرته راحو للحج والحمد لله وبقو اكثر من شهر ومن رجعو استقبلناهم احلى استقبال ولتمو اقاربنه كلهم واول ما وصلو ذبحو خمس خرفان وبقينه اكثر من شهرين احنه ملتهين بالخطار والله لن شيوخ من كل المحافظات اجوي ناس واحنه ما محصلين بس التعب والله من كد تلهوسه مال الناس حتى ما نكدر نام اني كمت اشرد لبيتي ومحد يدري بيه حتى انام ساعه واهلي يبقون يدورون عليه من يحتاجوني هههههه بس مع التعب صارت احلى ايام لن اقاربنه كلهم ملتمين
وبعد فتره حماي حسين خطب بت خالته وتزوجو وبقت وياه ثلاث سنوات وصار عدهم ولد وبنيه وصارت مشاكل بينهم وتطلكو وبعد سنه حماي حسين راد يتزوج ورحنه اني وعمتي اقبال على بنيه وشفناها يعني جمالها معقول وحبابه وصار العرس بعد شهرين من الخطوبه وهو حسين راح وشافها الشوفه الشرعيه ورحنه اني وعمتي اقبال واشترينه الذهب وباقي نواقص الغرفه وصار العرس
ورى العرس بكم يوم حماي حسين ما يحاجيني ومن اطبلهم وهو موجود يطلع سالت حماتي نجلاء كتلها شنو شبي حسين ليش من يشوفني يطلع واحاجيه ما يجاوبني كالت زعلان عليج كتلها ليش كالت
لن انتي من رحتي وشفتي مرته كتيله اي حلوه وهو هسه ما عاجبته كتلها شنو على مود هاي وشنو شبيها البنيه شو حبابه وشكلها معقول وهوه هسه متذكر زين هو من راح وشافها ما كال ما اريدها كالت يكول اني اقتنعت بكلام سارة تكلها ما يهمني ما دام اني ما غلطانه وي احد وروحي وصليله وكليله سارة تكول اني الما يقدرني ويحترمني بقشرة بصل ما اعترف بي هاي مجازاتي لن حايره بابنه والله لو ما اني ابنه مات وهو كلش زين يعرف هذا الشي
بعد مرور 3 سنوات
فاطمة صارت روضه واول ايام تخاف تبقه وحدها واني ابقه يمها لحد ما تعودت ومعلمات الروضه كلش يحبونها خلصت روضه دخلت صف اول ابتدائي والحمد لله شاطره مثل يوسف تحب المدرسه وقبل امتحانات اخر السنه راحت يم اهلي وحدها اني ما رحت وياها وبليل اخي سليم ماخذها للاسواق يشتريلها ومصعدها على البايسكل وهوه يسوق هيه ملتفه رجلها بلتايره مال الباسكل وانكسرت واني ما ادري لثاني يوم امي خابرتني وكالت تعاي فاطمة تعورت. بالباسكل اني حسبالي تعويره بسيطه ومن رحت لاهلي ولكيت بتي رجلها صايره زركه ومورمه كلت لامي شلون تعورت وكالت سليم اخذها يشتريلها وهيه صاعده ملتفه رجلها بلتايره كتلها خل ناخذها للدكتور وخذناها وسوالها اشعه والدكتور كال مكسوره لازم نجبسها وتبقه اسبوعين ونعيد الاشعه وكتبلها علاج
ورجعنه للبيت وبقت فاطمة بس تبجي حتي ما نامت وبقت الليل كله كاعده وثاني يوم الصبح رحت للمدرسة خذتلها اجازه اسبوع واستمريت على العلاج والاسبوع الثاني فاطمة داومت ولن ما تكدر تتحرك لبستها حفاظه وهيه ما تقبل لن ما اكدر ابقه يمها بالمدرسة وخلص الاسبوع ورجعتها للدكتور وفتح التجبيس وكال صايره زينه بس هاي الفتره لا تتحرك عليها هواي وصارت الامتحانات ونجحت والحمد لله
ويوسف صار ثالث متوسط وحيل تعبت وياه وقت الامتحان والحمد لله نجح دور اول وهوه امنيته يصير ضابط وقدمتله على مفوضيه الضباط بس ما قبلو وبعدين قدمتله على مهنية النفط وقبلو والحمدلله وداوم شهر تقريباً وبس المكان بعيد واني اخاف عليه لن يروح ويرجع وحده ما كو طلاب من المنطقه وياه وبعدين فتحو قسم امن سيبراني بمنطقه قريبه علينه وحولته عليها وهسه حالينه يمتحن وان شاء الله ينجح طبعا سيف ما يدخل بشغلت المدارس كلها اني واهمن حولته من مهنيه لمهنيه متت من الروحه والرجعه ومؤمل صار صف سادس ابتدائي وبطل لان ما يحب الدراسه ابد وهسه يشتغل وي سيف بالمحل
النهاية
سارة هاي قصة حياتي اتمني تحبونها
واشكر الاخت مرج البحر يلتقيان على طول البال لن اني تعبتها هواي
ل هناء نختم قصتنا اتمنى تتعلمون من سارة الصبر والتضحيه اني اطلع على التعليقات واشوف بعض تعليقات تايد سارة على طلاق وان تترك زوجها اني اكول لو كل وحده تمر في ضروف مثل سارة او غيرها كان هسه كل وحده مطلقه وكل طفل يبقى مشرد بين الاب ولام مااعتقد احنه عايشين بس ل نفسنا ف لازم نفكر ونعيش علمود اولادنا وشلون راح يعيشون في مجتمع ما يرحم
ف سارة صبرت وتحملت علمود تلم اولادها من تشتت وشي ثاني الي تعلمنا منها هو تضحيه ساره ضحت علمود اختها وسعادت اختها وكان المقابل هيه ومن مشاكل مرت بيها هاي معنا الاخوه وهاي معنا الحب والحنيه بين الاخوه
اتركم في امان الله وحفظه وانتضروني في قصة جديده هيه الجزء الثاني من قصه وشاءت اقداري
في موسم الثاني بعنوان احببتها قبل ان تخلق
تحياتي
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
