رواية جذبني فمك البني الفصل الواحد والعشرون 21 بقلم عبير إدريس

مدري شلون حبيتك

توضيت بعشك مو ماي

وبنص الصلاة،، الفاتحة لكيتك

خيم غرامك على الكلب

ما امن بريحة بشر

بس انت اعرف نيتك

بروحي من ادورك استحي

حاجز الروح وي الكلب

وبانفاسي صاير بيتك

لغيري تصير اتخايلك

متكولي من يستاهلك

حاسبلك انه بحاسبه

بالساعة كم مرة النفس

وشكد هوه البريتك..

__________________

انتضرنه بره الغرفه طلعت البنيه اعتقد ممرضه او هيج شي ، شافها عمو ادهم راح يمها سألها جان قلق كلش وملامحه كلها محتده ...

ادهم : ضربتيها..

_ اي عفتها متمدده شويه وتنام ..

ادهم : عاشت ايدج ام نوارس تعبتج.

_ اخ عزيز افضالك متنسي ماسويت شي..

ادهم: رحم الله والديج وبلا امر عليج اذا بليل احتاجيتج ممكن اجي اخذج ..

_ اي عادي بأي وقت اتصل قبل لا تجي علمود اتحضر..

ادهم : ماكو اشكال يعني لان ماريد اسببلج احراج..

_ صدكني ماكو اي اشكال ولا احراج هاي شغلتي اطلع عادي اي واحد يحتاجني اروح وياه اصلا جواريني يدكون الباب مرات اروح حتى ما اخذ فلوس..

ابتسم وتشكر منها هواي وطلعو وصلها للباب،،

دخلت لغرفتنه لكيتها تفتح بعينها وترجع تغمض ودموعها تنزل طلعت ورحت للمطبخ سمعت صوت ايمن يحجي وعمو ادهم جان يصيح تقربت من مكان الصوت باوعت من الشباك واكفين بالطرمه وكفت اسمع اعرف شي غلط بس ماطول شي يخص اختي ويخصني الفضول يقره الف..

ايمن : انت صدك تحجي شلون هيج مسوي بيه ..

ادهم : كم مره كررت سؤالك وارجع واكلك يستاهل.

ايمن : لا ميستاهل معذور تعرف كلش زين وصله الفديو بس اخر ثواني مو من البدايه..

ادهم : حتى لو ميصير هيج يسوي بيها ماله حق..

ايمن : شنو نسيت شصار بيك من شفته مو حتى منعتني اجاوب على اتصالاتهم بعد شكو ..

ادهم : بس مأذيتهم صح ضجت احتفظت برأيي لنفسي لا شهرت بيهن ولا غثيتهن اذا جانت زينه موزينه لنفسهة انه شعليه اجي أأذيها لو بوقتها صار الموقف وهيه بلبيت جان جيت نصحتها بطريقه ما افشلها ولا أأذيها..

ايمن : صح وياك طريقته جانت غلط بس مو الكل يفكر مثلك ادهم بالشرق وفهد بالغرب وانت كلش زين تعرفه شكد كلبه طيب ميستاهل هيج تسوي بيه..

ادهم : اكله دمر البنيه واتهمني وياها ويكلي ميستاهل اصلا زين ما دفنته.

ايمن : تره كاعد نتناقش ماله داعي الصياح ..

ادهم : من تتناقش بشي معقول وتصير منصف اجاوبك بهدوء بس اسئلتك قمه بالاستفزاز ..

ايمن : الصار صار وعفا الله عما سلف ..

ادهم : هاي عدكم انه ماعندي عفا الله عما سلف اللي يأذيني لو يأذي شخص مقرب مني او طالب حمايتي ما اغفرله ابد وأأذيه قاطات ..

ايمن : عليش تصلي لعد اذا تأذي اخوك وتحقد عليه.

ادهم : ها اصلي الصلاه تنهي عن الفحشاء والمنكر صح لو انه غلطان اذا هو يعرف الصلاه ويندل درب رب العالمين جان عرف شنو معنى قذف المحصنات واجه حجه ويايه وفهم مني وحتى وان كانت صدك غلطانه هم ما انطي الحق هيج يتصرف وياها..

ايمن : هسه فهمني انت ليش كاعد ترجف على كيفك تره انه ايمن مو فهد..

ادهم : اعرف مو زر*** ة بس الصار وخلاني بهذا الحال ضيع تعب اسبوعين البنيه بالكوه طلعتها من الهيه بيه خفت لا تدخل بحاله اكتئاب وتوها طالعه من انهيار عصبي وتعال شوف شلون تأزمت حالتها جانت بس ساكته هسه كامت تصيح وتملخ بنفسها..

ايمن : هو غلط بس الفديو مثل ما كتلك وصله الثواني الاخيره وجانت رده فعلنه هم مشابها لفهد وانت اكثر واحد ضجت بينه ليش تنكر.

ادهم : اول شي ضجت لان كلت عمتها توها ماتت بعدنه بالنجف وهيه تدور بوس وحضن وضجت لان ماغزر بيها تعب عمتها عليها وخانت الثقه بداخل بيتي ، بس شسويت سكتت جيت حجيتلك لا لو ما انت واصلك الفديو وجيتني متخبل انه ما احجي واختك باجر رايحلها اذا ما زوعتها حليب امها من خشمها ما ارتاح..

ايمن : شكد ضجت منها عبالك انه هم اكلت مني نصيب من الرزاله.

ادهم : صوجي ما كسرت ضهرها اكتفيت بسحب الموبايل منها ، يعني هيج حقدها على ياسه تحول لبنات وضاح لو بس اعرف شسوتلهم ياسه وهيج حاقدين عليها..

ايمن : كلهم ميحبوها هاي شويه نرمان مستلطفتها مو تدري انت بالوضع كله..

ادهم : ادري ادري بس شنو من جرئه تسوي حساب وتقطع الفديو وتدزلنه اخر ثواني لك من شفت الفديو كامل مصوره سبع دقايق ومبين البنيه حجيها وياه ضايجه منه وكاعد تكله احترم وفاه عمتي مو وقتها وهو الكلب يحاول وياها وتالي تمادة وباسها..

ايمن : عوفها هسه لتروح حير بسيلين وانه اروح اربيها ..

ادهم : ماريد فهد يوصل وغراضه كلهن ادزهن اله ..

ايمن : انت لا رأسن تفقل هذا اخوك من دمك..

ادهم : واخويه اذا باطل ماريد خوته..

ايمن : الله يهديك ..

باوعله صفح ودار وجها يمشي للهول اني ركضت رجعت للمطبخ بس عيني على الممر باوعت ، اجه فتح الباب مال سيلين باوع عليها وسد الباب وراح لغرفه مريم ، اللي مستغربته ليش تارك غرفه عمه من اجينه لحد الان لا ينام بيها لا يفوتلها وحتى ملابسه مطلعهن ..

وره ساعه جنت كاعده بالغرفه واكلب بالموبايل وسيلين نايمه ، دك الباب ..

ايفين : فوت عمو ..

فتح الباب وباوع ..

ادهم : بعدها نايمه..

ايفين : اي.

فات وكف فوك راسها ، يباوعلها ويحجي.

ادهم : لو بس اعرف شنو الصاير وياها وخلاها هيج هشه بسرعه تنكسر.

ايفين : عمو شافت ضيم وقهر امي تضغط عليها من جهة وغزوان الله لا يوفقه كام يضربها هواي اخر فتره ويفشر عليهة ب الفاظ كلش محلوة واخر شي كتلك شنو الصار..

ادهم : زين انتي ليش مخابرتيني من جان يضربها ليش اله تأزم الوضع يلا اتصلتي.

ايفين : مو جانت هيه تراسلك هواي وتتصل اكثر من عشرين مره بليوم وانت متجاوب جانت دائما تكول محتاجه نصيحته اشوف شنو رأيه نطلع نعيش وحدنه لو نرجع لبغداد نأجر ونشتغل ، جانت افكار هواي ابالها مزدحمه ..

ادهم : والله جنت تعبان اكثر من بنتي اللي هيه من روحي طالعه هملتها ومادري عنها وين ما وين،، صح غلطان ما جاوبت وما عرفت شبيها بس ماجنت ادري الموضوع بهذا السوء اصلا ماعرفت انتو يم امكم اله من ايمن اتصل بيها وطلبت منه يسألها همه وين انه فكرت وافكاري اخذتني لبعيد كلش كلت هسه انخطبت لابن عمها واحتمال عدها مشاكل وياه وانه ما ناقص دوخه ماجنت اعرف هيه تمر بظروف سيئه..

ايفين : المهم عمو من انت عرفت ماقصرت ويانه..

جر نفس طويل وزفره..

ادهم : ما نمت ليلتها ابد وطلعنه ساعه ٣ الفجر اريد بس اوصللكم ..

ايفين : كلش فرحت من شفتكم ..

ابتسم وكام .

ادهم : راح اجي بعد ساعه ١٢ تنامين لو تضلين كاعده؟

ايفين : والله نعسانه بس راح اضل.

ادهم : تحملي بس ٣ ايام ..

ايفين : اتحمل ماشي..

راح وكمت طلعت وراه

ايفين : عمو عمو..

التفت وباوعلي..

ايفين : راح تنام.

ادهم : اي ليش؟

ايفين : تتعشة

ادهم : انه ما اتعشة اذا تردين انتي اكلي.

ايفين : يعني يوميه متاكل.

ادهم : موشرط مرات اجوع بس الاغلب احب انام خفيف.

ايفين : ها زين تصبح على خير.

ادهم: وانتي من اهله..

راح للغرفه وسد الباب واني رجعت يم سيلين ضليت اكلب بالموبايل طبعا ممنوع اعلك تلفزيون يكلي يأثر عليها حتى لو نايمه وبليل اطلع موبايلاتنه اخليهن بالهول ،مرات كثر ما يلح عليه بهاي الشغلات اريد ابجي ...

صارت ساعه ١٢ ونص دك الباب على كيف كمت فتحته جانت الغرفه ظلمه معلوك بس ضوه تيبلام..همس

ادهم : بعدها نايمه..

ايفين : مكعدت..

ادهم : اعتقد تتظاهر بالنوم لان مفعول الابره انتهى وقته المفروض هسه تكعد..

ايفين : ماعرف والله..

كعد قريب راسها يقره ويحسب بيده ماعرف شنو بس شفته تتحرك صارت بالوحده ، طفى الضوه وطلع عباله نمت ، ثاني يوم كعدت سيلين بس من كعدت لحد ما اجتي المره ضربتها ابره هيه تعيط وتبجي انهارت كمنه منكدر عليها حتى عمو مكدر يسويلها شي ،

يضل بس يستغفر لو يجيب القران ويقره سورة ياسين ويطبك القران بوجها من تنام ،،

ومن تكعد محد يكدر يتقرب منها ، اجه ثاني يوم بليل هم كعد يم راسها نص ساعه قره عليها وطلع وثالث يوم هم كعدت تبجي وتملخ بنفسها وهم نفس الشي تكرر ابر مهدئة ويقره قران على راسها لا ساعه ولا ساعتين مرات يطول اربع ساعات بحيث ظهره ينكسر اصفن عليه اكول شجابرك هيج تسوي ..

بليل وره ما اجه وقره على راسها وطلع طلعت وراه راح للمطبخ شرب مي وراد يفوت ينام شافني واكفه كال..

ادهم : ها ايفين محتاجه شي.

ايفين : عمو انت ممجبور هيج تكسر ضهرك علينه وتتعب عايف دوامك وبنتك ومتطلع واحنه غريبات عليك يعني تنقهر علينه لو شنوو..

باوعلي وكعد على الكرسي بالمطبخ ضل ساكت وره شويه كال ..

ادهم : اول شي انه كرجل وعندي ضمير ما اقبل بنات يعيشون بيئه مثل بيئه امج ، حتى وان كنتو غربه عني هم احاول اساعدكم بس مو لدرجه ادخلكم بيتي واخسر وقت هواي بيهج حاله راح ابالغ واكذب بس احاول اساعدكم بالاكدر عليه حتى لو من بعيد لبعيد بس انتو اول شي ابوكم وضاح اله فضل عليه كلش جبير هواي وكف ويايه وسهل امري من خطبت ياسه جانو عمومتج قافلين ميقبلون ينطوني ،

والشي الاهم ياسة وصتني عليكم كالت مثل متشوف مريم شوف بنات وضاح وانه هيج شايفكم صدكي لو بنتي تمرضت هم اتعب عليها واسهر ،

لتخلين ابالج غير افكار لا عطف ولا شفقه نيتي وياكم صافيه وكل الداسوي اهديه لروح ياسه ، لان انتو يتيمات ومداراتكم بيها اجر وهذا الاجر اريده لياسه هسه عرفتي ليش اتعب عليكم..

ايفين : عرفت شكرا عمو واسفه لان فهمت خطأ..

ادهم : ماكو داعي للأسف كلنه نغلط ونتعلم يلا روحي نامي وباجر اختج راح تصحى بحيل الله.

مشى وصل باب المطبخ سألته جاوبني بدون ميندار..

ايفين : عمو هم راح تصيح وتعيط..

ادهم : بأذن الله لا راح تكعد وتضل ساكته احتمال متحجي بس بعدين تتحسن.

حجاها وراح نام واني هم نمت وفعلا ثاني يوم الصبح كعدت على صوت سيلين تحجي ويه ميلي ، فتحت عيني لكيتها كاعده وبحضنها الكلبه طفرت من مكاني باوعتلي ودنكت ..

ايفين : صباح الخير حبيبتي..

سكتت مجاوبتني..

طلعت اركض رحت دورت على عمو ادهم ملكيته ، خابرته كال بالحديقه طلعت لكيته يرش بالزرع.

ايفين : صباح الخير.

ادهم : صباح النور ..

ايفين : سيلين كعدت.

ابتسم وكال.

ادهم : ادري..

ايفين : شمدريك.

ادهم : سمعتها تسولف ويه ميلي.

ايفين: هاا صارلها هواي.

ادهم : كعدت قبل ساعه.

ايفين : الحمدلله.

ردت افوت ورجعت سألته.

ايفين : عمو شلون عرفت اليوم راح تكعد مابيها شي.

ضحك وراح سد المي مسد لحيته وباوعلي مضيق عينه.

ادهم : اكو شغله راح اعلمج عليها بعمري ماحاجيها لاقرب الناس الي لان اعتبرها كنز من الكنوز الثمينه لان ما مره سويتها اذا ما تحقق الاريده خلال هاي الثلاث ليالي..

ايفين : شنو عمو عفيه علمني...

ادهم :اعلمج بس بشرط تستخدميها بدون متأذين الناس يعني مو تدعين على شخص بسوء وتنتضرين يتأذه..

ايفين : لا اريدها الي..

فتحت موبايلي ودخلت على الملاحظات حتى اكتب شنو راح يحجي.

ادهم : راح تكتبيها.

ايفين : اي عمو.

ادهم : بعدين علميها لسيلين

ايفين : اكيد اعلمها ماطول شفت بعيني شلون اختي تغيرت وهدأت.

ادهم : اول شي انه قريت عليها هواي ايات من القران الكريم ومن ضمنها سوره يس بيها شفاء ورحمه للمريض هاي منتيهن منها اما شنو سويت بهاي الثلاث ليالي ..

اول شي قريت سورة الليل سبع مرات وسورة الشمس سبع مرات وبعدها قريت ٣٠ مره ( بسم الله الرحمن الرحيم تبارك الله رب العالمين ولا حول ولا قوة الا بالله العلي العظيم ) .. مده ٣ ليال.

وبأذن الله راح يتحقق كل اللي تتمنيه بشرط مابيه اذيه لا الج ولا لغيرج..

ايفين : كلش شكرا...

ادهم : كلش عفوا بس تعاي شو من جيتي لحد الان ماشفتج صليتي.

ضحكت ودنكت راسي..

ادهم : هاا كطعناها..

ايفين : مو بس اني سيلين هم كطعتها من رحنه يم ماما تركنه..

باوع عليه عقج وجها ضاج.

ادهم : من اليوم ترجعين تصلين ، شلون تريدين تتحقق حاجتج وانتي تاركه الصلاه ..

ايفين : اي صح اليوم ارجع اصلي..

هز راسه وفات جوه رحت سويت ريوك..

تريكنه اني وياه وسيلين اكلها وديته للغرفه اكلت بهدوء وساكته متحجي ، سويت غده تغدينه صار العصر اجه عمو ادهم جان طالع بره البيت..سألني

ادهم : سيلين كاعده؟

ايفين : اي كاعده .

ادهم : حجت وياج سويتي مثل ما وصيتج.

ايفين : سويت وسولفت كومه بس صافنه عليه..

ادهم : ماكو حل اله ابلش وياها جلسات ،

باعي اليوم راح ابلش وياها اول جلسه ، تسمعيها تكسر تصرخ تنهار معليج ماريد تعيشين دور الاخت الحنونه اليوم قوي كلبج ماشي .

ايفين: يااا هاي شراح تسويلهاو ليش تكسر وتصيح..

ادهم : عملية..

ايفين : شنو؟؟

حجيتها وفتحت عيني كلها..

ادهم : اسوي عمليه افتح راسج واشوف دماغج وين ، ٤٥ دقيقه متوصلين للغرفه لو الدنيا تحترك..

ايفين : اي صار ما اوصل لو الدنيا تحترك.

طلعت بره واهز بيدي وادردم شافني ايمن جان كاعد بالحديقه عيونه صارت على ايدي وضحك..

ايمن : ها طبكن..

ايفين : اخوك مو بس حيخبلني لا راح يخليني اركض بالشارع واصيح ميو..

ايمن: هههههه بعدج شافيه منه ..

ايفين : انت متأكد منه دكتور نفسي لو هو مريض نفسي.

ايمن : لتحجين على اخويه احترمي نفسج..

حجاها وضحك.

ايفين : شبيك تضحك مفهمت هسه ترزل تضحك شنو السالفه..

ايمن : لا داتخيل شكلج شلون صار من ادهم رزلج..

ايفين : هسه لو يزرل افهم رزلني بس مدري شيحجي.

ايمن : تتعلمين عليه بس يرادلج وكت هههههههه..

ايفين : اضحك شكو عليك ..

ضل يضحك اخر شي كال..

ايمن : خرب بشرفك ادهم متجوز من سوالفك..

سيلين

الصارلي كلش هواي وبلكوه بديت اتوازن وارجع طبيعيه بس الصار فهد من اجه وحجه عليه كلام ما استاهله،،

ومن شفت الفديو انحرجت منهم وانصدمت بنفس الوقت مجنت متصوره واحد مصورني كل البالي اخته حاجيتله ،

لهذا انهارت اعصابي كمت اعيط واصيح مرات من ماعدنه الحجه الكافيه البيها ندافع عن نفسنه او ماعدنه دليل يثبت برائتنه شنسوي نكوم نصرخ ونصير هجوميين علمود نثبت للمقابل احنه صح واحنه مظلومين وهذا الصار ويايه ايام متتاليه اني انام على المهدئات الى ان اجه ادهم ..

دك الباب فات جر كرسي وكعد كبالي عدلت نفسي ولفيت حجابي ومسحت عيوني المليانه دموع..

ابتسم..

ادهم : شلون صرتي؟

ضليت ساكته مجاوبته جان شايل بيده ورقه وقلم خلاهن بصفي باوعت عليهن ورجعت باوعت عليه..حجه هو

ادهم : نبلش بجلسه صغيره اسألج وانتي جاوبيني كتابه تمام...

جريت الدفتر منه وكتبت ..

سيلين : شنو الفائده منها؟

ادهم : اطلعج من الانتي بيه.

كتبتله

سيلين : اوك..

تنهد وكال..

ادهم : الحياه كلها اعتبريها روايه وانه كاتب واريد منج ادق التفاصيل اللي اثرت بنفسيتج وتأذيتي منها..

ضحكت وكتبتله..

سيلين : روايه هو اني صايره روايه وشنو تسميها روايه الظلم البؤس الضيم الغدر صار عندي فضول اعرف.

اخذ الدفتر قره المكتوب وكال..

ادهم : ممكن تبدي بمصح عقلي؟

عاد هنا متحملت

نترت بيه..

سيلين : بس اني مو مريضه بعقلي ..

ابتسم ورفع راسه اتنفس الصعداء و رجع باوعلي..

ادهم : مو عيب اذا نتمرض كلنا معرضين للمرض بس العيب اذا ادعينه الشفاء وداخلنه ينزف دم..مرات تصير ويانه حوادث تخلينه

واكفين على شفا حفره من الجنون.

سيلين : بس اني مو مخبله

ادهم : مو شرط المريض يكون مجنون يمكن اكو شي بداخله متعبه وهذا الشي اذا كتمه زياده عن اللزوم راح يأدي بيه الى الجنون..

سيلين : اني تعبانه مو مخبله اني حتى اعقل منك اني فهمت كل شي وادركت كل شي وضاقت الدنيا عليه من وسعها وخسرت كلشي وتالي وصلت لهذا الحال .

ادهم : صح احنه تعبانين لدرجه ممكن ان يكسرنا هوى عابر او يحرقنا ضوء شمعه صغيره او تدمي قلوبنه كلمه مو بمحلها بس لازم نتشارك بهمومنه ويه النحبهم علمود منخسر صحتنه..

سيلين : هذا الاقصده وبعدين اني ما ضل عندي احباب كلهم راحو..

ابستم وكال.

ادهم : اتفق بس عندج اختج لاتنسين احجيلها فتحي كلبج الها موزين الكتم..

سيلين : ليش كلت عليه مخبله..

ادهم : من وصفتج بالجنون ردت اطلع البداخلج واخليج تحجين بدون ما اتعب مجرد استفزج وبس..

سيلين : وهذا اسلوب من اساليب اطباء علم النفس..

ادهم : بالضبط ، واكتشفت انتي اذكى بهواي من ماجنت اتصور عمي انه المجنون مو انتي..

ابتسمت ودنكت راسي..

ادهم : راح اطلب منج اشياء نسويها سويه علمود ترتاحين ..

هزيت راسي ب اي.

ادهم : تنفسي ٢٠ مره بنفس منتظم شهيق وزفير..

سويت مثل ما كلي.

ادهم : جيد ، هسه اكثر موقف اثر بيج وتأذيتي منه تذكريه هسه كأنما صوره كدام عينج او فلم كاعد تشوفيه واريد تسترجعين ذاكرتج بخصوص هذا المشهد بالتفصيل ، بعدها خلي ايدج على صدرج مثل علامه الاكس يعني ايد اليمنه على الكتف الايسر والايد اليسرى على الكتف الايمن..

سيلين : سويتها ..

ادهم : صح ، هسه طبطبي على كتفج بيد اليسار مره وبيد اليمين مره،، تمام هسه اسرع شويه ...

سويت وهو يحسب.

ادهم : غمضي عينج وفكري بالموضوع الضايجه منه ...

ايفين

فتحت الباب وضليت اباوع عليهم لزمتني الضحكه هاي شكاعد يسوون شنو يحضرون ارواح بس سكتت خاف اترزل وهم اريد اباوع خاف يسد الباب ، علمها على حركات تسويهن وهيه مغمضه اباوع على ملامح وجها شويه تعصب وترجع تغمض عينها قوي بعدين حلكها رجف ونزلت دموعها وهو بيده دفتر ويكتب شنو ماعرف ...

ادهم : كافي سيلين صارت خمسين هسه اخذي نفس عميق بعد اقوه هسه ارتاحي ثواني ، يلا رجعي عيدي الحركات الكتلج عيلها وتخيلي المشهد المأذيج نفسه...

هم سوت خمسين مره ..ضليت اباوع عليهم كل خمسين مره يخليها ترتاح ثواني ويرجع يخليها تعيد حسبت عشر مرات خلاها تعيد هاي الحركات كل مره خمسين ،، سوت بس مفترفه كل خمسين مره وحد...

رحت لايمن سألته..

ايفين : ايمن شنو معنى هاي الحركه ليش عمو يخلي سيلين تسويها وكلش هواي طولو..

ايمن : شغله هذا شمعرفني انه ...

ضليت احوص دخلت على اليوتيوب كومه بحوشت يلا طلعتلي .

وعرفت معناها..

هاي الحركات تفعل الدماغ الجزء الايمن والايسر

وهاي الحركات تسوي تفاعل بجسم الانسان بحيث ترتب الصوره المزعجه اللي ضايجين منها بالشكل الصحيح و من تسوي هاي الحركات وتفكر بيها يساعدها على خفض التوتر ، مكتوب اذا سوينه هيج وتذكرنه هذا الحدث المؤلم او الذكرى المؤلمه راح نتذكرها بدون ما نشعر بضيق او توتر او قلق ، وبالمستقبل اذا اسمترينه عليها راح نتحسن ونعتبر الصار شي عابر بحياتنه وتجربه سيئه مرت وعدت ...

سيلين..

من بعد هذا التمرين حسيت روحي ارتاحيت شويه جان اكو ضيق بصدري حسيته راح اكو ألم بكلبي هم انزاح نوعا ما بس مانسيت..

ادهم : يوميه نكرر هذا التمرين الى ان نتحسن يومين نستمر بعدها عندي كعده وياج نسولف بيها شتكولين..

هزيت راسي ب اي.

ادهم : باجر راح اداوم خلصت اجازتي خوما تشلعين كلب ايفين اختج مريضه وتعبت تره عينها عليج..

نصيت راسي وهو كام طلع ..

رجعت مددت والدموع تجمعت بعيني بجيت ارتاحيت حسيت اكو جبل على صدري وبده ينزاح شويه شويه ..

مرت اليومين واني اسوي هاي التمارين ييجي يوصيني ويروح ثالث يوم هم اجه دك الباب وفات مبتسم..

ادهم: شوفي بهدوم الدوام بعدني..

سيلين : روح بدل ارتاح وبعدين تعال..

ادهم : اريد اطلع مستعجل واليوم اتأخر احتمال ساعه ١٢ يلا ارجع.

سيلين : تمام..

ادهم : اليوم اريدج تكتبيلي بدون متحجين زين..

سيلين : زين..

نطاني دفتر وقلم ...

ادهم : قسمي الدفتر بالنص.

قسمته بدون ما احجي وهو يراقبني بعينه ..

ادهم : على جهة اليمين كتبي تفكير ايجابي وعلى جهة اليسار كتبي تفكير سلبي ، ليفوك بدايه الورقه..

كتبت..

ادهم : كلنا عدنه اهداف نحب نحققها وعدنه طموح بس دائما الدنيا عاكسه ويانه ومتمشي صح..

كتبت صح..

ادهم : وانه اكول خطأ.

رفعت عيني باوعتله مبتسم بثقه ، ياربي ابتسامته وحدها علاج نفسي الهدوء البيه يخليني اخجل من نفسي..

ادهم : الدنيا تمشي عكس لان احنه هيج نفكر انتي شنو فرقج عني انه انسان من دم ولحم وانتي هم انسانه من دم ولحم و عندج عقل مثل عقلي وين الفرق..

كتبي بالجدول تحت التفكير الايجابي ادهم وتحت التفكير السلبي سيلين..

ضحكت و حجيت متحملت..

سيلين : بس اني ما افكر بسلبيه وضعي موزين والناس هيه ضدي..

ادهم : ماشي راح اعددلج امور وانتي كتبيهن كلهن ومن شنو تعانين كتبي كدامه صح..

سيلين : تمام..

ادهم : مودج تعبان عندج تشتت بالتفكير قلق حزن كئابة توتر احباط تعب بالجسم نحول صداع بالراس خمول ارق خدران بالايد والاطراف نمل بالرجلين وجع بمعدتج او حركه وحموضه عبالج بسبب الاكل بس هيه لا ، نغزه بالصدر خصوصا بالقلب اكتئاب استسلام نفاذ الطاقة الجسديه تردد با اتخاذ القرارات عدم الثقه بالنفس خوف من الماضي والحاضر وربما من المستقبل ، خوف من الموت من المرتفعات وخوف من الفشل ....

كتبتهن كلهن ونطيته الدفتر باوع ورجع باوعلي.

ادهم : هاي شنو

سيلين : شنو

ادهم : شو كله صح ..

سيلين : لان كلهن بيه وكل كلمه كلتها اني حاستها.

ادهم : مو كتلج تفكيرج سلبي.

سيلين : عمو شعليه..

ادهم : شلون شعليه هاي الاعراض كلها او جزء منها سببهة التفكير السلبي..

سيلين : لا اني مريضه وتعبانه معليه التفكير اذا جان سلبي او ايجابي ما مقتنعه بهذا الشي .

ادهم : انه احجيلج بشي طبي تره ما جايبه من جيبي.، شلون تعرفين نفسج تفكيرج سلبي من اربعه وعشرين ساعه تتذمرين انه ماعندي حظ انه مظلومه صديقتي كذا وانه كذا فلان حياته مرتاح بيها وانه تعيس حضي اعوج ، بردان اكره الشته ماحب الصيف او عندج مشكله صارت قبل عشر سنوات وانتي كل يوم تتذكريها حتى من انتي مرتاحه وماعندج شي جيتي صفنتي وتذكرتي هاي المشكله رحتي جبتي باكيت كلينس وتتذكرين وتبجين وفوك كل هذا تكومين تحجين بينج وبين نفسج انه ليش بوكتها ماكلت هيج وماحجيت هيج ليش سكتت ضاع حقي الى ان تحسين نفسج انهاريتي وصداع واذيه مالها اي داعي..

ضحكت ..هو هم ضحك.

سيلين: والله صح اني هيج..

ادهم : غلط ميصير لازم تبدلين كل تفكيرج بشي ايجابي ، اول شغله ترجعين للماضي مره وحده تتعلمين الدروس من الاخطاء العندج والقضايا النفسيه ناخذ الدرس ويانه للحاضر ونترك الموقف الأليم بالماضي ، وهاي سويناها بالجلسات السابقه ويه التمارين..

بالحياه عدنه مشاكل ومعوقات ، علمود نحقق الاهداف لازم منركز بالمشكله ونشكي منها لا كبل نفكر بحل هاي المشكله ، وتأكدي اي مشكله بحياتج جواها كنز وفرصه ذهبيه لو بس تعالجين المشكله وتنظرين الها نظره ايجابيه راح يتحقق الهدف البالج..

سيلين : اللي ما فهمته التفكير السلبي شعليه بالام الجسم والصداع وباقي الامور اللي ذكرتها.

ادهم : خوش سؤال باعي اي كلمه تحجيها بعد كلمه انه يعني انه تعبانه انه فاشله انه ماعندي حظ انه نعسانه و غفل تنامين انه مخنوكه وووو الخ من التذمر ،

هاي الاسئله اللي تبعت كلمه انه تدخل للعقل الباطن العقل الباطن ميفكر ولا يفتهم ولا يستوعب كبل ياخذ المعلومه ويرسل اشارات عصبيه للدماغ هنا الدماغ شيسوي يفرز هرمون الادرينالين هذا الهرمون يزيد ضخ الدم بالجسم والكريات الدم البيضاء ، علمود تحارب هذا الفايروس او المرض ، اللي حاسته هنا جهاز المناعه راح يتحفز علمود يحارب المرض العندج لهذا يصير عندج خمول وتعب وصداع وما الج خلك لاي شي حتى الاكل تكرهيه وتنعزلين عن العالم التفكير السلبي تماما مثل الفلاونزه ابسطها الج مو تهدج هد تخليج تكرهين حياتج نفس الشي دائما رددي انه قويه انه حلوه انه انفع اسوي اي شي عندي طموح وراح اوصله ، انه محبوبه الناس تحبني راح تشوفين كلشي حلو وعندج طاقه كبيره من الحماس..

سيلين : تعبتك خليتك هواي تحجي..

ادهم : شغلتنه هاي بس الاهم كون استفاديتي لان انه شغلتي ما انطي علاج او شراب او ابر وانما اعالج بالكلام والتمارين والغذاء الصحي والرياضه ، اتمنى متضيعين تعبي وياج..

سيلين : لا والله راح اسوي كلشي تكلي عليه..

ومرت الايام وبالاسبوع كمت اخذ جلستين وجنت انتضرهن بروح حتى اغير من نفسي وفعلا كدرت اتغير بنسبه ٢٠ بالميه واني اشوفه بحد ذاته انجاز ...

رجعت لحياتي الطبيعيه كلش تعلقت بميلي وكمت اهتم بيها هواي ونزرع الحديقه سويه وايفين ويانه ومرات ايمن ، الرياضه صارت جزء لا يتجزء من يومي ، الصبح نطلع اني وايفين نتمشى شويه ونرجع منبتعد عن البيت هواي والتلفزيون ممنوع والموبايل كذلك عشت حياه مختلفه كلش حبيت التغيير الصارلي ،

ومرات ايمن يطلعنه بطلب من عمو ادهم ،اكثر من مره طلعنه نشتري ملابس ومن نرجع يسألنه اشتريتو كلشي ممحتاجين شي نكله لا عاشت ايدك وبهيج صرنه جزء لا يتجزء من هاي العائله..

حجابنه مضبوط صلاتنه نضبطت وحتى ايفين هواي استفادت وتغيرت حسيتها بدت تميز بين الحلال والحرام وتتجنبه..

وبيوم طلبت من عمو ينطيني الموبايل مالتي.

ادهم : شتسوين بيه اتركيه افضل.

سيلين : عمو صرت زينه الله عليك انطينياه.

ادهم : يأثر على دماغج..

سيلين : ما استخدمه هواي ساعه بس.

ادهم : اكيد

سيلين : اكيد

فتح المجر مال مكتب وخلاه على الميز مديت ايدي اخذته وتشكرته ، ثاني يوم راح جاب مريم ورجع بليل..

بيومها احتفلنه بيها وهيه من فرحتها منامت للفجر سوالف وضحك ، نقلنه جربايتها يمنه وملابسها وصرنه ٣ بنات بالغرفه ، عمو كلش فرحان ب

ينه وتلاثتنه يعاملنه نفس بناتنه..

واحنه شعورنه تجاها كأنما ابونه ماعدنه احساس ثاني وهو نفس الشي ماعنده نضره محلوه ولا مره تلفظ بكلام ضوجنه بيه عايفنه على راحتنه لان احنه مشينه عدل مثل مايريد جان كلش فرحان بالتغيير الصار النه..

وبيوم كعدت على صوت الموبايل يدك ، باوعت رقم غريب مجاوبت رجع مره ثانيه دك هم مجاوبت بعدين اجتني رسائل ، فتحته ..مكتوب..

ها عار عبالج اعوفج تورطت ويه الناس حضري روحج غصبن عليج تجين وتتزوجين الرجال التقدملج اني ساكته بمزاجي بس الناس كل يوم تجي وتسأل حضري روحج المهر مالتج الخميس ..

وراها دزت رساله كلها فشار وغلط على عمو ادهم ..

كمت ارجف وابجي ، كعدت ايفين باوعتلي واجتي يمي كالت...

ايفين : شكو خير ياستار..

مكدرت اجاوبها ضليت بس ابجي هيه اخذت الموبايل قرت الرسائل ودكت عليها نزلت عليها فد نزله فقدت ايفين اخر شي كالت..

ايفين : اي عادي خلي يجون هسه تذكرو عدهم بنات اخ والله منرجعلج لو مو تدزيهم روحي بابه اصلا نسيناج ونسينه قرفج..

سدته بوجها وخلت الموبايل على الميز اجتي يمي لزمتني من كتفي..

ايفين : حبيبتي ليش ترجفين ماكو شي والله ميجون.

سيلين : لا راح يجون راح يرجعونه لبيتها هسه تشوفين..

ايفين : ميرجعونه عمو ميخليهم..

سيلين : ميكدر الهم راح يرجعونه والله ميكدر الهم اني فاشله مثل مكالت اصلا اني ليش عايشه.

ايفين..

حرت شسويلها بس ترجف عفتها وطلعت بره خابرت على عمو ادهم يدك يدك وميجاوب سديته ورجعت يمها لكيتها كاعده بالكاع وحاضنه نفسها وتبجي ، كعدت مريم ضلت صافنه عليها وخافت رحت يمها اخذتها من ايدها وديتها للمطبخ.

ايفين : كعدي هنا اسويلج ريوك واكلي.

مريم : شبيها سيلين..

ايفين : مابيها شي حبيبتي راسها يوجعها ..

مريم : هسه بابا يجي يوديها للطبيب.

ايفين : اي هسه يوديها عندج حمام.

مريم : اي ..

ايفين : يلا طبي على ما اسويلج اكل..

طبت للحمام واني رحت للغرفه لكيتها كاعده بالزاويه مال غرفه وحاضنه نفسها تبجي وضامه راسها بين رجليها.

دك موبايلي باوعت عمو ادهم..اخذته وطلعت بره بالحديقه حجيت وياه..

ايفين : هلو عمو صباح الخير .

ادهم : هلو ايفين جانت عندي محاضره مكدرت اجاوب خوماكو شي..

ايفين : عمو تعال هسه سيلين مدري شبيها..

ادهم : ياستار شصار .

حجيتله..

عصب كلش ونتر بصوت عالي ..

ادهم : كلت الها تترك الموبايل حالتها بعدها مو مال ، استغفر الله يعني العناد اخ اخ من العناد هسه هيه وين ..

ايفين : بنص الضيم..

ادهم : لتحركين اعصابي وجاوبي عدل وينهة وشنو دتسوي.

ايفين : بالغرفه وبس تبجي ومتقبل تحجي ويايه..

ادهم : لتحاجيها ابد ولتدخلين يمها بس راقبيها من بعيد لبعيد خاف تسوي بروحها شي .

ايفين : تمام..

ادهم : حاولي تلهين مريم لتخليها تشوفها عفيه .

ايفين : قبل لتكول خليتها بالمطبخ.

ادهم : اي لان كوه رجعت طبيعيه بعد وفاه امها كلش تأثرت نفسيتها.

ايفين : اي عمو تدلل.

ادهم : مسافه الطريق وانه يمكم.

ايفين: منتضريك.

كلت بكلبي لعد واني نفسيتي تجعصت ومحد بحالي ياريت عندي مثلك اب جان هسه حياتي غير حياة وحالي غير حال ، بهاي النقطه صدك حسدت مريم..

رجعت للمطبخ باوعت مريم ماكو ، رحت لغرفتنه لكيتها حاضنه ميلي وكاعده كبال سيلين ..

سحبتها على كيف من ايدها وطلعنه بره رجعنه للمطبخ..

ايفين : مو كتلج انتضريني هنا..

مريم : سمعتها تبجي .

ايفين : ميخالف هسه تصير زينه وبعد متبجي..

سويتلها ريوك وكعدت اوكلها تاكل على كيفها يمكن طولت نص ساعه ، واني صافنه عليها نعست روحي طفرت بس ماكدر احجي حساسه وبسرعه تزعل ...

صافنه عليها وسمعت شي انركع بالباب مال غرفتنه وعاطت سيلين كمت من مكاني ونسيت مريم ركضت على غرفتنه فتحت الباب لكيتها كاعده بالكاع وتملخ بشعرها وتصيح..

سيلين : راح يجون راح ياخذونه راح يجون..

رحت لزمت ايدها وخرت شعرها عن وجها وحضنتها.

سلين : راح ياخذونه امشي نطلع راح يجون.

ايفين : شمدريج منو كال ..

سيلين : خابرتني هسه كالت جبت عمامج ساعه وهمه يمنه ..

ايفين : حبابه سكتي الله يخليج هسه تسمع نرمان وتجي شتكول عليج ، ذاك اليوم سمعتيها كالت راح اروح مداكدر اقره.

حجيت هيج علمود بلكت تستحي وتبطل صراخ.

ايفين : خطيه مريم خافت منج ولج اثبتي منيلج هاي القوه ، خرب حضي خرب بيومج تماره منخلص منج وين موبايلج خل ابرد كلبي بيها التفتت ادور عليه لكيته مفلش..

لهناك وانفتح باب الغرفه التفتت عمو ادهم ضل صافن علينه انتبه لمريم واكفه على صفحه خايفه اخذها شالها وطلع سد الباب وره شويه اجه...

ادهم : ايفين روحي فوك يم مريم بلا امر عليج.

وخرتها من حضني على كيفي نامت بالكاع وحضنت روحها تشهك وتبجي..

ايفين :مريم بيت ايمن ..

ادهم : اي يمها نرمان بس عدها دراسه خاف تلتهي عنها وتنزل تجي هنا.

ايفين : ليضل بالك راح اروح..

( ملاحظه الحوارات االي راح اذكرها هسه اني ذاكرتها بدايه القصه رجعت ضفتها حتى تعرفون هذا المشهد شوكت صار وليش، وب

يه اضافات علما اني ما ماخذه من حق البارت )

طلعت ايفين وهو اجه كعد بمستوايه وكال...

ادهم : باعيني شو رفعي عينج سيلين مو احجي وياج ..

باوعتله عيونه مليانه قهر وقلق عليه همس بصوت دافي...

ادهم : صح الصار صعب وجبير بس يهون وانه وياج وياج بكل خطوه لحد ما توكفين على حيلج..

كمت اصيح...

سيلين : ماكدر اوكف على حيلي اني انسانه ضعيفه عديمه الشخصيه وهذا اللي وصلني لهذا الحال كل مره اوكع وارجع اكوم واصبر بنفسي وتالي ارجع اوكع من جديد بس هلمره وكعتي قويه تهد الحيل....

ادهم : لا غلطانه انتي قويه واكو قوه بداخلج بس تظهر حسب المواقف اصلا انتي انسانه ناضجه بالنسبه للبنات البعمرج ...

ماعرف جان يحجي صدك لو يريد يمتص غضبي لو يرجع ثقتي بنفسي...

سيلين : مو قويه اني مو قويه اني ضعيفه فاشله اني ضعيفه هيه خابرتي هسه وكالت انتي فاشله ...

ضليت اردد بالكلام واباوعله...

عض شفته وهز راسه مستحسف على الصار بيه وعلى انهياري..

جنت منهاره وبس ابجي جسمي كله يرجف ...

ادهم: ليش البجي ياعيني مو فطرتي كلبي ..

سيلين : اني ليش عايشه شنو الشي الزين بيه شو حياتي واني وكلشي يتعلق بيه عباره عن صفحه سوده مصخمه..

ادهم : ظروفج جبرتج على بعض الشغلات وانتي سباعيه وعرفتي شلون تتجاوزيهن وتحمين نفسج واختج بنفس الوقت ، صدكيني بيج صفات هواي حلوة لو بس تحاولين تحبين نفسج جان هواي امور اختلفت..

سيلين : هو اني اريد اكره نفسي علمود ابطل غرور غروري بنفسي وكعني بهواي اخطاء خسرتني شغلات لاتعد ولا تحصى ومنها هواي تقدمولي ورفضت عبالي اكمل دراسه ويتقدملي الاحسن..

صفن بوجهي بعدين حجه بهدوء..

ادهم : اضافه للغرور عندج هواي صفات هدوئج ، طيبه كلبج حنيتج على احبابج ، بداخلج مزيج من الصفات الحلوة وكلها بنسب متفاوته شي يشيل شي كل صفه عندج تظهر بموقف معين وساعتها تنطين كل موقف حقه بس انتي متحسين على نفسج لان صايره عباره عن كتله سلبيه ، بس المقابل يحس بيج ويشوف اللي انتي ماشايفته وانعمت عيونج عنه...

سيلين : انت شايف انسان ضعيف يقوه بمرور الايام اني مشايفه ...

حجيتها واني مصدومه بيه عبالك يعرفني من سنين وعايش ويايه ..

مسح على راسي بيده نزل راسه بمستوى راسي وهمس قريب اذني وهاي اول مره يسويها ..

ادهم : كومي غسلي وجهج وتعاي نحجي يلا حبابه ...

وكف مدلي ايده رفعت عيني المليانه دموع مديت ايدي جانت ترجف لزمها حسيت بحراره ايده سرت بجسمي اول مره رجال يلزمني خجلت كلش ....

مشى ومشيت وراه وعيني على ايده الشابكه اصابع ايدي ، جانت حاضنتها بقوه بحيث دمرات جفه بارزات..

غسلت وجهي وبعدها دخلنه للمكتب مالته اشرلي على القنفه اكعد ، كعدت ، راح جاب مي وقدمه الي اخذته بيد ترجف شربت شويه وخليته على الطبله...

نزع سترته وخلاها على الكرسي واجه كعد على القنفه المقابيلي خله رجل على رجل وكال ...

ادهم : ارتاحيتي نحجي..

اشرت براسي اي..

ادهم : تمام ، باعي سيلين انتي شخصيتج تحسيها ضعيفة مو صح هذا جان نهايه حديثنه ..

سيلين : صح؟

ادهم : شنو السبب الخلاج هيج تعتقدين..

سيلين : كلشي اسويه افشل بيه ما فد يوم نجحت بشي ابسط مثال دراستي مكدرت اطلع معدل بيه حظ ويمكن حتى معهد ميدخلني.

ادهم : لحظه نحلها وحده وحده عوفي موضوع الكليه هسه الف طريقه الها بس تعاي نعالج داخلج بالاول انتي داخلج يحتاجله صيانه بعدين نجي للعقل نغذيه بافكار صحيحه يلا ذاك الوكت ندخل العلم ونتطرق لأمور الدراسه..

سيلين : وهاي شلون حلها فهمني..

ادهم : يمج الحل كلشي بيدج انتي تكدرين تبنين نفسج من فشلج..

سيلين : عمو انت تضحك عليه لو شنو تره اني دمي محروك وكاعد ارجف وانت مدري شتسولف..

ادهم : انه ملاحظج من خلال كلامي وياج تردين تصيرين واووو ومن كلها كامله وماعندج اي خلل بحياتج وتحاولين تثبتين لنفسج انتي صح وانتي كامله مو؟؟

سيلين : صح ..

ادهم : بس ماكو هيج شي بالحياه ، ماكو انسان كامل فكره الكمال شيليها من راسج ، لتضلين تفكرين اسوي هذا ما اسوي هذا اركز على هذا اتجاهل هذا ، لازم اسوي فلان شي وابذل بيه جهد ومجرد تفشلين ترجعين للصفر وهذا اللي كاعد يتعبج السعي لتحقيق الكمال يتعبج يسلب منج الراحه راح تشوفين نفسج عباره عن نكره وكل متسوين شي تفشلين بيه وبهيج تزداد اخفاقاتج بالحياه ..

سيلين : عمو اني مو اريد اوصل حد الكمال اريد انجح بشي واحد اريد فد يوم اتوجه على شي ويكمل شنو اسوي يصير عكس منين ما التفت تنسد بوجهي فهمتني..

هز راسي مبتسم .

ادهم : فاهمج ميحتاج افهم ، باعي انتي شايفه الحياه عباره عن وحش جبير تخافين تجازفين بشي لا ياكلج ويأذيج لهذا دائما ضاله بمكانج واكفه جازفي بتجربه وكولي انه راح اسوي هذا الشي وما اسعى للكمال بيه صار صار ما صار اعيده مره ثانيه وعاشره الى ان انجح ،

انتي مجرد ما تشيلين من راسج فكره الكمال وما تستسلمين للفشل ، ودائما رددي فكره الكمال هي العدو ، بهيج راح تجتازين هواي امور هاي اولا ثانيا راح تبدعين واخر شي تشوفين ن

فسج نجحتي وتوفقتي ...

سيلين : عمو الكلام حلو وسهل بس الفعل صعب وانت احسك عايش بعالم وردي..

ضحك حك شعره وبعدين حك لحيته ...

ادهم : كلنا عدنه فيض من النصائح مرات تكون نابعه عن حسن نيه اجي احجيلج وانه ما اقصد شي ومرات تكون النصيحه مقصوده ،

نصيحتي اليوم بيها قصد وقصد كلش جبير انتي خليتي لنفسج قواعد وكاعد تمشين عليها وانه بنصيحتي الج وكلامي وياج جاي اكسر هاي القواعد واهدمها لان القواعد احنه نخليها ونكبرها ونخليها خط نمشي عليه بقيه حياتنه لكن هذا اكبر خطأ ليش لان القواعد يجب ان تكسر كوني فاشله ب اتباع القواعد تمام وهذا اول درس اعلمه الج بخصوص الثقه بالنفس وتطوير الذات والمجازفه بخوض تجارب احنه نريد نسويها بس مترددين ....والباقي شويه شويه نتعلم سوه وراح تلاحظين الفرق بعينج شلون تتغيرين وتصيرين اقوة ..

دنكت راسي وهمست..

سيلين : ما راح تلحك تعلمني اي شي..

ادهم : لا الحك والبالج شيليه محد يتجرأ ياخذكم منا واذا صارت صدك ذاك الوكت الي تصرف ثاني وياهم كومي اكلي وارتاحي وممنوع تبجين ولا تأذين نفسج مره ثانيه هلمره حجيت وياج بطيب مره ثانيه اغير اسلوبي وياج لتخليني اتخذ طريقه تضوجج.....

الفصل الثاني والعشرون من هنا 

شكرا لزيارتكم عالم روايات سكيرهوم