رواية كريات الدم السوداء الجزء الثاني الفصل الواحد والثلاثون بقلم زحل شريف
- رغم حمل اريج بس الكل يحسب لولادة قدر الي جنا منتضريها بفارغ الصبر وماعرف هل هو فضول لمعرفته تأثير الجينات الوراثيه لو خوف أن يكون المولد يشبه اهلها حسب كلام اريج والكل حتى. ابوي رغم تحفظه وماراد ثابت يحس بس كان واضح عليه القلق وأكثر من مرة سمعته يحجي ويا امي.
ابو اسعد::أمس دز عليه عمي فالح وحجى وياي بموضوع ثابت اتزوج هل بت لله بس لاتنسون هل عرقها وهيج راح تعرضونا للقال والقلت وماعدنا استعداد نعوف ثابت احنى نريد بناتنا مايرحن الغريب بس تعرف عقلية المجتمع.
وفيه::همه احسن من الله الخلق هل صنف من البشر
يعترضون على خلقه .
ابو اسعد::ناس ماتقتنع بهل كلام،،خلي يرد بت عمه
عاد يخلف منها وهيج محد يفك حلگه
وفيه::وشنو الي وخلف من مريم والي يصيرون من قدر يذبهم لو شنو ؟
ابو اسعد::لا مو هيج بس البنات مجتمعات بيت محمد وهم محاجياته شگلك هذا نسل وهيج عيالنا راح يحرمون أنو
ناخذ من اخوتنا لو ننطيهم ،، بعد لايخلي قدر تخلف وخل يتزوج .
وفيه::كون بلغت ثابت بهذا الكلام.
ابو اسعد::لا مستحيل شلون اخشن خاطرة
بس كلت لو .
وفيه::لو شنو بس لا تريدة يرجع مريم .
ابو اسعد:: لايابة هو مستحيل يردها اصلا قبل كم يوم
كال بلغ جبار يأخذ غرفه مال بنته لو يريد انطيهم بدالها فلوس وابيعها .
-شكد انقهرت عليها شنو ذنبها الله هو اختارلها هل نسب والحياة ،،وسبحان الله يمكن رب العالمين راد يريح قلبها بحيث ولدت بالسابع خابرنا كال راح تولد دكيت على نغم اجت تركض حجيتلها يله يمعودة امي تگول خل تجيب اغراض الطفل ،، شو هاي عافتني وراحت لبيتها
اجت بيدها علبة شلون الحصاله .
ابو اسعد::ها كملتي ؟
نغم::لحظه عمو هاي امانه قدر وصتني اذا ولدت
أنته تسمي المولد
-نزلت دموعي هز رأسه ابوي فتحت الحصاله نغم وراوته
الاوراق ضحك ودعالها .
ابو اسعد::الله يرضى عليها ويسهل أمرها وتولد بالسلامه
نغم::عمو هسه عرفت من اتمد ايدك تختار انتبه
ابو اسعد::وإذا ولد
قدر::كالت خلي يسمي يوسف.
ابو اسعد::رحمة الله على فاروق هلشي بفضله البنيه
تربت بيته تعبان على تربيتها يله يأبه امشينا
-بقيت أنه انتضر بفارغ الصبر لحد ما اتصلت بيه نغم
وبشرتني
نغم::ولج ولدت بنيه وثابت يگول حلوة تشبها خالتها
-ياااااي گولي والله ،، بقيت اطفر من الفرحه
نغم::دروحي بلغي اريج باي
-من فرحتي نضفت وطبخت امشي واغني
لحد ما اجت اريج كوى تمشي
اريج::ها شنو اخبار قدر.
-ولدت بنيه ويكولون تخبل
اريج::يعني تشبه قدر
-لا تشبه خالتها ،، هزت أيدها ماعاجبها
اريج::يعني صخله ههه جا مو حجيت گلتلكم جينات
-ياجينات شبيج اكلج تشبه خالتها جا خالتها مو حلوة؟
اريج::ولج انتي غبيه شبيج ترى حتى قدر رغم لونها
بس ترى واضح عليها وصيفه تصيح لامها وأبوها من كثرتها
العاليه وبراطمها وبالنسبه لأختها بعد واضحه من سوادها
-شسالفه اريج صح البنيه سمرة طوخ بس غير
تفلش طولها جسمها شعرها عيونها كلشي بيها حلو
اريج::تبقى عبدة .
-وبقت اريج تقلد وطلعو قدر ومن شفت الطفله تفاجئت سبحان الخالق نسخه مصغرة من سونه ونوب عيونها ملونه
وهل شي وارثته من جدنا وطول فترة بقاء قدر عند اختها
اريج تحاول توصلها بس ماخلتها امي وثابت فرحته ماتنوصف طاير ونوب سولفو على اتفاق اسعد وقدر
متنا ضحك
اريج::وشنو بكيفكم تقررون وشبيه أخذ لابني
-خزرها اسعد سكتت ،، واطولت فرحتنا بولادة قدر
صدمتنا اريج الي جانت محسبة غير حساب بس على كولت امي الگدر ماگدر جابوها من المستشفى تلكيتهم امي دموعها تصب وعمتي لافه الطفل جوى عبايتها تقربت عليها فرحانه
شهكت بخوف من شفته ضليت أتلفت جرتني نغم
نغم::يمعودة شبيج سم بالرحمن غسلي وجهج
-ركضت للسنگ غسلت وجهي وأنه استغفر التفتت على نغم
هزت راسها بأاسف ،، ومنا بدت معاناتنا ويا اريج الي رفضت
الطفل خبلتنا كسرت خاطري وأسعد حاول وياها
اسعد::الحمد الله مناقصه ايد لو رجل بس خلي
تمر كم شهر وناخذه لافضل الأطباء وانتي فاهمه الطب أطور
كم عملية يصير اجمل شاب .
-وهيج يوميه يكعد بالساعات هو يحجي وياها
بس ما اقتنعت نفسيتها تعبت كلش رغم احنى ماحسسناها
نوب ماتقبل تروح لبيت اهلها وبقينا متكتمين على الموضوع
بس اهلنا وناسنا عرفو والكل متعاطف وياها الى أن بيوم
الي اجت قدر تلكيتها اخذت منها تينه وانشغلنا بيها گامت
تسلم على اريج رغم ماردناها تلتقي بيها بس غلطه تندمت عليها خلت بنتها يمي وكامت دقائق وسمعت الصرخه خليت تينه بالكاع وركضت ويا ماوصلت لباب غرفتي طلعت قدر
تصرخ واريج وراها وحركة سريعه دفرتها بضهرها طاحت
قدر ركضت عليها كومتها بس هيه تخبلت تصرخ على صوتها المتو اهلي نريد بس نلزمها ماكدرنا تكسر الخاطر اطفر تريد تشرد منا طكت بالدرج وطاحت شالها ابوي فاقدة لحد ماصحيناها بيتنا انخبص
ابو اسعد::صيحولي اياد خل نأخذها للمستشفى
-ضلينا واحد يطك بالثاني واريج تصرخ ،، كام ابوي
يريد يكتلها لزمنا وعمتي فوگ الضيم استلمتنا دعاوي
اياد ضل محتار. خابرنا اسعد بلغنا وثابت جان مسافر
لحد مااجه تخبل من شافها والكارثه من تشوف بنتها
تضل تصرخ خذناها لبيتها وأبوي كال لاتبلغون اختها
وفيه::ليش يمعود بلكي من تشوف اختها تطمن.
ابو اسعد::اذا عرفت ماتسكت
-لحد مااجت سونه ومالمتها على السوته ،،انه التهيت بدانبي والبيت ومناك تينه وقدر بس صدك لو كالو اخوات سونه
ماعافتها و مديحه اختهن وأكثر لحد ما اخذتها رجعنا لبيتنا
وأسعد مل من اريج الي صارت ماتنطاق
اريج::روح للعبدة كابلها اي جا غير سونه يمها
اسعد::قسما بالله اذا ماتسدين حلكج انهيج ولج بختج
بحالتج تتجاوزين على زوجه ثابت ياادبسزز أنه الج
-وهيج خلصتها يوميه هوسه گام مايجي بقت عمتي
ملتزمتها هيه الي متكفله بالطفل نوب يوميه يكتشفون بي
عيب خلقي طلعت عمتي شايلته
ام اريج::هذا يدرر من جوى
وفيه::شلون يعني ؟
-حطنه يگلبن بي يكسر الخاطر دزو على اسعد اجه إذا
للدكتور هو وثابت اجو وجوهم مگلوبه
ابو اسعد::ها شنو كال الدكتور
ثابت::فتحت الادرار صايرة جوى بلبوله يكول مانكدر نسويله شي اله بعد ٧ اشهر .
ابو اسعد::لا اله الا الله
-الطفل يحتاج عناية خاصه واحنى هلكنا وهيه تعبتنا
على ساعه وكامت تصرخ وادعي وتغلط أنوب غرفتي تفلشت
مرة تدفر الكنتور كسرت المرايه وگله كوم ومن اجت مديحه حتى تسويلها علاج مثل علاج قدر وگفنا أنه ونغم يمها
وهيه تخبط بهل اعشاب شگلها يضحك شاده الشال مثل المصريات وتشتغل بتركيز
نغم::جنج ام عجوز.
مديحه::ترى آشور .
ـ هههههههه اي الي تعثرينه يطلع بي حرمل .
وفيه::نزول عليج يمديحه بس والله شاطرة
-غمزتلنا متباهيه كالت يله .
نغم::اوكفن خل اطلع الطفل من يم اريج خطيه لايختنك
-راحت نغم وردت شاردة طلعت. وراها اريج
وهيه تصرخ وتتهدد على مديحه
اريج::ام السحورة العبدة
مديحه::ترى أنه مو عبدة
-خرب عقلج نوب تحشش كوى لزمنا اريج منها
اريج::اذا ماحطيتج بالجمريه تعاي خل اشويج
واذبج للجلاب ياكح ،،، ياأم الزلم بت بشار الراقصه
- العجيب مديحه مااهتزت واگفه تباوع لاريج ومبتسمه
اريج::كله منجن انتن الي سكيتني وشوهتن ابني
شوفي ولج كولي لهذيج النغله وين ماالزمها اطلع بروحها
هيه وبنتها اكتلها خلاص اذا وصلت خلي تشوفلها نيه وتشرد
لان ماراح اعوفها..
-التفتت على مديحه الي دفعتني وصارت گبال اريج
مديحه::انتي جذابه مابيج شي ،، نصيحه روحي
استغفري ربچ بلكي يتقبل منج ويرحمج لخاطر هل طفل
-يمه تخبلت اريج هجمت تريد تهمش مديحه
اجه ابوي دفعها وهيه تغلط وتفشر،، جرينا مديحه وامي تتعذر منها
وفيه::مسحيها بوجهي ماما مريضه ماعليها عتب
-ردت مديحه وهيه تفتح شالها وتلفه عدل
مديحه::نصيحه ياخاله تعاملوا وياها وجهنا كلشي ما بيها
صح مو هين عليها طفلها بس ترى ما بيها شي .
-صفنت امي وأنه ونغم صلينه وحدة تباوع للثانيه
صحنا لمولي حتى يوديها لبيت سونه طلعنا وياها للباب
حجت امي بخجل
وفيه::ماوصيج ماما ماريد كلام اريج يوصل لقدر خطيه
نوب تخاف .
مديحه::لا خاله شسالفه هنه حجايات نبلعهن مثل ماعون
زردة بمحرم .
-جرتها امي بوستها وتشكرنا منها راحت واحنى ماخلصنا
من اريج نوب عمتي الي تلوم بينا .
ام اريج::يعني كل عقلكم جايبين هل سحارة تعالج بنتي
هنه الي ضرنها اي متأكدة هاي سوالف قدر واختها .
وفيه::اتقي الله كافي عاد .
ابو اسعد::كلمة زايدة بهل موضوع تأخذين بتج وياج
وجهالنا احنى نتكفلهم خلص تعبنا ملينا من سوالف اريج
-مو ايام مثل الجحيم تبهذلنا كلش بس الي لفت انتباهي
جيات مريم المتكررة لاريج والغريب اريج ماتتضايق منها
عكس من يجينا أحد تكول لادخلونه عليه مادرت الهن بال
نغم::اگلج مرايم شعدها جايه وكأنو معزومه لحفله
وتتعمد تلفت انتباه ثابت اذا موجود تسلم عليه
-مدري بسوالفها شو جانت تكول مااتفقنا ولا تراهمنا
هسه صار عزيز
نغم::ابد مامرتاحه لوجودها
-ايام وثابت كلش ماله خلك وتعب لأن قدر حالتها
مامستقرة وكم مرة ابوي راح عليها رفضت ترجع
ابو اسعد::من گلت وجود اختها مو لصالحها
اسعد::يأبه حرام خطيه يعني تحللون النفسكم وتحرمون على غيركم تگدر تتخلى عن ثابت أنته يوم اذا متشوفه
تبقى تعتب وتزعل عليه هاي اختها مالها غيرها
ابو اسعد::وهل شي أنته سببه .
اسعد::استغفر الله العظيم يأبه هاي شدخلها بهاي
البنيه مريضه وين تروح غير لأختها مو اجت لهنا والكلبة
هجمت عليها وخبلتها .
-طلع اسعد مزعوج وثابت حيل تغير بحيث دوم ماله
خلك وعصبي وهو طبعه هادء كاعد ولازم رأسه
وفيه::شبي راسك خاف مانايم
ثابت::صداع موتني مليت من الحبوب ماجي يسكن
-فز ابوي بقلق لزمه يمسح على رأسه كمت جبتله بندول
شربه نغم سوت كهوة مافاد
ابو اسعد::روح نام ارتاح شويه.
ثابت::بنون خليلي فراش بالاستقبال
-ركضت حضرتله فراش امي وأبوي ضلو قلقين عليه
وفيه::خابر اياد يأخذه للطبيب خاف ضغطه
ابو اسعد::قاسه اله مولي مابي شي
-بقى ثابت بشكي من رأسه امي احتارت خابرنا عمتي ام جواد اجتنا
وفيه::يصيح من رأسه
ام جواد::ولج خاف سوله شي
وفيه::منو قصدج ترى قدر مالها بهيج أمور
ام جواد::لا مو قدر ياخوفي بنيت جبار
-لطمت امي على صدرها بخوف
نغم::استغفر الله بس أنه هم شاكه
-ضلن وحدة ترفع وحدة تكبس بحجن بصوت ناصي
خاف عمتي ام اريج تسمع اشرتلي امي ادنيت عليها
وفيه::ولج رقم مديحه مو عندج
-بس ليش ؟
روحي جيبي نقالج خابريها الي يله وتعالن لغرفتي احسن حتى محد يسمعنا
-كمت جبت نقالي ونغم لزمت الباب دكيت ردت تضحك
مديحه::اهلا بنون شعجب ذاكترني اليوم
-اشرتلي امي فتحت صوت سلمت عليها وتحجي بهمس
وفيه::سمعيني خاله بس نصي صوتج
مديحه::كولي خاله خو ماكو شي
-حجتلها امي عن ثابت سكتت مديحه شويه أنوب ردت
مديحه::حضرلجن ورقه وقلم .
-اشرتلي امي كمت بسرعه جبتهن ورديت كعدت
ونغم لازمه باب الغرفه وكل شويه تلتفت علينا بفضول
مديحه::ورگ غار اصلي وجفت وحرمل وملح مركبي
وجاوي وشب هذن تقرن عليهن المعوذات سبع مرات
وفيه::اي ونوب
مديحه::ورق الغار يوميه تحرگين سبعه لمدة سبع ايام
والباقي تخلطينهن وتبخرينه بيهن كون يشمه يتشبع
بي كلش ونوب تجيبين خل وتخففينه بماي ورد
وترشين بعتبت بيته وبيتكم بس كون خل مال بيوت
مو هذا مال المعامل وروح امي بس تسوينهن يصير حصان
-ضحكت عمتي ام جواد
وفيه::يامديحه ريت ربي يسعدج ويهديلج فاطمه
مديحه::تنهدي بحيل الله اريد اطيبها على عيب
-متنا ضحك سديته منها وراحت عمتي للسوك جابت
الخلطه مال مديحه كامت امي تسوي بيها اريج ضلت تحجي علينا
اريج::الطفل اختنگ من دخانجن شنو هاي
وفيه::عن النفس ماما بلكي ربج تتحسن نفسيتج
هزت أيدها ماعاجبها وطبكت الباب وعتمي ام جواد
حاجت ابوي لأن هو عندة نسخه من مفتاح بيت ثابت
استغلوا عدم وجودة وراحو بخرو بيته ايام وثابت بدة يتحسن بعد ماجان رافض حتى رجوع قدر گاله ابوي.
ابو اسعد ::روح جيب زوجتك .
ثابت::خليها ترتاح يابة خطيه كلش تعبانه.
ابو اسعد::أن شاءالله خير .
-ماانقطعنا عن قدر امي يوميه تروحلها دنيا جاي انضف البيت ونغم راحت تسبح وتفاجئ بجيه جبار دخله ابوي
للصاله سويتلهم جاي راحت امي سلمت عليه رادت تطلع
صاح عليها.
جبار::تعاي ام اسعد انتي اختنا وبنية عمنا ويهمج خوتنا
-هزت راسها امي ورجعت گعدت قدمت الجاي وطلعت
وكفت يم الدرج استمع لكلامه
جبار::من مدة اجوني ناس على مريم .
-رد ابوي
ابو اسعد::اي الله يسهل أمرها أنه عود ردت ادز عليك بخصوص هل موضوع .حتى يطلكون بالمحكمة بس ترى هيه بأاعتبار خلصت عدتها لأن طلتك الشيخ هو الأهم
جبار::مو هذا الجانبي .
وفيه::ها جا شنو ؟
جبار::سألت عن الولد وأهله طلعو خوش ناس، وبلغت خوانها كالو مشيها المن گاعده بس من گلتلها ضلت تبجي
-امي وأبوي ساكتين،، دخلت نغم اشرتلها تعاي
وكفت يمي مستغربه
نغم::شگو ؟
ـ شاورتها اسمعي وانتي تفهمين هزت راسها خوش
وجبار كمل كلامه
جبار::ضلت تتوسل بويه شبيج اذا ماتردينه مانجبرج
گالت اعرف غلطي جبير بس والله ندمت أنه احب ابن عمي واريدة انجان رايدلي السعادة يابويه رجعني اله
-التفتت على نغم لكيتها فاكه حلكها نوب أحنى مو واكفين
وحده يم الثانيه صارت وجوهنا مقابل بعض مخنزرين
حصرتني الضحكه على شگلنا ركضت للمطبخ وهيه لحكتني
نغم::خرب يومج شكد فشله من عمو هسه حس بينا نتسمع
-ولج يافشله عوفي الفشل خلينا بالصدمه
نغم::مرايم وماادراك مامرايم
-دمشي نسمع شنو رد ابوي رجعنا لمكانا والظاهر امي وأبوي بعدهم بهول الصدمه بحيث ساكتين رد جبار يحجي
جبار::يا وادي البت جانت مراهقه والحمد لله انو لا لكيتوها خسرنه شرفها ولا
-قاطعه ابوي
ابو اسعد::لا يأبه شنو هل كلام بنت صاغ سليم وثابت
أكد هل شي من تمم زواجه منها لكن ياجبار
جبار::أنه لو لا خوتنا ومعزتك عندي ومشتري ثابت جان ماجيت بس اعرف بيك تحبني وتريد خاطري وتحسب بنتي
وبنتك واحد وخل يحسب زواجه عليها عقاب ومابيها شي
يردها ويسكنهن سوى شو بيته جبير يكدر يحطهن وحده فوك وحده جوى
-ضل ابوي ساكت
جبار::ها شتكولون
ابو اسعد::طلبك قرارة يم ثابت
جبار::وهو مايكسرلك كلمه
وفيه::بس خو مايجبرة
ابو اسعد::العلية احجي ويا ويصير خير
-ترخص جبار ابوي طلع ويا الباب أنه ونغم ركضنا للمطبخ
نغم::كارثه اذا
-معقولة يرجعها
نغم::شگلج اذا ابوج طلب منه وتعرفين بثابت مستحيل
يزعل عمو .
-اجت امي وهيه تستغفر
وفيه::شوراج يامرايم شتحوگين بس والله فلا اخليج
تنفذين الي براسج هسه تبچين عليه وتتوسلين نوب تحبه
-لليل وأنه ونغم كل شويه نتوقع شي اريج ساكته
وعمتي مكابلتها وكاعده نوب تبهذلت لأن مستحلات غرفتي
اصعد أبدل فوگ لو بغرفة امي وكل يوم انام بمكان كلش تعبت من هل وضع اجه ثابت وأنه ونغم نترقب شوكت ابوي يفتح ويا الموضوع التمو بعد العشى اسعد واياد ومولي
وحديثهم حالة ابن اسعد
ثابت::لا تستعجل خلي نتأكد من دكتور يضمن النا تحسن بحالة كون اقل شيء ٥٠ بالميه يله نسويله العمليه
-وابوي ماضيع فرصه فتح موضوع مريم وحجالهم طلب جبار الولد تفاچئو
اياد::شنو هو لعب لو توها عرفت بنفسها تحبه
ابو اسعد::خليك محضر خير بابا
اسعد::ياخير حجي زوجته وبنته ومااعتقد قدر بيها قصور
حتى يلتجئ لهيج أمر شله بشلعا الگلب
ابو اسعد::أنته هيج تشوف ؟
-ابتسم اسعد والولد دنگو
ابو اسعد:: تفكير صح ومنطقي إن كان مرتاح ويا زوجته
وعندة منها خلفه المفروض مايفكر بزواج ثاني لأن هل أمر راح يولد مشاگل واحتمال الزوجه ماتقبل وتتفكك أسرته
اسعد::مو هيج يأبه حاله عن حاله تفرق
ابو اسعد::شلون بله
اسعد::ثابت من البدايه ماكان مستقر ويا مريم زواجهم
مو متكافى ،، أما عن الرجال الي يتزوج على زوجته رغم
استقرار زواجه الاول هاي حالات نادرة القلب ماعليه سلطان
الحب بلاء خو محد يگدر يتحكم بقلبه
ابو اسعد::اي وانته اول من حكمه قلبه من ردت اريج
الباشا:: صح بس ماكو شيء ثابت غير وجود الله
والدليل اكو دعاء يگول يامقلب القلوب يعني وارد هل قلب يتغير من حاله إلى أخرى اتمنى اكون كدرت اوصلك الفكرة
ابو اسعد::بس هم اكو أية تگول ولاتزرو وازرة ازرة أخرى
اسعد::اعتذر يأبه بس تشبيهك الحالة مو صح لان الزواج
حلال بدال ما يستمر بعلاقه محرمه بالعكس أنه اشوف
الصح هو أن تتخذ هيج قرار وماتحرم وتعذب نفسك
من امرأة أنته تريدها .
ابو اسعد::ويهدم أسرة ويكسر امرأة وثقت بي وخلفتله
وعاشت ويا بمساوئه .
-اشتد النقاش بينهم وأبوي مصر انو اسعد يجاوبه
على صوتهم اجت عمتي ام اريج وهيه شايله الطفل
توجهت لاسعد انطتهيا آخذة وهو يتحسر شكد ننقهر عليه
دنك باسه .
ابو اسعد::اتمنى تنتبه لعائلتك وتفهم مقصد كلامي
أنه ماحرم حلال الله لكن مع التحفظ على الطرف الآخر
-هز رأسه اسعد متقبل كلام ابوي غمزله ثابت بمعنى كافي
سكت ابوي وهو يستغفر ردو على موضوع جبار
ابو اسعد::اي ياثابت شتگول
ثابت::على شنو يأبه
-عمتي تستمع بتركيز وهل شي أكد بأن عدها علم
ابو اسعد::على كلام جبار
ثابت::هل شي مستحيل .
-التفتت على صوت عمتي الي ردت منتفضه
ام اريج::وليش لا شكو بيها بنيتنا ومنا وبينا ومو عجيب
ياما ناس اطلگو ورجعو
ثابت::لاتدخلين ام اريج هل أمر يخصني مابي جبر خواطر
ام اريج::من خذت قدر مااعترضنا وتقبلناها لخاطرك
ثابت::وعلى شنو تعترضين ؟ وين الغلط بزواجي منها
ام اريج::الغلط بنسبها
اسعد::خلص كافي الف مرةگنالجن لاتحجن بهل شي
شبي نسبها انتي احسن من الله الخلقها.
ام اريج::وليش انفعلت أنه احجي ويا اخوي .
-وابوي التزم الصمت على غير عادته وهاي اول مرة
الولد يعلون أصواتهم بوجودة .
ثابت::الى متى تبقين تعيدين بهل سالفه إذا اخوج
المفروض من تسمعين أحد يحجي عن زوجتي ماتقبلين
ام اريج::ماحاجين عن شرفها بس هذا واقع والدليل
بنتك طلعت على خالتها .
اسعد::والواقع هيه زوجته وأم بنته .
ثابت::غير ربي استجاب دعوتي وطلعت رقاوي على خالتها
-ابتسم اسعد واياد ومولي دنكو يخفون ضحكتهم.
ابو اسعد::يأبه فكر البنيه شاريتك وندمانه على عدم تمسكها بيك خطيه تكسر گلبها
ثابت::لا يأبه مااكدر ارجعها اظلمها حرام عليه لأن مالي نفس بيها طلعت من نفسي صدگني وبعدين مستحيل اكسر قدر
--سلاسل--
-التفتت عليها مصدومه من صوتها صرخه هزت البيت
دنكت لازمه عمليتها ومنحنيه ركضت مديحه جرتها للقنفه كعدتها وأنه بس اباوع ثابت بقى متصنم بمكانه يباوعلها رجع نزل تينه لكركوتها وتقرب لقدر صاحت بي.
قدر::لا تدنه وخر
-هز رأسه تمام وبعد ضل واكف يباوعلنا ،، أنه مانطقت حرف وهيه بس تبجي ادنيت عليها سحبتها كامت أشرت لمديحه اخذيها للغرفه ودنكت على تينه شلتها خليتها گدامه ،،اخذها مني درت وجهي ودخلت الغرفه لكيت مديحه محتارة بقدر الي ملابسها فايضه طلعت گتله خابرلي خاله وفيه.
ثابت::شكو ؟
-اخذ قدر للدكتورة جاي تنزف رديت عليها كومتها للحمام سبحتها وغريرت ملابسها اريد اطلعها طاحت
صرخت اجه يركض شالها متوجه بيها للسيارة .
ثابت ::جيبي حجابها بسرعه
-لبست واخذتلها حجاب وبشت ولحكته وصلت للباب
ورجعت على مديحه اريد اوصيها اشرتلي روحي صعدت وهو يسوق بسرعه قبل مانوصل المستشفى كال لبسيها نزل جاب عربانه ونزلها تلكونا الممرضات خذنها جيكتها الدكتورة ثابت شرحلها حالتها كالتلهم حولها الغرفه استلموها ابر توقف النزف ومغذيات صحت تون الدكتورة استلمتنا رزايل .
الدكتورة::عملية وماصار هواي وتتعرض لكل هذا
شنو هل تخلف مريضه تبقى تحت رعايه لمدة شهر وأكثر .
-بين تحاليل وعلاج طلعنا من المستشفى
رجعنا للبيت تلتكتنا مديحه سألها ثابت عن تينه .
مديحه::نومتها .
-احس روحي هلكت دخلت للغرفة وطلعت
لأن هو بقى يمها .
مديحه::الباشا اتصل عليج جاوبته لأن ضل يدك .
-هزيت راسي اي كعدت محتارة بحالة قدر .
مديحه::هونيها وتهون.
-شوكت ارتاح ؟
مديحه:'من تخلصين من عدنا .
-كمت اطمن على قدر لكيته گاعد گبالها ويحجي رغم
دايرة وجها عنه وكفت استمع لكلامه وياها.
ثابت::تعبان ياقدري كلشش تعبان اول مرة بحايتي أمر بهيج حاله احس فاقد السيطرة على كل شيء مو متقبل نفسي
ادخل البيت اختنگ كلت يمكن عدم وجودج مسسني بوحشه
عذريني اذا قسيت وياج بالكلام .
شهكت تبجي بصوت دنك بوسها ورد يسألها
ثابت::شنو رايج اسولفلج سالفه بيت المسيحي .
-صابني الفضول لمعرفة السالفه بقيت واكفه وهو عدل كرسيه قربه عليها ضهرة عليه مايشوفني عدلت نفسها قدر
كعدت مستنده على الجربايه لزم أيدها
ثابت::گلتلج من قبل الباشا من هو صغير متقمص دور الضابط وچان بيومها عيد الطالب وهو لابس زي عسكري
ومن زمان هتلي ويتعيقل بحيث المعلمات يتغزلن بي
يتفيك بمشيته ومسوي نفسه شخصيه ماطولها عليج
رجعنا نمشي وهو لازململه مسدس مال صچم وصلنا بيت المسيحي وگف باوع جريته امشي يمعود نكت ايدي وتقدم
يمشي بخطوات حذرة وتقمص الدور يتلفت وايدة بحزامه
دفع الباب الي من كثر ما قديم من ينفتح يطلع صوت
التفت اشرلي بمعنى تعال صحت عليه لا تدخل مااهتم
دخل الباشا بقيت أنه أتلفت ماكدرت اعوفه واخاف ادخل
ورا تقدمت اريد اشوفه وين اختفى عن انضاري اضطريت
ادخل ورا. التفت شافني اشر على حلگة بمعنى لاطلع صوت
هزت راسي اي وهو يمشي على أطراف أصابعه البيت يخنك من ريحه التراب وبي اثاث قديم وكل شويه زارك من بين رجليه شي مرة ابو ابريص مرة مدري شنو وهو ولا مهتم مشط الطابق الجوى كله اشرلي يله وتقدم للدرج ، أيده
بحزامه وگأنو السلاح الي عندة حقيقي شايفه هذول بأافلام
الاجنبيه هيج هو كلش عايش اللحظه .
ـهو يحجي وأنه اتبسم ويتخيلي شگله بوقتها
التفتت على إثر الأنفاس الي وراي لكيت مديحه واكفه
اشرتلي خل نسمع درت وجهي الغرفه وثابت مسترسل بالسالفه .
ثابت::صعد الدرج تبعته بفضول اول ماوصلنا الطابق الفوك
لفت انتباهنا صوت همس ضلينا واحد يباوع للثاني تقدمنا
نتبع الصوت والضاهر اكو عش حمام بس حسن بوجودنا
طارن محدثات ضجه بعد شايفه شلون من ايطير الحمام
على إثر صوتهن انفتح الباب الي بالجهه الثانيه بسرعه الباشا
جرني ختلنا بصف الحايط مال الدرج كتمنا أنفاسنا ثواني ومن صوت عرفنا الباب انسد بس زعنا العافيه أنه خفت كلش اشرتله خلينا ننزل هز رأسه لا وتقرب يحجي وياي بهمس .
الباشا::لاتخاف لاتصير جبان خلينا نشوف منو .
ثابت::ردينا تقدمنا بحذر ونتفاجئ بصوت بنيه تحجي::
يله خليني اروح هسه حلت المدارس وخاف اهلي يستبطوني .رد عليها الي موجود يمها::باجر تجين من وكت
اطلعي قبل الدرس الاخير .
-شدتني السالفة وبقيت استمع بتركيز و مديحه مستنده
على كتفي وتسمع وياي .
ثابت::أشرت للباشا يله خلينا ننزل شو هذا دار وجه مني
وتقدم لباب الغرفه ودفعه فزت البنيه وننصدم بالي وياها
واحد معروف بالمنطقه سرسري مسقط مدگك ويشرب
التفت باوعلنا مصدوم أنه من الخوف لزمت ايد الباشا
وهو ولا تحرك صاح بينا اسجيد
يجيد::هااا ولكم شعدكم هنا انتم مو ولد حجي وادي
ثابت::يحجي ويتقدم علينا و البنيه كامت تلف بحجابها
ولبست جنطتها ودور وجها منا حتى لا نعرفها
قدر::ونوب شسوالكم ؟
ثابت::تقدم جر الباشا من ياخته يهز بي.
اسجيد::ها ولك عود مسوي روحك ضابط ابو الهوى
شصعدكم هنا اليوم اذبكم للجنيه تاكلكم .
ثابت::أنه ضليت ارجف وهو استلم الباشا يعت بي نوب لزمني نريد نخلص روحنه منه ضلينا ندفع بي وصلنا الدرج هو يسحل بينا .
قدر::يمه نوب شسوى بيگم؟
ثابت::ضلينا نصيح نريد أحد يسمعنا وهو يكفخ بينا
طلعت البنيه تبجي وتصيح عليه:: عوفهم خليني اطلع
تاخرت اهلي هسه يدوروني ،،نزلت صارت بنفس البدايه
مال الدرج الي احنا بيها تريد تشرد سجيد هد الباشا
ولزمها يسب ويغلط عليها الباشا انتهز الفرصه ركض وهو يصيح
الباشا::ياناس الحكو اسجيد بايك بنيه وخطف ثابت
ثابت::مالحك سجيد يلزمه نزل يركض ويصح بعلو صوته
قدر::وانته ؟
ثابت::أنه بقيت مصدوم من الخوف ماتحركت لأن اسجيد
نزل يركض ورا الباشا والبنية نزلت ورا وهيه تلطم على وجها
بقيت واكف مثل الصنم واسمع الباشا يصيح خبص المنطقه
دقائق واسمع صوت الحجي يصيح عليه نزلت أتلفت لكيت
محمد وجبار والحجي وعمامنا والمنطقه كلها متجمهرة باب بيت المسيحي والباشا يحجيلهم الصار ويستعرض مغامرته
بدخولنا واكتشاف الحقيقه
قدر::والبنيه وين راحت؟
ثابت::ماشفتها الضاهر فلتت وحتى اسجيد شرد
اخذنا الحجي وهو يرزل بينا ومن ساعتها الباشا صار حديث
المنطقه والولد الي بعمرنا ونوب ضل وين مايگلوله مكان مهجور يروح وتوصل الاخبار للحجي ويشبعه كتل تالي
قنعه گاله كمل دراسه وادخلك كلية عسكريه وصير ضابط
عاد هو اشتهد وتعب وصار عندة ولع يتابع افلام رعب بوليسيه اليل كله هو مگابل أن بي سي تو،، اياد جان زغير
من شاف الاهتمام بالباشا اتخذ نفس مسارة
قدر::شكد حلوة سالفته .
ثابت::أنتي اجمل سالوفه وصدفه وحدث رجعني
لسنيني .
قدر::من اصير زينه تأخذني اشوف بيت المسيحي
-ضحك بصوت عالي وتفاچئنا من گالها
ثابت::صار بيتي بعد ؟
قدر::شنوووو ؟
ثابت::اي من يومها ضل البيت أبالي وكل سنه اكبر
وأمر عليه اوگف اباوعله واتخيل بيوم يكون هل بيت ملگي
اجه شخص على أساس تواصل ويا أصحاب البيت عن طريق محامي واشرى منهم بوقتها كلش انقهرت ،، سكنه فترة وباعه. لغير ناس وكل عائله تسكنه ترمم بيه شويه
الى أن كبرت واستقليت بعملي وصارت عندي فلوس وشگد حاول الحجي حتى اخذلي بيت بس أنه مارغبت غير هل مكان وبيوم سمعت يردون يبيعونه اشتريته وگانو حققت حلم فرحة فرحه ماكو منها الحجي ماقبل أعلن عن امتلاكي
لهذا البيت يخاف عليه من الحسد لأن هو موقعه ومساحته
جان محط أنظار الكل فتكتمنا على الأمر انطيته لمقاول بعد مااختاريت خريطه للبناء وكلمته ماسكنت بي لحد ما انتي
ضهرتي بحياتي .
قدر::يعني مگعدني بالبيت المهجور بعد ماريده،، اخاف
ثابت::لج يامهجور كلشي مابي بس هذا السافل اسجيد
جان مستغله لسوالفه المكسرة وطلع عليه هل شائعه حتى محد يدخله .
-دنك باسها التفتت على مديحه الي تحجي بذوبان .
مديحه::الله شكد حلو جنهن فلم رومانسي .
-كفختها دمشي ام الفلم.
مديحه::ايا بت الصخل شبيج شبيج .
-صوتنا لفت انتباه ثابت باوعلنا وضحك خرب شكد عيب
ثابت::تعالو يأبه ليش واكفين هناك ترى جاي نسولف
-ردت مديحه مسمعتني
مديحه::هو شبع الفرخه بوس كل شويه شالعه خدها
بمطكه ويكول نسولف .
-درت خزرتها وأنه كوه لازمه ضحكتي ،، دخلنا يمهم
عدل كرسيه بموجهتنا وحجه قاصدني .
ثابت::المؤمن يحمل أخاه المؤمن ستون محمل
إن خطئت بتعاملي وياج فعذريني أن قسيت وياج بالكلام
ثقي موطبعي بس والله الضروف الي أمر بيها تعبت اعصابي
او احنى كلنا تعبانين ياسونه مااخفي عليج ابن الباشا دوخنا
طفل يكسر الخاطر والكارثه ماخلينا دكتور حتى للخارج رسلنا صورة وتقاريرة
-شنو كالولكم ؟
ثابت::حالة نادرة بحيث ماتحصل بگل مليون واحد الكارثه الطفل ماجاي يسكت ليل نهار يبجي رضاعته مو نضاميه لأن الفتحه بين الأنف والفم مابينهن حاجز يعني لهات ماكو وأمه نفسيتها صارت زفت ورغم ابو يبين متقبل الأمر بس نعرف جاي يكابر والدليل متهرب بالدوام .
-الله يشافي بلكي يتعالج زين. مايسووله حل
ثابت::لازم تمر فترة اقل شي ٣ اشهر تدرين أمس فريت
الدنيا على ممه خاصه لحالته ماكو تالي ابو راح لولد صيدلاني طلبها النا من موقع خارج البلاد على أساس هل سبوع توصل حاولنا نرهمله ممه سوينا بيها فتحه زغيرة مو مثل شلون افهمج
-هزيت راسي بمعنى فهمت بس ضحكتني قدر من كالتله
قدر::خوش جا سولفلي سالفه الحيه فد مرة
ـضحك ورد عليها
ثابت::لا هاي نسولفها بيتنا لأن خاصه
-حجاها وغمزلها ،،كمت و مديحه تبعتني
هو بقى شويه وطلع صاح عليه تبعته للباب.
ثابت::ماردت اقلقج بس حتى تعذرني على تصرفي
قبل فترة اياد سامع من ولد يداوم بسجن النساء
سليمه طالبة مقابلة مدير السجن .
-مافهمت ؟
ثابت::مانعرف شنو تريد بس حسب الي وصلنا هيه
طالبة من مدير السجن انو أحد يوصل الج بما انو انتي بنت زوجها وكايلتله أنه محد يزورني وتبهذلت اريد ملابس مصرف احتاج شغلات .
-معقولة محابس مايوصلها ؟
ثابت::ماعرف لأن هو صار فترة طالع من ابو الضاهر الولد
ماكدر يتخلى عن المستنقع الجان بي وماكدر يتعايش ويا
حياته الجديدة .
-وين معقوله الخال ماكدر يلزمه ؟
ثابت::مو طفل حتى يكدر يتحكم بي رجال شكبرة .
-وهسه وين ما يدري بي وين يعني رجع للصعده؟
ثابت::مااعتقد بس الي مطمن الخال هو منطي سيارة وفلوس وحسب ما سمعت مستأجر شقه وكاعد بيها .
-المهم سليمه ماعرفت شنو قصدك
ثابت::المدير كايللها تندلين بنت زوجج وين عندج رقم الها
كايلتله لا ف محولها إجراء قانوني لازم طلب للقاضي حتى يصدر قرار بجلب معلوماتج عن طريق بياناتج من الاحوال الشخصيه يعني يدكون اسمج بالبحث يطلع الهم ولا تنسين
انتي طلعتي جواز وهل بيت بااسمج يعني سهل الوصول إلج
وهيه راح نتعرض لهواي أمور منها ينكشف علاقتج بينا
-قصدك بالباشا،، والي ماتعرفه مستحيل محابس ماحاجيلها.
ثابت::ماعرف بعد .
-وانه شكدر اسوي ؟او شنو تردوني اسوي .
ثابت::ماكو شي بس تحذري خاف محابس يوصلج
مانريد نثير قال وقلت بين ناسنا لأن تدرين يردولهم سالفه
يله في امان الله وشيصير خابريني .
سديت الباب ورا ودخلت حجيت لمديحه
مديحه::خاب تولي شتريد تسوي وحتى ذاك السافل
البسيهم هو هنا مايوصل يخاف من الباشا .
-لشوكت نبقى ملاحقين منهم خاف نوب يعلسني
مديحه::وانتي نهار كله تفترين بالشارع .
-دوخاني هل سالفه خلص ليلي تفكير حتى على الباشا مارديت ثاني يوم قدر وضعها احسن خاله اجت ومامخليه
شي ماجايبته
وفيه::اكلي وجهج مصوفر أنه التهيت عنج هم عذريني
ترى محتارة بين اريج الي حالتها ماتسر العدو وبين ابنها
همزين امها راحمتني وبنين ابتلت بدانبي
قدر::الله يشفيها هيه وطفلها
وفيه::الف رحمه على روح امج .
ـ بقت يمنا شويه وراحت،،اجت مديحه تلفونها بيدها
مديحه::طارق يريدج
-اخذته منها سلم رديت عليه .
طارق::ردتها تبقى يمجن شو تكلي تعال عليه ؟
-اي تعال اخذها رحم الله والديك ماقصرت .
طارق::لا يأبه شمسوي انتن خواتي وشتحتاجين كولي .
-مشكور يله روح للحجي بين ماتوصل تلكها كدامك سديته
والتفتت على مديحه اووو عليمن بجيتي ؟
مديحه::مايهون علية اعوفجن .
-لازم ترحين تعودي وعودي عليج حبي وخلي يحبج
ابني عائله لأن ماعدنا أهل سويلج أهل وناس ،،يله حضري روحج وأنه مو بعيدة اجيج وتجيني .
مديحه::بروح جويسم لا تعوفيني
-درت وجهي ومشيت تلفوني يدك رديت بملل
الباشا::طارق جاي لاهلي
-اي دز مولي يأخذ مديحه حتى مناك ترجع
الباشا::شنو ابالج
ـماكو شي بس اول وتالي ترجع وهو خطيه بسبب ثابت
مااكدر اخلي يدخل علينا عاد يأخذ زوجته لبيته وهم اريدها
ترتاح لأن تعبت هل ايام ويانه ولا تنسى هيه حامل
الباشا::شو مامقتنع بكلامج
-مو مشكلتي ولا ضروري اقنعكم،مانطيته مجال يرد
سديت الخط وشمرت النقال وفتحت الكنتور اخذت جنطة مديحه وطلعت اطيتهيا.
مديحه:'مااخذها خليها يمج .
-ترى روحي مالي خلكها ومابيه اداهرج شكو مخليتها يمي
بنگ أنه اخذي ذهبج وياج
مديحه::إذن تردين تبعدين ولا تگليلي لا .
-صحت وين وين ابعد ومنو يخليني مااگدر انتن رابطاتني ربط مااكدر اعوفچن .
مديحه::عوفينا نعيش ماعلينا شي بس انتي وين تردين
سونه الباشا مابي صوج وماقصر ويحبج استقري وعوفي أهله هسه قدر شنو استفادة من أهله شو بس الضيم .
-دكومي هذا مولي بالباب ،، التفتت تباع للكامرة ودارت تباوعلي نزلت دموعي حظنتها وبجيت كامت بوست قدر وبنتها طلعت وياها للباب صعدت وعيني عليها حرگ مولي اشرتله بيدي بقيت واگفه لحد ماطلعو الشارع دخلت اباوع
للحيطان اجت قدر تمسح بدموعها
قدر::خليها تستقر ترى تعبت
-هزيت راسي اي بقينا ملهين نفسنا بتينه لليل خابرني الباشا
الباشا::ها سمرة شلون صرتي
-خافن اگلك زين واعليك اچذب
طحت بحر مابيه گشايه اچلب
الباشا::إفى وأنه وين وانتي تچلبين بگشايه
-سكتت وهو ضل يسولف
الباشا::شوفي يابه گل ثنين تصير بينهم مشاگل
لا تشيلن هم قدر .
-لشوكت تگابر ؟
الباشا::على شنو ؟
-ثابت حجالي عن سلوم .
الباشا::يعني غشميه انتي ماعرفتي هاي رساله منها
تهديد بصورة غير مباشرة ترى هيه تعرف ومتاكده انتي واختج يمنا اكيد محابس ماضام عنها شي
-اعرف بس ليش هيج سوت شنو أبالها
الباشا::بربوك وضالة تلعب
-والحل شسوي
الباشا::شعليج انتي تولي قابل يجبرونج ترحيلها
هاي اذا كملت طلبها والقاضي وافق يراد اشهر تولي لاتفكرين بيها وهو هذا الناقص محابس جاي يحوس على أساس يدورلها محامي يريد يستأنف الحكم
-ويصير يعني اذا خلالها محامي تطلع
الباشا::لا مستحيل بس بس ممكن يجي القرار لصالحها
ويتخفف حكمها ولو اشك لأن هيه نحكم بدلائل واعتراف
-سكتت محتارة صاح
الباشا::ها صفنتي ؟
-ماعرف بس !
الباشا::لابس ولا شي لاتفكرين بيها اصلا ،، شخبار قدر
وتينه مشتاقلها اريد اجي اشوفها بس انزل اريد اطلع خدودها من البوس يأبه شلون مشتاق
-غلست رغم اعرف قصدة بقى شويه وسدة
خابرت مديحه ردت فحطانه
مديحه::ها ام اعطوب شلونجن
-جاي تركضين
مديحه::اي فاطمه شردت على السياج واريد انزلها.
-طاح حظج شوكت تنعدلين بطلي من المرة
مديحه::لو اصحيها لو اثنينا نخبل ويشمرنا طارق بالشارع
-ولج كفي منها لانوب صدگ تسويلج سحر وتسودنج
مديحه::إفى وخبرتي الي اكتسبتها من طشه والهندي
والكتله الحصلتها بسبب تطفلي عليهم يرحن بلاش خرب
لهسه اتذكر من حطو راس الدجاجه بحلگي
-وانتي تبتي لو بقيتي تفترين وارهم
مديحه::ائ ولج جا خل اسولفلج فد مرة تبعت صولة
لمگبرة الإنكليز مدري شتريد تدفن
-صحت بيها سدي حلكج هو أنه بدون گلشي مرعوبه
بت التالف تردين تمرضيني مثل ذيج المرة
مديحه::ضلي عود ردت انفعج من خبرتي ومغامراتي
-دمشي خبرتها على أساس عالمه انتي انجري
مديحه::قاسيه انتي قاسيه
-سديته منها وأنه اضحك وعلى صوتي اجت قدر
سولفتلها .
قدر::ههههههههه ام المصايب ولا تكعد .
-وهيج تعده كم يوم ثابت يروح ويجي وخاله والبنات قدر طلعت الاربعين استعادت صحتها وبنتها نشنشت والباشا يوميه يتصل ولازم نفتحله كامرة يحجي ويا تينه ويخلصها
تمطك على كولت مديحه .
الباشا::بوسه بوسه منا تين
-وهاي هم شلو بت قدر تناغيله
الباشا::هاي بوسه الج وحده لخالتج
-ضحكت مدري شلون اجه أبالي عادل امام من يكول كل واحد ياخدلو خيارررايه.
الباشا:: ثول مو مال رومانسيه ام اعطوب
-سدة وهو يضحك خابرت خاله على قدر گتلها كافي روحي لبيتج
قدر::وانتي تبقين لوحدج ؟
-اريد ارتاح منجن فگني يله كومي احفج قبل لايجون عليج بعد ما رتبتها وصبغت شعرها وتنضيفات طلعت عروس
اجت عليها خاله خذتها صار البيت وحشى بجيت بقهر
احس اختنكت حاولت الهي نفسي كمت فتحت باب الصالون
الداخلي وبسطت لعبت بخلقتي لعب باوعت لروحي وضحكت خرب ابوج سونه شكد حلوة لمست خدي بحرگة سريعه وبست ايدي طلعت لأن نقالي يدك رديت على مديحه
مديحه::ام اعطوب شلونجن ؟
-زينه شعدج مخابرتني
مديحه::ايا بنت الصخل غير كاسرة خاطري وكلت ارد عليج الوحشه خاب مو صوجج .
كعدت وحولت الاتصال كامرة شافتني انصدمت قربت وجها تتفحص شكلي وتتلفت بغرفتها كامت سدت الباب وردت كعدت باوعت گبالها ماعون بي فواگه تلوج وتحجي
مديحه::اي عيني الضاهر اليوم سهرة
-لويت شفتي وغميتها
مديحه::جا المن هذا كله
-الروحي عندج مانع ؟
مديحه::لا منيلي مانع عفته بالمجر مال غرفتج.
-فگيت حلكي وهيه ولا جنها تاكل .
مديحه::شخبار قدر .
-ماخابرتها انتي شنو وضعج،، دفعت الماعون إليمها وجرت كلنكس مسحت حلكها
مديحه::الحمد الله
-على وضعج على الماعون الاكلتي بگشورة
مديحه::اثنينهن اسمعي أليوم فطوم شادة راسها
بطول مال اقماش لونه اخضر،، عاد أنه اختصرت عليها التعب وكمت خبطت خل وملح وهيه تباوعلي وكمت ارش
-متت ضحك ولج شبيج انتي شبيج ؟
مديحه::جا شسوي مليت عاد هيه سكتت وأنه سبحت
لان الخل وصل لبلعومي .
-خطيه يعني هيه اكيد مامرتاحه.
مديحه::الله يريحها .
-سوكت ترحين سونار ؟
مديحه::غدا
-خوش ام غدا عود بشريني
مديحه:'وانتي هم
-على شنو ؟
مديحه::على الحمرة مالتج .
ـسديته منها وكمت والله وحشى البيت قفلت البوب
وتمددت بالصاله ثاني يوم خابرت قدر رغم ماعاجبني صوتها بس غلست گلت خل تتعود على بيتها
قدر::خل نسوي مكالمه جماعيه ويا مديحه
-خاف بعدها بالدكتورة
قدر::دسدي خلي اشوفها
ـبقيت انتضر شويه ورجعت دكت تضحك
قدر::بيها بنيه
-دجمعينا بمكالمه،ردت مديحه تضحك
مديحه::ولجن شيثبرني لحد ما اجيب عاااا غير إشبعها
راجديات اذا مدت راسها من الباب اي ماعدنا بنات تطلع
-ڤگرها هل طفله تصير عندج .
مديحه::وين الله وعدها اعطوب حتى اهلسهن .
قدر::هههههههه ولج بطني كامت توجعني كافي .
-شنو گالت فاطمه اقصد شنو ردة فعلها من عرفت بيج بنيه
مديحه::گالتله روح جيب جربايه خليها بغرفتي
حتى تبقى الطفله يمي نصدمت بس طارق كال لاتخافين مستحيل امي تأذي بنتي هيه تتمنى يصير عندي طفل
قدر::اي صدك جانت تتمنى يصير عدهم جهال بس انتي شلون يعني تگدرين تخلين بنتج يمها
مديحه::طارق گال مستحيل احرمج من بنتج ننزل أنه وياج انام يمها هيه اول وتالي تطردنا احنى وبتنا
-اي بلكي تتغير وتحبچ وحتى هيه هم ترتاح شكو
بيها عادي تنام عدها .
مديحه::ماعندي اعتراض بس خوفي تشربها خل بدال الحليب وتموتها .
-ولج كافي نهيت مكالمتي وياهن ،،كم يوم والباشا اجاني
الباشا::مشتاقلك اسمر
-صفنت افكر اي ياسونه جنتي تتمنين بس مكان يحميج
خلص عيشي وارضي بالمقسوم اهم شي مأمنه على نفسي
وهو مامقصر وياي
الباشا::لا تصفنين هيه تصفى اول وتالي يتقبلون الأمر
-هزيت راسي اي وهيج الايام تمر بين مديحه وقدر وتعده
شهر على رجوع مديحه لطارق والباشا إذا مايجي يخابر كملت تنضيف ومثل كل يوم نسوي مكالمه جماعيه يربي شوكت مااشوفج تأكلين
مديحه:'مو أنه هاي عسوله تجوع .
-عسولة منو ؟
قدر::بنتها .
-خوش ام عسولة ماتجين مشتاقتلج ؟
مديحه::الخميس ها قدر تجين ؟
قدر::اي اكيد .
-گعدت الخميس وأنه فرحانه انتضر جيتهن طبخت ماخليت شي ماسويته اجت قدر بوستها وأخذت تينه صلوات صايرة تخبل وراها بشويه وصلت مديحه بطنها كبرانه تمشي
كوى هههههه من الاكل بس محلوة
مديحه::صدك وأنه عبالي طارق يجذب من يكول محلوة
تعاي ابوسج مادام هيج
-شكد ارتاحيت بوجودهن حتى شهيتي انفتحت
وهاي بت قدر گانو تفهم حالها حالنه تناغي موتناها أنه
و مديحه نبوس
قدر::يمااا موتن بنتي خدودها راحن
-خذتها نومتها كعدنا نسولف
مديحه::طارق عرض بيتنا للبيع
-ليش ؟
مديحه::يگول بلكي من نغير المگان امي ترتاح
-يجوز صح بس وين راح تكعدون
مديحه::يبني مايريد بيت مبني يگول كاع احسن وأبنيها على ذوقي بس يريد يم خالته
قدر::منو منهن
-اسمها ام احمد هاي البيضه وضعيفه يكول بلكي من نصير يمها امي تلتهي بيها عاد تروح الها خالتي تجيها
قدر::اي هاي زينه شويه
مديحه::وانتي شنو وضعج هم رحتي لبيت الحجي
قدر::لا ابد بس همه يجوني يوميه خو مولي والباشا
عود يستحون اذا ثابت ماموجود يجون ياخذون تينه
مديحه::ياخذوها لبيتهم ؟
قدر::لا بسيارة يبقون واكفين بابنا لحد مايشبعون منها
لو يجي ثابت ويدخلهم
مديحه::وشخبار اريج وابنها
قدر::حسب كلام ثابت هل شهر يبدون بعلاجه يعني عمليه
-هنه يسولفن وانه بس اسمع
مديحه::اي لاترحين لحد ما يعالجون الطفل عاد اريج مالها عذر وتمثل خبالها وتأذيج
قدر::لا ماروح بس هم احس بخنگه يعني اخلص نهاري لوحدي تصدگين من رجعت لحد الان ماصاعده للقاط الفوك
قبل جنت اصعد وانضفه شو هسه اخاف مدري ليش حتى من اباوع للدرج گلبي ينقبض.
-صفنت مديحه على كلامها وأنه هم سكتت.
مديحه::حرگي ورق غار وتبخري بي دوم طكطكي حرمل
كون تشمينه شعلي جمريه وشخي عليها خل يدخل الدخان
بملابسج لحد ماتريعين
-هزيت ايدي
مديحه::ترى ماكلت الها تضر ،، تريع هذا هوى انفاس ونفس
-خوش خوش شكو بيها سوي الماينفع مايضر
مديحه::هو انتي شيقنعج يا ام اعطوب
-حجتها وكامت للمطبخ تبعتها قدر خذلهن مشوار اجن
حاطاتلهن جمرات اثلاثه بجدر خلته بالكاع وحطت ورق غار
دخن أشرت لقدر دنكت تستنشق ونشحطت تگح
مديحه::رفعي ملابسج وشبخي يله راح اذب الحرمل
-وهذيج شتكلها هاي اتسوي وكفت فاتحه رجليها على الدخان كامت مديحه شالته وقدر كعدت نصدمت من ضلت
تريع شلون الشارب بطل سفن
مديحه::ها ام اعطوب شكلت
-ضليت اباوع لقدر
قدر::ينطيج العافيه يا مديحه يمااا شلون اخت انتي تعاي ابوسج
مديحه::مو هسه من اجيب ،، شوفي يوميه هيج سوي
لحد ما تحسين بروحج زينه وبخري بيتج وبالأخص المكان التخافين منه
قدر::اي ان شاء الله بس ارجع اوصي خاله تجيبلي هل شغلات واصعد ثابت يبخر القاط الفوك
-خلصن ليلهن يسولفن سالتها ،، مدوح جهزتي لولادتج
مديحه::فطوم ترست الغرفه يوميه تروح للسوگ وتجي
محمله علاليك حتى عطور مال اطفال
-خطيه فرحانه .
مديحه::كون تبقى هيج
-لثاني يوم هنه يمي لليل اجه ثابت على قدر وراحت
و مديحه حضرت نفسها هم اجها طارق سديت بابي
وهيج تعدة فترة خابرتني قدر كالت سووو لابن الباشا عمليه
قدر::هاي بس ترقيع الفتحه البين الخشم والشفه
ويمكن الها
-خطيه الله يشافي بس لاترحين
قدر::لا اصلا ثابت مايقبل
-ونفسيتج شلونها اقصد على وصفه مديحه
قدر::لا الف الحمد الله نعمه
-دفتحي كامرة خل اشوف تينه
قدر::اوكفي خل أشرك مديحه جاي تتصل بيه
مديحه::ها بنات راضي شلونجن؟
-اليوم مؤدبه شعجب؟
مديحه::لا صرت اخاف اسب أنه راح اصير ام ولازم اكون مؤدبه حتى بنتي تتعلم مني المهم ام اعطوب شخبارج
-مو أنه اگول ماتنعدلين ،، ردت قدر وهيه تمسح بوجه بنتها
قدر::لا ترى هاي مو مسبه دلع
مديحه::شدهنين بوجه الطفله بت الصخل
-ضحكت وقربت وجهي اباوع لتينه هاي شنو عدكم بگ
وجها محصف
قدر::لا منيلنا بگ ،، هذا مو حصف
مديحه::جا شنو حب شباب
قدر::ولج لا بس من كثر مايبوسون تتحسس لأن عدهم شوارب
مديحه::جا بتج شلو هيه مكيفه ماتبجي كون تتحسس
قدر::اسكتي ولج نوب ثابت متخبل لأن الباشا
يأخذها وشغللها اغاني والبت كانت حتى من احطلها
لطميات تهز
-صدگ ضحكت يا
مديحه::جا من اكول شلو وشالعه
قدر::ونوب يگلي دوم شغلي قران لو لطميات لو ادعيه
وهيه عبالك مكوگه تهز ذاك اليوم الباشا بابنا وأخذها
مديت راسي والكاها تگمز وهو ميت ضحك اجه ثابت
جابها منه ويحجي وياها من گل عقله يلگلها عيب بابا.
مديحه::يله ويجيك واحد يگلك صير مؤدب
قدر::يا لاتحجين على بنتي ازعل يله باي خل اگوم
احضر عشى
-باوعت للكامرة طبگت سيارته الباشا نزل وفتح
الباب الثاني نزل مسواك قبل مايدگ الجرس ركضت الغرفه شربت الحبايه باوعت الشريط مابقى بي لازم اوصي مديحه
طلعت فتحتله الباب دخل الغراض نكلتهن للمطبخ
الباشا::شلونج سمرتي
-زينه شلون صار ابنك
الباشا::نعمه شويه احسن
-متعشي لو اسوي
الباشا::لا مااشتهي عود إذا اجوع
-كام الغرفه حلل ملابسه وتمدد كعدت يمه يصفن هزين راسي بيك شي
الباشا::سلامتج
-حجاها وجرني لحظنه تذكرت بت قدر حجيتله عنها
الباشا::ولج فد حياله نوب تعلقت بيها.
-هههههه وقدر تكول ثابت متخبل يگلها شغليلها دعاء
ليش هيج علمتها على التكمز
الباشا::حلات الطفل هل عمر هو يكمز وبالأخص البنت
تحبب نفسها وهاي لوتيه مو بس وياي لو شايفه اياد
متخبل عليها يجي من الدوم گبل لبيت ثابت
-خطيه كون يصير عنده جهال
الباشا::اي خطيه
-قاطع حديثنا صوت نقاله مد أيده جرة من الميز باوع للرقم
وفتح خط
الباشا:::اهلا ابو محبس الغالي .
- ردت ابعد جرني مرجع راسي لصدرة سأله خاله
الخال::انكتم
الباشا::ها جا غير ابنك ونصيحك بأسمه
الخال::ساعة السودة العرفته بيها .
الباشا::اذا ماتريدة ومضوجك سلمنيا
الخال::لا تنعثل وين انته؟
الباشا::أمر واجيلك زحف.
الخال::كلاواتك مايمشن عليه شعندگ
الباشا::ماكو شي
الخال::جا المن داگ عليه قبل ساعه
الباشا::ردت اسألك على ابنك
الخال::اي كثر الله خيرك تسال عنك العافيه لكككك احجي
لا تماطل ليش تخليني أتجاوز عليك
الباشا::اتمون خال
الخال::يعني تجبرني اجي اسحلك احجي
الباشا::وصلني خبر القندرة حشاك موگل محامي لسلوم
الخال::شسويله ولك مللني مايسوى تنحيت عن وضيفتي لأجله وهو ماجاي يستقر عجيب امرة لا مدمن واعالجه
الباشا::غير منطني فلوس گتلك ضيق عليه المنفذ
الخال::مو أنه من سافر ضمياء منطيته مبلغ عود فرحانه بااخوها كايلتله من ترجع للعراق أشتري سيارة النذل ماگالي
وأنه اشتريتله سيارة وقبل كم يوم خالتك بلغتني
الباشا::والحل يأبه گتلك سلمنيا خل أعلكه كم يوم وعيونك أطلعه الك مؤمن وخلوق ومؤدب
الخال::ماينطيني گلبي عليه المهم أنته شنو المخوفك
من تصرفه .
الباشا::هل خطوى تأكد يريد يرجع يندگ بالبنات عن طريق سلوم
الخال::هاي شبيك شنو غشيم أنته ترى حتى وإن استأنفو
قرار الحكم يجوز يتخفف بس متطلع
الباشا::وابنك مو غبي ويعرف ماتطلع بس يريد يثبت لسلوم
ماتخلى عنها وهيج شيطلب منها تنفذ وأولها طلبها بعذر
انو تريد تتواصل بت رجلها
الخال::وأنه گتلك اختصر كل هذا ودزها تواجهها
الباشا::شبيك خال تحجي صدك ترى زوجتي وهيج
راح انكد معلوماتها عنا .
الخال::وگل عقلك محابس ماحاجيلها مع الاسف شبيك
شو صاير غبي
الباشا::لا بس گلت بلكي بي ذرة غيرة
الخال ::اسمعني يابه،، ليش تخليها تلعبك مو هل سافله
تتصيد واذا وصلت للقاضي راح تحاول تعرفه بارتباطك بيها
ابسط شي مثل اتكله اعرف عنوان بنت زوجي متزوجه فلان
الباشا::وخلي تحجي ماله شي يمي عود إذا تعرضت للسؤال
اعرف اتصرف ترى عقدي شيخ
الخال::وليش تنطي على نفسك لزمه واكيد الحجايه ماتنضم وهيج الي يكرهك راح يلكاها فرصه يشوه سمعتك
-هم يحجون وأنه ميته قهر وخجل شگد صعب عليه
اسمع هل كلام .
الخال::ها شكلت ؟
الباشا::مامقتنع.
الخال::اكطع راس الحيه واخلص
الباشا::شلون ؟
-انه ارتبلك الموضوع يوهمون سلوم بناء على طلبها
توصلو سلاسل ومن تروح تواجها خلي تگلها أنه اجيتج
اشوفج شتردين يعني الحكومه ماجبرتني اجيج بس بعد لتدزين عليه لأن راح ابلغ المركز ماريد مواجهتج وحتى ادخل للقاضي واجيله عنج أنه هسه متزوجه وانتي تردين تهجمين بيتي وهيج تخلص.
الباشا::تمام بس لازم أنه اخذها واجيبها خاف ابنك الناقص
يسويله لعبه .
الخال::لك وين يعرف يايوم سلاسل تروح وهم حتى تطمن
خلي ثابت يأخذها وينتضرها بس أنته لا
الباشا::تمام
الخال::عود تعالي مشتاقلك
الباشا::حتى أنه
الخال::ديله ادعبل
-نهى مكالمته وهو يضحك باوعلي وعكد حواجبه
الباشا::شبيج ليش تبجين ؟ عود صدك خايفه وأنه بضهرج
خلص ماتردين ترحيلها تولي .
-لا مو هيج بس
الباشا::بس شنو ؟
-لشوكت يبقى الماضي ملاحقنا ادري بيك متفشل
وتخاف لا يعرفون زواجك بيه
الباشا::هو منو اليعرف سونه الي يهمني ابوي واخواني
وعمامي ثابت ومحمد هذول اهم شي
-بس ماتقبلوني بالاخص ابوك
الباشا::سونه ابوي يحسب حساب البعيد يخاف لا اريج
تعرف وتطلب الطلاگ وهيج يعتبر تفككت عائلتي يفكر باابني.
يعني هيه اذا عرفت تكلك طلگني
الباشا::مااعرف بس ماضن يعني لنفرض انتي مكانها
شتسوين
-اگيد أكلك طلكني ،، باوعلي وضحك
الباشا::طاح حظج .
-اي جا ابقى عندك وانته رايح متزوج علي
الباشا::صح إذن مانلوم اريج أن رفضت أو طلبت الطلاق لاسامح الله .
-واذا خيرتك بيني وبينها ؟
الباشا::مااختار حتى مااضلم ولا اكسر گلب وحده بيجن.
-مافهمت شلون يعني ؟
الباشا::هسه شنو هل موضوع الي يضوج الخلك شو تعاي
-رغم نومتي بحظنه بس بقى بالي مشغول بسؤال ماجاوبني
عليه وهيج يوم بعد يوم لحد ما گال رتبت مواجهة لسلوم
مديحه تخبلت من بلغتها
مديحه::شلون اقنع طارق واجي وياج
-شكو رايحه سفرة
مديحه::اريد انعل والديها ولج هاي محد يعرف لها غيري
-تولي أنه هل مرة اريد اوكفها عد حدها يله لاتحجين لقدر
تضل بقلق خطيه
مديحه::اول ماترجعين خابريني
-اوك يله باي ،، حضرت نفسي اخذت فلوس گلت انطيها خطيه وهم خذتلها كبه من السوتها مديحه اجه عليه ثابت
ومن الطريق هم وكفته اخذته جكاير وفواگه وخبز
ثابت::تدرين تكسر خاطري ضحيه مجتمع وأهل ومالكت
الي يرسدها ويسترها .
-رغم قذارت عملها وقسوتها وبأنه بس الها مواقف
تدري عجيبه مرات تحسها تخاف عليه بس بنفس الوقت عدها استعداد تبيعني .
ثابت:'اطبعت وربت وكبرت على هل شيء مو سهل
-وصلنا نزلت وثابت وياي أنطه الورقه البيدة للحرس الي بالباب اخذها وراح شويه ورجع كال دخلو
ثابت::يله روحي لاتخافين أنه باقي هنا
وترى موصين عليج واكو كاميرات .
-دخلت انعثل بالعلاليك كعدوني بغرفه فارغه شويه وجابو
سليمه باوعتلي وضحكت كمت بوستها كعدت كبالي عجيب هاي شوكت تكبر
سليمه::اي شلونج شخبارج وشعجب جيتي
-غير انتي طالبتني وأجاني تبليغ،، باوعتلي مصغرة عيونها بشك هزيت راسي شكو
سليمه::يعني وصلوج
-اي بس ماجبروني اجي كالو كيفج هيه طالبتج
سليمه::اهااا خوش المهم شو مديحه مو وياچ
-ابتسمت عجيب وحده تجذب على الثانيه واحنى نعرف الجذبه بس نتصرف كأنو مصدكين،،رديت عليها ،،سلوم
مديحه تزوجت ومستقرة وهسه حامل وقدر نفس الشي
سليمه::وانتي ؟
-ماضن ابن حراير شريف وماناقلج اخباري فخلي نحجي طك بطگ
سلوم::اي هيج احسن لان مابيه للف والدوران
-غردي،، صفنت ثواني نوب سألتني
سليمه::اكلج انتي من دخلن يفتشونج
-مافهمت سؤالها ردت بدون تفكير ،، لا بس العلاليك
هزت راسها خوش ودنت تحجي وياي بصوت ناصي
سليمه::خوش جا تگدرين تجيني الاسبوع الجاي بس قلبلها ترحين للصعده تلكين محابس هناك ينطيج .... جيبيهن الي
-فكيت حلكي كل عقلج انتي تردين اتذبيني بمصيبه
مو صوجج صوجي اجيتج
سليمة:'ثوتج بت الصخل راح تفضحينا ترى كاميرات
-خل يسمعون حتى بلكي يحكمونج فوگ حكمج
وهذاك الساقط كون يلزمونه بتهمه يعدمنه عليها .
سليمه::ايا بت الصخل انعل ابوج لابو امج سهله
اطلع لو مااطلع اله اسحلج .
-هزيت ايدي كل عقلج ترى حتى لو طعنتي بالحكم
يجوز يتخفف بس مااطلعين ،، كفختني والتفتت للباب
الي انفتح دخل الشرطي .
الشرطي:'ولج انتي ماتهجعين حتى اليجي يشوفج
مايخلص من شرج ؟
-ردت بابتسامه .
سليمه::لا هاي بنتي .
الشرطي::جا كونها بتج ليش اطكينها؟
سليمه::ثولة وصيتها على ملابس داخليه وناسيتهن.
-باوعتلها متفاجئه والشرطي هز ايدة وطلع
سليمه::بت الصخل كله بسببج
-من الاخير دازه عليه شتردين .
سليمه::غير كون الحظ يسويها واطلع يابويه شسوي بيج
-وعليمن شتردين مني مو كافي السويتي هجمتي بيتنا
وطشرتينا ومات جويسم بسببج هاي حوبتنا هيج حكموج
سليمه::هيج أنه كل هذا سويته شنو كلت لامج صيري علاسه
لو شغلت اجويسم ويا سويكه لو ابوج جان يأذن بالگواز وخليته يطبل .
-لا بس طشرتينا
سليمه::وانتي واختج طشرتن الصعده وخلي ابالج
ترى كلمه مني
-ماخليتها تكمل ،، الماتلوحينه بيدج شبخي برجيلج
سلوم زمان اول اول تحول وكل وكت وآله اذان وكت راح
سليمه::ههههه لو بعد الف سنه اولى وتالي يشمرج
لاتفرحين ترى القبلج خلفن ولد وبنات وضل عارهن بنات بشار مو انتي هم من الصعدة وهم عبدة وهم رقاصه
شيسد وشيركع يبقى العار لولد ولدج وتبقين المنبوذة
لا اهله يتقبلونج ولا هو يگدر يعلن زواجه منج
-ضحكت الضاهر ابن حراير منطيج الاخبار بالتفصيل
بس گالج قدر اخذت ابو حيه سلوم تعرفين شنو ابو حيه
وخلفت منه وهو وأهله محاوطينها بحظنهم ومديحه اخذت ابن فاروق الي ابو عافله أملاك يگدر بيها ينبش الصعده ويحفر شكو شي دفنتي انتي والاعرج .
سليمه::وإذا حجيت لام دعدوش والبقيه عن علاستجن
خاف عبالج النصافات انتهن
-لا اعرف بدال حربه واختها اجن نصافات ولزمن الركن
ورجع الشارع اضرب من قبل والصعده صارت علني بس الماتعرفينه بعد ماخاف لأن ماعندي شي امنت على قدر ومديحه
سليمه::ولشوكت تبقين لابدة بسد أهل الباشا
مصيرة يشمرج.
-من الاخير شتردين سلوم ؟
سليمه::اختصريها وردي محابس يريدج
-وهذا عرض أمر طلب ؟باوعتلي ثواني
سليمه::صايرة نسخه مني هههههه
-بكلشي بس اذكى منج بهواي
سليمه:'لا مستحيل ولاتصيرين ،المهم هو منتضرج
وبلكي قرار التمييز يجي لصالحي
-هههه بعدج مصرة ترى مااطلعين
سليمه::اذا تخفف الحكم اي عفو يشملني
-ان شا الله مايصير
سليمه::شقررتي
-منو كتلج اريدلي ك و.. يكو .. عليه
سليمه::مرجوعج يمي
-ساعتها اكتل روحي
-حجيتها وكمت شوفي أنه راح اقدم شكوى واگول للقاضي
ماريد اخبار منج وحتى على طلبج ادخلج حبوب هم اگله
في احسن الج تكفين مني ليش تنحكمين حكم ثاني .
سليمه::ههه سويها وساعتها إشارة مني يجرونج
من حظن الباشا مثل مايجروني الشعرة من العجين
-اذا بيديج لاتفثىين اشريلهم ،، هزت راسها تمام وأنه
توجهت للباب صاحت وراي
سليمه::ترى محابس يتانج بالباب
-درت باوعتلها ضحكت بمكر واشرت بمعنى خابرته
هزيت ايدي مسهزئه اشرتلي تعاي تقربت بخطوات مترددة
نصدمت من مدت أيدها لصدرها طلعت باكيت الجگاير وهيه
تباوع بتجاه الكامرة الموجودة فرت ايدها حتى تراويني
شهكت من شفت الشريحه ملزوگه بضهر الباكيت
سليمه::ها شكلتي ترى قبل ماتوصلين الباب أنه ادخل للقاوش واخابرة .
الفصل الثاني والثلاثون من هنا
شكرا لزيارتكم عالم روايات سكيرهوم
