رواية زواج لدقائق معدودة الجزء الثاني الفصل العشرون
طب ماهي الدنيا فل معاكم اها...صدق اللي قال ناس تدلع على السرير.... وناس تتربط كيف الحمير
قالت جملتها الاخيره وهي بتبص لسند بغيظ وهو ضحك وقال بغمز....ما هو لو تسمعي الكلام انا ادلعك اخر دلع
هنا نوح زعق فيهم وقال بغضب..... بس انت وهيه انتو فهمتو ايه...احنا كنا بنتحدت عادي وجبنا سيرته في الكلام وعلشان كده مشى ...والمركب اللي تودي مترجعش ان شاء الله دي حاجه متزعلناش من اساسه
شروق قالت بغضب ....كيف متزعلناش يعني. انا لازم اروح وراه واشرحله انه فهم غلط
نوح بصلها بغضب وقال .....بس هو مش فاهم غلط يا شروق هو بيفهم زين انتي اللي الفهم عندك بعافيه شويه
شروق بصتلو بغيظ ولسه هتتكلم سند قال بسرعه.... شروق بلاش تكابري لغايه ما تضيعي كل حاجه من يدك... الكل عارف انك رايده نوح من وانتي صغيره وربنا اراد يجمعك بيه وبعد عنكم كل حاجه تفرقكم فيه ايه تاني عاد..والله في حياتك ماهتلاقي حد يحبك كيف نوح احسبيها بالعقل انتي حتى لو اتجوزتي نبيل عشان ترديلو الجميل هو اول واحد ما هيبقاش مبسوط يتبسط كيف وانتي قلبك مع واحد تاني ولا انتي كمان هتبقي مبسوطه
و بص لغنوه وقال بابتسامه جميله .....القلب لما بيلقى وليفه عمره ما يعرف الفرح بعيد عنيه
غنوه ابتسمت بكسوف وسند بقى يبصلها بحب وهيه بادلتو نفس النظرات
نوح ابتسم على نظراتهم لبعض وحمحم وقال.... احم المفروض اننا بنظبط هنه مش بنظبط هناك
سند ضحك وقال .....ظبط انت هنه هو في حد يعرف يظبط اكتر منك ..بالاذن
وشد غنوه ولسه هيمشي بيها غنوه رجعت خطوات واخذت الجواب من نوح بسرعه ومشيت مع سند
سند قال .....مالك بيه ده
غنوه قالت بفضول .....عايزه اعرف كاتب ايه
سند هز راسه بياس منها و اخذها ومشي
وشروق قعدت على الكرسي بحزن ودموع
نوح قعد جنبها واتنهد وقال..... مالك بس يا بت الناس ما هي الحمد لله اللي جات منيه زعلانه ليه بس
شروق قالت بدموع ...مكنتش عايزه اجرحه كده يا نوح... كل اللي بيحصل غلط انا جبتو معايا هنا واتبهدل اخر بهدله على اساس هنتخطب..نبيل ياما وقف معاي وساعدني ميهونش عليا كسرة قلبه واصل
نوح اتنهد وهو مقدر كل اللي حاسه بيه هو نفسه حس بحزن على نبيل بعد ما مشي بالطريقه دي من غير ما يتكلم مع حد اتنهد وقال...انا مقدر كل اللي بتقوليه ومعاكي حق ...بس كمان تفكيرك غلط مينفعش ترتبطي بيه لانك عايزه ترديله الجميل انتي كده بتوجعيه اكثر.... الصح انك كنتي تقوليله من الاول
شروق قالت بدموع ...اقوله ايه بس
نوح قال ببساطه...تقوليلو انا بحب نوح وعمري ما هقدر احب حد غيره ...وانت مفيش زيك والف من تتمناك بس متجيش شعره في راسه ولا نقطه في حلاوته
بقلم....زهرة الربيع
شروق بصتلو بدهشه و قالت ..... لا والله مين بقى اللي فهمك الكلام ده ان شاء الله
نوح قرب منها وقال وهو بيبص لعيونها..... عيونك اللي قالولي كل مايشوفوني بيقولوا لي كده
شروق ابتسمت وقالت.... عيوني ..وقالولك ايه كمان
نوح قرب منها قوي وقال ....بيقولو عمرنا ما حبينا ولا هنحب قد طلتك...ودلوك بيقولولي كده بردك
شروق نزلت عيونها بكسوف وقالت... ده وقت هزار بردك.... احنا في ايه ولا في ايه
نوح مسك ايدها وقال.... احنا في ايام حبنا اللي اخيرا لقيناه احنا في اجمل ايام عدت علينا عموما ..ولو على نبيل انا هكلم واراضيه وهخلي ام ...
بس قطع الكلمه بسرعه وقال ....هخلي مرت ابوه كمان تكلمه ...وصدقيني انتي كده بتساعديه يكمل حياته وينسى بدل ما يفضل موقف حياته على حاجه عمرها ما هتكون ايه ده انا لو موتك وموته وموت نفسي حتى مكنتش هسيبك تتجوزيه ولا تكوني لاي راجل غيري
شروق ابتسمت وبصت لعيونه وقالت..... بقيت تقول كلام حلو قوي يا عمده
نوح ابتسم وقال ...ولسه مشوفتيش حاجه من الكلام الحلو ده انا لعيب قديم واعجبك
شروق ابتسمت بسخريه وقالت...اممم انت هتقول لي ما انا عارفه انك لعيب قديم من ايام بت الوزير
نوح ضحك جامد وقال.... انتي لسه فاكره بت الوزير
شروق قالت ...ودي حاجه تتنسي مقولتليش صحيح ...ايه مبقيتش اشوفها هنه ...خير ان شاء الله
نوح ابتسم وقال....بتسألي ليه اتوحشتيها
شروق قالت بضيق..... لا بس خايفه تكون انت اتوحشتها
نزح ابتسم على غيرتها اللي واضحه في عيونها وقال ....انا مبقيتش اتوحش غيرك ..بشتاقلك حتى وانتي جاري
شروق ابتسمت ونزلت عيونها بكسوف
وهو ابتسم وقال...وعلشان تطمني قلبك بت الوزير مهتشوفيهاش هنه تاني واصل... انا كلمت ابوها وقلت له لو جات هنه تاني مهتطلعش واذا اخوها ربطته مع البهايم هي هربطها مع الكلاب السعرانه..من بعدها مجاتش تاني معارفش شكلها خافت ولا ايه
شروق بصتلو بدهشه وقالت ....شكلها خافت.... لا مفيش حاجه تخوف يعني هتخاف من ايه
ضحك وقال ...ايه انتي كمان خوفتي مني ولا ايه
شروق ابتسمت وقالت...انا عمري ما اخاف منك ..انا ممكن اخاف على زعلك لاكن منك لاه...متاكده انك لو اذيت الدنيا كلها مهتأذنيش ده انت اماني الوحيد يا نوح
نوح ابتسم وعيونه لمعت بالسعاده وقال....يابت بلاش الكلام ده خليني اتستر للاخر الشيطان عامل عمايله معاي
شروق ضحكت من قلبها وهو ابتسم وقال....خير البر عاجله هطلب يدك النهارده ولو انها شكليات بس بردك نمشي بالاصول
شروق اختفت ابتسامتها وقالت...طب ونبيل خلينا نكلموه الاول ونجبر بخاطره..انا مهقدرش ابقى مبسوطه وانا عارفه انه مشي زعلان
نوح نفخ بضيق وهيه قالت بتوتر ....امانه عليك ما تزعل يا نوح بس مجايش من قلبي افرح وهو زعلان وماشي من هنه خاطره مكسور ....نكلموه وبعد كده نشوف موضوعنا
نوح ابتسم بهدوء ووقف وقال... حاضر يا طيبه يا بت الطيبين انا عارف ان مهيونش عليكي ومتقلقيش مهطلبكش رسمي غير بعد ما نكلموه ونراضوه وكيف ما قلت لك هخلي مرت ابوه تكلمه و
بس قطع كلامه وحط اديه الاتنين على دماغه وقعد مكانه لما حس رجليه مش شيلاه
شروق اتخضت وقالت.... مالك يانوح فيه ايه
نوح قال بتعب..م...معارفش....معارفش كل شويه احس بصداع كده ورجليا متشيلنيش
شروق قالت بخوف...سلامتك...شوفوا دكتور...ولا نشوفو ليه خلينا نعمله اشعه على الدماغ واشوفلك انا فيها ايه
نوح قال بسرعه...ايه كل ده يا هبله دكتور ايه واشعة ايه... ما فيش حاجه لكل ده بس تلقاه من ضغط اليومين اللي فاتوا ..انتي روحي ريحي دلوك و متفكريش في حاجه
شروق بصتلو بقلق وقالت... انت متاكد انك زين
ابتسم وقال بسرعه ...يا بت قولت لك زين ما فيش حاجه وغمز وقال بمرح...ولا انتي بتتلككي علشان تكشفي عليا...انا جاهز اكشف على العموم لو انتي الدكتوره
شروق ضربتو في صدره وقالت...احنا في ايه ولا في ايهوقفت قلبي على فكره
نوح ابتسم وقال...سلامة قلبك يا قلب نوح...متقلقيش انا كويس والله... يلا روحي دلوك علشان نجاتي راح يجيب حسنين والخبير اللي هيفرغ الاجهزه عشان نشوف موضوع البلوه اللي فوق دي
شروق اتنهدت وقالت....تمام... ومشيت
و هو حط ايديه على دماغه بتعب تحت انظار حليمه اللي كانت بتبص عليه من بعيد ومبسوطه جدا باللي بيحصل وقالت بتوعد... ولسه يانوح ان ما هديت مكانتك زي ما هديت حيلك مبقاش انا حليمه
عند غنوه كانت ماسكه الجواب وهي متاثره جدا وقالت.... اسمع يا سند كاتب ايه بيقول ...
صباح الخير يا شروق بتمنى تكوني بخير... لما تقري الجواب ده هكون انا سافرت خلاص ..انا مبقتش قادره اكمل يا شروق بجد تعبت انا سمعتكم امبارح انتي ونوح كان بالصدفه على فكره انا ورايح اوضتي ...وكنت عايز اشكرك عن الكلام اللي قولتيه امبارح عني...رغم انه وجعني قوي لكن على الاقل فكرتي فيا وكنتي عايزه تكملي معايا رغم انك بتحبيه هو .... بس كده انتي مبتعمليش حاجه كويسه علشاني ياشروق العلاقات اللي زي دي احنا بننهي عنها ...مينفعش تتنازلي عن حبك علشاني لان انتي كده عمرك ما هتحبيني و عمري ما هبقى مبسوط.. على كلن مفيش مشاكل يعني ما حصلش حاجه كبيره قوي احنا لسه على اول الطريق....و بتمنى تلاقي من نوح الحب اللي بتتمنيه انا متاكد انه بيحبك..وانا ..انا مش زعلان على اللي حصل.... بس ياريتك كنتي حكيتيلي من الاول يمكن مكنتش غرقت قوي كده ....بصي تمام المهم تبقي مبسوطه ...اشوف وشك على خير يا شروق... او الافضل منشوفش بعض تاني مش زعل ابدا بس ده الافضل ليا عشان اتعافي بسرعه..بتمنالك السعاده من كل قلبي...نبيل
غنوه مسحت دموعها وقالت بحزن..... كان جدع قوي وقف معاها ومعاي حب باحترام وفارق باحترام
سند قال ..معاكي حق مع ان احنا للاسف محدش فينا احترمه واصل
غنوه بصتلو باهتمام وقالت ...قولي يا سند لو في يوم قولت لك اني بحب حد تاني وعايزه اتجوزه هتكتب لي جواب كيف ده
سند رفع شفته باستنكار و قال.... لا طبعا ..جواب ايه اللي اكتبهولك واسيبك لحد تاني ده انا اقطع رقبتك اسهل ولا تبقي لحد تاني
غنوه بصتلو بذهول وقالت..تقطع رقبتي.... بس اللي بيحب بيضحي عشان حبيبه
سند ابتسم بخبث وقال ...طالما كده تمام انا هروح اتجوز البنت سماح بقى وانتي لازم تضحي عشاني.... كنت عايز اتجوزها بس خايف من اذاكي
غنوه ابتسمت وقالت.... لا متقلقش انا مش مؤذيه ولا حاجه وبعدين اذيك انت ليه يا نور العين مدام هي موجوده اموتها هيه اسهل
سند ضحك بخفه وقال..امال انا بحبك ليه ..علشان بت جامده كده ومفيش حاجه تهزك...وانتي بقى بتحبيني ليه
قالت بسرعه...هبل
سند ضحك وقال....طب وبقيتي هبله من ميته
غنوه قالت ...من وقت ما حبيتك مش محتاجه دي
سند قال ..غنوه بلاش تتهربي...جد نفسي اعرف بقالك قد ايه تعرفيني و بتحبيني من ميته
غنوه ابتسمت وقالت.... كتير قوي من لما كنت في اعداديه ابويا اخدني سبق الخيل وانت كنت هناك
سند قال باستغراب...واه..ده انتي كنتي عيله
غنوه ابتسمت وقالت...كنت حوالي ١٤ سنه وانت كنت تطلع عشرين او واحد وعشرين ...يومها راهنت على حصانك وكسبت الرهان..ومن وقتها بقيت اروح وراك كل سبق ..واحس اني هموت واتكلم وياك بس اتكسف وارجع تاني
وفي يوم كانو عاملين سبق ولبست لبس اخوي وغطيت وشي ونزلت قصادك ...انت ضحكت عليا وقتها لان كان جسمي في الجلابيه باين اصغير ..واتسابقنا قصاد بعض
سند اتسعت عنيه بدهشه وافتكر الموقف وقال...انتي اللي وقعتي من على الحصان
ابتسمت وقالت ...ايوه انا ..منسياش انك كان فاضلك خطوات وتفوز بس وقفت واطمنت عليا ...قولتلي كويس يا اخينا لما مش قد الخيل بتركبوه ليه
ويومها كانت اول مره تمسك يدي قومتني ومشيت
سند لمعو عيونه بسعاده واعجاب ميتوصفش وقال.... كملي
غنوه ابتسمت وقالت...بعدها بقى الحاكم طلب لحمه للشهر كلو من عندنا واخويا مكانش قاعد وانا روحت عشان اوديها ويومها انت اخذتها مني... وتلاقينا عين لعين لاول مره... كنت طايره من السعاده وانت بتبصلي وباين في عنيك اني عجبتك حتى يومها عاكستني فاكر
سند كان مندهش من اللي بتقوله وافتكر الكلام ده كان قبل ما يسافر اصلا يكمل دراسته كانت بنت جميله ما كملتش 16 سنه زكانت جايبه لهم لحمه على البيت ابتسم بدهشه وقال ....افتكرتك ..بس...بس الكلام ده قديم قوي
غنوه ابتسمت وقالت ...مش قولتلك بقالي كتير اعرفك...يومها بقى قولتلك خد اللحمه فاكر قولت لي ايه
سند غمز وقال ... لحم صافي ولا ملبس... يسلم اللي ربى واللي لبس
بقلم...زهرة الربيع
غنوه ضحكت بخفه وقالت...اديك فتكر....عارف يومها معرفتش وصلت لدارنا كيف من الفرحه ....خصوصا انك بقيت تبص عليا مده طويله لحد ما اختفيت ....انا فكرت اني عجبتك مكنتش اعرف انك جاي في اي روح والسلام...تاني يوم جيت اخد الحساب لقيتك مع واحده ورا السرايا
سند ضحك بقوه وقرب منها قوي وقال ....انا مكنتش عارف ان فيه منجايه عويسي صغيره كده عشقاني...والا مكنتش دقت غيرها واصل
واتنهد وقال بجديه...طيب ليه وافقتي عليه ..يعني جوزك
غنوه اتنهدت لحزن وقالت.... بعدها انت سافرت وطولت قوي وحسن بقى يتقدملي واهلي عايزين يعرفو برفض ليه...ومفيش حاجه تتقال...قولت يا بت بطلي هطل هو معقول ود العمده هيحبك انتي..حتى لو رجع هياخد واحده من بنات الذوات ...شلت الفكره من دماغي او عملت نفسي شلتها و اتشكيت في لساني وافقت عليه ... بس انت عارف انا اتمنيتك من ربنا في ليلة قدر ووعدتو لو جمعني بيك مهفرطش فيك واصل عشان كده وافقت على جوازي منك لما هددتني بحميد
سند مسك ايديها وقربها ليه بحنيه وقال.... اذا انا زمان كنت حاجه مهمه في حياتك فانتي دلوك كل حاجه في حياتي... وحياه عيونك الحلوين دول مارايد غيرك وهوعد ربنا كيف ما انتي وعدتيه لو جمعني بيكي عمري ما هفرط فيكي ولا اوجاعك واصل
غنوه لمعت عيونها بالدموع و هيه بتبصلو بحب شديد
وسند قرب منها وحاولت تبعده وهيه بتقول بضعف...سند ..سند لاه بعد هفتح دماغك انت عارفني
سند ضحك وهو بيقرب اكتر وبيقول...اهون عليكي يا بت و
بس قاطعتهم سماح لما دخلت وهي بتقول ... سي سند نوح بيه عايزك و
بس قطعت كلامها لما شافته قريب من غنوه
وسند وغنوه بعده عن بعض بسرعه
سماح كملت بغضب و قالت....اللي اسمه حسنين جيه وجناب العمده عايزكم علشان هيفرغوا تلفون المرحوم
سند حمحم وقال...طيب تمام نازلين دلوك
سماح بصت لغنوه بغيظ وقالت... صوح يا سي سند نسيت اقولك... في حاجه رفيعه كده ناقصه من خلقاتي بقول يمكن تكون في اوضتك يعني لو تسمح بعد ما تنزل ادور عليها لانها حاجه خاصه شويه وخايفه حد يلاقيها
غنوه بقت تضرب رجلها في الارض بغيره وغضب مكبوت
وسند بص لسماح و قال بضيق منها.... مفيش حاجه في الاوضه يا سماح واتنضفت 1000 مره شوفيها يمكن نسيتيها في اوضه حد تاني
سماح بصتلو بغضب ولسه هترد غنوه قالت بسرعه...هملها تدخل تدور براحتها ...وشوفي لو في اي حاجه نقصاكي عشان من هنه ورايح مش هتخشي الاوضه دي تاني واصل....فلو في حاجه ضايعه كده ولا كده شوفيها بالمره
وطلعت من الاوضه وضربتها في كتفها بقصد
سند راح ورا غنوه بسرعه
وسماح بصت لطيفهم بغضب ميتوصفش وهيه بتتوعدلهم
سند جري ورا غنوه وقفها بسرعه...وقال...استني يمين بالله بقالي اكتر من سنتين مالمستها دي بتستهبل و
قاطعته غنوه وقالت بحزم...لسه عايز تتجوزني ولا غيرت رأيك
سند ابتسم وقال بسرعه ودلوك لو تحبي
غنوه قالت بجديه...دلوك هننزل نفرغ تلفون المرحوم...ونوح بيه متاكد ان الجدع اللي جابو هيجيب السجلات اللي اتمسحت وكده هيظهر الحق... وقتها تتكلم مع اخوك في موضوعنا على طول
سند ابتسم بسعاده وقال...هيظهر باذن الله ...مبروك علينا
بعد شويه كانو متجمعين كلهم في الصالون وبدا الخبير اللي جايبه نوح يفرغ تليفون حسن والتابلت بتاعه ويشوف الفيديوهات والصور اللي عنده واذا في حاجه محذوفه
بعد وقت من التوتر كان رجع كل المحذوفات و قال ...الاجهزه نضيفه يا نوح بيه كلها فديوهات افراح وكليبات ما فيش اي حاجه زي اللي انت بتقول عليها دي
اتسعت عيون الجميع بذهول وووووو
