رواية جذبني فمك البني الفصل السادس والثلاثون 36 بقلم عبير إدريس

قبل لاتقرأون البارت اريد انوه على المقدمه النزلت بدايه الرواية..

اليوم راح افك اول شفره منها ، انتو تصورتو المقدمه تخص سيلين وادهم فقط ( لا تخص كل ابطال القصه واني دمجتها بهذا الشكل هواي بيها الغاز وشفرات اليوم تقريبا اكدر اكول نحلت اول عقده منها ) ( المقدمه المضبوطه تلكوها بالواتباد )

قراءه ممتعة...

___

قالت له

كيف تناثر حبنا بين الهواء وتبخر

ليتنا نستبدل ملامح حبنا القديم

بملامح حب جديده

وبذاكره ملونه بعيده عن الابيض والاسود .

اجابها

اتقصدين خاليه من التعتيم

وبعيدة عن الحزن والمشاعر الرتيبه

اجابته

نعم وتكون بعيده عن الوجوه الشاحبه كبسمه عميقة على ثغر طفل مشرد فرح بقطعه نقود صغيرة عندما وجد من يربت على قلبه بحب ويقول له مبتسمآ افرح فأن الحياه بخير ....

اجابها.

لم يكن حبنا مستحيلاً ولم تكن حياتنا بتلك الصعوبه

فقط لو أنك مددتِ لي يدكِ قبل ان تبعديها عني و

قبل ان ينطفئ حبكِ بداخلي فقط لو احببتي قلبي كما احبكِ وعاملتهِ كما يستحق

كنتُ اقرب منكِ اليكِ

كنتُ على بعد شهقة منك

قالت له

والان بعد السماء عن الارض ...

قال لها

اخبرتك عن عورات قلبي المتعب دونآ عن الجميع

وكتمت الألم بصدري المرهق وسترت سوأته

لكن فضحني الحنين المتعب

وجعلني ابوح لكِ عن داخلي بتهكم عاشق .

كنتِ الوطن الوحيد الذي اختاره قلبي ،

لازلت كل يوم احتفل بحبك بيني وبين دمعتي واهاتي وحزني ، انتظرت منكِ رسالة وربما تكون اشارة قد تصلح بيننا وتكون بدايةً جميلة ولكن كانت !!!!!!!!!!

بقلمي عبير ادريس

_________

(الحاضر)

بغداد ( شقة سيلين )

جنت نايمه حارة الدنيا كعدت عطشانه احس ريكي ناشف سمعت صوت اكثر صوت اكرها بحياتي ويخبلني يخليني افقد اعصابي صوت الماء وهو ينزل بوتيرة رتيبة يشد على اعصابي كأنه نقار الخشب عندما ينقر في شجرة السنديان ...

خليت ايدي على اذني وكمت طلعت من الغرفه و اعصابي ترجف ماعرف من التعب لو قله النوم لو قله الاكل ...

رحت للمطبخ وسديت البوري ضل ينكط نفس الشي صرت اعصاب كمت اضرب حيل على السنك بدون وعي اكثر صوت دمرني وتلف اعصابي هو صوت المي اكثر فتره كرهتها بحياتي هيه الفتره اللي تعرضت بيها لعذاب نفسي تدمرت وهذا جان نوع من العذاب لهذا ما اتحمل ولا اطيق صوت المي مرات من اغسل مواعين اخلي سماعات بأذني واعلي الصوت يلا اكدر اغسلهن لان مجرد اسمع صوت قطرات المي ترجع بيه الذاكره للأيام السيئه اللي عشتها ...

وهاي جانت طريقه العلاج اللي ادهم علمني عليها علمود اكدر استخدم المي بدون ما اتنرفز واسترجع ذكرياتي السيئة البس سماعات واسمع اغاني، مرات من اسبح على اعصابي اريد بس اخلص ومرات ارجع تعبانه وفكري تعبان لو ضايجه من شي اكدر اضل جوه المي فتره لان بالي مشغول بشغلات اكبر واكثر متعبه من صوت قطرات الماء.

مكدرت اسمع اكثر رجعت للغرفه اخذت موبايلي اتصلت على ابو عبد جانت ساعه بتلاثه بليل حتى مهتميت خاف عيب لو نايم بس اريده يجي ويخلصني من هذا الصوت جاوبني..

ابو عبد: اهلا بنتي خو ماكو شي..

سيلين : اسفه اتصلت هسه بس اريد منك شغله اذا تكدر و اذا ما تكدر عادي بس اعصابي كلش تعبانه...

ابو عبد: خير بنتي كولي اذا قدرت اكيد ما اقصر...

سيلين : عمو فدوة البوري مال السنك كاعد ينكط واني تلفت اعصابي ما كاعد اتحمل الله يخليك بس تعال شوفلي حل...

ابو عبد: بس يابنتي هسه ما اكدر لا عندي عده ولا خلاط حتى اكدر ابدله ميخالف على باجر...

سيلين :عمو والله ما اكدر الله يخليك والله ما اكدر اني عندي رهاب من هذا الصوت و كلش اخاف منه ...

ابو عبد: ادري يا بنتي شلون متكليلي لازم باجر اجيب واحد يعرف لان مو شغلتي...

جريت نفس وكتله .

سيلين : هففف شكرا عمو اسفه دوختك....

ابو عبد : لابنتي تدللي

سيلين : شكرا عمو شكرا

سديت الموبايل ورحت للمطبخ اريد اسده ما كاعد اتحمل الصوت اعصابي تلفت مجرد سمعت الصوت استذكرت كل الايام السوده العشتها ومرت مثل الفلم كدام عيني لزمت راسي سديت اذني وظل الصوت يدك براسي الى ان حسيت اعصابي فقدتها تماما جان اكو كلاص مي ويمه سراحيه مديت ايد ترجف لزمت السراحيه اريد اصب مي بالكلاص مسيطرت وكعتهن و تطشر الكزاز بالكاع...

كعدت ابجي ما اعرف شنو اسوي

كمت و رحت للغرفه جبت خاولي

ورجعت للمطبخ لفيته على البوري خف الصوت احسن وخليت الطاسه جواه ورحت للغرفه مددت اعصابي ترجف جسمي يرجف حضنت نفسي ونمت...

ظليت صافنه ودموعي تنزل شنو اسوي خسرت شغلي وراح اخسر سكني ماعندي ادفع فلوس الشهر الجاي واضافه لهذا الدين اللي اخذته من رشا ولازم ارجعه اووف ياربي رحمتك ...

ماعرف شكد مر من الوقت بس اللي اعرفه تعبانه كلش وضايعه ضليت بفراشي لثاني يوم اندكت الباب الصبح رحت فتحته ام عبد....

سيلين : صباح الخير خاله..

ام عبد : صباح النور يمه جيت انطيج خبر راح يجي ابو البواري اني عبالي انتي بالدوام...

سيلين: لا خاله بطلت

ام عبد : يااا ليش..

سيلين: اني نفسي ما اعرف ليش..

ام عبد : يلا خاله الله كريم ما تظل هيج ان شاءالله تلكين شغل وبين ما تلكين اي شي تحتاجيه اني عندج وصيني شنو تردين مسواك مخضر لحوم اي شيء كولي وما قصر .

سيلين : خاله حشاج من التقصير الله كريم ان شاء الله تدبر واذا احتاجيت شي اكيد اجي عليج..

ام عبد : يلا يمه تعالي يمي تريكي ولبسي حجابج بينما يكملون...

سيلين: عاشت ايدج..

ام عبد: يلا واكفتلج..

وكفت بالباب واني طبيت بدلت وطلعت وياها تركت الباب مفتوح مثل ما طلبت خاله ام عبد على مود عمو و الرجال بسرعه يفوتون رحنا للشقه مالتهم جان ماكو احد الولد طالعين وبس اني وام عبد مددت على القنفه ضليت افكر شنو راح اسوي وره شويه اجتي ام عبد وشايله صينيه الريوك خلتها كدامي و كالت ..

ام عبد : كومي اكلي فكي ريكج..

سيلين : ما اريد ما اشتهي.

ام عبد : كومي كومي بدون كلام..

مديت ايدي توني اكلت اول لكمه دك موبايلي باوعت نسرين تركت الصمونه من ايدي وجاوبتها اول ما كالت الو نترت بيها.

سيلين : وييييييينج من اول البارحه لليوم اتصل وماكو..

نسرين : على كيفج موبايلي خلص شحن وعفته بالجنطه والتهيت بالبيت اليوم يلا شحنته.

باوعت على ام عبد تباوعلي..

سيلين : لحظه واخابرج سدي ، خاله من رخصتج شويه واجي.

ام عبد : براحتج يمه.

اخذت موبايلي ورجعت للشقه مالتي سمعت صوت ابو عبد بالمطبخ دخلت اخذت سويج السياره ومفتاح الشقه ونزلت اركض صعدت بالسياره رجلي ترجف ايدي ترجف اريد اسيطر على اعصابي ماكدر رجعت ذيج سيلين الضعيفه الخاويه..

لزمت موبايلي دكيت عليها جاوبتني.

سيلين : سالفه الشحن متعبر عليه المهم راح اعبرها الج بس كليلي وين محمد اريد اشوفه.

نسرين : اليوم العصر تعاي شوفيه.

سيلين : نسرين اذا كذبتي هلمره اشكيج لرب العالمين لان ماعندي غيره ..

نسرين : اشكرج هاي اني صديقتج وهيج تحجين ويايه.

سيلين : اشوف محمد اول واتأكد ذاك الوكت اذا احساسي غلط اعتذر منج الف اعتذار ماشي.

نسرين : ماشي...

رجعت راسي على الستيرن وغمضت عيني سمعت نقرات خفيفه على جامه السياره الخلفيه ، فتحت عيني التفتت ، ولد صاعد على ماطور واكف وره سيارتي مباشرتآ بس ممبين غير ضهره ردت انزل بس خفت كلبي كام يدك سريع معقوله هذا ادهم ، ياربي تصرفاته مو مال دكتور راكز مو انت العرفتك مو انت ليش هيج كاعد تسوي بيه فهمني ، فتحت الباب ردت انزل حرك الماطور وراح ، بعدين كلت جوز هيج واحد واني كمت ابالغ بحيث اي تصرف واي حركه اشك هذا ادهم..

كمت اعيش شعور الوعي واللاوعي لالا الاضبط شعور الهلوسه كمت اهلوس بعز النهار وهاي حاله من حالات الجنون الخفيف يعني اكدر اكول بدايته قاريه عنه هواي وراح اصير هيج قريبا ..

خليت ايدي على راسي كمت اردد ايات بكلبي درت وجهي على باب العماره انتضر شوكت يكملون ضليت اباوع لحد ما نزلو ،

نزلت من السياره قفلتها ودخلت للعماره صعدت لشقتي ، سديت الباب ورحت للمطبخ اباوع هوووسه كزاز مال البارحه على اللويصه مال المي واثار الشغل مال ابو البواري نظفت المطبخ شلون مجان ، سويتلي لفه على السريع اكلتها لان جسمي يرجف واريد اتقوه لان ورايه مواجهة صعبه ...

احتاجيتك تقويني يا ادهمي وينك القريب الغريب وينك وينك قررت قبل لا اروح الهم واواجهم ازور طبيبي النفسي لان عندي احساس بيني وبين الجنون خيط بسيط مجرد ينقطع افقد التركيز ومن ثم الادراك ونهايتآ بالجنون ...

خابرت على السكرتيره نطتني موعد ساعه ٣ دزيت مسج لنسرين كتلها الموعد ساعه بيش كالت ساعه ٦ ، ..

كلش زين عندي وكت هووووواي...

انتضرت الوقت يمشي على اعصابي صارت ساعه ٢ وربع كمت بدلت اخذت جنطتي وطلعت متوجهة لعياده الدكتور وصلت صفيت السياره اخذت جنطتي والموبايل نزلت وكفت كبال العياده صافنه واقره بالاسم المكتوب ...

الدكتور النفسي / لعلاج الامراض النفسيه وحالات الجنون الصعبه ......وووو كليشه طويله ....

مشيت خطواتي بأتجاه العياده شبهتها بأول خطوات الطفل من يكوم يمشي هيج جانت صعبه وثكيله ...

سمعت صوت الموبايل اجتني رساله فتحتها من ادهم ، ماعرف افرح لو ابجي لو اخاف لو شنو اسوي قريتها مكتوب.

( اللي كاعد تحسين بيه اذا سولفتيه هسه ما راح يفهمج لان انه برمجتج مثل ما اريد ، مثل ما جنتي حقيقية وياي لدرجه الكذب وخليتيني اشوف الحقيقه بوضوح حلم والاصح شي اشبه بالحلم وهذا الحلم مو حقيقي ومشكله الاحلام اللي نعيشها متتعدى جزء من الثواني بس انتي عيشتيني بيها شهور وايام مثلت انه صدكتج ومثلتي انتي حابتني ، غرورج بنفسج نساج انه منو ؟؟؟؟

انه ذيج القنبله التركتيها خلفج موقوته وتوقعي بأي لحظه تنفجر هاي القنبله اسمها القريب البعيد....

قريب منج لدرجه اشتم نفسج التتنفسيه

بيني وبينج بعد شهكه ، وبنفس الوقت بعيد عنج بعد النجوم عن الارض..

رحله علاج سيئة سيلينتي )....

حلكي ناشف صارت عندي صعوبه بالبلع مكدرت ابلع ريكي خفت لا اختنك بيه .. ضليت اباوع منا ومنا الشارع بيه ناس وبيه سيارات وين الكاك يعني وينك اذا قريب عليه اطلع شوفني نفسك عاتبني لومني اسمع مني حتى لو متفهمني بس الاهم افرغ اللي بكلبي لان وصلت حد الاختناق بالنفس....

هيج هنت عليك حتى لو جنت ما استاهل بس معقوله هيج نسيتني ونسيت حبك المجنون الي...

_____

(الماضي)

ايفين

بعد ما صار تراشق بالكلام بين الجبابره هيج شبهتهم مثل الجبل واحد واكف كدام الثاني بس جبل مليان خضار ومي وحياه والجبل الثاني صلد مصحر جاف مايل للون الاسود ..

فهد نهى الكلام بكلمه جانت اشبه للهمس بينهم ما سمعتها عافه واجه متجه للبيت جنت واكفه باب المطبخ وخرني بطرف اصبعه حيل ...

وخرت وباوعتله صفح انداريت اشوف عمو وين

من شافني اباوعله اجه وكف كبالي فرك وجهة وضل يستغفر بعدين نتر بيه و لزمني من زندي حيل وكام يهز بيه اول مره يسويها وجان مبين الخوف بعيونه كال..

ادهم : شنزلج هاااا شنزلج جووووه مو مانعكم تنزلون وفرتلكم كلشي ليش نزلتي اختج مو نايمه انتييييي ليش ما نمتي وياها تدرين كلش زين بيت بيه شباب تنزلين ليششش و تحرجيني وتحرجين نفسج حلو من عرضتي نفسج لهيج موقف وسمعتي هيج حجي انه ليوين اضل اعلم وافهم بيج ليوين فهميني انتي شنو متتعضين متاخذين لا عبره ولا درس من تصرفاتج الخطأ ....

ايفين : ضجت وردت اشتم هوه.

عاط بيه....

ادهم : الهوه اللي يتنفسه فهد ملووووث ميصلح تستنشقوووه سمعيني ماريده يلمحج بنضره وحده وسمعي كلامي شنو اكول تسوووووووين يعني شلون اعوف دوامي واكابلكم واكعد ايفييييين تره طلعتيها من ماعونها وكوه سااااااكتلج ....

دنكت راسي وبجيت.

ايفين : عمو اسفه مافكرت هيج والله.

فرك وجها ونصت نبره صوته وكال...

ادهم : فهد خطر عليكم افهميييني الله يخليج مو ما اكدر احجي كلشي ياالله شلون ورطه هاي ،،

ايفين صبرو بين ماشوف حل عقلي راح يوكف ويصير بيه شي ياربي سترك.

ايفين : هاهيه عمو ما انزل بعد

ادهم : ابد ابد متنزلين ابد

ايفين : ابد هذا هو.

ادهم : صعدي فوك بسرعه وقفلو الباب عليكم هذا مو صاحي.

ايفين : اي

صعدت اركض رحت للغرفه علكت الضوه حست عليه سيلين فتحت عينها وكالت

سيلين : شكو شبيج وين جنتي ؟

جاوبتها بصوت يرجف مليان خوف من التهديد السمعته.

ايفين : جنت جوه بالحديقه ووو.. سكتت

عكدت حاجبها سيلين وكالت.

سيلين : اي وشنووو وبعدين انتي شنزلج عمو شكال..

ايفين : باعي نزلت لان اختنكت والله ماعندي قصد ثاني وبعدين اجه فهد الحقير سد عليه الطريق مخلاني افوت بعدين ضل يسمعني بالحجي فيفو واسم حركي ومدري شنو سيلين لتباوعين هيج تره ما اكمل..

كامت من مكانها واجتي وكفت يمي.

سيلين : عيدي عيدي وين جنتي ومنو حجه وياج

دنكت راسي وكتلها.

ايفين : فهد..

ضربتني راشدي واول مره تسويها ويايه لزمت وجهي وبجيت حسيت امي ضربتني اني امي سيلين مو تماره صح بيناتنه فرق بسيط بس اهتمامها بيه اهتمام ام..

سيلين : انتي تردين تخزين عموووووو بين اهله لج شكلج مو طلع شعر بلسانه ويوصي ويحجي لتنزلون ديرو بالكم من صخمام بين ماشوف حل عمج يريد يقطع الفوك عن الجوه بحايط ويعزل بابنه وحد وتخيلي حجم المصيبه اللي يريد يعزلنه عنها وانتي تجين تتمخطرين بنصاص الليالي من اني وعمو نايمين تروحين تشتمين هوووى مو افونه مووووو لج تضلين بت تماره ولا تصيرلج جاره.

ايفين: لتقسين عليه بالكلام مسويت شي غلط.

سيلين : ياالله ياربي كل هذا وتكول ممسويه غلط مو انتي استهانتج للوضع اللي احنه بيه وضربج لكلام عمو بعرض الحايط هو هذا الغللللللللطططططط ...

ايفين : يكولي انتي بكتي فلوس من ايمن وادهم.

حجيت هيج حتى تسكت ومتضل تلوم بيه صفنت بوجهي عكدت حاجبها وهمست.

سيلين : شمدريه ؟

ايفين : ماعرف هو منو يدري بس اني وياج وعمو..

سيلين : وشنو عود شكيتي بعمو ادهم هو حاجي.

ايفين : ماكو غيره..

سيلين : كل عقلج انتي.

ايفين : اي لعد منين عرف.

سيلين : اذا سمعج عمو وتأذه من كلامج العب بيج لعب.

ايفين : لعد منين عرف شنو جني لو يعلم الغيب..

سيلين : وشصار بعدين احجيلي..

حجيتلها السمعته وبعدين كتلها ..

ايفين : لج لو تشوفيهم عمو ادهم وفهد واحد يناوش الثاني بكلام يكسرون بيه العظم بس اللي استغربته عمو ادهم يجاوب كلمه كلمتين بالزايد بس فهد متمكن من نفسه ويحجي بحيل صدر مثل واحد لازم على واحد شغله جبيره.

سيلين : دوختيني بس اللي فهمته من كلامج احنه نقطه ضعف عمو .

ايفين : صح.

سيلين : لهذا باع بيته وشال وهسه راح يستغله فهد ويضل يضغط عليه بسببنه .

ايفين : شنسوي لعد نرجع لبيت جدج.

سيلين : باع هاي.

ايفين : لعد ؟

سيلين : ماعرف ماعرف عقلي وكف..

ايفين : باعي سألي عمو باجر منين عرف فهد اني بكت..( سرقت)

سيلين : ماعندي جرأه أسأل واستفسر منه .

ايفين : ليش ؟

سيلين : شنو ليش اكيد راح ياخذ على نفسه واني مستحيل اخليه بموقف يكعد يبررلي كلام فهد التافه عمو اكبر من هيج ميسويها..

ومن بعد هذا الموقف بلش الضغط علينه من اهل ادهم شويه من امه شويه من فهد كل يوم يلوحنه رذاذ من السم وطشار من الكلام ،

وكل يوم اصيح الله يعينج ياعمه شلون عشتي وياهم وشلون تحملتي متنلام من جانت تكول فهد متعرفوه وعينج على اختج منه هذا شلايتي وابو سوك عايش عمره بين السوك والداخليه ، كل يوم واني كاعده بهذا البيت يتردد كلامها ابالي وبيوم صعدت ام ادهم فوك يمنه جنه كاعدين بالاستقبال اجتي وكعدت عمو جان توه طالع .

فردوس : ها سيلين شقررتي ؟

سيلين : على شنو خاله ؟

فردوس : ليش ما كلج ادهم.

سيلين : على شنو؟

فردوس : جاييج خطابه وايمن يريد ايفين علمود تعرسون سوه واريد ازوج ادهم وراكم..

سيلين : خلي يتزوج لازميه احنه هههه

فردوس : منو تقبل تتزوج واحد عايش ويه بنات ثنين شابات ومحرمات عليه ، انتي شنو متحسين ماعندج احساس شلون تقبلين على نفسج تعيشين ويه واحد غريب عنج متربطج وياه صله دم ولا قرابه..

دنكت راسي مكدرت اجاوبها لان كلامها صحيح.

فردوس : ايمن منا لشهرين تلاثه بالزايد يكمل شغلاته ونزوجه لاختج وانتي هم اقبلي بذوله الناس ، تره ادهم ضايج ومتحمل فوك طاقته بس يستحي يكول منا مصاريفكم ومنا يريد يتزوج بس يكول اله يتزوجن البنات يلا لان البنيه مقابله بيه من حاجيلها ظروفه.

سيلين : بس عمو مكالي..

فردوس : طبعا ميكلج احترام لمشاعر ياسه ، بس هو حجالي كلشي متشوفين شلنه من ذاك البيت لان يريد يستقر ويتزوج على اساس انتو تضلون فوك وهو يتزوج جوه بس البنيه مقبلت.

سيلين : هاهيه خاله وصلت رسالتج ماكو داعي تجرحين بينه ازيد...

فردوس : اردلهم خبر.

سيلين : لا مو هسه.

فردوس : اي هم حقج تفكرين.

راحت نزلت واني تزوهرت بجيت بجي مصاير وايفين اتعس مني بعد نعرفها تكذب وعمو ميحجيلها ابد لان مو من هذا النوع يروح يتشكه للنسوان بس شنسوي كلامها يجرح ويدك بالكلب..

بليل اجه عمو جايب مسواك وصاح عليه.

ادهم : سيلين وينكم شنو نايمين ..

طلعت من الاستقبال ورحت للمطبخ شافني عاف العلاليك من ايده وتقرب مني عاكد حاجبه همس.

ادهم : ياستار خير

سيلين : ماكو شي متعشي لو اسويلك.

ادهم : ماريد عشا ، شبيج انتي صاير شي ومادري.

سيلين: ماكو شي راح انام راسي يوجعني والمسواك ادز ايفين تسويه لان ماكدر بعد..

التفتت اريد اروح صاح سيلين عبالك ضرب خنجر بكلبي من صاح اسمي ، اني احبه حب غريب لا حب حبايب ولا عاشقين لا حب نظيف من نوع خاص بحيث هسه اتمنى التفت عليه واحجيله كلشي بس ماريد حياته تتأثر ويخسر اكثر بسببنه بدون ما التفت كتله.

سيلين : تصبح على خير باجر نحجي.

عفته ورحت للغرفه ضليت ابجي الليل كله يتكرر حجيها ابالي مثل السم صار الصبح كمت بدلت وكعدت انتضرته بالغرفه وره شويه دك الباب فتحته ، ابتسم وكال.

ادهم : صباح الخير اليوم احسن مو ..

سيلين : صباح النور.

حجيتها ودنكت راسي ومشيت من يمه نزلت الدرج طلعت للطرمه وره خمس دقايق طلع ضايج وعاكد حاجبه صعدنه بالسياره ورحنه للدوام ..

مرت اسبوعين على الموقف الصار وبيوم عمو جانت عنده محاضره بغير جامعه وداومت وحدي ، خابر على ايمن وصاه يرجعني من رجعت ، لكيت ايفين واكفه بالمطبخ تسوي اكل سألتها عن عمو كالت اجه قبل ساعه وكاعد بالمكتب ، رحت دكيت الباب صاح تعاي فتحت الباب وفتت..

سيلين : السلام عليكم ..

رفع راسه باوعلي وابتسم

ادهم: اليوم مكدرت اجيج مالحكت.

سيلين : ماصار شي وانت مقصرت دزيت ايمن ابدالك.

دنك على الحاسبه يكتب وكال.

ادهم : شلونه يومج جان ؟

سيلين : زين .

ادهم : شكو ماكو.

سيلين : ماكو بس اكو موضوع اريد احجيلك..

حجيتها وخليت جنطتي على الطبله وكعدت على الكرسي الكباله.

رفع راسه وباوعلي مهتم ..

ادهم : شنو الموضوع ؟

سيلين : عمو اكو واحد ويانه ..

حجيتها ودنكت كال.

ادهم : اي شبيه ؟ كملي..

سيلين : اجه حجه ويايه..

عكد حاجبه وتغيرت ملامحهة استرسلت بالكلام ..

سيلين : تقدملي وكال بلغي اهلج يردون يجون هاي الايام بس عمو اني كذبت عليه مكلت اني عايشه ويه زوج عمتي بنفس البيت تعرف الناس مترحم خصوصا عمتي متوفيه شلون ...

صفن بوجهي وعيونه تباوعلي بحيره حسيت روحه تريد تطلع اصابع ايده صار بيها رجفه...همس

ادهم :وانتي شنو رأييج؟

سيلين : هو الصراحه صار اكثر من مره يحجي ويايه واني جنت اصده بس اليوم كتله افكر..

اخذ نفس عميق دنك راسه حسيته توتر ، همس بصوت مخنوك عبالك طفل واخذو لعبتنه العزيزه منه وجاي يشكي لابوه وامه عليها بالضبط هيج شبهته..

ادهم : شنو سيلين ضجتي من عدنه وعيشتنه صارت متعجبج لو مليتي من شوفتنه..

سيلين : عمو مو قصدي شي انت حافظت علينه وجنت بمثابه اب بس الناس شمدريها انت هيج ويانه .

نتر ...

ادهم : شنو تحبيه ؟

سيلين : لا

ادهم : لعد ليش تريدين تقبلين بسرعه وسهوله..

سيلين : عمو كافي صار اكثر من سنتين احنه يمك وانت تصرف علينه ايفين خطبها ايمن وتروح بفالها اني شلون اضل وحدي هنا..

نتر ...

ادهم : شو انتي مدري شلون تسولفين واذا ضليتي وحدج يمي شراح اسويلج قابل..

سيلين : العفو ما كلت هيج بس كافي ثقلنه عليك هواي..

وجها احتقن صار دم..

ادهم : لتحجين شي بكيفج شو لا صارف عليج ذاك الصرف ولا مان عليج بشي انتي واختج فايديني اصلا هم ارجع الكه بيتي نظيف وهم لبسي وهم نفس وياي، وبعدين تعاي وين تعوفين مريم وهيه تعلقت بيج.

سيلين : عمو شلون فهمني اضل طول العمر هنا.

ادهم : منو هذا وشنو اسمه ومنين.

سيلين : هسه انت ليش عصبي تره هو نقاش مو عركه..

ادهم : انتي وحده ماعندج احساس ..

سيلين : عمو شبيك يعني مريم صغيره علمود اضل يمها وبعدين هنا بيت جدها بيبيتها وعماتها والاهم انت موجود يعني متحتاجني.

ادهم : شمدررريج متحتاجج بكيفج قابل..

سيلين : عمو لتصيح راح يسمعونه تره اني مكلت صديقي لو عندي علاقه بيه كلت خطبني فماكو داعي للأعصاب والتوتر..

ادهم : وكتلج مريم صغيره تكبر يلا.

سيلين : اذا مقبلت معناها كلام فهد عنك صحيح.

صفن بوجهي ودمارات كصته كامت تدك عرفت راح تلزمه نوبه صداع( شقيقه ) هدأت من الموقف لان الوضع صار مشحون مو مال الح كمت اخذت جنطتي ردت اطلع وصلت للباب كال.

ادهم : منووووووووو الخطبج اعرفه.

التفتت عليه وكتله

سيلين : عز المعرفه .

ادهم : منو هذا؟

سيلين : دكتور سامر.

اني كلت هيج لو تخبل ..

كام اجه يمي من الاعصاب الجان بيها كلت راح يضربني .

ادهم : يعني جنتي تصعدين يمي علموده موووو؟

سيلين : لتصيح الله يخليك انت ليش هيج متتفاهم..

ادهم : مو راح تخبليني شجابج على سامر اريد افهم.

سيلين : شلون يعني خطبني ومبدأيآ وافقت.

همس بصوت ضعيف مايل للبجي.

ادهم : بس هذا صديقي سيلين.

سيلين : عمو فكر وردلي خبر اول وتالي اني اتزوج واروح اذا مو هسه بعدين.

عفته ورحت للغرفه ، كعدت نزعت حجابي ودنكت راسي كمت احك بشعري بتوتر ماعرف شسوي ماعرف لا بيه اضل هنا اكثر ولا بيه اروح واعوفهم ياربي دخيلك...

مر اسبوع اني مداومت لان الوضع مشحون بيني وبينه واصلا يطلع ويروح للدوام بدون ميسألني تداومين لو لا ،

صرنه نتشاوف بالصدف لا يجمعنه مكان ولا تجمعنه وجبه اكل ، مرت عشر ايام على حديثنه جنت كاعده العصر اجتي ايفين كالت...

ايفين : عمو يكول خلي تبدل راح يجون ناس عليها..

سيلين: منو مكال.

ايفين : ماعرف بس سمعته يحجي ويه ايمن كاله دكتور ويايه بس جان ضايج كلش..

سيلين : كلج ساعه بيش يجون.

ايفين : لا بس كال خلي تتحضر اختج جاييها ناس.

سيلين : ماشي..

طلعت من الغرفه واني بدلت ورتبت وجهي وانتضرت جيتهم ، ماعندي شعور لا فرحانه ولا ضايجه بس اللي ادري بيه شي واحد اريد استقر واخلص من كلام الناس وبنفس الوقت اخلص عمو من هذا الحمل الثكيل وهم افشل مخطط فهد بدمار عمو لان احنه النقطه اللي يريد يدمر عمو من خلالها واللي ريحني اكثر قبل ٣ ايام ايمن حجه ويه عمو علمود سالفه ايفين واتفقو قبل زواجي يعقدون علمود من اعوفها هيه على ذمه رجال لهذا قررت اقبل اني هم.

صافنه وافكر انفتح الباب باوعت عمو مبدل بس وجها ميكصه السيف مغضب ومحتقن..

ادهم : كملتي..

سيلين: اي ماعندي شي.

ادهم : اجوي ..

سيلين : اي زين.

ادهم : يعني راح تقبلين هذا هو؟

سيلين : مبدئيا اي.

ادهم : عائلتهم منفتحه مو مثلنه.

سيلين : كلمن عليه بنفسه شعليه بعائلته اهم شي هو..

ادهم : طبعه يختلف عن طبعي خاف عبالج مثلي وقبلتي بيه.

سيلين : ماكو انسان يشبه الثاني بالاطباع اله ماندر يعني قبلت مو علمود يشبه اطباعك وبعدين انصدم بالاختلاف.

ادهم : فكرتي زين.

حجاها ويمكن الف دعاء والف سوره قره علمود اكله رفضت بس بوقتها مجنت اكدر ارفض اول شي قسمه زينه وثاني شي اني نفسيا مستبعده عمو لدرجه محسسته بهذا الشي بحيث مكدر ينطقها ويكلي ما انطيج لان نفسي بيج او رايدج اليه متجرأ يسويها..

سيلين : فكرت وقررت هذا هو...

فتت من يمه طلعت والتفتت عليه لكيته صافن على جربايتي..جريت نفسي بحسره قويه وكتله..

سيلين : وين كاعدين جوه ومنو يمهم اذا نزلت.

جاوبني بدون ميندار عليه.

ادهم : امي وابويه يمهم سبقيني جوه بالاستقبال.

نزلت شافتني نرمان كالت...

نرمان : انتظري هسه ماما تجي وتدخلج..

سكتت مجاوبتها وره شويه طلعت شافتني ضحكت وكالت

فردوس: يلا تعاي منتضريج.

باوعتلها بحقد هلكد كارهتها دخلت سلمت اول ما فتت رفع راسه سامر باوعلي مبتسم اني هم رديتله الابتسامه وكعدت ...

ضلو يحجون اخر شي دكتور سامر كال.

سامر : لعد ادهم ماكو اختفى..

يوسف: هسه يجي وين يروح كوم ايمن شوف اخوك وين..

راح ايمن وره شويه اجوي عمو كعد كبال سامر واني على الجهة الثانيه كعد بمكان يسطير علينه ثنينه يعني يشوفني ويشوف سامر ، بلشو يحجون واني ضليت افصل بحركاته ...

متوتر يفرك بيده لو يخلي ايده على ركبته ليوره ، ساعه يشرب مي لو يطلع موبايله يكلب بيه ويهز برجله ، اخر شي كالو خليهم يكعدون سوه يتعرفون واحد على الثاني ، اني رأسن رفعت عيني باوعت على عمو جان مدنك ورفع عينه باوعلي خزرني ورفع حاجبه مهدد يعني لتقبلين...

يوسف : يلا يابه كومو خليهم يحجون سوه اكيد عدهم اشياء لازم يتفقون عليها...

طلعو بس بعد ما عمو راد ينفجر لحد ما طلع هو يخزر بيه ، ماكو دقايق بعدنه محاجين شي ودك الباب فات وكال..

ادهم : دكتور كافي عود من تعقدون سولفو براحتكم..

سامر : هذا هو بس ردت افهم منها كم شغله وانت ما نطيتني مجال.

ادهم : الايام الجايه هووواي واليوم اعتبره مجرد زياره خفيفه تعريفيه بين عائلتنه وعائلتكم..

سامر : يعني شنو متنطي لو الك قصد ثاني ؟؟؟؟

ضل عمو ادهم مغضب وخازره ...

ادهم : ماكلت هيج كلت ماعاقدين من تعقد اكعد وياها..

سامر : هذا هو دكتور كلشي ولا تضوج انتظر بكل ممنونيه على كولتك..

ادهم : اي انتظر..

تسالموا دكتور سامر واهله ويه بيت اهل ادهم وطلعوا مجرد عبرو عتبه الباب عمو انفجر متحمل نزل عليهم ذيج النزله يريدون اهله يفهمون شبيه ليش هيج غفل فقد اعصابه ميقبل يحجي بس ضل يلوم بيهم ..

ادهم : كلت وارجع اكول يجي دكتور استاذ جامعي صيدلاني محامي ارقه شهادات البنات ما انطيهم حتى ايفين مازوجها واللي يوصل يمهن فوووووووك احرك البيت حرك على راسه وراسه الخلفه راح اطلع من طور الدكتور واحجي بثقافتكم عوفوني وعوفووو البنات تمااام لو يحتاج اعيد.

يوسف : انت عليمن تصيح وحارك دمك شو انت اللي اجيت وكلت اليوم راح يزورنه دكتور وعائلته وضيفوفهم كعدنه يمهم وطلعو جايين علمود سيلين وين المشكله..

فهد : هو هذا الخبله.

عاط بيه...

ادهم : انجب انت ...

فهد : هههههههههههه..

يوسف : فهد سد حلكك متشوووف الجو متوتر اطلع بره وانت انطي البنيه خوش قسمه ومبين خوش ولد ...

ادهم : ماعجبني.

يوسف : صديقك شلون ميعجبك.

حجه عمو بحركه كلب..

ادهم : لان صدييييقي ما انطي ..

يوسف : ليش غير افهم

ادهم : الاصدقاء من يتناسبون تخرب علاقتهم وانه ماريد اخسر صداقته.

يوسف : قابل شراح يصير انتو ثنينكم مثقفين وسيلين خوش بنيه وحبابه اكيد ماراح تسوي شي ينزل راسك ويخليك تخسر صديقك.

ادهم : متأكد منها متنزل راسي انه قصدته اله اذا اذاها راح اسكتله اكيد لا ..

بنص الهوسه سمعت واحد يهمس بصفي من التفت فهد واكف ومبتسم على حرك الاعصاب اللي كاعد يشوفه وكأنما مسرحيه فكاهيه كدامه ...

حجه واشرلي على عمو براسه

فهد : شفتيه شلون متمسك بيج يريد يضمج بغراضه هههههههههه..

خزرته ودرت وجهي ..

فهد : يعني انتي شنو تفسير تصرفاته هاي .

سيلين : معليك انت مافسرها شي ..

فهد : يعني متفسريها يحبج ويريدج تضلين يمه ..

سيلين : مرات الاب من حبه لبنته يتمسك بيها وميريد ينطيها بسهوله مو شرط مثل متفكر.

فهد : يعني تردين تقنعيني هاي المسرحيه الكدامي او حرب المشاعر مال حب اب لبنته.

سيلين : لعد شنو شنووووو ..

رسملي كلب بالهوه وبيه سهم ومن كمل رسم السهم سوه حركه بحلكه.

فهد : طخ ..

عود يعني القلب انضرب بالسهم

سيلين : مريض الله يشافيك

فهد : انه مررررريض من زمان وعجزو عن شفائي ادعي لعمج راح يفقد عقله مضل شي.

سيلين : انت ليش تكرها ..

فهد : انه

باوعتله بنضره احتقرته بيها ورجعت اباوع على عمو المفضوح بتصرفاته مكاعد يسيطر لا على نفسه ولا على حركاته ولا على كلامه ورجفه ايده وحدها قصه.

تحمحم وتنهد وكال..

فهد : انه ما اكره خلوني اكره بعمري ماغدرت احد انه انغدرت لعلمج اكثر نموذج عنيف بالكراهيه هو الانسان المغدور حب الكل بصدق وبسبب الحبهم تحول لشخص ظالم خارج عن الطريق ممكن ميرحم وممكن يكون غير انساني بعنفه ..

باوعت عليه حسيت بعيونه قصه كلش جبيره وعميقه وتروي احداث غضب اسد جريح بس تصرفاته تدل على خسه وغدر وحرت شنو اوصفه حيرني رجع كمل كلامه.

فهد : يستمد قوته ويعيد انكساراته من الآم الغادر اللي سببله الوجع بيوم من الايام.

سيلين : يعني تريد تفهمني عمو بيوم من الايام اذاك.

فهد : ممكن ذبحني انتي شمدريج .

سيلين : عمو ميسويها مستحيل دكتور بثقافته والعلم الشايله يخلي راسه براسك ويكعد يغدر بيك ويأذيك وانت اخوه شنو مصلحته.

فهد : ليش ماكو اخطاء طبيه ما سامعه طبيب يقتل انسان عن طريق الخطأ اكثر الوفيات تكون عن طريق اخطاء طبيه غير مدروسه ..

سيلين : كافي تحجي براسي حجي ما اله معنى ولا صحه واتركني بحالي معليك بيه .

فهد : روحي سأليه شسويت لفهد واتحداج اذا حط عينه بعينج وحجالج لان راح يكذب.

سيلين : كذاب كذاب كذاب زين اجي وياك جوز عمو صح اذاك بس لمصلحتك او احتمال ما قاصد اذيتك واحتمال انقهر من اذاك وتندم هاي اذا جان كلامك صحيح انت ليش هيج تسوي ومستمتع بحركان دمه..

فهد : المغدور من يصحى تصير عنده دوافع قويه للأنتقام ويكون مصمم على حمايه نفسه ويستهتر بمشاعر الغادر.

سيلين : كافي فلسفه مزيفه عمو مو هيج لو عشره مثلك يأيدون كلامك ماصدك انت كاعد تحجي هيج براسي تريدني اكرها و لو تموت ما اصدك حرف من الحجيته انت مثل الشيطان من يوسوس للبشر اعوذ بالله منك.

فهد : هههههه

عفته ورحت صعدت فوك وضليت بين اصدك وبين لا يتردد سؤال واحد ابالي معقوله عمووو ادهم هيج ؟؟؟؟؟؟؟؟

الفصل السابع والثلاثون من هنا 

شكرا لزيارتكم عالم روايات سكيرهوم