رواية ناديه الفصل التاسع عشر 19 بقلم انين الليل

سراج 

من سمعت عمتي وكلامها گتلها ::يعني شتتصورين ناديه شافت او سمعت شي اكثر من الشافته 

=اي فهمني سراج البت خايفه وصخنت وطلعت حراره بحلگها نفس يوم حادث ابوها 

::عمه مو هاي الكلبه امها سمعتها كلام وخوفتها او 

=او شنو ليش سكتت

::الحقيره نزعت الشال وگالتلها شوفي شلون زينو شعري كله من وراج ومن تكبرين محد راح يحبج وكلها 

راح تتخلى عنج وعن اختج وراح يعيرونج بيه ويگلولج 

امج الخاينه الي كتلت ابوج والناس راح تخاف منجن ما راح يخلون بناتهم يلعبن وياجن وهواي كلام 

عمتي هزت ايدها =اي سراج بعد مياده شتترجى 

اتحسرت ::اتصوري عمه من سمعت ناديه تصرخ خايفه دخلت واخذتها واگلها اسكتي بابا هي تگلها 

حتى هذا الشايلج يجي يووم من تكبرين ويتخلى عنج

=حسبي الله ونعم الوكيل عبالي انكسرت عينها اتندمت 

::اي عمه مكسوره عينها ومتندمه بس على سلدار ما شفت وحده مثلها مقره بذنبها ومتباهيه بي 

عمتي =كله من هادي ورطنا واله منير گلي لا تستعجلون اسئلو واطقسو بس هادي  

::عمه هادي شمدريه شاف رجل اختها وهذاك يحمد بيها 

عمتي =لا هادي حتى ما خلانه نسأل لان عنده شغل ويه منذر (بعدين تحسرت وگالت )بعد 

الحچي ما يفيد الفاس وكع بالراس همزين ياسراج اخذتها الناديه وشافتها على حقيقتها حتى ماتگول 

حرموني اشوف امي

جاوبتها ::صحيح عمه بس تعاي الي ينسيها ناديه ذكيه وكل شي يبقى ابالها ومو من السهوله تنسى 

=الله كريم عينه بعين رب العالمين 

::والنعم باالله

جاي نتعشى وانا كل شويه اشوف جبين ناديه اندك الباب واجه كرم جايب عمتي جميله وزهراء ما قبلو

يتعشون وراحت زهراء سوت چاي وشالت المواعين وكعدنا نسولف عمتي جميله سالتني ما جاوبتها لان 

انا نفسي مصدوم من شفت مياده وصلافتها عمتي منيره سولفت الها جميله گالت وهي تبجي 

- - الله يطول عمرج منيره وتربين البنات

زهراء غيرت الموضوع لان شافتني ضايج وگالت //سراج ما طولك اهنا كرم عنده موضوع ويه خالتي 

باوعتله:: ها كرم خيير 

كرم //كل الخيير سراج انا جاي وجايب امي واختي والله شاهد هنه ما يعرفن ليش جاي بس انا جبتهن 

حتى يصير الكلام گدامهن 

جميله //شكو اكريم خيير مو گتلي يمه امشيلج يومين يم خالتي

كرم ابتسم وباوع العمتي منيره //صحيح بس انا ياخاله ماانكر الي سووا عمي النه بيوم الي تركنا ابوي وما 

سأل علينه وشلون ماخلانه نحس بشي وانتي هم ما قصرتي 

منيره =انا شسويت يخاله 

جميله جاوبت /لا منيره سويتي هواي المثلج ماتخلين خليل يصرف علينه فلس احمر بس انتي ياخيه گلبج ابيض 

ما تشيلين حقد وكره

منيره= جميله شنو هالحچي جهالج جهالي شبيج انتي صدك مرات عدج خبالات ما ينلبس عليهن ثوب بس كلبج خالي 

كرم //وهسه اجه الوكت الي ارجع بي فضل عمي 

=يافضل يمه كرم شتحچي

كرم //خاله الماتدرون بي بيتنا الگاعدين بي تره موجدي اشترا لا عمي اشترا وسجله باسم ابراهيم

 وگله هذا بيت جميله وجهالها لذلك ابوي قبل وفاته دارا باسم امي لان عمي خليل گايله منيره تگول 

ما اگعد ابيت واختي وجهالها بالاجار 

عمتي منيره متفاجئه =والله كرم ما ادري بخليل مشتريلكم بيت 

كرم اتحسر //اي خاله اشترا وعباس الله يرحمه اشترالي البيكب وگلي وره الدوام اشتغل بيها ولا تبطل من دوامك 

وهسه انا جاي اريدج تجيبين بنات عباس وتجين تكعدين ويه امي واختي جوه 

وانا ومرتي وجهالي نكعد بالطابق الثاني

زهراء// علوا خاله انتي وامي والبنات وانا اخدمج بعيوني 

جميله//عمت عيني عليك خاله عباس مشتري السياره وما تكول ولا تحجي 

بعدين جميله باوعت المنيره //اي والله منيره تعاي ويانه احسن بدل ما گاعده ابحدج 

منيره ==لا ما ترهم لاتنسين جميله بناتي يجن وساعات يباتن 

جميله //واذا باتن شنو ما عدنا غرف لو خاف نطبخ على مودهن 

=والله ما ادري الله كريم

اندك الباب عرفتها عمتي دگة هادي قبل لا يروح كرم يفتح الباب گلتله 

=كرم دير بالك تجيب طاري البيت خليل مشتري والسياره مشتريها عباس تره يصير مثل الذهب الي يطالب بي

هز راسه وراح كرم وفتح الباب واجه هادي سلم علينه وشرب چاي وسأل على ناديه زهراء گلتله اتعشت ونامت 

وسأل شنو رادت منها مياده گتله 

::بس شافتها وانا شايلها باستها وراحت خمس دقايق ما طولت 

هادي //معقوله ما حچت 

جاوبته بنتر ::هادي شتحچي طفله شتريد اتگللها (رغم انا ما مرتاح خفت بس لا تگعد ناديه وتصرخ ) 

بعدين هاي لعبه من المحامي بلكي ما نوديها ويقدم استرحام ثاني وثالث حتى يعطل الحكم

عمتي جميله وكرم گلوله على روحت عمتي والبنات هو وافق وگال 

 - - - اي يمه روحي واخذي غراضج المهمات واجري البيت تستفادين منه 

شفت عمتي منيره تضايقت او حست بخيبة الامل جرت نفس وگالت 

=الله كريم خلي ينتهون من شغلة مياده وتجيب الفصل وتكمل فلوس المحل والباقي تشتري بي سلعه وكل شي سهل 

جميله //اي والله حلال اليتيمات الله يرحمك خاله عباس خليتلهن شي ينسندن علي وما يحتاجن احد

هادي مجرد ما يسمع بفلوس الفصل او اي احد يساله يطفر ويضوج لذلك هو ما عقب طلع بسرعه

زهراء وعمتي جميله بقن يم عمتي منيره وانا رحت نمت بالديوان الصبح گعدت وكويت ملابسي ولگيت 

عمتي منيره جايبه الريوك وجايه وهي تگلي 

=سراج عمه شتگول بكلام كرم 

::ما بيها شي بيتج وبيت اختج اقلها ما ظمو هذا الشي گالوها 

=بس خاف ما ارتاح 

:لا منيره ليش ما ترتاحين تگعدين ويه اختج تكضنها سوالف

=والله ما ادري افكر 

::اي منيره فكري الرجال گاعد على نار يريد ردج 

هي ضحكت وشمرت عليه المخده وانا بست راسها وگتلها 

::عمه بكيفج اليعجبج سوي كل همهم ما تبقين ابحدج وزهراء تداريج 

اتحسرت وگالت =كل هاي المصايب من جوه راسها ساعات ودي اطردها بس اشوف محنتها عليه وعلى بنات عباس 

::لا عمه هاي قسمه لاتحچيين هالشكل 

=اي والله قسمه وليش الچذب اتطلكت وهو ما قبل ياخذها (باوعتلي )اگلك وهاي الچلبه يمته يعدموها

::ما ادري عمه اهم شي ديري بالج على ناديه وحنين وابد لا تخلينهن يطلعن 

عمتي بخوف =ها گول تخاف عليهن من خوالهن لو من اهل سلدار 

عكفت حواجبي ::ايخسون جبانيه بس ما تعرفين يجوز يسوولهم لعبه 

=هم صدك 

::اي شي تحتاجينه تلفون زغير وانا يمج 

=الله يطول عمرك لو ما انت ما تدري شصار 

جاوبتها بابتسامه وانا ارفع حواجبي ::الحمد لله بالخدمه منيره شعدنا غيرج

ورحت اشوف ناديه لگيتها بعدهي نايمه والحراره خافه منها وصيت عمتي منيره تدير بالها واي شي تتصل بيه 

بقيت بالمقر اكثر من اسبوع عرفت انو نفذو عقوبة الاعدام بمياده والي استلمها خالها 

والي عرفته انو من جابوها للمنصه خافت وگالت انا بريئه سلدار هو الي قتله 

اريد بناتي 

انا بريئه 

ناديه تچذب

ما حبيت اوصل الخبر بالوقت الحاضر گلت يعرفون من ابو عيسى اكيد راح شيخهم يخابره لكن محد مخابره 

رجعت وره تسع تيام حصلت اجازه اسبوع وقررت اخذ عمتي والبنات وياي البغداد 

شفت عمتي ما الها خلك سالتها 

گالت =تعبانه وضايجه 

گتلها ::خلي نروح البغداد اخذ البنات اونسهن وانتي هم امشي شوفي ابوي وعمي

ورحنا البغداد بعد ان اخذت ملابس بسيطه الناديه وحنين لان قررت اشتريلهن اشياء جديده بالطريق سالتها العمتي 

::عمه شبيج ليش ضايجه 

هي اتحسرت وگالت =وره ما رحت بالليل اجه هادي ومرته وگلي تگعدين ابيتج انتي وبنات عباس ما ترحين

 تگعدين عد كرم الناس تاكل وجهي عايف امه گاعده ابيت اختها وما مگعدها ويا وانا ادري بيج انتي ما تحبين 

تگعدين عندي لان ما تحبين مرتي

باوعت الها وگلت ::هادي عنده الكل شي عذر 

عمتي جرت حسره وگالت ==تتصور هادي من عنده هذا الكلام 

جاوبتها ::ما اعرف عمه 

=لا تعرف هذا تدبير افراح لازم راح وگال الها وهي حچت ويا يعني امك تاجر بيتها وبيت عباس والمحل

 وتقبض اجارات وراح تنطيهن الكرم وجميله

باوعتلي عمتي وگالت =عبالها كلها الناس عينها فارغه مثلها ومثل رجلها (باوعتلي كانما اتذكرت شي )

= صدك عمه سراج من نرجع اريدك تروح على الرجال الي اشترا منه عباس المحل وتطلب منه مهله على 

ما يكملون فلوس الفصل انا لو عندي انطيتهن وخليته يتنازل 

انا فكرت وگتلها ::هم صدك هو ساكت من لمن اجه وره الفاتحه شعجب سكت 

=يا عمه محله عنده وقابض كل الفلوس وباقي شي بسيط يگلك اول وتالي يسدوني وهو اجه ذاك اليوم هو 

وهادي وگلي

=حجيه هذا هو ما يصير خاطرج وخاطر هادي اله طيب المحل اسلمه الهادي عن قريب 

جاوبتها ::هو اجه وكلج 

=اي عمه وانا كتله رحم الله والديك مال ايتام 

::زين عمه ان شاء الله بس ارجع اروح علي 

باوعت بالجامه الورا شفت ناديه وحنين نايمات كتلها :::عمه تدرين اول امس عدمو مياده

عمتي تشغت وضربت على خدها لا اراديا باوعتلها شفت عيونها غرگانات بالدموع انا جريت حسره وگتلها 

:::شنوعمه استخطيتيها لو حنيتي عليها وتردين تبچيين 

هي نزلت دموعها وجاوبتني =يا عمه الله لا ينطيها شسوت دمرت عايله باكملها لا شنو عايله عوايل ذني 

البنيات من يكبرن منو راح يتزوجهن لو اخواتها الي خلتهن عار لو اخوانها ومصيبة الولد الي اخذو شلون 

راح يعيش مو حقي يا سراج ناديه واختها بعدهن زغار باچر من يكبرن شلون بيهن ومنو يرحمهن

جريت حسره وكتلها :::اي عمه لذلك ااكد عليج لا يبطلن من المدرسه شجعيهن وخليهن ايدرسن 

=ان شاء الله اريد الله يطول عمري حتى اربيهن 

::ان شاء الله 

دارت عليه عمتي وگالت =اگلك سراج وهم عرفت شنو حچت شنو گالت

:::الحقيره من اخذت الها ناديه تگول اتمنى اموت اليوم گبل باچر واتوسد سلدار لكن من صارت صدك

وجابوها صارت تگلهم 

انا بريئه سلدار كتله انا ما كتلته ناديه تچذب 

ونفس الشي عمه ذاك السگط هم صار يصيح 

مو انا الي كتلته انا برئ هي هي 

عمتي گالت =الله لا يرحمهم

وصلنه يم مطعم انا درت انده البنات گعدن حنين راحت ويه عمتي وانا لزمت ايد ناديه الي باوعتلي وسالتني 

...عمو يعني شنو عدمو مياده 

عرفت بيها هي ما نايمه وسمعت كل شي حاولت ما اجاوبها وعرفت هاي البنيه شگد راح تعاني وشكد راح تسمع

 وتعيش مرار رجعت عادت عليه السؤال اظطريت اوگف واباوع الها وانزل المستواها 

حبيبتي ندووش شگد تحبيني 

هي اشرت باديها على شكل دائره وگالت وهي مغمضه ......هوااااااي 

::زين اذا تحبيني وتحبين بيبي منيره وبابا لاتسالين هيج سؤال 

...اي لا تزعل بس شنو عدمو مياده

جريت نفس قوي وگتلها بنتر ::يعني مياده سافرت راحت بعييييد وبعد ماترجع افتهمتي

هزت راسها واشوف دموع بعيونها واسئله حبستها بصدرها يمكن خوف يمكن رهبه من منظر مياده 

الي شافته وصلنه الباب المطعم هي هدت ايدي وراحت يم عمتي وحنين وهي مبرطمه دخلنه للمطعم 

هي اكلت شي قليل وعمتي تگلها 

=بيبي ليش ما تاكلين مو چنتي تحبين الكباب

هي ساكته وما تجاوب طلعنا ولزمتها هي وحنين واخذتها يم المحل الي بصف المطعم حنين اشترت نستله وعصير 

وناديه ما قبلت تشتري انا ماحاچيتها اشتريت علج وعصير وحب 

وصلنه قريب العصر وتلگونه ابوي وامي الي گالت 

غسلو وارتاحو وبعدين نگعد ونشوفكم وهذا چان برنامج امي حتى وياي لان الطريق بعيد فاكيد اكون تعبان

رحت الغرفتي وعمتي هي والبنات راحن للغرفه الي محضرتها امي بالليل گعدنا وانا اشوف ناديه تباوعلي 

وانا داير وجهي منها يعني زعلان عليها 

تعشينا وانا صرت اوكل بحنين وما احچي وياها بعدين گعدنا نسولف وانا اشوف شلون ابوي. 

وعمتي گاعدين ويسولفون بكل اشتياق ومحنة الاخوه

حنين رجعت نامت لكن ناديه بقت امي گالتلها 

- - بيبي ليش ما تنامين روحي يم اختج 

هي باوعتلي وسكتت عمتي گالت الها= ام سراج ناديه نومها بالليل قليل 

هي تباوعلي واشوف بنظرات هاي الطفله نظرات شابه تعاتبني وتگلي ...ليش ما تحچي وياي 

اختي نور گالت العمتي //عمه خلي ناديه تنام يمي 

لكن عمتي گالتلها =لا عمه ناديه ما تنام نومها خفيف وتاذيج

انا رحت للغرفه وثاني يوم گعدنا وعمتي طلبت تروح البيت عمي جميل اخذتها هي والبنات وابوي ورحنا

 بقت عمتي عطلوها ع العشا وانا رجعت لان عندي ارتباط ويه جماعه اصدقائي بالليل رجعت اخذهم وگلت 

العمي جميل :: باچر اخذهم للزياره تروح ويانه 

جميل // اي اروح 

وثاني يوم الصبح اخذتهم للزياره ابوي وامي ونور اختي وعمي جميل وزوجته وعمتي والبنات

 اجرنا سياره ورحنا ورجعنه بنفس اليوم وعمتي راحت القبر عباس وصار الموقف حزين

بيومها رجعنا تعبانيين بالطريق انا گاعد بالصدر يم السايق واجت ناديه وگعدت بصفي گتلها وانا امثل الزعل 

::ليش ما بقيتي يم بيبي 

...ردت اشوف الاشجار 

انا بدون ما اباوع عليها ...اي باعيلهن

هي گعدت بصفي وبقت تباوع عليه وانا ما انطيتها اهميه ولا كأني اشوفها ردت اعاقبها حتى ما تستفرد

 برايها وحتى من تكبر ما تصر على شي هي تعرفه خطأ بقت تباوعلي وكل شويه وگالت وتاشر بايدها 

...عمو شوف الشجره هاي شكبرها 

...عمو شوف الخرفان 

...عمو شوف النهر 

وانا اكتفي بكلمة اي الى ان حسيت بيها نعست وغفت خليتها بحضني وانا اگلها 

::نامي وارتاحي كافي تلعبين دور الكبار

وصلنه للبيت قريب المغرب وانا شايلها اخذتها الغرفتي لان اعرف حنين ما تخليها تنام خليتها ع الچربايه 

ورحت بالصاله عمتي گالت = چان جبتها يمي 

::لا عمه خليها تنام بغرفتي اعرف بحنين ما تخليها تنام تتحرك 

امي گالتلها//اليوم ناديه كسرت گلبي حتى ضغطي ارتفع من صارت تبچي يم الگبر وتگله

 بابا يمته تجي من الجنه مشتاقتلك

وصارت عمتي وامي يبچن ودزيت موفق جاب عشا رغم محد يشتهي بس لان عمتي عدنا وفعلا اكلنه قليل 

وانا حاچيت نور اختي گتلها ::نامي وارتاحي باچر وره الظهر اخذج انتي والبنات اونسكم 

هي ردت عليه //ان شالله 

امي جاوبت //وين سراج وين تاخذ نور ناسي هي سادس وكل دقيقه محسوبه عليها 

::ماما اخذها تغير جو اليوم ما ياثر 

نور// اي صدوك ماما اني اضوج بسرعه 

امي وهي تبتسم //بعد دگولي اليتيمه اثنيناتهم لا يسمع ابوكم ويجي وتصيرون حزب ضدي

راحت عمتي وحنين وبقيت انا بالصاله اباوع على فلم اجنبي بقرص فديو بذاك الوكت جابه موفق 

وصرنا نباوعله انا وموفق ومن نعس راح الغرفته وانا بقيت بالصاله رحت اجيب بطانيه حتى انام دخلت

 لكيتها مغمضه عيونها وكانها من الملائكه

مسدت على شعرها وگتلها ::ناديه انتي گاعده مو 

هي فتحت عيونها وهزت راسها 

::وليش ما تنامين 

...لان اخاف 

::منين 

...الشرطي يذبح حنين ويحرك وجهي 

::ليش انتي ما شفتيهم شگد يخافون مني 

...يعني اهنا ما يجوون 

::ولا باي مكان تدرين ليش 

...ليش ؟

::لان انتي مو شريره وما تسوين شي يزعل الناس 

...انت مو زعلان عليه 

باوعتلها وسويت حركه بخشمي ::انمم لا مو زعلان وهسه نامي 

...وانت تبقى اهنا تكتل الشرير 

::انا ابقى اكتل الشرير صار 

...وحتى من اكبر تبقى وما تزعل عليه 

هزيت راسي ::حتى من تكبرين

هي گعدت ع الجربايه وانا اطلع بالبطانيه من فوك الكنتور گلتلي 

...عمو سولفلي قصه 

باوعتلها وجريت حسره ::ندووش ما اعرف قصه اريد انام 

...مو گلت تبقى تكتل الشرير زين اگعد انا راح اسولفلك قصه وگعدت ع الحصير المفروش بغرفتي

 وخليت المخده وراي وصارت تسولفلي على ليلى والذئب گعدت الصبح ولگيت روحي نايم ع الحصير 

وهي نايمه ع الچربايه نومه ملائكيه

تستمر القصة أدناه

شفت الساعه ما صايره بالعشره كعدت ورحت لكيت عمتي وامي گاعدات بالمطبخ جاي يحضرن للغدا سلمت 

::صباح الخير 

=صباح النور اسويلك ريوك 

::لا عمه اريد گهوه 

=شلك بالگهوه اتريك گاضيها گهوه وجكاير وچاي 

::اليوم شنو راح تطبخون 

امي //ابوك مشتهي برياني من ايد عمتك 

::مخبل اذا اتريك غير اتاني الغدا

وسويتلي فنجان گهوه شربته بالصاله ورجعت للمطبخ گتلها ::عمه شنو رايج ترحين ويانه تغيرين جو 

=لا عمه ابقى اهنا ويه امك وابوك 

امي //عمتك تريد تبقى اهنا اتسويلنه معسل تمر لان انا ما اضبطه مثلها وانت تدري بابوك شگد يحبه 

:: بعد المعسل الي تسوي عمتي لا يوعلى علي 

=زين انا بس ارجع اسويلك تاخذه وياك للدائره 

::ههههههه تحچين صدك مو كل ما اجي شكو عدج تخليلي

امي //عاد منيره من يوم يومها نادره ومعدله كل شي ابيتها بداية الحصار المر وهي بيتها مليان اشكال 

=عمتي الحمد لله والشكر ردت بس الستر يا اختي 

گعدت ناديه وحنين الظهر تغدينا ونور سبحتهن وبدلت الهن وطلعنه رحنه للزوراء ولعبتهن بكل 

الالعاب واخذتهن للمحلات واشتريت الهن ملابس واحذيه وكصيت الهن صور واتعشينا بالمطعم 

ورجعنا بالعشره بالليل لگيتهم گاعدين 

ويسولفون سلمت عليهم والبنات چانن كلش فرحانت بالعابهن وبقينا ثمن تيام يوميه اخذهم المكان 

بالليل واحس ناديه وحنين مرتاحات وابدهن ما يرجعن بالليل كعدت وسالت عمتي

::ها عمه جمعتي اغراضج لان باچر نرجع 

=اي عمه 

ابوي //منيره ما تبقين 

امي //اي والله ابقي على اجازة سراج الثانيه وارجعي شوراج 

=لا والله ما عندي شي بس مي خالف شفتكم واتونست وانتو ما قصرتو

ابوي //لا تحچين هيج منيره انتي وخليل وعباس اصحاب فضل علينه 

=يا خويه الفضل ال الله شنو هالحچي 

امي //هسه ما تبقيين

=ان شاءالله بس يتزوج سراج اجي وابقى شهر على ما تملوون مني 

امي //احنه نمل منج علوا هذا ابن اخوج وقنعي يتزوج لان انا وابو ملينه منه 

باوعتلي عمتي وگلتلي ==اگلك شنو ما ناوي تتزوج 

خشنت صوتي وگتلها ::بعد وكت هسه 

=شنو متاني تكبر شويه اشو انت شاب والف وحده تتمناك 

امي باستهزاء //خاف يريد يبني مستقبله هذا ابن اخوج هسه يطلعلج الف عذر

=لا صدك عمه اتزوج انت ما شاء الله مو زغير هم ياالله نشوف جهالك 

رديت عليها بابتسامه ::بعد وكت منيره 

امي //شوفي هذا رده 

=عمه اذا تحبلك وحده كلنه عليها واحنا نروح نخطبها واذا لا ذني بنات عمك وبنات خالك وخالاتك واختار 

::اي ان شاء الله من اقرر اول وحده ابلغج انتي حتى قبل امي ما تدري 

امي //ابقى صنف ابقى على ما تشيب وما تلگى وحده تقبل بيك 

باوعت وانا اضحك =صدك الله عليج منيره انا شيخ الشباب محد تقبل بيه

موفق// عمه عوفي انا اريد اتزوج 

ابوي //كمل دراستك وهدية تخرجك نزوجك 

وصرنا نضحك ثاني يوم رجعنا للبصره لكن قبلها رحنا زرنا الامام الكاظم مره ثانيه وطلعنا للبصره وره الظهر 

وصلنه بالليل وبتنا وگعدت الصبح وقررت اروح للرجال الي اشترا منه عباس المحل وانا كفلته 

الضحى ركبت سيارتي ورحت على الرجال لان اندل بيته وصلت دكيت الباب طلعتلي زوجته سلمت عليها وگتلها

ابوناصف موجود 

هي گالت طلع للمحل 

استفسرت منها على العنوان ورحت وصلت يمه سلمت علي وجابلي چاي سالته 

:: حجي انت من اجيت چنا ملتهيين بالفاتحه وراها التهينا بالقضيه والطلايب وهواي اشياء وهسه انا جاي 

اريد اگلك انا ادفع الفلوس الي بقن على المرحوم 

الرجال باستغراب //يافلوس عمي

::الفلوس الي بقن بذمة عباس 

- - بس عمي انا اخذت الفلوس صار اكثر من شهرين 

انا استغربت ::شلون ومنو الي دفع 

- - عمي المحل صار شهرين من قبضت فلوسه واستلمه هادي وفتحه ليش ما تعرفون 

رديت بتوتر ::هاا لا ما عندي علم لان يجوز تعرف انا اداوم ابغداد فما ادري 

- - لا عمي هادي اجاني وگلي هذني الفلوس والي اريده منك تتنازلي عن المحل 

انا كتله ::لحظه تتنازله

- - اي عمي باسمه لان گلي الوالده ما بيها حيل وهو ولي امر البنات 

::بس شلون تتنازل 

- - لاعمي ما اتنازلت لمن اجه واخذني بايده لام عباس وهي الي گلتلي 

::ها وقبضت فلوسك 

- - اي قبضتهن وحتى هادي اشترا المواد الي بالمحل 

وگفت واعتذرت منه وگتله ::اعذرني حجي لاتنسى انا كفلت المرحوم وابوي گلي ادفع الي بذمة 

عباس لا تخلي مطلوب وانا اجيتك بوجهي ما استفسرت من احد

- 0 لا عمي ما صار شي انتم اهل 

::اي صح ياالله فيمان الله 

ركبت سيارتي وطول الطريق وانا افكر بهادي وانا متعجب منه هذا شگد طماع يعني ما يختلف عن مياده 

الي اخذت الذهب والفلوس وانطتهن السلدار وهو اخذ فصل اخو ومحله

زين الرجال يگول عمتي تعرف ليش دزتني اذا عدها علم 

واذا هسه اروح واگللها يجوز تتفاجأ 

خلي اروح الهادي وافهم منه

ورحت البيت هادي ما شاء الله قصر مو بيت رغم ظروف الحصار دگيت الباب طلعلي عمار ابنه 

شافني عرفني وگلي// هلو عمو 

::هلو وينه بابا 

- - عمو بالشغل بعده ما جاي اصيحلك امي 

::لا عمو ما كو داعي العصر امر يمه خلي ينتظرني 

ركبت سيارتي وبقيت افتر رحت الكرم بمدرسته واستاذنت المدير وطلعنا 

كرم متفاجئ من جيتي // ها سراج سلامات ؟

::شبيك حتى ما گتلي الله يساعدك خالي شلونه

كرم //الله يساعدك بس جيتك للمدرسه خوفتني شنو صاير سراج 

باوعتله ::ما كو شي عازمك على غدا 

- - اذا غدا وماكو شي ارووح وياك 

::داامشي ياالله يبيع امه وابو على بطنه 

- - ها سراج بعدنا صرت تعير 

::يابه ما اعير امشي ياالله

- - انتظرني شويه اوصي مرتضى يگللهم بالبيت حتى ما يقلقون 

رحنا للمطعم واتغدينا وشربنا چاي باوعلي كرم وگلي //شكو سراج بعيونك حچي 

سحبت جكاره وشعلتها وصرت ادخن وجريت نفس وگتله 

::كرم تعرف محل عباس المشتري 

- - اي شبي الرجال طالب بفلوسه حقه صار هواي وهو نعم الله علي بقى الهسه ساكت 

جريت نفس ::تدري هادي ماخذه ومسجله باسمه

كرم من سمع كلامي عادي مابين علي شي وگلي //سراج كلشي اتوقع من هادي فما استغربت تصرفه 

::بس كرم هاي حق ايتام وهو ما عايز 

- - صحيح سراج هذا هادي اكبر طماع ومرته اطمع منه ما شفت من حچيت حتى خالتي تروح 

تگعد ويه امي شلون بالبدايه وافق وبعدين رفض خو خالتي ما گالت هو ما قبل بس انا ادري 

لان افراح حسبتها گالت خالتي تاجر بيتها ويجوز تساعدني بالمصرف 

وبعدين ايراد محل عباس وبيته عبالها مثلها ادور طمع

::وهسه كرم 

- - هسه شنو سراج تروح الهادي وداعتك يطلع نفسه مظلوم 

::اي خلي نروحله انا وياك ونفتهم منه 

- - مي خالف هسه امشي وياي للبيت ارتاح يم عمتك والعصر نروحله 

::بس مو تجيب طاري الجميله 

كرم بضحك //شمالني غير رويتر تنبث بسرعة البرق

ورحنا انا وكرم يم عمتي جميله ارتاحيت والعصر رحنا على هادي 

دگينه الباب وطلع ابنه ياسر وگال ابوي بالبيت ودخلنه للديوان اجه هادي لابس دشداشه گعد وهو يتثاوب

وابنه جاب ماي وچاي 

هادي //الله بالخير 

::الله بالخير وهلا 

هادي //ها سراج يمته رجعت من بغداد 

::البارحه 

- - وشلونه خالي

::زين يسأل عنك يگول اشو هادي حتى ما يسال عني بالتلفون 

- - اي والله حقه بس تدري مشاغل 

::اي انا الادري 

- - عموري گلي الصبح مار عليه 

::اي وما لگيتك 

- - خيير سراج 

::كل الخيير رحت يم الحجي ابوناصف 

استعدل بگعدته وحمحم مبين عنده علم گتله 

::الصدك عمتي ودتني اخذ منه مهله بس هو فهمني انو قبض الفلوس كامله وحتى فلوس البضاعه الي 

بالمحل انت دافعها والمحل مسجله باسمك

هادي //اي صحيح 

كرم //هادي فلوس بنات عباس تسجل محله باسمك باي حق 

هادي وگف وگال //بحق اني عمهم او ولي امرهم ومحد اله شغل بيهن 

جاوبته ::لا متوهم هادي عباس گدام الكل وگدامك گلي من يصير عليه شي انت المسؤول عن البنات 

كرم// وانا اشهد 

هادي //انا ما بگت كل الي سويته خليت المحل باسمي 

كرم //السويته حرام 

- - شنو كرم تعلمني الحلال والحرام

- - مو اعلمك ابن عمي ما بيها شي اذكرك واگلك مال الايتام 

هادي بنتر //وهسه شنووالمطلوب 

::المطلوب تروح تفهم امك تگلها المحل سجلته باسمك وانت قابض فلوس الفصلين 

- - وليش كل هذا 

::مثل ما گتلك ابو ناصف گال امك تدري من گتله سجل المحل باسمك (اتقربت منه )

هادي امشي ويانه وتعال فهم امك

ما خليته يرد عليه وطلعت انتظرته انا وكرم هو بقى ما اجه دگينا هورن ماكو اتعجبنا كرم 

راد ينزل انا ما خليته رحنا العمتي وسلمنا وگعدنا چان غروب وهي لگيناها تتوضى تريد تصلي 

سلمنا وگعدنا وهم رحنا نتوضى حتى نصلي 

كملنه صلا وهي بقت تقرا قران صدقت واجت يمنا وگالت

=كرم اليوم اتعشى ويه هذا (واشرت عليه )من الصبح اليجاي ما ادري بي وين ما وين 

كرم //شنوعمه سراج زغير وتخافين علي 

==لا مو زغير بس اخاف علي 

بهاي الاثناء اندك الباب وراح كرم يفتحه شافه هادي الي دخل وهو وجهه ثگيل سلم وگالها 

- - ها حجيه شو تبتسمين 

كرم گله //خالتي تخاف على سراج لان طللع من الصبح وهسه ياالله جاي ة

هادي //والله زين چا ما تخافين على ابنج وحيدج 

عمتي =والله المفروض ابني وحيدي هو الي يخاف عليه ويسأل 

هادي //ها درتيها اكيد هسه تگولين مرتك ما تخليك 

=لا ما اگول الي يريد يسأل على امه ومرته ما تخلي ويسمع كلامها هذا اغم مو زلمه حووك 

انا حچيت ::ها هادي بعيونك كلام

هادي// انا لو انت سراج 

=عمتي خيير يا ستار شصاير 

::ما صاير شي عمه 

=لا صاير وصاير شكو شضاميين عليه 

::عمه تذكرين من عباس اامني على بيته وبناته 

=اي اتذكر ومو مره كل ما يشوفك وگدام شهود ومن ضمنهم هادي حتى انت گتله مو هذا اخوك گالك 

حتى هادي اامنه عدك 

جاوبتها ::هسه هادي يگول انا المسؤول عن البنات

عمتي باوعتلي وغمضت عيونها وعضت شفتها يعني اسكت =اي حقه عمهن اخو ابوهن وهو اولى بيهن 

هادي بشماته //ها سراج شفت امي 

عمتي =اي سراج عمهن ومسؤول منهن من باچر اااجر البيت واجي اگعد انا وبنات عباس عده وهم اجر 

بيت عباس ويه راتبه ويه فلوس المحلين والبقى من الفصل اروح وافتح بيهن الكل وحده دفتر توفير واقسمه

 الهن بالنص وهادي هو الي يصرف علينه واحنا شنو كلافتنا ناكل حالنه حالهم وبيت هادي بي هواي غرف 

ناخذلنه غرفه انا والبنات ،

(اندارت علي )ها ابو ياسر شتگول ؟

هادي متلعثم //اي يمه هله بيج اخليج انتي فوك راسي بس ذني لا 

باوعنه بتعجب الهادي وهو اياشر على ناديه وحنين سالته عمتي الي احس بيها صارت ترجف 

=شنو هذني لا چا وين يرحن 

هادي بنتر //شنو تردين تقنعيني هنه بنات عباس يمه اصحي المره الي دخلت عشيگها وكتلت رجلها 

وهي حامل گالت الولد من صاحبي كل شي تسوي مصاحبه ميه وشوفي ذني منين جايبتهن كلها شهر 

واخذهن اوديهن الخوالهن انا ما استقبلهن ولا اكول بنات اخوي

عمتي بعصبيه =انجب يا سافل طاح حظك چان استحييت جاي اتزغر باخوك 

هادي //ليش ازغر بي شنو اتجنيت عليها لو لبستها تهمه هي فد وحده ساقطه وتلعب براسه 

عمتي =صحيح ساقطه بس البنات بنات عباس ولوما بنات عباس ما وگفت ناديه وگالت چان صارت

بصف امها لو هاي حنين الي حتى ما تتذكرها 

هادي //لا تخافيين.يكبرن ويتذكرنها ويدافعن عليها

كرم //اگلك هادي شو تگول بعد شهر وتوديهن الخوالهن شنو الشغله بكيفك 

هادي //اي بكيفي اشتكيت وگلت مثل ما الولد مو ابن عباس هنه همه مو بنات عباس عبالك اوديهن 

واخليهم يطالبون بورث اخوي 

عمتي اتاشر بايدها =شوف هادي انا اروح واشهد واگلهم البنيه من حملت بناديه حملت عدنا ابيتنا وما چانت 

تروح الاهلها وهاي كلمة حق ومن حملت بحنين على الاربعين هم ما طالعه وما رايحه الاهلها وچنت 

انا وسلوى يمها

هادي باستهزاء //تخدمن بيها مو 

=اي نخدم الخاطر ابني

هادي //چا ليش اشو افراح ما تتقربلها 

=لا افراح بس تدخل بشهرها تروح الاهلها وتبقى للاربعين عدهم واحنا اسمنا يارايحين يا جايين حتى فلوس 

باگة الخضره تحسبها هي وامها لو نسيت 

هادي //ما نسيت بس ما سوت مثل السوته مياده

=مياده انت جبتها وانت اخذته يشوفها وشگالو گلت صار حتى ما خليتنه نسال على ابو رل اختها صاحبك 

لان چان عندك شغل ويا وانا ادري بيك انت ما 

كاتلك اخوك الي انكتل ولا كاتلك اصل وفصل البنات لا كاتلك فلوس عباس وحلاله 

هادي //اي ليش الچذب يمه فلوس عباس وحلاله من حقي وحق اخواتي وحقج ليش ياخذنهن هذني وهنه ما اعرف

 منين ملگطتهن

من شفت كلام هادي عرفت هو شكد طماع وكل همه الفلوس حتى ما همه تزغير اخو والطعن برجولته كدامي

 انا وكرم تركتهم يحچون ودخلت للغرفه الي خال بيها ملابسي وطلعت منها جنطه زغيره بيها ورقه واجيت الهادي 

::ابو ياسر اسحب الشكوى لان راح تخسرها وتخسر الاكو والماكو 

هادي باوعلي وهز راسه //لا سراج ما اسحبها واخلي البنات ياخذونهن خوالهن واذا رفضو اطلب من القاضي 

يخليهن بدار الايتام 

عمتي بعصبيه= وانا اشتكي عليك واروح واقسم بكلام الله البنات بنات ابني 

هادي //ههههه شنو يمه شنو هالحجي

::كلام عمتي صحيح هادي هسه تخابر المحامي يسحب الدعوه تره اذا وصلت للقاضي راح يطلع جثة 

اخوك ويسوي تحليل بصمه وراثيه 

هادي //اي ويطلعها

::خلي اكمل راح تطلع النتيجه هنه بنات عباس عاد اهنا خوالهن يطعنون بحكم المحكمه الي صدر 

على بتهم وحتى الولد بكولون ابن عباس لان انت الي لفقت الكذبه واختنا تحت التهديد والضرب 

وحتى يگولون تحت تهديد والاغتصاب اعترفت وهاي بتها طفله انت خوفتها راح ياخذون البنات 

ويطالبون بكل ورث عباس لا ويطالبون بالفصل وبعدين يردون رد اعتبار البتهم

ولازم تفصل وتاليتها تطلع مياده ما كاتله ولا حتى سلدار ومو بعيده يلبسونك التهمه وترجع الفصلين 

وتمشي على الطرفين وتفصل منو ضحك عليك وگلك اشتكي

هادي //اوگف اوگف شلون بنيت نظريتك 

::ما بنيتها حقيقه لمن مياده اعترفت بالولد مو ابن عباس عرفت انت راح تطعن بنسب البنات مو محبة باخوك

 لا والله ادري بيك على مود فلوسه من اخذو تحليل من سلدار وتحليل من مياده اخذت البنات وعمتي وطالبت

بتحليل نسب 

وطلعوا الجثه جثة اخووك وطلعن البنات بنات عباس وهاي الورقه تثبت مصدقه من اطباء ومن 

الطب شرعي ابغداد ومن المحكمه

هادي //وليش ما گتلي 

::لان انت چنت مشغول بالفصل وشگد تاخذ ومشغوول شلون تسجل محل عباس باسمك اتصور طعنت 

والمحكمه عدها اوليات واخذوهن واخذوا حلالهن شتتصور حليم وعدي ينسوون الي سوته ناديه لا صدكني 

شهرين ها بعد ان يحرموكم اشوفوهن شهرين ويكتلون ناديه يموتونها ويلفقون حادث الها وتصير كل الاملاك

 الحنين الي راح يربوها مثل ما يردون وانت تفصل وترد اعتبار مع الاسف عليك هلگد الفلوس الهن قيمه 

عدك مقارنة بدم اخوك 

هادي //وانت يابه شنو وهيج تسوي بكيفك ومنو گلك ؟

جاوبته بنتر ::اي بكيفي لان الي يدور على ورث الايتام اعرف راح يرشي اكثر من واحد حتى يطعن 

برجولة اخو 

هادي بعصبيه //سراج انت ما الك دخل ما عليك يا اخي ساعدتنا احنا ولد خالك كثر الله خيرك كافي 

بعد مو من حقك تتدخل بحياتنا 

:::حقك ابو ياسر بس هذا الشي تطلبه مني من اكون ابيتك مو ابيت عمتي وهي عايشه

هادي //شوفي يمه انا مسؤول عنج وعن البنات ما اريد اي احد يوصل الهن 

عمتي =وانا اگلك رجع المحل وانطينه البقى من الفصل ونروح نگعد عندك ابيتك وما اخلي لا سراج 

ولاكرم ولا اي احد يتدخل 

هادي //زين ما طول هيج صار الحچي المحل محلي وشعندج سوي ولا تجيين ابقي ابيتج وخلي ذوله ايفيدونج 

=. ذوله احسن منك

وطلع هادي عمتي صارت ترجف كرم راح جابلها ماي هي شربت وكرم گلها 

- - خاله لا تقهرين نفسج شنو ما تعرفينه الهادي يبيع ابنه على الفلس 

هي سكتت وصارت تتنفس حييل بعدين باوعتلي وگالت 

=سراج امشي وديني البيت هادي 

::عمه خلي يولي شتسوين ترحيله 

=سراج اذا ما تاخذني هسه اخذ البنات واجر تكسي واروح 

باوعت الكرم الي هز راسه وگتلها ::ياالله امشي 

لزمت ناديه وكرم شال حنين وصعدنا بالسياره وهي اجت ورانا وره ما لبست عباتها وقفلت الباب

////////////////////////////////////////////