رواية جذبني فمك البني الفصل الخامس والعشرون 25 بقلم عبير إدريس

ربما أكون مشاغباً..

أو فوضويّ الفكر أو مجنون 

إن كنت مجنوناً..

وهذا ممكن 

فأنت يا سيدتي مسؤولة عن ذلك الجنون

 أو كنت ملعوناً وهذا ممكن 

فكل من يمارس الحبّ بلا إجازة يا سيدتي ملعون

 فسامحيني مرة واحدة إذا أنا خرجت عن حرفية القانون...

نزار قباني

________

ايفين 

طلعت سيلين وعمو جر كرسي وكعد كبالي بس كعد بالكرسي عكس يعني ظهر الكرسي على بطنه وكتف ايده وخلاها على حافه الكرسي الفوك باوعلي بنظره جان كلش ضايج مني و مبين عصبي سألني بحديه..

ادهم : منين عرف حسابج اسامه وانه من سويته جانت منتهيه علاقتكم؟

دنكت راسي وضليت العب بأضافري..

ادهم : جاوبيني من اسألج ..

رفعت راسي لان جان عصبي كلش وخفت منه والاكثر خجلانه..

ايفين : ايمن كلك؟

ادهم : لتردين على سؤالي بسؤال ثاني سألتج سؤال جاوبي على كده ..

ايفين : اني راسلته..

خزرني ولو بيده يكسر الكرسي على راسي..

ضل يباوع بعيني كأنما ضربني الف مره خلاني اخجل واكره نفسي ضل ساكت بس عضلات وجها تتحرك...

ايفين: مو مثل ممفكر ، اني ردت ابدي صفحه جديده وحياه جديده طلبت منه يمسح صوري كتله تحجبت وكمت اصلي وتندمت لان جنت ادزلك صور بدون حجاب ومحد علمني هسه تعلمت الصح من الخطأ لهذا راسلته بس والله ياعمو بشنو تريد احلفلك ماعندي نيه سوء ولا ادري بيه هيج نذل ويفضحني..

ادهم : كم مره كايل ومنبه عليج اي شي تردين تسويه كولي لاختج واذا معرفت تتصرف تجين تسأليني او هيه تجي تسألني ليش تمشين وره عقلج ..

ايفين : غلطت اعرف بس صارت بعد..

ادهم : وهسه شيريد منج سولفيلي.

دنكت راسي خجلانه ماكدر اجاوبه نتر.

ادهم : لتسكتين عندي شغل فوك راسي ...

ايفين : كالي اذا مسويت وياه علاقه يرسل الصور الك ولفهد..

كام يدك على الكرسي باصابع ايده دنك راسه وره شويه مرر اصابعه بشعره وكال..

ادهم : خابريه..

ايفين : شنو ؟

ادهم : مثل ما كتلج خابريه ..

ايفين : زين شلون عمو مو يجلب بيه..

ادهم : انطيني موبايلج..

كمت خليته بيده وكفت بصفه نزل برنامج من سوق بلي..

ايفين : شنو هذا البرنامج..

ادهم : تسجيل مكالمات واريدج تخابريه وتجرجريه بالحجي خليه يهددج ماشي..

ايفين : ماشي..

ادهم : هاج خابري وفتحي سبيكر وابد لتبينين انه يمج احجي بثقه ولترتبكين ..

ايفين : تمام..

دكيت عليه بسرعه جاوبني..

اسامه: ها فكرتي؟

ايفين : بشنو ؟

اسامه : لتغشمين روحج..

سكتت معرفت شجاوب هو طلع موبايله وكتبلي بيه وداره عليه قريت جاوبته.

ايفين : دخلت سيلين وخفت منها ومسحت كلشي قبل لا اقراه..

اسامه : هاا كلش زين لعد اعيد الكلام عليج باعي اريدج مثل قبل لا لا قبل مجنت مستفاد شي اريد شغلات ازيد من اخابرج اعلمج عليها.

باوعت على عمو كتبلي وقريت الكاتبه كتله..

ايفين : لا احجي هسه علمود اعرف شنو تريد مني واضبط وكتي لان ماكدر اجاوبك كلهم موجودين وبابي متنقفل..

اسامه : لعد شوكت يفرغ البيت.

كتبلي عمو..

ايفين : الصبح عدهم دوام واضل وحدي.

اسامه : كلش زين لعد باجر اخابرج واكلج شنو تسوين..

اشرت لعمو شنو اكله كتبلي.

ايفين : اسامه لو بيك تكلي هسه ونتفق لو شتريد تسوي سوي ميهمني..

اسامه : عادي يعني ادز الصور لادهم...

كتبلي ودار الموبايل عليه.

ايفين : اصلا يدري وهو اللي كشفني وشايفهن قبل ايمن يعني اذا تكله ما اتأثر..

اسامه : صايره متخافين..

ايفين : لا ما اخاف لان يدري بيه..

اسامه : يعني قصدج متسوين اللي اريده.

ايفين : لا ماسوي..

اسامه : لعد باجر صورج ومحادثاتج كلها يم فهد وابو ادهم عود خلي يفيدج عمج الخابصتنه بيه.

كتبلي ادهم..

ايفين : انتظر حباب بس كلي شسوي شنو تريد مني لتفضحني..

اسامه : اي هيج من البدايه وجري عدل باجر تحضري اريد لبس حلو ماريد شي مستر اريد اتفرج على البياض واهم شي تطلعين ** ...

كلش خجلت دنكت راسي استحيت من عمو باوعتله صار نار بس ماعرف ليش ساكت ومتحمل ، رجع كتبلي وداره عليه بعصبيه قريته وكتله لاسامه..

ايفين : يعني شنو نفتح كام لو ادزلك صور.

اسامه : شسوي بالصور هههه اريد صوت وصوره ..

رجع عمو كتبلي اكدي على هاي الكلمه الكتبها قريتها وكتله..

ايفين : ماشي واذا مسويت التريده ..

اسامه : مو بس ادز لفهد ولابوه لا انشرهن واخزيج..

كتبلي عمو سديه ..

سديته منه وكال..

ادهم : كتبيله دخلو للغرفه وسديت الخط وخليه يعيد اخر جمله كتابه كليله مسمعت واكتبلي شنو اسوي وشنو يعجبك بعد ..

كتبتله اسامه دخلت سيلين وسديته اكتبلي اخر شي شنو كلت لان مسمعتك..

دزلي ..

اذا خلفتي بالوعد ومافتحتي كامره وياي وسويتي اللي اطلبه منج ادز صورج لفهد وابوه واخزيج ..

قراها عمو وكال..

ادهم : توسلي بيه كليله انه عرضك شلون هيج تسوي بيه المفروض تستر عليه.

كتبتله ..

رجع كتبلي..

لج شو تغير الحجي شنو اتفقنه سمعي عيني لا استر عليج ولا تسترين عليه مارايد شي منج بس علاقه تلفون قابل راح اخذج بالحقيقه وخايفه .

ادهم : كتبيله

شلون اذا فضحتني وطلبت مني اشياء اكبر..

كتبت ودزلي ..

تعتمد عليج شلون تريحيني اني استرج..

ادهم : كليله يومين انتظر دوام سيلين يبدي واخابرك ..

كتبتله كتب.

راح انتظر هواي بس يلا تسوين الانتظار باي حب..

ايفين : هسه شسوي.

ادهم : انطيني موبايلج ومعليج بعد بأي شي..

ايفين : شكرا عمو لان تفهمت..

مجاوبني اخذ موبايلي وطلع..

سيلين 

طلعت من الغرفه وسد الباب تخبلت شسوي ماعرف ايدي وكفت حتى شغل متاخذ اجتي مريم وكفت يمي لزمت دشداشتي وكالت..

مريم : متت جوع شوكت نسوي غده عفيه.

سيلين : تعاي حبيبتي هسه اسوي ..

كعدتها يمي وحميت الها الاكل الباقي الصبح وسويت نص لفه وخليتها بيدها..

سيلين : اكليها بين ميصير الغده..

اخذتها واني بلشت اطبخ بفكر سارح لهناك وسمعت انفتحت باب غرفتنه مديت راسي باوعت شفت عمو طلع بس صاير نار نصيت الطباخ ردت احجي وياه فات لغرفه المكتب وسد الباب رحت لغرفتنه لكيت ايفين كاعده تبجي متحملت بعد اعصابي تلفت كمت اصيح عليها فقدت وماعرف شنو حجيت وشنو كلت دموعي كامت تنزل من وحدهن هيه كامت حضنتني وبجت وتتوسل هيه ندمانه وكلش خجلانه من السوته ..

دفعتها ورحت للحمام غسلت وجهي ورحت للمطبخ لكيت عمو كاعد شافني ودنك على الموبايل ، ارتبكت من شفته وخجلت من نفسي لان صوتي عله وهو موجود...

رحت يم الطباخ فتحت التمن وكلبته فركعت دهن وسديت القبغ ، تنهد سمعت صوت نفسه عالي حجه بصوت ناصي ...

ادهم : ليش انتي عصبيه ومتعرفين تداركين الامور.

سيلين : مكدرت شكد حاولت اسيطر على نفسي متحملت ..

رفع عينه باوعلي وكال..

ادهم : تره انه ومريم ما متعلمين على صوت عالي وهوسه ياسه الله يرحمها جانت نسمه مافديوم سمعت صوتها ، انه هنا اهم شي عندي راحه بنتي ونفسيتها مهما معزتكم كبيره لكن بنتي اهم واعز ، تعرفين اجتني خايفه من صوتج وبجت ..

دنكت راسي خجلانه..

سيلين : اسفه من شفتها كدامي ماعرف شصار بيه ومكدرت اسيطر على نفسي..

ادهم : ماريد بنتي تتأثر بتصرفاتكم الطفل كلشي يتعلم اذا شاف الكبير يصيح وصوته عالي هو هم يكوم يصيح اذا سمع غلط هو هم يغلط لان احنه مرايه الهم تصرفاتهم تعكس اخلاقنه وتربيتنه..

سيلين : ماعندي شي اكوله غير الاسف.

ادهم : ماريد تتأسفين بكد ما اتمنى تسيطرين على نفسج وكت الغضب..

سيلين : ماعرف ياريت تعلمني واخلص من هاي الحاله لان تعبت.

ادهم : بكل بساطه من تصيرين عصبيه من انسان ديري وجهج عنه لان ماطول مكابلته راح تزيد الاعصاب عندج ابتعدي راح يخف الضغط عندج وبالتالي تنتهي نوبه الغضب ..

سيلين : عمو صح بس اني يمكن بسبب الضغط والمسؤوليه مال اختي كبرت وتفكيري الزايد بيها وبمرضها خلاني افقد اعصابي..

ادهم : صح التفكير والضغط الزايد والمسؤوليه الكبيره تولد الانفجار لكن انتي اكبر من هذا تكدرين تسيطرين على كلشي تكدرين تخففين الضغط بدون تفكير زايد انصحها وانطيها الثقه واراقبها اما صحتها زينه ومابيها شي ميستوجب كل القلق النفسي العايشته ..

سيلين : صح..

ادهم : ما اريد الصار اليوم ينعاد صرتي عصبيه تعاركتي ويه اختج اتركي المكان و راح تبردين وتشوفين الشي تافه ميسوه كل هاي الاعصاب وراح تفكرين بحل ليش احنه مندري بعلاقه اسامه وايفين مو جنه سوه من عرفنه الموضوع ليش حسيتج تفاجأتي..

سيلين : صح بس ايمن عرف وهاي بحد ذاتها فضيحه.

ادهم : الغلط يضل غلط هيه غلطت تتحمل غلطها ليش محسبت حساب لهذا اليوم ، كافي تحملين نفسج اخطاء انتي ما مسويتها..

سيلين : تمام اسفه مره ثانيه لان رفعت صوتي.

ادهم : ماكو داعي للأسف شنو سويتي غده كاعد اشم ريحه طيبه..

ابتسمت لان رغم ضوجته ومبين كلش ضايج حتى مكدر يبتسم وراد يغير الموضوع علمود ما اضوج اكثر..

سيلين : سويت تمن وتبسي...

ادهم : عاشت ايدج صار لو بعده علمود نتغده لو مالكم نفس..

سيلين : لا هسه اصب ونتغده كلنا سوه.

ادهم : يلا راح اصلي لان توضيت ومالحكت التهيت ويه ايفين..

سيلين : عمو منو كلك؟

ادهم : خابرت ايمن عرفت سبب البجي مالتها متعاركه وياه مقبل يحجي هددته سولفلي..

سيلين : وانت شنو كتله..

ادهم : مهما اكول واحجي وانطي مبررات مايصدك لان هو مو طفل شاب ويعرف نيه الشباب شنو وقره المحادثات وشاف الصور بعد براحته يريد يرجع يحجي وياها او يتركها بالحالتين هيه عيشتها مو على ايمن ولا الها صله قرابه بيه ماكو داعي لكل السوته..

سيلين : خجلت لهذا انهارت.

ادهم : خجلت من ايمن وما خجلت من رب العالمين خليها تتعلم درس علمود تحسب حساب لكل خطوه تريد تسويها..

سيلين : توقعتك راح تعصب وتحجي عليها شو دخلت عصبي وبعدين صار هدوء يمكن حتى ما حجيتو..

ادهم : مرات العقاب بالضرب اريح من عقاب الضمير هسه هيه ضميرها كاعد يوجعها يمكن اذا ضربتها او صيحت عليها راح ترتاح بينما من اساعدها او اسمعها واتفهم مشكلتها راح تعرف حجم خسارتها للناس اللي يحبوها اكبر غلط تقابلين المشكله بصياح وضرب ما راح تتعلم بينما هسه راح تكعد ويه نفسها وتندم على كل غلط ارتكبته ب

يتي وتعرف انه ما استاهل تخون ثقتي ..

سيلين : صح ماكو شي اقوة من عذاب الضمير..

ادهم : يلا اروح اصلي.

سيلين : ادعيلي عمو يبرد كلبي وتنستر اختي..

ادهم : معليج تنستر لتفكرين زايد...

عافني وراح رحت سويت زلاطه وحضرت كلشي بقه بس اصب رحت لغرفتنه لكيت ايفين نايمه والشهكه بيها مال بجي رحت يمها كعدتها.

سيلين : افونه كعدي حبيبتي كومي تغدي ويانه ..

فتحت عينها وكامت حضنتني ..

ايفين : يعني مضايجه مني..

سيلين : ضايجه عليج مو منج يلا انسي وعمو كال اني احلها.

ايفين : اي الله يوفقه حجينه ويه اسامه ..

سيلين : شلون يعني مفهمت..

وبدت تحجيلي كلشي ..

سيلين : الله يستر شنو ناوي عمو.

ايفين: مادري بس لتكولين عفيه اني كتلج لان نبه عليه ماحجي..

سيلين : لا ماكول يلا كومي.

رحنه للمطبخ وهيه فاتت للحمام غسلت واجتي كعدت صبيت واجه عمو شايل مريم يبوس بيها وهيه تشاوره وتضحك جر كرسي كعدها وكعد ...

اكلنه بهدوء ولا كأنما صايره مشكله قبل شويه كدر يسيطر على الوضع ويتدارك الموقف ويأمن روعتنه 

كمل وكام ...

ادهم : عاشت ايدج راح انام ساعه واكعد عندي شغله العصر ..

سيلين : نوم العوافي ..

ادهم : الله يعافيج .

حجاها والتفت على مريم ..

ادهم : مرايم كملي غده وغسلي وتعاي نامي بحضن ابوج..

ضحكت وكالت ..

مريم : يعني ماشوف كارتون.

وجها يخبل كبالك شنكه مال معجنات..

ادهم : عدنه دوام وكاعدين من الصبح لازم نام ساعه ونرتاح علمود نكعد نقره مو كلتي المس نطتني واجبات.

مريم : بس الله ربنا ومحمد نبينا وهسه سيلين تحفظني..

ادهم : اروح انام وانتضرج واذا متجين ازعل ..

مريم : هسه اجي..

حجتها ودنكت تاكل حسيتها ضاجت متريد تنام واني محجيت كلت اكيد ميحب اتدخل بتربيته لبنته ..

كامت غسلت وراحت لغرفه ابوها وسدت الباب ايفين هم راحت نامت واني كملت تنظيف المطبخ ورحت نظفت البيت على كيفي بدون صوت صارت ساعه اربعه دخلت سبحت وطلعت رحت لغرفتي مشطت شعري ودخلت بفراشي ونمت ،،،،

حسيت الدنيا ظلمه كمت علكت الضوه ساعه سبعه ونص ، وبس اني ايفين كاعده وطالعه من الغرفه ، طلعت لكيتهن بالهول هيه ومريم متمددات ويباوعن كارتون عفتهن ورحت توضيت وكفت اصلي احس ثكل بطني وقويه عبالك حجاره وكل شويه اعيد الوضوء وما اكدر اكمل صلاتي كلش ضجت لميت السجاده ومصليت بعد لان مكدرت احافظ على الوضوء ،

 مرت يومين واني نفس الشي يزداد عندي الالم ، تركت العشا وكمت اكل شغلات خفيفه حسيت نفسي احسن شويه..

وره اسبوع ضبط اندك باب البيت طلع عمو ادهم فتح الباب سمعت صوت عمو صلاح يصيح..

سيلين : هذا مو جنه صوت عمج صلاح..

ايفين : اي والله ..

كمزت كدامي واني وراها فتحنه الشباك وباوعنه واكفين هو وعمو ادهم .

عمو صلاح عصبي ويصيح وعمو يباوعله برود ولا كأنما اكو بشر كدامه راح يحرك روحه بعد شويه..

ادهم : هسه اختصر كلامك التريده شنو ؟

صلاح : تروح تتنازل وتطلع اسامه من الحبس ؟

ادهم : واذا متنازلت شتسوي عندي فضول اعرف..

صلاح : طلقه براسك ادزلك واحد انطيه جم فلس وفضت راحت..

ادهم : وكتلتني راح يطلع ابنك من السجن اكيد لا ههههه..

عمو صلاح كام يفرفح وعمو ادهم مبتسم..

صلاح : تنازل احسن الك وللكل.

ادهم : منو الكل بنات اخوك الي يوميه واحد بيكم مهددهن لو ولدك الجبير يبوس غصب والثاني يشهر ويفضح بعرضه احسن لمنو اريد افهم.

صلاح : تفاديا للمشاكل اسحب الشكوه وخلي ابني يبات بيته صارله ٣ ايام بالحبس ومجنت ادري بيك انت المشتكي لان متحفظين على اسمك..

ادهم : لعد شلون عرفت ،، المهم انه رايح لنفس المركز واشتكي عليك بتهمه التهديد وهم اريد اشوف منو ساعدك ونطاك اسمي..

صلاح : لخاطر ياسه طلعه مو هذا ابن اخوها.

ادهم : وانه لخاطر ياسة حبسته لان ذني بنات اخوها وبعدين شبيك خايف عليه خليه كم يوم يتأدب السجون تصنع الرجال وتقوم سلوكهم.

صلاح : ابني مدلل ما متعلم على البهذله الله يخليك وامه متخبله بس تبجي..

ادهم : جان ربيته مو افضل ما تدللة من تنطي خبز انطي وياه تربيه يا ابو زاكروز.

صلاح : هسه شلون الحل شنو..

ادهم : الحل يمكم تربي ولدك وتعوفون بنات وضاح بحالهن انسوهن اصلا.

صلاح : صار وغيرها.

ادهم : اذا ما يمر شهر كامل ما اسحب الدعوه واخليها قائمه حتى وان تنازلت واي صوره تطلع او محادثه لايفين ارجع احرك الدعوه من جديد واحبسه.

صلاح : طلعت مو هين ما انلام من جنت اكرهك وماردت انطيك ياسه بس اخ من وضاح كله صوجه وكعنه ويه هيج ناس..

ادهم : هاي بعد صرت كابوس بحياتكم تقبلو الموضوع وخلص..

ضل عمو صلاح يحجي ويسب عمو ادهم عافه وفات سد باب الهول وعمو وحده يكمز ويهدد بالطرمه ، شافنه واكفين باوعلنه وكال..

ادهم : مو كلت نبتعد من نسمع اي شي يخصهم ليش تعاندوني...

سدينه الشباك وكعدنه ، عمو صلاح ضل يحجي يحجي تالي مل ركع باب الشارع وطلع ، بيوما ردت افهم من ادهم الموضوع منطاني مجال غير السالفه بسرعه...

نرمان ملتهيه بدراستها وايمن بعد مشفناه ابد يرجع ويصعد فوك

حتى اني ميحجي ويايه مره شفته فات كأنما ماكو بشر كدامه تركته براحته..

اقترب موعد دوامي وعمو وصاني عده توصيات واجه اليوم الي لازم ابلش اداوم بيه ، بسبب المشاكل الصارت مرحت وياه للدوام مثل ما طلب مني علمود اتعود على الوضع ..

كعدت الصبح لبست ملابسي وتأنقت خليت كحله وبس ، طلعت لكيته كاعد بالهول منتضرني شافني ابتسم وكال.

ادهم : صباح الخير ..

سيلين : صباح النور.

ادهم : نروح ..

سيلين : نروح..

ضحك وطلعنه ، بالطريق سألته.

سيلين : اليوم مرايم من وكت ماخذهة الخط.

ادهم : خابرتهم يجون عليها اول وحده لان بلش دوامج منو يطلعها اخاف عليها..

سيلين : حقك ..

سكتنه وصلنه للكليه صف السياره ونزلنه وصلني للقسم مالتي وكال .

ادهم : اريدج قويه ومتنهزين من اي شي فرضي شخصيتج بأي مكان تفوتين بيه اي احد يسألج سؤال جاوبي حتى وان معرفتي الجواب جاوبيه بسؤال بنفس الموضوع خليه هو يدوخ ،،،

وخلي ابالج هواي راح تشوفين ناس مو مثلج،،،

 هنا عده مستويات وتفاوت بالاخلاق والاسلوب وكلشي انتي اتبعي اللي تشوفيه صح معليج بغيرج ولتتأثرين بتصرفاتهم ..

سيلين : ماشي عمو شكرا.

ادهم : عفوا انه بالبنايه الكبالج تندلين مكاني اي شي تحتاجين بلغيني وصيت عليج الاساتذه كلت الهم قريبتي علمود ياخذون بالهم منج ومن تجوعين اذا حبيتي تاكلين اكلي بالنادي واذا تخجلين صعدي يمي نتريك سوه ساعه تسعه ونص ماعندي شي.

سيلين ؛ ماشي عمو..

انداريت ردت افوت صاحني التفتت طلع فلوس من جيبه وخلاهن بوسط دفتر وخلاه بيدي.

سيلين : شنو هذا؟

ادهم : دفتر كتبي بيه ملاحظات ..

سيلين : اعرف دفتر بس البداخل الدفتر شنو؟

صفن بوجهي لان شافني ضجت وحار شنو يحجي خاف ما اتقبل اخر شي كال..

ادهم : قبل كلشي هاي مو فلوسي ..

سيلين : لعد ؟

ادهم : فلوس ياسة.

سيلين : تقشمرني مو ؟

ادهم : لا بس ياسه عدها فلوس جنت ضامهن الها وشغلتهن والوارد قررت انطيه الج ولاختج لان اعرف بيج متتقبلين مني فلوس 

سيلين : بس اني ممحتاجه كلشي عندي..

ادهم : ومنو كلج انتي محتاجه بس هاي فلوس جوه ايدج كلشي يصير اطلع غفل من الكليه ترجعين تكسي تجوعين وراج شرايه ملازم ..

سيلين : شكرا..

ادهم : الف مره كلتي شكرا وانه ماحب هاي الكلمه .

سيلين : هذا هو اروح.

ادهم : روحي بس قبل لا تدخلين القاعه كولي ( المبدئ) ٥٦ مره...

سيلين : ليش يعني..

ادهم : متعلم اي عمل ابلش بيه او شي يخص دراستي اكوله والحمدلله ينجز العمل بالنجاح واتوفق..

سيلين : هسه اسويه خاف اكول شكرا وتضوج..

ابستم وحجه هو وماشي..

ادهم : انتضرج على الريوك تأخرت عن المحاضره.

راح وضليت اباوع عليه لحد ما اختفى من نضري..

رحت دخلت للقاعه مرحله اولى وكعدت ثالث سره وكمت اطبق كلشي علمني عليه كل نصيحه كل كلمه حسيت ثقتي بنفسي زادت صرت لا اراديا اتصرف مثله احجي بطريقته ، اتصنع هدوءه الى ان شفت نفسي بمرور الايام كاعد اصير نسخه مصغره منه بس على هيئه بنت...

مشت الايام والي شهرين اداوم يوميه نفس الروتين نروح ونرجع ، اكمل شغل البيت اكعد ادرس ، وايمن لحد الان ماخذ موقف من ايفين ...

ايفين عمو جابلها كتب صف ثالث متوسط علمود تدرس وتقدم خارجي حبت الفكره كلش وكامت تقره بواهس ودخلها معهد بيه دورات خصوص و خلالها خط..

اسامه صارت كعده بيتنه واجوي عمامي والكل نطه الحق لعمو ادهم وصارت الملامه على عمو صلاح و ولده وهيج صار الاتفاق احنه نضل هنا ومحد يتعرضلنه منهم ارتاحينه نوعا ما..

مشت الايام وعلاقتي كل مجالها تقوه بعمو وصارت بينه اسرار وسوالف هواي بحكم احنه اغلب الاوقات سويه سواء بالدوام او بلبيت ...

اخلص محاضرات وكبل اصعد فوك يمه نتريك ونسولف وانزل ، علاقه محترمه لابعد الحدود لاهو حسسسني اني غريبه عنه ولا اني حسيت با احراج بعلاقتنه واكو شي غلط.

وبيوم حبيت اشكره بطريقتي طلعت بره الكليه اشتريت ساعه وغلفتها وكتبت على الكارت عباره...

( شكرا لمن اضاء قناديل العلم والمعرفه في قلبي شكرا لرمز الرجوله والوفاء شكرا لك معلمي لك كل الحب ) 

سيلين..

خليتها بجنطتي ودفعت فلوسها ورجعت للكليه ورجعنه للبيت سويت غده وتغدينه وكلمن راح لغرفته اني اخذت الهديه وخليتها على الميز مال مكتب وطلعت رحت نمت كعدت درست صارت ساعه تسعه رحت للمطبخ اسوي عشا توني ابلش اجتي مريم كالت بابا يريدج..

رحت اول ما فتت رفع عينه باوعلي وكال..

ادهم : شنو المناسبه ؟

سيلين : شنو ؟

دفع الهديه على الميز كدامي مفتوحه من الغلاف يعني شايفها.

سيلين : لان سجلتني بالكليه وتعبت عليه هواي وعالجتني حبيت اهديلك شي بسيط لان هواي تغيرت بسببك ...

ادهم : بس انه تعرفيني ما احب ترديلي شي مقابل شي..

سيلين : لا العفو فهمتني غلط قصدي شكر مني الك..

ادهم : جان بسطتيها بشي احلا واحبه اكثر..

سيلين : مثل شنو؟

ادهم : اكله طيبه من ايدج ونتعشه سوه احسها اكثر لطافه..

سيلين :ماشي هسه اسوي ..

رحت للمطبخ وره شويه اجه فتح الثلاجه شرب مي ، وكال..

ادهم : انه ماحب

اكلف احد بس الهديه عجبتني وذوق عاشت ايدج.

التفتت عليه و جاوبت بسرعه وبدون تفكير.

سيلين : بس اني مو اي احد..

باوعلي ورفع حاجبه ضل صافن عليه ارتبكت..

سيلين : يعني قصدي ...

هو سهلها وكال .

ادهم : مثل اخوج الجبير..

سيلين : اي بالضبط..

سحب الكرسي وكعد ..

ادهم : وين مريم؟

سيلين : صعدت فوك اجه ايمن واخذها اشترو وكال راح تبقه يمنه..

ادهم : جيد ..

سكتت وره شويه كال..

ادهم : احسج ضجتي او بالاصح غضبانه؟

سيلين : لا منو كال..

ابتسم وكال..

ادهم : انه اكول ..

سيلين : غلطان ..

ادهم : مغلطان وتعرفين كلش زين كلامي صح..

سيلين : شنو بداخلي انت وتعرف بيه ضجت لو عصبت ..

ادهم : ميحتاج ادخل لداخلج واعرف لان قاريج..

سيلين : عمو شفتني صيحت عيطت تره صدك بديت اضوج..

ادهم : لا بديتي بمشاعر حزن ممزوجه بالغضب..

باوعتله واستغفرت ...

ضحك وكال..

ادهم : حزن وغضب ممزوج بدهشه..

رفع حاجبه متحدي واني جريت كرسي وكعدت كباله..

سيلين : شلون عرفت بله فهمني.

جاوب بهدوووووء...

ادهم : نبره الصوت واختلاف الطبقات الصوتيه عندج خلتني اعرف بشنو تحسين..

ابتسم بخباثه وهو يقره ملامحي فركت وجهي بيدي صدك ردت ابجي...

سيلين : شلون ميزت بله ؟

ادهم : عرفتج عصبيه لان ارتفع صوتج وكمتي تحجين بصوت عالي وسريع وبعدها صارت طبقه الصوت معتدله وانخفضت وسرعه الكلام صارت بطيئة ههههه..

سيلين : كمل كمل راح تخبلني .

ادهم : هههههههه شوف علامات الدهشه شلون انرسمت براحه على الوجه؟

سيلين : شلون عرفت بله ..

ادهم : عيونج مفتوحه اضافه لصوتج مرتفع وسرعتج بالكلام ..

سيلين : اكوم اسوي عشا احسن ..

ادهم : يعني باجر ما ادوخ بالريست واتريك براحه..

سيلين : شنو قصدك ؟

ادهم : يعني متشاركيني بلحظات التذمر والضوجه مالتج ههههه.

سيلين : هاي اني ..

ادهم : لا انه منو يوميه يصعد وجها مكلوب ويشكي يشكي يمليني سلبيه وينزل..

سيلين : عمو لتخبلني شوكت شاكيه..

ادهم : تنكرين صعدتي تلطمين لان صديقتج كسرت علبه الباودر مالتج لو من تأخرتي على المحاظره والاستاذ طردج خليني ساكت ما اكمل..

سيلين : بس اني مو قصدي افرغ السلبيه بس ردت احجيلك لان ضايجه شسوي ماعندي صديقات وايفين متفهمني لهذا اجي عليك ..

ادهم : وانه عاجبني اشاركج العبئ المخيم على تفكيرج وقلبج اعتبريني صديق مقرب او اخ ...

سيلين : ونعم الاب والاخ والصديق..

ابتسم وكال..

ادهم : كوني صداقات لتنعزلين تره الصداقه الحقيقيه هيه مفتاح لابواب السعاده بحياتج وفضفضتج الها تختلف عني لان انه رجل راح تخجلين وتتحفظين عن بعض الاشياء التحبين تحجين بيها بينما صديقتج لا راح تحجيلها كلشي وبطلاقه..

سيلين : ما احب الاختلاط وانت تعرفني كلش زين.

ادهم : بالعكس احلا ما بالدنيا الاختلاط بس يكون اختيارج اكثر وعي وتعاملج حذر اخذي منهم ولتنطين ..

سيلين : لعد شلون تكلي احجي كلشي لصديقتج.

ادهم : ما قصدت اسرار ممكن تدمر حياتج بالمستقبل اكيد ضد هذا الشي لان راح تعيشين بخوف لان حياتج او مستقبلج بيدها بسبب هذا السر وشنو تشوفين غلط بيها متكدرين تعوفيها بسبب هذا السر تخافين تفضحج انه قصدي من الفضفضه شغلات متكدرين تشاركيني بيها شاركيها لصديقتج ضحكي فرفرشي هيج شي. ...

سيلين : همه اساسا مجاميع مجاميع كل ثنين وتلاثه سوه بس اني وحدي اكمل محاظره واصعد يمك..

ادهم : انتي منعزله زايد لهذا محد يحاول يتقرب منج لان عبالهم راح تصديهم والصراحه شكلج من بعيد يوحي لهيج شي ههههههه.

سيلين : عمووووو ؟

ادهم : يلا سكتت شنو راح تسوين عشا ..

سيلين : ماعرف هسه بلشت افكر..

ادهم : امشي نجيب لفات تجين.

سيلين : اجي ماعندي شي..

ادهم : يلا منتضرج بالسياره.

طلع واني رحت لبست عبايه اسلاميه وشال صاحت ايفين..

ايفين : وين؟

سيلين : معليج كعدي اقري.

سكتت رحت بستها.

سيلين : راح اجيبلج عشا واجي.

ايفين : خلي اجي وياكم طاكه روحي.

سيلين : يلا كوومي..

كامت لبست ترواكه فوك التراك مالتها ولبست شال وطلعنه جان الجو بارد نهايه شهر ال ١١ ..

شافنه عمو ابتسم ..احنه هم بادلناه الابتسامه صعدت ليكدام وايفين ليوره باوعلها بالمرايا وكال..

ادهم : شلونها افونه ...

ايفين : زينه .

ادهم : اقري زين علمود الامتحان .

ايفين : دا اقره والله..

ادهم : عاشت ايدج..

ايفين : وايدك..

رحنه وكفنه كبال مطعم نزل جاب لفات سفري وخلاهن ليوره يم ايفين وصعد وره شويه شمينه ريحه الاكل التفتت ليوره لكيتها مطلعه لفه وكاعد تاكل شافتني ضحكت انتبه عمو باوعلها بالمرايا .

سيلين :تره خيانه هاي.

ايفين : جعت ماتحمل بعد ههه.

ادهم : عوفيها تاكل بالعافيه .

ايفين : الله يعافيك عمو انت نفسيتك طيبه مو مثل بعض الناس..

سيلين : ههههه هسه شكلت ولج.

ايفين : عينج على لفتي.

ادهم : انطيها لفه خاف تغصين..

سيلين : ها اتفقتو عليه بسيطه..

ضحكو ورجعنه للبيت اول ما دخلنه صار ايمن بوجهنه وياه مريم شاف ايفين بسرعه تغيرت ملامحه وعصب سأله عمو..

ادهم : ها وين رايحين..

ايمن : دكيت الباب عليكم ماكو احد طلعت اشوف سيارتك موجوده لو طالع لان مريم رادت تنام.

ادهم : جان خابرت.

ايمن : ماعندي رصيد ونرمان هم مخلصه هسه اروح اجيب واجي هاك بنتك تصبحون ع خير.

ادهم : وانت من اهله.

سيلين : وانت من اهله..

اباوع على ايفين واكفه يم الباب مال الهول وتهز برجلها سريع وتاكل بضافرها شافهة عمو وكللها.

ادهم : عليمن هالتوتر على كيفج شنو الصار.

ايفين : لا ممتوتره بردت.

ادهم : طلعي ايدج من حلكج اضافرج خلصت..

نزلت ايدها وعمو فتح الباب دخلنه للبيت رحت بدلت وطلعت للمطبخ اجه عمو ومريم نامت لان متعشيه اكلنه بس اني وياه.

ادهم : باجر عندج امتحان..

سيلين : اي صعب كلش..

ادهم : لا مو صعب اقري زين.

سيلين : قريت ..

ادهم : الله يسهلج وتجاوبين..

سيلين : الله كريم ..

كمل وكام ..

ادهم : تصبحين على خير..

سيلين : وانت من اهله ..

شكرا لزيارتكم عالم روايات سكيرهوم