رواية حارة البطل الفصل الخامس عشر بقلم جنات بدر
عدى اكتر من شهر .
رغد اللى بتابع امور المستشفى كلها من خلال تقارير اللى بيبعتها دكتور محمد ومها ليها .
فاروق اللى هيتجنن ومش قادر يوصل ليهم .
مؤمن اللى بيحاول يطمن على البنات وبيروحلهم دايما بس بيكون حذر جداا عشان فاروق ومازن اللى حاطين رجاله مرقبينه .
حسن اللى اعجابه بيزيد كل يوم برغد وقوتها بس هيتجنن .
منصور ومحروسه اللى مضايقين من رغد وعايزين ينتقمو منها على طريقتها معاهم .
ام فرح اللى بتجهز كل حاجه عشان فرح بنتها فرح ومحمد اللى كمان اسبوعين .
رهف ولارا اللى مقضين معظم وقتهم فى المرسم ... ولارا اللى طبعا مش بتروح المدرسه لكل بتاخد دروس اون لاين وهتروح على الامتحانات بس.
حنين اللى بقت صديقه مقربه من رهف ورغد بعد مااتعرفو على بعض ....
ولارا اللى اتعلقت بحنين وحبيتها جداا وبدات تتابع دروسها معاها وبتذاكرلها دايمااا .
حسن اللى اطمن ان مؤمن علاقته برغد ابن خالتها وبس ... بس فى نفس الوقت كان مضايق من تقربها زايد ليه .
وبقي عندنا عاشق جديد فى الحارة وهو حمزة البطل اللى سحرته رهف برقتها وكسوفها فى كل مرة بيشوفها وكلم الحاج انه عايز يتقدملها بس الحاج طلب منه يصبر شويا لما يعرفو هما هيستقرو فى الحارة ولا هيرجعو القاهرة تانى.
بقلم الكاتبه جنات
ـــــــــــــــــــــ★ــــــــــــــــــــــ
يوم جديد فى حارة البطل .
رغد ورهف ولارا كانو قاعدين بيتفرجو على فيلم على الشاشه ... وبصو لبعض لما سمعو صوت فرقه بتطبل وتزمر فى الحارة .
رغد:ايه ده ؟!
رهف:مش عارفه!
لارا:تعالو نتفرج .
رغد ورهف لبسو اسدالات وخرجو البلكونه يشوفو فى ايه ..... وكانت الفرقه واقفه فى الحارة وشباب كتير ماشين ورا بعض وشايلين كراتين وشنط والستات واقفين يسقفو ويزغرطو فى الشبابيك وام فرح واقفه وباين عليها الفرحه ومعاها ستات كتير .
ام فرح بصت لفوق وشافت البنات:يادكتورة .
رغد:هو فى ايه ياام فرح ؟!
ام فرح قربت تحت البلكونه:عقبال عندك ده فرش فرح رايح شقتها مانتى عارفه الفرح كمان اسبوعين .
رغد ورهف باركو لام فرح اللى رجعت لستات تانى والبنات كانو واقفين يتفرجو بحماس لانه حاجه جديده عليهم اول مرة يشوفوها .
بعد فترة الشباب نقلو كل الفرش لبيت محمد وجابو سماعات كبيرة وشغلو مهرجانات ووقفو كلهم يرقصو رقص شعبي ... ومحمد شد حمزة اللى بدا يرقص مع الشباب .
وكلهم وقفو فجأه لما سمعو صوت موتوسيكل عادى وكان حسن والشباب وسعوله وهو وقف فى نص الطريق وبدأ يلف بالموتوسيكل مرة ويرفعها من قدام مرة وعمل حركات كتير والشباب كلهم كانو بيشجعوه ... وبعدها حمزة شد حسن اللى رقص معاهم.
رغد عينها على حسن من اول ماظهر وافتكرت كلام مراد لما قالها شاب كاريزما اول ماتشوفيه هتعرفى انه البطل وابتسمت .
بعد وقت طويل البنات دخلو الشقه لما الشباب خلصو رقص ومشو .
بقلم الكاتبة جنات
ـــــــــــــــــ★ــــــــــــــــ
فى شركه الصاوى وتحديدا فى مكتب فاروق وقاعد معاه مازن ابنه .
فاروق:يعنى ايه مش موجودين فى القاهرة كلها ... اومال راحو فين ؟!
مازن:مش عارف رجالتى ماسبوش مكان فى القاهرة غير مادورو فيها .
فاروق:معقول سافرو برا مصر !
مازن:معتقدش .... انت متاكد ان عمى جمال ماكنش ليه اى بيت او ڤيلا فى اى مكان فى مصر ؟؛
فاروق:لا جمال ماكنش بيحب غير الڤيلا ومفكرش يشترى غيرها .
مازن قام وقف:انا همشي الوقت وهخلى الرجال يدورو تانى لما نشوف اخرتها ايه ..... مش عارفه انت ازاى مخلتش الرجاله تراقب رغد لما كانت ف المستشفى .
فاروق:كانو واقفين مستنيها تنزل بس هى نزلت من باب الطوارئ .
مازن:تمام سلام الوقت .
فاروق:سلام
بقلم الكاتبة جنات
ــــــــــــــــــ★ـــــــــــــــــــ
فى حارة البطل البنات كانو قاعدين فى الصاله .
رهف:هدخل اجهز الاكل .
رغد:اوكى .
الباب خبط ورغد نادت على لارا تفتح
لارا فتحت الباب وكان مؤمن اللى شالها وباسها من خدها:روح بابا انتى .
رغد:كنت قدم عشر دقايق بس كنت هتشوف حته زفه تحفه .
مؤمن قعد على الكنبه:زفه ايه دى ؟!
لارا:كانو بيطبلو يابابي وعمو بيرقص .
مؤمن بص لرغد باستغراب .
رغد:ده كان فرش فرح خارج وكانت الفرقه هنا وعملو جو حلو اوى الصراحه.
مؤمن:اممم .... اومال رهف فين ؟
رغد:فى المطبخ يامعلم .... لولى ادخلى ارسمى يلا عشان تفرجى بابي على رسمتك .
لارا:حاضر .
رغد استنت لما لارا دخلت المرسم وبصت لمؤمن:فاروق وابنه ايه اخبارهم ؟!
مؤمن:تقريبا قالبين القاهرة عليكم ده غير الناس اللى ممشيهم ورايا بس انا بعرف اخلع منهم بمعرفتى .
رغد:انا من رايي بلاش تيجى هنا تانى يامؤمن ... انا خايفه يعرف مكانا وقتها مش هنقدر نوقفه ... فاروق بقي شبه الكلب اللى بيجرى ورا شويا لحمه وهيتجنن عشان يوصلهم .
مؤمن:متقلقيش يارغد ... وبعدين انا مش باجى بعربيتى وانتى عارفه بدخل بيتى على اساس خلصت شغلى وبخرج من الباب الخلفى وبركب تاكسي واجى .
رغد:ربنا يستر بقي .
مؤمن:اول مرة اشوفك خايفه يارغد !
رغد:خوفى مش على نفسي يامؤمن خوفى كله على رهف لانه عارف ومتاكد انها نقطه ضعفى .
مؤمن:سبيها على ربنا هو اقوى من اى حد .
رغد:ونعمه بالله .
والباب خبط ولارا خرجت من الاوضه وراحت بسرعه تفتح كانت حنين .
لارا حضنتها بحب:نونااااا .
حنين:روح نونا انتى .... عامله ايه النهارده ؟
لارا:انا كويسه جداا وفرحانه اوى انك جيتى .
حنين:قلبي ياناس .
مؤمن كان عينه على بنته ومستغرب تعلقها الكبير بحنين ... هى رغد قالتله ان حنين بتساعد لارا فى المذكرة بس ماكنش يعرف انها بتحبها اوى كدا .
رغد:تعالى يانوناا .
حنين دخلت واتفاجات بمؤمن اللى قاعد جمب رغد .
رغد:ده مؤمن ابو لارا ياحنين .
حنين ابتسمت:اهلا وسهلا .
مؤمن:اهلا بيكى ... بجد مش عارف اشكرك ازاى على تعبك مع لارا .
حنين:مافيش تعب ولا حاجه وبعدين انا بحب الاطفال جدا وبساعد اطفال حارة كلهم وببقا ومبسوطه وانا بعمل كدا .
رهف خرجت من المطبخ:اهلا اهلا بمؤمن ونونا ... انا هجهز السفرة عشان ناكل سوا .
حنين:اعفينى انا النهارده ..... انا كنت جايه اعرفك ان فرح هتبقي فى الارض الفاضيه اللى فى اخر الحارة كمان اسبوعين و الحارة كلها هتبقي متجمعه هناك و اكيد انتو هتيجو .
رغد:اكيد وام فرح قالتلى وعزمتنا كلنا .
حنين:طب كويس ... همشي انا بقا .
رغد:خليكى اتغدى معانا.
حنين:هدهد عملالى بشاميل ومقدرش اقومها الصراحه .
رغد:ياما نفسي اتعرف على هدهد مامتك بس قريب جدا والايام جايه .
حنين:وهى كمان نفسها تتعرف عليكم مانا مجنناها طول اليوم رغد ورهف .
البنات ضحكو وحنين ودعتهم ومشت ومؤمن اتغدى معاهم وقعد شويا ورجع القاهرة تانى عشان رجاله فاروق يشوفوه وهو خارج من فيلته بدرى .
بقلم الكاتبة جنات.
ـــــــــــــــــــــ★ـــــــــــــــــــــ
في السجن مكان جديد نزوره لاول مره وتحديدا في الزنزانه اللي محبوس فيها جابر ابن منصور اللي كان قاعد مع واحد من المساجين اللي مدته خلصت وهيخرج من السجن .
جابر: فهمت هتعمل ايه ؟!
جلال: فهمت يا جابر .... انت عايزني اعلم عليه بس ما يموتش .
جابر: بالظبط كده .... المهم تدخل عليه داخله كلها شر ..... حسن البطل دمه حامي اوي وبيخاف على اهل منطقته وبيحامي عليهم .
جلال: فهمت انا دماغه وما تقلقش هنفذ وافرحك يا كبير .
جابر: تسلم يا صاحبي .
جابر في نفسه: اعلم عليك قبل ما اخرج عشان اشمت فيك يا ابن البطل .
بقلم الكاتبة جنات
ـــــــــــــــ★ـــــــــــــــــــ
نرجع تاني لورشه البطل.
كان حسن وحمزه قاعدين في المكتب .
حسن: ما تهمد شويا بقى يا عم .
حمزه: يا عم بحبها وعايزه اتقدملها مش عارف عمي بياجل ليه !
حسن: هو مش قالك لما يتاكد اذا كانوا هيستقروا هنا ولا هيرجعوا القاهره تاني .
حمزه:وفيها ايه لو رجعوا القاهره تاني ؟!
حسن: وانت تفتكر لو رجعوا القاهره تاني هتتجوزك وتعيش في اسكندريه وتسيب اختها في القاهره ! .
حمزه: مش فاهم يعني ؟!
حسن: يا ابني انت مش شايف هما متعلقين ببعض ازاي .... ومااعتقدش ان هما ممكن يبعدوا عن بعض ..... بعدين اصبر الصبر حلو .
حمزه: ما انا صابر اهو .
حسن ضحك عليه وكمل شغله وحمزة خرج من المكتب .
ـــــــــــــــــ★ـــــــــــــــــ
فى البيت البطل .
حنين قاعده مع هدى وبيدردشو .
حنين: بصراحه يا دودو يبقى من سعدهم وهناهم حسن وحمزه لو كان نصيبهم رغد ورهف .
هدى: ماهو الواد حمزه حبها ونفسه يتقدملها بس انتى شايفه الحاج هو اللي رافض الوقت .
حنين: البنات كويسين اوي ياهدهد وادب واحترام مافيش بعد كده ...... بصراحه انا حبيتهم اوي .
هدى: وحسن وحمزه كمان مافيش زيهم ويستاهلوا كل خير .
حنين: هو انا قولت غير كده يعني يا دودو .... نفسي افرح بيهم بقى .
هدى: ربنا يفرح قلبي بيهم وبيك يا حنين يارب .
حنين حضنتها وباستها من خدها: افرحي بالشباب الاول ومالكش دعوه بيا يا دودو انا قاعده على قلبكم مش ناويه اتجوز.
هدى ضحكت: قومي يلا حضري العشا عشان اخواتك بيبقوا جايين تعبانين وجعانين .
حنين بهمس:امال مرات اخوك وبنتها فين مختفيين يعني ؟!
هدى:اولفت قالت تعبانه وطلعوا يناموا .
حنين: لا سلامتها الف سلامه .
هدى: بطلي غلبه وروحي حضري العشا .
حنين: حاضر يا دودو من عيوني .
هدى: تسلم عيونك يابنتي .
بقلم الكاتبة جنات
ــــــــــــــــ★ـــــــــــــــــ
عدى ٣ ايام والحال كما هو عليه .
والحاره كلها مشغوله في تحضيرات فرح محمد وفرح والكل فرحان من قلبه لاولاد الحاره .
وام فرح اللي بتخلي رهف ورغد يشاركوا معاهم في كل حاجه تخص تجهيزات الفرح .
جلال اللي خرج من السجن وبيجهز نفسه عشان يروح حارة البطل وينفذ خطته هو وجابر.
وفي يوم كل اهل الحاره مركزين في شغلهم وفجاه سمعوا صوت بنت بتصرخ ..
شباب الحاره ورجالتها كلهم راحوا ناحيه الصوت واللي كان قريب من ورشه البطل ..... وشافو شاب بيضايق بنت من بنات الحاره .
حمزه وحسن والشباب قربوا منه .
حسن:ايه اللي بيحصل هنا بالظبط ؟!
جلال: البنت دي تخصني وماحدش يتدخل .
حمزه: تخصك ازاي يعني.
شاب من اللي واقفين وهو قريب نعمه البنت: انتى تعرفيه نعمه ؟!
نعمه نعمه وهي بتعيط وبتحاول تخلص ايدها من ايد جلال: والله العظيم ابدا ما اعرفهوش .
حسن قرب منها ومسك ايدها وشدها ورجعها ورا ظهره وبص لجلال: اظن عيب اوي اللي انت بتعمله .
جلال: وانت داخلك ايه ... بنت عجبتني وقلت هطلبها للجواز بكلمها مش بترد عليا وانا ماحدش يقولي لا .
حمزه: ودي اخلاق رجاله البلد برده .
حسن: انت مين اصلا اول مره اشوفك في الحاره ..... وبعدين هو اللي يطلب ايد بنت بيطلبها في الشارع ولا بيروح يخبط على باب بيتهم ويكلم اهلها الكبار .
جلال: انت محموق اوي كدا ليه يا شبح هي تخصك ولا ايه .
حسن اتعصب وضربه بالبوكس بكل قوته وجلال وقع على الارض من قوه الضربه .
جلال قام واقف ومسح الدم اللي نازل من بوقه: انت قد الحركه دي !!
حسن وقف في وشه: وقد ١٠ زيك .
فجاه نزل ست شباب من العربيه اللي كانت واقفه في اول الحاره وقربو وقفوا ورا جلال .
جلال: اعتذر مني حالا ياما هقلب الحاره لساحه حرب.
حمزة:انت جاى تهددنا فى منطقتنا وفكرنا هنخاف ونكش مثلا ولو على الحرب لو حابين تجربوا جربوا ونشوف الدم هيسيل من مين فينا بالظبط .
حسن:انتم شكلكو جاين وناوين شر من البدايه ....قسما بالله انا بس مجرد كلمه منى وهتلاقي الحارة دى متلغمه رجالة تخرجكم من هنا علي ظهركم وسايحين في دمكم .
جلال بص لرجالته: يبقى يلا نبدا الحرب .
وفجاه رجاله جلال طلعوا اسلحه بيضا وهجموا على شباب الحاره والستات كانوا واقفين في الشبابيك بيصوتوا من بشعه المنظر .
رهف ورغد سمعو الصوت ولبسو اسدالات وخرجوا يشوفو ايه اللي بيحصل من البلكونه ولما رغد شافت المنظر طلبت من لارا تفضل في المرسم وماتخرجش .
رغد كان عينها على حسن اللي بيضرب بكل قوته وبيدافع عن شباب حارته وكانت حاسه بخوف غريب جوا قلبها .... شباب الحاره كانوا بيضربوا بكل قوتهم بمهاره ووقعوا كتير من رجاله جلال .
جلال استغل انشغال حسن بدفاعه عن الشباب وحمزه وقرب منه وشده من ذراعه عشان يبصله وطلع مطوه من جيبه ورفع ايده وجرح حسن جرح طويل من اول منطقه الكتف لحد بطنه بس طبعا كان حظر انه ما يموتش زي ما اتفق مع جابر .
جلال اللي اول ما حسن وقع في الارض والشباب وحمزه جريوا عليه شاور لرجالته اللي شالوا باقي الرجاله اللي واقعه على الارض وركبو العربيات وخرجوا من الحاره .
رغد لما شافت منظر حسن اللي واقع في الارض وبينزف قلبها وجعها ونزلت بسرعه من البيت وبقت تبعد الشباب من قدامها لحد ما وصلت عنده .
رغد: وسعو عشان يقدر ياخد نفسه .... حمزه خلينا ناخده فى اى مكان بسرعه عشان اقدر اعالجه .
حمزه بص ل لمحمد وعبده:شلوه معايا نطلع على البيت بسرعه .
رغد: حمزه خلي اي حد يروح اقرب صيدليه بسرعه يخلي الدكتور اللى فيها يكلمني .
حمزه: روح يا اسلام بسرعه واول ما توصل الصيدليه كلمني على تليفوني .
اسلام: حاضر .
اسلام جري على صيدليه والشباب شالو حسن وراحوا على بيت عيله البطل .
حمزه ومحمد كانوا مسندين حسن ودخلوا البيت والكل لما شافو حسن اترعبوا من منظر الدم .
هدى صوتت: يا حبيبي يا ابني .... ماله يا حمزه ؟!
حمزه: خلونا بس ندخله الاوضه عشان الدكتوره تقدر تعالجه وانا هحكيلكم كل حاجه .
محمود: ادخلوا يا ابني بسرعه ادخلوا .
حمزه ومحمد نيمو حسن على السرير ورغد بصت لحنين اللي كانت بتعيط بخوف: حنين عايزه ميه نظيفه ومقص بسرعه .
حنين: حاضر حاضر .
هدى قربت من حسن وهي بتعيط: ايه اللي حصلك يا ابني ؟!
حسن: انا كويس يا ست الكل ماتقلقيش .
حسن كان الجرح بيوجعه بس بيحاول يبان اقوى .
حنين جابت طبق في ميه وقطن ومقص واديتهم لرغد اللي اخذت المقص وقصت تيشرت حسن وبدات تحط القطنه فى الميه وتمسح الدم من حوالين الجرح .
وفون حمزه رن وكان اسلام وحمزه رد عليه بسرعه وكان الدكتور اللي موجود في الصيدليه وعطى الفون لرغد اللي بدات تقول الحاجات اللي هي محتاجاها للدكتور . وقفلت ورجعت الفون تاني لحمزه .
وبعد دقايق وصل اسلام ومعاه كل الحاجات اللي طلبتها رغد اللي بدات بانها تدي حسن حقنه بنج وتخيط الجرح وبعد ما خلصت خياطه لفت الجرح كويس .
حسن:شكراا يادكتورة
رغد بصت لحسن:ده واجبي والف سلامه عليك ياحسن
حسن:الله يسلمك.
رغد قامت وقفت وبصت لهدى وحنين اللي بيعيطوا: يا جماعه بتعيطوا ليه هو الحمد لله كويس .... هو الجرح اه عميق بس نحمد ربنا انه ما فيش اي حاجه في جسمه اتأذت .
محمود:الحمدلله .
هدى وهي بتعيط: الف حمد وشكر لك يارب ... مش عارفه يا بنتي اشكرك ازاي ربنا يحميك لشبابك يارب ويحفظك .
رغد: تسلميلي يا هدهد ما تعرفيش انا كان نفسي اتعرف عليك قد ايه ..... بس سبحان الله اتعرفنا في الظروف مش قد كدا .
هدى بصت لحنين ورجعت بصت لرغد: هو انتى الدكتوره رغد .
رغد: ايوه .
هدى قربت منها وحضنتها بقوه: البنت حنين قالتلي انك ذزي القمر بس طلعت بتكذب عليا .
رغد استغربت .
هدى ضحكت: نسيت تقولي انك قمرين تلاته عشرة .
رغد ضحكت: عيونك اللي حلوه يا هدهد .
هدى: تسلميلي يا قلب هدهد .
رغد بصت حسن تانى: وحمد لله على سلامتك تانى يابطل .... الجرح كان كبير واخذ غرز كتير ... انت لازم تريح نفسك على الاخر وبلاش تتحرك كثير عشان الغرز ما تفكش واهم حاجه مايجيش عليه ميه .
هدى: حاضر يا بنتي هخليه يعمل كل ده كل اللي انت قولتى عليه .
رغد: طب استاذن انا بقى لازم امشي .
هدى:طب خليكى اتغدى معانا .
رغد:خليها مرة تانيه فى ظروف احسن من كدا ياهدهد ... واه لازم الجرح يتغير عليه مرتين فى اليوم عشان ميتلوث والعلاج اللى فى الشنطه دى ياكل كويس وياخده عشان الجرح يلم بسرعه وكمان المسكن عشان مايحسش بوجع او يسخن .
هدى:ابقي تعالى غيرله انتى عليه يابنتى انا بصراحه هخاف .
رغد بصت لحسن ورجعت بصت لهدى:اكيد حاضر عن اذنكوو .
محمود:اذنك معاكى يابنتى ربنا يحميكى يارب ....مش عارفه اقولك ايه .
رغد:متقولش حاجه ياعمو محمود وبعدين ده واجبي ....
رغد ودعت الكل و خرجت من البيت ورجعت بيتها ....
