رواية نقش بارد الفصل الرابع والعشرون بقلم فدك فاطمه
آنة جَريتچ نِفَس گوة عَلى ريتي
و هَسة حِيرة مِنين ما أَهِدچ أَموت
.
..
غنـوة
تقربت گلبي يرجف من السمعتة حجة بهمس:وغنوة
صفوان:لاتخاف عليهة وعد على گص رگبتي ينمس طرف منهة
وخرت عن الباب من سمعت صوتة من برة قرب بعدة يحجي مافهمت شنو رد عليه مشيت للغرفة افتر اعض بأدية كاتمة البجية
ليش ما حجة و گالي كل مرة اقنعة نسافر ما يرد يغير
السالفة طلع كاتلة واحد ،البلاوي لعد هذة الزلمة ما تنعد يومية اسمع مصيبة شكل
گعدت لازمة بطني متوجعة منهة اخر اشهر كلش تعبت تمددت اعصر بأدية دموعي تصب والله اذا راح و عافني بعد ما اريدة
سامحتة اول مرة هسة يريد يعيدها وين يخليني روحي لوحدي ما دبرتها مو نوب هسة و عدي طفل
علوان حدة يومين وياي اذا يسمع دلهم ينسجن لو يسافر بعد ولا يباوع لوجهي منو الي اضل ملطشة بديهم ،صفوان شنو و يدير بالة علية
نفضت الغطة مخلية ايدي على بطني دخلت السابع
خايفة حيل لا أولد بيه أشوف نسوان اخواني جانن يجيبن بالسابع كل جهالن هيج
وصلت للباب رجعت خاف احجي وياه هسة يشوفني
ابجي يجذب علية حتى يسكتني و راهة غفل يعوفني
مو صعبة عليه يسوي هيج سوالف
خلي اشوفة يحجي لو لا ،اشمر روحي عليه و اتوسلة
كافي دوم اگلة لاتعوفني وينطي وعود يابو وعود خل اشوف تاليتة شلون
بليلتهة جبرت روحي أنام اجة للغرفة حسيت بي حجة وياي ما رديت غمضت أمثل النوم احس بكل حركاتة من كعد وراي حاول يندهني
تمدد بصفي ايدة على ظهري يدلك بيه عصرت عيوني خانگتني العبرة غفيت على لمساتة الخفيفة فوك وجهي و شعري
الصبح جان طالع للشغل لگيتة مسوي الجاي محضر
الكوب و الريوگ الخبز مطلعة برة اريد اشوف غفران
شعدهة كل فترة تخبز و تجيبة
ترگيت بدون شهية واني كاعدة اجتني نرجس همزين لزمتهة خوش لزمة خليتهة تلم الهوسة مال الاستقبال و البيت ماكدر ادنگ
فتحت الجرار ادور فلوس لگيت خمسمية نطيتهن الهة حجت تاخذهن:عمة اجيبلج خبز
حجيت امسح على شعرهة :لا عدنة ،امج شعجب يومية تودي النة شعدهة
گامت وكفت يمي تشاورني:لاتگولين لابوي بس امي
تاخذ فلوس من عمو و تخبزلكم و تودي
التفتت الهة مصدومة:تخبزلنة بفلوس
حجت تهز راسهة: اي بس لاتگولين امي گالت اذا سمع ابوكم اكتلكم بالواشر مال المبردة
غنوة:اني الغبية اگول منين اجتهة المحنة دلهم يومية يروحلكم ينطيهة فلوس
هزت راسهة وردت:لا تلث مرات نطاني وهم جاب طحين و امي يومية تخبز خبز حار توديلكم مرات ناكل منهن تگول اكلو من خبز عمتكم
حجتهة بضحكة هزيت ايدي اضحك والله بيك البلة
اني مامقتنعة هيج من غفران تصرفات يالله عمي
الحمدلله خل انجب لا اتبطر همزين ما مانة علية
تنهدت بضوجة اتذكر حجي دلهم البارحة وية صفوان كل ما اتذكرة يصير عدي جالي وبطني تمغصني ،گبل عيوني غورگن مسحتهن
تنهدت بضوجة گمت سويت غدة ونرجس تفتر يمي
كلشي اريدة تجيبة ضلت تمددت بالهول عيني على
الطباخ خاف اسهى عن التمن ويشيط
دك موبايلي بيد نرجس هي يمي تلعب بي نطنياه بس اخذتة فصل جان دلهم يتصل خليتة يمي رجع
مرة ثانية اتصل تنهدت فتحت خط
دلهم: وينج اراسلج ماتردين
غنوة:مادري الموبايل عد نرجس
دلهم:شلونج
غنوة:زينة لايضل بالك تريگت و خليت الغدة يمي نرجس هسة متمددة بالهول
دلهم: خوش محتاجة شي اجيبة
غنوة:لا سلامتك
دلهم:صوتج ما عاجبني صاير شي
غنوة:لا مـ..
قاطعتني نرجس من حجت قريب على الموبايل:عمو تجذب عليك تبجي
خزرتهة هي تضحك وخرت مسحت وجهي اسمعة حجة بقلق:شبيج ليش تبجين متوجعة ؟ ارجع اخذج للدكتورة
غنوة:لا كلشي مابية هيج ضجت لوحدي
دلهم:احجي غنوة
گرصت نرجس حجيت بهدوء:لاتخاف والله كلشي مابية لا متوجعة ولا شي كاعدة
دلهم: جا ليش تبجين
غنوة:اليوم عدي أبرة قوية اخاف منهة
دلهم: أجي و نشوف شنو هاي الحساسية النازلة عليج تبجين من أبرة
سدته بوجهي تنهدت التفت الهة شردت تضحك حجيت اشمر الدولكة عليهة:اني اعلمج بسيطة
نرجس:غير هو گالي بعد لاتجذبين حرام الجذب
غنوة:گايلج ما گايلي ،سألني انتي شبيج نلگفتي
نرجس:حرام عمة حرام تجذبين
غنوة: خوش خوش افتهمت
رجعت تباوعلي بخوف و ضحكة ماتفارگهة خلتني غصباً علية اضحك اخذت الموبايل اشوف رسائلة
گومتهة طفت الطباخ رجعت تلعب يمي
لحد ما أذن گمت صليت بعدني كاعدة أسبح سمعت صوت الباب نفتح و نرجس تسولف وياه يحجي بهمس اسمع تبسبس
گمت انزع العباة خليتهة ورة الباب طلعت مخلية شالي فوك راسي ما نزعتة شفتة كاعد يم باب المطبخ يسولف وية نرجس بصوت ناصي
غنوة: الله يساعدك
حجة يرفع راسة :هلة
فتحت الثلاجة أشرب ماي مر مني رايح للغرفة لزمت نرجس احجي بهمس:شعدة شگالج
نرجس:يگول شبيهة عمتج مطنگرة
غنوة:شحجيتي
ردت تگلب بعيونهة:گتلة مادري غير انتة رجلهة
غنوة:يمة يمة من لسانج امج غفران شطلعين
نرجس:خل اروح للبيت يجي ابوي يكتلني
غنوة:لااا ضلي هنا تغدي يمي
نرجس:ابوي يكتلني
غنوة:هو يومية يكتلج ضلت على اليوم
عبست تباوعلي ضحكت اكرص بخدهة نتبهت للعلاگة فوك السنك فتحتهة مشتري برتقال غسلت منة حضرنة الغدة اني اصب هي تخلي بصينية
صاحتة گالهة متريد باوعت مستغربة للغرفة عفت الي بيدي رحت يمة فتحت الباب مطفي الضوة ونايم على وجهة
غنوة:دلهم ليش ماتريد
دلهم:اريد انام تغدي انتي من اگعد اتغدة
غنوة: ليش البارحة شعدك مانمت
فتح عيونة صافن علية تنهد دار وجهة للجهة الثانية
سديت الباب رحت تغديت من القهر اكلت ماعونين
العصر كعدتة يوديني لبيت جدي مارضى اروح ولا گعد خابرت غفران ودتلي نرجس عدلت شالي لبست العباة اوصل للباب ارجع من الخوف
مشيت للغرفة حجيت اندسة:دلهم راح اروح
حجة بزهگة يوخر الغطة:اشتعل ابـ..
سكت الة شوية شتمني اخذ تشيرتة طلع غسل من الحوض وصل للباب التفت الية واكفة بباب المطبخ
عاط يأشر:ماتجييين
رديت البس نعالي:ها اروح وياك
دلهم:فهاوتج تشگ الگلب
غنوة:شسالفة على كيفك تصيح نايم صارلك خمس ساعات و تزومخ
لزمني گوة عليه كاتم اعصابة اني الازم اعصب مو انتة طلعت امشي بصفة كل شوية مخلي وجهة بوجهي خاف شعري طالع
غنوة:راح اعثر
دلهم: متحمرة و متكحلة هاي عود تخافين من الابرة
غنوة:جا اروح وجهي املح طاگني الضيم
حجة يمسح خدي:هذة شبي احمر
غنوة:خجلانة
مسح خدي دفعت ايدة :زلغت وجهي ترة هو احمر شعلية اني شجاك
دار وجهة ينافخ وصلني دگيت الباب طلع هلال سلم
عليه دلهم شنكة گوة يرد دخلت سلمت على البنات
انتظرت سكنة لحد ما حنت علية و اجت
ضربتني الابرة نطيتهة فلوس جدتي لزمتني تسولف علية ياهو الج شلون تشتغلين اذا تولدتي ودي على مرت اخوج تروح وياج
دلهم خبصني يرمش و يرجع ليورة حجيت وياهة شوية طلعت اشوف جسام واكف بالحوش يم ابوه يسون بالحديقة عبرت منهم طالعة
دلهم گاعد گبال بيت جدي مرتكي على الحايط استغربت ليش ما دخل بس شافني طلعت سوة حركة بيدة يشتمني وصلت يمة
حجة بهمس:مو أبرة عملية كبرة
غنوة:مو جدتي تسولف علية
دلهم:دمشي امشي
تأففت مشيت كدامة وصلني للباب رجع للمحل شوية واجة كعد برة بالحوش بيدة باكيت جكاير و الثاني بصفة مخليه يشرب يرجع ليورة
حجيت من الشابك: اصبلك غدة
رد بدون ما يباوعلي:لا
غنوة:لا غدة لا اكل حتى ماي ما شربت من اجيت گاعد تشرب جكاير تريد تموت
اشرلي بيدة امشي تنهدت رحت حميت الغدة حضرت المواعين نصيت الطباخ طلعت كعدت بصفة على حافة الصبة مال الحديقة
اخذت الباكيت من ايدة طلعت جكارة باوعلي بطرف
عينة منتظر شسوي حتاريت شلون اشعلهة والزمهة مثل ما يلزمهة بين اصابعة
خليتهة بيدي اليمنة ما اسيطر على الجداحة باليسرة و اشعلهة كل ما اضغط عليهة يزلگ اصبعي
طاحت من ايدي شمرت الجكارة وراهة
مديت ايدي اخذت جكارتة گبل لا اخليهة بشفتي سحبتهة حجة:سالمين
غنوة:اريد اشرب وياك
دلهم:هذة الي ببطنج شنو طابوگة
غنوة: كل ما تشرب اشرب
دلهم:دلزميهة عدل نوب اشربي
حجيت الزم جفة:يالله گوم تغدة كتلني الجوع اريد أكل
رد بضوجة:ماتغديتي
غنوة:لا غير انتة ماردت گلت انتظرك
دلهم:يمتة تبطلين هاي العادة
غنوة:مادري
گام يگومني وياه رحت للطبخ گبلة خاف يشوف الجدر بي شوية يكشفني خليتة يگعد بالهول صبيت الغدة اجة شالة خلاه بالگاع
حجة يباوعلي بطرف عينة:ماعون واحد
غنوة:ماكو فرق ناكل سوة
رفع الخاشوگة يوكلني اخذتهة منة شبعانة كلش خليتة يتغدة اكل شوية حجة :جذابة
ابتسمت العب بطرف الصينية اريد احجي الكلمة على طرف لساني و اسكت خل يكمل احسن ما يضوج نوب يضل جوعان لليل
كمل غدة راح للغرفة مشيت يمة اعصر بأدية گعدت احجي مدنگة:سمعت حجيك انتة وصفوان
باوعلي مصدوم نزل الموبايل تقرب :شنو السمعتي
غنوة:كلشي سمعت
رفع ايدة يحك حاجبة تلفت بالغرفة حجة متوتر:جان حاتم متوفي توة ادري ياهو لكاتلة ماكدر احجي امي نجلطت و كلشي متخربط غلطت مشيت
وية صحبة مو زينة و شربت الصار و صار
عصر عيونة ضاغط على ركبة رجلة رجع گال:اني غلطان ادري الشرب مو حل و صارت مجادلة بينة اني و الولد زياد ضربتة مو متعمد اعترف غلطت جنت مستعد اتحاسب
مسحت دموعي اعصر بأدية شهگت ابجي حجيت بغصة:وعدتني ماتعوفني
لزم ادية رفعهن عاصرهن بين اديه حجة يتقرب:وين اعوفج غناوي
غنوة: صفوان گالك سلم روحك و هو يدير بالة علية
حجة يحضن خدي:گال بس ما وافقتة ادور غير حل جعفر مسافر و مستقر بالخارج نتواصل وياه ندور حل للقضية احسن ماتضل معلگة
غنوة:يسجنونك
دلهم: اكو هواي ملابسات بالقضية اكدر احصل حكم مخفف و اذا جعفر وافق يوقع على تنازل نهائي ، زياد هو لتهجم اذا كدرت اثبت هيج الگة حل
غنوة:اذا هيج ليش خاييفهم منهم يفتحون القضية
دلهم:راح يتلاعبون بيهة مثل ما تلاعبو بقضية جلال
الفلوس كلشي تسوي و الواسطات تطلع ادلة ماموجودة بس يلزمون لزمة علية يستغلونهة
غنوة: دلهــم بعد رب العالمين محد الي غيرك سامحتك اول مرة لاتخليني اتندم حامل منو الي
حاول بس لا تسافر ،اذا ماكو حل انتظر لحد ما اجيب استقر البارحة بس اتخيل تروح واني هيج وحدي اختنگ
حضن راسي لصدرة يبوس شعري يمسح على خدي
حجة بهدوء:وعدتج ما اعوفج كلشي اسوي افكر بيج
لا تفكرين اخلص وداعتج لعيونج اسوي كلشي واخلص روحي منهم
غنوة: وراك شگد سوالف يومية انصدم بيك ليش تشرب المن ماشي بهيج درب
دلهم: صحبة سوء
غنوة:يگلولك انتحر تنتحر شجاك ماتگلي
دلهم:هسة تحاسبيني على الفاتن راحن و مشن
غنوة:شگد جان عمرك
دلهم:داخل الـ18
غنوة: وتشرب اني بگدك جنت اخاف اشغل دگمة التلفزيون خاف يحترك
دلهم:ولو هو ماكو رب بين الدكمة و الحرگ بس انتي ثولة عبالج الناس مثلج
غنوة:وخرر مو صوجك أذن ماتسمعة اروح اصلي احسن
وخرت ايدة گمنة صلينة رحت للمطبخ جوعانة گليت بتيتة و سويت جاي رحت يمة تخبل شنو تخلينهن على الجربابة كتلنة النظافة
غنوة:ماكدر اكعد بالگاع كل شوية
دلهم: يلتم النمل علية
غنوة: خل يلتم يدور رزقة
هز ايدة اجيت اطلع سوالفة من يسوي جاي بالليل يخلي الكوب على السنك لازك بي الشكر نوب يضل
يحجي هو أسلوبة كلش حلو
سويتلة لفة اطك على جتفة بيدي اخذاهة مايحب البتيتة كوة عليه اكل صك كوب الجاي كلة اجة اخذ
فانيلتة يريد يطلع
غنوة:صدك تذكرت غفران طلعت تخبزنة بفلوس
رد يجر الكلمة:لااا صددك
حجيت بضحكة:شفت شلون
حجة يحضن خدي:لو عدي سلطة عليهة اخليهة تخبزلج ببلاش بكل وجبة كرصة حارة من التنور
ضحكت الزم ايدة :شني أميرة حتى الله من فوك ما يرضاهة
دلهم: نرهمها
سديت حلكي أضحك بوسني بخدي راح للمحل يريد يشتري گلوب للحمام ،كملت عشة گمت غسلت المواعين رحت غيرت هدومي تمددت ادور فلم
لحد ما احة سد البيبان و طفة الاضوية الساعة بالتسعة احنة عزلنة اجة تمدد نايم على بطنة مديت ايدي ادلك بمتونة
دلهم:حيل شبيج فاهية
غنوة: منين اجيب الحيل انتة و ابنك علية
فشر عليه ضحكت اگرصة عدل نومتة رفعت راسي جتى يخلي ايدة جواه اخذ الموبايل يگلب بالفلام
دلهم:شو ماكو انجلينا
غنوة:كل ما اشوف فلم الهة اسوي تبليغ من البرنامج
ضحك يدور على فلم لگة واحد اخذتة منة حجة يأشر:هذة حلو سأليني
غنوة:وعلي اعضك
طلع منة يدور غيرة طلعت فلم الاميرة ام الثلج گلب وجهة مايرضى يتابعة جبرتة يشوفة رفعت ايدي انطيه حب كرزات ياكل
غنوة:طلعلي اللب
دلهم: ادري متزوجتني اشتغلج
غنوة:اريد خمسين حباية
رفع حاجبة ضحكت ارجع اتابع حجيت بدون ما اباوعلة:مو تسويهة بحلكك طگهة بصبعك
طگهة بين اصابعة فتحت حلگي وصلهة الي رجع اكلهة اخذ غيرهة هم طگهة بين اصابعة واكلهة
شال صم من الحب طشرة فوك راسي
دلهم:مو خدام الخلفوج اكلي وحدج
غنوة:ترستني حب شجاك
رفع ايدة يريد يطلعهن لزمتة عايفة الموبايل نكتت الدشداشة حجة يجرهة:قميصج صاير ماشوفة
غنوة:ماتشوفني بية طنين وين يكفي برجلي ما يصير
دلهم:نفس السمن ماتغيرتي هاي اعذار حتى ماتلبسينة الي ولا تگولين رجلي اونسة ادللة
غنوة:ايي اونسك بقميص خطية انتة طاكك الجفاف
حتى ماتعرگ بالصيف مت گد ما جاف
دلهم: احجي برقة شوية
غنوة: صوتي جان ماينسمع انتة خليتني العلع
دلهم: ذبيهة براسي
غنوة: والله من وراك دشوفني گوة اتنفس بطني واصلة لخشمي
رد يرفع ايدة:لهنا وكافي ايد وحدة ماتصفگ كافي تشمرين كلشي علية
غنوة:خوش يالله اسكت
رد يكمل:ترة انتـ..
صميت حلگة بيدي:ايي كافي افتهمت بس لا تحجي
وخرهة رد: انتي تلبسين قـ..
رديت اسد حلگة:يبوووي كافي
ضحك يجر وجهي عليه يشاورني خلاني اتگلب من الخجل اسد بحلگة يعض ايدي لو يدغدغني بهذلني
عطت لازمة بطني:اخخخ دلهم بطني يييمة
نهض مفزوع :شبيج شبيج
غنوة:كلشي مابية اريدك تسكت
جر ايدي يعض بيهة كفشت شعرة اجرة رفعت ايدي دفعتة احجي:شعرررك بي لمع
وخر يمسح عليه:شنو
رديت اراوية:بييي لمع شوف منين اجاك
لزمهة يگلبهة:وين شفتي بهل الضلمة خفة
غنوة:يلمع اشوفة منيلك هاا منين اجاك
گلب المخدة يأشر عليهة حجيت اتلمسهة:هاا
دلهم:ومرضا
غنوة:حرام عليك نهبطت
دلهم:دولي لا اعمي عينج
غنوة:اعصابك حبيبي
رفع حواجبة يباوعلي بخبث اخذت النستلة مامهتمة
تقرب يبوس و ييحضن كل شوية طاكني بغزل يشاورني لو يبوس أذني
غنوة:بعد هواي جيب من هاي النستلة
همهم بدون مايرد يشم بشعري و رگبتي ماد ايدة يدور بالجرار عن العطر شغلت الفلم اعبر اللقطة لطلعتلي نزيت من رش علية
غنوة: اختنگت يمعود دخل حتى ببلعومي
دلهم: مخلص شلج بهاي الجذبة
غنوة: والله رشيت بحلكي
اخذ الموبايل طفاه سحب ايدي مخليهة بشعرة حضني ضليت احركة على كيف اني نعست هو بعدة
مادري غفيت عايفتة ايدي تعبت
مرن كم يوم شلع گلبي لحد ما خلصت الابر ابتليت على روحي ياخذني لبيت جدي يضل اليوم كلة ينافخ
خلصت السابع لزمتهة بجي و تولول خايفة بعدلي شهرين واني من هسة رجلية تطكطك خطية لعبت روحة يحجي و يواسي گوة صابر
مرتين اجتني خالتة بس رفا جانت مواعدتني تحي خفت عليهة ورة ما هددوهة ذولة خاف شو شيصير بالبت نوب عذرتهة گتلهة لاتجين
دخلت للتاسع نفسيتي مدمرة گوة علية اخلص اليوم
اموت من الخوف احس گلبي ينعصر من اتذكر الولادة اخاف اضل ابجي محد يمي
نرجس يومية يمي يقريهة دلهم تضل يمنة حجة وية علوان خلاهة حتى هدومهة يمنة ترجع من المدرسة وتجينة مكيفة صايرة تعرف تقرة
دعيتلهة كون صدك تنتبه للمدرسة تحصل شهادة تفيدهة الي بعمرهة وين وصلن حرامات تضل هيج
تتزوج و تكعد خل تشوف الدنيا شوية
تساعدني هواي گلبي ماينطيني بس هي سباعية كلشي تعرف عينهة علية مكيفة يمتة يجي الطفل اني اريد الايام تطول من الخوف
شمرت المخدة على فراشهة تحجي بهمس يومية تعيد السالفة:انام بالهول عمة
غنوة:ليش حبيبتي هنا ادفة
هزت راسهة تمددت گعدت گوة نمت يمهة التفتت مكيفة حضنتهة ابوسهة :تعبتج يروحي
نرجس:لا عمة احلى شي من اجي يمج و احنص بغسق و الجهال على عنادهم
غنوة: طلعتي مو هيينة
نرجس: افرگعهم
ضحكت ابوسهة تصفني بكلماتهة نامت حاضنتني تعبانة من المدرسة صايرة تروح بنشاط گبل همة هواي غفران اذا ماتكدر تغيبهم صار عدهم كسل
هسة اني الح عليهة تروح وية دلهم الصبح على طريقة هاي عدهة احلى شي امشطلهة و اسويلهة فيكات بشعرهة تتحمس تروح
رفعت راسي على صوتة يحاجيني يأشر رديت مستغربة:ها شكو
تمدد بالعكس راسة يم طرف الجرباية لجهتنة حجة بهمس:وين اليوم مهاجرة
غنوة: جا بس انتة تعرف تهاجر
دلهم:دتعاي نوميني
غنوة: يا خطية ماتكدر تمام
دلهم:لاتصيرين جلبة
غنوة: ما الة ما اجي البنية مستحية تريد تنام بالهول
دلهم:صارلهة شهررر توهة يالله استحت وشمسوين وتستحي هاي عيارة ماخذتهة منج
ضحكت لازمة بطني اشرلة:ماكدر اگوم تعذرني نام لوحدك ابو .. ابو منو انتة ماختريت اسم
رد يأشر: ابوج راج اشتمة گومي
غنوة: والله ما أكدر
اجة غصبا علية گومني تمدد بصفي نمت بحضنة
بنص الليل حسيت بوجع فتحت عيني عاضة شفتي
لازمة بطني الوجع يروح و يجي
عبالي مثل كل مرة ما گعدتة لحد ما حسيت بلل بين رجلية خفت عبالي دم رفعت ايدي صفگت زندة طلع صوت قوي فز مخروع
حجيت لازمة بطني:تبللت تللت
حجة مصدوم:بلتي
عطت لازمة ايدة:لااا دلهمم
فتح الضوة يباوعلي احس صدري نطبگ على ظهري
اختنگت من الوجع عيوني صارن بهامتي اذا اتوتر لو اخاف تهيج الشقيقة علية
لزم راسي يمسح عليه حجة ورة ما استوعب:اششش اهدي اهدي لاتتشنجين گومي لاتخافين
عرگت من كد ما ضاغطة على سنوني سوة احتار شيسوي يطلع الثوب تطيح العباة گوة بدلي مشاني خطوة عطت ابجي اطگ بظهرة
وصلني للباب لزمتة رجع مستعجل جاب السويج و محفظتة اجة يلبس بالفانيلة همزين اخذ سيارة صفوان ضلت عدنة خاف تصير حالة طارئة
عصرت الحديدة مال الباب رجلية يرجفن گوة واكفة
عاضة ايدة و دموعي عشرة عشرة طلعني يمسح بوجهي موبايلة بيدة يخابر على علوان
مايرد عليه احتار بنرجس وحدهة ضلت شتمة و فشر عليه يخابرة و يرفضة بجيت من القهر شغل السيارة
گاعدة بالصدر يمة مرجع الكشن ليورة
ظلمة و الجو ضباب اني اواول فوك منة مدري شلون وصلنة المستشفى نزلني مخبوص متوتر ضليت وحدي لو ما بنية ممرضة يمي تحاجيني من شافتني هيج هي وياي ضلت تروح و ترجع يمي
اني متمددة على السدية احس روحي طلعت نوب هاي الدكتورة تگلي احتمال مو ولادة رغم الوجع ماينحمل شفت الموت بعيني
لحد ما اجت الدكتورة الساعة قريب الثنتين گالتلي ماكو ولادة هسة عدج الوجع يصعد لظهري لو جايبة بعملية و منجبة ولا هاي الحالة
رجعت شافتني گالت رجعي للبيت ارتاحي بعد مو هسة ما رحت بقيت بالردهات افتر وحدي دلهم برة مايدخلونة راسي صار طبل من الوجع
لحد الخمسة ماكو ولادة بس وجع يموت يشل عيوني صارن بهامتي اريد احجي واستحي اگللهة النسوان يمي تصارخ روحي طلعت
امشي لازمة الحايط اشوف من بعيد خالة دلهم توهة دخلت تدور علية بعيونهة اباوعلهة ماكدر حتى أشر
شافتني و اجتني بهمة طگيتهة بجية انوح
حضنتني تمسح على ظهري ابجي من وجع بطني
وراسي گعدتني احس بيدهة على شعري مادري وين شالي وديتة العباة على متوني
حجت مخلية ايدهة على ظهري:الله يسهلج يامستعان سهل عليهة گولي يالله يمة مگضية بحيل الله هسة تولدين
رديت دموعي تصب:راح اموت راسي راح يطگ
لزمت راسي تعصر بيه تحجي:يالله نطيهة القوة يا منجي يونس من بطن الحوت يارب
ابجي اشتكيلهة من الضوة و الصوت غير وجع بطني
مددتني على السدية مغطية راسي بعباتهة عن الضوة تقرة قرآن و ادعية تمسح على راسي
ساعات تمنيت اغيب عن الوعي ما اعيشهن صار وجع حسيتة راح يقسم ظهري نصين صرخت اعض بأدية أون و عيوني راحت من البجي
لحد ما اخذني لصالة الولادة روحي طلعت وجع اقوة من الگبلة العرگ يصب صرت ماي رغم الجو بارد جسمي كلة حار نار تطلع مني
لحد ما ولدت غمضت عيوني رجفة لزمتني بعظامي صرت اخفگ لو ما خالة دلهم وياي جا نتهيت ما عافتني ولا شوية لحد ما غمضت عيوني
اخر شي سمعت دكتورة گالت:مبروك بنية سليمة الحمدلله
حسيت سمعت غلط ماهتميت اريد بس استراح گلبي انتهى من الوجع مادري شگد غفيت ولا احس
گعدت بعدين بغرفة وحدي الضوة بعيني تمنيت اشلع الگلوب قوي يخلي راسي يوجعني جسمي احسة خفيف و بردانة اطكطك
مديت ايدي اريد الغطة لمست بطني شلون ماكو
طفرت خايفة ناسية الولادة فزت وياي المرية مبهونة مسحت وجهي اتلفت بالغرفة
گامت اجتني تمسح على شعري :اسم الله يمة شجاج
غنوة:وين اني
ردت ترفع الغطة علية: بالغرفة طلعناج ترتاحين الحمدلله على سلامتج يمة مبروك على ما اجاكم يربى بينكم بسلامتج و سلامة ابوه
مسحت عيوني ارد بهمس:الله يبارك بيج خالة عذرينة زاحمناج
ردت تبوس راسي: غالية مرت الغالي ماكو زحمة بنيتي
غنوة:وين ابني
حجت ببتسامة:بالخدج هسة اجيبة نمتي ماهنتي علية اگعدج
غنوة: الشقيقة موتتني
ساهرة:الله يساعدج
طلعت لحظات جابتهة حجت تخليهة بيدي:هاي بنيتج وگفتنة على تك رجل
غنوة:دكتورة گالت ولد
حجت تعدلهة بيدي:بنية يمة شني هاي دكتورة لرحتولهة
غنوة: والله گالت ولد
ساهرة:هسة ولد بنية المهم سلامتج و سلامتة
باوعت بوجهة صغيرونة مغمضة عيونهة مسحت دموعي فرحانة گلبي طاير من الفرحة نسيت التعب كلة من شفتهة
غنوة:دلهم شافهة
حجت تگعد بصفي:شني هو شفتة اني الجبان صعد ضغطة من خوف راح احتارو بي الولد
باوعتلهة خايفة لزمت ايدي تحضن البنية:شبي ليش صعد ضغطة
ساهرة:جا من الثنتين للسبعة يروح ويرد بهل الممرات جكايرة ما طاحت من ايدة نوب انة من طلعت گتلة تبجي من راسهة نهبط الولد سودة علية
غنوة:هسة وينة
ساهرة:راح يكمل الاوراق مالتج حتى يطلعونكم
غنوة: شلونة خاف بي شي عفية گليلي
ساهرة:ولج كلشي مابي صحة من شاف بنتة
غنوة: فدوة خالة بس لا راح يسوي البيان يخلي اسمها انجلينا غير اتسودن
ردت تضحك:ياا شمالة هو هذة اسم مدري شلونة
غنوة :خابري فدوة
ساهرة:عوفي و رضعي بنتج فتشت صلوات على محمد باوعليهة حليوة
غنوة: انتي رضعيهة اني ماعرف
ساهرة:هنيال امي دگعي عدل كعدي
غنوة:شربيهة ممية
ساهرة:تضل تطلبج
غنوة: ميخالف
تعلم بية واني گلبي يم دلهم اريد اشوفة گوة رضيت
اخليهة بحضني و انطيهة حليب ضليت الح عليهة
لحد ما خابرتة گالهة راح اجي
گامت واكفة وراي تلم بشعري الصار كفشة من كد ما هلستة لمتة كل ضني دلهم ما شايفني طلع جايني واني نايمة مادري بي
حجت تضفر شعري:من اشوف راسج اتذكر الحجية امي الله يرحمهة جانت تصبغ بهل الشعر لحد ماتخلي أحمر هيج
غنوة: مثل جدتي هم تجيب وتخلي
ساهرة:عجايز گبل يموتن على الحنة
ابتسمت جنة دوم نخلي فتحت جنطتهة جايبة حمرة ضحكت خايت منهة نوب تفطنت بالماي اني طاك گلبي وهم ناسية اشرب
طگيتلي نص بطل بلاعيمي مورمة ندك الباب دخل دلهم ابتسمت مكيفة بشوفتة شالت البنية من ايدي
خلتهة بالكاروك غافية راحت لدلهم
تشكر منهة هي تشاقة وياه دنگ بوستة بخدة باسهة من راسهة طلعت گالت رايحة تغسل عافتنة وحدنة
تقرب گعد يمي تنهد من كل گلبة حجيت الزم ايدة:شلونك
رد يبوس ايدي:بخير بشوفتج
تقرب علية حاضني بجيت ادردم عليه اسولفلة بس اريد اشوفة و اطلع الشكاوي احس من اشكيلة ارتاح
رفع وجهي يمسح دموعي حجيت اناشغ:گلبي ورم راسي يوجعني من صوتهم هاي گصيتي موتتني عيوني رادن يطلن من الوجع
رد يمسح دموعي: حبيبة روحي عمت عيني حبيبتي
شهگت ابجي امسح عيونة:لاتگول هيج حباب
دلهم: ياروحي ياغناي
حضنتة محاوطة رگبتة يمسح على راسي يعدل بثوب المستشفى وخر يمسح دموعي و وجهي
غنوة:سميتهة
دلهم:لا گلت اشوفج شتردين
رديت اجس نبض:انتة شنو ابالك
باوع للكاروك حجة: مادري گلت اسميهة جمرة
غنوة:عود ليش
رد يحرك جتفة:بدون سبب من اشوفج يجي ابالي
غنوة:ماريدة ماعجبني
دلهم:جوى
غنوة:بعد جنى،جميلة،جنات ، المهم اكو حرف الـ ج مال انجلينا
ضحك مستغرب :لا بشرفج
غنوة:اختار إسم غيرة
دلهم:معلية انتي اختاري عوفيني
غنوة:لو تحبني جا اختاريت
دلهم:لينا
غنوة:ضل حرفين حطهن و ارتاح
ضحك لازم ادية : حبيبتي
التفتنة للباب رجعت خالتة حجت مسح وجهة :بعدك هنا
دلهم:هسة اروح اجيب غدة
غنوة:خلي خالتي تسميهة
ساهرة:انة معلية بيكم هاي بتكم وسموهة
غنوة:لا خالة راضين بأي اسم المهم دلهم مايدخل
ساهرة:سموهة فضة
دلهم:ولا حرف من انجلينا
غنوة:اني موافقة گوم سميها
ضحك مايريد الاسم زعلت غيرة سمى من كيفة مسميها "غـمزة" راح يكمل البيان تأخر يالله سواه من استقرت حالتي و ارتاحيت طلعوني للبيت
دلهم لازم ايدي و خالتي شايلة البنية و جنطة الغراض جايبتهة ويانة مناك البنات محظراتهة عدهة مرت ابنهة هم حامل محضرتهة الهة نطتهة
اني الغبية اتعاجز احضرلي جنطة همزين جابتهة
وصلنة للبيت دخل دلهم يسب بأي واحد يجي على بالة كل مايشوف بيت اهلي يزيد مسبة
البارحة ردت بس غفران تروح وياي مرة تدخل يمي
الخبيثة تفاجئت بوتين و سمر جنتهم بالبيت وابن خالتة بالاستقبال كاعد
منظفات البيت محضرات فراش حضنتني وتين تضحك حجت:مبروك وأخيرا فشيتي
غنوة:الله يبارك بيج حبيبتي
سمر: ياهلة عمي شني مو بنت محلفينهة يالله طلعت
ضحكت ابوسهة ساعدتني تمددت على الفراش حجيت التفت على وتين :شگد عيب من مرت اخوج مجهزة لابنهة و دزتهن
وتين:لا يمعودة كلنة واحد ،هي عدهة هواي امها واخواتها يشترن
غنوة:جنت اريد اروح اشتري كاروك و وبعد هدوم بس محد يروح وياي و امج گالت تجي رفا جهزت حتى توديهن وياهة تروحلكم
وتين:اي خابرتني خطية رادت تجينة بس احنة مستعلجين حتى اجينة بملابس البيت امي طلعتنة ركض لبست شيلتهة و اجيت
رديت بغصة:الله يحفظها ماعرف شلون اجازيهة لو ما هي مادري شصار بية
وتين:تدللين غناوي مرت البارد لو ما انتي مانلزم عليه لزمة
ضحكت همة يضحكون عليه لان صعد ضغطة ابن خالتة مسوي نصبة الهم ،ساعدتني دخلت الحمام غيرت هدومي رشيت ماي علية بس ارتاح
على ما صار الغدة صبن للزلم وراهة تغدينة احنة
العصر اجتني نرجس تركض توهة راجعة من المدرسة مكيفة طايرة بالسمة
بالليل اجة علوان و الشفية غفران على گولة دلهم
يتعذرون و ماندري الصبح اجتنة نرجس گالت سكتنة عنهم غفران طاح لسانهة من تعذر
رب ضارة نافعة الله جابلي خالة دلهم و البنات خطية ضلن يمي اسبوع سمر مشت ضلت بس وتين و أمها
صادف يوم الجمعة رفا گالت تجي عدلت الغرفة منتظرة خالتي راحت للسوك مريت على غموزة بوستها نايمة روحي بيهة زاعجتهة
سمعت صوت دلهم رحتلة واكف بالباب يدخل بالمسواك اشرلي للاسقبال رحت مستغربة اجة يتلفت وراه وكف بصفي
حجة حاضن خدي:طاگ من الشوگ
ضحكت ابوسة بخدة:حبيبي
دلهم: أهلة و ناسة تضمين وجهج عني
رديت اتمايع:مشغولة تعذررني
دلهم:ماعت اشتعلو
ضحكت اعدل بالفانيلة عليه دنگ يبوسني اسمع صوت خالتي تصيح و وتين تسأل عني گوة بعدتة
طلعت الهن امسح بوجهي
جايباتلي ملابس گلبيىة حلوة كشخة للبيت لبستهة
بيهة شوية عرض اسويه بالحزام اخذتهة رحت للحمام گبل لا يجن اعدل روحي
طلعت مشطت شعري ظفرتة و خليت مكياج خفيف
اسمع صوت برة توهن اجن طلعت اجتني رفا طايرة
حضنتهة اضحك حجت تبوس خدي:مشتاقتلج شلونج مبروك عليكم رفاوي الحلوة
غنوة:الله يبارك بيج حبيبتي سميناهة غمزة
عافتني رايحتلهة مشيت سلمت على امها گعدن بالهول رجعت يم رفا لگيتهة شايلتهة تبوس بيهة
غنوة:حلوة
رفا:سميتي هاي طبعاً حلوة
غنوة: ولج ماسميناهة عليج ذولاك الناس مايرضون
ردت بضوجة:غدي عابتلهم زعلتوني والله
ضحكت عافتهة اجت حضنتني رجعت اسولفلهة عن الولادة هي مكيفة المهم عدهة صارت بنية حتى تشتريلها بدلات كل شوية تروح تبوسهة
ضلو يمنة للعشة و صفوان سمع رفا هنا اجة گبل تختل طبلنة بالاستقبال بس صوتة مسموع يضحك
حجت وتين بهمس:هذة منو يمة صوتة يخبل
باوعتلهة رفا بطرف عينهة:شنو من ذوق عدج
حجت تشاقيهة: حلو شبيج شفتة من طلع غسل يخبل متزوج صديق دلهم مو
درت وجهي ضامة ضحكتي و وتين تسولف عليه معجبة رفا تگلب بعيونهة تحجي بسلبية تريدهة تسكت و وتين لزمتهة بعد
غنوة:هذة صفوان وحدة عايش مامتزوج نخطبج الة
وتين:اي موافقة يالله خطبوني
غنوة: هاي بت خالتة قنعيهة بيج
وتين:الوگ عليه شرأيج
رفا:حرمات تضيعين شبابج وياه تستاهلين الاحسن منة
وتين:لا صدك خطبوني
گرصتهة باوعتلي تغمز تجذب على رفا هي وتين تحب ابن عمها كاتلة روحهة عليه لا صفوان ياعدالة
رفا:هاي هي اقنع امي و نجيكم
وتين:يااا كل الهلة بيكم تنورونة
ضحكت اشيل غمزة اخليهة بحضني سحبت شالي
اتغطى بي ارضعهة اسمع سوالفهن يضحكن رفا گوة تريد تسوي روحهة مامهتمة هي تعصر بالمخدة
مرت الايام هدوء و غريبة بوجود طفل ويانة صرنة عاقلين نفكر گبل كلشي و تربيتة و سهر كلش يتعب
ما اشبع نوم ابد ساترة علية خالتي ساهرة كل اسبوعين تجي كم يوم تگضيهن يمنة ارتاح و انام
جدتي اجتني بأول اسبوع وياهة نسوان اعمامي وبناتهم كم ساعة مشن الغاثتني سكنة تخوزر بية
لحد ما مشن احس بلسانهة حجي ماتگولة هي ومرت هلال ثنينهن حوامل سوة من دخلت الشهر السادس سمعت بيهة حامل
طلعت الاربعين مر تلث ايام جنت متمددة بصفي غمزة الاعب بيهة فتشت عيونهة تمنيت مثل عيوني بس طلعت على دلهم
عيونها بالبداية سود بعدين مالن للبني و الشعر خفيف احمر
نفتح الباب دخل الهيبة عدلت نومتي گعد بصفي مدنگ حجة يبوسهة : يا احلى البنيات
غنوة:احم
دلهم:من بعد غناوي حبيبتي باباتي
غنوة: شلونك حبيبي
رد مدنك على بنتة:هلة عيني
غنوة:باوعلي
حجة يبوسهة:خل اشبع
ابتسمت اتقرب منة بوستة بخدة حضن جتفي عدل گعدتة نوب شالهة خلاهة بحضنة يشمهة بكل حيلة
دلهم:ياعطري ياعطرج عمي الجنة هنا
غنوة: ييمة دلهم راح اموت عليهة
رد يرفع راسة:يراد عشر گلوب الجن
ضحكت اتقرب منة اتحرش بي التفت يدغني بخصري: عيب ولج منا البت
غنوة:يمة ماعرفتك
ضلينة نتشاقة نوب عفتة يمهة رحت اكمل شغلي بالليل ورة العشة خابرة العلة صلاح گالة جاينك
خلانة نطنگر بعز فرحتنة
اجو علمود يباركولة عشتو حضرت ضيافة الهم كعدو بالاستقبال بين السوالف و النغزات شربو جايهم و طلب صلاح يشوف غمزة
اباوع من طرف الباب اشوفة شايلهة لو شايل گلبي بيدة دلهم كل شوية يعصر ايدة يرفعهة يخاف عليهة لمن خلاهة بيدة ردتلة الروح
لحد ما مشو لعبو روحنة اخذتهة ابوس بيهة واشمهة شلعت الدنبوس الذهب لخلاه صلاح الهة دلاعة عفتة على الميز
اجة دلهم اخذاهة يشمهة يفتر بالهول فتحت الجرار
خلي اضمة لحد ما اشوف دلهم اذا يريد يرجعة لو وين يوديهة
دورت على المفتاح طلعتة من بين هدومي صار هواي ما منظفة الغرفة محتارة بغمزة اركض الهة
و للبيت مامهتمة الية
عفت المفتاح بالجرار رحت للكنتور طلعت قميصي ابو الحظ مشيت عدي شگد بس هذة احبة دخلت للحمام طگيتلي سبحة زينة
صاحني دلهم عليهة تبجي لفيت روحي زين طلعت اخذهة ضلت بحضني لحد ما نامت خليتهة بمكانهة
گمت مشطت رتبت روحي
فتحت الجرار اريد اطلع الاساور مالتي نزعت من سمنت صارن يضايقني بفترة الحمل ايدي ورمت
طلعت ثنين لبستهن
خليت حمرة مدنگة ادور حسيت بدلهم من دخل
صار وراي شلت الغراض الي بالجرار ادور على البقية
دلهم: غناي
رديت مركزة:ها حبيبي هم شفت السوارات الثانية
رد يتلمس خصري:ذني بيدج
غنوة: بعد ثنين ماكو دلهم
ما رد صافن علية مسلطن نخبصت وخرت منة لزمني بضوجة:عوفيهن الصبح دوري
فتحت الخانات الثانية تأفف بضوجة عيوني غورگن شكد احبهن وين راحن رفعت راسي الة مقهورة
غنوة:ماكو متأكدة اربعتهن هنا گبل لا أجيب خليتهن ردت البسهن من اجيت خالتك گالت خليهن يخشخشن بيدج
دلهم:وين راحن يعني
عبست ارد عليه:ماكو
