رواية بنات سهر الفصل الثامن عشر بقلم فراقد حسن علي
من صميم القلب قلت أحلى القوافي
أتفنن في حروف أروع قصيدة
للعروس اللي لابسة ثوب الزفافي
(سوار ) اللي بزينها صارت فريدة
اسمها ( سوار ) والاسم كافي
لو صاغها الصايغ ضيع نشيده
(سوار ) عليها من الحسن والعفافي
÷÷÷÷÷÷÷÷÷÷÷÷÷÷÷÷÷÷
سوار/ من طلع طارق من المطبخ خالتي طردته
هو راح وبقى يتلفت عليه
وكام يغني /لا وعيونك ما راضيك
وخالتي بقت تحجي عليه اسويلي اكل
رجعت على شغلي وبلشت اسوي بالكاستر
وبالي بقه يودي ويجيب بسوالف طارق
شو أشوفه حباب
وبس يشاقه
وسوالفه تضحك
وتقريبا كل اهله واقربائهم يحبونه
بس أني الوحيده الاخاف من عنده ومااحبه
ومااعرف ليش هيج أذاني وهجم عليه ؟؟!!
خالتي بقت تخدر جاي بالسماور وتفتر بالمطبخ
والبنات رايحات راجعات يجيبن بمواعين العشا
خجلتني كالت / هااا وين وصلتي ؟؟
كاسترج لجع خوطي ..
أستحيت حسيتها منتبه عليه
شلون صافنه وافكر بطارق وبسوالفة
سهى أجتي ساعدتني
نصب الكاستر بالكاسات الصغار
ونغمس بيهن أثنين او ثلاث بسكتايات على حالهن بدون تكسير،، ونخلي عليهن شرايح موز
بس شويه صك الكاستر سهى اخذته الهم بالصالة
8 ت
اني هم أخذت كاستري ورحت كعدت بالصاله
اباوع على الشاشه مالي دخل بيهم
واكل على كيفي معدتي تكلب
بس اجبر روحي اكل
حيدر ولمى بس يخوفن بيه يكلولي / اذا بطلتي الاكل الجاهل ياخذ منج كل قوة الدم العندج
وتتخربطين وتوكعين ياخذوج للمستشفى
ويخلولج مغذي ويضربوج ابر هذني السود الحارات
اني ما ضاربتهن قبل ،
بس جنت اشوف ماما شلون تتألم من تضربهن
وحتى يصير مكان جلد أسود من وراهن
بالصدفة شلت راسي لان همام صاح / هذا مو لعب والله ،،شبيك مهند انطينه فنتك نفوز
أخذتنا بالوجه
3 ت
صارت عيني بعين طارق هو غمزلي
يالله فد خجلت متت من المستحى
انداريت وانطيتهم ظهري حتى بعد مااباوع عليهم
لليل نمت بحظ مسرة لان هي ادلكلي شعري
شويه قبل لا انام ، وتبقى تحجي ويايه
حتى تتغير نفسيتي واصير أحسن
وأساور صارلها كم يوم تبات يم لمى فوك
حتى مسرة حذرتها
كالتلها / من تنامين قفلي باب الغرفه،
وممنوع تطلعين بليل للحمام لو لغير مكان
وديري بالج من الولد
خاف واحد بيهم يريد يحجي وياج
يسخرج على شي من تصعدين ممنوع
ترى الشيطان شاطر خاف واحد منهم يلزمج
ابقى بغرفة لمى وممنوع تطلعين
خطيه مسرة هواية شايله همنا
الصبح كعدت ماكو احد بالغرفة
بس اني نايمه ومتأخرة بالنوم
بس شنو احس نفسي راح اطك
بلكوه كمت وركضت العفو للحمام
بعد ما غسلت ولبست حجابي واسلاميتي وجواريبي
رحت على المطبخ
لكيت سهى ونهى ومسرة وساهرة وخالتي
صايرات هوسه يعزلن بالمسواك
ما شاء الله جايبين يمكن كل السوك
ومنتصر وهمام موجودين يمهن
صبحت عليهم كلهم
وشكد أحب منتصر من يكلي / هلا بويه صباح البركة
خالتي كالتلي/ مالج دخل بالشغل
ولا تلزمين شي ، امشي اتريكي
وجهج صاير هلكدوته من الجوع
كتلها / مااريد روحي تلعب
منتصر كالي / بويه كومي تريكي
وصبيلي وياج استكان جاي ،
كتله/ بابا جان هم مرات يكول النا بويه
احب هاي الكلمه ، هنا خنكتني العبره
اريد ابجي مخنوكة
هو بسرعه كال / الله يرحمه انا هم أبوج
دكومي يالحليوة جيبلي جاي وكولي يالله
همام صاح / سوسو وياج بيضه عيون تعرفين
خليلي عليها فلفل اسود قليل
لمى سوتها عليه قوزي صار ساعه احشم بيها
كتله / هسه اسويلك
واني هم صرت حبابه وديت جاي المنتصر
وسويت الهمام بيض وكعدنا اثنينه نتريك
اجى حسين وصاح / صبحكم الله بالخير يالربع
والله عنده سوالف تضحك
كلنا صبحنه عليه
كال / وين هاي لمى الزركة ليش مانزلتيني وياج
لو لكتيلج عرب غيرنه
وهم ياريت حلوين جنهم قلم جاف
هنا منتصر ضحك من خاطره
كاله / ولك عليمن الزركة ؟؟
ومنو هم القلم الجاف
جاوب بثقه / لمى اختك هي الزركة
وأساور هي القلم الجاف
عمي طه هو الغششني وكالي / مرت ابوك ومرت مازن مو حلوات بس مريتي حلوة
مرت ابوك جنها عصا دونكي مال شرطة
ومرت مازن جنها قلم جاف
بس مريتي حاته صاكة تفلش
لمى كامت عليه وجرته من أذانه
مو صدك هيج بالشقه
كالتله / ولك الوسخ منو الزركة
ضحك وكاللها / هاي انتي حبيبتي لمى الورده
قصدي نهى الزركة
خلانا كلنا نخرب من الضحك
هنا ودكت الباب تفلشت
باوعت على شاشه الكاميرا اشوف مجموعه مال ناس
منتصر كال / يالله حجيه شرفوا اهلنا
راح منتصر يتلكاهم ، وطلعت وراه خالتي
وانوب البنات
همام بقى ياكل شكله صدك جوعان
اني ومسره بقينا بالمطبخ نستحي نروح مانعرفهم
همام كال / روحن سلمن
اول وتالي تنشفطن
خرررب صنمهن عماتي
مايبوسن يشفطن خد الواحد
افلت الغرفتي أحسن مابيه حيل حاليا اسلم
منتصر كربني من الفجر
18 ت
صدك شويه واجتي سهى
كالت / عيب أمشن سلمن هذني عماتي
وهم عمات أبوجن يعني هم عماتكم
لان انتن عدجن بس عمه وحدة حقيقه
ومتوفيه الله يرحمها ،،
طلعنا نمشي وره سهى وهي بدت تعرفنا
أحنا بنات المرحوم عدنان
النسوان أثنين عجايز كبار
بوسنه وكامن يبجن ويكولون حزن على بابا
وباقي النسوان هم بوسه
وبقن يباوعن علينا من كعدنا يمهم ،
خالتي فاطمة والعجوز ام ساهره
هن كامن يسولفن على ماما وفاتها
وشلون تعرفنا على أهلنا
وهن شكد بقن يسألن على حياتنه
يمكن حتى على معنى اسمائنا سألن
هنا نزل همام يسلم وهن كامن يهلهلن
وهو يكلهم / عمي مو انا العريس
طارق بعده فوك متوث نوم
بس ميخالف خوش فال
وره شويه ونزلت أساور
وهم عرفوها على الخطار
اني تعبت من الكعدة
وتورطت أكلت لكمة بيض لو احس معدتي تملخت
وهن النسوان مخليات ريحة مال عرب
زاد لعبان النفس عندي
كمت ورحت تمددت بسرير خالتي
للظهر واني ممدوده
وجهال سهى وحسين وياهم جهال الخطار
حولوا البيت ملاعيب العيد من الركض والضحك والهوسه ، راسي صار طبل كلش دخت
ما تغديت نفسي تكلب ودايخه
1 ت
وره ماكفوا الغدة اجتي لمى كالت / عيب من الخطار
كومي بدلي واكعدي يمهم كل النسوان سألن عليج
واحنا كمنا نلزك بالسالفه
كنالهم سنونها توجعها
ممنوع تكولين انتي حامل
طبت نهى وكالت / عليمن تخوفين بالبنيه
حتى ما تكول لوحده هي حبله
شو طشت سالفتها بذان الكل
تبارك وخالاتها وجناين عمامي
دكن بوق الكح.... خلن امي تتخربط من الفشله
عاد باوعت عليه وكالت / كومي حبابه
غسلي وكشخي وبدلي احلى شي عندج والبسي ذهبج
وطز بكل واحد يحجي ،
سالفه وصارت وصلحناها
العالم كلشي يصير عدهم محد يسمع
بس قملة فاطمة بكعة وتشهر بيها الخايسه تبارك
وامها الوسخه
لمى كامت تسكت بنهى لان صارت عصبيه
وكامت تحجي بصوت عالي
والله مالي خلك للمشاكل
ومسره هم أجتي وكالت / كومي بدلي النسوان
يردن يسون حفله
كمت بالكوة والله الخاطر مسره
وهم اجامل الكل
استمرت الحفله لليل والشباب لعبوا طوبه
من صدك حفله عرس ،
شويه تغيرت نفسيتي وفرحت بهاي الحفله
والنسوان شلون يباوعن عليه
اعرف مستغربات من لون عيوني
بس فرحتي بالحفله خلتني مااهتم الهن
1 ت
وطارق كام يركص هو وباقي الشباب
وحدة من بنات عمته من خاطرها صفنت عليه
وبقت وحدة اختها مااعرف شصير منها تندس بيها
لان وحده ثالثه أشرتلها حتى تنبها على صفنتها
مرت الوكت وهم الناس بعدهم فرحانين
واني لعبت روحي يكرم اسم الله
كلساع العفو اروح للحمام احس روحي مضايقه
لبست عبايتي على راسي يلا كمت
لان لابسه بس دراعه وربطة وجواريب
ورحت العفو للحمام الخارجي مال الاستقبال
لان كعدتي اقرب للطرمة
العفو أستخدمت الحمام وطلعت
لكيت هذني البنات بره وياهن تبارك
من فتت من يمهن وحدة كالت / اكلج ام عيون
انتي صدك حبله ؟
أرتبكت ولا جاوبتها عفتهن ومشيت
وهي صاحت / هييييي ام عيون العمي
مو أحجي وياج تعاي هنا
فتت بسرعة للبيت من باب المطبخ
لان هن لازمات باب الاستقبال من الخارج
شافني ولد غريب باوع عليه كال / انهجم كبرك
يا عدنان على هاي الخلفه وغمزلي
14 ت
اني عرفته هذا مو خوش ولد
فتت جوة للصاله ولاكاني
ماجد ابن عم منتصر يريد يطلع للطرمة
كتله / عمو هذاك الولد حجه عليه
وغلط على بابا وغمزلي
اني مااقبل يتجاوز عليه
احترام الكم راح أسكت وأشرتله عليه
10 ت
هو كالي / فوتي جوة هسه ادفنه بالحديقة
وانعل ابو اليطلع وراه
فتت جوة وكعدت يم مسره
وشاورتها حجتلها على الصار
هي بقت تاكل بروحها
خافت لا تصير مشكله من ورانا
بس الحمد لله ما صار شي
لليل فرشوا للناس انملت الصاله والاستقبال
وغرفه خالتي ، والغرفه الثانيه
وباقي الناس البيوتهم قريبه راحو
للصبح كعدت بالكوة مسره سحلتني من المخده
هم ما تريكت معدتي تكلب
دخلت سبحت بسرعة وطلعت
لمنى ونهى خبصني خبص
وراها رحنا للصالون
وبعد ساعتين اكثر يلا خلصتني تسريحه ومكياج
بس كلش تأذت عيوني من لبستني العدسات
ومن لبست البدله الاولى لونها فستقي فاتح
ام الصالون ونهى رتبن الشال عليه
ما طلع شي من جسمي دنبسن الشال على البدله
ولمى بيدها البرنص الابيض جبير البسه على راسي
ومسره نفس ترتيبي بس مالبست عدسات
ولون بدلتها تفاحي
بس مسره خلصت الوكت كله تبجي
يحجن عليها البنات وهي بس تبجي
ابد ما حجت شي بس مبينه نفس حالتي
مشتاقه الماما ومحتاجتها اليوم ويانه
نهى خابرت على رجلها وميض يجي ياخذنا
بس أجانه همام رجعنا للبيت
ووصل السياره قريب باب الاستقبال
يلا كال / أنزلن ،
لان مالين الحديقه كراسي
واكو كراسي بعدها ما منصوبه بالطرمه
السيارة عاليه وشلعت قلبي بالصعدة والنزله
عاد ساعدتني نهى ونزلتني
ومسره ساعدتها لمى ونزلتها
من دخلنا للاستقبال النسوان كامن يهلهلن
ويغنن ويصفكن
كعدنا اني ومسره على نفس القنفه
هنا دخل طارق من باب الصاله
شكله مستعجل يمكن حتى ماانتبه علينا
خله مسره تصركع خمطت البرنص من ايد لمى
هسه نزعته تريد تعدلها وشمرته عليها
واني بعدني ما مرتاحة بكعدتي
البنات يخلن جوايه كوشه
وطلع بوجهه طبك باب الاستقبال التطلع على الطرمة
وقفلها بالمفتاح واخذ المفتاح بيده
وهو يمشي كال / يووووم عود على اتفاقنه
وممنوع أسم ذكر تخلنه يوصل لهنا
عماته كامن يضحكن وكالن / هذا تسودن
بعده ما معرس وهل تسودن
هنا تعالوا اسمعوا الحجي الصار
هذن يكولن / حقه يسودن مو مضوكتة
وهذيج تكول/ طالعه لامها شايله خرزة محبة اله
وهاي تكول / من هسه صاكرته
وهذن يكولن / بعد بنات سهيره ذبت فلك بوكتها
وهسه ألدور البناتها
وصار حجي التبسبس اشكال الوان
ونهى وسهى كامن يفورن
وساهره بقت تلطف بالجو
وتجامل هاي وتحجي ويه هذيج
لحد ما لمى جابت الدي جي سماعه جبيره تسحل بيها
ومشغله اغنيه / يمه كرصتني العكربه
وصوتها كلش عالي
جرت خواتها وكامت تركص وتصفك وتهلهل
سكتت الكل
أني أنحمست من القهر لان يحجن على ماما
بس مسرة لا كامت تبجي
وخالتي فاطمة وساهرة بقن يسكتن بيها
وبقن النسوان محتفلات يدكن ويركصن
واتفاجئ بدخول هدى جايه من الصالون
شنو طالعه احلى واكشخ من عدنه احنا العرايس
ودخلت بوست النسوان وتهلي وترحب بيهن
وفد حركاتها نازكه وتمشي على كيفها
وحذاها كعب عالي ، وتخشخ من كثر الذهب
حتى عدسات لابسه وعيونها صايرات خضر
واجتي باوستنه وباركت النا
وشلون اسلوبها حلو
أني للعصر تعبت نفسيا من التبسبس
لان اسمع الحجي اليوجع ،
وجسديا ، البدله ثقيله
ومعدتي تكلب روحي تلعب من العطور
اشكال الوان اشتم ريحة العطور
وصدك ماكو ولا رجال دخل للاستقبال
فقوري يكول/ خالي طارق
مخلي ميز جبير كدام باب المطبخ
حتى ولا رجال يفوت
4 ت
شويه واجتي لمى كالت المسره / كومي اكعدي
على هذيج القنفه حتى يجون الولد يلبسوجن الذهب
وساعدتها واستقرت مسره بالكعده كبالي
ونهى لبستي البرنص
سألتها / شنو راح يجي طارق ؟؟؟
أشرتلي على حلكها أااااش
دنكت شاورتني / لا تخافين يلبسج الذهب ويطلع
يعني نمثل كدام الناس صيري حبابه
لا تفشلين امي خطيه ،
بقيت ساكته
دخل منتصر لابس قاط ومرتب حاله والله ولا عرفته ،
لبس مسره ذهبها،
وقطعوا الكيكه
وشربوا العصير
وخواته خجلنه بالزايد
سوي هاي الحركة وسوي هيج علمود صور ،
ومسره غدت طماطة من الخجل
وهو هم مبين عليه الخجل والارتباك
هو من راد يطلع خطيه اجى عليه
وباركلي دنك باسني على راسي
وكالي / بويه هديتج مظمومه
وأنا أبوج لا تخافين وتشيلين هم
بس أريدج تصيرين حبابه
حركت راسي يعني اي
أستحيت من عنده
شويه ودخل طارق شنو كاشخ شنو انيق
ونسوان يهلهلن ويصفكن
وهو فرحان ومكيف يعدل بجاكيت القاط
كعد بصفي والله لا مرتبك ولا شي
شو صاح / لمى تعالي يمعوده شوفيني خلقه الله
وهي اجت تركض شالت البرنص عن راسي
وهو باوع عليه وصاح بضحكة / بوووويه فطيمه من عسنج بالجنه على هاي القسمه
ولكم مو عيون طركاعه
خله النسوان خربن من الضحك
سهى مرتبه الذهب بصينية فخمة مال زينه
مغلفه بقماش بيض ومرصعه بخرز كرستال ملون
شنو من لبسني ذهبي كمت ارجف من الخوف والارتباك
اريد اسيطر على روحي بعد مااكدر
هو يلبسني بالكلاده شاورني / لا تخافين راح اطلع
بس هو جذاب بقى كاعد
لحد ما قطعنه الكيكة وذوكني قطعة صغيره
بس اني ارجف ما كدرت اذوكة
لمى سوتها شلون الفيكه وضحك
واخذت الشوكه من ايدي وخلته بحلكة
والعصير صار الضحك بدرهم
هو شربني ،،شربت قليل علمود الصور ،
بس اني من شربته شويه وكع عليه
واني طلعت من عندي كلمه عفويه
كتله / ماالوحك انت جبير دنك شويه
هو ضحك من خاطره وكال / ادنك واصير صغير الخاطرك يا حلو ،
خله النسوان كامن يصفكن ويضحكن
يمه قلبي كام يدك بسرعه من راد يكوم
دنك عليه وباسني بخدي فاجئني
يبووووو فد فشلت وهو ولا مهتم
ولمى كامت تصفر واخذها الحماس تصفك وتهلهل
يعني من صدك اجواء حلوه
من جانب خايفه ومرتبكه
بس اكول ميخالف اقوي روحي وماافشل خالتي ،
ومن جانب حبيت فكره اني عروسه
وكلشي بهاي الحفله علمودي
للمغرب وبلشوا حفله الرياجيل بالشارع
يعني حفلة الحنه
وجايبين رادوح اسلامي
عود يغني اغاني مال افراح بس دينيه
البنات رادن يصعدن بالسطح
علمود يتفرجن على الحفله
بس خابت أمالهن
لكن باب السطح مقفول
والمفتاح محد تعرف بي وين ضايع
هنا كمنا بدلنا بدلاتنا ولبسنا بدلات الحنه
اني بدلتي حمره وياها شالها هم رتبنه اليه البنات
ومسره بدلتها ورديه هم سترنها البنات
صارت هوسه العشا والطبخ وباقي الشغلات
بيت عمنا حاتم ،،
ماشاء الله صارت عزيمه كلش جبيرة
عود ساهره جابتلي اكل
كتلها / اريد بس شي بارد أبد مااشتهي الاكل
معدتي تكلب ،خطيه راحت جابتلي
بسكت وكاستر وماعون فاكهه
كالت/ بس هذا الشي البارد لكيته بالثلاجة
اكلت شويه وانطيتها الكاسه
البنات جابن صواني الحنه ونصبنها كدامنا
وهم اغاني وحفله حلوه
وحنت ايدي خالتي فاطمة وبوستني
وعمة منتصر هي حنت ايد مسرة
وشكد حلوة تكول اغاني وتهلهل
وحنت ايد باقي البنات الما متزوجات
دزوا على خالتي فاطمة وراحت وياها
عمات منتصر يحنون منتصر وطارق
شنو شويه وصارت جبهات قتال من كثر الرمي
وهلاهل الولد شعلت الجو
يعني اجواء شكد مااكول عليها
حلوة ومفرحة وبيها فرفشه وناسه قليل بحقها
طبعا اني كلشي عندي حلو وغريب
لان ابد ماشايفه هيج شي من قبل
هواية فرحت وتونست رغم اكو خوف بداخلي
بس حبيت هاي الاجواء والهوسه
يمكن للساعة ب ٩ وكتلهم هذا حدي
متت من التعب انكسر ظهري من الكعدة
رحت لغرفة خالتي اجتي لمى نزعتلي العدسات مااعرفلها
انوب خذت هدوم عادية
ودخلت للحمام اجتي ويايه أساور ساعدتني
نزعت البدله،واخذتها وطلعت
ومن سبحت وطلعت ساهره خطيه هي مشطتلي
بين ما مسره هم راحت بدلت وسبحت
هنا أجتي نهى خطيه هي الاخذت ذهبنه وضمته
تخاف عليه ينباك الواحد ياخذ احتياطاته
ما شاء الله البيت مليان ناس
والله اعلم بداخل النفوس شكو
فالواحد يرتب امره أفضل
اني خليت وتمددت على سرير خالتي
والبنات بقن يلبسن وينزعن بالبدلات
يكولن / فال زين حتى تجي قسمتهن ورانا
اني بقيت اباوع عليهن واضحك
وهن يتعاركن هاي تكول / اليه الدور انا هسه البسها
وهذيج تكلها /خليني البسها وراج
انوب ضحكت من خاطري
لان سهى جابت قلم جاف
وكعدت تكتب اسماء البنات المامتزوجات
العفو على الحذاء من جوة
وهاي تكول / اكتبي اسمي
وهذيج تكلها / خطيه ذكرت فلانه كتبي اسمها
يعني حذائي وحذاء مسره صارن قائمه مال اسماء
عفت الهوسه وغفيت من التعب
فزيت مسرة تكعدني تريدني اكل شي
بس اني النوم عندي عزيز واهم من الاكل رجعت نمت ،
فزيت يمكن ب ٢ بليل لو اكثر
هواية متضايقه العفو لازم اروح للحمام
كمت بسرعة للحمام الموجود أكبال غرفه خالتي
العفو لكيت دم قليل نازل بملابسي
غسلت وكملت رجعت للغرفة
كمت ادور بالكنتور بغراضنا العفو على نسائيات
وانوب ضجت بداخلي كلت / هسه وكتها وتجي
ويشهد الله عليه ما جنت أعرف الحامل
تقطعها الدوره الشهريه ،،حسبالي عادي
تبقى تجيها كل شهر
حتى من سألتني ام ساهرة وخالتي ،
ورحت للدكتوره محد بيهن فهمتني
وكالتلي / راح تنكطع وبعد ما تجي
بدلت ورجعت نمت ،
يعني مسرة وخالتي وجم مراه نايمات بالغرفة
ولا وحدة حست عليه ، اتحرك بهدوء
للصبح هم كعدتني مسرة كالت / كومي
الناس اقرباء بيت خالتي اجوي
وهوايه خطار كاعد يجون وصاروا لحم بره ،
البيت انملى ملي نسوان وجهال
1 ت
كتلها / ظهري يوجعني وبطني توجعني
روحي جيبلي حبايه راس
بلكت يخف عندي الوجع
والله استحي اكلج بس مااكدر أتحرك
هي كالت / دكومي اتريكي وراها انطيج حبايه
بس تحركي لا يجن عليج البنات ويخبصنج خبص
كمت اسحول بروحي العفو دخلت للحمام
يمكن عشرين مره لو اكثر اني باليوم ادخل للحمام
احس روحي متضايقه والعفو ماكو ادار
شكد اضوج من هاي الحاله
العفو النسائية لكيت قليل بيها دم
استغربت هاي ليش هيج
خاف مو زين !!
فكرت وكلت خاف لان شربت هوايه علاج
لو لان حامل
لو لان صرتي مشلوعه
بقيت فكره تاخذني وفكرة تجيبني
5 ت
بس طلعت من الحمام
لكيت سهى ونهى واكفات بالباب
سهى سألتني / شسوين بحب الراس
كتلها / ظهري وبطني يوجعني
ورحت للمغسلة اغسل
نهى سألتني / انتي نازل عليج شي
لو لان ظهرج يوجعج تردين علاج ؟
اني اغسل بوجهي بالصابون كتلها /
نهاوي ترى استحي عيب تسأليني
كالت سهى / ولج لا تشلعين قلبي
مو وكت العيب هسه
مسرة كاعده ادورلج على حب راس
ليش تردينه شسوين بي ؟
جاوبتها بروح خلصانه
مابيه حيل للملحة من الصبح
كتلها / اجتني الدوره وظهري يوجعني
هي شلون الاخترعت وكالت / شنو اجتج الدوره
ولج انتي مو حبله شنو اجتج ؟؟
باوعت عليها وكتلها / هي بكيفها اجتي بعد ...
نهى كالت / ولج مسودنه انتي حبله بعد ما تجيج منا لحد ما تجيبين ،
سهى كالت / يمه اسم الله بس لا صاير شي على الجاهل ، والله محد مصدك حبلتي بسرعه
وبدون ركضة الاطباء وشلعان القلب
اجتي خالتي تدعبل هي شويه سمينه
ورجلها توجعها عدها سوفان ما تمشي عدل
شلون البطريق من يمشي
تميل شويه منا وشويه منا
كالت / هاااا شبيها البنيه شو ساهره
انطتني باص خايفه عليها
سهى كالتلها / عدها نزف وما تعرف تكول جايتها العاده
خالتي دكت على صدرها وكالت / يمه اسم الله
ولج يمه شو تعاي يمي ولجن الله أكبر
المصايب تمطر على راسي مطر
اني بقيت اباوع عليهن هذني شبيهن
شو فرد نوب أنخبصن وخايفات
وانوب اجت ساهرة ،
وسدن الباب حتى لا واحد يسمع
وبقن يحققن ويايه شلون ؟؟وليش ؟؟؟
عاد أتفقن اذا ما نزل عندي هواية دم اليوم
ومصار شي ،،باجر نروح للدكتوره
انوب الخطار صاروا نفس هذوله الافواج
من دخلوا مكه بفلم الرساله ،
كلساع جاين وجبه
بحيث بنات ونسوان الخطار القديمين
كامن يخدمن بالخطار الجديدين
وهم بلشنا نفس ركضة البارحه
اني اكلت شي قليل بالريوك
وخالتي وساهرة يلحن عليه
تعاي اكلي فواكه بدل الاكل
وجهج اصفر ،
ويمكن ساعة مشت ورحنا للصالون
هم راحت ويانه لمى ونهى
وهم نفس الدوخة وتعب البارحه
بس اليوم تعذبت ام صالون أذت عيوني بالعدسات
خلتلي عدسات لونهن ازرك وحدت لون عيوني
و المكياج سوته طوخ
بس ما سوتلنا تسريحات بس رتبت شعرنا
لان لفتلنا حجاب بطريقه حلوة
ولبسنا البدله البيضه بس بيها اردان
يعني هذا لبس خاص مال محجبات
هوايه تأخرنا بالصالون عاد البنات تغدن هنا
وميض رجل نهى جاب الهن غدة
بس اني أكلت بس صمونه وخيار
شكد أشتهيت شي حامض
بس ما جان أكو شي بي حموضه
من كملنا يمكن بالاربعه العصر لو اكثر
ولمى ونهى هم بدل ومكيجن يمنا بالصالون
وكلساع ونهى تسألني/ تحسين بشي ينزل
بس اكلها / لا ، هي تسكت وتعوفني
عاد كالت / يلا تحضرن أجوي الولد نطلع للتصوير
ساعدتني لبست البرنص لان هي حارت بيه ولمى ويه مسرة
سمعنا صوت مزايق ادك باب الصالون
اني لهنا مقتنعه كل هاي الهوسه
بس تمثيل كدام الناس
مو ما خايفه بس مطمئنه طارق ماله دخل بيه
بس كلش مرتبكة
وهوايه خجلانه ومستحيه من الناس
وبنفس الوقت مكيفه وفرحانه
اني عروسه
لمى طلعت مسره قبلي
وتعالوا أسمعوا الهوسه والهلاهل
والمزايق والاغاني
يعني مااسمع نهى شنو تحجي ويايه
طلعتني نهى لباب الصالون مااشوف البركع والبرنص نازلات على وجهي
حسيت رجال لزمني من ايدي الثانيه ونهي بعدها تمشي ويايه
صعدت بالسيارة والله انشلع قلبي
البدله جبيره وثقيله
والسياره عاليه
وصوت طارق بصفي يصيح على نهى /
ولج لا ترفعين البدله لا تشلح
وهي تكله / شبيك خبصتني لابسه ستريج جواها
وهو يكلها / ووولج لا تشلحيها الخريه واكفين
مااريد شي يطلع منها
لحد ما كعدت واستقريت طلعت روحي
وهو يكلي / ممنوع ترفعين الحجاب عن وجهج
والله دقايق هوسه بهوسه الواحد ينثول بيها
باوعت زين من جوه الحجاب
بعد ما مشت السياره
بس اني وطارق وحدنا بالسيارة
يعني كعدت يمه بالصدر ،،
حسبالي نهى صعدت ويانه
يمه قلبي وكف من الخوف
هو كالي / اشغلج التدفئة لو زين هيج ؟؟
ما جاوبته بقيت اقره قران بقلبي حتى مااخاف
هو رجع سألني / امي تكول عندج نزف شنو بطنج توجعج
لو تعبانه لو تحسين الجاهل بي شي
يمه هو كالي هيج لو أني متت من الخجل شكد عيب ولا يستحي يحجي بشغلات البنات ولا جاوبته
هو رجع كال / اذا عده اليوم على خير
باجر اخذج للدكتوره حتى نطمئن
انتي بس لا تخافين والله كريم
هو مشغل اغاني بس جان صوتها ناصي
شويه عله الصوت يعني مو حيل صوت عالي
وكام يهوس ويه اصدقائه
وباقي السيارات
ويدك وياهم هورن
الاغنيه ماافتهم كل كلامها
لان مبينه قديمه والمغني يحجي سريع بس ماادري ليش احسها انكتبت علمودي ومن كال المغني / ولا هيّه عرگة وكت وألبس عباتي وياك وأركض
لو گرب يوم الولادة اشلون داده
بجيت بصوت عالي والشهكة شكت صدري وجرحت بلعومي ، وبقيت بداخلي الوم بروحي ليش ما صرت سباعيه وانهزمت بهذاك اليوم من عنده !!
11
هو بسرعة اندار عليه وكال / شبيج
خفتي من صوت الرمي ؟؟
حركت راسي يعني لا
اني اصلا جنت مركزة ويه صوت الاغنيه بالي مو يم الشارع ،
ما جاوبته وبقيت بس أبجي
هو كال / لا تخافين والعباس مالي دخل بيج
بس كدام العالم مسوين الزفه
حتى نصلح الموضوع وكلشي يصير تمام
وهسه بس نروح للمصور ونرجع للبيت
حتى بوكت ما يزفونه
بس ادخل شويه للغرفة واطلع
مااذيج وروح أبويه
بقيت بس أبجي اخاف أحجي وياه
وبقيت اقره قران بقلبي اتقوى بكلام الله
وقلبي يصير شويه قوي
هو دك تلفونه جاوب عليه كال / والعباس صاحي
شبيك حاتم ما مصدك
لا شارب ولا مكبسل اصحى منك بعد
اني مااسمع عمنا شنو يحجي وياه
كاله / لا مابيها شي حبابه وخوش بنيه
تريد تحجي وياها وتفك عني ياخة
شبيكم الخاطر الحسين سودنتوني
لا تشرب ولا تصخم
انطيتكم كلمه مااشرب هذا هو لا تظلون تلحون
وسد الخط وهو انكلب وجهه من كد عصبيته
طلعت اغنية لنفس هذا المغني
يكول بيها / اهواك واتمنى ولو انساك اهواك
شنهو الذنب الجنيته وياك
حاجيني يبعد الروح
وارحم عاشق و مجروح
يبجي الحالي طير الدوح
ومن عيني الدمع مدفوع ....
5 ت
مااحس الا طارق ضرب الاستيرن مال سياره بقوه
ودموعه كامن يكوطرن على وجهه
و كام يمسح بيهن بيده
وشهك وصاح / الله لا يووووفقج عليااااااء
وخمط كومه مال كلينكس من كدامه
وبقى يمسح بوجه ويكول / الله لا يوفقج علياء
كون حوبة قلبي ما تخطيج
من عساج بنار اخس وانكس من نار الشابه بقلبي
من عساها النار تصيبج بعزيز قلبج
يالكح.... يالس....
والعباس بنات الليل اشرف منج
وكف السياره على صفحة وطفى الاغنيه
يا لجبروج .. يالقنعوج
وما كملتي عشرينج ...
غصب زفوج.....
كرهت الشيخ من كلج
ولج ترضين
وقبلتي !!!
جا كتيلة اريد ويه الولف زفتي
ما شايل حقد ل أبليس
بس شايل حقد عالناس
ذولة الركصو بعرسج
=================
وراها لا حاجاني ولا حاجيته
لحد ما وصلنا للتصوير
منتصر ومسره نزلوا قبلنا صوروا
هو ما قبل ننزل
حتى من أجوي البنات خواته
وباقي الشباب ولد عمه ما قبل انزل
كاللهم / عوفوها بردانه لا تتمرض
من يطلعون الجماعه ننزل
وصدك بقينا بالسيارة كاعدين لحد ما خلصوا تصوير
منتصر ومسره وطلعت سياره زفتهم قبلنا
4 ت
نزلتني بيداء مرت عمنا حاتم وسهى
وهو خبصهن غطنها وسترنها
لا ترفعن البدله لا تشلح
بيداء كالتله / يمعود افتهمنا
اكلت روسنا شبيك مسودن ، وسودنت البت وياك
13 ت
دخلنا للتصوير وانوب اليصور طلع رجال
وهو تخبل ماقبل
-
وهمام وماجد
يكلوله / يمعود البنيه لابسه حجاب
شبيك صور وخلصنا
-
وهو يكلهم /الكو.... مو كاتب التصوير كادر نسائي
-
الولد كالوله / البنيه المصوره ماجايه
-
وماجد كاله / صوجك انت ومنتصر
من البارحة كنالكم خل نروح نحجز ،
كلتوا عليمن الشارع متروس قاعات تصوير
يالله العناد تارس روسكم .
-
وبالشافعات يلا صورنا
والصراحه جانت لحظات مخبوطة خوف وخجل وفرح
اجتني أساور طالعه كشخه تخبل
لابسه فستان لونه جوزي فاتح ولابسه شال
ومخليه مكياج خفيف
خطيه جابتلي عصير وكيكه
كالت اكلي / ظل بالي عليج
مازن خاف عليج من وكفتوا بنص الشارع
كال / بس لا تخربطت
ودك على طارق بس ما جاوبه
6 ت
كتلها / مسره شبيها ليش البنات واكفات يمها؟؟
كالتلي / خطيه ترجف تكول بردانه
بس اني وانتي نعرف شبيها ..!!
نفس الفكره التاكل بروحها مجلبه بيها ...!!
وخجلها راح يوكف كلبها
هسه اكلي شويه حتى تكومين تبدلين و ترتاحين
11
شويه وخالتي اجت اخذت ماشه من شعري
وراحت خلتها بشعر مسره
وهم جابت ماشه من عدها خلتها بشعري
وانوب جابت صمونه اني عضيت منها شويه
ومسره هم عضت منها شويه
ولمى خلتها بالجيس وضمتها
كالت / حتى اقسمها بين طارق ومنتصر
وراحت ضمتها
كتلها /خاله ليش هيج سويتي ؟؟،
كالت / حتى ما تنجبسن وأثنينجن تخلفن
وكرفتجن تعم بالخير والرزق على ولدي
9 ت
ماكو دقايق وكامن يصيحن النسوان /
صلن على النبي وكل وحده تاخذلها مكان
راح يجبون العشا ،
رحم الله والديجن أستريحن
وسون طريق حتى يصبون العشا
وصارت هوسه لان ماشاء الله نسوان وجهال
تكولون دود ،
اللهم بدون حسد كل مراه وياها ثلاثه واربعه جهال
بعد ما الكل أستقر ، كاموا يجيِّبون الاكل وبالعافية كل الناس تعشوا
7
هنا اني كاعده كبال مسره كم بنيه كاعدات يمها
واني هم اكو بنات كاعدات يمي
صفنت ويه روحي مااعرف هنا شنو أحساسي
شلون اكدر اوصفلكم هذيج اللحظات الحسيت بيها
يعني لحظة حلوة ، وفرح ، وخوف ، وارتباك
وتباهي ، وتجربه جديده
الشعور بيها مخربط كل دقيقه شكل
ميعرف الواحد شلون يفسرة
من كملوا العشا كامو يصيحون
صعدوا العرايس فوك راح يزفون العرسان
وصارت هوسه كلهن يصيحن
هاي تكول / البسن حجاب وتسترن
وهذيج تصيح / ولجن أتسترن ربع العرسان
راح يزفوهم مو ولدنا
وهاي تكول / بناتنا اهل الناصرية دخلن جوة
محمد اذا لكف وحده منجن يوذرها
وهذيج تكول / ما شاء الله معازيم
ال الحسن كلهم ضباظ وشيوخ وشباب كشخه
وهاي تكول / هذوله المعازيم عود مو كلهم جاين
منتصر ابو حسين واصل الدنيا كلها
يبوووو صار مزاود وتفاخر على كلشي
21
هنا نهى وساهرة كالن / يلا كومي نصعدج فوك لغرفة طارق حتى يزفونه ربعه
أنصدمت ولا وحده بيهن
لا خالتي ولا ساهرة ولا مسرة
اتفق ويايه اصعد الغرفة طارق
كتلهم / مااصعد اخاف اريد اكوم ابدل
واروح للحمام هوايه متضايقه
وامدد وانام هوايه تعبت
هن شو لطشن وكامن يلحن /
كومي اصعدي فوك
وبس يدخلون الولد طارق للغرفة شويه يعوفج وينزل
( 2 )
اني اسمع غرفه طارق وهو بيها موجود اصركع
قفلت متت من الخوف
مااصعد يعني مااصعد كل الموقف ينعاد بذاكرتي
7 ت
مسره صعدنها البنات
هلاهل وصفكات و هوسات حلوه
واني كمت ارجف من الخوف اكول الساهره/
والله اخاف مااصعد لغرفة طارق
وهي تعضلي بشفتها وتكلي / عيب يمه
منا العالم لا تفضيحن نفسج كومي اصعدي
بس يصعدوه جماعته وبسرعه ينزل
اني بعد الخوف سيطر عليه وكمت ارجف وأبجي
واجت خالتي تشاورني تكلي / والله تمثيل
انقشمر على العالم كومي حبابه اصعدي
واني اكول / والله مااصعد
النسوان كامن يحجن/ شبيها ؟
وليش تبجي ؟
وخالتي وساهره كامن يملغطن بسالفه يكولون /
تخاف وتستحي لان عليها الدوره تكول عيب شكول لطارق
هنا تبارك واكفه هي وهذن البنات المو راحة
وجان تكول / وشنو هل عياره
مو حبله شنو عليها دوره
يا يمه سطرتها سهى راشدي يمكن كسرت سنونها
كالتلها / تثبيت سحوره امج عطلن وبطلن وبال عليهن الجلب الاسود ، اصعدي الغرفتج بربوِوِوِوِ....
خوش تألفين سوالف
خلت دموعها تكوطر للكاع
هي ماسكتت وكالت / اني اعلمهن
وراحت تركض وطلعت بره
اجتي هدى وبقت تحجي على سهى / شلون تضربين توته مو عيب عليج وهي طفله وما تفتهم
وحقها تغار على ابوها
ومو سهله عليها تشوف وحدة تجي بمكان امها
لا تاخذين بكلامها من حركت قلبها
كامت تألف سوالف
خالتي وام ساهرة وحدة من عمات منتصر
كالن / لا تسولجن عركه لا تجبسن البنات
عدن هاي الساعات على خير
خالتي بقت اتندس بيه / كومي اصعدي حبابه
واني من صدك الخوف اكل قلبي
هنا سمعنا صوت الرياجيل يدبجون قريب باب الاستقبال يهوسون / زفيناه بصاية حِيدر
وصوت الرمي حرك الدنيا
دخلوا منتصر وطارق يدفعون بيهم
ويهوسون ويصفكون
ساهره بسرعه شمرت عليه البرنص وغطتني
طارق ومنتصر وباقي الرياجيل اقربائنا
شلون التفاجؤا لان اني بعدني ما صاعدة
خالتي كامت تهوس/ صلوا على نبينا والعين ما تجينا
والنسوان الكبار كامن يهوسن وياها
هنا حسيت رجال جرني من ايدي يريد يكومني
بس اني من الخوف انشلت رجليه
ماكمت ،
مااحس الا كرصه على زندي شلعت جلدي
وصوت عمنا حاتم صاك على سنونه
يكلي / كومي ويايه لو ادفنج
حسابج ويايه بعدين
انمدت عليه ايد رجال ثاني
كالي / كومي ولا تخافين
هذا صوت طارق
خالتي هي وساهرة بقن يمشن بيه
ماادري البنات وين راحن
هسه وصلت الباب الغرفة غير اريد افوت أنشليت
رجليه بسامير واندكت بره
وطارق لازم ايدي ويمشي ويه خطواتي ،
وخالتي فاطمة وساهرة ويايه يمشن ،
وصوت الرياجيل يهوسون ورانا
وأني هنا نشليت لا اروح واجي
عمي حاتم حسيته دفعني من جتفي بخشونه
وبالضحك يكول / يلا فوتوا برجلكم اليمنه
وصلوا على النبي
طارق جرني من ايدي واني شهكت بخوف
عاد هو سواها شلون الفيكه وبالضحك
لكفني وشالني ودخل للغرفة بسرعه
وكام يصيح / ما قصرتوا كفووو منكم ،
وسد الباب برجله بس نزلني قفلها
واني زعت العافيه من الرجيف والخوف
بسرعة مديت ايدي كدامي ادافع عن نفسي
هو حجه بصوت ناصي كالي /
مالي دخل بيج هسه شويه وانزل
وبقى مخلي اذانه على الباب بعدهم الرياجيل يهوسون
كال/ هسه غير يروح الكو.... لطش يم الباب
واشرلي بيده وكال / اخذي راحتج
نامي ، بدلي ، ارتاحي،، اني شويه وانزل
وهو حتى ولا وصل يمي
شويه وراح للكنتور وطلع تراك
وعادي بدل كدامي
يتصرف بهدوء كانما اني ما موجودة
من خلص تبديل بده يرتب القاط بتعلاكه
وعلكه بالزاوية ، بعدين كعد على السرير
وسحب جكاره وكام يدخن
وبقى مدنك راسه بالكاع
هنا كالي / اكلج اني مااريد اضغط عليج
شويه وراح اطلع واعوفج براحتج
بس لازم تبدلين حتى العالم تمشي عليهم جذبه
اني هنا كاعد مالي دخل بيج
روحي بدلي وره باب الكنتور
والبسي دشداشه اي شي مستور
مالج دخل بحجي النسوان لا تلبسين هذني المشلحات البلزاوية
6
اني مااسمع ولا اتحرك ولا كلشي اسوي من الخوف
يعني لحظات مرت عليه مره ما تنجرع من الخوف
شكد ما جنت فرحانه ومكيفه صار كم يوم
هاي الدقايق طلعت الدنيا من عيني
بالكوة طلعت من حلكي هاي الحجايات
لان بس اشهك وأبجي
كتله / يعني لازم ابدل يلا تطلع
هو وين يلا حرك راسه يعني اي
وكال /هاي بعد طبع عد اهلنا
ما يمشون اذا ما أطلع أسلم عليهم
هوايه ركزت عليه من خوفي
مااعرف شبي هوايه هادي
وصفنه تاخذة ، وصفنه تجيبه
والجكارة يشفطها بقوة ومن يذب دخانها
كانما تطلع روحه ويه الدخان
مشيت بخطوات كلش ثكيله
احس رجليه مشدودة بيهن صخر من ثكلهن
بالكوة أتحرك ، رحت طلعت دشداشة
والله حتى ماانتبهت شنو لونها
شمرتها بالكاع وكمت ادور على ربطة
مااحسه الا واكف بصفي عطت عيطة رجت الغرفة
عوووووفني حباااااب
وخليت ايديه كدامي احمي روحي
-وهاي الدشداشة غيرها
شوفي لونها خرة عكرك مو مال عروس
-راح اجي قريب عليج مو تعيطين عيب
ترى العالم البره راح يفهمون عياطج غير شي ،
تقرب علية بهدوء
بس شنو مركز نظرة بس على عيوني
بقى الجكاره بحلكة واندار بظهري
من مد أيدة وبده يفتح بالقياطين
اني أريد اسيطر على روحي مااكدر
الرجيف موتني
الخوف بهذل حالي
كمت ازخ عرك من كثر الخوف
هو بسرعة فتح القياطين وابتعد عني
راح وكف وره باب الغرفة
شمر جكارة بالكاع وطفاها برجله،،
وانوب بقى يضرب بالحايط برجله بهدوء
شلون الواحد من يضرب الطوبه
كالي / بدلي بسرعه خل اطلع
لا تموتين دكات قلبج وصلت للكعبة
اني هنا أنتبهت شلون ابدل وهو موجود
سيطر عليه الخوف والخجل
كمت مااعرف أتصرف
فتحت باب الكنتور وكفت وراها
ونزعت البدله ليجوة نزلتها على رجليه
ردت البس الدشداشة ما دخلت براسي
نسيت الحجاب والبركع وهاي الهوسه
كعدت بالكاع خبصت روحي خبص
كمت افتح بالحجاب بسرعه
كمت اخمط خمط بالشال والبركع ،
بدلت بسرعة وكمت الملم بهوسه البدله والحجاب
هو كالي / عوفي كلشي بالكاع لا تلملمين شي
خلي الغرفة هوسه
بس تعالي هنا أمسحي مكياجج
هذا كلينكس رطب على الميز
ماادري ليش اسمع كلامه
واسوي شنو يكلي عليه
يمكن الخوف هو السبب واريده بس يطلع من ألغرفة
ماادري لان شفته غير شكل
يعني حباب ويحجي بكل هدوء
حتى شكله هنا شفته يختلف من كثر هدوئه
رحت على الميز سحبت كلينكس شو صارت هوسه
اني جريت وحده شو اجى كومه بيدي
رجعت الباقي بالجيس ماانتبهت طخت ايدي
باقي المكياج وانكلب وتخربط على الميز
عفته الهوسه وكمت امسح بوجهي
شنو صرت لوحة مال الوان خبطت وجهي خبط
هو كالي / ديري بالج امسحي عيونج على كيفج
لا يتأذن من العدسات لو تنزعيهن أحسن
جاوبته/ مااعرف
هنا دك تلفونه هو راح على ميز السرير
من جاوب كال / لا يوم ما بيها شي لا تخافين
لا حبابه وتسمع الكلام
من ارمشلج اصعدي عليها
اني مسحت وجهي شلون ما جان
مبين عليه اللوصه مال مسح الألوان
3
من سد التلفون هو بمكانه حاجاني
كالي / شوفي راح اجي يمج أساعدج
أنزعي العدسات متاذيات عيونج من عدهن
خابط بياضهن
هم سحب جكارة من الباكيت ورثها واجى عليه
وكف يمي وصار كلش قريب عليه
وكام يدور على الميز ولكى علبة العدسات
حضرها وغسل ايده بالمي مال العلبه
واندار عليه يعني صارت وكفتنه وجه بوجه
كالي / لا تخافين هسه اسحبها الج
صدك من سحب العدسه من عيني
ماادري ليش ما حسيت بيها
من خلتها اليه ام صالون
بقت عيوني شكد تهمل دموع وظلت شكد تنغز بيه
من سحبهن أثنينهن وخلاهن بالعلبة
بعدة قريب عليه واكف كدامي
كالي بصوت ناصي / بس كوليلي شنو اسم عطرج الجنتي مخليته هذاك اليوم ،
الهسه ريحة هذيج الدقايق ضاربه براسي
اني هنا أنصكت من الخوف بس النفس يصعد وينزل
ولا تحركت بس كتله / ماادري
1طّ
هو وخر من يمي وكالي/روحي البسي حجابج حتى اطلع ، ومن يصعدن النسوان ويه امي
خاف وحدة تسألج كولي هو نزعني البدله واسكتي
واذا بقن يلحن عليج بس كولي صارت شغلات عيب وبعد كلشي لا تكولين
هو اخذ تلفونه ويمكن اتصل على خالتي
واخذ باكيت جكاير من الميز
وبقى يدور بجاكيت القاط طلع محفظته منها
من راد يطلع من الغرفة بالباب
كالي / متعرفين شكد شايل ندم وقهر
ديري بالج على نفسج ، وعلى الجاهل
من اليوم بعد مااضايقج ،
واذا بيوم تغيرت فكرتج عليه
ونفسج أرتاحتلي
وردتيني،،
لبة قلبي تلكيها صايرتلج غطة وفراش
فتح قفل الباب وطلع
اني هنا كمت ابجي بالزايد
ماادري ليش ؟؟!!!
والله مااعرف افسر شعوري شنو جان بهذيج اللحظه
نزل عليه غضب أسمة بجي
صعدت خالتي وساهرة وياها كم مريه
وهم كامن يهلهلن ،خالتي بس طبت
لفتني بحظنها شو كمت أبجي بصوت عالي
والله مااعرف شصار بيه
هي شاورتني/ ضربج لو وصل يمج
كتلها / لا حباب
عمته كالت / يعني طويرق ضاكج وغمس بيج
لو بهاي دموعج سطرتي
ماافتهمت شنو كالت لو شنو معنى كلامها
بقيت ساكته
ساهره ضحكت وكالتلها/ عمه شلج بهذا السؤال
حرجتيها للبنيه ما تعاينين مخلفات الحرب
هذا واوي لا تخافين عليه
يعرف شلون يحصل على لكمتة
8
هن بقن يهوسن ويصفكن ويهلهلن
دوخني فوك خوفي ودوختي
سندت روحي على ميز المراية
1
الباب مو مفتوحه
لمحت تبارك وياها هاي البنيه المو راحة
الجانت تباوع على طارق من يركص بالحفله
وصاحت عليه بالطرمة وما جاوبتها
رايحات على جهه الدرج يردن ينزلن
هاي البنيه بقت تتلفت على غرفة طارق وتبجي
من شافتني لمحتها وصارت عيني بعينها
غمتني بثنين ايدها وراحت
أستغربت هاي شبيها ؟؟؟؟!!!
شويه وخالتي كالت / ابقى بغرفتج ارتاحي
بين ما يصعدلج البنات العشا
وغمزتلي ،،بس ماافتهمت شنو قصدها
هن بس طلعن واني قفلت الباب وراهن
ورحت مددت على السرير
ظهري احسه أنكسر من كثر التعب
يمكن نص ساعة اكثر ، اندكت الباب
كلت /منو ؟؟
اجاني صوت طارق كال / انا افتحي الباب
واني هنا عنطز دماغي ما تحركت ولا فتحتها
والله أخاف ،،
رجع دكها على كيفه جم مره بس ما فتحتها
هو هم بعد مادك
شويه وسمعت صوت ساهرة وسهى
يدكن بالباب كالن / افتحي الباب جبنالج العشا
كمت فتحتها واشوف طارق مخلي كرسي
وكاعد يدخن بالفسحة المقابيل الغرفة
ساهرة كامت تحجي عليه /
ليش قافله الباب وماأفتحها الطارق
عيب من العالم هسة شيكولون
وأحنا ماشي عدنا طبع العشاير
وماكو زلمة يبات برة غرفته بيوم عرسه
وهمزين الله ستر ومحد بعد صعد فوك
لان منتصر من راح الغرفته زفوا باقي الرياجيل
لحد هسه ما طلع مسلم عليهم
وبقت شكد تحجي ويايه ،
هم من جهه تعلمني
ومن جهه ثانية تلوم بيه
طارق فات للغرفة بهدوء
وهي ساهرة وسهى بقن يوصنه عليه
هو بس حرك راسه يعني اي
هن عافن صينيه العشا بالكاع
وماعون الفاكهة والحلويات والعصاير
رتبتها بالثلاجة
هو اكو فاكهة وشغلات بالثلاجة
بس هم ضافن بعد شغلات بيها
سلمن عليه وساهرة باستني وشاورتني كالت /
صيري حبابه واسمعي الكلام
لخاطر سمعة امج
والخاطر خواتج خلي هاي الليله تعدي على خير
طارق قفل وراهن الباب
كعد ياكل كالي /تعالي تعشي
خوش مرتبات الاكل صينيه مال عرسان وكذا
بس كتله / مااريد
هو كال / براحتج وبلش يتعشى
اني ظهري يوجعني كلش أذاني
والعفو محتاجه اروح للحمام
رحت فتحت الباب
هو كالي / وين رايحة
كتله / للحمام
كالي / ارجعي البسي اسلاميتج واطلعي
خاف واحد يصعد دشداشتج بيها كصف
باوعت دشداشتي عاديه مابيها كصف
واني هم أنثولت ونسيت البس عليها شي،
رجعت لبست عباية الراس ورحت للحمام
هذا مال طابق الفوك
العفو استخدمت الحمام،
وانوب دفيت المي وسبحت
وغسلت وجهي تمام من المكياج
ورجعت لبست نفس هدومي وعبايتي وطلعت
مادري ليش حسيت نفسي لكيت فرصه
والخوف ياكل بقلبي ومااعرف افكر زين
ما رجعت للغرفة،
خليت ونزلت جوة لغرفة خالتي...
وهن النسوان وحدتهن راح تموت من العجب
شافني وبقن يكولن/ شعندج نازله
ومو عيب تعوفين رجلج وتنزلين
وكامن هواية يحجن
اني بس كتلهن / أستحي سبحت واريد امشط
واني جذب بس اريد انهزم
اجتي خالتي مااعرف وين جانت
خزرتني واجتي عليه كالت / هاااا يمة شعندج نازله
واجتي وكفت بصفي
كتلها / اريد امشط واستحي
هي ضحكت بس عيونها مخنزره
كالت / ولج يمه أصعدي مشطي فوك يم رجلج
وسويه تعشوا بالعافيه
يلا حبابه اصعدي
هنا دخلت هدى واخت مازن اسمها شهلاء
شو وحدة كامت ترفع وحدة كامت تكبس
ويحجن على ماما حجي مو زين
وعساس هي مو زينه ،
واحنا شلون ترباتها وهيج طلعنا خجولات ،
واحنا جذابات ونتعاير حتى نكسب قلوب الكل
بهذا فقرنا وعيارتنا
اني كمت ابجي هم انهضمت
لان حجن على ماما وكدام الكل
ويحجن عليها حجي مو حلو
وهم لكيت البجي حجة حتى مااصعد فوك
2
شو هن النسوان كلهن كامن يحجن
ومن هاي كلمة ، ومن هذيج سالفه
واني عقلي وكف وعاندت مااقبل اصعد فوك
وصار الحجي بصوت عالي وكام بعد يعلى
وماادري منو بيهن طالعه كايله للرياجيل
يعني سون من كلشي ماكو قصه شكبرها وشكدها
2 ت
هنا نزل طارق
بقى واكف باب غرفة خالتي يباوع عليه وساكت
هدى شكالتله / شو ساكتلها ما تصعدها فوك
لو من هسه ركبتك 🤦♀️
بويه هي بعد حضوض وماخذات من حظ امهن
يعرفن شلون يخورسن الزلم
4 ت
هو كاللها / وانتي ليش غاثه روحج
انا المركوب لو أنتي ،
انتي بس طلعي من الدكمة الحمرة وهي تصفى
هنا أجى عمي حاتم سلم على طارق وباركله
واجى عليه بوسني وباركلي
وانطاني ظرف ابيض خلاه بيدي
كالي / هاي هدية عرسج ،
وعلى نزلتي الجايه أخذج انتي وخواتج
زياره اسبوع الكربلاء اشبعجن ونسه وطلعه
3 ت
هنا هو لزم أيدي ويريد يمشي بيه
يضحك ويكول / يلا بويه طويرق
اخذ امريتك وامشي راويني عرض جتافك ،
شعدكم نازلين يمنا اصعدوا ارتاحوا
وياكم دكوا الباب على منتصر
عاينوا عدل لو أستشهد
خافنه وكف كلبه الشايب
وخله النسوان كلهن كامن يضحكن
9
شايفين الواحد من تجي ساعه يطفي دماغه
ويكوم ما يسمع ولا يشوف
والخوف يسيطر عليه
ويخلي دماغه يتخيل شغلات
راح تصير وتخوفه وتأذي
وبذيج ساعه ابد ما يجي براسه
غير كل فكره سودة وتخوف ،
اني هنا الشيطان اكل دماغي
شكد حاول عمي حاتم يضحكني
ويعاملني باأسلوب حلو حتى بس اصعد فوك
واني ابد دماغي مات
وبقى بس يفكر أذا صعدت فوك
وبقيت وبتت اليوم هناك
طارق راح يعتدي عليه نفس هذاك اليوم
7
ونوبات الواحد من كثر الضغط عليه
وهو ماعنده عقل يشتغل صح
وهيج خايف ومرعوب
يكوم يحجي كلام ما يحسب حسابه
زمخت على عمي حاتم وحجيت بصوت عالي كتله /
مااااصعد فوك انت شبيك غبي ما تفتهم
الا اكلك ااااخاف من عنده
اااخاف يرجع ينام فوكايه ويخنكني ويعورني
هن النسوان طكنها بضحكة وعلى فد صوت
والغرفه كامت ترج بضحكتهن
2 ت
مااحس الا عمي حاتم سطرني براشدي دار وجهي وصاح / ووووووولج بت عدنان ....
هنا ما كمل كلامة عض على لسانه
ويخنزر عليه يريد ياكلني
جرني من عباتي يريد يمشيني
7
بسرعة اجى طارق وخر أيدة من عندي
وكاله / ابو جواد اعصابك
اعطاء العذر واجب مو هاي مقولتك
1 ت
انوب لزمني من ايدي وكالي / امشي اصعدي
كافي عناد وخنزر عليه
مشى وظل لازم ايدي لحد ما صعدنا وطبينا للغرفة
كلشي ما حجه ، راح للكنتور طلع هدوم جديده
كشخ واخذ محفظته وتلفونه وجكايره وطلع
صعدت خالتي وقفلت الباب
بس كالت / مو حجيت وياج وعلمتج هيج احسن
الله يصلح عقلج ،
كعدت على طبلة ميز المكياج وبقت تسبح
واني رحت تمددت على سرير
وغفيت هلكد ماتعبت من كثر الخوف وألبجي
وياريتني سمعت الكلام وما سويت هيج
ولو بعد ما يفيد الندم .......
-
-
شكرا لزيارتكم عالم روايات سكيرهوم
