رواية أعظم خيانة الفصل التاسع والعشرون 29 بقلم الزهيريه

ريماس/ من تنسد بوجهك كل البيبان يبقى بعد بس باب رب العالمين ندگه وننتظر رحمته واني حياتي ما ارتاحيت بيها ويگولون التالي ربه عالي وان شاءالله اشوف الراحه بيوم اني من وصلت بيت بيان اكذب إذا اگول ما خايفه لانه ما اعرفهم بس الساعات ألأولى في بيتهم حبيت بيبية بيان تحسها ما بگلبها حقد اما ابوبيان تحسه حذر مني وكابوس حياتي بيان هذا اخذني لغرفته يحقق ويايه 

وچانت صدمه لبيان من عرف انه اخته أغاريد مريضه تركني بعد ما چان واگف على راسي مثل عزرائيل وراح گعد على السرير ودموعه تنزل واخذ كلينس وهو يمسح دموعه بعدها گال 

بيان / چانت تتعالج وشگالت بعد علينه احچيلي بالتفصيل 

ريماس/ والله چانت تگول غلطتي الوحيده ابتعدت عن اهلي واي چانت تتعالج وحتى جلسات كيمياوي چانت تاخذ بس المشكله العلاج ما يفيدها واغلب الوقت تاخذ مسكنات لأنه عظامها تهيج عليها واني لليوم صافنه ابو شوارب ليش اخذ رحاب ويا وهمه اصلاً من تمرضت طردوها بعد العلم عند الله 

بيان / انتي ليش تگولين رحاب ما تگولين أغاريد 

ريماس/ اني من تعرفت عليها ام رحاب صيحلها رحاب وآني بالبدايه مثلك عبالي بنتها لام رحاب بس هي بعدين گالت لا هاي مو امي وحچت الي قصتها 

بيان / شنو طبيعة شغل أغاريد يم ام رحاب 

ريماس/ مو أخاف احچي 

بيان / احچي لا تخافين 

ريماس/ بصراحه هي شغلها بالليل يعني 

وسكتت وهو كمل ورايه 

بيان / بليل هاي تطلع تبياته يعني يا ربي وين أنطي وجهي آي ريماس انتي شنو شغلچ ويه ام رحاب هي أغاريد ابوها چان ضابط وأخوها حالياً ضابط تطلع تبياته انتي شنو يسوون عليچ شده يا ورد 

ريماس/ لا اني شغلي مو مثل شغل رحاب 

بيان / ليش هاي ماخذه دكتورا وانتي ماخذه ماجستير انتن اثنينچن نفس الخيسه 

هسه عندي اهم سؤال واريد اجابه عليه شنو صار ويه عمي مهند وشلون تعرفتي عليه واستدرجتي يمچ 

ريماس/ والله اني گتلك كل شي ما اعرف چانوا يخلوني أصيد شباب وأسلمهم الهم وبديت احچيله من اول يوم رحنه عليه إلى ما سلمته الهم من صوروا وهو بلا ملابس ويايه 

بيان / ايا بنت القندره شلون خطه والله على بال ابليس ما وارده انتي تدرين عمي مهند شلون مات 

ريماس/ بشنو تريد احلفلك والله ما چنت اعرف شيسوون بالشباب الي يستلموهم من عندي 

اتقرب عليه وضربني راشدي قوي وهو يگلي 

بيان / بنت الكلب يصوروهم وياچ حتى يبتزوهم ويخلوهم يتبرعون بأعضائهم لجماعتچ بس گليلي ليش سويتي هيچ بعمي مهند لكونه حبچ وچان يريدچ زوجه اله 

ريماس/ حلفت الك گتلك على الوضع كله شلون چان 

بيان / يعني عمي دفع حياته على مود ينام وياچ 

اي ونام وياچ حاله حال غيره لو لا 

ريماس/ ترى حلفت الك انت ما تريد صدگ اما عمك ما نام ويايه لا هو ولا غيره 

بس فاجئني من جرني عليه ودفعني على السرير وصار فوگي وهو يگلي 

بيان / خطيه عمي ظليتي بنفسه آنتي وهسه اني راح سويها وياچ بثواب روحه وان شاءالله يوصل الثواب 

ريماس/ طبعاً إذا اريد أوصف الواقعه كلها ما تنوصف يعني كلها صارت خلال ثواني ما نزعني ملابسي بس رفع دشداشتي ونزعني الداخلي اما هو بس عضوه بعدها حسيت بوجع بطني حتى من عطت 

بيان / هسه لو تعيطين من السبت للخميس ماكو احد يسمع المكان فارغ مزرعه هاي 

ريماس/ هذا كله ما طول هواي وابتعد عني وهو يگلي 

بيان / شعجب المكينه عندچ ما گايمه شنو چانوا يسوون بيچ لعد شنو خليچ منظر تجذبين الشباب بشكلچ على العموم هذا الثواب كل مره اكرره وياچ على روح عمي يعني عمي انطى حياته وانتي تبخلين عليه بالممكينه مالتچ حتى هذا مو عدل بس اطمئني ما نزلت شهوتي حتى لا تحبلين شبيه مخبل اخلف من وحده مثلچ

ريماس/ وعافني وفتح الباب وهو يأشر براسه بمعنى طلعي بره 

گمت وبطني توجعني طلعت من غرفته وهو سد الباب من طلعت ودخلت بالغرفه الي قبل شويه چنت ادگ الباب عبالي بيان بيها وچانت فارغه ما بيها احد وبيها غرفة نوم وبيها حمام دخلت للحمام اغسل لانه بعده ينزل عليه دم قليل غسلت ورحت على السرير وبس خليت راسي غفيت بعد دريت بروحي

ما حسيت غير بيان يگعد بيه ويگلي / شنو ميته گومي سوي عشه 

ريماس/ والله بطني توجعني واحس جسمي كله مكسر ما بيه حيل اريد بس انام 

بيان / شوفي ما بيه حيل احچي راح انزل وتعالي ورايه سوي عشه 

ريماس/ عافني وراح گوه گمت سلمت امري لله ونزلت للمطبخ لكيت الحجيه بالمطبخ گاعده تثرم باللحم شافتني وگالت روحي حبوبه إذا تعبانه نامي ما عندي شي هو تبسي لحم أذبه بالفرن والخبزات ام حارث خبزت وجابت صفطت خبز والچاي اني اسوي 

جاوبتها / عادي اساعدچ ما عندي شي وبقيت جوه ايدها جيبي هذا وأخذي هذا رجعي لمكانه وكملنه التبسي والحجيه حضرت اله القوري والمي الحار هي بس خلت الچاي اليابس وخلت المي وتگول ما يشربون الچاي إلا اني اسوي بيدي وبقينه گاعدين بالمطبخ ونسولف وسوالفها كلش حلوه بعدها گامت تبچي وتنعي على ابنها شگد قهرتني ومن شفت دموعها على مهند حقدت حتى على نفسي 

ودخل بيان شافها تبچي وظل يبوس بيدها وراسها وهو عينه عليه يگللها / عساها بصحته وعافيته كلمن چان السبب بموت عمي مهند 

ريماس/ اني بقيت ساكته وظل بيان يواسي بيها إلى ما انفتحت الباب ودخلت وحده وسطة عمر واول ما شافها

 بيان گال/ لا هله ولا مرحبا خير يا طير شبيچ مثل البومه تفترين علينه 

لقاء / اني جايه على واحد لا ذمه ولا ضمير من عايف مرتك حامل ما تگول شلون تصرف 

بيان / وانتي احد صخم وجهچ وگلچ آخذيها شعجب ماخذه لميس وياچ وبناتچ الباقيات عايفتهن يم أبوهن 

لقاء / تريد اخلي بنتي للمذله مالتك لو تموت وانت غصبن عليك تدزلها مصرف فهمت كل شهر 500 الف 

بيان / شنو شو انتي تخوطين بصف الاستكان يا قاضي غبي مثلچ يحكم نفقه 500 الف لو تموتين ما ادفع ذيچ المحكمه وروحي اشتكي عليه وبعيني اني ادفعلها نفقه عن طريق الدوله انتي كل عقلچ انطيچ بيدچ فلوس خطيه الظاهر اخوچ الي گاعده يمه يريد مصرف منچ لكون گاعده عنده لهذا اداعين بمصرف لبنتچ والا ليش ماخذتها يمچ غير حتى تحصلين فلوس وربچ راح اخليچ مثل عمي وسام فلس احمر ما تحصلين مني 

لقاء / شنو بكيفك إذا نشتكي على نفقه نص راتبك ناخذه 

ريماس/ وبيان اجى يمي وسحبني عليه وخلاني گدامه وحضني قوي وهو يگللها 

بيان / انتي خطيه غير عقلچ على گدچ والطمع عمى عينچ اني تزوجت والقاضي ما يحكم غير 150 الف لبنتچ لانه راح يخلي بالاعتبار انه اني عندي بيت ثاني وأسره اصرف عليها ما يحكم وربچ واني متاكد واخوچ الطماع مثلچ وهو الي دى يخطط الچ غبي مثلچ والظاهر عمي وسام چان كاشفچ بدليل چان ما ينطيچ فلس بيدچ انتي شتريدين يجيب بس فلوس ما ينطيچ واني مثله ما گدرتي تقفصين عليه انتي وبنتچ 

ريماس/ إذا اگول من حچى بيان المره تخبلت قليل لانه گامت تحچي شيش بيش مره تغلط ومره تفشر مره اجر غراض من المطبخ وشمر بالگاع هنا بيان دفعني عنه واجى لزم المره من رگبتها وهو يگللها شوفي لچ لا طلعين خبالچ هنا عليه وحق الموت الي اخذ عمي مهند اطلع خبالي عليچ اخليهم يشيلوچ منا بأسعاف يله ولي 

ريماس/ وبيان دفع هاي المره قوي وطلعها بره وبعدين عرفت من الحجيه انه هاي المره هي ام لميس زوجة بيان وعلى ثاني يوم صار موقف خلاني اشوف لميس كذلك 

بيان / اكو مواقف تهد حيله للإنسان وشگد يكون قوي بس يضعف وشگد هد حيلي وفاة عمي مهند بس أغاريد حطمت نفسيتي وبعد ما عرفت أغاريد شنو تشتغل احس عقلي نشل تماماً أضافةً التهديد الي وصلني خلاني ليلي ما أنامه وبعد يوم كله مشقه بين ريماس وبين قدري الأسود عمه لقاء ثاني يوم أني بالدوام واتصل بيه فرقد وهو اني چنت ادور عليه وهو يگلي وينك شو ماكو بعدها گلي تعال بعد الدوام مر عليه 

واني بالدوام اتصل بيه أبويه وگال 

سامي / بيان اليوم اجتي لقاء ولميس وزوجة اخوها لعمتك لقاء لزمن هاي المسكينه ريماس خلصن عليها تعال شوفها 

بيان / اريد من الله ينطيني طولة بال حتى اتحمل الي دى يصير من ارجع يصير خير هسه اني بالدوام 

ورجع اجاني اتصال التهديد بخصوص يريدون تصريح يمرون بي من السيطرات بس ما انطيت جواب ولما انتهى الدوام احس روحي تنازع رحت على فرقد للمركز وگعدنه نسولف وبلغته بالتهديد الي اجاني 

فرقد/ مو گتلك ترى راح يبدي وياك الابتزاز شلون صار ويه عمك اني ليش گتلك ازوج البنيه حتى نكون بأمان 

سيدي / بس همه شيسون بالتصريح عن طريقي اكيد العصابه يديرها راس چبير بالدوله هو يجيبلهم تصريح 

فرقد/ لا انت تكون كبش فداء هاي العصابات الصماخات الچبيره الي بالدوله ما تظهر بالواجهة يخلون وكلاء عنهم حتى إذا يصير شي يضحون بالوكلاء وهمه وطنيين ويخافون على البلد ما يعرفون هيچ وتطلع انت ضابط بالداخليه تدير هاي العصابه شبيك بابا هاي الكلاوات والشعارات شبعنه منها وبعد من يتصلون بيك گللهم نشروا الفديو ما يهمني 

بيان / سيدي غير انفضح اني 

فرقد/ اعرف تنفضح انت في حالة نشروا الفديو بس اني متاكد ما ينشرون هسه لانه عدهم شغله في بغداد يريدون يهربوها واني اريد وقت لانه راح اطلب إسناد من الداخليه على ابو شوارب اريد نكسب اكثر وقت ممكن 

بيان / زين سيدي ليش ما أظاهر انه اني موافق على أنه اجيب الهم تصريح واعرف شنو يريدون يهربون والموعد 

فرقد / همه ما راح ينطون اي معلومه وفي حالة گلت اي وتفاوضت وياهم راح يسجلون الك تسجيل صوتي يعني تنطيهم دليل ثاني اقوى من الاول عليك بس حتى إذا نشروا الفديو ما راح يصير شي اني وزوجتي وموبايلها نسرق ونشروا فهمت بس إذا تسجيل صوتي هذا ما راح يتكذب ابد لهذا اريد باچر آجيب زوجتك وتجي تقدمون شكوى أنه موبايلها نسرق 

بيان / تمام سيدي وبعد حچي هوايه ظلينه نسولف تقريباً وصلت للمغرب يله طلعت من يم فرقد ورجعت للبيت دخلت بيبي وابويه دى يصلون عفتهم وصعدت فوگ دگيت الباب على غرفة لميس سابقاً لانه ريماس تنام بيها ماكو جواب فتحت الباب الغرفه ظلمه فتحت الضوه لگيتها نايمه رحت گعدتها وهي شلون جفلت من شافتني وبعدها گالت 

ريماس/ الله يخليكم بعد لا تضربوني والله جسمي بعد ما يتحمل الله يخليك بيان طلگني وخليني ارجع لبيتي اني قابله عصابة ام رحاب يصفوني بس ما ابقى هنا إذا ما رجعتني لبيتي هسه والله انهزم منكم 

بيان / ظليت اباوع عليها گعدت على طرف السرير وجاوبتها / والله ما الي خلگ الچن اني منين اتلگاها يا ربي بابا إتحملي هي فتره وتعدي وبعيني اطلگچ شايفتني ساحل روحي عليچ وبعدين لمن انتي هيچ نچره ليش ما انهزمتي من ام رحاب وعصابتها 

وگامت وگفت ورفعت ملابسها وشوفتني مكان جرح عدها وگالت 

ريماس/ وانت منو گلك اني ما انهزمت من عدهم وربي يشهد عليه انهزمت منهم لاربيل ويايه اخواتي تدري شنو سووا رجعوا لزموني واخذوا كليتي وهذا مكان الجرح واغتصبوا اختي ام عشر سنوات ومو بس اني هيچ مسوين بيه حتى رحاب الي هي أغاريد أختك كذلك هم مهزومه منهم وهم مرجعيها وماخذين كليتها ماكو وحده بينه عايشه وياهم حياة يوميه من رجال لرجال وعاجبتها بس مجبورين اني ادري شنو احچي وياك ما راح اصدگ بس هاي الحقيقه 

بيان / حتى لو چنتي ضحيه المجتمع ما راح ينظر الچ على انه انتي شريفه على هذا شغلچ هسه اي حچي نحچي صدگيني ما راح يفيد اتمنى هذا الوضع الي انتي بي ينتهي على خير باچر نروح اني وياچ حتى نشتكي على الموبايل مالتچ ونگول نسرق حتى اي شي يصير احنه مبلغين 

ريماس / تمام الصبح اروح وياك 

بيان / انزلي سوي عشه الي جوعان 

وعفتها ورحت لغرفتي سبحت وبدلت ونزلت وچانوا بيبي وابويه مخلصين صلاه وگعدوا يحچون على عركة لميس وامها ويه ريماس واني چنت ناوي نيه گشره على لميس بس لكوني مشغول تاركها وبالي مو يمها وتقريباً ربع ساعه واجتي ريماس جابت العشه وجابت علاج بيبي الي قبل العشه وظلت بيبي ساعه تمدح بريماس على العشه وهي نفسها اشوفها ماخذه عليهم 

ما اعرف ليش من عرفت ماخذين كليتها استخطيتها انقهرت عليها شعور راودني من ناحيتها وريماس كلش حلوه بس ما اعرف ليش من حچتلي شنو چانت سوي ويه الشباب الي تتعرف عليهم نفسي كشت منها وبذيچ الليله چنت تعبان كلش واريد بس انام بس عندي أشياء اريد أسويهن على موبايلي لهذا طلبت من ريماس جيبلي الچاي وصعدت فوگ 

ومن دخلت لغرفتي نمت على سريري واول ما فتحت الموبايل نمت وما حسيت غير على ريماس وهي تگلي 

ريماس/ بيان هذا الچاي مالتك وموبايلك صار ساعه يدگ يمك انتبهت على الجهاز الرقم غريب وهم رقم دولي رديت عليه اجاني صوت الي كل مره يهددني بنشر الفديو مالتي 

جاوبته / انشر حبيبي هاي البنيه زوجتي إذا انشر الفديو ساعتها اطلگ زوجتي وخلاص وينتهي الموضوع 

بس فاجئني من گال 

المجهول / وأغاريد أختك هم طلگها عدنه هواي تصوير فديو عليها ننشرهن ونشوف وهي بيدنه وانت تعرف نقتلها ونشمرها شمرت الچلب 

بيان / وغلق الخط بوجهي وريماس چانت واگفه يمي وگتلها / تذكرين من گلتي اتمنى اعرف ليش ماخذين رحاب وهي مريضه هسه اگلچ طلعوا يدرون بيها اختي وگاموا يهددوني بيها 

وظلت ساكته وتباوع بوجهي بعدها راحت وبقيت ذاك الليل الوب لما طلع الصبح وخليت ريماس تبدل واخذتها ورحنه للمركز قدمنه شكوى على أنه الموبايل نسرق منها ومن دى يدگون اسم ريماس حاسبه ابو الحاسبه گال 

البنيه عليها شكوى ضبط واحضار اعذرني سيدي لازم تنعرض على ضابط التحقيق وهي تقربت عليه ولزمت ايدي وتگلي / عفيه بيان ابقى ويايه 

شكرا لزيارتكم عالم روايات سكيرهوم