رواية أعظم خيانة الفصل الخامس والثلاثون بقلم الزهيريه
لا تحكم عليه من خلال كلامي
طالما لم تعش حياتي
ريماس/ مرات الحزن الي بالگلب يكون سوه جرح عميق لهذا علاجه مو سهل وتبقى كلمن سوه هذا الجرح كل ما شوفه الوجع يتجدد وهذا چان حالي ويه بيان شگد احبه بس لليوم جرحه الي بگلبي ما يطيب ابد وكل وما اشوفه يتجدد الوجع لهذا من شفت بيان يم الضابط من دى اخذ نسخه من القضيه رجع جدد جرحي واذكر من رفض نكمل سوه لهذا من عرض عليه نرجع سوه ما قبلت ورفضت رفض قاطع ومن طلعت من المركز احس روحي مخنوگه
گوه تحملت اوصل للبيت بحيث گمت بسّ أتقيأ من هدئت نفسي رجعت گعدت على فراشي أريد انام اجتي ام زهراء وهي بيها طبيعه تحب كل شي تعرف وحچيتلها على الصار
ام زهراء/ شوفي ريماس طالما رفضچ لان عندچ ماضي ما انصحچ ترجعيله صدگيني ما يوم راح ينسى انه چنتي بحضن عمه او غير عمه بمرور الوقت تروح السكره وتجي الفكره وراح يكرهچ بقناعه وساعتها تشوفين الويل منه وتكونين ضيعتي المشيتين لا انتي سافرتي ولا انتي ارتاحيتي بحياتچ ويا بنيتي روحي سافري وعيشي حياتچ وهاي فرصتچ من ضيعيها من ايدچ والله تعضين اصابيعچ ندم
ريماس/ اعرف خاله هو بنفسه گال اني شكاك وحياتچ صير جحيم ويايه شنو الي تغير هسه شنو ماضي تغير بالنسبه اله لا ما ارجع ابد
وبعدها عبرت ايام عاديه واجى يوم الي نروح بي للجوزات وأخذت اخواتي ورحت ويه عمي احمد للجوزات وكلمنه الجوزات وبقى موعد الاستلام بعد 10 ايام واجى راكان خطبني من عمي احمد ومن اجى راكان چان يوم جمعه لهذا بقى بفندق إلى يوم الاحد رحنه للمحكمه وسوينه طلب زواج وحولونه على تحليل الدم واخذنه تحليل الدم وهم انطونه موعد لاستلام التحليل لهذا راح راكان لدهوك ومن يجي موعد نتيجة التحليل يجي
وكملت 10 ايام واستلمنه الجوازات وهاي چانت احلى فرحه بديت اخلي رجلي على الطريق الصح
وطلعت نتيجة التحليل مال الزواج قبل ما تطلع نستلم الجوزات بس راكان ما قبل گال تطلع الجوزات واجي على التحاليل ونعقد
وبس استلمت الجوزات بلغت راكان وبخلال 3 ايام اجى راكان واستلم نتيجة التحليل ورحنه للمحكمه ويانه عمي احمد وتم العقد بمؤخر كلش عالي وطلعنه من المحكمه وراكان من رجعنه گدام عمي احمد لبسني حلقه وگال لعمي احمد
راكان / اني راح ياخذ ريماس شهر عسل لتركيا وهي ما يقبل يروح إلا خواته ويا نريد منك موافقه عن طريق المحكمه حتى ياخذ ريماس أخواته ويا يشوف تركيا
ريماس/ واكيد عمي احمد يوافق لأنه إذا اطلع لتركيا وحدي معناها لازم ياخذ اخواتي ويا لبيته باعتبار ماكو يمهن احد ومرته ما تقبل لهذا قبل ينطي موافقته على سفر إخواتي ويايه
و بالفعل أنطى موافقته وطلعنه فيزه الي ولإخواني ولراكان وتحدد موعد السفر الأسبوع الجاي يوم الثلاثاء واتفقنه إني راكان يجي عليه يوم الاثنين حتى اشتري حاجات إلي واخواتي هم محتاجات غراض حتى نسافر يوم الثلاثاء وأني صار عليه حامل 2 ونص وچان يوم يوم خميس يعني قبل موعد السفر ب 4 ايام الظهر ندگت الباب
طلعت صار گدامي بيان گال / السلام عليكم اريد احچي وياچ
ريماس / عليكم السلام بلا زحمه اني مو گتلك إذا تريد شي تبلغ عمي احمد وهو يبلغني
شو هذا بحركه مفاجأه گبل دفع الباب ودخل وسد الباب ورا ورجع لزم ايدي اليمنى
بيان / لابسه حلقه شنو نخطبتي
ريماس/ لا وانت الصادگ ازوجت لانه تم العقد
بيان / وليش ما بلغتيني
ريماس/ وليش بالخير أبلغك شنو ولي امري انت
بيان / بس اني احبچ ريماس والله
ريماس/ شنو نسيت اني شنو اني عندي ماضي وانت شكاك ما راح نگدر نكمل سوه خلي كل واحد يروح بطريقه افضل
بيان / راح أتغاضى عن اي شي من ناحية ماضيچ
ريماس/ صدگني اي حچي بعد بهذا الموضوع ما يفيد إذا جاي على هذا الموضوع جاوبتك توكل بالله
بيان / لا ما جاي على هذا الموضوع اجيت على موضوع ثاني أغاريد الله يرحمها قبل ما تموت كتبت وصيه موصيه بيها الچ جزء من فلوسها تعالي استلميهن ولو ما اصور ينطوهن الچ باليد لانه انتي قاصر لهذا تتحول الفلوس للقاصرين تردين يوم الاحد تحضرين وبالعافيه عليه زوجچ بعده ما ماخذچ أجته كومه فلوس
ريماس/ هو رجله خضره عليه وجهه السعد عليه اني اريد اجهز روحي يوم الاحد ما فارغه عمي وصي عليه هسه اتصل بي وهو يروح يكمل الاجراءات هذا كل العندك ارجوك هاي ثاني مره أعيد الكلام لا تجي هنا اي شي عندك بلغ عمي وهو يبلغني وما بقى شي راح انتقل للعيش ويه زوجي بدهوك يعني حتى بعد إذا تجي ما تلگاني مع السلامه
بيان / خلاص بعد ما آجي ومبروك والله يسعدچ
ريماس / راح بيان بس عافني گلبي يدگ الف دگه بالدقيقه چنت اتمنى اسمع هذا الكلام منه قبل من چنت عايشه ويا بس فات الأوان وحبي لبيان مثل النار جوه رماد من اشوفه يطير الرماد وترجع النار تتأجج مره ثانيه
وبعد ما راح بلغت عمي احمد بكلام بيان وهو گال انه راح يتابع الموضوع اما اني يوم الجمعه ابو زهراء جاب جماعه للبيت واتفقت وياهم على الايجار وانه يستلمون المفتاح يوم الثلاثاء من ابو زهراء
وابو زهراء اتفقت ويا يستلم الايجار ويحوله الي وشكرته من كل گلبي على كل الي سوا النه
ويوم الاحد اخذت اخواتي ورحنه لسوگ اشترينه كل الي نحتاجه من ملابس ومواد تجميل واجى يوم الثلاثاء راكان وبيومها چان عمي احمد وزوجته جاين يمي وام زهراء من حضنتها ظليت ابچي لانه چانت بمثابة امي اما عمي وزوجته چان توديعي الهم طبيعي لانه ما فتره من عرفته لعمي
واخذني راكان أني واخواتي لمطار بغداد وضربات گلبي تسارع گد ما فرحانه انه راح اطلع خارج العراق وأبدي حياة جديده وبعد التدقيق على كل مستمسك نقدمه وما صعدنه لطياره إلا بعد طلعان روح وانطلقت بينه الطياره نحو حياة جديده
وبعد وقت ما اعرف شگد وصلنه لتركيا بس حمدلله الاجراءات ما چانت مثل اجراءات إلي بمطار بغداد وطلعنه من المطار رحنه بمنطقة بتركيا تكثر بيها الجاليه العراقيه وراكان مأجر شقه بيها وبقينه تقريباً 3 ايام راح راكان لسفاره يريد يطلگني وبلغهم انه طلگني طلاگ تعسفي لهذا غصبن عليه يدفع الي المؤخر بس قبل ما يرجع للعراق هو ساعدني عن طريق ناس يعرفهم قدمت لجوء على منظمة اليو ان وانطيت حتى اوراق قضية اختطاف اخواني وبعد ما رجعوا وقضية اختطاف اخواتي وشلون حرروهن من الخاطفين وبقى لازم انتظر قبول اللجوء وشوكت يطلع اللجوء الله اليعلم
وهو رجع على العراق واني فتحت حساب مصرفي بتركيا وبوقتها ابو زهراء حولي ايجار البيت مال 3 اشهر وراكان حولي المؤخر مالتي وأنطاني حساب عليه حولت الفلوس وبس اخذت نسبتي
وبقيت بتركيا طبعاً شگد ما اگول تركيا حلوه قليله بحقها وحياتنه بيها هادئه ومر على وجودي بتركيا 3 اشهر وبلغوني منظمة اليو ان انه نقبل لجوئي على ألمانيا حتى الجاليه العراقيه الي ويايه كلها صارت تهني بيه شلون نقبل اللجوء مالتي بخلال 3 اشهر وكلها اعتبرتني صاحبة احسن حظ
وبخلال فتره اسبوعين تم نقلنه لألمانيا وانطونه شقه وكل شهر أني واخواتي النه راتب وتواصلي ويه ام زهراء ما انقطع ابد وهنا بألمانيا لكوني حامل بقانونهم لازم شهرياً أراجع الدكتوره واذا انسى الموعد همه يتصلون بيه وهذا قانون لازم انفذه وصلت نهاية الشهر الثامن من اتصل عليه رقم غريب دولي ومن رديت چان بيان متخبل لكوني طلعت خارج العراق وما بلغته وكذبت عليه
بيان / طبعاً أكثر الناس دائماً يشوف انه هو افهم من الأصغر منه بس اكو مراتٍ اشخاص رغم صغر عمرهم بس والله الذكاء العدهم يصفنوك على زمانك بذكائهم وهذا چان ينطبق على ريماس من اخذت نسخه من القضيه گلي فرقد بوقتها هاي راح تقدمها لمنظمه بس اني ما صدگت گلت واذا قدمتها لمنظمه شنو الفايده الي راح تعود عليها بس طلع مخططها اكبر من هذا الشي وصدگ ذكيه ولعبتها صح واحنه من نفتحت الوصيه مال أغاريد وطلعت موصيه جزء من فلوسها لريماس ومن رحت عليها بس تفاجات انه ما اهتمت لا لفلوس ولا توسلاتي انه نرجع سوه وتخبلت انه طلعت مزوجه
لهذا ما بيدي حيله ابتعدت عنها وربي يشهد ابد ما فارگت دماغي دقيقه وحده بس شسوي استسلمت لأمر الواقع انه البنيه تزوجت بس بعدها كرهت كل النسوان وقررت اعيش حياتي وحدي
وسبحان الله اني لكوني من صدگ ردت ريماس زوجه الي وهي ما رادت ونيتي صافيه الله كشف المضموم بعد شوفتي لريماس ب 5 اشهر اتصل عليه فرقد وگال تعال اريد احچي وياك بموضوع
اني تعجبت بصراحه فرقد من آخر مره چنت يمه على مود ريماس صار تواصلنه بس على الموبايل وكل بين فتره وفتره لهذا تعجبت واني ما چذبت خبر ورحت وهو من رحتله چان بالمركز ويريد يطلع لهذا عزمني على مطعم ومن وصلنه لمطعم تغدينه ومن دى نشرب چاي گال
فرقد / طبعاً اني عندي يقين انه الگحبه من توب صير گواده
بيان / يعني شنو سيدي ما فهمت
فرقد / تذكر ريماس
بيان / سيدي هو أني ناسيها حتى اذكرها ما ناسيها
فرقد/ حلو هاي احنه مو حررنه اخواتها من عصابه
بيان / اي صح
فرقد/ زين أبشرك ريماس نفسها استعانت بالعصابه نفسها حتى تطلع خارج العراق شگد نغله لعبت على الطرفين علينه وعليهم شوفها شگدوتها فرت زلم مشوربه والداخليه
بيان / شنو خارج العراق هي زوجت بدهوك
فرقد / والله ماكو احد على نيته غير بس انت قبل اسبوع لازمنه واحد كردي اسمه راكان هذا يتفق ويه بنات ازوجچ واخلي مؤخر عالي الچ واطلعچ خارج العراق واطلگچ وارجع للعراق احولچ فلوس المؤخر العالي وانتي حولي على حساب انطي الچ يعني غسيل أموال فهمت ومن ضمن الاسماء الي محول الهن مهر عالي ريماس يعني سوت هذا كله حتى تطلع خارج العراق ريماس مو بالعراق طالعه
بيان / تخبلت شنو خارج العراق شنو هاي اللعبه لابليس ما تخطر لهذا اتصلت بعمها احمد وبلغته بكل كلام فرقد بس هو اكد انه كل شي ما يعرف عليها وانه من يتصل بيها تگله اني زينه وانه هي بدهوك واخواتها زينات
ونهيت اتصالي ويه عمها احمد وبلغت فرقد بكلامه عمها وسالته انه ريماس تعتبر شريكه ويه الكردي
فرقد/ هي اكيد شريكه وشوكت ما تدخل للعراق راح يتم إلقاء القبض عليها
بيان / بقيت اغلي معقوله هاي هسه بتركيا زين شلون سوت هيچ لهذا اذكرت بيتها شلون اجرته وهي مو بالعراق شلون تستلم الايجار استئذنت من فرقد ورحت على بيتها شايط دگيت الباب طلعلي رجال ومن سالته على ريماس صاحبة البيت گال اني مؤجر رجعت سالته شلون تدفع ايجار لصاحبة البيت وطلعت هويتي اله حتى يعرف اني ضابط ويجاوب صدگ گال اني أنطي الأيجار لأبو زهراء طلع جيرانهم الي يصفهم هو ابو زهراء وسبحان الله من دگيت الباب طلعلي ابو زهراء بنفسه
گتله / اني ضابط من الشرطه جاي اسال على ريماس شلون تنطيها فلوس ايجار بيتها وانصحك تحچي الصدگ لانه ريماس متهمه بقضية غسيل أموال واذا ما جاوبت الصدگ تعتبر شريكها
واني احچي طلعت هويتي وشوفتها اله وهو وجهه گام ينطي ألوان
ابو زهراء/ والله سيدي ما اعرف شي اني هي طلعت ويه زوجها لتركيا وچنت احول فلوس الايجار لتركيا بس صار فتره صرت أحولهن لالمانيا
بيان / انوب خبلني گتله / شنو لالمانيا يعني هي هسه بألمانيا
ابو زهراء/ اي سيدي قدمت لجوء بتركيا ونقبل لجوئها على ألمانيا وراحت هي وأخواتها
بيان / هنا صدگ صفنت على ذكاء ريماس لهذا طلبت منه رقمها بس اخذته منه رحت صعدت لسيارتي اتصلت بيها وما خليت كلمه غلط وفشار ما گلتها
ريماس/ بعد عندك شي ما گلته من غلط وفشار أسمعك
بيان / بس گليلي ليش هيچ سويتي بيه انتي هسه عليچ القاء قبض بالعراق شوكت ما تدخلين العراق ياخذوچ لسجن
ريماس/ وانت منو گلك اريد اسمع اسم العراق حتى ارجعله انت غلطان للموت ما اخلي رجلي بالعراق بعد هنا عايشه احسن عيشه مرتاحه شعندي بعد بالعراق بس اخواتي وهذني هنه ويايه شنو بعد قبل ما انهي اتصالي بيك عندك نت
بيان / اي عندي ليش
ريماس / افتح كاميرا اريد أشوفك شي
بيان / تعجبت من طلبها بس مع ذلك فتحت كاميرا وياها وهي وجّهت الكاميرا على جسمها وچانت بطنها چبيره لانه أواخر حملها تخبلت شنو حامل
ريماس/ اكو شي اني ما گلته الك اني من طلعت من العراق چنت حامل منك عليه شهرين ونص وما بقى ايام واروح اسوي عمليه قيصريه بيه توأم ولد تريد دزلي مستمسكاتك اسجلهم بأسمك ما تريد هنا بألمانيا يسمحولي اسجل الأطفال باسمي
بيان / هنا وگفت كل كلمات العالم بالساني ما اعرف شنو اسوي ولا حتى شنو احچي وهي غلقت الخط بوجهي وبعدها عرفت انه ولدت توأم ولد ورسلت مستمسكاتي الها عن طريق السفاره وتسجلوا الأطفال باسمي ومرت هاي السنين كلها وعرفت ريماس دى تدرس وحتى اخواتها هم دى يدرسن اما ولدي التوأم صار عمرهم تسع سنوات واني ما شايفهم وهاي چانت ((أعظم خيانه ))
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
