رواية هشاشة قلب الفصل الثالث والعشرون بقلم العباديه
يفتشون عنهُ في هاتـفـي
في حسابـاتي و قصائدي وبيـن سطوري.
ولأنهـم لا يعرفـون كم أحبه !!!
لَــن يجــدوه ،
فأنـا أخبئهُ جيداً بين طيات سجادة الصلاه . .
هُـنـاك . . . مَـع كل أشـيائـي الثمينـه .
مـع كُل أسـراري التي أستودعهـا عند الله ...!!
#نوران_الحسيني
~~~~~~~~~~~~~~~~~~~~~~~~~~~
ثُرىٰ . . .
إلتفتت عليه ساره تباوعلي بإستهزاء وتحدي .. رجعت باوعت للبنيه كالتلهه :-
- بمناسبة خطوبة ثُرىٰ وماهر !!!!!!!
ظليت مصدومه وأباوع بشكلهه فاتحه عيوني !!
شنو هالصلافه هاي ؟؟
تريد تشوه سمعتي گدام لقاعه ! وثُرىٰ وماهر !!.. ماهر حاف لا دكتور ماهر لاشي.
النوب كلهه كامت تصيح "مبرروك" وظلو يصفگون ويضحكون عبالهم صدگ !
متت من المستحه وإحمّر وجهي ! هسه شيكولون عليه واستاذ ماهر شيگول هم !
اخذنه محاضرات واني مااگدر اطلع من القاعه وجهي مااطلعه من الفشله .
خلصتهه كله كاعده بالقاعه ومدنگه اكتب جذب خاف وحده تحاجيني .
صار وقت محاضرته دخل هوَ .. سلم ع الطلاب وظلوا يباركوله !
إستغرب وسأل طالب :-
- شنو عليمن تباركولي؟؟
- دكتور غير خطبت
استغرب وعكد حواجبه .. أشر على نفسه مصدوم
- آني؟؟
- اي دكتور مبرووك
عكد حاجبه وباوعلي . دنگت مااريد اشوفه .
شرح المحاضره ومايباوعلي بس عاگد حاجبه ويهز برجله بهدوء إهتز گلبي وتأرجحت روحي بحركاته الهادئه .
كمل شرح المحاضره وطلع .. بقه شويه يلا اجتني بنيه صاحتني علمود يريدني بمكتبه .
رحت دگيت الباب ودخلت .
كال :-
- شنو موضوع الخطوبه؟؟
تنهدت
- ساره
- شبيهه ساره؟؟
- توزع چكليت وتگللهم خطوبة ثُرىٰ وإستاذ ماهر
- شنوو؟؟؟ منو موصللهه؟؟؟
- مو موصللهه ع القديمه. لا تگلهم جديده هسه همه مخطوبين !
- شلون سالفه هاي يعني راح يشوهون سمعتج إذا عرفوا ماكو خطوبه وراح تصير العيون علينه اني وياج
- اي
- بسيطه ساره .. باجر تلكيهه ماموجوده
وكف يريد يكوم واني انتفضت :-
- لا لا ليش شتسويلهه
- اني اتصرف وياهه شلون إلهه جرأه هيج تسوي؟؟ اشوفهه ماهر منو
- لا استاذ فدددوه خليهه رغم خباثتهه بس خطيه
صفن وكال :-
- مو راح يشوهون سمعتج
سكتت ودنگت .
فرك وجهه حيل بحيث صار أحمر ونفخ انفاسه احسه گوه عليه نطق هالكلمه !
- احمم راح اتقدملج
فهيت مستغربه
- هاا؟؟
عصب ونتر بيه :-
- راح اتقدم ثُرىٰ ررااححح اتقددم يعني متسمعين ؟؟ من هسه كولي موافقه لو لا حتى ماإله داعي اتقدم وأهين نفسي مرة اللخ
- غير لازم افكر وهيج شي يعني
- ها اي بكيفج مااجبرج اني. بس كوليلي قبل لااتقدم لان مامستعد اواجه الرفض
هزيت راسي بــ(إي) داخلي فرحان وطاير فرح .. راح اوافق معقوله واصير مرته ؟!!
هاي هواي عليج ثُرىٰ والله راح اطير من الفرح اصلاً اني موافقه بس احب شويه اتفيك وهم حتى مايگول ماصدگت وبسرعه وافقت .
بقيت اسبوع كامل مامرجعتله الجواب .. وكلما يدخل يشرح المحاضره يباوعلي بنظرات تفحص عود شنو اجابتج.
ادري تريدني اگلك اجابتي غير المفروض هوَ يسألني !
اليوم دخل للكليه واني امشي وراه بس هوَ مايدري بيه .
طلاب هواي كدامه يمشون لان وقت قليل ويبلش الدوام .
ظليت اضحك واني اتفحص ملامحه من وره وهيبته وكشخته ومشيته يبوو يچتل .
ردت اخذ من عنده ملزمه لان اكو وحده من النطانياهن بيهه نقص .
يمشي واني وراه اريد الحگه امشي بكل سرعتي ومالحگته.
مو رجلين تگول تيل كل خطوه يشبخ مترتين.
بدت حركة رجليه ترجع لوره وتبطئ واني اشوف الگدامه تمشي !!
ظليت ابلع بريقي مصدومه ! الدكتوره نفسهه فتحلهه باب مكتبه يضحك ودخلهه وسد الباب !!
ظليت صافنه !! شنو هاي يضحك عليه شنو؟؟
تشعوطت من الحرگه !!
ظليت ملازمه باب مكتبه ماوخرت منا لمن طلعت تضحك وهوَ هم !!
رغم محد يضحكه غيري بس وياهه يضحك !
مـد إيده إلهه يصافحهه !! هيَ ظلت صافنه تباوع بوجهه وترجع تباوع على ايده .
ارتبكت وضحكت خجلانه نصت راسهه ومدت ايدهه مستحيه صافحته .
مبينه من الناصريه لان مانتصافح احنه . مادام استحت يعني منا من الولايه .. هوَ عباله مثلهم عادي عنده خله البنيه ترتبك طلع ساس البله هوَ عمي البنيه مگروده .
راحت وراح يمشي وياهه الا يوصلهه لباب الكليه عشتو يخاف عليهه.
خلاني انشال وانرگع ! متت من الغيره .. شخص متطرف الرجوله يرهق إنوثتي وينهكها .. يشعرني بالعجز مقابيل تصرفاته المتناقضه تبعثرني وتخليني بحيره .
رحت للقاعه ودز عليه .. رحتله واني ميته منه بس اشوفه افترسه من غيرتي .. لگيته كاعد مبتسم ع الكرسي إبتسامته تلون الأنهار وتلقح الأزهار تخلي كل صلب بداخلي ينهار وتحل مكانه مشاعر من حرير .. نظرتله بنظرات حاده كقذيفة من لهب .
باوعلي عاكد حاجبه من شاف نظراتي .. أشرلي اگعد ع الكرسي .. بقيت واكفه مااهتميت لنظراته .
خزرني ودار وجهه متفاجئ .
همس :-
- شبيج؟
رديت :-
- مابيه شي
- ها تمام .. بس ردت منج الملازم والمحاضرات مال المرحله الاولى إذا عندج .
قوست حواجبي مسته
زأه . نترت بصيغة سؤال :-
- للدكتوره؟؟
صفن بنظراته عليه وضحك .. شبك حواجبه وسأل :-
- قطر؟؟
اني عبالي يضحك عليه .. رديت بصيغة مستهزأه ومملؤه بالسخريه :-
- لا المغرب
خزرني وفتح إيديه .. دنگ راسه بس عيونه بعيوني وبيهن صيغة سؤال ونظراته عبالك تگلي شنو هاي ؟
دنگت كال :-
- شتكولين للأردن مو احسن ؟ هــه تستهزأين حضرتج .. حبابه هاي الدكتوره اسمهه قطر قطررر قطررررر
همست :-
- اي والله فهمت بس إذاني شويه اريدهن احتاجهن للسمع
- لعد الاذان نشم بيهه مثلاً هـه .. المهم هسه عندج لو لا؟
- اي عندي موجودات
- لعد باجر جيبيهن
- صار وبعد
- سلامتج هـه
هزيت راسي وطلعت فايره اعصابي .. مبارك بس هاي الفالح بيهه بس يحرگ بگلبي. وخلصهه عليه هه و هه !
عود صرت خطيبته واريد اخذ ميانه هالله صدگ غبيه .
رحت للقاعه .. وبوقت محاضرته ظل يخزر بيه وماگومني رغم كتلت روحي اريده بس يگومني .. عين وعماد ماگومني .
گعدت بالستيج مالتي ودرت وجهي على جهة الباب وظليت اباوع للرايح وللجاي مامنتبهه لشرحه . أشعلت فتيل قلبه بنار الإهمال .
حطيت ايدي وحطيت راسي عليهه مثل النايمه وصافنه من الباب .. حسيت بخياله اجه وسد الباب مال القاعه واني اباوع !
زفرت نفس بعصبيه .. شهالخباثه هاي .
ظل يتمشه والبنات كامن يصيحن :- استاذ اختنگنه فدوه افتح الباب
باوعلي ورفع حاجبه
- لا ماافتحه
ذني ظل يتعايرن وكله اوي اختنكنه .. انجبر يفتح الباب واني ظليت مغندبه وجهي وضايجه .
اجه وگف يم ستيجي وهمس :-
- لتضوجين هسه اكومج
رفعت راسي من على إيدي فرحت بداخلي بس ماباوعتله .. ظل يفتر بالقاعه ويشرح .. گوم ساره شرحت شويه وكعددت كمل المحاضره وزاد وقت واني ماگايمه .. خلاني مثل المزهريه ولا عبالك موجوده .
كال :-
- منو يگوم يعيد المحاضره من البدايه للنهايه؟
ظل يباوعلي . رفعت ايدي لما حسيت العظم إنكسر وهوَ ماكومني يحرگ بگلبي ويخبث .
راح وكوم ساره خلاني اتشعوط .
ساره گامت تلبلب تلبلب شرحته كله وهوَ يهز براسه واحسنتِ مااحسنتِ عبالك مقابيله نبي مو ساره.
كملت وگاللهه :-
- على هذا الشرح الج 3 درجات على المعدل
هه كاتل روحك .. 3 درجات متعجب بيهن الناس تنطي 10 وهذا متعجب بالـ3 .
ساره كيفت مو 3 عبالك منطيهه درجه كامله تهي بهي .
اصلاً لو مايريد يحرگ گلبي ماينطيهيا.
ثاني يوم هم بمحاضرته ماگومني .. واني اتشعوط كمت ماارفع ايدي.
كال سؤال كلش صعب كلهه ظلت تفر بإذاناتهه اني عود اعرف كتلت روحي رافعه ايدي بس اني بالقاعه فرحانه كومني وطلع مو هوَ الجواب وجوابي جان تافه .. باوعلي بإستهزاء وكال :-
- صارلج ساعه كاتله نفسج وهذا جوابج؟؟ هـه دگعدي اگعدي !!
ظليت موسعه عيوني على قوتهن حسيتهن يريدن ينفجرن .. شهالرزاله هاي همزين محد ضحك لان يخافون منه والله لو ضاحكين مايعه روحي من الفشله .
گعدت ووجهي ددددم صار احس بخار يطلع من اذاناتي وخدودي .
بعد مارفعت عيني عليه .
كال سؤال وهالمره اليجاوبه اله 10 درجات .
لاأول مره بتاريخ حياته يسويهه ماينطي 10 اقصى حد اله 3 .
الطلاب كامت تتكاتل تجاوب صح وغلط .. كام اليكول اجابه غلط يضحك ويكلهم " لا مو هاي الاجابه "
من شفته مايرزل رفعت ايدي وكتله جوابي وهم غلط. باوعلي رافع حاجبه وابتسامه على شفته
ظلوا الطلاب يجاوبون وهوَ يكلهم لا .. اخر شي كال :-
- راح احسب للتلاثه ويسقط حقكم واكول الاجابه
ظل يحسب كال :-
- واحد
اني افكر افكر وعقلي صايره بيه دائرة تحميل
- اثنين
بعده ماگال تلاثه واني طفرت بجوابي .. كتله الجواب هوَ كلمه وحده .. التفت عليه وضحك أشر بإصبعه علامة (اوكي) كال :-
- صحيح جوابج
فرحت لان 10 تطيرني للسما شكبرها بالنسبه إلي ومنا درجتي شلونهه عنده اكيد تفيدني . باوعلي بخبث وكال :-
- بس ماانطيج ولا درجه
انصدمت وشهكت :-
- يييححح ليش استااذ
- لان جاوبتيني من مكانج مااستأذنتي ورفعتي ايدج وگمتي گلتي الاجابه
- لا والله مايصير هيج المهم اني كلت اجابه صحيحه
- بس ماينحسب
واحد صاحله :-
- ههههه دكتور كول مااريد انطيهن
ايييييي والله ريّح كلبي وقصفه هم . خزره و كالله :-
- لا اخليهه عبره إلكم حتى بعد محد يجاوبني من مكانه
كتله رافعه حاجبي يضحك عليه شنو :-
- لا استاذ اليه نص الدرجه هنه 10 إلي 5
- ههه تمام يابه اكلتوني بگشوري
لوتي يريد يلهمطهن عليه عباله ثُرىٰ هينه.
بنفس اليوم بالليل دزلي رسائل :-
- ثُرىٰ شنو اجابتج؟؟ مليت الانتظار كولي لو إي لو لا؟؟
مارديت عليه بأي كلمه .. رجع دز
- اذا تستحين ومتكدرن تردين عليه ..حتصل عليج اذا إي ردي وابقي ساكته وإذا لا ارفضي المكالمه تمام؟
المستحه طگني صفح مارديت .
دز :-
- ع الاقل ارسليلي بس ملصق اوكي
دزيتله الملصق بس شافه رأساً إتصل.
ظليت شويه وبعدين رديت ظليت ساكته وهوَ كال :-
- ههه شبيج يابه مستحيه قابل آكلچ
سكتت. ظل ساكت وسحب نفس براحه .. ضحك وهمس :-
- صوت أنفاسج المتسارعه كلش كافي
يبوو شصار بيه من المستحه اني ويهي مال غزل.
سديته منه ووجهي صاير دم. راح يصير صدگ خطيبي يممه اني استحي شلون بيه.
يلا الاستحه من بنت عمه ماجاب منهه ولد .. عليمن مستحيه هيَ هاي سنة الحياه احم.
ثاني يوم من داومت خلصهه كله نظرات ويباوع بيه ويضحك وكلساع يرفعلي حاجبه .. لا لا جذب هذا نفسه ابو الرزايل لو بدلوه؟؟
من طلع من القاعه دز عليه.. رحتله لگيته واگف بباب مكتبه اول ماوصلت يمه كاللي :-
- اليوم العصر الوالده تتواجد يمكم تحضروا
هزيت راسي منصيه وخدودي معطبات .. ضحك بصوته الرجولي وهز ايده
- عود تستحي ههههههههه
النوب مايكعد راحه يربي يبسمر بيه .. ضحكت وفلتت من يمه لو باقيه لحظه گابه نار من الخجل .
رجعت للبيت طايره وفرحانه .. گلت لتقوى ولمروه واتشمت بمروه لأن تگلي لاتتعالين بأحلامج .. هسه اني كسرت خشمهه.
- اگلچن گلن لاأمي ع الخطوبه اني استحي اگلهه
تقوى.. اني اگلهه شتردين بعد
مروه.. كلللوووش راح ارگص بخطوبتج
حطيت ايديه على وجهي عود خجلانه وذني يضحكن عليه .
كتلهن مايگلن لنهى خليهه آخر من يعلم تنصدم من يجي ابو الرزايل يعزمهه.
طلعت تقوى گالت لاأمي .. خمس دقايق واجت امي كالتلي :-
- ثريا انتِ مقتنعه؟؟ تره عيشتهم تختلف عن عيشتنه وشفتيهه امه
- شعليه بإمه قابل متزوجتهه .. اني متزوجته هوَ مامتزوجتهه
- بس بعد يومين تتعيرين
- لا هوَ مايعيرني وولا يلمحلي اصلاً بس أمه واني اعرف اتصرف وياهه
مروه.. ثريا گولي تجلطين المره
- بس اول شهر ونزفهه للفتحه الثالثه
تقوى.. عزززاا ولج مصخمه شتردين تسوين
- ياااا هههه صدگتن شأسويلهه قابل هنه كم قصفه وبسموره شمسويه عمي
امي كالت :-
- ولج ثريا تريدين تجلطين المره؟؟
- لا عمي شبيكم كلشي مااسويلهه أُم القاسي هاي
- يلا گومن تحضرن من هسه اريد البيت تحديث إصدار اول
كعدت وتركنت
- اني ماعليه خطوبتي مو اروح اشتغل
تقوى.. اصلاً انتِ المفروض تكربين لان احنه ماعلينه انتِ المستفاده
- اشوفج نظفتي بخطوبتج هه دروحي روحي توكلي شوفي شغلج
راحن ينظفن گلبن البيت گلاب واني گاعده اسوي اقنعه واختارلي فستان ألبسه .
صارت الساعه 3 الولد طلعوا واني رحت بدلت استعداد لجيتهم .
لبست فستان طويل مخصر لونه بصلي وبيه ورد ملون والصدر مالته بيه ورده بيهه ريش ناعم .. ضفرت شعري فرنسي وحطيت مكياج خفيف وگفت وأدز لروحي بوسات بالهوى ع المرايه .
- خايبه شنو هالجمال يممه فديت
تقوى.. گومي الباب يندگ
- يححح صخام شأسوي هسه شأسوي
تقوى.. إركدي إركدي خل تدخل ام ماهر وانتِ قدمي الضيافه
- يلا خوش تره بلشت اتوتر
- صدگ چذب هاي ثريا لو مبدليهه
- شبيج وياي غير عود مستحيه وكذا
- ههههه رايحه اني
راحت واني شو رجليه كامت ترجف وبطني كامت تخبط . مامصدگه ابدد احس هذا حلم وهسه شويه وينتهي !
رحت للمطبخ اخذت الضيافه ودخلت .. لكيت أم ماهر گاعده ويمهه موج وأم وليد وياهن . سلمت وردن السلام
اول مارفعت راسهه سميرانو وشافتني همست :-
ام ماهر.. يااا شو مبدله ومجهزه نفسهه عبالك تعرف بجيتنه الله يستر اخر جيل هذا !!
وگفت بمكاني من سمعتهه احس رجليه ارتخت .. رجعت عدلت وگفتي ورفعت راسي اضحك تمشيت إلهه وحطيت الصينيه مقابيلهه مااخليهه تأثر بيه ولا تنغص فرحتي .
قدمت الضيافه كدامهن وگعدت يم امي .. ولاتعرف تسولف وتجامل رأساً فتحت موضوع الخطوبه وعبالك هم وتريد تخلص منه ووجهه مغندب مايگصه الطبر .
ام ماهر.. تره من هسه اگلكم احنه بعد سنه ونرجع لبغداد !!
أني انصدمت وامي هم .. باوعتلي ورجعت باوعتلهه كالتلهه :-
- احنه مانعرف بهذا الحجي
ام ماهر.. اي وهسه عرفتو يعني تقبلون لو لا؟؟
امي جاوبتهه :-
- حجيه غير نشوف اخوان البنيه وناخذ رأيهم
انتفضت بفزع
ام ماهر.. حجِيه شنووو اني حجِيه ؟؟ هذا الشباب كُله وتكولين عني حجِيه؟
امي باوعت ضحكت وانطتهه على مايهه
- لا انتِ الخير والبركه اني من شفت جمال ولدج كلت اكيد طالعين على امهم صغيرونه وحلوه
هيَ صح حلوه بس مو صغيرونه
نشنشت وظلت تسولف وي امي وفررحانه طايره من الفررح لان امي كالتلهه صغيرونه .. مصدگه روحهه هاي .. عود بكل عقلهه تحجي هههه
اختنكت حيل اريد بس اطلع مو طايقه ابقه يمهه اكره الناس المتصنعه مااحبهم ابد.
خليت وطلعت .. ظليت ارفس ضحك بالمطبخ شنو هاي ياربي مو بشر كااارثه سوده.
راحو واجت امي ميته ضحك وذني يحششن عليهه .. عمي مره احفادج تزوجو وماكاعده راحه خوش والله .
اجو الولد بالليل وامي كالتلهم .. اسماعيل باوعلي بنظرات شك واني رأساً اطفرر .
اكيد شك بيه اني منطيته موافقه لان مايتقدم مره ثانيه ويذل نفسه اذا مايعرف وعنده جواب اكيد اسماعيل هم مو غبي ويفكر.
اسماعيل.. مايحتاج يسأل لان نعرفهم وسألنه عليهم من اجو لنهى والنعم منهم بس لازم شويه تاخذولكم فد يومين يلا ترجعون موافقه لو رفض وهذا الشي يرجع لثريا
- يمه تعيش ببغداد
اسماعيل.. شنو شنو لا ليش ببغداد غير شالو واحنه وين نكدر نفارگ ثريا
- هيَ إمه كالت ببغداد
ظلوا يتناقشون واحد يرفع وواحد يكبس وامي تدري بيه موافقه بس متردده من ناحية اعيش ببغداد .
اجتني للغرفه كالت :-
- ثريا تره ببغداد. انتِ مو تكولين ماافارگ اهلي وهسه قسمتج ببغداد شلون؟
- يااا ماما چا هاياهه بغداد قريبه
فتحت ايديهه وعود تقلد عليه
- اي اي قريبه جيرانه اصلاً مادام السالفه بيهه مهوري
يااا يااا عزه هاي امي هيج تحجي ولا اصدگ .ولو هيَ حشاشه درجه اولى .. بس شصار بيه ييبوو متت من الفشله
ذني شصار بيهن ماتن ضحك وناصبات عليه كلساع وكاللي قريبه واني ميته خجل.
يَا حُـبُّ: مَن أَنشَأكَ فِـي
قَـلـبِـي وَأَوسَـعَ مَدخَـلَك ؟
مِن أَينَ جِئْتَ، وَكَيفَ جِئْتَ ؟!
وَمَـن بِرُوحِـي أَنزَلَك؟
مَا شَـكلُ خَاتِمَـةِ الهَـوَى
إِن كَـانَ هَـذَا أَوَّلَـك ؟
~~~~~~~~~~~~~~~~~~~~~~~~~~~~~
ثُرىٰ . . .
بعده توه اكل وسمعنه.. الباب الرئيسي انرگع وصوت عياط !!!
إنفتح باب المطبخ بقوه ودخلت علينه مره سمينه بيضه ووجهه ملغلغ لحم بس لغدوهه بيهن طن لحم .. فحطانه وتصيح واخذتنه بصياحهه وتهدد ووراهه جنات يمكن امهه
- للللككك مااهرر تخطببب وتعوف بنتييي ماكللت بنت خالتييي خطيييه اشوه سمعتهه
ام ماهر ركضت تهدأ بيهه تكسر وتجبر
ام ماهر.. فدوه رحتلج خيتي اذا بنتج مدري شلونهه شو اگُعدي ارتاحي مو زين على قلبج
ام جنات.. ليششش لكك ليششش
جنات.. ييووم هوَ خانني والله من زمان لاحظته اني يباع عليهه .. وساحل نفسه سحل
اني صافنه وماهر مصدوم يخوزر بإمهه ويخوزر بيهه .
اني ظليت اباوع عليه وارجع اباوعلهن .. جنات كامت تلعلع وي أمهه وهوَ يضحك بأستهزاء ويهز بإيده .. هنه تخبلن من حركاته مستفزز إلى أبعد حدد .. مااشوفلك إلا جنات متوجهه عليه تركض تريد تفترسني .
اني بحركه سريعه ختلت بظهره ولزمت بقميصه من وره .. وصلت يمنه تلاگف بإيديهه وتشمر تريد توصلني .. اني سويت روحي فقيره وماامد إيدي وخايفه عود .
تشاگف بإيديهه تريد تلوحني وهوَ يدفع بيهه .. ولا اهتزت شعره بيهه والصلافه واللسان ماشفت مثلهن بحياتي ..
كلما تريد تتقرب يمي اقوي قبضة إيدي واشربك إصابعي بقميصه . احتمي بيه وهوَ من سويت هيج ولاحظ خوفي بحركاتي اللاإراديه ظل يزيد بحمايتي. بس هيَ ولا وخرت وولااهتزت اصلاً.
آخر شي سمطهه سمطه بووويه وعلي لو اني سامطنياهه شرط اسبوعين بالمستشفى .
اجاهه الراشدي يههههف هفف نومهه بالگاع وهوَ عاط بعلو صوته الرجولي الخششن :-
ماهر.. لججج نذذذله ساااتر عليجج اني وساااكت گوليلهم ليش فصختت كولليي لو بيج خير احجييي خل يعرفون المستور شنووو .. جايه تغلطين بكل عين صلفه؟؟ .. وربج إذا ايدج النگسه تتقرب على ثُرىٰ اكسرهه الجججج ياااااعاااررر
يييمممه شصار بيه كمت اطگطگ من الخوف .. هاي شلون يضرب يمه متتت من صوته وعصبيته المُفرطه.
هيَ بقت على نومتهه بالگاع وامهه وامه خنسن والجو هدوء بس صوته يعيط رج البيت رج.
عاط..
ماهر.. كووممي لتمثلليين كوووميي اطلعي بره مااطيق شكلج
ماكامت واصرت على نومتهه .. دنگ عليهه سحبهه من إيدهه وكومهه
ماهر.. خليتيني امد ايدي على مره بسبب صلافتج يااعاررر ... يلااا برررررره
ام ماهر.. ماهر تطرد بنت خالتك؟
ماهر.. اطرددهاا واطررد عشيرتهاا .. وحده صلفه ادبسسززز بدون تربيه. بنت الشوارع متسوي السوته
ام جنات.. اي غير تفهمنه شسوت .. اصلاً انتَ الصوج منك عايف بنتي ولا كأنما خطيبهه تطب وتطلع ونظرات وابتسامات ويه طالباتك وبالجذب ماتذكرهه بشي لا مخابره لا سؤال
وسع عيونه مصدوم وخزرهه
ماهر.. ااشششش لهنا حددددج كلشي ولاتدخلين طالباتي ابدد مااسمحلج ماااسمممح
ام جنات.. غير انتَ ماتهتم بجنات وماتسأل
ماهر.. هه هذا الاهتمام كله ومااسأل؟؟ حطيتلهه القمر بإيد والنجوم بإيد وماصار بعيننهههه وفوكاهه تننكرر نسيتيي الطلعاتت مو اجي للبيت اخذهه كدااامج لووو لااا مااخلي مكان ماافرهه بيه هاي غير الهداايا مااعيركم بس خلو نقطة حـَد كلشي وإله حددود !!
جنات.. انتَ خنتني !!
ظل يخوزر بيهه ورفع إصبعه على شفته وعيونه صارن ناار
ماهر.. اششششش لتحجين احسللج وتظلين تطلعين إتهامات في سبيل تبررين نفسج .. حچايه وحده هسه اوضح كلشي واخليج تطمين نفسج
ام ماهر.. ماهر إحجي ليش فصخت
ماهر.. ماااااحجييي ماااحجججي
جنات.. اي لان الصوج منك
ماهر.. ههههههههههههه مو مااريد احجي واذا بقيتي لحظه بعد اكتهن كلهن ف اطلعي بره احسللج
جنات.. مااطلع مااااطططللعع
ركض عليهه بإيد وحده سحلهه وهيَ مشبثه بالگاع .. گومهه بقوته حسيت متنهه انفصخ .. سحبهه مثل البهيمه وشمرهه بره من باب المطبخ وقفل الباب وهيَ ظلت تصرخ .. دخل عاط بموج
ماهر.. شدددخلللههااا
موج.. ااءء الباب بيه خيط سحبته ودخلت
ماهر.. إإلغيييه انزل الگاااه ماكووو
موج.. اي اي
خله.ومشه صعد لفوك !
اني بس صافنه واشاهد بصمت
امه وامهه وجهولي نظرات الاتهام وهدن عليه
ام ماهر.. كله بسببج يافگر
- ييااااء اني شعليه؟؟
ام جنات.. تكول جنات عدهم علاقه صدك هالحجي سميره
ام ماهر.. اي مبين لان معقوله ماهر عاف البنات من مستواه واخذهه ؟؟
ثُرىٰ.. ماعدنه لاعلاقه ولا شي هوَ استاذي شافني وتقدملي
ام جنات.. لج ذني كلهن مارات عليه
سكتت.. احس نفسي غريبه بيناتهن وين راح وخلاني ؟
بهالاثناء نزل وجهه بعده معصب وعاكد حواجبه وعيونه تخزر بنظرات غاضبه
عاط بيهن
- ثُرىٰ معليهه لحددد يدخللههه ولا عدنه علاقه ولا شي أطهر منهه مشفت اني حبيتهه وخطبتهه لان كلهن حاويتهن وخليكم بعيدين عن حياتي مفهووم.
ام جنات..
اي طبعاً لعد شتگول قابل تشوه سمعة خطيبتك بس جنات حاضر تشوه بسمعتهه لان فقيره
ماهر.. جناات فقيررره؟؟ هـه اذا جنات فقيره لعد منو المشيطن اني
خلاهم وتوجه عليه سحبني من إيدي ومشه .. ظليت امشي وياه .. طلع لبره ووكف يريد يصعد بالسياره ظليت واگفه .. باوعلي وكال :-
- متصعدين شمنتظره
- منتظره تشرحلي كلشي
- شنو شأشرحلج؟
- كل الصار جوه
وسع عيونه وعكد حواجبه .. رفع حواجبه لفوگ بحركتين أشرلي اصعد واني ظليت بمكاني . علچ ولزگ جواي .
فتح عيونه وأشر بإيده
- متصعدين
- وضحلي كلشي
- وانييي وااگففف؟؟
- ها لا لا ههههه اي هم صدگ
ضحكت چذب ألطف الجو بس ياتلطيف هذا وماهر معصب.
هز إيده وصعد عصبي .. ادري هاي العصبيه راح اكلهه رزاله معدله .. قابل غريبه الطوبه إعله احمد راضي.
صعدت وهوَ ظل گاعد عاقل لا لزم إيدي لا سوه شي .. منك من الشيطان .. كلما اصعد بالسياره يلزم إيدي عود هسه صاير عصبي وكذا.
وصلنه للبيت مالتنه وهوَ ماحچه شي وولا نطق بكمله !!
وكفني ببابنه وظل ساكت يباوع لگدام مايلتفت عليه وولا حط عينه بعيني !
همس :-
- انزلي
ظليت اباوعله رافعه حواجبي ومستغربه !
- ماتحجيلي؟
- مااگدر ثُرىٰ مااگدررر
- بس مساع كتلي احجيلج
- اني كلت هيجج؟؟ هـه لا مشتبهه
- قبل شويه كلتلي احجيلج واني واكف يعني تحجيلي
- بس ماكلت احجي
- اني راح اصير مرتك يعني لازم كلشي اعرف عنك
- بس علينه بالحاضر الماضي صار ماضي بعد
- اها قصدك ماتثق بيه !
- ماكللتت هييج ثُرىٰ لتتهميني بشي ماگايله وولا مفكر بيه اصلاً
- جا شتسميهه هاي ضام عليه وماتقبل تحجيلي
- انطيني مجال ثُرىٰ داختنگ اني تفهمين شنو داختنگ .. كلهه تضغط عليه وكلهه ذابه الصوج بيه مو وقت عتاب هسه .. زحمه السياره واگفه بنص الشارع
- هاا هاي هيه نازله اني
هز راسه .. واني عود منتظره يگلي لاتنزلين .. بس ماكال !
نزلت وضايجه روحي طالعه وكلمة جنات تتردد ببالي " انتَ خنتني!! " شنو خانهه معقوله؟؟
الافكار تزاحمت ببالي وأرهقني التفكير .. خانهه؟؟ وساتر عليهه؟؟ والراشدي؟؟
هذا مايتفاهم وإذا يعصب ينسه روحه .. يمكن اذا تصير مشكله بيناتنه لاسامح الله وهيج يضربني اموت بين إيديه .. صوت الراشدي لهسه يتردد بإذني .. مو راشدي كااارثه إذا إيده ساطور.. حقهه جنات تموع روحهه مدري تمثل على گولته شدراني .. حرت حيره محد محتارهه !
ثاني يوم رحت للكليه وجهي مايكصه الطبر .. لازم اخذ موقف منه شنو مخليني طرطور لايحجيلي لايشرحلي .. كلشي ماادري اطرش بالزفه .
خلصتهه بس معفسه وجهي ومااحجي وياه .. دخل للمحاضره وطلع عيني مارفعتهه حتى صار عصبي وظل ينتر ويرزل .. بس حميت روحي من اي رزاله لارفعت إيدي ولا سويت أي شي گعدت عاقله متخذه موقف.
من طلعنه خابرني رديت بهدوء
- الووو
- وين انتِ؟؟
- بعدني بالكليه
- اطلعي اليوم اني اوصلج
- واسماعيل
نتر بنفاذ صبر :-
- خااابررته
- اي وليش عصبي وتزمخ
همس
- استغفر الله مامعصب مامعصصب
سكتت شاحجي وياه مثلاً
- ثُرىٰ اطلعي تلگيني بالباب منتظرج
- اي جايه
طلعت ولگيته واگف يم باب السياره ولابس النظارات عرفت هاي الحركه اذا بيهه نظارات معناهه لاتباوعيلي ومااخليج تشوفيني .. يلا اني هم مااباوع اصلاً .
رحت صعد بسكتتي وعاگده حواجبي.. دخل بالسياره وهم ساكت .. ظل يسوق والهدوء مالي الجو.
اخر شي مل نتر :-
- ووشللون نبقه سكته؟
رفعت أكتافي وفتحت إيديه بمعنى "ماادري"
- ثُرىٰ الترديه شنو بالضبط؟؟
- اريد توضحلي كل شي
- اي اوضحلج بس مو هسه
- جا يمته؟
- من اصفي ذهني واخلص من سالفة أبويه واسولفلج
- وسالفة ابوك هم تسولفهه الي؟
- اي اي كلهن
- وعد؟
- اي وعد اخذيهه مني .
- خوش
قرب أيده وحطهه على إيدي .. سحبهه وباسهه بهدوء وشمهه .
- ااااه مااتحمل تگلبين وجهج عليه لتسويهه بعد خبلتيني اليوم كله افكر شلون أرضيج
- سولفلي واني ارضه
- اسولف اسولف هوَ الزواج شنو غير سوالف ومشاركه واهتمام وكلهن اسويلجياهن بس انيطيني مجال
- منطيتك يابه منطيتك
- ههههههههه
ظل يضحك على كلمة "يابه" عود لان مالته چا شمالني اني مااعرف أألف أعرف بس للسهوله بگتهه من عنده.
رجعني للبيت بيومهه .. بالليل جاي اتعشه وخابرني ركضت لموبايلي رديت اجاني صوته يحجي سريع
- ثُرررى موبايلج وين عنج جنتي فاتحه نت؟
- لا اصلاً جاي اتعشه
- لعد اخترقوج
- شنو شنو وين
- روحي للفيس من تكملين وشوفيه
- لحظه راح اتصل عليك من جهاز مروه
- يلا منتظرج.
اتصلت عليه ودخلت على الفيس كال
- شيطلعلج
- انتهت صلاحية الجلسه
- سجلي دخول بله
سجلت دخول كلمة مرور غير صحيحه
- مايفتح كلمة المرور خطأ
- هــه اخخ جنااات اخخخ
- شنو؟
- جنات اخترقتج اعرف سوالفهه
- شلون عرفت؟؟
- قبل شويه داراسل بيج ووصلني سكرينات كلام ويه ولد لعبان نفس المتزوجه ماتحجيه استغربت وبعدهه كاتبتلي ( اني مااحبك واريد افصخ خطوبتي وعندي علاقات وو..) من هذا الحجي الكلاوات .. عبالهه ماهر غبي وعربانه تدفعه بسرعه والله ياالله
- يححح عززااا وشلون تالي شسويت
- خابرتج لان مااشك بيج ولو واحد بالميه .. اني قراراتي دائماً ادرسهه يلا اخطي خطوه وهاي اني اعلمهه فوك شينهه گوات عينهه
- ماهر والله اني ماعندي ذني السوالف وولا مسويتهن بحياتي
- اعرف اعرف لو اشك بيج جان صدكتهه بس المثلج انتِ من الداخل طاهره وشفافه
- بعد گلبي
- هههه اول تالي
- ههههه
- هسه دزيلي الايميل والرمز ارجع الحساب
- خوش
سديته منه ودزيتله الايميل والرمز .. شويه وكاللي افتحيه وسوالي رمز شطووله.
حفظت حسابي ورجعلي.. شلون سالفه هاي تظل ام فچوچ يوميه مخترقتني والله مليت ياربي.
همزين ماهر يثق بيه الحمد لله والشكر .. رزن ويفكر يلا يتصرف .
إجه إسماعيل لاأمي
اسماعيل.. راح اجيبلج التعوض مكان تقوى وثريا
- اهلهل
اسماعيل.. هههه هلهلي وحضري روحج حتى تروحين تخطبين
- يوم عيد
اسماعيل.. اول ماتتزوج ثريا اتزوج حتى مانحس بنقص بعائلتنه
ثُرىٰ.. لاعيني لا اني محد يعوض مكاني
اسماعيل.. هم صدگ .. انتِ ماتتعوضين
- اي والله فديتني
ظلينخ نسولف ونضحك ووجهي صدك خير من اگلهم خير عليكم اني محد يصدگني .. كلهه عرست وياي .
باجر نروح نخطبله وامي مكيفه وهوَ هم خطيه مكيف .. فدك اكيد باجر عيد عدهه.
يوم ثاني كعدت على إيد تنمد على وجهي .
تگلبت للجهه الثانيه .. هم اجت على وجهي
- يبوو منو هذا
- اني اني مااشتاقيتيلي
گعدت بفرحه ولهفه من سمعت صوت نهى لگيتهه شايله حسوني ومبتسمه بوجهي .. يمه كيفت طفرت عليهم اثنينهم احضن بيهم سويه .
- مشتاقتلج حييل
نهى.. حسوني اليوم مشتاق لخالته وجبته
- فديت حسوني وأم حسوني هلا بيكم بكل الاوقات
نهى.. ديلا بدلي دنروح للخطوبه
- احمم اي حبدل .. هيَ مال بغدادي ديلا عمي يلا خل اغسل واجيج عود بعدين ابدل
ركض ركض بدلنه ورحنه لبيت خالتي ام فدك .. سمعو قافل على فدك .
حجت امي الرسميات وطلبتهه وهمه مكيفين شفايتلهه فديكان ماخذه عمود بيتنه واحسن واحد بعائلتنه .
رجعت من الخطوبه وانصدملك بماهر عدنه !
يحح صخام بويهج ثُرىٰ نسيت ماگتله رايحين .. بس يلا ماعنده هاي سوالف التحكم هاي.
رحت دخلت سلمت عليه وگعدت .. ظليت اتفحص بوجهه اشوف معصب لو لا.
الحمد لله وجهه طبيعي مامعصب ولا مغندب .
گعدت مقابيله وظل يسولف هوَ وإسماعيل لما طلع اسماعيل وخلانه وحده .
ماهر.. تعالي هنا
- لا خليني هنا
ماهر.. تعالي يمعوده
- اي جيت
گعدت يمه باوعلي رافع حاجبه
- طالعه واني آخر من يعلم
- ماطولنه بسرعه رجعنه
- بس ماگلتيلي
- اخر مره
- گلبي علمني واجيت
- ههههه
- مامصدكه شبيج
- لا لا مصدگه
دنگت .. همس
- عيونج عيونج خل اشوفهن تكتليني برصاص من تدنگين .. المن مدنگه رب الحلو
رفعت عيوني وباوعت بعيونه .. انتچه على الحايط وزفر انفاسه بإرتياح
- ايييي .. شسويتي بيه
- هههه كلشي مامسويه اني الفقيره الضعيفه
- چؤؤ چؤؤؤ انتِ اقوى مما تبينين
. أكثر صلابه ممما تتظاهرين رغم نعومتج ورقتج وسهولة خدشج بس انتِ شامخه , قويه مثل الشجره جذورج عميقه وعتيقه , أصيله تزأرين مثل اللبوه من واحد يهينج ومحد يكدر يهشمج تعمقت بشخصيتج ودوختيني گوه فهمتج
اني صافنه عليه كل كلمه يكولهه اتخيلهه خو من كال شامخه ردت اگله هذا اسم جدي بس گلت خاف اگطع تفكيره وبعد مايمدحني .
تخيلت هذا الحجي اليحچيه إليه يگوله لجنات .. الافكار كامت تتصادم ببالي وبدون علمي زلگ لساني
- هم جنت تحجي هيج لجنات؟؟
باوعلي رفع راسه خزرني اني دنگت عزززا.. ذكرته شسويت اني
ماهر.. اسمهه لتذكريه مقابيلي ولتقارنين نفسج بيهه
- عود ليش تضوج منهه وانتَ قبل تموت عليهه؟
- بحياتي مامتت عليهه خطبتهه ارضي كبريائي
- جا ليش ماتقبل تحجيلي ليش فصخت؟؟ غير كتلي احجيلج؟
- بعدين ثُرىٰ
- لا والله ماعليه هسه احجيلي
- ثُررررىٰ مااگدر هسه اذا اذكر السالفه ابقه يومين عصبي ف خليني ساكت احسن
- لخاطري فدوه لخاطري
- اووف كلشي ولا خاطرج هسه احجيلج
غمض عيونه وعبالك يتخيل محد يمه وظل يحجي بصعوبه وصوته يقطع كلمه كلمه يحجي.
ماهر.. جنت مدللهه حيل اگول راح تصير مرتي ومااريد اقصر وياهه بشي .. احنه كلنه عدنه المره مدلله ولازم تتدلل.. ردت ادللهه .. ظليت يوميه طلعات وطبات وهدايا ولبس وأي شي تريده اجيبهه إلهه بثواني .
تتصل عليه اعوف أي شي بإيدي واروح ركض اسوي التريده..
كل هذا ماغزر بعينهه ..
بيوم هيَ خابرتني اعتذرت مني وگالتلي اني اليوم راح أسافر لتركيا .
كتلهه اروح وياج خاف ماتندلين لو شي .. ماقبلت .. ماضغطت عليهه وخليتهه براحتهه .
إخوهه دائماً اني وياه ميانه وسوالف وضحك ونطلع سويه ومسوي عليه أفضال كوومه.
بيومهه گاللي ماهر تعال اليوم نسهر سويه .. اني ماعارضت كتلهه راح اجيب كرزات وشغلات نتسلى بيهن نتابع لعبات لو افلام اجنبيه .
اخذتهن ورحت .. كعدنه نسولف ونضحك وصاحبه ويانه .. خلص البرنامج الچنه كاعدين عليه راح الولد صاحبه اني ماخلاني اطلع كاللي تبات يمنه اليوم.
الوقت متأخر ودنيا ليل كتله عادي ابات يمكن الليله.
ظلينه شويه وصاح " جنات تعالي " تفاجئت بجنات دخلت !!
شافتني وجهه ظل ينطي ألوان !! اني هم تفاجئت شنو مصلحتهه تجذب عليه؟
كاللهه افرشي لماهر .. راحت الروحه روحه بعد مارجعت .. هوَ ظل يضحك وكال اتعب جدامك ولاتتعب لسانك.. گام يجيب فراش وخلاني وحدي.
دزيتلهه رساله من عندي اريدهه تشرحلي وتبررلي الچذب ليش بس ماردت .
موبايل اخوهه بقه يمي .. دزيتلهه رساله من عنده بحجة جيبي مي جاوبت كالت شويه وتجيبلكم أمي يعني الموبايل يإيدهه وتشوف رسائلي بس متجاوب.
جاب اخوهه وفرش الفراشات ونمنه على حسب الأصول .. الشيطان ظل يگمز على راسي الا اعرف ليش جذبت عليه.
بنص الليل اخذت موبايلي ورحت بسكته لغرفتهه.
مامسوي شي اني خطيبتي واحجي وياهه حتى لو لگفوني.
صعدت الدرج على ضوه الموبايل لان البيت اظلم .. صعدت كلش وصلت للصاله التفصل بين الغرف وكفت يم غرفتهه وسمعت صوت ضحك وسوالف !!
تفاجئت ويامن تسولف وهيَ وحدهه بالغرفه !!
فتحت الباب وانصدمت بالمنظر !!
شكرا لزيارتكم عالم روايات سكيرهوم
